“Aanelago oyo mboka ya tseya ompumbwe yawo yopambepo”

NGELE uudhila tau penduka ongula, olundji ohau kala tau sheketa uule wokathimbo nopo nduno tau tameke okutuka u ka konge iikulya. Kongulohi, ohau galukile kiihandhila yawo, tau sheketa ko ishewe kashona e tau ka lala. Pomathimbo gontumba gomumvo ohau londwa, tau langele omayi e tau kokitha uunimwena wawo. Iinamwenyo yilwe ohayi landula omukalo ogwo tuu ngoka twa tumbula metetekelo.

Aantu hasho tu li ngawo. Dhoshili, ohatu li, ohatu kotha nohatu mono aanona, ihe oyendji yomutse inatu gwanenwa kiinima mbyoka owala. Otwa hala okutseya kutya omolwashike tu lile po. Otwa hala okutseya elalakano lyonkalamwenyo yetu. Otwa hala wo etegameno lyomonakuyiwa. Oompumbwe ndhika dha kwata miiti otadhi ulike uukwatya mboka hau kala u niwe owala kaantu, sha hala okutya, ompumbwe yiinima yopambepo nosho wo ohole yoku yi hola.

Otwa shitwa oshifetha shaKalunga

Ombimbeli otayi yelitha etompelo kutya omolwashike omuntu a valwa nompumbwe yiinima yopambepo, tayi ti: “Kalunga okwa shiti omuntu oshifetha she, e ya shiti omulumentu nomukiintu.” (Genesis 1:27) Okushitwa kwetu tu li “oshifetha shaKalunga” otaku ti kutya nokuli nando otwa nyatekwa kuulunde nokokwaagwanenena, otatu vulu okuulika omaukwatya gaKalunga gontumba. (Aaroma 5:12) Pashiholelwa, otatu vulu okutota po sha. Otu na wo uunongo, eiyuvo lyokulonga uuyuuki, nohatu vulu okuulikilathana ohole yopaiyambo. Natango, otatu vulu okudhiladhila kombinga yonakuziwa nosho wo otatu vulu okuninga omalongekidho gonakuyiwa.—Omayeletumbulo 4:7, OB-1954; Omuuvithi 3:1, 11; Mika 6:8; Johannes 13:34; 1 Johannes 4:8.

Ohole yetu yokuhola iinima yopambepo ohayi ulikwa nawa kehalo lyetu lyopaunshitwe okulongela Kalunga. Ngele itatu sile oshimpwiyu ompumbwe yetu yokukala nekwatathano li li nawa nOmushiti gwetu, itatu vulu okumona enyanyu lyashili notali kalelele. Jesus okwa ti: “Aanelago oyo mboka ya tseya ompumbwe yawo yopambepo.” (Mateus 5:3, NW) Ihe otu na okukala twa kotoka opo tu sile oshimpwiyu ompumbwe ndjoka noshili yopambepo—ooshili kombinga yaKalunga, omithikampango dhe nelalakano lye li na ko nasha naantu. Mbela openi tatu vulu okwaadha oshili yopambepo? OmOmbimbeli.

“Oohapu dhoye odho oshili”

Omuyapostoli Paulus okwa nyola a ti: “Enyolo kehe olya nyolithwa kOmbepo yaKalunga noli na oshilonga shokulonga oshili, okukumagidha, okupukulula.” (2 Timoteus 3:16) Oohapu dhaPaulus otadhi tsu kumwe naandhoka dhaJesus, ngoka a popi megalikano kuKalunga a ti: “Oohapu dhoye odho oshili.” Nena, otwa tseya kutya Oohapu odho Ombimbeli Ondjapuki, notatu ningi nawa ngele tatu konakona shoka twi itaala nosho wo omithikampango dhetu okutala ngele otadhi tsu kumwe nayo.—Johannes 17:17.

