अनन्त जीवनकालागि उचित मानसिक प्रवृत्ति राख्नेहरूको खोजी गर्नु होस्
“अनन्त जीवनका लागि उचित मानसिक प्रवृत्ति राख्नेहरू विश्वास गर्नेहरू भए।” —प्रेरित १३:४८. [न्यु वर्ल्ड ट्रान्सलेशन्]
१. यहोवासँग मानिसको हृदयलाई के गर्ने क्षमता छ?
यहोवा परमेश्वरले हृदयको कुरालाई पढ़न सक्नु हुन्छ। शमूएल अगमवक्ताले, यिशैको एक जना छोरालाई अभिषेक गर्न जाँदा, यो कुरा स्पष्ट देखियो। एलीआबलाई देख्ना साथै, शमूएलले “विचार गरे, ‘परमप्रभुको [यहोवाको, न्यु.व.] सामने उहाँका अभिषिक्त राजा यिनीनै रहेछन्।’ तर परमप्रभुले [यहोवाले, न्यु.व.] तिनलाई भन्नुभयो, ‘त्यो सुन्दर र अल्गो भए तापनि त्यसको ख्याल नगर। म त्यसलाई इनकार गर्दछु। परमप्रभुले [यहोवाले, न्यु.व.] मानिसले झैं हेर्दैनन्। मानिसले रूप हेरीकन विचार गर्छ तर परमप्रभुले [यहोवाले, न्यु.व.] हृदय हेरीकन विचार गर्छन्।’” यसै अनुसार, ‘परमप्रभु [यहोवा, न्यु.व.] आफैले रुचाउनु भएको’ दाऊदलाई अभिषेक गर्ने निर्देशन शमूएलले पाए।—१ शमूएल १३:१३, १४; १६:४-१३.
२. एउटा व्यक्तिको लाक्षणिक हृदयमा कुन कुराले जरा गाड़ेको हुन्छ, र हामी शास्त्रमा यस बारे के पढ़दछौं?
२ हरेक व्यक्तिले पनि आफ्नो एउटा मुख्य प्रवृत्ति व्यक्त गर्दछ। उसको लाक्षणिक हृदयमा जरा गाड़ेर बसेको एउटा विशेष प्रकारको मिजास हुन्छ। (मत्ती १२:३४, ३५; १५:१८-२०) यसैकारण, “मनमा [हृदयमा, न्यु.व.] लड़ाइँ” भएको व्यक्तिको विषयमा हामी पढ्दछौं। (भजनसंग्रह ५५:२१) हामीलाई एसो पनि भनिएको छ: “गरम मिजास भएको मानिसले धेरै खराब काम गर्छ।” र हामी यसो पनि पढ्दछौं: “एक अर्कालाई टुक्रा-टुक्रा पार्ने मिजास भएका साथीहरू हुन्छन्, तर भाइ भन्दा नजिक रहने मित्र पनि हुन्छ।” (हितोपदेश १८:२४ [न्यु.व.]; २९:२२) खुशीको कुरा के हो भने, धेरै मानिसहरू, पिसिडियाको प्राचीन एन्टिओकका केही गैर-यहूदीहरू जस्तै साबित भएका छन्। मुक्तिका निम्ति यहोवाले मिलाउनु भएको प्रबन्धबारे सुने पछि, “तिनीहरू खुशी भए र यहोवाको वचनको महिमा गर्नलागे, र अनन्त जीवनका लागि उचित मानसिक प्रवृत्ति राख्नेहरू विश्वास गर्नेहरू भए।”—प्रेरित १३:४४-४८ [न्यु.व.].
विश्वास गर्नेहरू “हृदयमा शुद्ध छन्”
३, ४. (क) शुद्ध हृदय हुनेहरू को हुन्? (ख) शुद्ध हृदय हुनेहरूले परमेश्वरलाई कसरी देख्तछन्?
३ एन्टिओकमा विश्वास गर्नेहरू बप्तिस्मा लिएका मसीहीहरू भइदिए, र तिनीहरू मध्येका विश्वासीहरूले येशूका यी शब्दहरू आफूमा प्रयोग गर्न सक्त थिए: “धन्य हृदयमा शुद्ध हुनेहरू किनभने तिनीहरूले परमेश्वरलाई देख्नेछन्।” (मत्ती ५:८) तर “हृदयमा शुद्ध हुनेहरू को हुन्”? र तिनीहरूले परमेश्वरलाई कसरी “देख्नेछन्”?
