OVAANELA WOOCHARELA
YOOHUSERYA 7
Ovilela
Nlakiheryo: “[Awo] yaatitelela ehihiyerenrye, ohusiha ni olaleerya michaka saphaama.”—Saw. 5:42.
Tiheeni Paulo Opankeiye?
1. Moone EXILEMA, naari mwaalakhanye Saweeriwa ti Arummwa 19:8-10. Voocharela, mwaakhule makoho anacharela:
Moohipwacha waakaahiwa, nnasuwela hai wi Paulo aahivilela wi aakhaviherye yaale yoonihenrye nchuno?
Ikwaha kavi Paulo aakookenleiye wi aahusihe achu yaawo yoonihenrye nchuno, nave eenreno yeeyo ophiyerya elukuluku taani?
Tiheeni Nnahuseryaahu Orweela wa Paulo?
2. Nnaphwanela omaliha elukuluku ni ikuru, wi nipake oxekurya waphaama ni opaceryiha soohuserya sa Piipiliya.
Mmutakiherye Paulo
3. Murehererye yoochariha anyu wi mmuxekurye muchu mu elukuluku yeeyo eri yaphaama wa yoowo. Mwiikohe: ‘Elukuluku taani oneeraaya okhale wooweryeya omphwanya muchu? Ti liini nave ti woowi oni okhale wookhweya wa yoowo ovaanela ni miyaano?’ Naamwi elukuluku eyo eri yoohiphwanelela wa nyuwaano, mukhale ooreheryeya omuxekurya muchu owo.
4. Mwiiwanane vooloca sa ovaanela onacharela. Omakuchuwelo wa ovaanela ori woothene, mweereryeke wiiwanana elukuluku taani munahaalaanyu otitelela ovaanela mwaha owo. Mpakeke owetha wanyu wi mukhwaaniherye elukuluku mwiiwanannaanyu.
5. Muhiyeleeleke ewehereryo. Muhuupuweleke wi muchu owo haanono nchuno pahiru nthowa nawi onakhala woovila omphwanya vaate vawe, naari nthowa nawi owo onakhala ooweiwa. (1 Ako. 13:4, 7) Mweelukuluku emohamoha, mukhale oophimelela. Mutitelele ovilela, nave mweererye opharihela elukuluku anyu mwamiruku.—1 Ako. 9:26.