Marzo

¿Nemi yakaj ipan tlanechikojli akin xtiuelij iuan touikaj? Tla xitlaj tikchiuaj, tlen tikmachiliaj itech yejon tokniuj xnopatlas. ITlajtol toTajtsin techijlia ika tla kuajli titeseliaj techpaleuis kuajli matouikakan iuan oksekimej, niman hasta imiuan akin techtlauelitaj (Prov. 25:21, 22). Tla yakaj tiknotsaj tochan, kichiuas matikilkaujtiakan tlen ika otokualanijkej niman kiyektlalis ken touikaj. Noijki, uelis peuas tikitaskej yejon kualtsin kualneskayomej tlen Jehová okitak ipan tokniuj ijkuak okichiuj mauajla ipan ikalpan (Juan 6:44). Ijkuak tlasojtlalistli techyolmapeua matiknotsakan se tokniuj akin nion xkichiaya, ken iuan touikaj uelis melak nopatlas. ¿Kenon uelis tikmatiskej ika tikchiuaj pampa yemelak titetlasojtlaj? Se tlen uelis techpaleuis yejua tiktlakamatiskej tlen kijtoua tlaxelojli tlen aman tikitstokej. Melauak, nochimej uejueyixtokej xijkon ken tejuamej, uelis ipan tlaneltokijli, ipan ken tlaxikouaj, ken yolchikaujkej noso ipan okse kualneskayotl. Tla tikitaj tlenon melak kuajli kichiua tokniuj xijkon ken tejuamej, kichiuas matiktlasojtlakan niman xouijtika yes kuajli tikseliskej tochan. w18.03 17 párrs. 18, 19

Ijkuak se tekoneuj kikixtiaj ipan tlanechikojli, tajtin kixnamikij se tlatlatalistli pampa noneki kitlakamatiskej Jehová. Matikitakan tlen ipan onochiuj se tokniuj siuatl ijkuak okikixtijkej ichpoch ipan tlanechikojli niman okikauj ichan. Yejua techijlia: “Niktejtemouaya ipan toamoxuan itlaj tlen ika ninotlatlamiskia niman ijkon niknotsas nochpoch niman noxuitsin”. Ika tlasojtlalistli, iueuentsin okititi ika xok yejuamej nonekiya kitaskej imichpoch, niman ika nonekiya yolmelaujkanemiskej itech Jehová niman noijki ika xkipiaya nokalaktiskej itech ken okimelajkatlalijkaj. Seki xiujtin sakin, ichpoch oksejpa okiselijkej ipan tlanechikojli. Inan kijtoua: “Melak kitlakaita noueuentsin niman nejua pampa otiktlakamatkej toTajtsin. Melak kuajli touikaj”. Tla se mokoneuj okikixtijkej itech tlanechikojli, ¿titlaneltokas itech Jehová ika nochi moyojlo niman xtimoyekanas ika tlen tejua tikasikamati? (Prov. 3:5, 6). Ijkon tej, nochipa xtlaneltokakan itech ken temelajkatlalia Jehová niman itech itlayekanalis, maski ijkuak tekoko yes tiktlakamatis. Xselikan ken temelajkatlalia toTajtsin, maka xkixnamikikan. w18.03 31 párrs. 12, 13

Biblia xkijtoua kech xiuitl noneki kipiyas yakaj niman ijkon noapolaktis. Tlajtojli ipan Griego tlen ipan Mateo 28:19 notlajtolkuepa ken “xkinmachtikan tlaltikpakchanejkej” kijtosneki tikinmachtis oksekimej pampa tikneki yakaj makitokakan. Se akin inomachtijkauj Jesús yejua akin kixmati niman kasikamati itlanauatiluan, niman akin kuajli yokijto ika kintlakamatis. Ika yejon, tajtin Teixpantijkej noneki kitejtemoskej kinmachtiskej inkoneuan ijkuak ok pitentsitsintin niman ijkon manoapolaktikan niman makitokakan Cristo. Niman melauak ika se konetsintli xkichiua tlen kintlajtlaniliaj akin kinekij noapolaktiskej. San ika, Biblia teititia ika maski kokonej pitentsitsintin ueliskej kasikamatiskej niman kitlasojkaitaskej tlen melauak itech Biblia. Se neskayotl, Timoteo katka se nomachtijketl akin okitlapejpeni kitekichiuilis Jehová ijkuak ok san telpochtli katka. Yejuin okichiuj machikaui itlaneltokil (2 Tim. 1:5; 3:14, 15). Ijkuak okajxilti kanaj 20 xiuitl, ikichiuaya tlen notlajtlaniya niman ijkon kimakaskej ueyi tekitl ipan tlanechikojli (Hech. 16:1-3). w18.03 9 párrs. 4, 5

Ijkuak otipeujkej tiktekichiuiliaj toTajtsin, otopatlakej. Niman yejuin ones ipan nochi tlen tikchiuaj. Niman xotlan ika topatlaj ijkuak otoapolaktijkej. Pampa titlajtlakolejkej, noneki nochipa topatlatiaskej (Filip. 3:12, 13). Tla titelpokamej noso itiuejueyimej, uelis totlajtoltiskej yejuin: “¿Nikita ika ninoyekantika ika iespíritu santo toTajtsin? ¿Nitlanemilia ken Cristo? ¿Tlenon kiteititia tlen nikchiua niman ken ninouika ipan tlanechikoltin? ¿Tlenon nesi ika nikneki ijkuak nitlajtoua imiuan oksekimej? ¿Tlenon kiteititia notech ken ninotlakentia, ken ninoyektlalia, ken ninomachtia niman ken nitenankilia ijkuak nexchikajkanotsaj? ¿Tlenon nikchiua ijkuak nikixnamiki tlen nechyoltilana? ¿Yonikchiuj tlen noneki niman yoninochiuj se akin kitoka Cristo akin chikauak itlaneltokil?” (Efes. 4:13). Titlanemiliskej itech ken tikinnankiliskej yejuin tlajtoltilistin techpaleuis tikitaskej kech yotokojtilijkej tikchikauaskej ken toyekanaj ika iespíritu santo toTajtsin. w18.02 24 párrs. 4, 5

