यहोवाका साक्षीहरू तिनीहरूको धर्मबाट हटाइएकाहरूसित कस्तो व्यवहार गर्छन्?
हामी सबै जनासित मायालु, दयालु र आदरपूर्वक व्यवहार गर्न सक्दो प्रयास गर्छौँ। यदि कुनै यहोवाका साक्षी यहोवाको उपासनामा पहिले जति सक्रिय छैनन् वा उहाँको उपासना गर्न छोडेका छन् भने हामी तिनीसित कुराकानी गर्न अग्रसर हुन्छौँ, तिनलाई माया गरेको कुरामा ढुक्क बनाउँछौँ र परमेश्वरसित फेरि नजिक हुन मदत गर्छौँ।—लुका १५:४-७.
कहिलेकाहीँ कुनै व्यक्तिले यस्तो काम गर्न सक्छन्, जसले गर्दा तिनलाई मण्डलीबाट हटाउनुपर्ने हुन सक्छ। (१ कोरिन्थी ५:१३) तर सङ्गी भाइबहिनीलाई धेरै माया गर्ने भएकोले तिनलाई मण्डलीबाट हटाउन नपरोस् भनेर हामी पहिल्यै सक्दो मदत गर्छौँ। यदि तिनलाई मण्डलीबाट हटाइयो भने पनि बाइबलमा बताइएअनुसार हामी तिनलाई प्रेम र आदर गरिरहन्छौँ।—मर्कुस १२:३१; १ पत्रुस २:१७.
कुनै व्यक्तिलाई किन मण्डलीबाट हटाइन्छ?
यदि कुनै व्यक्तिले गम्भीर गल्ती गर्छन् र त्यो गल्ती सुधार्न चाहँदैनन् भने तिनलाई मण्डलीबाट हटाउनुपर्छ भनेर बाइबलले स्पष्ट बताउँछ।a (१ कोरिन्थी ५:११-१३) के-कस्ता गम्भीर गल्तीहरू गर्दा कोही व्यक्तिलाई मण्डलीबाट हटाइन सक्छ भनेर बाइबलले तोकेरै बताएको छ। तीमध्ये केही हुन्: व्यभिचार, अत्यधिक मद्यपान, हत्या, घरेलु हिंसा र चोरी।—१ कोरिन्थी ६:९, १०; गलाती ५:१९-२१; १ तिमोथि १:९, १०.
तर कसैले गम्भीर गल्ती गर्नेबित्तिकै तिनलाई मण्डलीबाट हटाइँदैन। बरु सुरुमा मण्डलीका एल्डरहरूलेb तिनलाई आफ्नो गल्ती सुधार्न मदत गर्छन्। (रोमी २:४) तिनीहरू गल्ती गर्ने व्यक्तिलाई कोमलतासाथ र दयालुपूर्वक सम्झाउने कोसिस गर्छन्। (गलाती ६:१) यसो गर्दा उक्त व्यक्तिले आफ्नो गल्ती महसुस गर्न र पश्चात्ताप गर्न सक्छन्। (२ तिमोथि २:२४-२६) यदि बारम्बार मदत गर्दा पनि तिनी बाइबलको स्तर उल्लङ्घन गरिरहन्छन् र पश्चात्ताप गर्दैनन् भने तिनलाई मण्डलीबाट हटाउनुपर्ने हुन्छ। त्यसपछि एल्डरहरूले उक्त व्यक्ति अबदेखि यहोवाको साक्षी होइनन् भनेर मण्डलीमा घोषणा गर्छन्।
एल्डरहरू गल्ती गर्ने व्यक्तिलाई कोमलतासाथ र दयालुपूर्वक सम्झाउने कोसिस गर्छन्
गम्भीर गल्ती गर्ने व्यक्तिलाई मण्डलीबाट हटाउँदा कस्तो फाइदा हुन्छ? एउटा फाइदा भनेको मण्डली परमेश्वरको नैतिक स्तरअनुसार स्वच्छ हुन्छ र गलत काम गर्ने व्यक्तिको नराम्रो प्रभावबाट जोगिन्छ। (१ कोरिन्थी ५:६; १५:३३; १ पत्रुस १:१६) अर्को फाइदा भनेको गल्ती गर्ने व्यक्ति गलत काम गर्न छोडेर आवश्यक परिवर्तन गर्न उत्प्रेरित हुन सक्छन्।—हिब्रू १२:११.
यहोवाका साक्षीहरू मण्डलीबाट हटाइएकाहरूसित कस्तो व्यवहार गर्छन्?
