Mwaakhaviherye Yaale Ari Mmuteko wa Elukuluku Yoothene
“Ni wupuwelela mohihiyererya muteko anyu wa nroromelo, ni osivela wa muteko.”—1 ATES. 1:3.
MWAHAALA WAAKHULA HAI?
Taavi yaari makhalelo makina a muteko mu nsana noopacerya, nave yaale yaarumeela mmakhalelo yaawo yaakhaviheryiwa hai?
Makhalelo taani a muteko wa elukuluku yoothene munathamalelaanyu mmahiku ahu?
Munii mmukhaviherye hai muchu ori mmuteko wa elukuluku yoothene?
1. Paulo oona hai vooloca sa yaale yaamurumeela Yehova mwamvai?
MURUMMWA Paulo aanawuupuwela yaale yaalapa mwakuru wi eyeno vahoolo michaka saphaama. Paulo oorepa: “Ni wupuwelela mohihiyererya muteko anyu wa nroromelo, ni osivela wa muteko, ni ovilela woweheryerya wa Apwiyahu Yesu Kristu, va mithoni va Muluku Atithihu.” (1 Ates. 1:3) Yehova mukhateiye, onnuupuwela wiilipixerya woosivela wa oothene yaale anamurumeela yoowo moororomeleya, moohipwacha wakhala wi mikhalelo sa okumi aya sinnaweeriha olapa vancipale naari vakhaani.—Ahe. 6:10.
2. Tiheeni nnahaalaahu othokororya mmwaha yoola?
2 Arummwa akhwiihu ancipale—akhalai naari ahiihaano—anniilipixerya vancipale wi emurumeele Yehova elukuluku yoothene. Hankooni nthokororye orumeela wa akina mu nsana noopacerya. Nnahaala othokororya tho mikhalelo mikina sa muteko wa elukuluku yoothene mmahiku ahu nave woona mukhalelo nnaphwanelaahu owuupuwelela oosiveliwa ahu yaawo aniivaha mukhataaya wi erumeele mmikhalelo savameekhaaya.
AKIRISTU A NSANA NOOPACERYA
3, 4. (a) Akina yaarumeela hai mu nsana noopacerya? (b) Yaakhwaniherya hai soothowa saya soomwiilini?
3 Elukuluku vakhaani Yesu amanle opatisiwa, Owo aapaceryiha muteko yoowo waahaala ophiyerya mu elapo yoothene. (Luka 3:21-23; 4:14, 15, 43) Amanle okhwa, arummwa awe yaahoolela mu omwaramwaxa wa muteko yoola wa olaleerya. (Saw. 5:42; 6:7) Akiristu akina, ntoko Filipi, aarumeela ntoko mulaleeryi ni misiyonaario o Palestina. (Saw. 8:5, 40; 21:8) Paulo vamoha ni akina yaahiphiya ikulucu soorakamela. (Saw. 13:2-4; 14:26; 2 Akor. 1:19) Ntoko yootakiherya, Silvano (Sila), Marko, ni Luka—yaarumeela ntoko anamarepa. (1 Pet. 5:12) Arokora Eekiristu yaalapa vancipale vamoha ni anna yaala oororomeleya. (Saw. 18:26; Arom. 16:1, 2) Saweereya saya soolipiha sinneeriha wi Soorempwa Seekiriki Seekiristu ihakalalihe waalakhanya, nave sinnooniherya wi Yehova onnawuupuwela phaama akapuro awe.
4 Arummwa oopacerya a elukuluku yoothene yaaphwanya hai ichu soomwiilini? Ilukuluku ikina, awo yaanaakheliwa ntoko aleco ni okhaviheryiwa mmakhalelo makina ni Akiristu akhwaaya, nyenya awo hiyaavyaavya makhaviheryo yaawo. (1 Akor. 9:11-15) Achu akina ni miloko ikina moohakalala yaanavaha nikhaviheryo. (Mwaalakhanye Saweriwa Tarummwa 16:14, 15; Afilipi 4:15-18.) Paulo ni asinthamwene awe aweeceeca yaanalapa mukhataaya wi yiivakulele soothowa saya.
