Ontopolwa 13

Epangelo lyaKalunga lyOmbili

1. Omapangelo gaantu oga nyengwa okulonga shike?

OWA NDHINDHILIKA tuu omapangelo gaantu kutya nokuli gamwe po ngoka ge na oompangela oombwanawa, oga nyengwa okugwanitha shili oompumbwe dhaantu? Nonando olimwe lya vula okukandula po ando iilonga yomuyonena nuutondwe wopamihoko nenge ando lya gandja iikulya ya gwana nomagumbo kaapangelwa yalyo ayehe. Inaga mangulula thiluthilu aakwashilongo yago komikithi. Niishewe kapu na epangelo limwe lya vulu okuhulitha po uukulupe nenge okukeelela eso nenge okuyumuna oonakusa. Nonando tuu olimwe lye etele aakwashilongo yalyo nokuli ombili negameno tayi kalelele. Omapangelo gaantu ga nyengelelwa okukandula po omaupyakadhi gaantu omanene.

2. Etumwalaka enene lyOmbimbeli oshike?

² Omushiti gwetu oku shi nkene tse twa pumbwa shili epangelo lyuuyuki ndyoka tali vulitha aantu ayehe ya kale nomwenyo gwu udhithwa nonelago. Ano osho omolwashoka Ombimbeli tayi hokolola epangelo kohi yewiliko lyaKalunga. Dhoshili, epangelo ndika lyu uvanekwa kuKalunga olyo etumwalaka enene lyOmbimbeli.

3. Jesaja 9:6, 7 (OB-1986) ota ti ngiini kombinga yepangelo lyaKalunga?

³ Ihe ngiika to pula: ‘Openi mpono Ombimbeli tayi popi epangelo lyaKalunga?’ Jesaja 9:5, 6 oye oshiholelwa. PaMbimbeli yOshindonga yo 1986 oovelise ndhika otadhi ti (9:6, 7): “Otwa valelwa omunona! Otwa pewa omumati! Epangelo olye; oli li komapepe ge. Ota lukwa Omupukululi omukumithi, Kalunga omunankondo, He yomuukwaaluhe, [Omuwa] gwombili. Uukwaniilwa we kau na mpoka tau hulu po, noshilongo she otashi kala aluhe shi na ombili.”

4. Olye okanona hoka taka ningi omupangeli gwepangelo lyaKalunga?

⁴ Mpaka Ombimbeli otayi hempulula evalo lyokanona, omukwaniilwa. Konima yethimbo ‘omuna gwomukwaniilwa’ nguka okwa li e na okuninga omupangeli omunene, “Omuwa gwombili.” Ye okwa li e na okukala omukomeho gwepangelo ndika ekumithielela. Epangelo ndika otali ke etela evi alihe ombili, nombili otayi ka kala sigo aluhe. Okanona, hoka evalo lyako lya hunganekwa muJesaja 9:6, 7 (OB-1986) okwa li Jesus. Sho omuyengeli Gabriel a tseyitha evalo lyako komukadhona Maria, ye okwa popi Jesus a ti: “Ota ningi omukwaniilwa . . . nuukwaniilwa we kau na mpoka tau hulu po.”—Lukas 1:30-33.

ESIMANO LYUUKWANIILWA OLYA THINDWA

5. (a) Ombimbeli otayi holola ngiini esimano lyUukwaniilwa? (b) Uukwaniilwa waKalunga oshike, notau ka ninga shike?

