Junio

Jehová techyektlalia niman techmachtia pampa techtlasojtla. Kineki iuan matouikakan niman nochipa matinemikan. Kemantika, tikmelajkatlalis yakaj xsan kijtosnekis tiknonotsas. Tla se tlaltikpakchane okichiuj se ueyi tlajtlakojli, kanaj uelis kipolos seki tekitl ipan ikalpan toTajtsin. San ika, maski ijkon panos, ijkuak kimelajkatlaliaj kititiaj ika Jehová kitlasojtla. Kipolos tekitl ipan tlanechikojli uelis kipaleuis akin otlajtlako makita ika melak noneki makixelo itiempo niman ijkon iselti nomachtis, tlanemilis niman kichiuas teoyotl. Nochi yejuin kipaleuis machikaui ken nouika iuan Jehová (Sal. 19:7). Sakin, kanaj oksejpa kimakaskej tekitl ipan ikalpan toTajtsin. Niman ijkuak yakaj kikixtiaj itech tlanechikojli ijkuakon noijki noteititia itlasojtlalis Jehová, pampa notlajpiya tlanechikojli itech tlen uelis kijtlakos (1 Cor. 5:6, 7, 11). Niman pampa ken techmelajkatlalia Jehová nochipa melajki, ijkuak yakaj kikixtiaj, yejon uelis kipaleuis makasikamati kenon ueyi otlajtlako niman kiyolmapeuas manoyolkuepa (Hech. 3:19). w18.03 24 párrs. 5, 6

Tlakatl akin kitlajpiaya cárcel xkixmatiya iTlajtol toTajtsin. Kuakon, tla kinekiya kichiuas ken Cristo, nonekiya kixmatis tlen melauak itech iTlajtol toTajtsin, kasikamatis tlenon kijtosneki tiktekichiuilis Jehová niman kuajli kijtos ika kineki kintlakamatis itlamachtiluan Jesús. Nion xouejkauj, ouel okixmat san tlen yemelak nonekiya niman noijki okitlasojtlak tlen melauak, yejon okiyolchikauj manoapolakti (Hech. 16:25-33, TNM). Ken tikmatstokej, sakin ika onoapolakti ononek okseki kixmatstias. Kuakon, ¿tlenon uelis kichiuaskej tajtin tla se inkoneuj kimijlia ika kineki noapolaktis pampa kitlasojtla Jehová niman kineki kitlakamatis? Uelis kijliskej ika matlajto imiuan tlayekankej ipan tlanechikojli niman ijkon yejuamej kitaskej tla ikichiua tlen noneki itech akin kinekij noapolaktiskej. Ijkon ken oksekimej akin noapolaktiaj, yejua noijki nochipa nomachtijtias itech tlen kineki kichiuas toTajtsin. w18.03 10 párrs. 8, 9

Ijkuak tokojtiliaj toyekanaskej ika iespíritu santo toTajtsin, yejon espíritu techmaka kojtilistli tlen ika uelis tikpatlaskej ken titlanemiliaj. Ijkon ika yolik tipeuaskej titlanemiliskej ken Cristo. Noijki techpaleuiya matikinpopolokan iileuilisuan totlalnakayo niman matikpiyakan kualneskayomej tlen kiyolpaktiaj toTajtsin. Tla titlanemiliaj ken Cristo nesis itech kenon titlajtouaj, kenon touikaj, ipan totekiyo noso ipan kaltlamachtijli, itech kenon titlajtouaj niman itech tlenon tiktlapejpeniaj tikchiuaskej mojmostla. Tlen tiktlapejpeniaj tikchiuaskej kiteititis tla tochikauaj tiktokaskej Cristo. Tla toyekanaj ika iespíritu santo toTajtsin xtijkauiliskej ika itlaj makijtlako ken touikaj iuan Jehová. Ijkuak tikixnamikiskej tlen xkuajli niman tlen teyoltilana, tikmapeuaskej. Niman ijkuak tiktlapejpeniskej tlenon tikchiuaskej, kachtopa totlajtoltiskej: “¿Katlejua itlajtolyekanalisuan Biblia nechpaleuis kuajli manikita tlenon nikchiuas? ¿Tlenon kichiuaskia Cristo tla ipan nochiujtoskia yejuin? ¿Tlenon kiyolpaktis Jehová?”. w18.02 25 párr. 12; 26 párr. 14