ARUMMWA A ELUKULUKU YOOTHENE MMAHIKU AMUTANO
5. Moonelo taani mutheli mmoha olonceiye sa okumi aya mmuteko wa elukuluku yoothene?
5 Olelo tho, ancipale anniivoliiherya mukhataaya mmakhalelo oohiyanahiyana a muteko wa elukuluku yoothene. (Moone ekaaxa “Makhalelo a Muteko wa Elukuluku Yoothene.”) Awo anoona hai vooloca sa muteko athanlilaaya? Nla nikoho munaphwanelaanyu waakoha yaawo, nave munahaala woonana wi munahaala ophura mweerano hiihaa. Muthokororye yootakiherya emoha: Munna mmoha yoowo aarumeenle ntoko piyoneero a elukuluku yoothene, piyoneero avameekhaaya, misiyonaario, ni o emusi ya Peteli mu elapo yookhopela aaloca: “Kinoona wi ovolowa mmuteko wa elukuluku yoothene yoolakelela yaphaama kipankaaka. Kirino iyaakha sa oyariwa 18, kaari ookawanyeya variyari va olakelela ovolowa mu ixikola sa vasulu naari ovolowa mmuteko wa mulaponi weelukuluku yoothene, ni opiyoneero. Saweereya sookooniherya wi Yehova hanacuwala wiilipixerya muchu onapakeiye wi amurumeele yoowo elukuluku yoothene. Kinnawerya opharihela mavyakelo oothene Yehova okivanheiye mmakhalelo ahinaweryeya weerano mmuteko weelapo.” Mwaariye onnaloca: “Orummwa ori woothene onnakikhaviherya wunnuwa. Wiiliwiili ninnalawiha okhapelela ni ohoolela wa Yehova mmukhalelo ohinaweryeya othariha. Kinnamuthamalela Yehova mahiku oothene ntakhara okumi ahu mmuteko wa elukuluku yoothene.” Mwaamusiveliwa woona okumi anyu mmukhalelo yoola?
6. Yoororomela taani nnaphwanelaahu okhalano vooloca sa moonelo wa Yehova?
6 Aai, akina arino mikhalelo sa okumi sineeriha wi ehiwerye wuuka mmuteko wa elukuluku yoothene ophiyerya mweryo yoola. Ninnaroromela wi Yehova tho onnathamalela wiilipixerya waya wa okumi woothene. Nkuupuwelani vooloca sa yaale Paulo aalonceiye mu Filemoni 1-3, ophitaanyerya yaale yaapaka makupa a muloko wa Kolose. (Mwaalakhanye.) Paulo aahaathamalela yaawo, nave Yehova tho aahaathamalela. Mmukhalelo mmohamoha, Atiithi ahu awirimu annathamalela muteko anyu. Vano, ti mwawiihai munahaalaanyu waakhaviherya yaale ari mmuteko wa elukuluku yoothene?
MWAAKHAVIHERYE MAPIYONEERO
7, 8. Muteko wa opiyoneero onavolowela eheeni, nave akina mmulokoni anawerya hai waakhaviherya mapiyoneero?
7 Ntoko alaleeryi a nsana noopacerya, mapiyoneero amvai ehime etokotoko ya olipiha miloko. Akina annalakelela omaliha iwora 70 mu orummwa mweeri ti mweeri. Munii mwaakhaviherye hai yaawo?
8 Piyoneero murokora oniichaniwa Saari onnaloca: “Mapiyoneero anooniwa ntoko toolipa, nthowa na oya mmuteko wa olaleerya nihiku nnihiku. Nlelo, awo annachuna olipihiwa.” (Arom. 1:11, 12) Murokora mukina yoowo aawenrye orumeela ntoko piyoneero mu iyaakha ikina aaloca sa mapiyoneero mmulokoni mwawe: “Mapiyoneero annalapa mwakuru ni moohihiyererya. Vaava akina anaavahaaya soowela, soolya, tiisele, ikhorowa, awo annathamalela. Eyo ennawooniherya wi munnaathokororya chiryene.”
9, 10. Tiheeni akina aneeraaya wi yaakhaviherye mapiyoneero mmilokoni saya?
