Mayo

Melauak ika ijkuak techmelajkatlaliskej uelis techkokos, san ika, onka okse itlaj tlen melak tekoko: ijkuak xtikseliaj ken techmelajkatlaliaj (Heb. 12:11). Matikitakan tlen okichiuj Caín. Ijkuak toTajtsin okitak ika Caín kitlauelitaya ikniuj niman kinekiya kimiktis, okijli: “¿Tleka melak titlauelmiki, niman titlaueltlacha? Tla tikchiua tlen kuajli, ¿xok oksejpa mitstlakaitaskej? San ika, tla xtikchiua tlen kuajli, tlajtlakojli sa mitschiatok ipan puerta, niman kineki mitstlanis; san ika, tejua, ¿uelis tiktlanis?” (Gén. 4:6, 7). Teajman ika, Caín xokikak Jehová. Okimikti ikniuj niman okixnamik tlajyouilistli niman tlen xkuajli ipan nochi inemilis (Gén. 4:11, 12). Tla Caín kikakiskia ken Jehová okimelajkatlalijka, xkixnamikiskia tlen melak tekoko. Ken tikitaj, Jehová xkineki matotejtemouilikan tlajyouilistli (Is. 48:17, 18). Ika yejon, matijkakikan ken techmelajkatlalia Jehová niman matochiuakan tlamachilisejkej (Prov. 8:33). w18.03 32 párrs. 18-20

¿Kenon Daniel okixmat Jehová? Kuajli nesi ika itajuan Daniel melak kuajli okimachtijkej. Yejuamej okititijkej makitlasojtla Jehová niman iTlajtol. Niman Daniel nochipa okipix yejon tlasojtlalistli. Maski melak iueuentsin katka, tikitaj ika yejua kuajli nomachtiaya itlajtol toTajtsin. Ipan iteoyouj tlen okichiuj ika nochi iyojlo niman ika yolyemanilistli, tlen onka ipan Daniel 9:3-13 kiteititia ika yejua melak kuajli kixmatiya toTajtsin niman nochi tlen okichiujka ipampa Israel. ¿Tleka xtikxeloua motiempo niman ijkon tikpouas yejon teoyotl niman itech titlanemilis? Judíos akin yolmelaujkej katkaj melak kintekiyomakaya nemiskej ipan Babilonia kampa melak kinueyichiuayaj tajtsitsintin. Xnemili yejuin, Jehová okimijli judíos: “Xtejtemokan yolseuilistli ipan ueyikalpan kampa xnenchanejkej” (Jer. 29:7). San ika, noijki kinekiya ika san yejua makiueyichiuakan (Éx. 34:14). ¿Tlenon okipaleui Daniel niman ijkon kichiuas yejuin ome tlen kitlajtlaniya toTajtsin? Tlamachilistli tlen ualeua itech toTajtsin okipaleui kasikamatis ika nonekiya kachtopa kitlakamatis Jehová maka ken tekiuajkej. Sakin ika opanok miyek xiuitl, Jesús noijki okitemakak yejuin tlamachtijli (Luc. 20:25). w18.02 10 párrs. 11, 12

¿Tikimixnamiktika seki tlaueltin, kanaj tikpiya se kokolistli, xtikpiya tomin noso mitstlaueltokaj? ¿Mitstekiyomaka kemantika tikpiyas pakilistli ipan tekitl tlen tikchiua ipampa Jehová? Tla kema, mitsyolchikauas ineskayo Noé, Daniel niman Job. Yejuamej tlajtlakolejkej katkaj, niman okixnamijkej miyek tlauejli tlen tejuamej noijki tikixnamikij, niman hasta tlaueltin tlen ika ueliskiaj kipoloskej innemilis. Maski ijkon, yejuamej xkeman okikaujkej Jehová, niman yejua okimitak ken neskayomej akin kuajli tlaneltokayaj niman tetlakamatiyaj (Ezeq. 14:12-14). Yejuin tlaxelojli tlen aman tikitstokej, okijkuilo Ezequiel ipan Babilonia ipan xiuitl 612 i.x.x. 1, makuijli xiuitl achto ika kixoxotoniskiaj Jerusalén, tlen onochiuj ipan xiuitl 607 i.x.x. 1 (Ezeq. 1:1; 8:1). Melak achijtsitsintin tlaltikpakchanejkej okiteititijkej kualneskayomej tlen kipiayaj Noé, Daniel niman Job, akin okinneskayotijkej niman ijkon makisaskej (Ezeq. 9:1-5). Aman noijki, san akin Jehová kimitas yolmelaujkej ken yejuamej kimineskayotiskej niman ijkon makisaskej ijkuak kipopoloskej tlen kiyekana Satanás (Apoc. 7:9, 14). w18.02 3, 4 párrs. 1-3

Telpochtli noso ichpochtli, xmotlajtolti: “¿Niauj tlanechikoltin niman nontenojnotsa san pampa notajuan kinekij ijkon manikchiua? ¿Kuajli ninouika iuan Jehová?”. Yemelak ika tinochimej, maski tla titelpokamej noso itiuejueyimej, noneki tiktejtemoskej kenon sakin tiktekichiuiliskej Jehová. Yejuin techpaleuis matikchikauakan ken toyekanaj ika iespíritu santo toTajtsin (Ecl. 12:13). Tla yotikitakej kanon uelis toyektlaliskej, aman kipiya ika topatlaskej. Yejuin melak ueyi kijtosneki. Pampa uelis kichiuas matikselikan nemilistli noso mikilistli (Rom. 8:6-8). Melauak ika, tikpiyas chikauak motlaneltokil xkijtosneki ika aman xok titlajtlakole. Niman Jehová techpaleuiya ika iespíritu. Maski ijkon, kipiya ika tokojtiliskej. Maski tomachtiskej Biblia melak teyolpakti, xkipiya ika tikpouaskej kentla tikpouaskiaj se amoxtli tlen san ika toyolpaktiskej. Kipiya ika tokojtiliskej tiknextiskej tlen iyantika niman tlen techpaleuis. w18.02 25 párrs. 10, 11

