अध्ययनका लागि सुझाव
यहोवाबारे बहुमूल्य रत्न भेट्टाउनुहोस्
बाइबलमा पढेको कुरा राम्ररी बुझ्न हामी विभिन्न अध्ययन सामग्री प्रयोग गर्न सक्छौँ। तर हामी ज्ञान बढाउनको लागि मात्र अध्ययन गर्न चाहँदैनौँ। बरु यहोवाको व्यक्तित्वबारे बहुमूल्य रत्न भेट्टाउन चाहन्छौँ, जसले उहाँप्रतिको हाम्रो प्रेमलाई बढाउँछ। यसो गर्न आफैलाई यस्तो प्रश्न सोध्न सक्छौँ: ‘बाइबलको यस विवरणबाट म यहोवाबारे के सिक्न सक्छु?’
हामी यहोवाले आफ्ना उल्लेखनीय गुणहरू प्रेम, बुद्धि, न्याय र शक्ति कसरी देखाउनुभएको छ भनेर खोज्न सक्छौँ। तर उहाँको व्यक्तित्वमा यीबाहेक अरू मनमोहक गुणहरू पनि समावेश छन्। उहाँका गुणहरूबारे थप जानकारी कहाँ पाउन सक्छौँ?
यहोवाका साक्षीहरूको लागि अनुसन्धान सहयोगी-को “यहोवा परमेश्वर” शीर्षकअन्तर्गत “यहोवाका गुणहरू” भन्ने उपशीर्षकमा हेर्नुहोस्। त्यसपछि तपाईँले पढिरहेको विवरणसित मिल्ने गुणहरूबारे अनुसन्धान गर्नुहोस्।