Ontopolwa 1
Oto Vulu Okukala nOnakuyiwa Yi Na Elago!
1, 2. Omushiti gwoye okwa hala u nyanyukilwe shike?
OKUPAPATELWA nohole kugumwe ngoka u hole. Okuyola taku zi komutima pethimbo lyokulya okuwanawa pamwe nookuume aaholike. Enyanyu okutala aanona yoye taya dhana ye uvite elago. Omathimbo ga fa ngaka ogo omathimbo gelago monkalamwenyo. Ihe kaantu oyendji, onkalamwenyo otayi monika ya fa tayi eta uupyakadhi wa kwata miiti wa landulathana. Ngele osho shi li ngawo nokungoye, ino teka omukumo.
2 Osho ehalo lyaKalunga opo ngoye u nyanyukilwe elago tali kalelele moonkalo oombwanawa momudhingoloko omwaanawa noonkondo. Shika kashi shi owala ondjodhi, oshoka Kalunga ote ku pe shili oshipatululo shonakuyiwa yelago ya tya ngaaka. Oshipatululo shoka osho ontseyo.
3. Ontseyo yini oyo oshipatululo shelago, nomolwashike tatu vulu okukala nuushili kutya Kalunga ota vulu okugandja ontseyo ndjoka?
3 Tse otatu popi ontseyo yoludhi lwi ikalekelwa ndjoka onene noonkondo yi vule uunongo wopantu. Oyo “ontseyo okutseya Kalunga.” (Omayeletumbulo 2:5, OB-1986) Konyala oomvula 2 000 dha piti, omunyoli gumwe gwOmbimbeli okwa tile: “Kehe tuu egumbo li na omudhiki, ihe ngoka a dhike ayihe, oKalunga.” (Aaheberi 3:4) Dhiladhila owala mpoka ontseyo yi thike ndjoka Omuningi gwaayihe e na okukala e na! Ombimbeli otayi ti kutya Kalunga oha yalula oonyothi adhihe nohe dhi pe omadhina. Edhiladhilo ndyoka kali shi tuu ekumithi, oshoka momulalawili gwetu omo amuke omu na oonyothi omamiliyona omayuvi omathele, naatseyinyothi otaya ti kutya oku na konyala omilalawili dhilwe omamiliyona omayuvi ethele! (Epsalmi 147:4) Kalunga okwa tseya wo ashihe kombinga yetu, olye ano ishewe kee shi ye ta vulu okugandja omayamukulo omawanawa ge na ko nasha nomapulo ga simana gonkalamwenyo?—Mateus 10:30.
4. Omolwashike tu na okutegelela Kalunga a gandje omalombwelo oku tu wilika, nembo lini tali kutha po ompumbwe ndjika?
4 Natu tye nduno aalumentu yaali otaya kambadhala okupangela iihauto yawo. Omulumentu gumwe ota geye e te ekelehi iilongitho ye pevi. Gulwe oto opaleke uupyakadhi a gundjila, ota pungulula oshipatululo shokuhwameka noti imemeha sho oindjina tayi stata notayi ende nawa. Itashi ka kala oshidhigu kungoye okutengeneka kutya oguni gwomaalumentu mbaka yaali a li e na embo lyomalombwelo lya za kunaku shi ninga. Kashi li mbela pandunge kutya Kalunga okwe tu pa omalombwelo ge tu wilike monkalamwenyo? Ngaashi tashi vulika u shi shi, Ombimbeli otayi ti kutya yo oyi li naanaa oyo—embo lyomalombwelo newiliko lya za kOmushiti gwetu, lya dhiladhililwa okugandja ontseyo okutseya Kalunga.—2 Timoteus 3:16.
