‘Ehalo lyaKalunga nali gwanithwe’
1. Oshipalanyolo shoshigongi shesiku lyi ikalekelwa shomumvo gwiilonga 2012 oshini, nomolwashike shi li tashi opalele?
1 Otwa shitwa omolwehalo lyaJehova. (Eh. 4:11) Onkee ano, itashi vulika tu gwanithe elalakano lyetu nopwaahe na okwiilonga nokulonga ehalo lyaKalunga. Shika kashi shi oshipu ngaashi sha fa tashi monika, molwaashoka otu na okukondjitha egamo lyetu okulonga shoka “sho opalela uuhalu womalutu getu nowomadhiladhilo getu” nenge okulonga “iilonga ya faathana noyaapagani.” (Ef. 2:3; 1 Pet. 4:3; 2 Pet. 2:10) Nopwaahe na ekwatho lyaKalunga, otatu kala moshiponga ‘shokumagwa kuSatana nokuvulika kuye.’ (2 Tim. 2:26) Opolohalama yoshigongi shesiku lyi ikalekelwa shomumvo gwiilonga 2012, otayi ka kwathela kehe gumwe gwomutse a kale metsokumwe neindilo etitatu lyasimanenena lyoshiholelwa shegalikano, ndyoka tali ti kutya “ehalo lyoye nali gwanithwe.” — Mat. 6:9, 10.
2. Omapulo geni taga ka yamukulwa pethimbo lyopolohalama yoshigongi?
2 Omapulo ngoka taga ka yamukulwa: Sho to pulakene kopolohalama, konga omayamukulo gomapulo taga landula: Iinima yilwe yini ya simana, kakele owala kokupulakena Oohapu dhaKalunga? Ongiini tatu vulu okumona kutya ehalo lyaKalunga olini? Omolwashike twa pumbwa okukwathela aantu yomaludhi agehe? Ongiini tatu vulu okumona onkalamwenyo yi li nawa notayi ti sha? Aagundjuka oshike mwa pumbwa okuninga opo mu ulike kutya otamu longo ehalo lyaJehova? Omalaleko nuuyamba geni haga zi mokulonga ehalo lyaKalunga? Omolwashike she endelela okutunga yalwe noku ya tsa omukumo pambepo?
3. Ongiini tatu vulu okumona uuwanawa mopolohalama?
3 Shilipaleka kutya opo to ka kala nokugandja eitulomo lela kopolohalama. Omupopi omutalelipo okwa tegelelwa a ka ze koBetel nenge a kale omutonateli omweendi. Kala wa manguluka okupopya naye komeho nokonima yopolohalama nosho wo nomukulukadhi gwe ngele okwa hokana. Ngele mwa shuna kegumbo, inamu “dhimbwa” okweendulula opolohalama mu li uukwanegumbo nokukundathana nkene tamu vulu okukala metsokumwe nehalo lyaKalunga. — Jak. 1:25.
4. Omolwashike sha simana okupititha komeho ehalo lyaKalunga?
4 Masiku mboka taya lalakanene omahalo gawo yene naamboka taya tindi okulonga ehalo lyaKalunga otaya ka hanagulwa po. (1 Joh. 2:17) Onkee ano, natu panduleni Jehova sho e tu longekidhila uuyelele mbuka wu li pethimbo wu tu kwathele tu pitithe komeho okulonga ehalo lye.