तपाईँको अनुदान कसरी प्रयोग गरिन्छ?
महामारी सुरु हुनुभन्दा ठीक अघि सम्पन्न भएका निर्माण परियोजनाहरू
नोभेम्बर १, २०२०
हरेक वर्ष हजारौँले बप्तिस्मा गर्ने भएकोले हामीलाई यहोवाको उपासना गर्ने भवनहरूको अझ धेरै आवश्यकता परेको छ। त्यसकारण संसारभरका स्थानीय डिजाइन/निर्माण विभागहरूले २०२० सेवा वर्षभित्र उपासनाको लागि प्रयोग गरिने २,७०० वटा भवनहरू निर्माण वा मर्मतसम्भार गर्ने योजना बनायो।a
तर दुःखको कुरा कोभिड-१९ महामारीले गर्दा यी योजनाहरूमा बाधा पुग्यो। हाम्रा भाइबहिनीको सुरक्षाको लागि र सरकारले बनाएको नियम पालन गर्न परिचालक निकायको प्रकाशन समितिले संसारभर नै धेरैजसो निर्माण परियोजनाहरू स्थगित गऱ्यो। तर खुसीको कुरा, महामारी सुरु हुनुअघि नै २०२० सेवा वर्षभित्र १,७०० भन्दा धेरै उपासनास्थलको निर्माण र मर्मतसम्भार सम्पन्न भइसकेको थियो। साथै १०० वटाभन्दा धेरै भवनहरूको निर्माण वा मर्मतसम्भार गरियो। तीमध्ये दुई वटा निर्माण परियोजनाले भाइबहिनीलाई कस्तो फाइदा पुऱ्यायो, अब हेरौँ।
क्यामरून शाखा। क्यामरूनको पुरानो शाखा भवन डुवालामा थियो तर त्यो भवन निकै सानो र धेरै पुरानो भइसकेको थियो। त्यसैले प्रकाशन समितिले त्यो भवन मर्मतसम्भार गर्ने विचार गऱ्यो। तर त्यस भवनको मूल्य जति थियो, त्यसको मर्मतसम्भार गर्न त्योभन्दा धेरै खर्च लाग्ने देखियो। भाइहरूसामु दुई वटा विकल्प थियो। तिनीहरूले या त जग्गा किनेर नयाँ भवन बनाउन सक्थे या बनिसकेको भवन किनेर त्यसलाई मर्मतसम्भार गर्न सक्थे। तर त्यहाँको अवस्थाले गर्दा यी दुवै कुरा सम्भव भएन।
त्यही समयतिर उत्तरी डुवालामा त्यहाँको स्थानीय सरकारले हाम्रो एउटा सम्मेलन भवनसँगै सडक निर्माण गर्दै छ भनेर हाम्रा भाइहरूले थाह पाए। सडकले गर्दा हाम्रो सम्मेलन भवन भएको ठाउँसम्म आउजाउ गर्न अनि पानी र बिजुलीबत्तीजस्ता अत्यावश्यक कुराहरू ल्याउन सजिलो हुने थियो। हुन पनि शाखा कार्यालयको लागि यस्तै ठाउँको आवश्यकता थियो। त्यसैले परिचालक निकायले सम्मेलन भवन भएको जग्गाको एउटा भागमा नयाँ शाखा कार्यालय बनाउने अनुमति दियो।
भाइबहिनीहरू क्यामरून शाखाको निर्माणमा सघाउँदै
यस परियोजनामा हाम्रा भाइबहिनीले बाहिरका ठेकेदारहरूसँगै मिलेर काम गरे। यसले गर्दा समय र पैसाको बचत भयो। वास्तवमा हाम्रा भाइहरूले सोचेको भन्दा निकै कम खर्चमा यो परियोजना सम्पन्न भयो। तिनीहरूले २० लाख अमेरिकी डलर (लगभग साढे २३ करोड नेपाली रुपैँया) भन्दा धेरै बचत गर्न सके। कोभिड-१९ सुरु हुनुभन्दा केही समयअघि मात्र बेथेल परिवार यस नयाँ भवनमा सरेको थियो।
क्यामरून शाखाको निर्माणकार्य कोभिड-१९ महामारी सुरु हुनुभन्दा ठीक अघि सिद्धिएको थियो
क्यामरूनका बेथेल सेवकहरूले यस नयाँ भवनमा पहिलाभन्दा राम्रो वातावरणमा र सहज तरिकामा काम गर्न सकेका छन्। एक दम्पती यसो भन्छन्: “हामी बेथेल सेवामा अझ मेहनत गरेर यस उपहारप्रति कृतज्ञता देखाउन चाहन्छौँ।”
भाइबहिनीहरू महामारी सुरु हुनुअघि आफ्नो नयाँ अफिसमा काम गर्दै
