अरूहरूलाई हाम्रा प्रकाशनहरूको कदर गर्ने सहायता दिन
१ “परमेश्वरको वचन जीवित र प्रबल [छ]।” (हिब्रू ४:१२) बाइबलमा आधारित हाम्रा प्रकाशनहरूले मानिसहरूलाई परमेश्वरको वचनको शक्तिबाट लाभ उठाउने मदत दिन्छन्। यसकारण अनौपचारिक तवरमा साक्षी दिंदा वा घरघर गएर प्रचार गर्दा होस्, बाइबलमा मानिसहरूको जिज्ञासा बढाउन हामी यी प्रकाशनहरूको प्रयोग गर्छौं।
२ जनवरी महिनामा हामी के परमेश्वर साँच्चै हाम्रो चिन्ता गर्नुहुन्छ? गर्नुहुन्छ भने, उहाँले दुःख-कष्ट हुने अनुमति किन दिनुहुन्छ? के यसको कहिल्यै अन्त हुनेछ? भन्ने ब्रोश्यर चलाउने छौं। यो ब्रोश्यर भारतका सबै मुख्य भाषाहरूमा उपलब्ध छन् र मण्डलीहरूले पनि यसलाई पुग्दो मात्रामा प्राप्त गर्ने समय पाएका थिए। यसलाई प्रस्तुत गर्दा घरधनीको हृदयलाई छुने प्रयास गर्नु होस्। हाम्रो अद्भुत आशा उत्साहप्रद ढङ्गमा उनको सामु राखिदिनु होस्। तर यो कसरी गर्ने?
३ के परमेश्वर हाम्रो चिन्ता गर्नु हुन्छ ब्रोश्यर प्रस्तुत गर्न: आज संसारका समस्याहरूलाई प्रकाश पार्ने अथवा निकट भविष्यमा पृथ्वीले भोग्नु पर्ने खराब स्थितिहरूलाई औंल्याउने कुनै समाचारतिर ध्यान आकर्षित गराउदै तपाईंले वार्तालाप सुरु गर्न सक्नुहुन्छ।
त्यसपछि एउटा प्रश्न सोध्नुहोस्, जस्तो कि:
▪“परमेश्वरले संसारको वर्तमान स्थितिलाई कुन दृष्टिले हेर्नु हुन्छ? तपाईंलाई कस्तो लाग्छ? [जवाफ दिने मौका दिनुहोस्] तपाईं सायद छक्क पर्नु होला तर वास्तवमा परमेश्वरले पृथ्वीको भविष्य र मानवजातिमा ठूलो चासो लिनु भएको छ। र आज हामीले देखिरहेको खराब स्थितिलाई हटाउन उहाँले चाँडै नै केही गर्नु हुनेछ।” यसपछि घरधनीलाई विषय-सूचि देखाउनु होस् र सङ्क्षिप्तमा बताउनु होस् कि वर्तमानमा मानिसले अनुभव गरिरहेको पीडाले परमेश्वर हुनु हुन्न अथवा परमेश्वरले मानिसको चिन्ता गर्नु हुँदैन भन्ने कुरा प्रमाणित गर्दैन। परमेश्वरले केही समयका लागि दुःखकष्ट रहिरहन दिनु भए तापनि उहाँको उद्देश्य यस पृथ्वीलाई एउटा प्रमोदवन बनाउने हो जहाँ मानिसहरू पीडा र दुःखकष्टबाट मुक्त र आनन्दित भएर बस्नेछन्। विषय-सूचिको माथि पट्टि दिइएको नक्सालाई औंल्याउँदै भन्नु होस् कि यसप्रकारको स्थिति अब चाँडै नै आउनेछ भनेर हामीले पक्का आशा राखेका छौं।
४ यो ब्रोश्यर उपलब्ध नभएको खण्डमा अथवा उपयुक्त भएमा चाहिं हामी १९२-पाना भएका पुराना प्रकाशनहरूलाई विशेष मूल्यमा जनवरी महिनामा प्रस्तुत गर्नेछौं। तर यिनलाई प्रस्तुत गर्ने कसरी? सबैभन्दा पहिले त तपाईंको प्रचार-क्षेत्रमा बस्ने इमान्दार हृदय भएका मानिसहरूले सम्भवतः मन पराउने कुनै एउटा विषय ती प्रकाशनहरूबाट रोज्नु होस्। अब तपाईंले रोज्नु भएको विषयमाथि घरधनीको ध्यान आकर्षित गर्नुभन्दा अघि उनीसित छोटकरीमा छलफल गर्नका लागि हालसालैमा घटेको कुनै घटना वा आम चासोको कुनै एउटा विषयबारे सोच्नुहोस्। तपाईंले भन्नु हुने कुरालाई समर्थन गर्न सम्भवतः प्रकाशन अथवा बाइबलैबाट कुनै एउटा शास्त्रपद पढेर सुनाउनु भएपछि पुस्तक दिनुहोस्। त्यहाँबाट जानुभन्दा अघि घरधनीको सामु एउटा प्रश्न अथवा विचार राखिदिनु होस् र पुनःभेट गर्दा त्यसैलाई एउटा पूर्वाधारको रूपमा चलाउन सक्नु हुनेछ।
५ धेरै मण्डलीहरूमा इज दिस लाइफ अल देयर इज? अथवा लिस्नीङ्ग टु द ग्रेट टीचर पुस्तकहरू छन्। यी पुस्तकहरू उपलब्ध छन् भने यिनै प्रकाशनहरूमा आधारित वार्तालाप सुरु गर्ने तयारी गरेर घरधनीहरूलाई यी मध्ये कुनै एउटा पढ्न प्रोत्साहित किन नगर्ने? दी ट्रुथ द्यात लिड्स टु इटर्नल लाइफ पुस्तक प्रस्तुत गर्दा चाहिं माथि बताइएको तरिका चलाउदै यस उच्चतम बाइबल अध्ययन सामग्रीमा पाइने थुप्रै आधारभूत शिक्षाहरू छलफल गर्ने तयारी गर्न सक्नुहुन्छ।
६ तर कुनै बेला त पत्रिकाहरू अथवा एउटा पर्चा मात्र प्रस्तुत गर्न उपयुक्त होला। अरूहरूले पनि परमेश्वरको वचनको निर्देशनलाई स्वीकार गर्दै आफ्नो जीवनमा परमेश्वरको वचनको शक्ति अनुभव गर्न सकून् भनेर जोश र उत्साहकासाथ तिनीहरूलाई यी प्रकाशनहरू पढ्न प्रोत्साहित गर्ने ठोस कारण हामीसित छ।