9 Mwaamusiveliwa waakhaviherya mapiyoneero mu orummwa? Piyoneero aniichaniwa Poopi aaloca: “Ninnachuna nikhaviheryo nawaaca variyari va esumana.” Piyoneero mukina mmuloko mmoha moha aahaaceererya: “Ti woovila okhalano nthamwene a muteko othana.” Murokora onarumeela o Peteli ya Proklin onnaloca sa muteko awe wa opiyoneero: “Murokora mmoha aarino ekaaro aaloca, ‘elukuluku eri yoothene oneeraawe ohikhalano nthamwene, okiichane, nave nnahaala olaleerya vamoha.’ Chiryene owo aakhaviherya opiyoneero aka.” Nave Xaari aahooniherya moonelo ola waphaama: “Emanle olaleerya, mapiyoneero aciye wiiliwiili anakhala meekhaaya. Waawopa awo mmiteko mikina onnaalipiha.”
10 Uupuwelaka muteko awe wa opiyoneero ni arokora akina aciye, murokora mmoha aarumeenle mmuteko wa opiyoneero mu iyaakha 50 onnaloca: “Asitokweene ahu yaanaaxekurya mapiyoneero savira miyeeri vakhaani. Awo yaanakoha vooloca sa ekumi ahu ni muteko ahu wa mulaponi ni waakhanle wi nookhalano sawuukhula. Awo yaananikhaviherya chiryene. Awo yaanaxekurya vaate vahu wi yoone naachunaka nikhaviheryo.” Ela akhweya ennawuupuxeryaani othamalela wa Paulo nikhaviheryo na emusi o Efeso.—2 Tim. 1:18.
11. Enavolowela heeni orumeela ntoko piyoneero avameekhaaya?
11 Miloko mikina sinnareelihiwa moorweela wa okhalano mapiyoneero avameekhaaya. Ancipale a anna ni arokora yaala aniilipixerya omaliha iwora 130 mweeri ti mweeri mu orummwa. Nthowa na elukuluku anamalihaaya mo orummwa ni okhaviherya mmakhalelo makina, haano elukuluku ya okhalano muteko mulaponi. Efiliyale enaakhaviherya awo ni ikhorowa savakhaani mweeri ti mweeri wi ewerye oteteiwa ni orummwa waya.
12. Asitokweene ni anna akina anawerya hai waakhaviherya mapiyoneero avameekhaaya?
12 Nnii niwerye hai waakhaviherya mapiyoneero avameekhaaya? Mutokweene mmoha mu efiliyale yoowo oniiwanana ni yaawo onnaloca: “Asitokweene anaphwanela oloca ni yaawo, osuwela makhalelo aya, ni olakelela mukhalelo wa waakhaviherya. Anamoona akina annuupuwela wi mapiyoneero avameekhaaya annakhapeleliwa phaama woona wi annavahiwa ikhorowa vakhaani, nyenya anna a vanipuroni ananwerya waakhaviherya yaawo mmakhalelo oohiyanahiyana.” Ntoko mapiyoneero a elukuluku yoothene, mapiyoneero avameekhaaya, annathamalela okhalano asinthamwene mmuteko wa mmacani. Mwanwerya waakhaviherya mmukhalelo yoowo?
MWAAKHAVIHERYE OOWEHERYA AWEECEECA
13, 14. (a) Tiheeni nnaphwanelaahu wuupuwela vooloca sa aweeceeca a ekulucu? (b) Tiheeni munaweryaanyu weera wi mwaakhaviherye yaale ari mmuteko wa weeceeca?
13 Aweeceeca a ekulucu ni asaaraya wiiliwiili anooniwa ntoko oolipa omunepani, achu oovilela. Ela eparipari, nyenya awo tho annachuna olipihiwa, asinthamwene mu orummwa, ni waawopa mmathatelo. Hanka wakhala wi awo anamwiiceliwa naari wi awo ari oxipitali, akhweya anachuna othaliwa naari olooliwa? Ohakalala taani awo anaphwanyaaya vaavaa anna ni arokora anaakhaviheryaaya soothowa saya ni waapwacha yaawo. Nnanwerya waanyiherya erempwe mu liivuru a Saweriwa Tarummwa yeeyo yaawoonihenrye nikhaviheryo “mulipa-mureche ósiveliwa” Luka Paulo vamoha ni asinthamwene awe akina weeceeca.—Akol. 4:14; Saw. 20:5–21:18.
