Abril

¿Tlenon noneki tikchiuaskej niman ijkon matechpaleui tlen kichiuaj tlayekankej? Matikixkopinakan intlaneltokil niman ken kuajli noyekanaj, niman matikinkakikan ijkuak technotsaskej ika Biblia (Heb. 13:7, 17). Matikilnamikikan ika tlayekankej techtlasojtlaj niman kinekij ika machikaui ken touikaj iuan Jehová. Se neskayotl, tla kitaj ika topolouiliaj tlanechikoltin noso ika xok techyolpaktia titenojnotsaskej, nimantsin techpaleuiskej. Kuajli techkakiskej, techyolchikauaskej niman techijliskej ika Biblia tlen uelis techpaleuis. ¿Tikita tejua ika Jehová mitstlasojtla pampa kintlalia tlayekankej? Kemantika tlayekankej ouijtika kitaj technonotsaskej. Kuakon, ¿kenon uelis titepaleuis niman ijkon tlayekankej xkintekiyomakas kichiuaskej intekiyo? Xmoyolyemanili, nochipa xnekto tikinkakis niman xkintlasojkamachili. Ijkuak mitspaleuiskej, xkita ika ijkon Jehová mitsititia itlasojtlalis. Tla ijkin tikchiua, mitspaleuis tejua, niman tlayekankej kinyolpaktis intekiyo. w18.03 31 párrs. 15, 16

Xnemij omemej kokonej akin sa noijkimej. Inseselti kipiya kenon noskaltijtiuej. Sekimej ok pitentsitsintin ijkuak chikaui intlamachilis niman tlen kimachiliaj, niman kijtouaj ika kinekij noapolaktiskej. Oksekimej uejkauij achijtsin hasta ijkuak kimachiliaj ika iuelis kichiuaskej yejon. Tajtin akin kasikamatij yejuin xkinchiualtiaj inkoneuan ika manoapolaktikan, yejuamej kinpaleuiyaj manoskaltijtiakan ken yejuamej uelij. Tajtin melak pakij ijkuak inkoneuan kitlapejpeniaj kichiuaskej tlen kijtoua tlaxelojli tlen aman tikitstokej. Maski ijkon, xkeman kipiya kilkauaskej ika tlen kinekij yejua ika inkoneuan manochiuakan inomachtijkauan Cristo. Aman ika yotikitakej yejuin, kuajli tla tajtin notlajtoltiaj: “¿Nokoneuj ikixmati tlen noneki niman ijkon nosentemakas itech toTajtsin niman noapolaktis?”. w18.03 9 párr. 6

Ika yejon, tla titlanankiliaj kampa technotsaj, xkipiya ika itlaj techtsinkixtis. Tla totsinkixtiaj, nochi kech yonokojtili akin technotsa san nenka yes (Mat. 5:37). Nemij akin tlanankiliaj yaskej kampa kinnotsaj, san ika, sakin kiteijliaj ika xyaskej pampa kitlapejpeniaj yaskej oksekan kampa okinnotskej tlen kinemiliaj melak kuajli yes. Tikchiuas yejon kiteititia ika xtitetlasojtla niman xtitetlakaita. Tlen noneki tikchiuaskej, yejua tiaskej kampa technotsaj niman tiktlasojkamatiskej ika nochi toyojlo tlen tokniuan techmakaskej (Luc. 10:7). Niman, tla itlaj uajkisaskia tlen ika xtiueliskiaj tiaskej, nimantsin matikonijlikan akin otechnotska. Ijkon tikteititiskej tlasojtlalistli niman tetlakaitalistli. Noijki melak ueyi kijtosneki matiktlakaitakan tlen nochiua kampa oksekimej ualeuaj. Sekimej tlaltikpakchanejkej xkinpasoloua tla yakaj ajsi inchan maski xokinotskej, san ika, oksekimej melak kitlasojkamatij tla kachtopa kimijliaj. Niman oksekan nochia ika akin kinnotsaj maka nimantsin matenankilikan tla san sejpa noso okpa kimijliaj, san ika, ipan okseki kalpamej, tla ijkon kichiuaj kimitaj ken akin xtlaj kitlasojkamatij. Maski san kenon, matikchiuakan nochi tlen tiueliskej niman ijkon mapakikan pampa otechnotskej. w18.03 18 párrs. 20, 21

Maka xkilkaua ika san tikixmatiskej tlen kijtoua Biblia xtechpaleuis nochipa matoyekanakan ika iespíritu santo toTajtsin (1 Rey. 4:29, 30; 11:4-6). Kuakon, ¿tlenon okseki noneki tikchiuaskej? Noneki tikitaskej ika totlaneltokil nochipa machikauak (Col. 2:6, 7). Ika yejon, melak noneki matomachtikan amoxtli “Nochipa xnemikan itech itlasojtlalis toTajtsin”. Tla titlamij tomachtiaj yejuin amoxtli techpaleuis matikitakan kenon tikintlakamatiskej ipan tonemilis itlajtolyekanalisuan Biblia. Tla tejua yotitlan timomachtia yejuin amoxtli, ¿uelis tikimitas okseki amatlajkuiloltin tlen mamitspaleuikan nochipa xtlaneltoka? (Col. 1:23). Noijki, noneki matikchiuakan teoyotl niman matiknemilikan kenon uelis tikchiuaskej ipan tonemilis tlen tomachtiaj. Maka xkilkaua ika ijkuak tomachtiaj niman titlanemiliaj tiktejtemouaj tikchikauaskej ika tiknekij tikyolpaktiskej Jehová niman tiktlakamatiskej itlanauatiluan (Sal. 40:8; 119:97). Niman noijki, tomachtiaj tikmapeuaskej tlen uelis kichiuas maka matikiskaltikan totlaneltokil (Tito 2:11, 12). w18.02 24, 25 párrs. 7-9