Mokuyelekanitha shoka twi itaala nOohapu dhaKalunga, otatu holele aantu yokuBerea shonale, mboka ya li ya shilipaleke ngele omalongo gaPaulus otaga tsu tuu kumwe nOmanyolo. Pehala lyokugandja uusama kAaberea, Lukas okwa li e ya pandulile iikala yawo mbyoka. Okwa nyola a ti: “Oya li ye na ehalo ewanawa lyokutaamba . . . , nesiku kehe oya kala nokukonakona Omanyolo, opo ya tale, ngele shono tashi popiwa kuPaulus, oshoshili tuu.” (Iilonga 17:11) Mokutala kekondjithathano lyopamalongelokalunga nomalongo gopamikalo mbyoka yi li apuhe nena, osha simana opo tu landule oshiholelwa shAaberea aanandunge.

Omukalo gulwe gwokudhimbulula oshili yopambepo ogwo okumona nkene tayi nwetha mo onkalamwenyo yaantu. (Mateus 7:17) Pashiholelwa, okukala pashili yOmbimbeli oku na okuninga omuntu a kale omusamane e li nawa, tate omuvali e li nawa, omukulukadhi e li nawa, nenge meme omuvali e li nawa, nokuninga ngawo otashi indjipaleke enyanyu lyuukwanegumbo notashi indjipaleke wo egwaneno lyawo. Jesus okwa ti: “Aanelago oomboka taa uvu oohapu dhaKalunga e taye dhi dhiginine.”—Lukas 11:28.

Oohapu dhaJesus otadhi tu dhimbulukitha ndhoka dhaHe gwomegulu, ngoka a li a lombwele Aaisraeli yonale a ti: “Ongame OMUWA Kalunga koye, ngoka tii ku [longo] shoka she ku opalela noku ku ulukila ondjila u na okweenda nayo. Ando to pulakene shili iipango yandje, andola omayambeko otage ku kungulukile ga fa omulonga tagu tondoka omeya, nuuyuuki otau tookele kungoye wa fa omakuthikuthi gomefuta.” (Jesaja 48:17, 18) Ayehe mboka ye hole uuwanawa nosho wo uuyuuki itaye ki inyengithwa tuu shili keindilo lyopahole lya tya ngaaka!

Yamwe oye hole ‘omakutsi gawo taga nywithwa’

Kalunga okwa pula nomutima aguhe Aaisraeli ya pulakene kiipango ye molwaashoka oya li ya pukithwa kiifundja yopalongelokalunga. (Episalomi 106:35-40) Tse wo otu na okukala twa kotokela iifundja. Shi na ko nasha naamboka hayi iti Aakriste, Paulus okwa nyola a ti: “Ethimbo otali ke ya, uuna aantu taa ka kala inaa hala okupulakena elongo lyu uka. Ihe otaa ka landula uuhalu wawo yene notaa ki ikongela aalongi mboka taye ya lombwele oohapu tadhi nywitha omakutsi gawo. Oyo otaa ke etha elongo lyoshili.”—2 Timoteus 4:3, 4.

Aawiliki yomalongelokalunga ohaya nywitha omakutsi gaantu mokukala ya panda iilonga mbyoka tayi mbilipaleke omahalo omawinayi, ngaashi omilalo pondje yondjokana, uushenge nuunkolwi. Ombimbeli otayi popi sha yela kutya mboka ya hokwa iinima ya tya ngaaka naamboka haye yi longo “itaya thigulula uukwaniilwa waKalunga.”—1 Aakorinto 6:9, 10, KB; Aaroma 1:24-32.

Kapu na omalimbililo kutya otashi pula uulaadhi opo omuntu u kale pamithikampango dhOmbimbeli, unene tuu ngele to shekwa, ihe otashi vulu okuningwa. Mokati kOonzapo dhaJehova omu na oohandimwe oyendji mboka ya li ya pikwa kiingangamithi, oonkolwi, aahondeli, iihwanga, aafuthi naafundja. Ihe nonando ongaaka oya taamba ko Oohapu dhaKalunga nokekwatho lyombepo ondjapuki oya ninga omalunduluko monkalamwenyo yawo opo ya ‘kale ngaashi Omuwa a hala ya kale.’ (Aakolossa 1:9, 10; 1 Aakorinto 6:11) Molwaashoka oye na ombili naKalunga, oya mona wo ombili yokomwenyo, nongaashi tatu ke shi mona, oye na etegameno lyashili lyonakuyiwa.