14 Aweeceeca a ikulucu vamoha ni asaaraya annaachuna asinthamwene. Aweeceeca mmoha a ekulucu oorepa: “Asinthamwene aka annasuwela kaachunaka olipihiwa. Awo annapaka makoho amiruku, nave eyo ennakikhaviherya oloca yeeyo enakuukhula. Pahiru okiwiriyana waya phaama onnakhaviherya vancipale.” Aweeceeca a ekulucu vamoha ni asaaraya annathamalela vancipale opwacha anna ni arokora aya anawooniheryaaya.
MWAAKHAVIHERYE YAALE ANARUMEELA O EMUSI YA PETELI
15, 16. Muteko taani yaale anarumeela mu imusi sa Peteli ni Ipa sa Mithukumano anapakaaya, nave nnii naakhaviherye mwawiihai?
15 Mu elapo yoothene, yaale anarumeela o Peteli ni Ipa sa Mithukumano annakhaviherya vancipale muteko wa Omwene mu ilapo sa efiliyale aya. Wakhala wi muloko anyu naari ekulucu anyu aakhalawo Mapetelita, munii mooniherye hai wi munnawuupuwela?
16 Vaavaa yaaphin’yaaya o Peteli, awo yaakhalano munkhela wa owaani, woona wi aahiya emusi ni asinthamwene aya oosiveliwa. Annahakalala vancipale vaavaa Mapetelita akhwaaya ni muloko aya muvyaani anakhalaaya asinthamwene aya! (Mar. 10:29, 30) Miteko saya sinnaweeriha oya mmithukumano sa muloko ni wuuka mmuteko wa mmacani omakuchuwelo wa esumana. Ilukuluku ikina, Mapetelita annakhalano miteko sawaaceererya. Vaavaa muloko oniiwexexaaya yeela ni waathamalela Mapetelita ni muteko anapharaaya, oothene annaphura.—Mwaalakhanye 1 Atesalonika 2:9.
MWAAKHAVIHERYE YAALE ANARUMEELA MMUTEKO WA ELUKULUKU YOOTHENE MU ILAPO SOOKHOPELA
17, 18. Orummwa mu ilapo sookhopela onavolowela miteko taani?
17 Yaale aneemererya orummwa wi yarumeele mu ilapo sookhopela annaphwanya soolya, elocelo, sookhovelela, ni makhalelo ari oohiyana vancipale ni yaawo yaakhovelenlaaya. Ntakhara heeni awo anneemererya otorokeya yoola?
18 Akina mamisiyonaario, yaawo voopacerya anarumeela mmuteko wa mmacani mwemmo ancipale anavyakihiwaaya phaama. Efiliyale enaavaha mamisiyonaario ipa sawiiyeviha ni ikhorowa wi evakulele soothowa saya. Akina anarumeela mu ilapo sookhopela annarummwa wi yarumeele ofiliyale naari okhaviherya otekiwa wa ifiliyale, ikupweete sootaphulela, Ipa sa Mithukumano, naari Ipa sa Omwene. Annavahiwa soolya, mapuro ookhala, ni ichu ikina. Ntoko emusi ya Peteli, awo moohihiyererya annaya mmithukumano ni wuuka mu orummwa, mwawiihiiha awo annakhaviherya mmikhalelo sincipale.
19. Tiheeni nnaphwanelaahu osuwela vooloca sa yaale anarumeela mu ilapo sookhopela?
19 Munii muwerye hai owuupuwelela arummwa yaala a elukuluku yoothene? Muupuwele ela—voopaceryani—awo akhweya hakhovelenle soolya sa nipuro nenlo. Munaphwanela wuupuwela yeela vaavaa munaawopaanyu wi elye; ti yaphaama opacerya waakoha yeeyo yaahaala waasivela olya naari weererya. Mpise murima vaavaa awo anahuseryaaya elocelo ni sookhovelela sa vanipuroni. Enahaala ovira elukuluku yincipale ehaakumve wiiwexexa soothene munalocaanyu, nyenya moosivela munanwerya waakhaviherya awo oromola masu. Awo annachuna ohuserya!