४ हृदयमा शुद्ध हुनेहरू आन्तरिक रूपमा सफा हुन्छन्। तिनीहरूमा मूल्याङ्कन गर्ने भाव, स्नेह, अभिलाषा र नियतहरू शुद्ध हुन्छन्। (१ तिमोथी १:५) तिनीहरूले परमेश्वरलाई अहिले नै देख्नुको अर्थ, समग्रता पालकहरूका पक्षमा परमेश्वर क्रियाशील हुनु भएको तिनीहरूले अनुभव गर्दछन्। (प्रस्थान ३३:२०; अय्यूब १९:२६; ४२:५ सँग तुलना गर्नु होस्) यहाँ “देख्नु” शब्दको ठाउँमा प्रयोग गरिएको युनानी शब्दको अर्थ “मनले देख्नु, अनुभव गर्नु, थाह गर्नु” पनि हो। ख्रीष्टले परमेश्वरको व्यक्तित्वलाई सम्पूर्ण ढङ्गमा प्रतिबिम्बित गर्नु भएको हुनाकारण, ख्रीष्टमा र पापहरूको प्रायश्चितका निम्ति उहाँले चढ़ाउनु भएको बलिदानमा विश्वास गर्दै, आफ्नो पापहरूको क्षमा पाएर परमेश्वरलाई ग्रहणयोग्य बलिदान चढ़ाउन सक्ने ती “हृदयमा शुद्ध हुनेहरूले” परमेश्वरको व्यक्तित्वलाई स्पष्टसँग बुझ्ने अन्तर्दृष्टिको आनन्द अनुभव गर्दछन्। (यूहन्ना १४:७-९; एफिसी १:७) अभिषिक्त जनहरूका निम्ति, परमेश्वरलाई देख्ने अनुभव चरमबिन्दुमा तब पुग्छ जब तिनीहरूले पुनरुत्थान पछि स्वर्गीय जीवन पाउँछन् र परमेश्वर र ख्रीष्टलाई साक्षात देख्नेछन्। (२ कोरिन्थी १:२१, २२; १ यूहन्ना ३:२) तर सही ज्ञान र साँचो उपासनाद्वारा, हृदयमा शुद्ध हुने सबैले नै, परमेश्वरलाई देख्न सम्भव छ। (भजनसंग्रह २४:३, ४; १ यूहन्ना ३:६; ३ यूहन्ना ११) तिनीहरू स्वर्ग अथवा एउटा पार्थिव प्रमोदवनमा अनन्त जीवन पाउनका लागि उचित मानसिक प्रवृत्ति भएकाहरू हुन्।—लूका २३:४३; १ कोरिन्थी १५:५०-५७; १ पत्रुस १:३-५.
५. येशू ख्रीष्टको एउटा विश्वासी र सच्चा चेला कसरी मात्र बन्न सकिन्छ?
५ अनन्त जीवनका लागि उचित मानसिक प्रवृत्ति न भएकाहरू चाहिं विश्वासीहरू हुनेछैनन्। तिनीहरूका लागि विश्वास गरिरहन सम्भव छैन। (२ थिस्सलोनिकी ३:२) साथै, शिक्षा लिन तयार हुनेहरू मात्र येशू ख्रीष्टको एउटा साँचो चेला बन्न सक्तछन् र हृदयको कुरा हेर्नु हुने यहोवाले त्यस्ता व्यक्तिलाई आफू तिर तान्नु हुन्छ। (यूहन्ना ६:४१-४७) हुन त हो, घर-घर प्रचार गर्न जाँदा यहोवाका साक्षीहरूले कसैको विषयमा पूर्वाग्रह राख्दैनन्। तिनीहरूले मानिसहरूको हृदयको कुरा पढ्न सक्तैनन्, तर परिणाम परमेश्वरका प्रेमपूर्ण हातहरूमा तिनीहरूले छाड़ि दिन्छन्।
६. (क) घर-घरको सेवकाईमा व्यक्तिगत सम्पर्क बारे के भनिएको छ? (ख) अनन्त जीवनका लागि उचित मानसिक प्रवृत्ति राख्नेहरू फेला पार्ने मद्दत दिन, यहोवाका साक्षीहरूका लागि कुन कुन प्रबन्धहरू मिलाइएका छन्?