Etegameno lyUukwaniilwa

Etegameno lyOmbimbeli li na ko nasha nombili tayi kalelele yaantu aavuliki otali ka gwanithwa okupitila mUukwaniilwa waKalunga. Jesus okwa galikana moshiholelwa she shegalikano a ti: “Oshilongo shoye nashi ye [“uukwaniilwa woye nau ye,” KB]. Ehalo lyoye nali gwanithwe kombanda yevi wo ngaashi megulu.” (Mateus 6:10) Eeno, Uukwaniilwa waKalunga owo awike tau vulu okushilipaleka kutya ehalo lyaKalunga otali ka longwa kombanda yevi. Omolwashike? Omolwaashoka Uukwaniilwa mboka womegulu—epangelo li na omupangeli Jesus Kristus—owo tau ka longithwa kuKalunga okuulika uuthemba we wokupangela ombanda yevi alihe.—Episalomi 2:7-12; Daniel 7:13, 14.

E li Omukwaniilwa gwUukwaniilwa mboka womegulu, Jesus Kristus ota ka mangulula aantu aavuliki muupika woludhi kehe, mwa kwatelwa okupikwa kuulunde kehe waAdam nosho wo omikithi neso mbyoka twa thigulula kuwo. Ehololo 21:3, 4 otali ti: “Ngashingeyi egumbo lyaKalunga oli li paantu . . . [Jehova Kalunga] oye ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.”

Ombili tayi kalelele otayi ka kala kombanda yevi alihe. Mbela omolwashike tatu vulu okukala nuushili waashika? Etompelo otali hololwa muJesaja 11:9, ngoka ta ti: ‘[Aalelwa yUukwaniilwa] kondundu yandje ondjapuki itaya ka longa uuwinayi nenge iikolokosha, oshoka evi otali ka kala lyu udha okutseya OMUWA kwa fa omeya ga siikile efuta.’ Eeno, omuntu kehe kombanda yevi ota ka mona ontseyo yashili yokutseya Kalunga nota ka kala ha vulika kuye. Mbela etegameno ndika itali nyanyudha omutima gwoye? Ngele osho, ngashingeyi olyo ethimbo lyokutameka okumona ‘ontseyo yokutseya OMUWA.’

Mbela oto ka pulakena ketumwalaka lyUukwaniilwa?

Okupitila mUukwaniilwa, Kalunga ota ka hanagula po iilonga ayihe yaSatana e ta longo aantu oondjila dhe dhuuyuuki. Onkee ano, itashi kumitha sho Uukwaniilwa wa li enenedhiladhilo lyelongo lyaJesus. Okwa ti: “Elaka etoye lyoshilongo shaKalunga [“lyuukwaniilwa waKalunga,” KB] ondi na oku li uvitha wo miilando yilwe, oshoka osho naanaa shika Kalunga a tumu ndje, ndi shi ninge.” (Lukas 4:43) Kristus okwa li a lombwele aalongwa ye ya lombwele yalwe etumwalaka ndyoka. (Mateus 28:19, 20) Okwa li a hunganeke a ti: “Elaka ndika etoye lyOshilongo [“lyuukwaniilwa,” KB] otali ka uvithilwa aantu ayehe, li ningile iigwana ayihe onzapo; notaku ya ihe ehulilo.” (Mateus 24:14) Ehulilo ndyoka otali hedha popepi neendelelo. Ano inashi simana tuu opo aantu mboka ye na omitima dhu uka ya pulakene konkundana ombwanawa tayi hupitha omwenyo!