Tinemij ipan tonaltin kampa miyek tlen panotika. Ijkon ken yokijtoka Biblia, Jehová kisentlalijtika melak miyekej tlaltikpakchanejkej itech “nochiuiyan países, nochi raza, nochi pueblo niman nochi sesetlamantik tlajtoltin”. Nochi yejuamej “se chikauak kalpan” tlen aman yonochiujkej ipantsin chikueyi millones tlaltikpakchanejkej akin yolpakij niman “kimauistiliaj Dios ikan tonajli niman yeuajli ne ipan iueyitiopan” (Apoc. 7:9, 15; Is. 60:22). Xkeman ijkon onenkej miyekej akin makitlasojtlakan toTajtsin niman makintlasojtlakan oksekimej. San ika, Biblia noijki yokijtoka ika ipan yejuin tonaltin, tlaltikpakchanejkej akin uejka nemij itech toTajtsin kipiyaskiaj okse tlasojtlalistli, se tlasojtlalistli tlen san itech tlanemilia. Apóstol Pablo okijkuilo ika, “sa itlajtlankan on tonajli”, miyekej “tsotsokamej yeskej [‘sa no yejuamej notlasojtlaskej’, TNM]”, “sanoyej kejeleuiskej tomin [‘kitlasojtlaskej tomin’, TNM]” niman “sa kinejnektiaskej on impakilis ipan in tlaltikpaktli xej kitetemoskej tlinon ika kipaktiskej Dios [‘kitlasojtlaskej tlen ika noyolpaktiskej maka ken kitlasojtlaskej toTajtsin’, TNM]” (2 Tim. 3:1-4). Yejuin tlasojtlalistli tlen san itech tlanemilia xijkon ken tlasojtlalistli itech toTajtsin. San ika, kema kichiua ika tlaltikpakchanejkej san intech matlanemilikan niman kichiua ika innemilis nochimej maouijtika. w18.01 22 párrs. 1, 2

Tlen kixmatstoya Noé okichiuj matlaneltoka niman makipiya tlamachilistli tlen ualeua itech toTajtsin. Yejuin noijki okitlajpix niman okipaleui maka itlaj kichiuas tlen kijtlakoskia ken kuajli nouikaya iuan Jehová. Xnemili yejuin, pampa Noé “okistinen iuan toTajtsin akin melauak” yejua ximiuan okistinen, noso ximiuan onosentlali, akin xkitlakaitayaj toTajtsin. Yejua noijki xokinokauili makikajkayauakan xkuakualtin iluikaktekitkej akin onokuepkej tlakamej niman ouajtemokej ipan tlaltikpaktli. Miyekej akin xkipiayaj chikauak intlaneltokil melak okinmojkatlachialti kenon melak kojtikej katkaj niman hasta kanaj okinejkej kinueyichiuaskej (Gén. 6:1-4). Noijki, Noé kimatstoya ika toTajtsin okimijlika tlaltikpakchanejkej manomiyekilikan niman makitemiltikan tlaltikpaktli (Gén. 1:27, 28). Kuakon, kimatstoya ika iluikaktekitkej xokinchijchiujkej manonamiktikan iuan siuamej niman inuan makinpiyakan inkoneuan, niman kimatstoya ika yejon xkuajli katka. Kuajli tikitaj ika sakin kuajli okasikamat ika yemelak ijkon katka ijkuak okitak ika yejon kokonej xkatkaj ken oksekimej kokonej. Sakin, toTajtsin okijli Noé ika yejua kuajkuiskia se apachiuilistli ipan tlaltikpaktli. Itlaneltokil Noé okiyolmapeuj makichijchiua se akajli, tlen okinmakixti ichanejkauan (Heb. 11:7). w18.02 9 párr. 8

Tla tejua otikchiujka se ueyi tlajtlakojli, Jehová kineki mitspaleuis xpajti itech yejon. San ika, san uelis tikchiuas, tla tikselia itlapaleuilis tlen temaka itechkopa tlanechikojli (Prov. 24:16; Sant. 5:13-15). Maka xuejkaui ika tikchiuas, pampa yejuin uelis kichiuas xpiya noso xpolo nemilistli tlen xkeman tlamis. Aman tej, ¿tlenon uelis tikchiuas tla motlamachilis ok melak mitsajmana sakin ika toTajtsin yomitstlapopolui? Kemantika Pablo kajmanaya tlen yeuejkaui xkuajli okichiujka. Yejua okiseli: “Xniueyixtikaj ken on oksekimej apóstoles, niman nion achijtsin xnechmelaua nechtokayotiskej apóstol pampa onikintlauelitak niman onikintlajyouiltij on tlaneltokakej” (1 Cor. 15:9). Jehová kiseliaya Pablo maski yokichiujka tlen xkuajli niman kinekiya ika Pablo kuajli makimatsto yejuin. Ijkon tej, tla tejua ika nochi moyojlo yotimoyolkuep itech tlen yeuejkaui otimopopolojka niman yotikijli Jehová tlen otikchiuj, niman noijki tlayekankej tla nonekiya, uelis kuajli tikmatstos ika toTajtsin mitsiknelis. Ika yejon, xneltoka ika Jehová yomitstlapopolui niman xselili itlapopoluilis (Is. 55:6, 7). w18.01 11 párrs. 17, 18