¿Kipiyaj ika tlaltikpakchanejkej kixmatiskej nochi itech Biblia achto ika ueliskej nosentemakaskej niman noapolaktiskej? Ka. Pampa nochimej akin noapolaktiaj ok noneki nomachtijtiaskej okseki itech tlen melauak (Col. 1:9, 10). Kuakon, ¿kech noneki se kixmatis itech Biblia achto ika noapolaktis? Techpaleuis matiknankilikan yejuin tla tikitaj tlen ipan onochiuj se familia akin onen ipan kachtopa siglo (Hech. 16:25-33, TNM). Kanaj nisiuj itech xiuitl 50, Pablo ika okpa okitlajpaloto kalpan Filipos ken misionero. Yejua niman akin iuan yaya, Silas, okimajsikej niman okintsajkej pampa okintlajtolchijchiuilijkej. Yejon yeuajli, se tlalolinalistli okinolini itsintepanuan cárcel niman puertas otlapojkej. Akin kitlajpiaya cárcel, kinekiya nomiktis pampa okinemili ika ocholojkej akin tsauktoyaj. San ika, Pablo xokikauili makichiua. Yejua niman Silas okinojnotskej itech iTlajtol toTajtsin yejon tlakatl niman ichanejkauan. Pampa melak okipatiojkaitakej tlen okinmachtijkej itech Jesús nimantsin onoapolaktijkej. w18.03 10 párrs. 7, 8

Jehová yejua se toTajtsin akin yolpaki, niman itekipanojkauan kiteititiaj yejuin kualneskayotl. Noijki, pampa xsa no yejuamej notlasojtlaj niman xsan kinemiliaj itlaj kiseliskej, itekipanojkauan Jehová yolpakij pampa yejuamej kichiuaj tlen uelij niman ijkon kinpaleuiskej oksekimej (Hech. 20:35; 2 Tim. 3:2). ¿Kenon uelis tikmatiskej tla tlasojtlalistli tlen tikmachiliaj topampa yokipanaui totlasojtlalis itech toTajtsin? Matiknemilikan itech tlen techijlia Filipenses 2:3, 4: “Ma ka itlaj xchiuakan ikan nexikojli nion pampa nenkinekij nemoueyimatiskej, yej ikan yolyemanilistli xmomatikan ika oksekimej más uejueyixtokej xken nemejuamej. Ma ka xchiuakan on tlen kuajli san para nemejuamej, yej no xkinchiuilikan on oksekimej on tlen no kuajli para yejuamej”. Uelis totlajtoltiskej: “¿Nikchiua tlen nikan kijtoua ipan nonemilis? ¿Niktejtemoua kenon nikinpaleuis oksekimej ipan tlanechikojli niman ipan tenojnotsalistli?”. Tikchiuaskej itlaj inpampa oksekimej kemantika ouijtika. Kanaj nonekis melak tokojtiliskej niman tijkauaskej itlaj tlen tikuelitaj. San ika, xtlaj melak techyolpaktis ken tikmatiskej ika tikchiuaj tlen kuelita Jehová, akin Ueyixtika. w18.01 23 párrs. 6, 7

Pablo okijto ika noneki matotlatlatakan niman ijkon tikitaskej tla timelajkanemij ipan totlaneltokil. Uelis tikchiuaskej yejon tla totlajtoltiaj: “¿Yemelak nikneltoka ika ninemi ipan ikalpan Jehová tlen yejua kitekitiltia niman ijkon kichiuas tlen kineki? ¿Nikchiua nochi tlen niueli ika nitenojnotsas niman nitemachtis kuajli tlajtoltin itech Tekiuajyotl? ¿Nikteititia ika tlen nikchiua ika yemelak nikneltoka ika tinentokej ipan itlamiyan tonaltin niman iyejkotika ijkuak tlamis itlayekanalis Satanás? ¿Ok nitlaneltoka itech Jehová niman Jesús ijkon ken ijkuak oninosentemakak?” (Mat. 24:14, TNM; 2 Tim. 3:1; Heb. 3:14). Titlanemiliskej itech ken nonankiliaj yejuin tlajtoltilistin techpaleuis ok matikteititijtokan tiakinomej. Se ken uelis toyektlaliskej achto ika yejkos ijkuak tikilnamikiskej imikilis Cristo yejua tikpouaskej tlamachtiltin itech Biblia tlen matlajtokan itech kenon yejuin melak ueyi kijtosneki niman intech titlanemiliskej (Juan 3:16; 17:3). San uelis tikpiyaskej nemilistli tlen xkeman tlamis tla kuajli tikixmatij Jehová niman titlaneltokaj itech Jesús, isenteKonetsin toTajtsin. Ijkuak tikilnamikiskej imikilis Cristo uelis toyektlaliskej ika tomachtiskej itech, tlen techpaleuis matiknisiuikan Jehová niman Jesús. w18.01 13 párrs. 5, 6