5. Ontseyo ndjoka Ombimbeli yi na oyi na ongushu yi thike peni?
5 Ngele epopyo ndyoka lyOmbimbeli olyoshili, dhiladhila owala eliko lyontseyo mpoka li thike ndyoka li li membo moka! Omayeletumbulo 2:1-5 (OB-1986) otage tu ladhipike tu konge uunongo, tu wu fule ngaashi tatu fulu eliko lya holekwa—hamevi lyomadhiladhilo gopantu, ihe omOohapu dhaKalunga mwene. Ngele tatu wu kongo mudho, otatu ka “mona ontseyo okutseya Kalunga.” Oshoka Kalunga oku uvite ko omangambeko getu noompumbwe dhetu, ye ohe tu pe omalombwelo ngoka tage ke tu kwatha okukala nonkalamwenyo yombili noyelago. (Epsalmi 103:14; Jesaja 48:17) Kakele kaashono, ontseyo okutseya Kalunga ohayi tu pe onkundana ombwanawa yituntula.
OMWENYO GWAALUHE!
6. Eshilipaleko lini Jesus Kristus a gandja shi na ko nasha nontseyo okutseya Kalunga?
6 Omuntu a tseyika nawa mondjokonona, Jesus Kristus, okwa hokolola sha yela uukwatya mbuka wontseyo okutseya Kalunga. Okwa ti: “Nomwenyo gwaaluhe ogwo tuu nguka, oyo ye ku tseye, ongoye Kalunga awike gwashili, naanguka we mu tuma, Jesus Kristus.” (Johannes 17:3, oondanda otse twe dhi endameke.) Dhiladhila owala—ontseyo ndjoka tayi fala komwenyo gwaaluhe!
7. Opu na euliko lini kutya kasha li elalakano lyaKalunga tu se?
7 Ino tokola mbalambala kutya omwenyo gwaaluhe ogwo owala ondjodhi. Pehala lyaashono, tala omukalo ngoka olutu lwomuntu lwu umbwa. Olwu umbwa komukalo omukumithi opo lu vule okulola, okuuva, okunika, okumona nokuguma. Opu na iinima oyindji noonkondo kombanda yevi mbyoka hayi nyanyudha iiyuvitithi yetu—iikulya iitoye, omaimbilo ga nyanyudha guudhila, oongala dha nika nawa, omushitilo omwaanawa, uukuume uhokitha! Nuuluyi wetu uukumithi ou vule unene okompiuta ndjo ya dhenga mbanda, oshoka ohau tu kwatha okupandula nokunyanyukilwa iinima ayihe mbyoka. Oto dhiladhila mbela kutya Omushiti gwetu okwa hala tu se notu kanithe ayihe mbika? Itashi kala mbela shi li pandunge unene okuthika pehulithodhiladhilo kutya ye okwa hala tu kale tu uvite elago nokunyanyukilwa omwenyo sigo aluhe? Shika osho ontseyo okutseya Kalunga tayi vulu okutya kungoye.
OMWENYO MOPARADISA
8. Ombimbeli otayi ti shike kombinga yonakuyiwa yaantu?
8 Shoka Ombimbeli tayi popi shi na ko nasha nonakuyiwa yevi noyaantu otashi vulu okungongwa noshitya shimwe—Oparadisa! Jesus Kristus okwe yi popi sho a lombwele omulumentu ngoka ta si: “To [ka, NW] kala pamwe nangame muParadisa.” (Lukas 23:43) Kapu na omalimbililo, okutumbulwa kwOparadisa okwa dhiladhilitha omulumentu nguka onkalo yelago yaakuluntu yetu yotango, Adam naEva. Sho Kalunga e ya shiti, oya li ya gwanenena noya li ya kala moshikunino sha fa oparka shoka Omushiti a toto po nokwe shi tsike po. Osha li sha lukwa she eleka oshikunino shaEden, edhina ndyoka tali ti enyanyu.
