युद्धको भयानक असर
युद्ध र हिंसाको सामना गर्नु जो-कोहीको लागि दर्दनाक कुरा हो। यस्तो अवस्था भोगेका सिपाहीहरू र सर्वसाधारणमाझ यसले ठूलो असर पुऱ्याएको छ।
सिपाही
“युद्धमा थुप्रै मानिस गम्भीर घाइते हुन्छन् र कतिपयले ज्यानै गुमाउँछन्। आफूवरपर यस्ता विनाशकारी घटनाहरू घटिरहने भएकोले मनमा त्रास छाइरहन्छ।”—ग्यारि, ब्रिटेन।
“मेरो ढाड र अनुहारमा गोली लागेको थियो। मैले केटाकेटी र वृद्ध-वृद्धालगायत थुप्रैले ज्यान गुमाउनुपरेको देखेँ। यस्ता कुराहरूले मन कठोर बनाइदिन्छ।”—विलमार, कोलम्बिया।
“आफ्नै आँखाअगाडि कसैलाई गोली लागेको देखेपछि त्यो दृश्य झलझली याद आइरहन्छ। त्यो व्यक्ति पीडाले कराएको र छटपटाएको कुरा दिमागमा खेलिरहन्छ। तपाईँ चाहेर पनि त्यो घटना कहिल्यै बिर्सन सक्नुहुन्न।”—जाफिरा, अमेरिका।
सर्वसाधारण
“म फेरि कहिल्यै खुसी हुन सक्दिनँ जस्तो लाग्थ्यो। मरिएला कि भन्ने डर त छँदै छ, त्यसमाथि परिवार र साथीभाइलाई केही हुने हो कि भन्ने डरले अझ धेरै सताउँथ्यो।”—ओलेकसान्द्रा, युक्रेन।
“बिहान २ बजेदेखि राती ११ बजेसम्म खानाको लाइनमा बस्दा निकै डर लाग्थ्यो। अचानक कहाँबाट गोली चल्ने हो, थाहै हुँदैनथ्यो।”—डेलेर, ताजिकिस्तान।
“युद्धको कारण मैले आफ्नो आमाबुबा गुमाएँ। अनाथ भएकोले मलाई सान्त्वना दिने र ख्याल राख्ने कोही थिएन।”—म्यारी, रुवाण्डा।
युद्धको मारमा परे तापनि माथि उल्लेख गरिएका व्यक्तिहरूले अहिले शान्ति महसुस गर्न सकेका छन्। त्यतिमात्र होइन, तिनीहरू अब छिट्टै युद्ध र हिंसाको अन्त हुनेछ भन्ने कुरामा ढुक्क छन्। यो कसरी हुनेछ, प्रहरीधरहरा-को यस अङ्कले स्पष्ट पार्नेछ।