Ijkuak tikpoua Biblia niman toamatlajkuiloluan, niman ijkuak tiauj tlanechikoltin, tiueli itech miyekej akin toTajtsin yokinpaleui mamelajkanemikan. San ika, ijkuak timoskaltijtiuj ken akin kichiua ken Cristo, nonekis sa no tejua xkita kenon Jehová mitspaleuiya ipan monemilis. ¿Kenon yotikitak sa no tejua ipan monemilis ika Jehová yolkuajli? Onka itlaj tlen tinochimej akin tikchiuaj ken Cristo yotechititi ika Jehová yolkuajli. Yejua yotechnots matonisiuikan itech niman itech ikoneuj. ¿Tikneltoka ika Jehová okichiuj itech xuajla? Se telpokatl uelis kinemilis: “Jehová okichiuj notajuan manonisiuikan itech, niman nejua san niauj imiuan”. San ika, ijkuak otimosentemakak niman otimoapolakti, otikteititi ika kuajli timouika iuan Jehová. Aman, yejua yemelak mitsixmati. Biblia kuajli techijlia: “Tla yakaj kitlajsojtla Dios, Dios kuajli kixmatstikaj” (1 Cor. 8:3). Xmochikaua nochipa tiktlasojkaitas ika tinemi ipan ikalpan Jehová. w17.12 26 párrs. 12, 13

Ijkuak tijkaki tlajtojli titemelajkatlalis kanaj nimantsin tiknemilia ika kijtosneki titetlajtlakolmakas, san ika, xsan yejon kijtosneki. Miyekpa Biblia kuajli tlajtoua itech titemelajkatlalis, niman ijkuak itech tlajtoua iuan kiteneua tlaixmatilistli, tlamachilistli, tlasojtlalistli niman nemilistli (Prov. 1:2-7; 4:11-13). Ken toTajtsin techmelajkatlalia techititia ika yejua techtlasojtla niman ika kineki matinemikan nochipa (Heb. 12:6, TNM). Melauak, ijkuak yejua temelajkatlalia noijki uelis itech itlaj tetlajtlakolmakas, san ika, xkeman chikauak kichiua nion xika tetlajyouiltia. Niman xsan yejon, itech tlajtojli titemelajkatlalis ompa kalaki tlajtojli titemachtis, ijkon ken se tajtli kimachtia ikoneuj akin kitlasojtla. Akin tikchiuaj ken Cristo tinemij ipan “ichan Dios” (1 Tim. 3:15). Ika yejon, tiktlakaitaj ika Jehová kinamiki makijto tlenon noneki tikchiuaskej niman matechmelajkatlali ika tlasojtlalistli ijkuak xtiktlakamatij. Noijki, tikixnamikiskej tlen xkuajli ipampa tlen tikchiuaj niman tikseliskej ken techmelajkatlalis techilnamiktis ika melak noneki matiktlakamatikan toTaj Jehová (Gál. 6:7). w18.03 23 párr. 1; 24 párr. 3

Kanaj titelpochtli noso tiichpochtli akin tiknemilia ika motajuan akin kichiuaj ken Cristo xmitsasikamatij noso nion xitlaj mitskauiliaj xchiua. Kanaj pampa tiajmankamiki, kichiua xometlamati tla yemelak ika tiktekichiuilis Jehová ijkon ken melauak kuajli tijkuis monemilis. San ika, tla tijkaua tlen melauak, nimantsin tikitas ika xakaj ijkon najmana mopampa ken motajuan niman tokniuan ipan tlanechikojli. Tajtin noneki matemelajkatlalikan. Tla xkeman mitsmelajkatlaliskiaj, ¿xtimotlajtoltiskia tla yemelak najmanaj mopampa? (Heb. 12:8). San ika, kanaj tlen xtikuelita yejua kenon mitsmelajkatlaliaj. Maka san xtlanemili itech kenon mitsmelajkatlaliaj, xyejyeko xkasikamati ika onka tlen ika ijkon kichiuaj. Ika yejon, xmoyolseui niman xmokojtili tikteltis tlen tikmachilia. Xtejtemo timochiuas yakaj akin tlamachilise, akin ika iyojlo ueli kiselia ijkuak kimelajkanotsaj, niman itech xmopaleui niman maka mamitsajmana kenon omitsijlijkej (Prov. 1:8). w17.11 29 párrs. 16, 17

Kanaj yotikimixmatkej sekimej telpokamej akin onoapolaktijkej, san ika, sakin opeujkej ometlamatij itech tla yemelak kinpaleuiya kitlakamatiskej itlanauatiluan toTajtsin. Sekimej hasta xok kitekichiuiliaj Jehová. Ika yejon, tajtin kanaj kinmojtia ika sakin ika inkoneuan yonoapolaktijkej, makipatlakan tlen kineltokaj niman makikauakan intlasojtlalis itech tlen melauak. ¿Tlenon uelis kichiuaskej tajtin niman ijkon maka panos yejuin niman inkoneuan makiselikan “temakixtilistli”? (1 Ped. 2:2). Matikitakan tlen Pablo okijkuilouili Timoteo: “Xtlakamati melajki tlinon omitsmachtijkej niman yejuan tikneltoka [‘omitstlaneltokiltijkej’, TNM], pampa tejua tikmatstikaj akinomej omitsmachtijkej. Niman desde tikonetl katka tikixmati on iYektlajkuilol Dios yejuan uelis mitstlamachilistis niman mitsuikas itech on temakixtilistli itechkopa motlaneltok itech Cristo Jesús” (2 Tim. 3:14, 15). Matikitakan yejuin yeyi tlemach tlen okijli: 1) “tikixmati on iYektlajkuilol Dios”, 2) “yejuan tikneltoka [ʻomitstlaneltokiltijkejʼ, TNM]” niman 3) “yejuan uelis mitstlamachilistis niman mitsuikas itech on temakixtilistli itechkopa motlaneltokil itech Cristo Jesús”. w17.12 18, 19 párrs. 2, 3