Ipan itonaluan Enoc, ika okpa iabuelo Noé, tlaltikpakchanejkej yokitlalkauijkaj toTajtsin. Yejuamej hasta kijtouayaj “tlen xkuajli” itech Jehová (Jud. 14, 15). Tlen xkuajli nochiuaya miyekixtiaya. Niman ipan itonaluan Noé, “tlaltikpaktli tentoya ika tlen xkuajli”. Xkuakualtin iluikaktekitkej onokuepkej tlakamej, ononamiktijkej niman okinpixkej inkoneuan, akin xkuakualtin katkaj niman kichiuayaj tlen xkuajli (Gén. 6:2-4, 11, 12). San ika, Noé xijkon katka. “Yejua okiteititi ika yolmelaujki katka intsajlan akin ijkuakon nemiyaj. Noé okistinen iuan toTajtsin akin melauak” (Gén. 6:9). Kuajli matikitakan tlen kijtouaj yejuin tlajtoltin itech yejuin yolmelaujki tlakatl. Kachtopa, matiknemilikan kech ouejkauj Noé okitekichiuili toTajtsin ipan yejon xkuajli tlaltikpaktli achto ika yejkos Apachiuilistli. Xsan okitekichiuili 70 noso 80 xiuitl, ijkon ken aman nemij tlaltikpakchanejkej. ¡Noé onen ipan yejon tlaltikpaktli kanaj 600 xiuitl! (Gén. 7:11). Niman ijkuakon, yejua xkipiaya se tlanechikojli, ijkon ken tejuamej tikpiyaj, kampa manemikan itekipanojkauan toTajtsin akin makichikauilikan itlaneltokil. Nesi ika nion ikniuan xokipaleuijkej. w18.02 4 párrs. 4, 5

Akin kitlasojtlaj tomin nochipa kinekiskej okseki kipiyaskej, niman nochi innemilis kitejtemotoskej yejuin. San ika, yejuin san kichiuas makipiyakan “miyek ajmantli” (1 Tim. 6:9, 10; Ecl. 5:10). Melauak ika tinochimej techpoloua tomin, pampa uelis tikijtoskej ika yejuin techtlajpiya (Ecl. 7:12). Aman tej, ¿uelis yakaj yolpakis tla san kipiya tlen yemelak noneki? Tikmatstokej ika kema (Ecl. 5:12). Agur, ikoneuj Jaqué, okitlajtlanili toTajtsin: “Maka xnechmaka mayantli nion miyek tomin. San xnechmaka tlen nijkuas”. Nimantsin tiuelij tikasikamatij tleka xkinekiya mayantli. Yejua okijto ika xkinekiya maajsi tonajli ijkuak kinekiskia tlachtekis, pampa ijkon kitsokuiloskia itokayo toTajtsin. San ika ¿tleka okitlajtlanili maka makimaka miyek tomin? Yejua okijto: “Niman ijkon maka manikmachili ika xitlaj nechpoloua niman manimitsilkaua niman manikijto: ‘¿Akinon Jehová?’” (Prov. 30:8, 9). Jesús okijto: “Xakaj ueli kintekichiuilia omemej tekomej, pampa se kitlajsojtlas niman okse kitlauelitas, noso se kipialis kuajli iyojlo niman okse kitlalkauis. Ijkon, tej, xakaj uelis kitekichiuilis Dios niman no kinotekimakas on tomin” (Mat. 6:24). w18.01 24 párrs. 9-11

Tejuamej titlapaleuiskej matinemikan san sekan tla tikintlapopoluiyaj oksekimej. Ijkuak tikintlapopoluiyaj akin techyolkokouaj, tikteititiaj ika tiktlasojkamatij ika Jehová ueli techtlapopoluiya itechkopa imikilis Cristo. Matitlanemilikan itech se neskayotl tlen Jesús okiteneuj niman onka ipan Mateo 18:23-34. Matotlajtoltikan: “¿Nechyolchikaua yejuin neskayotl manikchiua tlen Jesús otemachti? ¿Nikimijyouiya niman nikimasikamati tokniuan? ¿Niknektika nikintlapopoluis akin nechyolkokouaj?”. Melauak ika seki tlajtlakoltin uejueyimej niman okseki ka. Noijki, tinochimej titlajtlakolejkej niman ouijtika tiktlapopoluiyaj seki tlen texchiuiliaj. San ika, itlajtoluan Jesús kiteititiaj tlen Jehová kichia matikchiuakan. Jesús kuajli techititia ika Jehová xtechtlapopoluis tla xtikintlapopoluiyaj tokniuan ijkuak onka tlen techititia ika noneki tikchiuaskej. Yejuin itlaj tlen noneki kuajli itech matitlanemilikan. Ijkuak tiktlakamatij Jesús niman tikintlapopoluiyaj oksekimej, tiktlajpiyaj ken san sekan tinemij niman titlapaleuiyaj ijkon matinemikan. w18.01 15 párr. 12