⁵ Omanga yo ya li kombanda yevi, Jesus Kristus naayambidhidhi ye oshilonga shawo sha simana osha li okuuvitha nokulonga yamwe Uukwaniilwa waKalunga mboka tau ya. (Lukas 4:43, KB; 8:1, KB) Oyu ulike mOmbimbeli lwiikando 140 lwaampoka kUukwaniilwa mboka. Nokuli Jesus okwa longo aalanduli ye okugalikana kuKalunga: “Uukwaniilwa woye nau ye; ehalo lyoye nali gwanithwe kombanda yevi wo ngaashi megulu.” (Mateus 6:10, KB) Ano Uukwaniilwa mboka Aakriste haa galikana owo epangeloelela? Otashi vulika ino dhiladhila ngawo, ihe osho. Omwana gwaKalunga, Jesus Kristus, oye Omukwaniilwa gwUukwaniilwa. Nevi alihe otali ka kala oshitopolwa shoka ye ta pangele. Alikana otashi ka kala ngiini oshiwanawa uuna aantu itaa ka topagulwa we miigwana oyindji tayi kondjithathana, ihe aantu ayehe otaa ka kala ya hangana mombili kohi yepangelo lyUukwaniilwa waKalunga!

6. Ethimbo ndyoka Jesus a li kombanda yevi, omolwashike kwa tiwa Uukwaniilwa “we ya popepi” na “u li mokati keni”?

⁶ Johannes Omuninginithi okwa tameke okuuvitha epangelo ndika nokwa lombwele aantu: “Itedhululeni, oshoka [uukwaniilwa wegulu we] ya popepi.” (Mateus 3:1, 2, faathanitha KB.) Omolwashike Johannes a vula okutya ngawo? Omolwashoka Jesus, Ngoka a li ta ka ninga omupangeli gwepangelo lyaKalunga lyomegulu, a li po oku ka ninginithwa kuye nokugwayekwa nombepo ondjapuki yaKalunga. Ano oto vulu okuuva ko molwashike konima Jesus a ti kAafarisayi: “Tala! uukwaniilwa waKalunga u li mokati keni.” (Lukas 17:21, NW) Osha li omolwashoka Jesus, ngoka a langekwa kuKalunga oye omukwaniilwa, a li puyo hwiya. Pethimbo lye lyoomvula ndatu netata dheuvitho nodhelongo, molwuudhiginini we kuKalunga sigo omeso, Jesus oku ulike uuthemba we okukala omukwaniilwa.

7. Oshike tashi holola kutya Uukwaniilwa mboka owa li ompata yi na oshilonga pethimbo ndyoka Jesus a li kombanda yevi?

⁷ Okuholola kutya Uukwaniilwa waKalunga owa kala ompata yi na oshilonga pethimbo lyuukalele waKristus, natu taleni kwaashono sha ningilwe po mesiku lya tetekele eso lye. Ombimbeli otayi tu tseyithile nkene aantu ya tamaneke Jesus noohapu ndhika: “Nguno otwe mu mono ta tsitha aantu oondumbo noti indike okugandja oompale komukesari noti itile, oye Kristus, omukwaniilwa.” Sho tuu Pontius Pilatus omupangeli Omuroma u uvu iinima mbika, ye okwa pula Jesus: “Ongoye omukwaniilwa gwAajuda?”—Lukas 23:1-3.

8. (a) Jesus okwa yamukula ngiini sho ye a pulwa ngele ye omukwaniilwa? (b) Jesus okwa hala kutya ngiini sho ye a ti Uukwaniilwa we “kau shi womuuyuni mbuka”?

⁸ Jesus ina yamukula epulo lyaPilatus shu ukilila, ihe okwa ti: “Uukwaniilwa wandje kau shi womuuyuni mbuka, andola uukwaniilwa wandje womuuyuni mbuka, ando aamati yandje ya kondjo, ndaa gandjwe miikaha yAajuda; ihe ngashingeyi uukwaniilwa wandje kau shi womuka.” Jesus okwa yamukula ngawo molwashono Uukwaniilwa we kawa li tau ka kala wokevi. Ye okwa li e na okupangela okuza megulu, hangaashi omulumentu ngoka e li koshipangelapundi kombanda yevi. Oshoka ompata oya li mpoka kutya ngele Jesus okwa li e na uuthemba wokupangela e li omukwaniilwa nenge hasho, Pilatus okwa pula ishewe Jesus: “Ongoye ano omukwaniilwa?”