६ एक जना विद्वानले उपयुक्त ढङ्गले यो कुरा भने: “[पावलले] सत्यता खुल्लम-खुल्ला र घर-घरमा गएर प्रचार गरे। मञ्चबाट मात्र होइन, तर व्यक्तिगत सम्पर्क द्वारा व्यक्ति-व्यक्तिसँग तिनले ख्रीष्टको विषयमा प्रचार गरे। मानिसहरूमाथि असर पार्ने काममा, धेरै पटक, अरू उपायहरू वा तरिकाहरू भन्दा यस प्रकारको व्यक्तिगत सम्पर्क अति नै प्रभावशाली हुदँछ।” (अगस्त वेन रिन्) थियोक्रेटिक मिनिस्ट्री स्कूल गाइड्बुक, रिजनीङ्ग फ्रम द स्क्रिपचर्स र हाम्रो राज्य सेवकाई जस्ता प्रकाशनहरूद्वारा यहोवाका साक्षीहरूले भाषणहरू दिने र तिनीहरूको क्षेत्र सेवकाईमा व्यक्तिगत सम्पर्कबाट ज्यादासे ज्यादा लाभ उठाउने सहायता पाउँदछन्। यी बाहेक, सेवकाई सभामा हुने प्रदर्शनहरू र थियोक्रेटिक मिनिस्ट्री स्कूलमा [ईश्वरतन्त्रीय सेवकाई पाठशाला] पाइने सल्लाह पनि मद्दतकारी हुन्छ। यस पाठशालामा उपस्थित हुनेहरूले आफूले बोल्ने विषयको राम्रो परिचय दिने, शास्त्रको उचित प्रयोग गर्ने, तर्क अनुसार कुरा बढ़ाउने, सन्तोषजनक तर्क प्रस्तुत गर्ने, उदाहरणहरूको प्रयोग र प्रभावशाली निष्कर्षहरू जस्ता वाक्पटुता सम्बन्धी गुणहरूबारे बहुमूल्य प्रशिक्षण पाउँदछन्। अनन्त जीवनका लागि उचित मानसिक प्रवृत्ति राख्नेहरूको खोजी गर्ने काममा परमेश्वरका जनहरूलाई अझ प्रभावशाली तुल्याउनका निम्ति, बाइबलले यो सल्लाहलाई अझ कसरी बढ़ाउदो रहेछ भनी हामी अब हेरौं।
विचारोद्दीपक भूमिकाहरू
७. डाँड़ाको उपदेशमा, येशूका प्रारम्भिक शब्दहरूले हामीलाई भूमिकाहरूबारे के शिक्षा दिन्छ?
७ घर-घर गएर साक्षी दिने कामका लागि तयार भइरहेकाहरूले मानिसहरूको चासो जगाउने प्रकारका भूमिकाहरू बारे येशूका उदाहरणबाट शिक्षा लिन सक्नेछन्। उहाँले डाँड़ाको उपदेश शुरू गर्नु हुँदा, “धन्य” [“खुसी” न्यु.व.] शब्द नौं पटक प्रयोग गर्नु भयो। उदाहरणका निम्ति, उहाँले भन्नु भयो: “खुसी हुन्, आफ्नो आध्यात्मिक आवश्यकताबारे चेतनशील हुनेहरू, किनभने स्वर्गको राज्य तिनीहरू कै हो [न्यु.व.] . . . धन्य नम्र हुनेहरू, किनभने तिनीहरूले पृथ्वीको अधिकार पाउनेछन्।” (मत्ती ५:३-१२) ती वाक्यहरू सोझो र स्पष्ट थिए। र त्यो भूमिकाले निश्चय पनि मानिसहरूमा चासो जगायो र उहाँका स्रोताहरूको ध्यान आकर्षित भयो, किनभने धन्य अथवा खुसी हुन न चाहने आखिर को होला र?
८. घर-घरको सेवकाईमा, वार्तालापको विषयलाई कसरी प्रस्तुत गर्नु उचित हो?
८ घर-घरको सेवकाईमा प्रयोग गरिने वार्तालापको जुन सुकै विषय भए तापनि, त्यसलाई एउटा सकारात्मक र रुचिकर ढङ्गमा प्रस्तुत गर्नु पर्दछ। तर कसैले पनि आफ्नो स्रोतालाई जिल्ल पार्ने किसिमको भूमिका प्रयोग गर्नु हुँदैन, जस्तो कि, “तपाईंका लागि बाहिरी अन्तरिक्षबाट एउटा समाचार ल्याएको छु” भनेर। सुसमाचारको स्रोत जरुर पनि स्वर्ग नै हो, तर पनि, यस प्रकारको भूमिका सुने पछि, घर-पट्टीले आफ्नो ढोकामा आएको साक्षीलाई महत्त्व दिनु कि उसलाई सकेसम्म चाँडों धपाइ दिनु भनेर सोंच्न थाल्न सक्छ।
परमेश्वरको वचन ठीकसँग प्रयोग गर्न
९. (क) शास्त्रका पद्यहरूलाई कसरी प्रस्तुत गर्न, पढ़न र सेवकाईमा प्रयोग गर्नु पर्दछ? (ख) येशूले प्रश्नहरूको प्रयोग गर्नु भयो भनेर प्रदर्शित गर्न के उदाहरण प्रस्तुत गरिएको छ?