Maski ueliskia kipolos inemilis, Daniel xokinek ika nion achijtsin makinemilikan ika yokikajkaujka kitekichiuilia Jehová. ToTajtsin okiteochiuj Daniel pampa oyolmelaujkanen niman okipix yolchikaualistli ijkuak okichiuj ika leones maka makikuakan. Yejuin milagro okichiuj ika miyekej makixmatikan Jehová nochiuiyan kampa tekiuajyotl medopersa tlanauatiaya (Dan. 6:25-27). ¿Kenon uelis titlaneltokaskej ken Daniel? Xsan noneki tikpouaskej iTlajtol toTajtsin, noneki tikasikamatiskej tlen kijtoua niman ijkon melak chikauak tikpiyaskej totlaneltokil (Mat. 13:23). Tiknekij tikmatiskej tlenon kinemilia Jehová, niman noijki tikasikamatiskej itlajtolyekanalisuan Biblia. Yejua ika, kipiya ika titlanemiliskej itech tlen tikpouaj. Melak noneki nochipa matikchiuakan teoyotl tlen makisa itech toyojlo, niman melak ueyi kijtosneki matikchiuakan ijkon ijkuak tikixnamikij tlen ouijtika. Ijkuak tikchiuaj teoyotl ika tlaneltokijli niman tiktlajtlaniliaj matechmaka tlamachilistli niman kojtilistli, Jehová ika iyojlo techmakas (Sant. 1:5). w18.02 10, 11 párrs. 13-15

Noijki tikita ika Jehová yolkuajli ijkuak mitspaleuiya xtlajto itech motlaneltokil kampa tontenojnotsa techajchan niman kampa timomachtia. Sekimej kitaj ouijtika kinnojnotsaskej akin inuan nomachtiaj ipan kaltlamachtijli. Kanaj mopan yopanok yejuin. Niman uelis melak ouijtika yes tla nonekis titlajtos imixpan miyekej. ¿Tlenon uelis mitspaleuis? Kachtopa, xtlanemili itech tleka kuajli tikmatstika ika melauak tlen tikneltoka. Ipan jw.org, onka guías tlen ika timomachtis ipan miyek tlajtoltin tlen mitspaleuiskej xtlanemili itech tlenon tikneltoka, tleka tikneltoka niman kenon uelis tiktetomilis. ¿Tleka xtikxeloua motiempo niman tikintejtemoua? Tla yemelak kuajli tikmatstika ika melauak tlen tikneltoka niman kuajli timoyektlalia, melak tiknekis titlajtos itech itokayo Jehová (Jer. 20:8, 9). w17.12 26 párrs. 12, 14, 15

Xsan noneki tikinnotsas niman tikinmachtis mokoneuan intech akin tlajtoua Biblia noso itech tlen kijtoua opanok. Timoteo noijki okitlaneltokiltijkej. Ipan tlajtojli tlen ika onoijkuilo, yejuin kijtosneki “kuajli tikmatstos ika itlaj kema yemelak”. Timoteo kixmatstoya Tlajkuiloltin ika Hebreo ijkuak san konetl katka. San ika, seki xiujtin sakin, okitak miyek tlen okitlaneltokilti ika Jesús katka Mesías. ¿Kenon se tajtli uelis kipaleuis ikoneuj kuajli matlaneltoka, ijkon ken Timoteo? Kachtopa, noneki kipiyas ijyouilistli. Mokoneuj xtlaneltokas san ipan se teotlak, nion xkichiuas san pampa itajuan melak kuajli tlaneltokaj. Tekoneuan san ueliskej kuajli tlaneltokaskej itech tlen melauak itech Biblia tla “kitekitiltiaj intlamachilis”, kijtosneki, ika sa no yejuamej tlanemiliaj (Heb. 5:14, TNM). Tajtin noneki makinpaleuikan inkoneuan itech yejuin, niman melak noneki ijkuak kintlatlajtoltiaj. w17.12 19 párrs. 3, 5, 6

