कामकुरो पन्छाउने बानीलाई के गर्ने होला?

बाइबलमा कामकुरो पन्छाउँदा हुने परिणामबारे यस्तो लेखिएको छ: “बतासको विचार गर्नेले कहिल्यै छर्दैन, औ बादलमा नजर राख्नेले कहिल्यै कटनी गर्दैन।”—उपदेशक ११:४.

मानिसहरू किन आफ्नो काम पन्छाउँछन्‌, त्यसका केही कारणहरू विचार गरौँ र यो बानी कसरी हटाउन सकिन्छ, हेरौँ।

काम गर्न ढिला भएकोले अत्यास लाग्दा।

हो कुनै काम यति गाह्रो देखिन्छ कि त्यसलाई पन्छाउनु नै बेस लाग्न सक्छ। यसो गर्नुको सट्टा अरू राम्रो तरिकाहरू विचार गरौँ।

• कामलाई स-सानो भागमा छुट्ट्याउनुहोस्‌। मेलिसा नाम गरेकी एक युवती यसो भन्छिन्‌: “काम सिद्ध्याउन साह्रै ढिला भइसकेको छ भने पनि म एक पटकमा एउटा काम गरेर समयमा सिद्ध्याउन प्रयास गर्छु।”

• सकेसम्म चाँडो सुरु गर्नुहोस्‌। “काम पाउने बित्तिकै सुरु गरिहाल्नुहोस्‌। त्यो कामलाई गर्नु पर्ने कामहरूको सूचीमा राखिहाल्नुहोस्‌। अथवा त्यो काम गर्ने कुनै तरिकाहरू मनमा आउने बित्तिकै बिर्सिनअघि नै लेखिहाल्नुहोस्‌। यसो गर्नु सानो काम जस्तो लागे पनि गरिहाल्नुहोस्‌।”–विरा

• मदत माग्नुहोस्‌। तपाईँको आमाबुबा र शिक्षकहरूले पनि तपाईँको जस्तै समस्याहरू सामना गर्नुभएको होला। त्यसोभए उहाँहरूको अनुभव सोधिहेरे कसो होला? उहाँहरूले तपाईँलाई कुन तरिकाले काम गर्दा राम्रो हुन्छ भनेर बताउन सक्नुहुन्छ होला अनि योजना बनाउन पनि मदत गर्न सक्नुहुन्छ होला।

सुझाव “तालिका बनाउनुहोस्‌। हुनत तालिका बनाएपछि तपाईँ व्यवस्थित हुनुपर्छ अनि त्यसअनुसार चल्न हार मान्‍नु हुँदैन। तर यसो गर्नुभयो भने तपाईँको सबै काम समयमै सिद्धिन्छ।”—एब्बी

काम गर्ने जाँगरै नहुँदा।

तपाईँलाई रमाइलो नलाग्ने किसिमको काम गर्नुपर्ने छ भने प्रायजसो त्यो पूरा गर्न झन्झटिलो लाग्न सक्छ। तपाईँले त्यस्तो जिम्मेवारी पाउनुभयो भने त्यो पूरा गर्न के गर्न सक्नुहुन्छ? तल दिइएको सुझाव लागू गर्न प्रयास गर्नुहोस्‌।

• काम चाँडो पूरा गर्नुपर्ने कारण विचार गर्नुहोस्‌। उदाहरणको लागि, काम पूरा भएपछि तपाईँलाई कत्ति आनन्द लाग्नेछ, कल्पना गर्नुहोस्‌। एमी नाम गरेकी एक युवती यसो भन्छिन्‌: “समयमै काम पूरा गर्न सक्दा वा समयभन्दा अघि नै काम सिद्ध्याएर आरामसँग बस्न पाउँदा मलाई असाध्यै आनन्द लाग्छ।”

• काम पूरा गर्न ढिला गर्दा के हुन्छ, विचार गर्नुहोस्‌। ढिलासुस्ती गर्नुभयो भने तनाव बढ्‌दै जान्छ र काम पूरा नहुने सम्भावना पनि उति नै बढ्‌छ। बाइबल भन्छ: “मानिसले जे रोप्छ त्यही फल्छ।”—गलाती ६:७, पढ्‌न सजिलो संस्करण.