Tla tiknekij touikaskej iuan Jehová, noneki tijkakiskej niman iuan titlajtoskej. Uelis tijkakiskej tlen techijlia, tla tomachtiaj Biblia toselti. Yejuin kijtosneki tikpouaskej iTlajtol toTajtsin niman amatlajkuiloltin tlen itech nokixtiaj, noijki titlanemiliskej itech tlen tikpoujtiuej. Ijkuak tikchiuas, xkilnamiki ika timomachtis Biblia xkijtosneki san tiktekitiltis motsontekon, kentla tiknekiskia tikilnamikis itlaj niman ijkon titlanankilis ijkuak mitstlatlajtoltiskej ipan kaltlamachtijli. Timomachtis Biblia yeskia kentla kanaj tias tikontejtemos niman ijkon tikixmatis okseki itech ikualneskayouan Jehová. Tikchiuas yejuin mitspaleuis xnisiui, niman yejua noijki mitsnisiuis. Ikalpan Jehová yotechmakak miyek tlen uelis tiktekitiltis niman ijkon kuajli timomachtis. Ipan jw.org tikinnextis guías de estudio tlen intoka “¿Qué enseña realmente la Biblia?”, yejuin mitspaleuiskej xchikaua motlaneltokil niman xueli xtetomili tlen tikneltoka (Sal. 119:105). w17.12 25 párrs. 8, 9

Matikitakan ika yejuin yolseuilistli onias nochiuiyan, “pampa tlaltikpaktli melauak temis ika itlaixmatilis Jehová”. Yolkamej xuelij nomachtiaj itech Jehová, kuakon yejuin teotlajtojli kineskayotia kenon tlaltikpakchanejkej kipatlaskiaj innemilis (Is. 11:6, 7). Nemij miyekej tlaltikpakchanejkej akin temojtikej katkaj ken koyomej, san ika, aman nemij ika yolseuilistli inuan oksekimej. Uelis tikpouaskej seki itech yejuamej ipan sección “La Biblia les cambió la vida” itech jw.org. Sekimej itekipanojkauan toTajtsin akin temojtikej katkaj aman yokinotlalilijkej yenkuik innemilis “tlen onochijchiuj ken kineki toTajtsin ika melauak itech tlen melaktik niman tlasojtlalistli tlen xtekaua” (Efes. 4:23, 24, TNM). Ijkuak nomachtijtiuej itech toTajtsin, tlaltikpakchanejkej kasikamatij ika noneki kitlakamatiskej itlanauatiluan. Yejuin kinpaleuiya makipatlakan tlen kineltokayaj, ken tlanemiliayaj niman itech tlen kichiuayaj. Ouijtika tikpatlas yejuin, san ika, uelis nochiuas pampa espíritu santo kinpaleuiya akin yemelak kinekij kichiuaskej tlen kitlajtlani toTajtsin. w18.01 31 párrs. 15, 16

Biblia techijlia ika akin yoliuiskej ipan iluikak “cada se ipan nochiuas ijkuak kontocaros”, kijtosneki ika kuajli nochiujtias. Ika yejon uelis tikneltokaskej ika yoliuilistli ipan tlaltikpaktli noijki kuajli nochiujtias. Yejuin uelis kichiuas matotlajtoltikan: “¿Kemanon yoliuiskej akin omijkej ipan totonaluan? ¿Yes ijkuak Cristo san kemach peujtias tekiuajtis Mil Xiuitl, niman ijkon kinseliskej inchanejkauan niman akin iuan nouikaj? Niman tlakamej akin oyolmelaujkanenkej yeuejkaui niman kuajli ken tlayekanayaj, ¿kachtopa yejuamej kinyolitiskej niman ijkon tlapaleuiskej ika kinyekanaskej itekipanojkauan toTajtsin? ¿Niman tlenon panos inuan akin xokitekichiuilijkej Jehová? ¿Kemanon niman kanon yoliuiskej?”. Melak miyek onka tlen uelis totlajtoltiskej, san ika, amantsin xnoneki matajmanakan ipampa nochi yejuin. Melak kuajli yes titlamachiaskej matikitakan, tlenon kichiuas Jehová. Kuakon, aman noneki matikchikauakan totlaneltokil itech Jehová. Yejua kuajli yotechijli itechkopa Jesús ika yoliuiskej akin nemij ipan itlanemililuan (Juan 5:28, 29; 11:23). w17.12 12 párrs. 20, 21

Kuajli tikmatij ika noijki tiknemiliaj ika yejuin tlajtoltin ok kinpaleuijtika teueuentsitsintin, tesiuatsitsintin niman tekoneuan ipan yejuin tonajli. Biblia kimijlia teueuentsitsintin: “Cada se de nemejuamej xtlasojtlakan nemosiuau niman ma ka xtetlajtlaueltijkej inuan”. Tokniuj akin kitlasojtla isiuatsin kitlakaita ijkuak kikaki tlenon kinemilia niman kititia ika kitlasojkamati tlen kijtoua (1 Ped. 3:7). Maski xnochipa uelis kichiuas tlen isiuauj kitlajtlanilia, kitlajtoltis tlen kinemilia, kipaleuis kitlapejpenis tlen kuajli (Prov. 15:22). Tlakatl akin kitlasojtla isiuauj xkichiualtia makitlakaita, yejua kinotlanilia. Ijkuak se tokniuj kitlasojtla isiuatsin niman ikoneuan, uelis kichiuas ika makitechiuilikan Jehová ika pakilistli niman makiselikan tlen tikchiaj. w17.11 28 párr. 12; 29 párr. 15