9. (a) Oshili onkumithi yini po Jesus a tseyitha? (b) Nena omapulo omanene geni po ge li po?

⁹ Dhoshili, Jesus okwa li mepangulo tali pula omwenyo gwe molwashono u uvitha epangelo epe. Ano Jesus okwa yamukula Pilatus: “Eeno, ngaashi to ti, ongame omukwaniilwa. Onkee nda valwa nonkee nde ya muuyuni, ndi hokolole oshili.” (Johannes 18:36, 37) Eeno, Jesus okwa longitha omwenyo gwe kombanda yevi okuhokololela aantu oshili ndjoka onkumithi kombinga yepangelo lyUukwaniilwa waKalunga. Osho sha li etumwalaka lye lya simana. NUukwaniilwa mbuka natango ou li ompata yi na oshilonga ngashingeyi. Ihe natango omapulo taga landula ge na okuyamukulwa: Epangelo lini po li na oshilonga unene monkalamwenyo yomuntu? Epangelo limwe lyontumba lyaantu, nenge Uukwaniilwa waKalunga mboka u na omupangeli gwawo Kristus?

OMALONGEKIDHO GEPANGELO EPE LYEVI

10. (a) Uunake Kalunga a mona ompumbwe yepangelo epe? (b) Openi mpono Ombimbeli yu ulike lwotango kepangelo ndika? (c) Olye a thanekwa keyoka?

¹⁰ Sho Satana a pondola Adam naEva mokuya moshipotha she shuunandumbo, Jehova okwa mono ompumbwe yepangelo epe kuuntu. Ano mbala Kalunga okwa tseyitha ompangela ye okudhika po epangelo lya tya ngawo. Ye oku ulike kepangelo ndika sho ye a tokola eyoka mokulombwela lelalela Satana Ondiaboli: “Etondathano tandi li tula mo opokati keni nomukiintu nopokati koluvalo lwoye nopokati koluvalo lwe; olwo talu ku nyanyagula po omutse gwoye, ongoye oto mu nyanyagula po oshithi shompadhi ye.”—Genesis 3:14, 15.

11. Oolye ya li taa ka tondathana?

¹¹ Ihe ngiika to pula: ‘Openi pwa popiwa sha muka kombinga yepangelo?’ Natu konakone nawa etumbulo ndika opo tu shi mone mo. Enyolo otali ti kutya opwa li tapu ka kala etondathano, nenge uutondwe, pokati kaSatana “nomukiintu.” Opwa li tapu ka kala wo uutondwe pokati ‘koluvalo’ nenge aanona yaSatana ‘nokoluvalo’ nenge aanona yomukiintu. Tango tu na okumona mo kutya olye ‘omukiintu’ nguka.

12. Oshike sha popiwa mEhololo 12 kombinga ‘yomukiintu’?

¹² Ye ke shi omukiintu gwokevi. Satana ke tonde lela omukiintu gumwe shi vulithe yamwe. Nguka oye omukiintu gwopathaneko. Sha hala kutya, ye otu ulike sha. Shika osha hololwa membo lyahugunina lyOmbimbeli, Ehololo, moka mwa gandjwa uuyelele owindji kombinga ye. Omwa popiwa kutya “omukiintu a zala etango nokwa lyata oompadhi komwedhi nokomutse gwe okwa zala oshishani shoonyothi omulongo nambali.” Opo shi tu kwathe okumona mo kutya olye ta thanekwa ‘komukiintu’ ngoka, otatu vulu okutala shoka Ehololo tali popi kombinga yokanona ke: “Nena omukiintu okwa vala okanona okamati, hoka ke na okupangela iigwana ayihe nondhimbo yosheela. Ihe okanona hoka oka fegulwa po noka falwa puKalunga noposhipangelapundi she.”—Ehololo 12:1-5, OB-1986.