Albert ngoka a tumbulwa moshitopolwa sha tetekele, oku uvu etumwalaka lyUukwaniilwa sho omukulukadhi gwe nomwanamati ya li ya tameke okukonakona Ombimbeli nOonzapo dhaJehova. Tango, Albert okwa li e na omalimbililo. Okwa li nokuli a pula omukwambepo gumwe gwopuyo e ye a talele po omukulukadhi gwe nokamwanamati opo e ya hololele iifundja yOonzapo. Ihe omukwambepo ka li a hala okukala e na mo ombinga. Onkee ano Albert okwa tokola okupulakena koonkundathana dhOmbimbeli opo e yu ulukile omapuko ngoka tadhi popi. Konima owala yokukala po kwe kwotango, okwa li a kutha wo ombinga mekonakonombimbeli, e na ehalo enene okwiilonga oshindji. Konima yethimbo okwa yelitha kutya omolwashike iikala ye ya lunduluka. Okwa ti: “Shika osho naanaa nda kala tandi kongo uule wethimbo.”

Lwahugunina, Albert okwa tameke okusila oshimpwiyu oompumbwe dhe dhopambepo, noine shi uvila nando nayi. Oshili yOmbimbeli oye mu pe shoka a li ta kongo uule wonkalamwenyo ye ayihe—ekandulopo lyokwaahe na uuyuuki nolyeyonuko mbyoka yu udha muulipamwe waantu netegameno lyonakuyiwa. Oshili yOmbimbeli oye mu pe ombili yokomwenyo. Mbela ngoye ompumbwe yoye yiinima yopambepo oya silwa oshimpwiyu? Omolwashike itoo kutha ethimbo u leshe omapulo ngoka ge li momusholondondo moshimpungu shoka shi li pepandja 6? Ngele owa hala uuyelele wa gwedhwa po, Oonzapo dhaJehova otadhi ka kala dha nyanyukwa oku ku kwathela.

[Oshimpungu/Omathano pepandja 6]

Mbela ompumbwe yoye yopambepo otayi silwa oshimpwiyu?

Mbela iikulya yopambepo mbyoka ho mono oye ku kutitha? Otatu ku hiya u leshe omapulo taga landula nokupa okangombe ngoka to vulu okuyamukula mondjila.

□ Kalunga oye lye, nedhina lye olye?

□ Jesus Kristus oye lye? Omolwashike a li e na okusa? Ongiini eso lye tali vulu oku ku etela uuwanawa?

□ Mbela Ondiaboli oko yi li? Ngele oko yi li, openi ya za?

□ Oshike hashi tu ningilwa ngele tatu si?

□ Elalakano lyaKalunga olyashike li na ko nasha nevi nosho wo naantu?

□ Uukwaniilwa waKalunga oshike?

□ Omithikampango dhaKalunga dhi na ko nasha nuuyogoki odhini?

□ Muukwanegumbo, iinakugwanithwa yini omusamane nomukulukadhi ya pewa kuKalunga? Omakotampango gamwe gOmbimbeli ogeni ngoka taga humitha komeho enyanyu lyuukwanegumbo?

Ngele ku na uushili shi na ko nasha nomayamukulo gomapulo ngoka, oto vulu okwiimonena oshileshomwa Kalunga Ota Pula Shike kuTse? Oshileshomwa shoka sha nyanyangidhwa kOonzapo dhaJehova momalaka ge li konyala 300, otashi kundathana iikundathanwa yOmbimbeli yopetameko yi li 16 notashi gandja omayamukulo gopamanyolo komapulo agehe ngoka ge li momusholondondo pombanda mpoka.

[Omathano pepandja 4]

Aantu inaya fa iinamwenyo, oshoka yo oye na ompumbwe yiinima yopambepo

[Ethano pepandja 5]

“[Otaa] ki ikongela aalongi mboka taye ya lombwele oohapu tadhi nywitha omakutsi gawo.”—2 Timoteus 4:3.

[Ethano pepandja 7]

Ombili tayi kalelele otayi ke ya po okupitila mUukwaniilwa waKalunga wopaMessias