Uelis titlaneltokaskej ijkon ken Noé tla kuajli tomachtiaj itlajtol toTajtsin, tla tikpatiojkaitaj tlen tomachtiaj niman tla tijkauiliaj ika yejon matechyektlali niman matechyekana (1 Ped. 1:13-15). Kuakon, tlaneltokijli niman tlamachilistli tlen ualeua itech toTajtsin techtlajpiyas itech itlakajkayaualisuan Satanás niman itech ken xkuajli tlanemiliaj tlaltikpakchanejkej (2 Cor. 2:11). Yejuin xkuajli tlanemilijli kichiua ika miyekej makitlasojtlakan auilnemilistli niman tlen melak xkuajli. Niman kichiua ika tlaltikpakchanejkej san matlanemilikan itech xkuakualtin ileuilistin (1 Juan 2:15, 16). Niman hasta uelis kichiuas ika akin xkojtik intlaneltokil maka makitakan ika inonisiuijtika iueyitonal toTajtsin. Matikitakan ika ijkuak Jesús okijto ika totonaluan ijkon katkaj ken itonaluan Noé, xsan otlajto itech auilnemilistli niman itech tlen xkuajli nochiua, yejua okijto ika uelis tijkajkauaskej tikchiuaskej tlen toTajtsin kineki (Mat. 24:37-39). Xmotlajtolti: “¿Kiteititia nonemilis ika yemelak nikixmati Jehová? ¿Nechyolmapeua notlaneltokil manikintlakamati itlanauatiluan Jehová niman noijki manikinteijli?”. Ken titlanankilis kiteititis tla tejua noijki tikistinemi iuan toTajtsin akin melauak (Gén. 6:9). w18.02 9, 10 párrs. 8-10

Melauak ika noneki inuan toneloskej tlaltikpakchanejkej akin kichiuaj tlen xkuajli pampa inuan titekitij, inuan tiauej kaltlamachtijli noso inuan tichantij. San ika, kema uelis tikmapeuaskej titlanemiliskej niman touikaskej ken yejuamej. ¿Kenon uelis tikchiuaskej? Noneki tikchikauaskej ken touikaj iuan Jehová, niman tikchiuaj yejuin ijkuak tomachtiaj Biblia, niman noijki ijkuak tikintlapejpeniaj touikaskej imiuan akin kuajli yokijtokej kitekichiuiliskej. Noijki noneki tokojtiliskej tikinpaleuiskej tlaltikpakchanejkej ipan intlaneltokil. Nochipa matiktejtemotokan titenojnotsaskej niman matiktlajtlanilikan Jehová matechpaleui matikijtokan tlen kinamiki ijkuak noneki. Matikimijlikan tlaltikpakchanejkej ika tiiteixpantijkauan Jehová. Ijkon, ken kuajli tikuikaj tonemilis kiueyichiuas toTajtsin niman xtejuamej. Yotechmachtijkej “ma tikajkauakan nochi tlen xkuajli niman nochi eleuilistli yejuan onkaj ipan in tlaltikpaktli” niman noijki “ma titonauatikan kuajli, ma tiyolmelajkanemikan niman ma tiyeknemikan ipan in tlaltikpaktli” (Tito 2:11-14). Tla tikixkopinaj Jehová niman tiktlakamatij, tlaltikpakchanejkej techitaskej niman kanaj sekimej kijtoskej: “Tiknekij nemouan tiaskej, pampa yotiktekakilijkej ika toTajtsin nemouan nemi” (Zac. 8:23). w18.01 31 párrs. 17, 18

¿Kijtosneki yejuin ika xkuajli sa no tejuamej matotlasojtlakan? Ka. Tinochimej totlasojtlaj niman hasta noneki matotlasojtlakan san ken kinamiki. Ijkon otexchijchiuj Jehová. Jesús okijto: “Xkintlajsojtla oksekimej no ijki ken tejua timotlajsojtla” (Mar. 12:31). Tla xtotlasojtlaj sa no tejuamej, xuelis tikintlasojtlaskej oksekimej. Niman, Biblia kijtoua: “Ijkon, tej, ken on tlakatl kitlasojtla itlalnakayo, ijki noneki kitlajsojtlas isiuau. Yejuan kitlajsojtla isiuau sa no yejua notlajsojtla. Xakaj nemi yejuan xkitlajsojtla itlalnakayo, yej kitlakualtia niman cuidaroua” (Efes. 5:28, 29). Ika yejon, kuajli ika matotlasojtlakan san ken kinamiki. Timotlasojtlas sa no tejua ken noteneua ipan 2 Timoteo 3:2 xtechpaleuiya nion xkinamiki. Akin melak notlasojtlaj, sajnoye intech tlanemiliaj ken xok noneki kichiuaskej (Rom. 12:3). Melak najmanaj inpampa xijkon ken inpampa oksekimej. Niman, ijkuak itlaj xkuajli onkisa, miyekpa kintlajtlakoltiaj oksekimej niman xkiseliaj ika yejuamej noijki onopopolojkej. Yejon tlaltikpakchanejkej akin san intech tlanemiliaj xmelauak yolpakij. w18.01 23 párrs. 4, 5