9. Onkalamwenyo oya li ngiini mOparadisa yopetameko?
9 Oshikunino shika kasha li tuu shihokitha! Osha li oparadisa yoshili. Mokati komiti dhasho dho opala omwa li mu na ndhoka hadhi imi iiyimati iitoye. Sho Adam naEva ya li taya shiyike oshitopolwa shawo, ya nu momeya gasho omatoye noya toonona iiyimati yomiti dhasho, kaya li ye na etompelo lyokukala noshimpwiyu nenge ya tila. Nokuli iinamwenyo kaya li oshiponga kuyo, oshoka Kalunga okwa pe omulumentu nomukiintu gwe epangelo ye yi pangele ayihe nohole. Kakele kaashono, aantu yotango yaali oya li ye na uukolele uuwanawa. Andola oya dhigininine okuvulika kuKalunga, ando oya kala ye na onakuyiwa yaaluhe yi na elago. Oya li ya pewa iilonga yinyanyudha okutonatela egumbo lyawo Oparadisa onkumithi. Niishewe, Kalunga okwa pe Adam naEva elombwelo ‘yu udhithe evi noku li pangela.’ Yo noluvalo lwawo oya li ye na okutamununa mo oongamba dhOparadisa sigo opulanete yetu tayi ningi ehala ewanawa nolinyanyudha.—Genesis 1:28.
10. Sho Jesus a popi shi na ko nasha nOparadisa, okwa li a dhiladhila shike?
10 Ihe sho Jesus a tumbula Oparadisa, ka li ta pula omulumentu ngoka ta si a dhiladhile kethimbo lya piti lyonalenale. Aawe, Jesus okwa li ta popi shi na ko nasha nonakuyiwa! Okwa li a tseya kutya evi alihe ndyoka li li egumbo lyetu otali ka ninga oparadisa. Ano Kalunga ota ka gwanithila aantu nevi lyetu elalakano lye lyopetameko. (Jesaja 55:10, 11) Eeno, Oparadisa otayi ke etululwa! Na otayi ka kala ya tya ngiini? Oohapu dhaKalunga, Ombimbeli Ondjapuki, nayi yamukule.
ONKALAMWENYO MOPARADISA YE ETULULWA
11. MOparadisa ye etululwa, oshike tashi ka ningilwa omikithi, uukulupe neso?
11 Omikithi, uukulupe neso itayi ka kala po we. “Nena omeho gaaposi otaga tonata, nomakutsi goombolo otaga thituluka. Esiku ndyoka oshitiningili ta nuka ngomenye, nelaka lyoshikokoma tali imbi pombanda.” (Jesaja 35:5, 6) “Kalunga mwene ota ka kala pamwe [naantu] nota . . . ka theta omahodhi momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hulu po.”—Ehololo 21:3, 4, OB-1986.
12. Omolwashike tatu vulu okukala nuushili kutya itapu ka kala omuyonena, ekuni nuukolokoshi mOparadisa yomonakuyiwa?
12 Omuyonena, ekuni nuukolokoshi otayi ka hula po sigo aluhe. “Aadhudhu otaa ka vudhwa mo sheke . . . Oku na okathimbo kowala, omukeenakonashanakalunga nokee po we . . . okwa yi nale. Ihe aaneifupipiko otaa ka thigulula [evi, OB-1986].” (Epsalmi 37:9-11) “Ihe aakaanakonashanakalunga taa tudhwa moshilongo, naaniifundja oyo taa fulwa mo.”—Omayeletumbulo 2:22.
13. Kalunga ote ke eta ngiini ombili?
13 Ombili otayi ka pangela kombanda yevi alihe. “[Kalunga] ta hulitha [po] omalugodhi sigo kooha dhuuyuni: omatati ote ga yono po nomagonga te ga teyagula.” (Epsalmi 46:10) “Omuyuuki ta tsama nawa pomasiku ge nombili oyindji sigo kaku na we omwedhi.”—Epsalmi 72:7.
14, 15. Ombimbeli otayi ti shike kombinga yomahala gokukala, iilonga niikulya mOparadisa ye etululwa?
14 Otapu ka kala omahala gokukala ga gwana niilonga otayi ka kala yinyanyudha. “Oyo taa kala nokudhika omagumbo nokukala mo . . . Ihaa kala nokutunga, yalwe ando ya kale mo, ihaa kunu, yalwe ando ya kale nokulya iiyimati yawo, oshoka ongomasiku gomiti, osho taga ningi nomasiku gaantu yandje. Aahogololwa yandje oyo yene taa ku utha iilonga yiikaha yawo. Oyo itaa kala nokwiihepeka osima noluvalo lwawo itaaye lu valele we okusa kwohaluka.”—Jesaja 65:21-23.