९ क्षेत्र सेवकाईमा जाँदा, मञ्चमा झैं, शास्त्र-पद्यहरूलाई उचित ढङ्गमा प्रस्तुत गर्नु, उपयुक्त जोड़ दिएर पढ़नु, र एउटा स्पष्ट र सही ढङ्गमा प्रयोग गर्नु पर्दछ। शास्त्रका बुँदाहरूबारे घरपट्टीलाई सोंच्न बाध्य पार्ने खालका प्रश्नहरू पनि मद्दतकारी हुन सक्तछन्। यहाँ फेरि, येशूले अपनाउनु भएका तरीकाहरू उपदेशपूर्ण छन्। एक पटक, मोशाको व्यवस्थामा पोख्त भएका मानिसले उहाँसँग यो प्रश्न गरे: “हे गुरु, अनन्त जीवनको हकदार हुनालाई मैले के गर्नुपर्छ?” येशूले जवाफ दिनु भयो: “व्यवस्थामा के लेखिएको छ? तिमी कसरी पढ़दछौ?” यो प्रश्नको उत्तर त्यस मानिसले दिन सक्नेछ भनेर येशूलाई अवश्य पनि थाह थियो। र तिनले सही उत्तर दिंदै एसो भने: “तैंले परमप्रभु [यहोवा, न्यु.व.] आफ्नो परमेश्वरलाई आफ्नो सारा हृदयले र आफ्नो सारा प्राणले, र आफ्नो सारा शक्तिले, र आफ्नो सारा मनले प्रेम गर, औ तेरो छिमेकीलाई आफूलाई जस्तै गरी प्रेम गर।’” यो जवाफका लागि येशूले स्याबासी दिनु भयो र छलफल अघि बढ्यो।—लूका १०:२५-३७.
१०. वार्तालापको विषय जहाँसम्म सम्बन्धित छ, आफूले मनमा कुन कुरालाई ध्यान दिनु आवश्यक छ र घर-पट्टीलाई प्रश्नहरू सोध्दा, के गर्नु भएन?
१० घर-घर साक्षी दिंदै जानेहरूले वार्तालापको मूल विषयलाई महत्त्व दिनु पर्दछ र त्यस विषयलाई प्रस्फुटित गराउने बाइबलका पद्यहरू पढ़ने कारण स्पष्ट पार्नु पर्दछ। साक्षीले घरपट्टीको हृदयलाई प्रभावित पार्ने कोशिश गरिरहेका हुनाकारण, तिनले लाजमा पार्ने प्रकारका प्रश्नहरू पटक्कै सोध्नु भएन। परमेश्वरको वचन प्रयोग गर्दा ‘हाम्रो वचन नूनले स्वादिलो पारेको जस्तै अनुग्रहसहितको होस्।’—कलस्सी ४:६.
११. गलत दृष्टिकोणहरूलाई सुधार्न शास्त्रको प्रयोग गर्ने सम्बन्धमा, शैतानले येशूलाई परीक्षामा पारेको घट्नाबाट हामी के उदाहरण लिन सक्तछौं?