Miyekej tlaneltokiltin kichiuaj ika tlaltikpakchanejkej makitlalkauikan toTajtsin pampa tlamachtiaj ika kintlajyouiltia akin xkuakualtin ipan infierno, techiualtiaj makitemakakan tomin noso nokalaktiaj ipan política. Ika yejon, xtechmojkatlachialtia ika mojmostla miyekiyaj akin kinemiliaj ika uelis pakiskej maski xkipiyaj se tlaneltokijli. Melauak ika uelis tipakiskej tla xtikpiyaj tlaneltokijli tlen xmelauak. San ika, xkeman yemelak tiyolpakiskej tla xtouikaj iuan Jehová, “toTajtsin akin paktika” (1 Tim. 1:11, TNM). Nochi tlen yejua kichiua kinpaleuiya oksekimej, niman itekipanojkauan tipakij pampa tokojtiliaj tikinpaleuiskej oksekimej (Hech. 20:35). Se neskayotl, tlaneltokijli tlen melauak kichiua maonia pakilistli intech tochanejkauan. ¿Tleka? Pampa techmachtia matiktlakaitakan toixnamik niman maka matikajkayauakan, kuajli matikinmachtikan tokoneuan, niman ika yemelak matikintlasojtlakan tochanejkauan. Tlaneltokijli tlen melauak kichiua san sekan manouikakan itekipanojkauan toTajtsin niman kinkauilia manemikan ipan tlanechikoltin kampa onka pakilistli, niman makinpiyakan imikniuan ipan nochi tlaltikpaktli. w17.11 21 párrs. 6, 7

Ipan yejuin tonajli, miyekej itekipanojkauan toTajtsin akin yolmelaujkej nomachiliaj ijkon ken yejua. Maski akin tikchiuaj ken Cristo tikyejyekouaj tikyolpaktiskej Jehová, tinochimej topopolouaj pampa otechpanoltilijkej tlajtlakojli. Niman sekimej akin yokichiujkej se ueyi tlajtlakojli kinemiliaj ika Jehová xkeman uelis kintlapopoluis. San ika, Biblia kuajli techijlia ika akin nopaleuiyaj itech Jehová xkipiya ika melak notekipachoskej ipampa intlajtlakol (Sal. 34:22). Pablo okijto ika xkuajli nomachiliaya niman noyolajmanaya pampa xueliya kitlakamatiya Jehová ken kinamikiya. San ika, maski noxixikouaya iuan tlajtlakojli niman ika tlen okichiujka yeuejkaui, okijto: “Nikmaka tlaxtlauijli Dios ika san itechkopa toTeko Jesucristo ueli nechmakixtia” (Rom. 7:25). Pampa yonoyolkuepka, kuajli kimatstoya ika Jehová yokitlapopoluijka itechkopa Jesús. Cristo okitemakak inemilis topampa, niman ijkon kichipaua totlamachilis niman techmaka yolseuilistli (Heb. 9:13, 14). Niman pampa yejua toUeyi Teopixkauj, “yejua ueli kinmakixtia para nochipa on yejuan yejua itechkopa kinisiuiyaj Dios, pampa yejua nochipa nemi para inka kitlajtlanilijtikaj Dios ma kimpaleui” (Heb. 7:24, 25). w17.11 8 párrs. 1, 2; 12 párr. 15

¿Kenon tikchiuaj tlen otikijtokej ijkuak otosentemakakej? Ken tikixnamikij tlen techtlatlata, maski pitentsitsintin noso uejueyimej, kiteititis tla tiktlakaitaj totlajtol ijkuak otikijtokej ika tiktekichiuiliskej Jehová “mojmostla” (Sal. 61:8). Se neskayotl, tla yakaj kampa titekitij noso ipan kaltlamachtijli techyoleua iuan matikistinemikan, ¿tikmapeuaj tlen kichiua topampa niman ijkon tikteititiaj ika tiknekij tiktlakamatiskej Jehová? (Prov. 23:26). Noso tla ipan tochan san tejuamej tiktekichiuiliaj Jehová, ¿tiktlajtlaniliaj ika matechpaleui nochipa matikchiuakan ken Cristo? Ipan nochi tlen tikixnamikij, ¿tikchiuiliaj teoyotl Jehová mojmostla niman tiktlasojkamatij itlasojtlalis niman itlayekanalis? ¿Tokojtiliaj mojmostla tikpouaskej Biblia? Ika melak, ijkuak otosentemakakej itech toTajtsin, ototlajtolkaujkej ika tikchiuaskiaj nochi yejuin. Tikchiuaskej tlen otikijlikej, kijtosneki tiktlakamatiskej. Tla melak kuajli tiktekichiuiliaj, tikteititiskej ika tiktlasojtlaj niman ika melauak itech yotosentemakakej. Tiktekichiuiliskej Jehová yejua tonemilis, niman xsan tlajtojli. w17.10 23, 24 párrs. 11, 12

Se tonajli se tlakatl akin kijkuiloua tlakuikaltin okijto ika tlajtoltin kichiua matitlanemilikan, niman tlatsotsonajli kichiua matikmachilikan, san ika, tlakuikaltin kichiua matikmachilikan tlen tiknemiliaj. Xonka itlaj melak kuajli ken “tikmachiliskej” tlen tiknemiliaj itech toTajtsin iluikakchane, Jehová, ijkuak ika tlakuikaltin tikueyichiuaj niman tikijliaj ika tiktlasojtlaj. Itekipanojkauan toTajtsin tikmatij ika tokuikatiskej melak ueyi kijtosneki ijkuak tikueyichiuaj, maski tla tikchiuaj toselti noso iuan tokniuan ipan tlanechikojli. Aman tej, ¿tikuelitaj chikauak tokuikatiskej ipan tlanechikojli, noso tipinauij? Miyekan, sekimej tlakamej xkuelitaj nokuikatiskej imixpan oksekimej. Yejuin uelis kijtlakos nochi tlanechikojli, niman ueyi yes tla tlayekankej xnokuikatiaj ika nochi inyojlo noso kichiuaj okseki tlemach ijkuak nochimej tokniuan nokuikatijtokej (Sal. 30:12). Tla yemelak tikasikamatij ika ijkuak tokuikatiaj noijki ijkon tikueyichiuaj toTajtsin, xtopolouiliskej yejuin ipan totlanechikol. w17.11 3 párrs. 1-3