Yotikitakej ika tijkakij Jehová ijkuak tomachtiaj Biblia. San ika, tla tiknekij iuan titlajtoskej, noneki tikchiuiliskej teoyotl. Akin tikchiuaj ken Cristo xkipiya tikitaskej teoyotl ken itlaj tlen san timomatis tikchiuas noso itlaj tlen mitspaleuis kuajli makisa tlen tikchiuas. Teoyotl yejua tlen ika tiuelij tonojnotsaj iuan akin otexchijchiuj. Niman Jehová kineki mitskakis (Filip. 4:6). Ijkuak itlaj mitsajmantos, xkilnamiki ika Biblia mitsijlia yejuin: “Xkontlajkali motlamamal ipan Jehová” (Sal. 55:22). ¿Yemelak tikneltoka ika yejuin uelis mitspaleuis? Melak miyekej tokniuan uelis kuajli mitsijliskej ika yejuin yokinpaleui. Niman tejua noijki uelis mitspaleuis. Noneki nochipa tikchiuiliskej teoyotl Jehová, xsan ijkuak tiknekiskej matechpaleui. Uelis ika kemantika melak tajmanaj ipampa totlaueluan niman hasta tikilkauaj miyek tlateochiualistin tlen yotikselijkej. ¿Tleka xtikchiua ika mojmostla xnemili itech yeyi tlemach tlen ika tiktlasojkamachilis Jehová? w17.12 25, 26 párrs. 10, 11

Nochi xiujtin melak miyekej akin nomachtiaj Biblia nosentemakaj itech Jehová niman noapolaktiaj. Miyekej intech yejuamej san kemach telpokamej akin onoskaltijkej kampa inchanejkauan kichiuaj ken Cristo, niman aman yokitlapejpenijkej nemilistli tlen melak kuajli (Sal. 1:1-3). Kuajli tikmatstokej ika tajtin akin iteixpantijkauan Jehová melak kinekij mayejko tonajli ijkuak inkoneuan noapolaktiskej (uelis tikitas 3 Juan 4). Tajtin akin kichiuaj ken Cristo kinekij ika inkoneuan makixmatikan “iYektlajkuilol Dios”, tlen aman kipiya Tlajkuiloltin ika hebreo niman Tlajkuiloltin ika griego. Maski kokonej akin pitentsitsintin, san kech iuelij kasikamatij, uelis kixmatiskej tlen xouijtika intech akin tlajtoua Biblia niman itech tlen kijtoua ika opanok. Ikalpan Jehová yokikixti miyek amoxtin, amatlajkuiloltin niman videos ipan miyek tlajtoltin tlen tajtin uelis kitekitiltiskej niman ijkon kinpaleuiskej inkoneuan. Matikilnamikikan ika san uelis kuajli touikaskej iuan Jehová tla tikixmatij tlen kijtoua Biblia. w17.12 18 párr. 1; 19 párr. 4

Matiknemilikan ika se tokniuj siuatl kinemilia ika iueuentsin, akin xTeixpantijketl, kichiuilia tlen xkuajli. ¿Kichiuas manoyektlali tlen panotika tla san kixkoijlijtok tlen kichiua? Niman, maski tla kichiuaskia ika iueuentsin makipatla tlen kichiua, ¿kichiuaskia yejuin makineki kitekichiuilis Jehová? Kanaj xuelis. Yejuin xijkon ontlamis tla yejua kitlakaita pampa yejua akin tlayekana ipan inchan. Ijkon kichiuas ika ichanejkauan manemikan ika yolseuilistli, kiueyichiuas Jehová niman hasta uelis ika iueuentsin kinekis kitekichiuilis toTajtsin. Tla ijkon panoua, kanaj omemej kiseliskej tlen tikchiaj (1 Ped. 3:1, 2). Matiknemilikan aman ika se tokniuj kinemilia ika isiuauj, akin xTeixpantijketl, xkitlakaita. ¿Kichiuas makitlakaita tla kitsajtsilia niman ijkon kititis akinon tlanauatia? Tikmatstokej ika ka. Jehová kichia ika yejua makixkopina Jesús niman makitlasojtla isiuatsin. Cristo tlanauatia ika tlasojtlalistli niman ika ijyouilistli ipan tlanechikojli (Luc. 9:46-48). Tokniuj akin kixkopina ineskayo Jesús kanaj uelis kichiuas ika isiuatsin noijki makineki kitekichiuilis Jehová. w17.11 28, 29 párrs. 13, 14