११ विशेषगरी पुनः भेटहरूमा, शास्त्रपद्यहरूले वास्तवमा के भन्दछ अथवा त्यसको अर्थ के हो भनेर देखाउँदै, गलत दृष्टिकोणहरू सुधार्ने आवश्यकता पर्न सक्तछ। येशूले पनि शैतानलाई फट्कारनु हुँदा झन्डै यस्तै काम गर्नु भयो किनभने शैतानले उहाँलाई भनेको थियो: “तपाईं परमेश्वरको पुत्र हुनु हुन्छ भने, यहाँबाट तल हाम फाल्नुहोस्, [मन्दिरको गजूरबाट, आत्म-हत्या गर्न खोजेको जस्तै गरी] किनभने यस्तो लेखिएको छ, ‘उहाँले तपाईंको विषयमा दूतहरूलाई खटाउनु हुनेछ, र तिनीहरूले तपाईंलाई हात-हात उचाल्नेछन्, नत्रता तपाईंको खुट्टा ढुङ्गामा बजारिनेछ।’” शैतानले उद्धृत गरेको भजनसंग्रह ९१:११, १२ ले परमेश्वरको वरदानरूपी जीवनलाई खतरामा पार्ने औचित्य जनाउदैन। आफ्नो जीवनलाई खतरामा पार्दै यहोवाको जाँच गर्नु गलत हो भनी थाह भएको हुनाकारण, येशूले शैतानलाई भन्नु भयो: “फेरि यस्तो लेखिएको छ, ‘तैंले परमप्रभु [यहोवा, न्यु.व.] आफ्ना परमेश्वरको परीक्षा नगर।’” (मत्ती ४:५-७) जरुर पनि, शैतान सत्यको खोजी गर्ने व्यक्ति होइन। तर विवेकशील व्यक्तिहरूले तिनीहरूको आध्यात्मिक प्रगतिमा बाधा पुर्याउने किसिमको दृष्टिकोण व्यक्त गरेमा, त्यसबारे वास्तवमा शास्त्रपद्यहरूले के भन्दछन् र तिनीहरूको के अर्थ हो भनी बड़ो समझदारीका साथ परमेश्वरको वचनका सेवकले देखाउनु पर्दछ। यी सबै कुराहरू “सत्यको वचनलाई ठीकसँग प्रयोग गर्ने” विषयमा सम्मिलित छन्—र ईश्वर-तन्त्रीय पाठशालामा [थियोक्रेटिक मिनिस्ट्रि स्कूल] सिकाइने यो एउटा मुख्य पाठ हो।—२ तिमोथी २:१५.
अनुनयीताको आफ्नो ठाउँ छ
१२, १३. सेवकाईमा अनुनयीता प्रयोग गर्नु किन उचित हो?
१२ मसीही सेवकाईमा अनुनयीताको एउटा उचित ठाउँ छ। उदाहरणका लागि, पावलले आफ्ना सहकर्मी तिमोथीलाई तिनले सिकेका र “निश्चय भएका [विश्वास दिलाइएका, न्यु.व.] कुराहरूमा” लागि रहन भनी आग्रह गरे। (२ तिमोथी ३:१४) कोरिन्थमा, पावलले “हरेक विश्रामको दिनमा . . . सभाघरमा बहस गर्थे, औ यहूदीहरू र ग्रीकहरूलाई मनाउन प्रयत्न गर्थे।” (प्रेरित १८:१-४) एफिसस्मा तिनले सफलतापूर्वक ‘सभाघरमा पसीकन परमेश्वरको राज्यको विषयमा रीतिपूर्वक बहस गरेर तिनीहरूलाई मनाउँद थिए।” (प्रेरित १९:८) र रोममा तिनलाई आफ्नो डेरामै कैद पारेर राख्दा पनि, यी प्रेरितले मानिसहरूलाई आफूकहाँ बोलाइ पठाउँद थिए र तिनीहरूलाई “प्रष्टगरी [अनुययीताका साथ, न्यु.व.]” साक्षी दिंद थिए र केही मानिसहरूले विश्वास गरे।—प्रेरित २८:२३, २४.
१३ तर साक्षी जति नै अनुनयी भए तापनि, अनन्त जीवनका लागि उचित मानसिक प्रवृत्ति भएकाहरूले मात्र विश्वास गर्नेछन्। सन्तोषजनक तर्कहरू र स्पष्ट व्याख्याहरू, समझदारीसाथ प्रस्तुत गरेर, तिनीहरूलाई विश्वास दिलाउन सकिन्छ। तर तिनीहरूलाई विश्वास दिलाउनमा अरू कुन कुरा मद्दतकारी हुन सक्तछ?
तार्किक र पत्यारलाग्दो हुनुहोस्
१४. (क) तार्किक र क्रमअनुसार रीतिले आफ्नो विषय वस्तु अघि बढ़ाउनुमा कुन कुन कुरा समावेश छ? (ख) पत्यार लाग्दो तर्क प्रस्तुत गर्दा के आवश्यक छ?