Nesi ika apóstol Pablo okintlajkuilouili colosenses ijkuak itlamiskia ika kachtopa okitsajkej ipan Roma, kanaj ipan xiuitl 60 noso 61. Ompa okimijli ika melak ueyi kijtosnekiya tikpiyas “kajsikamatilistli yejuan kisaj itech Dios”, kijtosneki, uelis tikitas nochi tlemach ijkon ken Jehová kita (Col. 1:9). Noijki okinmelajkaijli: “Yejua in nemechijlia nemejuamej para ma ka yakaj mechkajkayauas  ika on tlajtojli yejuan kakisti melauak niman kualtetsin, pero xmelauak. Xmotakan sa no nemejuamej. Ma ka yakaj xkauilikan mechkajkayaua  ika on xkuajli temachtilistli yejuan tekajkayaua  ika on tlen xmelauak. On ken on tlajtlamach temachtilistli, san intemachtilis niman incostumbres on tlaltikpaktlakamej. On temachtilistli xkisa itech Cristo” (Col. 2:4, 8). Sakin, okimijli tleka xkuakualtin katkaj seki tlanemililtin tlen melak noixmatij, niman tleka ken tlanemilia tlaltikpaktli uelis kinyoltilanas tlaltikpakchanejkej tlajtlakolejkej. Se neskayotl, uelis kichiuas ika se makineltoka ika melak tlamachilise noso ueyixtika xijkon ken oksekimej. Ika yejon, Pablo okimijkuilouili yejuin amatlajkuilojli niman ijkon kinpaleuis makimapeuakan ken tlanemilia tlaltikpaktli niman okseki tlen xkuajli (Col. 2:16, 17, 23). w17.11 20 párr. 1

¿Tlenon noneki makikajkaua se akin kichiua ken Cristo niman ijkon toTajtsin ok kiknelis? Noneki kinektos kikajkauas hasta yejon tlen kuelita tla yejuin uelis kichiuas matlajtlako (Mat. 18:9, TNM). Se neskayotl, tla akin inuan touikaj techyolchikauaj matikchiuakan tlen xkuelita Jehová, ¿tijkajkauaskej ika imiuan touikaskej? Tla ouijtika tikmatij toteltiskej itech alcohol, ¿tiknektokej tijkajkauaskej tlen uelis kichiuas matiknekikan miyek tikoniskej? Tla tokojtilitokej tikteltiskej ileuilistli itech auilnemilistli, ¿tikmapeuaj películas, páginas ipan Internet niman nochi tlen kichiua matikpiyakan xkuajli ileuilistin? Matikilnamikikan ika nochi tlen tijkauaskej niman ijkon timelajkanemiskej itech Jehová melak techpaleuis. Xtlaj melak teyolkoko ken tikmachiliskej ika toTajtsin xok touan nemi. San ika, xtlaj melak techyolpaktia ken tikmachiliskej ika tikpiyaj itlasojtlalis tlen xkeman tekaua (Is. 54:7, 8). w17.11 11 párr. 12

Matikitakan ika Zacarías 5:4 kijtoua ika “se tlauijuikaltilistli [...] kalakis ichan tlachtejketl [...] niman nokauas kalijtik niman kipopolos yejon kajli”. Yejuin kijtosneki ika Jehová uelis kichiuas manesi niman kitlajtlakolmakas san katlejua tlajtlakojli tlen kichiuas se itekipanojkauj. Kanaj yakaj uelis kiyanas tlen yokichiuj ixpan tekiuajkej, itech akin tekiti, tlayekankej noso itajuan. San ika, xuelis kiyanilis toTajtsin, akin yokijto ika nochi tlachtekilistli kichiuas manomati (Heb. 4:13). Itekipanojkauan toTajtsin techyolpaktia tinemiskej inuan akin melak nokojtiliaj melajkanemiskej “itech nochi tlemach” (Heb. 13:18, TNM). Jehová kitlauelita nochi tlachtekilistli. Itekipanojkauan toTajtsin tikitaj ken se tlateochiualistli tikixmatiskej, toyekanaskej ken yotechmachti, niman tikueyichiuaskej itokayo ika tonemilis. Ijkon, xtikseliskej itlajtlakolmakalis toTajtsin tlen kinmakas akin kitlapejpeniaj xkitlakamatiskej itlanauatiluan. w17.10 22, 23 párrs. 6, 7

Kipiya tikchiuaskej nochi tlen tiueliskej niman ijkon maonia yolseuilistli iuan tokniuan maski ijkuak tikmachiliskej ika xotikpixkej tlajtlakojli noso otexchiuilijkej tlen xkinamiki (Rom. 12:17, 18). Tla yakaj tikyolkokouaj, kipiya tiktlajtlaniliskej matechtlapopolui, san ika, matikchiuakan ken kinamiki. Yolseuilistli melak noneki itech akin yononamiktijkej. Melak xkuajli yeskia ika akin yononamiktijkej, imixpan oksekimej melak kiteititiskiaj ika notlasojtlaj, san ika, ijkuak san yejuamej nemij nion xnonotsaskiaj, noijliskiaj tlen teyolkoko noso nouisokiskiaj. Noijki noneki matiknektokan titetlapopoluiskej. Tla yakaj techyolkokoua, maski yejua nion xokimat, kipiya ika tiktlapopoluiskej niman kipiya tikyejyekoskej tikilkauaskej tlen otexchiuili. Tla tiknekij yemelak titetlapopoluiskej kipiya ika tikinteltiskej totlanemililuan niman xtikpoujtiaskej tlen xkuajli texchiuiliaj (1 Cor. 13:4, 5). Tla ipan toyojlo titetlauelitaj, yejuin xtechkauilis kuajli matouikakan iuan tokniuan nion iuan Jehová (Mat. 6:14, 15). w17.10 10 párrs. 14, 15