Tlaltikpakchanejkej akin tlanemiliaj ijkon ken yejuin tlaltikpaktli xkipatiojkaitaj itlanauatiluan Jehová. Ken tlanemiliaj uelis ika yolik kijtlakos totlaneltokil. Tinochimej uelis techmauas ken tlanemilia tlaltikpaktli, tlen nosemoyaua ipan televisión, Internet, kampa titekitij niman ipan kaltlamachtijli. Ipan miyekej países, melak tikinkakis akin kijtouaj ika xtlaneltokaj itech toTajtsin. Kanaj xkuajli kitejtemouaj kimatiskej tla melauak nemi noso xnemi toTajtsin, noso kanaj kinyoltilana kichiuaskej nochi tlen kuelitaj (Sal. 10:4). Oksekimej kanaj kinemiliaj melak tlamachilisejkej ijkuak kijtouaj: “Uelis kuajli ninoyekanas maski xnitlaneltokas itech toTajtsin”. ¿Kinamiki tikneltokas ika xnemi se Tlachijchiujketl? Tla tikyejyekouaj tiknankiliskej yejuin ika ciencia, kanaj techpopolos nochi tlen kijtoua. San ika, ken nonankilia nion xouijtika. Ijkon ken kaltin ononek yakaj makinchijchiua, nochi tlen yoltika yakaj yokichijchiuj. w17.11 20, 21 párrs. 2-4

¿Tleka melak ueyi kijtosneki matonechikokan ijkuak noilnamikis imikilis Cristo? Matikilnamikikan ika totlanechikoluan noijki tlen ika tikueyichiuaj toTajtsin. Niman uelis tikmatstoskej ika Jehová niman Jesús kuajli kitstokej akinomej nokojtiliaj yaskej ipan yejuin tlanechikojli tlen melak ueyi kijtosneki itech nochi xiuitl. Tiknekij makitakan ika ompa tinemiskej, niman ika san ueliskia techteltis se kokolistli tlen melak ueyi noso okse itlaj melak ouijtika. Ijkuak ika tlen tikchiuaj tikteititiaj ika totlanechikoluan ueyi kijtosnekij, nochi yejon kichiua ika Jehová makipiya totokayo ipan “amoxtli tlen tetlalnamiktia”. Yejuin amoxtli, tlen noijki kitokayotiaj “tlajkuilolamatl yejuan kijtoua akinomej kipiaj yenkuik nemilistli”, kipiya intokayo nochimej akin Jehová kineki kinmakas nemilistli tlen xkeman tlamis (Apoc. 20:15). Ipan tonaltin achto yejkos ijkuak tikilnamikiskej imikilis Cristo, uelis tikxeloskej tiempo niman ijkon tikchiuaskej teoyotl niman kuajli tikitaskej kenon touikaj iuan Jehová (2 Cor. 13:5). w18.01 13 párrs. 4, 5

Tla akin otemikti inemiya ipan yejuin ueyikalpan, kijtosnekiya ika yomakiska. Jehová okijto itech yejuin kalpamej: “Niman yejuin kipiya mechpaleuiskej” (Jos. 20:2, 3). Jehová xok kitlajtlaniya oksejpa makiyolkuitikan akin otemikti ipampa tlen yokichiujka. Niman yejon tetlakuepiltijketl ipampa yestli xkikauiliayaj makalaki ipan kalpan niman makimikti. Tla akin otemikti nemiya ijtik yejon kalpan, ompa toTajtsin kitlajpiaya niman xkipiaya itlaj kimakasis. Yejua xtsauktoya, pampa ueliskia tekitis, kinpaleuis oksekimej niman kitekichiuilis Jehová ika yolseuilistli. Ueliskia nemis ika iyojlo niman yolpakis. Nemij itekipanojkauan toTajtsin akin yonoyolkuepkej itech se ueyi tlajtlakojli san ika ok kintekipachoua tlen okichiujkej. Sekimej hasta kinemiliaj ika Jehová nochipa kitstos itlaj tsokuiltik ipan yejuamej. Tla tejua ijkon timomachilia, uelis kuajli tikmatstos ika Jehová yomitsikneli niman kuajli yomitstlapopolui. w17.11 9 párr. 6; 11 párrs. 13, 14

Se ken uelis titlapaleuiskej matinemikan san sekan yejua kuajli titlanemiliskej itech tlenon kijtosneki pan niman vino tlen notekitiltia ijkuak noilnamiki imikilis Cristo. Noneki matikchiuakan achto ika yejkos yejon yeuajli ijkuak tikilnamikiskej, niman melak noneki ipan yejon yeuajli (1 Cor. 11:23-25). Pan tlen xkipiya tlaxokolilistli kijtosneki itlalnakayo Jesús tlen xkipiya tlajtlakojli niman tlen okitemakak ken uentli, niman vino kijtosneki iyesyo tlen okitoyauj. Matikilnamikikan ika pampa Jesús onotemakak, onoteititi ome tlasojtlalistli tlen melak ueyi kijtosnekij: tlasojtlalistli tlen Jehová okiteititi ijkuak okitemakak iKonetsin niman ijkon techmakixtis, niman tlasojtlalistli tlen Jesús okiteititi ijkuak okinek kitemakas inemilis topampa. Kuajli titlanemiliskej itech yejuin kipiya ika techyolchikauas noijki matikintlasojtlakan. Niman tlasojtlalistli tlen tikmachiliaj ipampa Jehová niman ipampa tokniuan kentla se mekatl tlen techsentlalia niman techpaleuiya san sekan matinemikan. w18.01 15 párr. 11