१४ ईश्वर-तन्त्रीय सेवकाई पाठशालामा जोड़ दिइने वाक्पटुता सम्बन्धी गुणहरू मध्ये एउटा चाहिं विषयलाई तार्किक र क्रमानुसार विकाश गर्दै लैजान सक्नु हो। यो गुणको प्रयोग गर्नुको अर्थ, सबै मुख्य विषयहरू र आवश्यक सामग्रीलाई क्रमअनुसार प्रस्तुत गर्नु हो। पत्यारलाग्दो तर्क पेश गर्नु पनि महत्त्वपूर्ण छ र त्यसका लागि अकाट्य प्रमाण र एउटा असल जग बसाल्नु आवश्यक हुन्छ। साथै, स्रोता र वक्ता, दुवै सहमत हुने एउटा आधार कायम राखेर, स्रोताहरूलाई तर्क गर्ने मद्दत दिन, विभिन्न बुँदाहरूको यथेष्ट व्याख्या गर्न र ती बुँदाहरूलाई प्रभावशाली ढङ्गमा प्रस्तुत गर्न सक्नु पनि एउटा अर्को सम्बन्धित गुण हो। यी सबैका लागि, शास्त्रमा सूक्ष्म-निर्देशनहरू दिएको छ।
१५. (क) पावलले मार्सको डाँड़ामा बोल्दा कसरी ध्यान आकर्षित गर्दै आफ्ना स्रोताहरू सहमत हुने एउटा आधार स्थापित गरे?
१५ प्रेरित पावलले, प्राचीन एथेन्सको मार्स डाँड़ामा दिएका प्रसिद्ध भाषणमा, वाक्पटुता सम्बन्धी यी गुणहरू प्रत्यक्ष रूपमा देखिन्छन्। (प्रेरित १७:२२-३१) तिनले आफ्नो भाषणको शुरूमा दिएका भूमिका द्वारा स्रोताहरूको ध्यान आकर्षित गरे र दुवै पक्षलाई ग्रहणयोग्य हुने प्रकारको आधार बसाल्दै भने: “हे एथेन्सका मानिस हो, तपाईंहरूलाई म सब कुरामा अति धर्मनुरागी देख्तछु।” यस प्रकारको कुरा तिनीहरूका लागि एउटा प्रशंसा सरह थियो। एक जना “अजान परमेश्वरका” लागि बनाइएको देवता-थानको चर्चा गरे पछि, पावलले तार्किक र क्रमअनुसार ढङ्गमा, पत्यारलाग्दो तर्क प्रस्तुत गर्दै अघि बढ़े। तिनीहरूले न चिनेका यो परमेश्वरले “संसार र त्यसमा भएको यावत थोक बनाउनु भयो” भनी तिनले बताइ दिए। एथेना अथवा अन्य युनानी देवताहरू जस्ता न भएर, यी परमेश्वर ‘हातले बनाएको मन्दिरमा बास गर्नु हुन्न नता मानिसहरूका हातबाट उहाँलाई केही थोकको खाँचो भएझैं पूजा लिनु हुन्छ।’ यही परमेश्वरले हामीलाई जीवन दिनु भयो र हामीले अन्धो मानिसले झैं उहाँको खोजी गरेको उहाँ चाहनु हुन्न। तर अज्ञानताको समयमा गरिएको मूर्तिपूजाको हाम्रा सृष्टिकर्ताले वास्ता न गर्नु हुँदै, अब चाहिं ‘सबै ठाउँमा सब मानिसहरूलाई पश्चाताप गर्ने आज्ञा दिनु’ हुँदैछ भनी पावलले तर्क गरे। र यस पछि ‘परमेश्वरले नियुक्त गर्नु भएको मानिसद्वारा धर्मपूर्वक संसारको इन्साफ गर्नु हुनेछ र त्यस मानिसलाई उहाँले मरेकोबाट बिउँताउनु भएको छ’ भन्ने विषय तिर कुरा तार्किक ढङ्गमा लगियो। पावलले “येशूको र पुनरुत्थानको सुसमाचार प्रचार” गरिरहेको हुनाकारण, येशू ख्रीष्ट नै ईश्वरले नियुक्त गर्नु भएका न्यायाधीश हुनु हुनेछ भनी एथेन्सका ती मानिसहरूलाई थाह थियो।—प्रेरित १७:१८.
१६. मार्स डाँड़ामा पावलले दिएका भाषण र ईश्वर तन्त्रीय सेवकाई पाठशाला [थियोक्रेटिक मिनिस्ट्रि स्कूल] बाट हाम्रो सेवकाईमा के असर पर्न सक्तछ?