20. Mmukhalelo taani waphaama nnaweryaahu waakhaviherya yaale anarumeela mmuteko wa elukuluku yoothene vamoha ni asitiithi aya?
20 Arummwa a elukuluku yoothene annuuluvala, navetho asitiithi aya annuuluvala. Wakhala wi asitiithi Anamoona, moohikhwa minikwa yoochunaaya etokotokoxa ti yawi anamwanaaya etitelele orumeela waya. (3 Yoh. 4) Aai, arummwa a elukuluku yoothene anahaala weera yeeyo anaweryaaya wi ekhaviherye soothowa sa asitiithi aya nave wiiliwiili anahaala waaxekuryaka wakhala wooweryeya. Nivano, yaale ari owaani ananwerya waakhaviherya yaale ari mmuteko wa elukuluku yoothene moorweela wa okhaviherya soothowa sa asitiithi aya awuuluvala. Muhicuwale wi arummwa a elukuluku yoothene aakhalano mirici sookhweleya mmuteko wookhweleyaxa oneeriwa veelaponi. (Mat. 28:19, 20) Apwanne nyuwaano naari muloko anyu onanwerya okhaviherya wakhala wi asitiithi a arummwa a elukuluku yoothene onnachuna nikhaviheryo?
21. Yaale anarumeela mmuteko wa elukuluku yoothene anoona hai vooloca sa nikhaviheryo ni olipiha onarweela wa akina?
21 Yaale anavolowa mmuteko wa elukuluku yoothene annalapa vancipale, ohiya waavya ikhorowa, nyenya ovaha—Yehova ni akina. Awo annathamalela vancipale nikhaviheryo munaweryaanyu waavaha. Murokora mmoha onarumeela mweelapo yookhopela ooloca moonelo wa ancipale: “Masu a othamalela annooniherya wi akina annawuupuwelaani nave wi awo ari oohakalala ni yeeyo oneeraawe.”
22. Munoona hai vooloca sa muteko wa elukuluku yoothene?
22 Omurumeela Yehova elukuluku yoothene chiryene mukhalelo woohakalalihaxa wa okumi. Owo ti woovila, woohusiha, woohakalaliha. Nave owo mukhalelo waphaama wa wiireherya wa muteko woohakalaliha wa elukuluku yoohimala yoowo onahaala opuhiwa ni arummwa oothene oororomeleya a Yehova vathi va Omwene wa Muluku. Hankooni oothene hiyo ‘nupuwelele mohihiyererya muteko nroromelo, ni osivela’ wa yaale anarumeela mmuteko wa elukuluku yoothene.—1 Ates. 1:3.
[Ekaaxa va epaaxina 29]
Makhalelo a Muteko wa Elukuluku Yoothene
Mapiyoneero a elukuluku yoothene annamaliha iwora 70 vamweerini mu orummwa, erumeelaka mmulokoni mwaya naari mmapuro onachuneyawo nikhaviheryo ntokweene.
Mapiyoneero avameekhaaya annamaliha iwora 130 vamweerini mu orummwa, wiiliwiili annarumihiwa mmapuro oriwo othowa otokweene.
Ooweherya aweeceeca annarumeela miloko sincipale, ehoolelaka mu orummwa nave ekhaviheryaka miloko mmikhalelo mikina.
Achu a emusi ya Peteli anarumeela o filiyale naari ekupweete yootaphulela ekhaviheryaka opakiwa wa soolaleeryiwa naari soohoolela mu elapo enahooleliwa ni efiliyale aya.
Mamisiyonaario wiiliwiili annarumihiwa orumeela mu ilapo sookhopela. Mamisiyonaario ancipale anamaliha iwora 130 vamweerini mu orummwa.
Arummwa ookhopela ni alipa wiiveleela annaya mu ilapo soohiyana hiyana wi ekhaviherye otekiwa wa ifiliyale, ikupweete sootaphulela, Ipa sa Mithukumano, ni Ipa sa Omwene.
Arummwa Ooteka Ipa sa Omwene annavyakihiwa wi etekeke Ipa sa Omwene ni okhaviherya soothowa ikina sa oteka mu elapo aya.