¿Kenon okinpaleui judíos itlajtoluan Zacarías? Jehová yokimijlika ika kinyektlaliliskia innemilis niman kintlajpiyaskia niman ijkon matlamikan iteopan, yejuin kanaj okinmakak tlamachialistli. San ika ¿kenon ueliskia tlamiskiaj nochi tekitl tla nion xmiyekej katkaj? Tlen kinajmanaya kanaj opopoliuj ijkuak Zacarías okseki okijto itech tlajtoltin tlen toTajtsin okimakaka. Ijkon ken kinpaleuiskiaj tlakamej melajkej ken Heldai, Tobiya niman Jedayá, noijki toTajtsin okijto ika miyekej oksekimej kinpaleuiskiaj kichijchiuaskiaj “iteopan Jehová”. Kuakon judíos kuajli kimatstoyaj ika Jehová kinpaleuiskia. Ika yejon, nimantsin oksejpa okipeualtijkej tekitl maski tekiuaj itech Persia xkinkauiliaya. Nion xouejkauj, toTajtsin okipopolo yejon tlen kintsakuiliaya, tlen katka kentla se tepetl imixpan. Niman ipan xiuitl 515 i.x.x. 1 otlankej teopan (Esd. 6:22; Zac. 4:6, 7). San ika, itlajtoluan Jehová noijki konteneuaj okseki tlen ueyi panotika ipan yejuin tonaltin. w17.10 29 párr. 17

Jehová okinauati Salomón makiyekana kenon nochijchiuas teopan ipan Jerusalén, yejuin se tekitl melak ueyi tlen onochiuj yeuejkaui. Tlen kichijchiuaskia temojkatlachialtiskia, niman iueyilis niman ikualtsinyo kimatiskiaj “nochimej países”. San ika, tlen melak ueyi kijtosnekiya ika yeskia “ikal Jehová akin melauak toTajtsin” (1 Crón. 22:1, 5, 9-11). Tekiuaj David kineltokaya ika toTajtsin kipaleuiskia Salomón, san ika, kitekipachouaya ika san se telpochtli katka niman xmiyek kixmatiya. ¿Kipiyaskia yolchikaualistli Salomón niman ijkon kiselis tekitl ika kichijchiuas teopan? Pampa yejua se telpochtli katka niman xmiyek kixmatiya, ¿kiteltiskia yejuin ika kichiuas tekitl? Tla Salomón kinekiya kuajli onkisas nonekiya kiteititis ika yolchikauak niman tekichiuas. Tla Salomón nomojtiskia, kanaj nion xkipeualtiskia yejon tekitl, niman yejuin melak xkuajli yeskia xijkon ken tla san xkuajli kichijchiuaskia. Ijkon ken Salomón, tejuamej noijki noneki Jehová matechpaleui matiyolchikaujkej niman ijkon tikchiuaskej tekitl tlen yotechnauatij. w17.09 28 párrs. 1, 2; 29 párrs. 4, 5

¿Kenon yeskia tonemilis tla xoniaskia Biblia? Xtikpiyaskiaj itlaj tlen mojmostla kuajli matechyekana ipan tonemilis. Xtikmatiskiaj tlen melauak itech toTajtsin, itech nemilistli, itech tlen panos tlayekapan nion itech tlen yeuejkaui Jehová okichiuj topampa. Ika yejon, uelis tiktlasojkamatiskej ika xijkon tinemij. Jehová otechmakak iTlajtol, Biblia, niman yokijto ika tlen ompa kijtoua xkeman poliuis. Ijkon okijto apóstol Pedro ipan 1 Pedro 1:24, 25, kampa okonteneuj Isaías 40:8. Maski yejuin tlaxelojli xkiteneujtika amoxtli Biblia ken aman tikixmatij, san ika, kema kiteneua itech tlen kijtoua Biblia. Kema, noneki tikpouaskej ika totlajtol tlen kuajli tikasikamatij niman ijkon techpaleuis. Akin kitlasojtlaj Biblia yokitakej ika yejuin melauak. Melak miyek xiujtin, yonenkej tlaltikpakchanejkej akin yonokojtilijkej kitlajtolkuepaskej niman kichiuaskej oksekimej makipiyakan maski melak ouijtika. Tlen yejuamej kinekiyaj san noijki ken tlen kineki toTajtsin, akin kineki ika “nochi tlakatl ma makisa niman ma kimati on tlen melauak” (1 Tim. 2:3, 4). w17.09 18 párrs. 1, 2

Miyekej telpokamej akin kichiuaj ken Cristo kixnamikij itlaj ken José okixnamik (Gén. 39:7). Matikitakan tlen ipan onochiuj Kim. Miyekej akin inuan nomachtiaya melak noueyimatiyaj niman kijtouayaj ika ipan yejon itlamiyan semana iuan yakaj onotekakej. San ika, yejua xtlaj kipiaya ken yejon tlen ika tlajtos. Kim kijtoua ika pampa xijkon katka ken oksekimej, kemantika yejon kichiuaya manomachili iselti niman ika yokitlalkauijkej, niman akin inuan nomachtiaya kijliayaj ika xtlamachilise pampa xakaj iuan kistinemi. Maski ijkon, yejua kuajli kimatstoya ika timotekas iuan oksekimej ijkuak titelpochtli, se tlatlatalistli melak ueyi (2 Tim. 2:22). Akin inuan nomachtiaya miyekpa kitlajtoltiayaj tla ok xakaj iuan notekaya, niman yejua kitekitiltiaya yejon ika kimijlis tleka yokijtoka xakaj iuan notekas. Melak tiyolpakij intech telpokamej akin kuajli yokijtokej tlaxikoskej niman xauilnemiskej. Niman Jehová noijki melak yolpaki ipampa yejuamej. w17.09 4 párr. 8; 5 párr. 10