Tinochimej tiknekij tinemiskej ika yolseuilistli, maka itlaj matechajmana. Yejua ika, melak tiktlasojkamatij ika Jehová techmaka yolseuilistli. Yejuin kichiua matoyolseuikan niman techtlajpiya itech tlanemililtin niman tlen tikmachiliaj tlen teyolkokouaj (Filip. 4:6, 7). Noijki, pampa yotosentemakakej itech Jehová , tiuelij iuan “tikpiaj yolseuilistli”, kijtosneki, ika tiuelij kuajli iuan touikaj (Rom. 5:1). Aman tej, ok xiyejko tonajli ijkuak toTajtsin kuajkuis nochi yolseuilistli. Tinemij ipan itlamiyan tonaltin niman ika yejon, tikpiyaj miyek tlaueltin niman miyekej tlaltikpakchanejkej kichiuaj tlen xkuajli (2 Tim. 3:1-4). Noijki, akin tikchiuaj ken Cristo, kipiya ika tikixnamikiskej Satanás niman tlamachtiltin xmelajkej tlen kisemoyaua (2 Cor. 10:4, 5). San ika, tlen melak uelis techkuilis toyolseuilis yejua tochanejkauan akin xkitekichiuiliaj Jehová. Kanaj sekimej itech yejuamej techpijpinaujtiaj itech tlen tikneltokaj noso techtlajtlakoltiaj ika tikinxelouaj tochanejkauan. Noijki hasta uelis techmojtiskej ika xok techitaskej ken inchanejkauan. w17.10 12 párrs. 1, 2

Nochi tlajtoltin nopatlatiuej ijkuak panoua miyek xiujtin, niman ijkon inpan yonochiuj tlajtoltin tlen ika yonotlajtolkuep Biblia. Uelis panos ika se Biblia tlen onotlajtolkuep otepaleui ijkuak okis, san ika, seki xiujtin sakin xok nasikamatis. Matikitakan tlenon ipan onochiuj se Biblia ika inglés tlen melak noixmati, itoka: King James Version (Versión del Rey Jacobo). Yejuin okis ipan xiuitl 1611, melak onoixmat intech biblias ika inglés, niman miyek tlajtoltin tlen ompa ijkuiliujtok hasta aman ok notekitiltiaj. Pampa yopanokej miyek xiujtin, miyek tlajtoltin tlen kinuajkui Biblia King James Version (Versión del Rey Jacobo) aman xok nasikamatij. Noijki yejuin panoua itech kachtopa Biblias tlen onkintlajtolkuepkej ika okseki tlajtoltin. Ika yejon melak tiktlasojkamatij ika onka Biblia Traducción del Nuevo Mundo de las Santas Escrituras, pampa yejuin kuajkui tlajtojli tlen aman notekitiltia niman onka san tlajko noso nochi kanaj ipantsin 150 tlajtoltin. Kijtosneki ika miyekej ipan nochi tlaltikpaktli uelis kiamapouaskej. Noijki, ken ijkuiliujtika kichiua maajsi ipan toyojlo. w17.09 19 párrs. 5, 6

Telpokamej kipiyaj kitlapejpeniskej miyek tlemach. Kitlapejpeniskej akinomej iuan nouikaskej, tlenon ika noyolpaktiskej, tlenon kichiuaskej niman ijkon chipaujkej yeskej ipan innemilis niman kemanon noapolaktiskej. Noneki kipiyaskej yolchikaualistli niman ijkon kitlapejpeniskej tlen kuajli, pampa kixnamiktokej tlen kineki Satanás, akin kipijpinaujtia toTajtsin. Itlaj tlen ueyi kijtosneki makitlapejpenikan telpokamej niman ichpokamej yejua tlen kichiuaskej ika innemilis tlayekapan. Ipan seki países, kinchiualtiaj manomachtikan ipan universidad niman makipiyakan se tekitl kampa ueyi kitlaniskej. Oksekimej, kampa chantij, tlasojti tomin niman kinemiliaj ika kipiya melak tekitiskej niman ijkon kinpaleuiskej inchanejkauan. Ijkuak telpokamej kitekichiuiliaj toTajtsin niman kachtopa kitejtemouaj iTekiuajyo ipan innemilis, kiseliaj miyek tlateochiualistin. Jehová kinpaleuis makinextikan nochi tlen kinpolos inchanejkauan. Ipan kachtopa siglo, telpokatl Timoteo okikuik inemilis ipan itekiyo toTajtsin, niman tejua uelis noijki ijkon tikchiuas (Filip. 2:19-22). w17.09 29, 30 párrs. 10-12

Akin tikchiuaj ken Cristo uelis techpaleuis matoteltikan toselti tla tikpiyaj kemanon tomachtiaj Biblia. ¿Kenon uelis techpaleuis? Biblia kipiya neskayomej tlen kuajli techititiaj ika tlen tikchiuaj uelis techuajkuilis tlen kuajli noso tlen xkuajli. Jehová okichiuj manoijkuilokan yejuin neskayomej niman ijkon matiuelikan intech yejuamej (Rom. 15:4). Ika yejon, kipiya tikinpouaskej, intech tomachtiskej niman intech titlanemiliskej. Matiknemilikan kenon uelis techpaleuis niman kinpaleuis tochanejkauan, niman matiktlajtlanilikan Jehová matechpaleui matikchiuakan tlen techmachtia Biblia. Tla tikitaj ika techpoloua toteltiskej toselti, matokuitikan, matikchiuilikan teoyotl Jehová niman matokojtilikan tikitaskej kanon noneki toyektlaliskej (Sant. 1:5). Noijki techpaleuis tla tomachtiaj itech toamatlajkuiloluan. w17.09 6 párrs. 15, 16