Jehová melak kintlasojtla tlaltikpakchanejkej. Niman pampa melak techtlasojkaita hasta okitemakak ikoneuj niman ijkon uelis tinemiskej nochipa (Juan 3:16). Tla Jehová xkichiuaskia tlen yokijto kichiuas ika tlayekapan, Satanás niman oksekimej itlauelikniuan toTajtsin kiteititiskiaj ika melauak tlen kijtouaj. Satanás kijtoua ika Jehová tekajkayaua, xkineki tlen kuajli ipampa tlaltikpakchanejkej niman xtlayekana ken kinamiki. Itlauelikniuan ueliskiaj kipijpinaujtiskej Jehová itech tlen yokijto kichiuas niman kijtoskej: “¿Tlika hasta aman xuajlau Cristo [xnochiua, TNM] ijkon ken okijtoj? Desde omikej on toachtojtajuan, ok sa no ijki tikitaj tlaojonkaj ken ijkuak nochi otsimpeu” (2 Ped. 3:3, 4). San ika, Jehová kichiuas tlen yokijto. Yejua xsan kichiuas manoteititi ika melauak kinamiki tlayekanas noijki kinmakixtis tlaltikpakchanejkej akin kitlakamatij (Is. 55:10, 11). Iueyitlayekanalis Jehová kisa itech itlasojtlalis. Ika yejon, uelis kuajli tikmatstoskej ika nochipa kintlasojtlas niman kintlasojkaitas itekipanojkauan akin xkikauaj (Éx. 34:6). w17.06 23 párr. 7

Ijkuak Jehová okijto ipan Génesis 3:15 ika kuajtitlaniskia se Temakixtijketl, okitak kentla ikoneuj yokitemakakoya inemilis. Naui mil xiujtin sakin, Jehová okitemakak isenteKonetsin inpampa nochimej tlaltikpakchanejkej, maski yejuin melak okiyolkoko (Juan 3:16). ¡Melak tiktlasojkamatij! Pampa Jehová otexchijchiuj ken itlachialis, tiuelij tikteititiaj tlasojtlalistli maski xtlaj tiktlanij. Abel okiteititi itlasojtlalis tlen kimachiliaya itech toTajtsin ijkuak okimakak tlen kuajli kipiaya (Gén. 4:3, 4). Noé okiteititi itlasojtlalis inpampa oksekimej ijkuak otenojnots miyek xiujtin maski xokikakej (2 Ped. 2:5). Abrahán okiteititi ika itlasojtlalis itech toTajtsin ueyi katka xijkon ken itlaj okse tlen kimachiliaya ijkuak okinek kitemakas ikoneuj Isaac (Sant. 2:21, TNM). Ijkon ken yejuin tlakamej yolmelaujkej, tejuamej tiknekij tikteititiskej tlasojtlalistli maski ijkuak ouijtika tikchiuaskej. w17.10 7, 8 párrs. 3, 4

Itekiyo Jesús ken toUeyi Teopixkauj techmaka miyek tlen ika uelis kuajli tikmatstoskej ika uelis techtlapopoluis niman ika uelis tikseliskej teiknelilistli niman “iueyi tetlajsojtlalis yejuan techpaleuis ijkuak itlaj techpolos” (Heb. 4:16). Ijkon tej, tla tikneki timopaleuis itech Jehová, xpiya tlaneltokijli ipan tlaxtlauijli tlen okichiuj Jesús. Xpiya tlaneltokijli ika tlaxtlauijli tejua mitspaleuiya (Gál. 2:20, 21, TNM). Xpiya tlaneltokijli ika tlaxtlauijli yejua tlen kichiua ika toTajtsin makintlapopolui tlajtlakoltin tlen tejua otikinchiujka. Xpiya tlaneltokijli ika tlaxtlauijli tejua mitsmaka tlamachialistli ika tinemis nochipa. Tlaxtlauijli tlen okichiuj Jesús se tetlayokolijli tlen Jehová yomitsmakak tejua. ijkuak Jehová techtlapopoluiya, xok kipiya tikmakasiskej ika oksejpa matechilnamikti noso matechyolkuiti ipampa yejon (Sal. 103:8-12). Kema, kuajli matikmatstokan ika yejua techtlapopoluiya. w17.11 11, 12 párrs. 14-17

Yeuajli ijkuak onochiuj kachtopa iTlakualis toTeko, Jesús okitlajtlan ipan se teoyotl ika inomachtijkauan noijki kualtsin manouikakan ijkon ken yejua niman iTaj nouikaj. Yemelak, Jehová yokinankili yejon teoyotl tlen okichiuili ikonetsin akin kitlasojtla. Niman ijkon ken xueli kichiua okse tlanechikojli, ijkuak tikilnamikij imikilis Cristo kuajli kiteititia ika iteixpantijkauan Jehová san sekan tinemij. Ipan seki kalpamej, xmiyekpa noita noso hasta xkuajli kitaj ijkuak tlaltikpakchanejkej akin ualeuaj itech okseki razas nosentlaliaj ipampa intlaneltokil. San ika, Jehová niman Jesús kitaj melak kualtsin ika san sekan tinemij. Itekipanojkauan Jehová xtechmojkatlachialtia ika kualtsin san sekan tinemij. Niman Jehová yokijtoka ika panoskia yejuin (Ezeq. 37:15-17; Zac. 8:23). w18.01 14 párrs. 7-9