बाइबलमा ख्रिष्टियनहरूलाई मण्डलीबाट हटाइएकाहरूसित “सङ्गत गर्न छोड्नू,” यहाँसम्म कि ‘त्यस्ता मानिसहरूसित खाँदै नखानू’ भनी बताइएको छ। (१ कोरिन्थी ५:११) त्यसैले हामी मण्डलीबाट हटाइएकाहरूसित सङ्गत गर्दैनौँ। तर हामी तिनीहरूलाई पूर्णतया बेवास्ता पनि गर्दैनौँ। बरु तिनीहरूलाई आदर गर्छौँ। तिनीहरू हाम्रो सभामा आउन सक्छन्, जहाँ यहोवाका साक्षीहरूले तिनीहरूलाई अभिवादन गर्न सक्छन्।c तिनीहरूले एल्डरहरूसित मण्डलीमा फर्कनको लागि आवश्यक मदत माग्न सक्छन्।
मण्डलीबाट हटाइएकाहरू हाम्रो सभामा आउन सक्छन्
यदि कुनै व्यक्तिलाई मण्डलीबाट हटाइयो तर तिनको जोडी र छोराछोरी अझै पनि यहोवाको साक्षी नै हुन् भने नि? आफ्नो परिवारसित तिनको आध्यात्मिक सम्बन्ध टुट्छ तर पारिवारिक सम्बन्ध भने कायमै रहन्छ। एउटै घरमा बस्ने भएकोले वैवाहिक सम्बन्ध, परिवारसितको माया-प्रेम र व्यवहारमा कुनै परिवर्तन आउँदैन।
मण्डलीबाट हटाइएका व्यक्तिले एल्डरहरूलाई भेट्नको लागि आग्रह गर्न सक्छन्। एल्डरहरूले तिनलाई बाइबलआधारित मायालु सल्लाह दिनेछन् र पश्चात्ताप गरेर यहोवाकहाँ फर्कन प्रोत्साहन दिनेछन्। (जकरिया १:३) तिनले गलत काम गर्न छोडे र बाइबलको स्तरअनुसार जीवन बिताउन इमानदार भई प्रयास गरे भने तिनलाई मनैदेखि फेरि मण्डलीमा स्वागत गरिन्छ। कोरिन्थका ख्रिष्टियनहरूले जस्तै आज पनि मण्डलीका भाइबहिनीले पश्चात्ताप गरेर फर्कने व्यक्तिलाई ‘दयापूर्वक क्षमा दिन्छन् र सान्त्वना दिन्छन्।’—२ कोरिन्थी २:६-८.
विगतमा मण्डलीबाट हटाइएकाहरू अहिले कस्तो महसुस गर्छन्?
विगतमा मण्डलीबाट हटाइएका तर पछि यहोवाकहाँ फर्केका केहीले कस्तो महसुस गरे, विचार गर्नुहोस्।
“जब मैले मण्डलीमा फर्किने निर्णय गरेँ, तब एल्डरहरूले मण्डलीबाट हटाइएपछिका वर्षहरूमा मैले गरेका एक-एक कुरा सोध्नुहुन्छ जस्तो लागेको थियो। तर उहाँहरूले यसो भन्नुभयो, ‘हामी तपाईँले विगतका कुरामा होइन, अगाडिका कुराहरूमा ध्यान दिएको चाहन्छौँ।’ त्यसपछि मैले ढुक्क महसुस गरेँ।”—मारिया, अमेरिका।
“म मण्डलीमा फर्कँदा भाइबहिनीहरू निकै खुसी हुनुभयो। उहाँहरू मेरो मोल गर्नुहुन्छ भनेर महसुस गरेँ। साथै मैले क्षमा पाइसकेको कुरामा ढुक्क हुन उहाँहरूले मदत गर्नुभयो। त्यसैले मैले विगतका कुराहरू सम्झेर निराश हुन छोडेँ। मलाई फेरि यहोवासित घनिष्ठ हुनको लागि मदत दिन एल्डरहरू सधैँ तयार हुनुहुन्थ्यो। यहोवा अझै पनि मलाई माया गर्नुहुन्छ र अनमोल ठान्नुहुन्छ भन्ने कुरामा विश्वस्त हुन उहाँहरूले मदत गर्नुभयो।”—मल्काम, सियरा लियोन।
“आफ्ना सेवकहरूलाई धेरै माया गर्नुहुने भएकोले यहोवा आफ्नो सङ्गठनलाई नैतिक रूपमा स्वच्छ राख्नुहुन्छ। यो देख्दा मलाई एकदमै खुसी लाग्छ। बाहिरका मानिसहरूलाई यो प्रबन्ध निकै कठोर छ जस्तो लाग्ला। तर यो एकदमै आवश्यक अनि मायालु प्रबन्ध हो। स्वर्गमा बस्नुहुने बुबा मायालु र क्षमाशील हुनुहुन्छ। म उहाँप्रति साँच्चै कृतज्ञ छु।”—सान्डी, अमेरिका।
a विगतमा गम्भीर गल्ती गरेर पश्चात्ताप नगर्नेहरूलाई बहिष्कार गरिएको भन्ने गरिन्थ्यो। तर अहिले बाइबलअनुसारै मण्डलीबाट हटाइएको भन्ने अभिव्यक्ति चलाइन्छ।
b एल्डरहरू परिपक्व ख्रिष्टियन पुरुषहरू हुन्, जसले धर्मशास्त्रबाट सिकाउँछन् र परमेश्वरको बगाललाई मदत अनि प्रोत्साहन दिएर गोठालोले झैँ हेरचाह गर्छन्। तिनीहरू यस कामको लागि तलब लिँदैनन्।—१ पत्रुस ५:१-३.
c कुनै-कुनै अवस्थामा मण्डली त्याग्ने निर्णय गरेका व्यक्तिले मण्डलीलाई नराम्रो असर पुऱ्याउन सक्छन् र भाइबहिनीलाई गलत काम गर्न समेत उक्साउन सक्छन्। त्यस्तो अवस्थामा हामी बाइबलमा दिइएको तिनलाई “अभिवादन पनि नगर” भन्ने आज्ञा पालन गर्छौँ।—२ युहन्ना ९-११.