“Yenkuik nemonemilis”, yejuin tlajtoltin tlajtouaj itech se nemilistli “tlen onochijchiuj ken kineki toTajtsin” (Efes. 4:24, TNM). ¿Uelis totlaliliskej yejuin yenkuik nemilistli? Kema, pampa Jehová otexchijchiuj matikpiyakan itlachialis. Kuakon uelis tikpiyaskej ikualneskayouan (Gén. 1:26, 27; Efes. 5:1, TNM). Ijkuak yotechyolchikaujka matotlalilikan yenkuik nemilistli, Pablo otlajto itech se kualneskayotl tlen melak ueyi kijtosneki, xtitechikoitas. Ipan Colosenses 3:11, Traducción del Nuevo Mundo kijtoua: “Kampa xnemi nion griego nion judío, circunciso nion incircunciso, akin oksekan ualeua, escita, akin tlakeuajli noso xtlakeuajli”. Ipan tlanechikojli, xakaj kipiya kinemilis ika ueyixtika itech oksekimej pampa ualeua itech okse raza, kanon ualeua noso ipampa ken kitaj oksekimej. ¿Tleka? Pampa akin yemelak kichiuaj ken Cristo yejuamej “san sekan [...] nemij se iuan okse” (Gál. 3:28). Ijkuak totlaliliaj yenkuik nemilistli, tikintlakaitaj nochimej maski san katlejua inraza noso ken kitaj oksekimej (Rom. 2:11). w17.08 22 párr. 1; 23 párrs. 3, 4

Jehová xtechtlajtlanilia itlaj tlen yejua xkichiuaskia. Uelis tikijtoskej ika yejua akin techmaka melak kuajli neskayotl itech titlamachias (2 Ped. 3:9). Se neskayotl, yejua yokichiak melak miyek xiujtin niman ijkon manoteititi ika tlen okijto Satanás ipan xochitlalpan Edén itech yejua, xmelauak. San ika, Jehová “sa kichiatika ika yolseuilistli” ijkuak nochipauas itokayo. Nion xuelis tiknemiliskej nochi tlateochiualistin tlen kiseliskej “nochimej akin itech tlamachixtokej” ijkuak nochiuas yejuin (Is. 30:18). Jesús noijki okinek tlamachias. Ijkuak onen ipan tlaltikpaktli, yejua omelaujkanen ipan nochi inemilis. Ipan xiuitl 33, okitemakak inemilis ken tlaxtlauijli. San ika, ononek tlamachias hasta ipan xiuitl 1914 niman peuas tekiuajtis (Hech. 2:33-35; Heb. 10:12, 13). Niman ok nonekis tlamachias makinpopolokan nochi itlauelikniuan, yejuin nochiuas ijkuak yotekiuajtik mil xiuitl (1 Cor. 15:25). Uejkauis tlamachias, san ika tikmatstokej ika kuajli onkisas. w17.08 7 párrs. 16, 17

Se tokniuj itoka Susi okijto: “Sakin ijkuak yomijka tokoneuj, kanaj se xiuitl melak otechyolkoko”. Se tokniuj kijtoua ika pampa san totoka omik isiuauj, okichiuj melak makikoko itlalnakayo. Teyolkoko tikijtoskej ika miyekej inpan nochiua yejuin. Miyekej itekipanojkauan toTajtsin kanaj xkichiayaj mamiki se inchanejkauj achtopa yejkos Armagedón. Tla tejua noso yakaj akin tikixmati yomik se nemochanejkauj noso se akin iuan nemouikaj, kanaj uelis nemotlajtoltiskej: “¿Kenon uelis nopaleuiskej akin noyolkokouaj itech yejuin?”. Kanaj kemantika yotijkak ika tiempo kipajtia nochi. San ika, ¿melauak ijkon panoua? Se tokniuj siuakauajli okijto: “Nikita ika melak kinamiki noijtos ika tlen kichiua se ika itiempo, yejon tlen tepajtia”. Kema, timoyolkokos san noijki ken mitskokos motlalnakayo: uelis popoliujtias tla ika tlasojtlalistli tikpajtiaj. w17.07 12, 13 párrs. 1-3

¿Tlenon mitsijlia Jehová xnemili tikchiuas? Xnemili yejuin. ToTajtsin okinchijchiuj yolkamej mapaktokan san ika tlen kikuaskej, tlen koniskej niman kinpiyaskej inkoneuan. San ika, tejuamej otexchijchiuj ika matechyolpakti tlen melak ueyi kijtosneki, ken tikixmatiskej niman tiktekichiuiliskej nochipa (Sal. 128:1; Mat. 5:3). Biblia kijtoua ika toTajtsin, yejua “kitemaka [...] tetlajsojtlalistli”, “paktika” niman okinchijchiuj tlaltikpakchanejkej ken “itlachialis” (2 Cor. 13:11; 1 Tim. 1:11; Gén. 1:27). Yejuin kijtosneki ika tiyolpakis tla tikixkopina toTajtsin. Biblia kijtoua: “Más paki on yejuan kitemaka xken on yejuan kiselia” (Hech. 20:35). ¿Kemantika yotikmachili ika ijkon? Yejuin yemelak ijkon panoua ipan tonemilis. Ika yejon, Jehová kineki ika tlen tiknemilis tikchiuas, mateititi ika tiktlasojtla yejua niman oksekimej (Mat. 22:36-39). w17.07 23 párr. 3