• काम जहिले पूरा गर्नुपर्ने हो, त्योभन्दा अघि नै पूरा गर्नुपर्छ भनेर सोच्नुहोस्‌। आलिसिया नाम गरेकी एक युवती यसो भन्छिन्‌: “म काम पूरा गर्ने समयभन्दा एक-दुई दिन अघि नै पूरा गर्नुपर्छ भनेर सोच्छु। यसो गर्दा पछि फेरि आफ्नो कामलाई दोहोऱ्‍याएर हेर्न सक्छु अनि मसँग अझै एक-दुई दिन बाँकी पनि हुन्छ।”

सुझाव “यो सबै सोचाइको कुरा हो। आफैलाई यसो भन्‍नुहोस्‌: ‘जे गर्नु छ, त्यो म गर्छु अनि कुनै कुराले मलाई रोक्न सक्दैन।’ त्यस्तो कुरा आफ्नो दिमागमा ठप्प राखिसकेपछि जे गर्नुपर्ने छ, त्यो गरिन्छ।”—एलेक्सिस्‌

अत्यन्तै व्यस्त हुँदा।

नेथन नाम गरेका एक युवक यसो भन्छन्‌: “प्राय मानिसहरूले मलाई अल्छी भनेर बोलाउँछन्‌। तर कहाँ त्यसो हुनु! म कति व्यस्त छु भनेर तिनीहरूलाई थाहै छैन।” तपाईँले पनि नेथनले जस्तै महसुस गर्नुभएको छ भने यी सुझावहरू लागू गर्ने प्रयास गर्नुहोस्‌।

• सजिलो काम पहिला गर्नुहोस्‌। एम्बर नाम गरेकी युवती यसो भन्छिन्‌: “यदि कुनै काम पाँच मिनेटभन्दा काम समयमा भ्याइन्छ भने त्यो गरिहाल्नुपर्छ भनेर मलाई कसैले सिकाएको थियो। जस्तै: सफा गर्ने, लुगा झुन्ड्याउने, भाँडा माझ्ने र फोन गर्ने।”

• महत्त्वपूर्ण काम पहिला गर्नुहोस्‌। बाइबल यसो भन्छ: “अझ महत्त्वपूर्ण कुराहरू के हुन्‌, सो तिमीहरूले पक्का” गर। (फिलिप्पी १:१०) यो कुरा आफ्नो दैनिक जीवनमा कसरी लागू गर्न सक्नुहुन्छ? आना नाम गरेकी युवती यसो भन्छिन्‌: “मैले गर्नुपर्ने कामहरूको म सूची बनाउँछु र ती कामहरू कहिलेसम्म सिद्ध्याउनुपर्ने हो, त्यो पनि लेखेर राख्छु। तर सबैभन्दा महत्त्वपूर्ण कुराचाहिँ, हरेक काम कहिले सुरु गर्ने र सिद्ध्याउने, त्यो मिति लेखेर राख्छु।”

के यसो गर्न गाह्रो छ जस्तो लाग्छ? फेरि एक चोटि विचार गर्नुहोस्‌! कुरा के हो भने, तपाईँले तालिका बनाउनुभयो भने समयले तपाईँलाई नियन्त्रण गर्नुको सट्टा तपाईँले समयलाई नियन्त्रण गर्नुहुनेछ। अनि यसले तपाईँको तनाव कम गर्छ। केली नाम गरेकी एक किशोरी यसो भन्छिन्‌: “योजना बनाएकोले गर्दा म शान्त भएर बस्न सक्छु अनि कुन काम कहिले गर्ने भनेर ठीक तरिकाले सोच्न सक्छु।”

• बाधा दिने कुराहरूलाई हटाउनुहोस्‌। जेनिफर यसो भन्छिन्‌: “कुनै महत्त्वपूर्ण काम सुरु गर्नुअघि म घरमा भएका सबैलाई थाह दिन्छु। यदि मैले केही गरिदिनु छ भने मेरो काम सुरु हुनुअघि नै भन्‍नुहोस्‌ भनेर बताउँछु। म आफ्नो फोन र इमेल अलर्टस्‌ पनि अफ गर्छु।”

सुझाव “तपाईँले गर्नुपर्ने कामहरू नगरेसम्म त्यो जस्ताको तस्तै रहन्छ। त्यसैले कुनै काम गर्नु छ भनेर जहिले पनि सोचिरहनुको सट्टा सिद्ध्याइहाल्नुहोस्‌। त्यसो गर्नुभयो भने तपाईँको बाँकी दिन मजाले बित्नेछ।”—जोर्डन