15 Otapu ka kala eloolo lyiikulya yuundjolowele. “Ekuta lyiilya tali kala moshilongo nosigo koondungu dhoondundu.” (Epsalmi 72:16) “Evi lye eta iimeno yalyo; Kalunga, Kalunga ketu, te tu laleke nuuyamba.”—Epsalmi 67:7.
16. Omolwashike onkalamwenyo mOparadisa tayi ka kala yinyanyudha?
16 Omwenyo gwaaluhe meviparadisa otagu ka kala gunyanyudha. “Aayuuki otaa ka thigulula evi e taa kala mo sigo aluhe.” (Epsalmi 37:29, OB-1986) “Ombuga nomalondo taga ka nyanyukwa, ombuga tayi ka nyanyukwa pombanda, tayi iopaleke ngongala yomavo.”—Jesaja 35:1.
ONTSEYO NONAKUYIWA YOYE
17. (a) Ou na okuninga shike ngele onkalamwenyo mOparadisa ombwanawa kungoye? (b) Otu shi shi ngiini kutya Kalunga ota ka ninga omalunduluko omanene kombanda yevi?
17 Ngele onkalamwenyo mOparadisa ombwanawa kungoye, ino etha nando osha shi ku imbe okumona ontseyo okutseya Kalunga. Ye oku hole aantu nota ka ninga omalunduluko ngoka ga pumbiwa okuninga evi oparadisa. Dhoshili, ando owa li u na oonkondo okuhulitha po iihuna nokwaahenuuyuuki mbyoka yi li apuhe muuyuni, ando ito ke shi ninga mbela? Otatu dhiladhila mbela kutya Kalunga ite ke shi ninga? Dhoshili, Ombimbeli otayi popi komukalo gwa yela ethimbo sho Kalunga ta ka kutha po onkalelo ndjika yu udha etopauko noku yi pingena po nelelo lya gwanenena lyuuyuuki. (Daniel 2:44, KB) Ihe Ombimbeli otayi tu hokololele oshindji shaahe shi owala shika. Otayi tu ulukile nkene tatu vulu okuhupa tu ye muuyuni uupe wu uvanekwa kuKalunga.—2 Petrus 3:13; 1 Johannes 2:17.
18. Ontseyo okutseya Kalunga otayi vulu oku ku ningila shike ngashingeyi?
18 Ontseyo okutseya Kalunga otayi vulu wo oku ku ningila oshindji ngashingeyi. Omapulo gomuule nomapiyaganeki unene gonkalamwenyo otaga yamukulwa mOmbimbeli. Ngele to zimine ewiliko lyayo otashi ke ku kwatha okuninga uukuume naKalunga. Uuthembahenda ou thike peni! Naashika otashi ke ku kwatha u nyanyukilwe ombili ndjoka tayi vulu okugandjwa kuKalunga awike. (Aaroma 15:13, 33) Uuna to tameke okutseya ontseyo ndjika ya simana, ngoye oto tameke wo oshilonga sha simana noonkondo noshi na ondjambi konkalamwenyo yoye. Ito ki ipa nando uusama sho wa mona ontseyo okutseya Kalunga ndjoka tayi fala komwenyo gwaaluhe.
19. Epulo lini tatu ka kundathana montopolwa tayi landula?
19 Tse otu ulike kOmbimbeli yi li embo li na ontseyo okutseya Kalunga. Ihe otu shi shi ngiini kutya kali shi embo lyuunongo wopantu, ihe olyo sha oshinenenene shi vulithe mpoka? Otatu ka kundathana epulo ndika montopolwa tayi landula.
KONAKONA ONTSEYO YOYE
Omolwashike ontseyo okutseya Kalunga tayi vulu oku ku etela elago lyaaluhe?
Onkalamwenyo otayi ka kala ngiini mOparadisa yokevi ndjoka tayi ke ya?
Omolwashike to ka mona uuwanawa mokumona ontseyo okutseya Kalunga ngashingeyi?