ToTajtsin techititia tlakaitalistli. Yejua melak kuajli techtlajpiya xijkon ken tejuamej ueliskia totlajpiyaskej. Jehová kitlasojtla nochi ikalpan ken grupo. San ika, noijki melak najmana inpampa inseselti. Xtlanemili itech tlen opanok yeuejkaui. Kanaj trescientos xiujtin, Jehová okintekitilti jueces tlen ika okiyekan ikalpan niman okintlan intlauelikniuan. Ijkuak panotoya nochi yejuin, Jehová kimitstoya inseselti. Se itech yejuamej katka se siuatl itoka Rut. Yejua xkatka israelita, san ika, yokikaujka miyek tlemach niman ijkon kiueyichiuas Jehová. ToTajtsin okiteochiuj pampa okichiuj makipiya se iueuentsin niman se ikoneuj. San ika, xsan yejon, ikoneuj Rut onochiuj familia akin itech uajnemiskia Mesías. Jehová noijki okinek ika inemilis Rut manoijkuilo ipan Biblia, ipan se amoxtli tlen kipiya itokayo. ¿Kenon tiknemilia nomachilis Rut ijkuak oksejpa nemis niman kimatis yejuin? (Rut 4:13; Mat. 1:5, 16). w17.06 28, 29 párrs. 8, 9

Ipan 1970, se tokniuj itoka Peter kipiaya 19 xiuitl niman san kemach yopeujka tlapaleuiya ipan Betel tlen onka Gran Bretaña. Peter tenojnotstinemiya techajchan niman okinextito se tlakatl akin tentsone iueyi katka. Kuakon okitlajtolti yejon tlakatl tla kuelitaskia kasikamatis Biblia. Yejon tlakatl katka judío niman xueli kineltokaya ika se telpochtli kinemiliaya kimachtis itech Biblia. Pampa yejon tlakatl kinekiya kitlatlatas Peter, okitlajtolti: “Xnechijli, telpochtli, ¿ika tlenon tlajtojli onoijkuilo amoxtli Daniel?”. Yejua okinankili: “Seki onoijkuilo ika tlajtojli arameo”. Peter kilnamiki: “Yejon tlakatl melak otlamojkaitak ika onikmat ken niknankilis, san ika, ¡xijkon ken nejua! ¿Kenon onikmat tlen onechtlajtolti? Ijkuak oninokuep nochan niman onikitak revistas Amatl Tekakistilijketl niman ¡Despertad! itech metstin tlen yopanoka, oniknexti se tlamachtijli tlen kijtouaya ika Daniel onoijkuilo ika Arameo” (Dan. 2:4, nota). Kema, iespíritu santo toTajtsin uelis techpaleuis matikilnamikikan tlen yotikpoujkaj (Luc. 12:11, 12; 21:13-15). w17.06 13 párr. 17

Noijki xtlanemili itech kenon teueuentsin niman tesiuauj uelis nomachiliskej ijkuak kimatiskej ika kipiyaskej inkonetsin. Maski yejuin melak kinyolpaktia, miyekpa noijki melak nokuaajmanaskej. Kanaj tesiuauj niman iueuentsin notlajtoltiaj tla nochi kuajli onkisas pampa yejua koneua. Kanaj uelis kinajmanas tla kuajli noskaltis inkoneuj. Yejuamej noijki kimatij ika aman nonekis miyek tomin. Niman ijkuak tlakatis inkonetsin, yejuamej nonekis kipatlaskej okseki. Nantli uejkaujtipan panos iuan ikonetsin. Ika yejon, yejua iuan iueuentsin xok uelis uejkaujtipan panoskej san sekan ijkon ken kachtopa kichiuayaj. Noijki tajtli aman kipiyas okseki tekitl tlen nonekis kichiuas. Yejua noneki kitas ika isiuauj niman ikonetsin makipiyakan tlen kinpoloua. Sekimej akin yononamiktijkej tlajyouiyaj itech okseki. Yejuamej kanaj melak kinekij kinpiyaskej inkoneuan, san ika, xueli kinpiyaj. Ijkuak tesiuauj xueli kipiya ikoneuj, kanaj uelis melak noyolkokos. w17.06 4 párr. 1; 5 párrs. 5, 6

Akin tikchiuaj ken Cristo tiktlasojtlaj tlen melauak. Niman tlen melauak tiknextiaj ipan iTlajtol toTajtsin. Jesús okijli iTaj: “Motlajtol yejua tlen melauak” (Juan 17:17). Ika yejon, noneki tikmatiskej tlenon kijtoua Biblia tla tiknekij tiktlasojtlaskej tlen melauak (Col. 1:10). San ika, xsan yejon noneki tikchiuaskej. Xkita kenon tlajkuilojketl itech Salmo 119 techpaleuiya matikasikamatikan tlenon noijki noneki tikchiuaskej (Sal. 119:97-100). Ipan nochi tonajli noneki titlanemiliskej itech tlen tikpouaj ipan Biblia. Ijkuak peua titlanemiliaj kenon techpaleuiya tikchiuaskej ipan tonemilis tlen melauak itech Biblia, peuas melak ueyiyas totlasojtlalis. Noijki, amatlajkuiloltin tlen kisaj itech Biblia tlen ikalpan toTajtsin techmaka yeskia kentla tlakuajli tlen melak uelik. Ijkuak tlakuajli tikueliliaj, tiknekij yolik tijkuaskej pampa techyolpaktia. Noijki ijkon, tiknekij tikxeloskej tiempo ika tomachtiskej. Kuakon melak techyolpaktis “tlajtoltin tlen teyolpaktiaj” itech tlen melauak, niman xouijtika tikilnamikiskej tlen tikpouaj niman uelis ika tikinpaleuiskej oksekimej (Ecl. 12:10). w17.05 18 párrs. 11, 12