१६ यो साँचो हो, पावलले मार्स डाँड़ामा घर-घर गएर प्रचार गरिरहेका थिएनन्। तर तिनले दिएका भाषण र ईश्वर-तन्त्रीय पाठशालामा दिइने प्रशिक्षणबाट, यहोवाका साक्षीहरूले आफ्नो सेवकाईमा उन्नति गराउने धेरै कुरा सिक्न सक्छन्। हो, जसरी तार्किक र पत्यारलाग्दो ढङ्गमा प्रस्तुत गरिएका पावलका तर्कहरूले एथेन्सका केही निवासीहरूलाई विश्वास दिलायो, त्यसरी नै यी सबै कुराहरूले हामीलाई पनि अझ प्रभावशाली सेवक हुने मद्दत दिन्छ।—प्रेरित १७:३२-३४.
उपदेशजनक उखानहरू प्रयोग गर्नुहोस्
१७. सेवकाईको दौड़ानमा, कुन प्रकारका उदाहरणहरूको प्रयोग गरिनु पर्दछ?
१७ घर-घर गएर साक्षी दिन, साथै सेवकाईको अन्य क्षेत्रहरूमा असल उदाहरणहरूको प्रयोग गर्न, परमेश्वरका सेवकहरूले ईश्वर तन्त्रीय सेवकाई पाठशालाबाट [थियोक्रेटिक मिनिस्ट्री स्कूल] मद्दत पाउँदछन्। मुख्य मुख्य बुँदाहरूमाथि जोड़ दिनका लागि, साधारण र शिष्ट प्रकारका उदाहरणहरू प्रयोग गर्नु पर्दछ। साक्षीले ती उदाहरणहरू परिचित परिस्थितिहरूबाट लिन राम्रो हो र सबैले बुझ्नेगरी तिनीहरूको प्रयोग गर्नमा होसियार हुनु पर्दछ। येशूका उदाहरणहरूले यी सबै आवश्यकताहरू पूरा गरेका छन्।
१८. मत्ती १३:४५, ४६ सेवकाईमा कसरी उपयोगी हुन सक्तछ?
१८ उदाहरणका निम्ति, येशूका यी शब्दहरूमाथि विचार गर्नु होस्: “स्वर्गको राज्य असल मोतीहरू खोज्ने एउटा व्यापारी जस्तो हो, र त्यसले एउटा बहुमूल्य मोती भेट्टाएपछि गएर आफूसँग भएका सबै बेचेर त्यो किन्यो।” (मत्ती १३:४५, ४६) मोतीहरू बहुमूल्य रत्नहरू हुन् जो सिपीहरूको खोल र मोतीकीराहरू भित्र पाइन्छन्। तर कुनै कुनै मोतीहरू मात्र “बहुमूल्य” हुन्छन्। यो एउटा मोतीको ठूलो मूल्य बुझ्ने अन्तरदृष्टि त्यो व्यापारीसँग थियो र त्यसलाई प्राप्त गर्न सबै कुरा त्याग्न उ तयार थियो। र परमेश्वरको राज्यको साँच्चै नै मूल्याङ्कन गर्ने व्यक्तिले त्यो व्यापारीले झैं गर्नेछ भनी, हामीले यो उदाहरण कुनै पुनः भेट अथवा बाइबल अध्ययनका निम्ति जाँदा प्रयोग गर्न सक्नेछौं। यो हर बलिदानको योग्य छ भनी बुझेर, ईश्वरको राज्यलाई यस किसिमको मानिसले प्राथमिकता दिनेछ।
प्रेरणासाथ कुरा टुङ्गयाउनु होस्
१९. घर-घरको सेवामा जाँदा, हाम्रा निष्कर्षहरूले घर-पट्टीहरूलाई के देखाउनु पर्दछ?
१९ ईश्वर-तन्त्रीय सेवकाई पाठशालामा [थियोक्रेटिक मिनिस्ट्रि स्कूलमा] परमेश्वरका जनहरूले सिक्तछन् कि भाषण अथवा कुनै छलफलको निष्कर्ष, मुख्य विषयसँग सम्बन्धित हुनु पर्दछ र स्रोताहरूले के गर्नु पर्ने हो, सो देखाउन र त्यसलाई गर्ने प्रोत्साहन पनि दिन आवश्यक छ। घर-घरको सेवकाईमा हामी जाँदा, घर-पट्टीले के गर्नु परेको छ, अथवा बाइबल सम्बन्धी कुनै प्रकाशन लिन अर्थात् पुनः भेटका लागि राजी हुने जस्ता कुरा तिनलाई निश्चित् रूपमा देखाइ दिन जरुरी छ।
२०. मत्ती ७:२४-२७ मा, एउटा प्रेरणायुक्त निष्कर्षको के उदाहरण हामी पाउँदछौं?