टोहोलाबाल अनुवाद कार्यालय, मेक्सिको। टोहोलाबाल अनुवाद टोलीले धेरै वर्षसम्म मेक्सिको सिटीनजिकै भएको मध्य अमेरिका शाखाबाट काम गरे। तर टोहोलाबाल भाषा विशेषगरि त्यहाँबाट झन्डै १,००० किलोमिटर (६२० माइल) टाढा पर्ने अल्टामिरानो र लास मार्गारिटाज्मा बोलिन्छ। त्यसैले अनुवादकहरूले टोहोलाबाल भाषामा के-कस्ता परिवर्तनहरू भइरहेको छ भनेर थाह पाउन सकेनन्। अनि शाखालाई पनि वरपर टोहोलाबाल भाषाका प्रकाशनहरू र अडियो रेकर्डिङहरू अनुवाद गर्ने काममा सघाउन सक्ने योग्य भाइबहिनी भेट्टाउन गाह्रो भयो।
भाइबहिनीहरू अनुवाद कार्यालयको परियोजनामा सघाउँदै
यी कारणहरूले गर्दा परिचालक निकायको लेखन समितिले अनुवाद टोलीलाई टोहोलाबाल भाषा बोलिने इलाकामै सार्ने सुझाव दियो। यसको लागि शाखाले एउटा भवन खरिद गरेर त्यसलाई मर्मतसम्भार गर्ने निर्णय गऱ्यो। नयाँ भवन बनाउनु वा भाडामा लिनुभन्दा यसो गर्नु खर्चको हिसाबले निकै सस्तो पर्न गयो।
यसले गर्दा अनुवादकहरूलाई कस्तो फाइदा भयो? एक जना अनुवादकले यसो भने: “मैले शाखा कार्यालयमा अनुवादकको रूपमा सेवा गर्न थालेको १० वर्ष भइसक्यो। तर मैले अहिलेसम्म मेरो भाषा बोल्ने एउटा परिवार पनि भेटेको थिइनँ। अहिले हाम्रो अफिस टोहोलाबाल भाषा बोलिने इलाकामै छ। अहिले म टोहोलाबाल भाषा बोल्ने मानिसहरूसित दिनहुँ कुराकानी गर्ने गर्छु। यसो गर्दा मेरो शब्द भण्डार र मेरो कामको गुणस्तर बढेको छ।”
पुनर्निर्माण हुनुअघि र पुनर्निर्माण भएपछिको टोहोलाबाल अनुवाद कार्यालय
सन् २०२१ सेवा वर्षका लागि निर्माण परियोजनाहरू
परिस्थितिले दियो भने २०२१ सेवा वर्षमा ७५ वटा अनुवाद कार्यालय र बाइबल स्कुलको लागि भवनहरू निर्माण गर्ने योजना छ। आठ वटा शाखा भवन निर्माण र मर्मतसम्भार गर्ने परियोजना भने चलिरहनेछ। तीमध्ये न्यु योर्कको रामापोमा चलिरहेको नयाँ मुख्यालयको निर्माणकार्य अनि अर्जेन्टिना र इटाली शाखालाई नयाँ ठाउँमा सार्ने परियोजना पनि पर्छ। यसबाहेक १,००० वटा भन्दा धेरै नयाँ सभाभवनको आवश्यकता छ, अहिले भएको ६,००० वटाभन्दा धेरै सभा गर्ने ठाउँ अनुपयुक्त भएकोले अन्तै सार्नुपर्ने देखिन्छ र ४,००० वटा सभाभवनलाई मर्मतसम्भार गर्नुपर्ने देखिन्छ।
यी सबै निर्माणकार्य र मर्मतसम्भारको खर्च कसरी जुटाइन्छ? मध्य अमेरिका शाखा समितिका सदस्य भाइ लजारो गोन्जालेजले टोहोलाबाल अनुवाद कार्यालयको परियोजनाबारे कुरा गर्दै गर्दा यसको जवाफ यसरी दिए: “हाम्रो शाखाको इलाकामा पर्याप्त स्रोतसाधन छैन। संसारभरका भाइबहिनीको साथ नहुने हो भने यहाँका आदिवासी भाइबहिनीलाई मदत गर्न अनुवाद कार्यालयहरू बनाउन असम्भव हुने थियो। संसारभरका भाइबहिनीले दिनुभएको अनुदानले गर्दा नै अनुवादकहरूलाई उनीहरूको भाषा बोलिने इलाकामा सार्न सम्भव भएको छ। हाम्रा भाइबहिनीले उदार भएर दिनुभएको अनुदानको लागि हामी मनैदेखि धन्यवाद दिन्छौँ।” हो, विश्वव्यापी कार्यको लागि दिइएको अनुदानले गर्दा नै यी निर्माण परियोजनाहरू सम्पन्न गर्न सम्भव भएको हो र तीमध्ये धेरैजसो अनुदान donate.jw.org मार्फत प्राप्त हुन्छ।
a स्थानीय डिजाइन/निर्माण विभागहरूले आफ्नो शाखाको इलाकामा सभाभवनहरू निर्माण गर्न योजना बनाउँछ र त्यसको कार्यान्वयन गर्छ। विश्व मुख्यालयमा भएको विश्वव्यापी डिजाइन/निर्माण विभागले कुन निर्माण परियोजनालाई प्राथमिकता दिने भनेर निर्णय गर्छ र त्यो सम्पन्न गर्न योजना बनाउँछ।