Tejuamej tiknekij tikinpaleuiskej akin tlajyouijtokej, noijki hasta akin xkitekichiuiliaj Jehová. Ijkuak ijkon tikchiuaj, tikchiujtokej ijkon ken okichiuj tlakatl chanej Samaria tlen Jesús okiteneuj ipan se neskayotl (Lucas 10:33-37). Melak kuajli tikinpaleuiskej tlaltikpakchanejkej tla tikinnojnotsaj itech tekiuajyotl. Se tlayekanketl akin yokinpaleui miyekej akin okikaujkej inchan okijto ika melak noneki nimantsin noijliskej ika tejuamej tiiteixpantijkauan Jehová. Noneki tikimijliskej ika achtopa itlaj okse otiajkej pampa tiknekij tikinpaleuiskej makasikamatikan tlamachialistli tlen techijlia Biblia, niman xotiajkej ompa pampa tikinmakaskej okse tlemach tlen ika tikinpaleuiskej. Ijkuak tikimititiaj melauak tlasojtlalistli “akin xchanejkej”, melak kuajli onkisa (Sal. 146:9). Se tokniuj kijtoua ika ichanejkauan ocholojkej pampa kintlaueltokayaj ipan Eritrea. Sakin ijkuak naui itech ikoneuan ononek nejnemiskej chikueyi tonaltin kampa tlaluaktli, oajsikej Sudán. Yejua okijto: “Tokniuan melak kuajli okinselijkej kentla tochanejkauan yeskiaj, okinmakakej tlakuajli, tlakentli, kampa nokauaskej niman okinpaleuijkej ijkuak nonekiya yaskej oksekan. ¿Akinomej noijki kinseliaj akin xkimixmatij ipan ichan san pampa noijki kiueyichiuaj sa no yejua toTajtsin? ¡San iteixpantijkauan Jehová!” (Juan 13:35). w17.05 8 párrs. 17, 19, 20

“¿Uelis toTajtsin kitekitiltis se tlakatl itech itlaj? ¿Uelis yakaj akin tlamachilise ipan itlaj kipaleuis yejua? ¿Tiknemilia ika Akin nochi ueli kichiua kitstika ika tejua timelajkanemi, noso itlaj kitlani yejua pampa tejua tiyolmelaujki?” (Job 22:1-3). Elifaz kinemiliaya ika tlen okitlajtolti nonankiliaya ika ka. Okse tlakatl akin iuan otlajto Job itoka Bildad akin suhita katka. Bildad okijli Job ika xuelis nonemilis ika toTajtsin uelis kimitas ika tlaltikpakchanejkej melajkej (Job 25:4). Elifaz niman Bildad okiyejyekojkej kitlaneltokiltiskej Job ika xtlaj kijtosneki ken nochikaua kitekichiuilis Jehová. Yejuamej kinekiyaj makineltoka ika toTajtsin techita san kentla se kojpochauistli noso se okuilin (Job 4:19; 25:6). Jehová okimijli Elifaz, Bildad niman Zofar ika tlen yokijtokaj se tlakajkayaualistli katka. Sakin toTajtsin okijto ika pakiya itech Job, akin okitokayoti “notekipanojkauj” (Job 42:7). Kuakon uelis kuajli tikmatstoskej ika tejuamej akin titlajtlakolejkej uelis tikpaleuiskej toTajtsin. w17.04 27 párrs. 1, 2

Kanaj ouijtika tiknemiliskej yejon. Melak yotiuejkaujkej tinemij kampa onka tlen xkuajli, niman kanaj nion xok tikmatij kenon yejuin kichiua melak matokuaajmanakan. Matikonnemilikan yejuin: tlaltikpakchanejkej akin chantij nisiuj kampa panoua tren kanaj hasta yonomatkej kikakiskej kenon chikauak kakisti. Niman tlaltikpakchanejkej akin chantij nisiuj kampa konxiniaj tlasojli nion xok kimachiliaj kenon xkuajli ijnekuisti. San ika, ijkuak Jehová kipopolos nochi tlen xkuajli panotok, melak kualtsin tomachiliskej. ¿Tlenon kipatlas tlen aman melak techkuaajmanaj? Xtlanemili itech tlen kijtoua tlaxelojli tlen aman tikitstokej. ¡Melak techyolpaktia tikmatiskej ika yejuin tlen Jehová kineki topampa! Ipan yejuin tonaltin ijkuak melak tokuaajmanaj, matikchiuakan nochi tlen tiueliskej niman ijkon uelis tinemiskej nisiuj itech Jehová niman ikalpan. Tikmatstokej ika melak kualtsin tlen tikchiaj. Kuakon, nochipa matitlanemilikan itech yejon, niman matikimijlikan oksekimej (1 Tim. 4:15, 16; 1 Ped. 3:15). Kuakon, uelis kuajli tikmatstoskej ika ijkuak yejkos tlapopolouilistli, tejuamej timakisaskej niman nochipa melak tiyolpakiskej. w17.04 14 párrs. 16, 17

Yejuin nimantsin tikasikamatij, san ika ¿tlenon tikchiuaskej ijkuak tejuamej techijtlakos itech tlen nopopoloua se tokniuj? ¿Tikitaskej melajkayotl ijkon ken kita Jehová? Se neskayotl, ¿kenon titlanankiliskej tla se tlayekanketl kijtoua itlaj tlen nesi ika texchikoita? ¿Tijkauiliskej matechtlajkali tla se tlayekanketl kijtoua itlaj tlen nion xkinemilia techyolkokoua? ¿Nimantsin tiknemiliskej ika se tokniuj xkipiya ika yes tlayekanketl noso titlamachiaskej itech Jesús, tlayekanketl itech tlanechikojli? ¿San titlanemiliskej itech tlen nopopoloua se tokniuj, noso tikilnamikiskej ika yejon tokniuj youejkauj kuajli yokitekichiuili toTajtsin? Tla se tokniuj akin tlajtlakoua totechkopa ok tekiti ken tlayekanketl noso kiselia okse tekitl, ¿tipakiskej iuan? Tla tiknektokej titetlapopoluiskej, tikteititiskej ika tikitaj melajkayotl ijkon ken kita Jehová (Mat. 6:14, 15). w17.04 26 párr. 18