२० येशूको डाँड़ाको उपदेशको निष्कर्षमा हामी यस कुराको एउटा राम्रो उदाहरण पाउँदछौं। सजिलैसँग बुझ्नसकिने एउटा उदाहरण द्वारा, येशूले, उहाँका कुराहरू सुन्न बुद्धिमानीको मार्ग हुनेछ भनी प्रदर्शित गर्नु भयो। उहाँले यस प्रकार कुरा टुङ्ग्याउनु भयो: “यसकारण जसले मेरा यी वचनहरू सुन्छ र गर्छ, म एउटा बुद्धिमान मानिससित त्यसको तुलना गर्छु, जसले आफ्नो घर चटानमाथि बनायो। अनि पानी परेर भल आयो, हुरी चल्यो, र त्यस घरमाथि बजारियो, र पनि त्यो ढलेन। किनकि त्यो चटानमाथि बसालिएको थियो। औ जसले मेरा यी कुरा सुनेर पनि त्यस अनुसार गर्दैन, त्यसको तुलना एउटा मूर्ख मानिससित गरिन्छ जसले आफ्नो घर बालुवामाथि बनायो। पानी परेर भल आयो, हुरी चल्यो र त्यस घरमाथि ठक्कर लाग्यो, र त्यो ढल्यो, अनि त्यसको पतन ठूलो भयो।” (मत्ती ७:२४-२७) परमेश्वरका सेवकहरूले घर-पट्टिहरूलाई प्रेरणा दिने कोशिश गर्नु पर्दछ भनी यस कुराले कति राम्रोसँग देखाउँदछ!
२१. हाम्रो यो छलफलबाट के प्रर्दशित भएको छ तर हामीले कुन कुरा स्वीकार्नु आवश्यक छ?
२१ ईश्वर-तन्त्रीय सेवकाई पाठशालाले [थियोक्रेटिक मिनिस्ट्री स्कूल] धेरै जनालाई परमेश्वरका राज्यका निपुण प्रचारकहरू हुने मद्दत दिन सक्तछ भनी यी अघि छलफल गरिएका बुँदाहरूबाट देख्न सकिन्छ। जरुर पनि, परमेश्वरबाट मात्र विशेष रूपमा निपुणता प्राप्त गर्न सकिन्छ। (२ कोरिन्थी ३:४-६) र प्रचारक जति नै निपुण भएता पनि, परमेश्वरले ख्रीष्ट द्वारा मानिसहरूलाई आफूतिर नतानुञ्जेलसम्म तिनीहरूलाई कसैले पनि विश्वास दिलाउन सक्तैनन्। (यूहन्ना १४:६) तापनि, अनन्त जीवनका लागि उचित मानसिक प्रवृत्ति राख्नेहरूको खोजी गर्दै हिंड्दा, परमेश्वरका सेवकहरूले यहोवाका सबै आत्मिक प्रबन्धहरूको जरुर पनि फायदा उठाउनु उचित हो। (w01/15/91)
तपाईंका जवाफहरू के हुन्?
◻ “हृदयमा शुद्धहुनेहरू” को हुन् र तिनीहरूले कसरी “परमेश्वरलाई देख्नेछन्”?
◻ घर-घर गएर राज्यको सन्देश प्रस्तुत गर्दा, कुन-कुन कुरालाई ध्यान दिनु पर्दछ?
◻ सेवकाईमा परमेश्वरको वचनको सही प्रयोग कसरी गर्न सकिन्छ?
◻ क्षेत्र-सेवकाईमा तार्किक र पत्यारलाग्दो ढङ्गमा कुरा कसरी प्रस्तुत गर्न सकिन्छ?
◻ सेवकाईमा प्रयोग गरिने उदाहरणहरू बारे के याद गर्नु पर्दछ?
◻ साक्षी दिने काममा प्रयोग गरिएका निष्कर्षहरूको के परिणाम हुनु पर्दछ?
[पृष्ठ ११-मा भएको चित्र]
येशूले भन्नु भयो कि “हृदयमा शुद्ध हुनेहरूले” “परमेश्वरलाई देख्नेछन्”। उहाँको भनाइको अर्थ के थियो?
[पृष्ठ १३-मा भएको चित्र]
शास्त्रका पद्यहरू उचित भूमिकाका साथ प्रस्तुत गरिनु पर्दछन् ठाउँ-ठाउँमा सुहाउँदो जोड़ दिंदै पढ़िनु पर्दछ र एउटा स्पष्ट र सही ढङ्गमा प्रयोग गरिनु पर्दछ