13. Olye nenge oshike sha thanekwa ‘kokanona okamati’ ‘nokomukiintu’?

¹³ Ngele twa mono mo kutya “okanona okamati” olye nenge oshike, otashi tu kwatha okumona mo kutya “omukiintu” ota thaneke lye nenge shike. Okanona kake shi omuntu gwolela, ongaashi tuu omukiintu kee shi omukiintu gwopantu lela. Enyolo otali holola kutya “okanona okamati” haka otaka ka “pangela iigwana ayihe.” Ano “okanona” otaka thaneke epangelo lyaKalunga li na Jesus Kristus oye Omukwaniilwa. “Omukiintu” ota thaneke ehangano lyaKalunga lyiishitwa iidhiginini yomegulu. Ngaashi naanaa “okanona okamati” ke ya po ka za ‘momukiintu,’ osho wo ngaaka Omukwaniilwa, Jesus Kristus, e ya po a za mehangano lyomegulu, olutu lwiishitwa yopambepo iidhiginini megulu mbyoka hayi longele kumwe okugwanitha ompangela yaKalunga. Aagalati 4:26 otaa luku ehangano ndika “Jerusalem yokombanda.” Ano, sho Adam naEva ya ningile epangelo lyaKalunga oshipotha, Jehova okwa ningi po omalongekidho omolwepangelo ndika lyUukwaniilwa mboka tau vulu okukala etegameno kwaamboka ye hole uuyuki.

JEHOVA OTA DHIMBULUKWA EUVANEKO LYE

14. (a) Ongiini Jehova a holola kutya ye okwa dhimbulukwa euvaneko lye kombinga ‘yoluvalo’ ndoka talu ka nyanyagula Satana? (b) Olye “oluvalo” lwu uvanekwa?

¹⁴ Jehova ina dhimbwa euvaneko lye okutuma “oluvalo” ndoka lwa li lu na okukala omupangeli gwepangelo lyaKalunga. Omupangeli nguka okwa li e na okuhanagula po Satana mokunyanyagula po omutse gwe. (Aaroma 16:20; Aaheberi 2:14) Konima Jehova okwa ti kutya oluvalo ndoka lwu uvanekwa olwa li lu na okuza momulumentu omudhiginini Abraham. Jehova okwa lombwele Abraham: “Aantu ayehe kombanda yevi otaa ka yambekwa moluvalo lwoye.” (Genesis 22:18) Olye “oluvalo” ndoka lwu uvanekwa lu na okuza mezimo lyaAbraham? Ombimbeli otayi gandja eyamukulo konima sho tayi ti: “Abraham okwa pewa omauvaneko, ye mwene oluvalo lwe. Inaaku tiwa, nomaluvalo, ngoyendji, aawe, ongashika gumwe: Noluvalo lwoye, olwoKristus.” (Aagalati 3:16) Jehova okwa lombwele wo Isaak omwana gwaAbraham, naJakob omutekulu gwe, kutya “oluvalo” ‘lwomukiintu’ gwaKalunga lu na okuza mezimo lyawo.—Genesis 26:1-5; 28:10-14.

15, 16. Oshike tashi holola kutya “oluvalo” olwa li lu na okukala omukwaniilwa ta pangele?

¹⁵ Oohapu dhaJakob komwana gwe Juda otadhi holola sha yela kutya “oluvalo” nduka olwa li lu na okukala omukwaniilwa ta pangele: “Ondhimbo yuukwaniilwa [nenge, oonkondopangelo] itayi zi mo muJuda nepangelo moluvalo lwe, sigo taku ya [Silo, NW] ngoka te li pewa, ngoka iigwana tayi vulika kuye.” (Genesis 49:10, OB-1986) Jesus Kristus okwa valwa mezimo lyaJuda. Oye a li “Silo” ngoka “iigwana tayi vulika kuye.”—Aaheberi 7:14.