Sekimej tlaltikpakchanejkej melak nimantsin kualanij, kijtouaj tlen xkuajli niman tlen teyolkoko. Niman nochi yejuin kichiua ika inchanejkauan maka ika inyojlo manemikan. Biblia technauatia ika maka matikualanikan, maka matiteuijuikaltikan niman maka matitsajtsikan (Efes. 4:31). Pampa miyekpa, tla xnokajkauaj, kichiua ika sekimej manouisokikan. Sekimej uelis kinemiliskej ika xtlaj tlenon tla ijkon panoua, san ika, yejuin kichiua maka manotlakaita toTajtsin. Ika yejon, miyekej tokniuan yononek kikauaskej yejuin tlen kichiuayaj yeuejkaui niman yonotlalilijkej se yenkuik nemilistli (Col 3:8-10). Ijkuak yakaj ok xkipatla inemilis noijki tekajkayaua. Se neskayotl, miyekpa noita ika tlaltikpakchanejkej tekajkayauaj pampa xkinekij kitlaxtlauaskej impuestos noso pampa xkinekij tlanankiliskej itech tlen xkuajli okichiujkej. San ika, Jehová xijkon, yejua “toTatsin itech tlen melauak” (Sal. 31:5). Ika yejon, technauatia akin tikchiuaj ken Cristo ika nochipa matikijtokan tlen melauak, niman ika maka matokajkayauakan semej iuan oksekimej (Efes. 4:25; Col. 3:9). Kuajli tikitaj ika nochipa kipiya tikijtoskej tlen melauak maski uelis tipinauiskej noso xtechpaleuis tlen panos (Prov. 6:16-19). w17.08 18 párrs. 3, 5; 20 párrs. 12, 13, 15

Ipan yejuin tonajli, Jehová techyekana ika iTlajtol, Biblia. Niman “itlajtol melak totoka notlaloua”. Yejuin kijtosneki ika techpaleuiya itech totlaneltokil ijkuak techpoloua. San matiknemilikan kenon melak techpaleuiya ijkuak tikpouaj Biblia, tomachtiaj amatlajkuiloltin tlen techinmaka “tekitketl” akin yolmelauak niman tlamachilise, tlen tikitaj ipan JW Broadcasting, página jw.org, tlayekankej niman oksekimej tokniuan (Mat. 24:45). ¿Yotikitak kenon Jehová techyekana melak totoka? Salmista kimatiya kenon yeuejkaui toTajtsin okiteochiuj ikalpan. ToTajtsin san yejuamej okinmakak “itlajtol” niman “itlanauatiluan niman ken tetlajtlakolmakas” (Sal. 147:19, 20). Ipan yejuin tonajli, yotechteochiujkej pampa san tejuamej tikpiyaj itokayo toTajtsin. Tikixmatij Jehová, tikpiyaj iTlajtol tlen techpaleuiya ipan tonemilis niman kuajli iuan touikaj. Ijkon ken yejon tlajkuilojketl itech Salmo 147, onka miyek tlen ika noneki tikueyiteneuaskej Jehová niman tikimijliskej oksekimej noijki makichiuakan. w17.07 20 párrs. 15, 16; 21 párr. 18

Ipan yejuin tonajli, akin kichiuaj ken Cristo nochikauaj noyekanaskej ika yejuin. Intech yejuamej nemij melak miyekej akin chikauak kitekichiuilijtokej toTajtsin. Akin kichiuaj ken Cristo nochikauaj kimapeuaskej tlen onka ipan tlaltikpaktli, niman kilnamikij ika “akin notlaneuiya nochiua tlakeuajli itech akin kitetlaneujtia” (Prov. 22:7). Satanás kineki ika matijkuikan totiempo niman tochikaualis ika matochiuakan tlakeualtin itech ken notekitiltia tomin aman. Sekimej, ueyi tomin notlaneuiyaj niman ijkon kikouaskej se kajli, se carro, ika nomachtiskej ipan uejueyimej kaltlamachtiltin noso kipiyaskej se ueyi iluitl ijkuak nonamiktiskej. Tla xtiktlajpiyaj tlen tiktlapejpeniaj tikchiuaskej, uelis tikteuikiliskej tomin miyek xiujtin. San ika, tla tikteititiaj tlamachilistli, tinemiskej san ika achijtsin, xmiyek tikteuikiliskej niman xmiyek tomin tikpopoloskej. Kuakon uelis tochiuaskej tlakeualtin itech toTajtsin, niman xitech ken notekitiltia tomin (1 Tim. 6:10). w17.07 10 párr. 13

Jehová kinamiki matlayekana. Yejua kitekitiltia itlanauatijkayo ika melajkayotl tlen xnopopoloua. Yejua techijlia: “Nejua niJehová, Akin teititia tetlasojtlalistli tlen xtekaua, melajkayotl niman tlen melajki ipan tlaltikpaktli, pampa ipan yejuin tlemach ninoyolpaktia” (Jer. 9:24). Xnoneki intlanauatiluan tlaltikpakchanejkej ijkuak Jehová kitlapejpenia kichiuas tlen melajki. Jehová akin kijtoua tlenon melajki. Yejua kinmaka tlanauatiltin tlaltikpakchanejkej tlen kisa itech imelajkayo tlen xnopopoloua. Salmista okijto: “Tlen melajki niman melajkayotl tlayekanaj kampa titlanauatia”. Kuakon san katlejua tlanauatijli, tlajtolyekanalistli noso tlanemilijli tlen ualeua itech Jehová melajki yes (Sal. 89:14). Satanás kijtoua ika Jehová xtlayekana ika melajkayotl. San ika, Satanás xuelis kichiuas maonia melajkayotl ipan tlaltikpaktli. w17.06 28 párr. 5