“Kalchijchiujkej” akin xokiselijkej Jesús, akin Mesías, katkaj tlayekankej judíos. Yejuamej xsan xokiselijkej ika yejua katka Cristo. Miyekej hasta okitlajtlankej makimiktikan (Luc. 23:18-23, TNM). Ika yejon, ijkuak okimiktijkej noijki intlajtlakol katka. Tla Jesús xokiselijkej niman okimiktijkej, ¿kenon ueliskia nochiuas “tetl tlen yakatstika”? San tla yejua yoliuiskia. Apóstol Pedro otlajto itech “Jesucristo yejuan ualeua Nazaret” akin yejuamej okipilojkej ipan se kojtli melaktik, san ika, “Dios okiyoliuitij niman oketsteu ne ipan itlalkon” (Hech. 3:15; 4:5-11; 1 Ped. 2:5-7). Sakin ika okiyolitijkej, iKoneuj toTajtsin onochiuj akin san itechkopa tiuelij timakisaj, “pampa Dios xokuajtitlan yakaj okse tlakatl ipan in tlaltikpaktli yejuan itechkopa uelis timakisaskej” (Hech. 4:12; Efes. 1:20). w17.12 9, 10 párrs. 6-9

Jesús okijto yejuin itech ueyi tlajyouilistli tlen iyejkotika: “Kitaskej [...] yejuan oninochiu Tlakatl. Niman ijkuakon nochi tlajtlakoltlakatl [...] nechitas nejua yejuan oninochiu Tlakatl, niuajlas ikan noueyi poder niman noueyilis. Niuajlas ipan on moxtli yejuan kisa ne iluikak. Kemaj  ika on trompeta chikauak kipitsaskej, nikinuajtitlanis on noiluikaktekitkauan para kinsentlaliskej” (Mat. 24:29-31). Jesús kinsentlalis akin toTajtsin “yokintlapejpenij” ijkuak kinuikas iluikak akin ok nemiskej ipan tlaltikpaktli. Yejuin panos sakin ika peuas ueyi tlajyouilistli, san ika, yes achto ika peuas Armagedón. Ipan yejon guerra, Jesús niman 144,000 kintlaniskej tekiuajkej ipan tlaltikpaktli (Apoc. 17:12-14). Tonajli ijkuak noilnamikis imikilis Cristo achto ika Jesús uajlas niman kinuikas tlapejpeniltin iluikak, yejon yes sa ika tlami. w18.01 16 párr. 15

Jesús chanti ipan iluikak ika nemilistli tlen xkeman tlamis (Rev. 1:5, 18, TNM; Rom. 6:9; Col. 1:18, TNM; 1 Ped. 3:18, TNM). Yejua okimijli itlatitlankauan yolmelaujkej ika yaskiaj iluikak niman ijkon iuan tlanauatiskiaj (Luc. 22:28-30). Pablo okijkuilo: “Cristo melauak oyoliu niman onoketsteu ipan itlalkon. Niman yejua yakatstikaj intech on mimikej yejuan yoliuiskej niman noketsteuaskej ipan intlalkon”. Sakin okiteititi ika, ijkon ken Jesús, oksekimej yoliuiskiaj niman ijkon nemiskej iluikak. Okijto: “Pero cada se ipan nochiuas ijkuak kontocaros. Achtoj Cristo oyoliu niman onoketsteu ken on uelik yejuan achtoj tlaki ipan kojtli. Kemaj ijkuak yejua uajlas [ʻtekiuajtitosʼ, TNM], [...] on yejuan iyaxkauan yoliuiskej niman noketsteuaskej” (1 Cor. 15:20, 23). Jesús opeuj tekiuajti ipan xiuitl 1914. Aman tinemij ipan tonaltin ijkuak tekiuajtitika, niman itlamiyan yejuin xkuajli tlaltikpaktli iyejkotika. w17.12 10 párr. 11; 11 párrs. 14-16

ToTajtsin akin teikneliani noijki yokinpolo akin melak kintlasojtla, ken Abrahán, Isaac, Jacob, Moisés niman tekiuaj David (Núm. 12:6-8; Mat. 22:31, 32; Hech. 13:22). Biblia kijtoua ka toTajtsin melak kineki maajsi tonajli ijkuak oksejpa kinmakas innemilis (Job 14:14, 15). Ijkuak panos yejon, yejuamej yolpakiskej niman xok kualoskej. Matikilnamikikan ika toTajtsin noijki okitak kenon omik iKoneuj “akin yejua melak okitlasojtlak” (Prov. 8:22, 30). Nion xuelis tiknemiliskej kenon Jehová melak onoyolkoko (Juan 5:20; 10:17). Uelis kuajli tikmatstoskej ika Jehová techpaleuis. Ika yejon, noneki matiktlapouilikan toyojlo niman matikijlikan nochi tlen tikmachiliaj. Melak techyolchikaua tikmatiskej ika kasikamati kenon toyolkokouaj niman techyolseuiya ijkuak melak noneki. San ika ¿kenon kichiua? (2 Cor. 1:3, 4). w17.07 13 párrs. 3-5

Melak miyekej tlaltikpakchanejkej kitekichiuiliaj toTajtsin amanin. Inyojlo kichiua ika matlapaleuikan ika “tlemach tlen patioj”, yejuin uelis yes ika intiempo, intomin niman inkojtilis (Prov. 3:9). Jehová xkeman kilkauas tlen tikchiuaj ipampa nion tlasojtlalistli tlen tikititiaj. Nochi tlen youel yonochiuj ipampa tlaneltokijli tlen melauak ipan yejuin itlamiyan tonaltin melak kuajli teititia ika Jehová kiteochiua niman ika Cristo kiyekana. Itekipanojkauan toTajtsin tinemij ipan ikalpan tlen xnopapatla, tepaleuiya niman nochipa onias. Ika yejon, matikpatiojkaitakan ika Jehová techkauilia matinemikan ipan ikalpan niman matijkakikan “itlajtol Jehová”, toTajtsin (Zac. 6:15). Tla tikchiuaj, techtlajpiyas toTekiuaj niman toUeyi Teopixkauj. Matikchiuakan nochi tlen tiueliskej ika tikpaleuiskej tlaneltokijli tlen melauak. Ijkon, kuajli tikmatstoskej ika Jehová akin kinyekana akin tlaixnamikij techmakixtis itech yejuin itlamiyan tonaltin niman ika nochipa. w17.10 30 párrs. 18, 19