¹⁶ Konyala sho pwa piti oomvula 700 okuza peuvaneko ndyono kuJuda, Jehova okwa popi David gwomezimo lyaJuda: “Ongame nda mono David, omuntu gwandje . . . Noluvalo lwe onda hala, ndi lu kolekele sigo aluhe, noshipangelapundi she tashi kala ngashika omasiku gegulu.” (Epsalmi 89:29, 30) Kalunga okwa dhiladhila shike sho ta ti okwa hala okukoleka “oluvalo” lwaDavid sigo aluhe nonokutya “oshipangelapundi she” otashi kala “ngashika omasiku gegulu”? Jehova Kalunga otu ulike mwaashono kutya epangelo lyUukwaniilwa miikaha yomupangeli ngoka e mu langeke po, Jesus Kristus, otali ka kala sigo aluhe. Otu shi shi ngiini?

17. Ongiini tu shi shi kutya Jesus Kristus oye omupangeli omuuvanekwa?

¹⁷ Eeno, dhiladhila kwaashono Gabriel omuyengeli gwaJehova a lombwele Maria kombinga yokanona hoka a li e na okuvala. Ye okwa ti: “U na oku mu luka Jesus.” Ihe Jesus ka li owala e na okukala okanona, nenge nokuli omulumentu owala, kombanda yevi. Gabriel okwa tsikile ta ti: “Oye ta kala omunene, ye e na okwiithanwa Omuna gwOkombandambanda, Omuwa Kalunga note mu pe oshipundi shuukwaniilwa wahe David, ota ningi omukwaniilwa gwegumbo lyaJakob sigo aluhe, nuukwaniilwa we kau na mpoka tau hulu po.” (Lukas 1:31-33) Kashi shi oshikumithi nando sho Jehova a longekidha okudhika po epangelo lyuuyuki omolwuuwanawa waaluhe waamboka ye mu hole noye mu inekela?

18. (a) Ongiini Ombimbeli tayi hokolola ehulilo lyomapangelo guuyuni? (b) Epangelo lyaKalunga otali ka ningila aantu shike?

¹⁸ Ethimbo olya thikana opo epangelo lyUukwaniilwa waKalunga li hanagule po omapangelo agehe guuyuni. Jesus Kristus ota ka katuka e li Omukwaniilwa omusindani. Okuhokolola olugodhi nduka, Ombimbeli otayi ti: “Ihe pomasiku gaakwaniilwa mbeyaka Kalunga ngoka komegulu ota ka dhika uukwaniilwa itaau ka teka po sigo aluhe . . . Nowo otau ka nyanyagula notau ka teyagula omaukwaniilwa agehe noku ga hulitha po, ihe owo wene tau ka kala sigo aluhe.” (Daniel 2:44, KB; Ehololo 19:11-16) Ngele omapangelo gamwe agehe ga hulithwa po, epangelo lyaKalunga otali ka gwanitha oompumbwe dholela dhaantu. Omupangeli, Jesus Kristus, ota ka tonatela opo pwaa ka kale gumwe gwaapiya ye aadhiginini te ke ehama, ta ka kulupa nenge ando ta ka sa. Iilonga yomuyonena, ompumbwe yomagumbo, ondjala nomaupyakadhi gamwe gi ili ga tya ngawo, otayi ka kandulwa po. Otaku ka kala aluhe ombili negameno yashili kombanda yevi alihe. (2 Petrus 3:13; Ehololo 21:3-5) Ihe otu na okutseya oshindji kombinga yaambono taa ka pangela mepangelo lyUukwaniilwa waKalunga.

[Picture on page 112, 113]

Jesus okwa tumu aalanduli ye ya ka longe oshilonga

sha simana shokuuvitha kombinga yUukwaniilwa waKalunga

[Picture on page 114]

Pethimbo lyokupangulwa kwe, Jesus okwa tsikile okuuvitha Uukwaniilwa waKalunga

[Picture on page 119]

Ongiini ho tala ko Jesus—ongaashi tuu omukwaniilwa omusindani nenge ongaashi okahanona hoka kaa na ekwatho lyasha?