ख्रीष्टियन जीवन

मध्यहप्ताको सभाको नयाँ विशेषता

जनवरी २०१८ देखि पवित्र बाइबल नयाँ संसार अनुवाद अनलाइन अध्ययन संस्करण (nwtsty) मा भएका अध्ययन नोट र मिडिया मध्यहप्ताको सभामा समावेश गरिनेछ। तपाईंको भाषामा अध्ययन संस्करण उपलब्ध नभए पनि यो कुरा लागू गरिनेछ। यो नयाँ विशेषताले सभाको तयारीको गुणस्तर बढाउनुका साथै हाम्रो मायालु बुबा यहोवासित अझै नजिक हुन मदत गर्नेछ।

अध्ययन नोट

अध्ययन नोटले विभिन्‍न बाइबल पद पछाडि लुकेको संस्कृतिक, भौगोलिक र भाषाबारे जानकारी दिन्छ।

मत्ती १२:२०

धिपधिप बलिरहेको सलेदो: घरमा प्रयोग गरिने दियो साधारणतया माटोको हुन्थ्यो र त्यो बाल्न जैतुनको तेल प्रयोग गरिन्थ्यो। दियोमा बालिने सलेदो मिहिन सेतो सुती कपडाले बनेको हुन्थ्यो। ग्रीक भाषामा “धिपधिप बलिरहेको सलेदो” भन्‍ने अभिव्यक्‍तिले ज्वाला निभाए पनि धुवाँ निस्किरहेको सलेदोलाई बुझाउन सक्छ। यशैया ४२:३ मा येशूले देखाउनुहुने कोमलताबारे भविष्यवाणी गरिएको छ। उहाँले दुःखमा परेका नम्र मानिसहरूको धिपधिप बलिरहेको आशाको सलेदोलाई कहिल्यै निभ्न दिनुहुनेछैन।

मत्ती २६:१३

साँच्चै: ग्रीक र हिब्रू शब्द “आमिन”-ले “यस्तै होस्‌” वा “पक्कै पनि” भन्‍ने अर्थ दिन्छ। येशूले यो अभिव्यक्‍ति कुनै कुरा भन्‍नुअघि, प्रतिज्ञा वा भविष्यवाणी गर्नुअघि प्रयोग गर्नुहुन्थ्यो। उहाँले भन्‍नुभएको कुरा पूर्ण रूपमा सत्य र भरपर्दो छ भनेर यसले जोड दिन्थ्यो। येशूले जुन तरिकामा “साँच्चै” वा आमिन भन्‍ने शब्द प्रयोग गर्नुभयो त्यसरी अरू कुनै धार्मिक किताबमा प्रयोग गरिएको पाइँदैन। येशूले प्रयोग गर्नुभएको आमिन भन्‍ने अभिव्यक्‍तिलाई यूहन्‍नाको किताबभरी जहाँ-जहाँ (आमिन आमिन) भनेर दोहोऱ्‍याएर उल्लेख गरिएको छ त्यसलाई “साँच्चै” भनेर अनुवाद गरिएको छ।—यूह १: ५१.

मिडिया

फोटो, चित्रकला, मौन भिडियो र एनिमेसनले बाइबलका विवरणहरूबारे विभिन्‍न जानकारी दिन्छ।

बेथफागे, जैतुन डाँडा र यरूशलेम

यो भिडियोमा आधुनिक समयको एत्तुर गाउँदेखि पूर्वहुँदै यरूशलेम जाने बाटो देखाइएको छ। बाइबलकालीन समयमा जैतुन डाँडाको अल्गो ठाउँमा अवस्थित यो गाउँलाई बेथफागे भनिन्थ्यो। बेथफागेको पूर्वपट्टि बेथानी पर्छ। येशू र उहाँका चेलाहरू यरूशलेम जाँदा प्रायजसो बेथानीमा बस्नुहुन्थ्यो। आज त्यस ठाउँलाई अरबी भाषामा एल-एजारिया अर्थात्‌ “लाजरसको ठाउँ” भनिन्छ। येशू त्यहाँ जानुहुँदा मार्था, मरियम र लाजरसको घरमा बस्नुहुन्थ्यो भन्‍ने कुरामा कुनै शङ्‌का छैन। (मत्ती २१:१७; मर्कू ११:११; लूका २१:३७; यूह ११:१) तिनीहरूको घरबाट यरूशलेम जानु हुँदा येशूले सायद भिडियोमा देखाएको बाटो प्रयोग गर्नुभएको हुन सक्छ। इस्वी संवत्‌ ३३ नीसान ९ मा येशू गधामा चढेर जैतुन डाँडाबाट यरूशलेम जानुहुँदा उहाँ बेथफागेको बाटो हुँदै जानुभएको हुन सक्छ।

१. बेथानी देखि बेथफागे जाने बाटो
२. बेथफागे
३. जैतुन डाँडा
४. किद्रोन खोल्सा
५. मन्दिर

कुर्कुच्चोमा गाडिएको किल्ला

यो फोटोमा मानिसको कुर्कुच्चोलाई ११.५ सेन्टिमिटर लामो किल्लाले छेडिएको देखाइएको छ। यो कुर्कुच्चो एउटा प्रतिकृति (नक्कल कृति) मात्र हो। यसको सक्कल कृति १९६८ मा उत्तरी यरूशलेममा उत्खनन गर्दा भेट्टाइएको थियो। अनि यो रोमी साम्राज्यको शासन चलिरहेको समयतिरको हो भनेर पत्ता लाग्यो। मानिसलाई मृत्युदण्ड दिन खम्बामा किल्ला ठोकेर झुन्ड्याइन्थ्यो भनेर यस्ता पुरातात्त्विक प्रमाणहरूले पुष्टि गर्छ। रोमी सेनाहरूले येशू ख्रीष्टलाई यातनाको खम्बामा टाँग्न यस्तै किल्ला प्रयोग गरेका हुन सक्छन्‌। यो कुर्कुच्चो लास कुहिसकेपछि बाँकी रहेका हड्डीहरू राखिने अस्थि बाकसमा भेट्टाइएको थियो। खम्बामा मृत्युदण्ड दिइएको व्यक्‍तिलाई पछि चिहानमा गाड्‌न दिइन्थ्यो भन्‍ने कुराको प्रमाण यसले दिन्छ।—मत्ती २७:३५.