Elongelokalunga ndyoka li li mondjila ohali longo aantu ya kale ya simaneka Oohapu dhaKalunga
JESUS okwa li u ulike kutya okwa simaneka Oohapu dhaKalunga, Ombiimbeli. Shika okwa li e shi ulike sha yela momukalo moka a li a yamukula Ondiaboli sho ya li tayi mu makele. (Mateus 4:4-11) Pashiholelwa, mbela Jesus okwa li i inyenge ngiini sho Satana a li e mu makele a shitukithe omamanya iikwiila? Jesus okwa li a kondjitha emakelo ndyoka moku totha oohapu dha nwethwa mo ndhoka dha nyolwa kuMoses, ndhoka to vulu okulesha muDeuteronomium 8:3. Sho ishewe Ondiaboli ya li ya lombwele Jesus kutya otayi mu pe omapangelo agehe gomuuyuni ngele Jesus okwe yi tsile oongolo e te yi galikana, Jesus okwa li a yamukula ngiini? Jesus okwa li a tindi shoka a li ta pewa mokutotha ekotampango lyopamanyolo ndyoka li li muDeuteronomium 6:13.
Dhiladhila owala kwaashika. Nonando Jesus okwa li Omwana gwaKalunga, okwa li hi ikolelele kOmbiimbeli uuna ta longo aantu. Kali nando a landula omithigululwakalo dhopantu e ti ipwililikile Oohapu dhaKalunga. (Johannes 7:16-18) Onkee ano, oyendji yomaawiliki yomalongelokalunga yopethimbo lyaJesus kaya li ya simaneka Oohapu dhaKalunga ye mu fa. Mbela omolwashike? Oya li ya tala ko omithigululwakalo dhopantu dha simana dhi vule Omanyolo Omayapuki. Jesus okwa li a lombwele aakwatelikomeho yomalongelokalunga mboka shu ukilila a ti: “One otamu kutha oohapu dhaKalunga oonkondo omolwomithigululwakalo dheni. Aafudhime ne, Jesaja okwe mú hunganekele dha tsa sho ta ti: ‘Aantu mbaka ohaya simaneke ndje owala noohapu dhomokana, ihe omitima dhawo odhi li kokule nangame. Okulongela ndje kwawo osima yowala, oshoka otaya longo omalongo gopaipango yaantu.’”—Mateus 15:6-9.
Omalongelokalunga ogendji muuyuni, kutya nduno ogopakriste nenge oongoka kaage shi gopakriste ohaga ti kutya oga simaneka Ombiimbeli. Ihe, nonando ongawo mbela owu shi omalongelokalunga gangapi ngoka haga landula omithigululwakalo dhopantu uuna tadhi tsu ondumbo nomalongo ga yela ngoka taga adhika mOohapu dhaKalunga? Tala kiiholelwa mbika iyali.
OSHIKUNDATHANWA: Omadhinasimaneko gaawiliki yomalongelokalunga.
SHOKA OMBIIMBELI TAYI LONGO: Jesus ka li a panda aawiliki yomalongelokalunga yopethimbo lye omolwohole yawo yokuhola omadhinasimaneko nuuhalu wawo wokukala ya simana. Jesus okwa ti kutya aalumentu mboka oye hole “pomahala gaakuluntu miituthi nokiipundi ya simana moosinagoga. Oye hole okukundilwa pokuma hapu gongala aantu nokwiithanwa kaantu ‘omulongi.’” Jesus okwa lombwele aalongwa ye ta ti: “Inamu zimina, mu ithanwe omulongi, oshoka one amuhe aamwayinathana nomu na Omulongi gumwe awike. Inamu ithana nando olye gwokombanda yevi ‘ho’, oshoka one mu na Ho gumwe awike, oonguka gwomegulu.”—Mateus 23:1-10.
EPULO: Mbela aawiliki yelongelokalunga ndika oye hole okwiithanwa omadhinasimaneko nokukonga esimano momudhiingoloko nenge ohaya vulika koshipango shaJesus okuyanda okuninga ngaaka?
OSHIKUNDATHANWA: Okulongitha iihongwathano megalikano.
SHOKA OMBIIMBELI TAYI LONGO: “Ino ihongela oshiyelekela nenge efano lya shaa shoka megulu nenge kombanda yevi nenge momeya kohi yevi. Ino yi inyongamena, nenge wu yi simaneke.”—Eksodus 20:4, 5.
Omuyapostoli Johannes okwa li a nyolele Aakriste ta ti: “Yandeni iikalunga.”—1 Johannes 5:21.
EPULO: Mbela elongelokalunga ndika ohali vulika koshipango shOmbiimbeli shoka sha yela okuyanda elongitho lyomafano nenge lyiiyelekela melongelokalunga?
Oto vulu okumona elongelokalunga ndyoka li li mondjila
Kakele komwaalu ogundji gwomalongelokalunga ngoka taga ngwangwaneke kunena, oto vulu okumona ndyoka tali fala komwenyo. Opu na uukwatya owundji tawu vulu oku ku kwathela wu dhimbulule mo “elongelokalunga lya yela nolya yogoka koshipala shaKalunga.” (Jakob 1:27) Omanyolo ngoka ga kundathanwa moshitopolwa shika otaga vulu okukala ngaashi omandhindhiliko gomoondjila ngoka tage ke ku kwathela oku ku ulukila ondjila ndjoka yu uka kelongelokalunga ndyoka.
Omolwashike itoo pula Oonzapo dhaJehova dhi ku yelithile omayamukulo komapulo ngoka ge li moshitopolwa shika. Sho to konakona shoka tadhi ti, landula oshiholelwa oshiwanawa shaamboka ya li ko methelemumvo lyotango moshilando shaBerea. Konima sho yu uvu omuyapostoli Paulus tu uvitha, “oya kala nokukonakona Omanyolo, opo ya tale, ngele shono tashi popiwa kuPaulus oshoshili tuu.” (Iilonga 17:11) Ihe ngele owa fa Aaberea nowa simaneka Oohapu dhaKalunga noku dhi ilonga nuukeka oto ka mona ondjila ndjoka tayi fala komwenyo. Opo wu ende nondjila ndjoka owu na okuninga ehogololo.
[Oohapu dha simana pepandja 9]
Elongelokalunga lini hali ladhipike aantu ya konakone Omanyolo opo ya tale ngele shoka tayi ilongo oshoshili ngaa?