Nochi tlen melauak yotomachtijkej ika yeyi tlen patioj tlen Jehová yotechmakak. Tlen melauak ualeua itech Jehová (Sal. 31:5). ToTajtsin kineki techmakas yejon tlen melauak pampa kuelita kitemakas tlen kipiya. Ika yejon, yotomachtijkej miyek itech yejon tlen melauak ijkuak tikpouaj iTlajtol, toamatlajkuiloluan, ijkuak tiauej ipan uejueyimej tlanechikoltin niman ipan tlanechikoltin tlen tikinpiyaj nochi semanas. Ijkon yotomachtijtiajkej miyek tlen melauak, niman ueli tikpiyaj tlen Jesús okitokayoti “tlen patioj” itech tlen melauak “tlen yenkuik niman tlen xyenkuik” (Mat. 13:52). Tla tiktejtemouaj tlen melauak ijkon ken tiktejtemos tlen patioj iyantika, Jehová techpaleuis matikpiyakan miyek “tlen patioj” (Prov. 2:4-7). ¿Kenon tikchiuaj yejon? Noneki tomachtiskej Biblia niman toamatlajkuiloluan nochipa niman matikasikamatikan tlen tomachtiaj. Yejuin techpaleuis matiknextikan “yenkuik” tlen melauak tlen xtikmatiyaj (Jos. 1:8, 9; Sal. 1:2, 3). Noneki nochipa matiktejtemojtokan okseki tlen melauak. w17.06 12 párrs. 13, 14

Se telpochtli tlanemiliaya itech 1 Corintios 7:28, kampa kijtoua ika akin nonamiktiaj kipiyaskej “tlajtlamach tlen “[te]pajsoloua”. Yejon tokniuj otlajto iuan se tlayekanketl akin yononamikti niman okitlajtolti: “¿Tlenon yejuin tlajtlamach tlen ‘[te]pajsoloua’, niman kenon nikixnamikis tla ninonamiktia?”. Achtopa kinankilis, tokniuj tlayekanketl okijli telpochtli matlanemili itech tlen Pablo, itlatitlankauj Cristo, okijkuilo, ika Jehová “Dios yejuan [...] nochipa techyoltlalijtikaj. Dios techyoltlalia ipan nochi on tlin techpajsoloua” noso techtlajyouiltia (2 Cor. 1:3, 4). Tikmatij ika Jehová yejua toTaj akin techtlasojtla niman techyolseuiya ijkuak tikixnamikij tlen ouijtika. Tejua uelis tikilnamikis ika kemantika Jehová yomitspaleui niman yomitsyekan ika iTlajtol. Kuajli tikmatstokej ika yejua kineki melak kuajli matinemikan, ijkon ken yeuejkaui okichiuj kuajli manemikan itekipanojkauan (Jer. 29:11). w17.06 4 párrs. 1, 2

Tokniuan akin kikauaj inchan xsan kinpoloua tlakuajli niman tlakentli. Yejuamej kinpoloua makinpaleuikan itech ken nomachiliaj niman makinmakakan yolseuilistli ika Biblia (Mat. 4:4). Tlayekankej uelis kinpaleuiskej makipiyakan amatlajkuiloltin ika intlajtol niman makimixmatikan tokniuan akin tlajtouaj intlajtol. Yejuin melak noneki pampa miyekej akin kikauaj inchan ononek kikauaskej nochi tlen kixmatiyaj. Ika yejon, kintejtemouaj inchanejkauan, kampa chantiyaj niman intlanechikol. Yejuamej kinpoloua kimachiliskej itlasojtlalis niman iteiknelilis Jehová itechkopa tokniuan. Tla yejuamej xkimachiliaj, kuakon uelis kitejtemoskej makinpaleuikan akin ualeuaj kampa yejuamej ualeuaj maski xkitekichiuiliaj Jehová (1 Cor. 15:33). Ijkuak tikchiuaj kuajli manomachilikan ipan tlanechikojli, titekitij iuan Jehová akin kinpaleuiya “akin xchanejkej”. Akin kikauaj inchan xuelij nokuepaj inchan ijkuak tlanauatiaj akin kintlauelitaj. Noijki, kanaj melak nomojtiaj ipampa tlen inpan yonochiuj. Matotlajtoltikan: “Tla nejua ijkon nopan nochiuaskia, ¿kenon niknekiskia manouikakan nouan?” (Mat. 7:12). w17.05 7 párrs. 15, 16

Pampa tinemij kampa Satanás tlayekana, onka miyek tlen kemantika uelis kichiuas matikpolokan toyolchikaualis (1 Juan 5:19). San ika, tla tijkauiliaj mapopoliui toyolchikaualis, xok tikpiyaskej totlaneltokil niman totlasojtlalis itech toTajtsin. Se neskayotl, kanaj tikixnamikij tlen ouijtika pampa itiueuentsitsintin, tikpiyaj kokolistli noso xtikpiyaj tomin. Noso kanaj melak tajmanaj pampa xtiuelij kuajli tikchiuaj seki tlemach ken tejuamej tiknekiskiaj. Kanaj yotechyolkoko itlaj tlen opanok ipan tonemilis tlen xtikchiayaj. Maski san tlenon topan manochiua, xkeman noneki tiknemiliskej ika Jehová yotechtlalkaui. Xtlanemili itech kualtsin tlajtoltin tlen tiknextiaj ipan Salmo 136:23: “Yejua otechilnamik ijkuak toyolkokouayaj, pampa itlasojtlalis nochipa onias”. Kuajli tikmatstoskej ika Jehová techkaki ijkuak tiktlajtlaniliaj matechpaleui niman technankilia (Sal. 116:1; 136:24-26). w17.05 17 párr. 8

