Oshoongalele shefiku le likalekelwa shomomudo woilonga 2009
Oshoongalele osho otashi ka kala shi na oshipalanyole tashi ti, ‘Pashukila oukalele woye noku u wanifa po,’ sha kanghamena kOvakolossi 4:17, NW. Eladipiko olo ola fimanenena kufye tu li Ovakriste, molwaashi otwa pumbwa okuwanifa po oukalele wetu noudiinini ngaashi Jesus a li a ninga. (Johannes 17:4) Omuyapostoli Paulus naye okwe tu tulila po yo oshihopaenenwa sha denga mbada shi na sha naasho. Okwa li a tokola toko okuwanifa po oukalele waye. — Oilonga 20:24.
Oshipopiwa shomupashukilishikandjo otashi ka ulika nghee ovaudifi ve lili noku lili va li va finda omashongo moukalele wavo. Opo nee, otaku ka shikula oshipopiwa shi na oshipalanyole “Kulika ohokwe yaavo to udifile.” Oshipopiwa osho otashi ka divilika nghee hatu dulu okukwafela ovo “ve na oikala iwa i na sha nomwenyo waalushe.” (Oil. 13:48, NW) Omupopi omutalelipo tete ota ka yandja oshipopiwa shi na oshipalanyole “Nghee hatu dulu okuliholola kutya otu li ovakalele vaKalunga,” omo ta ka kundafana nafye 2 Ovakorinto 6:1-10, ovelishe novelishe. Pefimbo lomutumba womutenya, omupopi oo omutalelipo ota ka yandja oshipopiwa shi na oshipalanyole “Kala wa lenga oukalele woye.” Otwe lineekela yo kutya otamu ka hafela oipopiwa ikwao oyo tai ka yandjwa poshoongalele osho ngaashi ei tai landula, “Ovanyasha novanamido, hafeleni oukalele weni” nosho yo “Ovanyasha ovo hava wanifa po oukalele wavo.” Ngeenge ope na oo a hala oku ka ninginifwa pushimwe shomoyoongalele oyo i li komesho, na shiivifile omupashukili omuunganeki fimbo pepi. Molwaashi ohatu konakona Oshungonangelo poyoongalele, eteleleni eekopi deni dOshungonangelo oyo tai konakonwa moshivike shoshoongalele osho shefiku le likalekelwa.
Eshi hatu pashukile oukalele wetu, otu na okukendabala tuha efe oinima imwe i lili i ye moshipala oilonga oyo Jehova e tu lineekelela. Natu lineekele kutya ehongo lopamhepo olo hatu ka pewa poshoongalele osho otali ke tu kwafela tu mone kutya oshike osho twa pumbwa okuninga po opo tu kale twa pitifa komesho oukalele wetu notu likonakone tu tale ngeenge ohatu wanifa po oukalele wetu pauyadi.