Sa achijtsin poliui, nochi tlen kiyekana Satanás uetsis, ken notekitiltia tomin, política niman tlaneltokijli xmelauak. Teotlajtokej Ezequiel niman Sofonías okijtokej ika oro niman plata xtlaj kijtosnekis, maski ipan miyek xiujtin yonotekitilti ken itlaj tlen melak patioj itech ken notekitiltia tomin (Ezeq. 7:19; Sof. 1:18). ¿Kenon tomachiliskiaj tla yejkoskia ijkuak tlamis tonemilis ipan yejuin tlaltikpaktli niman tikitaskiaj ika yotikmapeujkej melauak “riquezas” pampa otiksentlalijkej “riquezas de yejua in tlaltikpaktli”? Ueliskia tomachiliskej ken akin tekiti nochi inemilis niman kitlani miyek tomin niman sakin kita ika xmelauak tomin (Prov. 18:11). Tomin tlen notekitiltia ipan yejuin tlaltikpaktli tlamis. Ika yejon, nochipa ijkuak tiueliskej matikintekitiltikan ika imiuan matouikakan akin nemij iluikak. San tlenon tikchiuaskej ika tikpaleuiskej Tekiuajyotl techpaleuis ok melak kuajli matouikakan iuan Jehová. w17.07 11 párr. 16

Sekimej tokniuan akin yokichiujkej se ueyi tlajtlakojli kiyejyekouaj kiyanaskej pampa xkinekij pinauiskej nion xkinekij kinyolkokoskej oksekimej (Prov. 28:13). San ika, ijkon kiteititiaj ika kinpoloua tlasojtlalistli, pampa sa no yejuamej noijtlakotokej niman noijki kimijtlakotokej oksekimej. Uelis kichiuaskej ika espíritu santo manotelti, niman kuakon yolseuilistli ipan tlanechikojli uelis poliuis (Efes. 4:30). Tlasojtlalistli tlen melauak kichiuas ika tokniuj akin yokichiuj se ueyi tlajtlakojli makimijli tlayekankej niman ijkon uelis kipaleuiskej (Sant. 5:14, 15, TNM). Tlasojtlalistli yejua se kualneskayotl tlen melak ueyixtika (1 Cor. 13:13). Kichiua manesi ika tejuamej tikchiuaj ken Cristo niman ika tikixkopinaj Jehová, akin itech ualeua tlasojtlalistli. Pablo okijkuilo ika tla yejua xtetlasojtlaya yejua xtlaj kijtosnekiya (1 Cor. 13:2). Ijkon tej, nochipa matikteititikan totlasojtlalis xsan ika “tlajtojli”, yej noijki “ika tlen tikchiuaj niman tlen melauak” (1 Juan 3:18, TNM). w17.10 11 párrs. 17, 18

Matiknemilikan kenon José okiteititi ika yolchikauak katka ijkuak isiuauj Potifar okichiualti iuan manoteka. José kimatstoya ika kipiyaskia tlaueltin tla xkiseliaya tlen kitlajtlaniliayaj. Maski ijkon, xokpa okinemili tlen kichiuas, yejua okimapeuj (Gén. 39:10, 12). Matikitakan aman ineskayo Rahab, akin chantiya Jericó. Ijkuak ome israelitas akin oichtakatlachiatoj oyajkej ichan, yejua okipix yolchikaualistli, okimiyan niman okinpaleui macholokan (Jos. 2:4, 5, 9, 12-16). Itlatitlankauan yolmelaujkej Jesús noijki yokitakaj kenon yolchikauak katka Jesús. Niman ijkuak seki teopixkej akin kimixmatij ken saduceos okinnauatijkej makikajkauakan ika tenojnotsaj itech, yejuamej xokichiujkej (Hech. 5:17, 18, 27-29). José, Rahab, Jesús niman itlatitlankauan kuajli yokinemilijkaj kichiuaskej tlen melajki. Yolchikaujkej katkaj pampa tlaneltokayaj itech Jehová, xpampa melak tlaneltokayaj intech. Ijkuak tikixnamikiskej itlaj kampa nonekis matiyolchikaujkej, matitlaneltokakan itech Jehová niman maka totech (2 Tim. 1:7). w17.09 29 párrs. 6-9