Ken nesi ipan Gálatas 2:11-14, Pedro okimojti tlen kinemiliskej oksekimej itech yejua (Prov. 29:25). Pedro kimatiya kenon Jehová kimitaya akin xjudíos. Maski ijkon, okimojti tlen kinemiliskiaj itech yejua judíos akin onochiuilijkej circuncisión akin ualeuayaj Jerusalén pampa nosentlaliaya iuan akin xjudíos. Pablo, itlatitlankauj Cristo, okijli Pedro ika kipiaya ome ixayak (Hech. 15:12; Gál. 2:13). Pedro yolyemanki katka niman okiseli ken okiyektlali Pablo. Biblia xkijtoua ika Pedro okipolo tekitl tlen kipiaya. Xsan yejon, sakin yejua okijkuilo ika iespíritu santo toTajtsin ome amatlajkuiloltin ipan Biblia. Jesús, tlayekanketl itech tlanechikojli, ok okitekitilti (Efes. 1:22). Ijkuak yejon tokniuan okitlapopoluijkej Pedro, okichiujkej ken Jesús niman toTajtsin. Tikmatstokej ika nion se itech yejuamej xokikauili makitlajkali tlen okichiuj se tlakatl tlajtlakole. w17.04 25, 26 párrs. 16-18

Jehová okinpopolo yejon kalpamej niman nochi iyeualiyan niman ijkon okipopolo tlen xkuajli nochiujtoya ompa. San ika, noijki tlen okichiuj teititia “ika no ijkon impan nochiuas” xkuakualtin tlaltikpakchanejkej ipan yejuin tonajli. Ijkon ken Jehová okipopolo nochi auilnemilistli tlen ompa nochiuaya, noijki ijkon kichiuas ijkuak kipopolos tlen panotok aman. ¿Ika tlenon nopatlas tlen xkuajli onka aman? Ipan yenkuik tlaltikpaktli, tikpiyaskej miyek tlen tikchiuaskej tlen techyolpaktis. Se neskayotl, tikchiuaskej ika tlaltikpaktli manokuepa se xochitlalpan niman tikinchijchiuaskej tokaluan niman tikinchijchiuiliskej akin tikintlasojtlaj. Noijki tikinseliskej melak miyekej akin yoliuiskej niman tikinmachtiskej itech Jehová niman itech nochi tlen yokichiuj ipampa tlaltikpakchanejkej (Is. 65:21, 22; Hech. 24:15). Ipan yejon tonaltin, tikpiyaskej miyek tekitl tlen techyolpaktis tejuamej niman kiueyiteneuas Jehová. w17.04 13 párrs. 11, 12

Ijkuak Jefté okijto tlen kichiuas, yejua kanaj kimatiya ika ichpoch akin ueliskia kuajnamikis. San ika, maski tla kimatiya noso ka, kichiuas tlen yokijlika Jehová ouijtika kitaya yejua niman ichpoch. Ijkuak Jefté okitak, melak onoyolkoko. Ichpoch oyaj onochokilito pampa xnonamiktiskia. ¿Tleka? Jefté xkipiaya ikoneuj tlakatl niman aman ichpoch xkeman nonamiktiskia niman xkinpiyaskia ikoneuan. Itokayo ichanejkauan Jefté popoliuiskia. Jefté niman ichpoch okasikamatkej ika onkatka tlen melak ueyi kijtosnekiya xijkon ken tlen kimachiliayaj. Jefté okijto: “Nejua yoniktlapo nokamak ika tlen onikijli Jehová niman aman xniuelis ninotlajtolkuepas”. Niman ichpoch okijto: “Xchiua nouan ijkon ken yotikijto tikchiuas” (Juec. 11:35-39). Jefté niman ichpoch oyolmelaujkanenkej niman xkeman okinemilijkej notlajtolkuepaskej itech tlen yokijlikaj toTajtsin kichiuaskej, maski melak ouijtika kitayaj kichiuaskej (Deut. 23:21, 23; Sal. 15:4). w17.04 4 párrs. 5, 6

José miyek ipan onochiuj tlen melak xkuajli niman xkinamikiya. Kachtopa, okinemakakej ken se tlakeuajli ijkuak san kipiaya 17 xiuitl. Sakin, okitlajtlakoltijkej ika kinekiya kinajnauiltis isiuauj iteko. Yejuin xmelauak katka, san ika, okitsajkej (Gén. 39:11-20; Sal. 105:17, 18). Maski katka se tlakatl yolmelaujki, nesiya ika xkiseliaya tlateochiualistin, kiseliaya tlaueltin. San ika, trece xiujtin sakin nochi san totoka onopatlak. José okikixtijkej kampa tsauktoya niman onochiuj ken ika ome akin melak ueyixtoya ipan Egipto (Gén. 41:14, 37-43; Hech. 7:9, 10). ¿Oajmankamik José ipampa nochi tlen xkuajli okixnamik? ¿Okikajkauj tlaneltokas itech iTajtsin, Jehová? Ka. ¿Tleka ouel otlamachiak ika yolseuilistli? Pampa tlaneltokaya ipan Jehová. José okitak ika toTajtsin kipiaya ipan ima nochi tlen nochiujtoya. Ika yejon okimijli imikniuan: Maski nenkinekiyaj ninnexchiuiliskej tlen xkuajli, toTajtsin okinek ika manochiua tlen kuajli niman ijkon kichiuas ika maka miyekej mamikikan, ijkon ken kichiujtika amanin” (Gén. 50:19, 20). Ijkuak nochi otlan, José okitak ika melak kuajli ika otlamachiak. w17.08 4 párr. 6; 6 párrs. 12, 13