Xuelis tikpatlaskej tonemilis san ika tokojtilis. Miyekej melak onokojtilijkej niman ijkon kipatlaskej ken nemiyaj. ¿Kenon ouel okichiujkej? Pampa onopaleuijkej ipan kojtilistli tlen okinmakak iTlajtol toTajtsin niman iespíritu santo (Luc. 11:13; Heb. 4:12). Tejuamej noijki uelis topaleuiskej itech yejuin kojtilistli tla mojmostla tikamapouaj Biblia, titlanemiliaj itech tlen tikamapouaj niman tiktlajtlaniliaj Jehová ika nochipa matechmaka tlamachilistli niman kojtilistli tlen ika tiktlakamatiskej iTlajtol (Jos. 1:8; Sal. 119:97; 1 Tes. 5:17). Iespíritu santo toTajtsin niman Biblia noijki techkojtiliskej tla toyektlaliaj ijkuak tiauej totlanechikoluan (Heb. 10:24, 25). Noijki, kipiya ika tiktekitiltiskej nochi tlen techmaka ikalpan Jehová, ken revistas, JW Broadcasting ipan Internet, JW Library niman página jw.org (Luc. 12:42). Xsan noneki tijkajkauaskej tlen achtopa tikchiuayaj niman ijkon techselis toTajtsin, noijki kipiya ika totlaliliskej yenkuik nemilistli niman maka keman tokixtiliskej (Col. 3:10). w17.08 21 párrs. 16, 17

Tekiuaj David ipan onochiuj miyek tlen xkuajli niman tlen xkinamikiya. Maski Jehová okitlapejpeni matekiuajti ipan Israel ijkuak san telpochtli katka, ononek tlamachias kanaj 15 xiuitl niman ijkon nochiuas tekiuaj san intech ichanejkauan (2 Sam. 2:3, 4). Itech yejon tonaltin, ononek cholos itech tekiuaj Saúl, akin kinekiya kimiktis. Ika yejon, David kemantika ononek chantis ipan okse país noso hasta ijtik teostomej ipan tlaluaktli. Sakin, Saúl omik ijkuak oteixnamikito. Maski ijkon, David ononek tlamachias kanaj chikome xiujtin ika nochiuas tekiuaj itech nochi kalpan Israel (2 Sam. 5:4, 5). ¿Tleka okinek David tlamachias ika yolseuilistli? Yejua tlaneltokaya ipan itlasojtlalis Jehová tlen xtekaua. Kichiaya ika pakilistli tonajli ijkuak Jehová kipopoloskia nochi itlaueluan. Noijki, tlanemiliaya itech kenon Jehová yokipaleuijka yeuejkaui (Sal. 13:6). Kema, David kimatiya ika tla tlamachiaya, kuajli onkisaskia. w17.08 6, 7 párrs. 14, 15

Tlajtoltin nopatlatiuej ijkuak panoua xiujtin. Yejuin tlen ipan onochiuj hebreo niman griego, tlajtoltin tlen melak onokuikej ika onoijkuilo Biblia. Ipan yejuin tonajli, yejon tlajtoltin xok ijkomej ken ijkuak onotekitiltijkej ipan Biblia. Ika yejon, akin kinekij kasikamatiskej iTlajtol toTajtsin noneki kitaskej se tlen yonotlajtolkuep, maski mauelikan hebreo noso griego tlen aman notekitiltia. Nemij akin kinemiliaj ika kuajli kasikamatiskiaj Biblia tla nomachtiaj hebreo niman griego tlen onotekitilti yeuejkaui, san ika, kanaj yejuin xmelak tepaleui ken kinemiliaj. Tiktlasojkamatij ika Biblia yonotlajtolkuep san tlajko noso nochi kanaj ipan 3,000 tlajtoltin. Yejuin teititia ika Jehová kineki ika “ipan nochi país, nochi raza, ipan nochi pueblo”, niman “nochi kech sesetlamantik tlajtoltin” manopaleuikan itech iTlajtol (Apoc. 14:6). Yemelak ika tikitaskej itlasojtlalis Jehová niman ika xtechikoita, kichiua matonisiuijtiakan itech. w17.09 19 párr. 4

Tla se tochanejkauj noso se tokniuj techyolkokoua, ineskayo José uelis techpaleuis maka itlaj totoka matikchiujtikisakan. Noijki, tla tikpiyaj se tochanejkauj akin okikixtijkej itech tlanechikojli, kanaj nonekis matikteltikan tlen tikmachiliaj niman ijkon xtikchiuaskej itlaj tlen kichiuas iuan matouikakan. Tikchiuas yejuin uelis ouijtika yes, san ika techpaleuis tla tikilnamikij ika ijkuak ijkon tikchiuaj, tikixkopinaj Jehová niman tiktlakamatij tlen techijlia. Se neskayotl tlen onka ipan Biblia yejua tekiuaj David. Ijkuak Saúl kitlaueltotokatinemiya niman ijkuak Simeí kikualanisnekiya, David nion xokualan nion xokikuik ikojtilis intechkopa yejon tlakamej (1 Sam. 26:9-11; 2 Sam. 16:5-10). Melauak, tikmatij ika David xnochipa ouel onotelti. Matikilnamikikan tlenon kichiuilisnekiya nexikole Nabal, niman kenon otlajtlako iuan Bat-seba (1 Sam. 25:10-13; 2 Sam. 11:2-4). ¿Tlenon tiuelij itech inemilis David? Kachtopa, ika tlayekankej kipiya ika noteltiskej niman melak notlajpiyaskej ika xkitekitiltiskej intlanauatilis ika kichiuaskej tlen kinekiskej. Ika ome, xakaj kipiya kinemilis ika xitlaj ipan nochiuas, nion ika uelis kixikos maski san katlejua tlatlatalistli (1 Cor. 10:12). w17.09 5, 6 párrs. 12, 13