Marta melak kuajli iuan nouikaya Jesús niman katka se inomachtijkauj. Yejua najmantoya pampa ikniuj Lázaro yomijka. ¿Tlenon ueliskia kiyolseuis? Jesús okijli: “Mokniu oksejpa yoliuis” (Juan 11:20-23). Marta kuajli kimatstoya ika tlayekapan Lázaro yoliuiskia. San ika, Jesús okiyoliti ipan yejon tonajli. Kanaj yotikpolojkej toixnamik, totajuan, se toabuelo noso se tokoneuj. Melak tiknekij oksejpa tiknapaloskej tochanejkauj, iuan titlajtoskej niman iuan tiuetskaskej. Melauak, xtikpiyaj itlaj tlen matechtlaneltokilti ika Jesús noso iTaj kiyolitiskej amanin. San ika ¿yemelak kuajli tikmatstokej ijkon ken Marta ika tlayekapan oksejpa yoliuis? Techyolpaktia ika tikpiyaj miyek tlen techkauilia matikijtokan tlen Marta okijto: “Nejua nikmatstikaj ika oksejpa yoliuis ijkuak yoliuiskej niman noketsteuaskej on mimikej ipan on sa ika nochi tonajli”. Maski ijkon, noneki matiknemilikan tleka tikneltokaj ika panos. w17.12 3 párrs. 1, 2

Jesús kitlasojtlaya iTlanauatil Moisés. Niman yejon xtechmokatlachialtia, pampa yejon Tlanauatijli ualeuaya itech itaj, Jehová, akin ueyi kijtosneki ipan inemilis. Biblia yokijtoka kenon Jesús melak kitlasojtlaskia itlanauatiluan toTajtsin. Yejuin teotlajtojli nestika ipan tlaxelojli tlen aman tikitstokej. Jesús okiteititi ika itlajtoluan niman ika tlen okichiuj ika yejon Tlanauatijli kuajli katka niman tepaleuiaya, niman ika yemelak nochiuas (Mat. 5:17-19). Jesús kanaj melak onajman ijkuak okitak ika escribas niman fariseos xkuajli kitekitiltiayaj iTlanauatil iTajtsin. Yemelak ika yejuin tlayekankej ipan teopan kichiuayaj hasta tlen melak pitentsin notlajtlaniya. Ika yejon, Jesús okijto: “Nenkiyaxkatiaj Dios itech on majtlaktli. In se ejemplo, nenkiyaxkatiaj se menta, se anís niman se comino”. Kuakon, ¿tlenon katka tlen xkuajli kichiuayaj? Jesús okijto: “Pero xnenkichiuaj on tlen más ueyi kijtosneki ipan on temachtilistli yejuan onkaj ipan on tlanauatijli kampa kijtoua ika noneki nemouikaskej ikan melajkanemilistli, ikan teiknelilistli niman ikan tlaneltoktli” (Mat. 23:23). Yejon fariseos xkasikamatiyaj tlen kijtosnekiya Tlanauatijli niman nomatiyaj uejueyixtokej xijkon ken oksekimej. San ika, Jesús kuajli kasikamatiya Tlanauatijli niman tlen kiteititiaya se tlanauatijli itech Jehová. w17.11 13 párrs. 1, 2

Uelis nemis akin kijtos ika se noneki noyolpaktis ipan inemilis niman ika xtlaj tlenon tla timoteka iuan akin xiuan timonamiktia. San ika, Biblia kijtoua ika auilnemilistli xkuajli, ika yejon, akin tikchiuaj ken Cristo xtikseliaj auilnemilistli (1 Tes. 4:4-8). Pampa Jehová otexchijchiuj, kinamiki techijlis tlenon uelis tikchiuaskej niman tlenon ka. Yejua san kitekauilia manotekakan se tlakatl iuan se siuatl akin yokinnamiktijkej. ToTajtsin techmaka tlanauatiltin pampa techtlasojtla niman pampa kimatstika ika techpaleuiskej ipan tonemilis. Ijkuak familias kintlakamatij, yejuamej notlasojtlaj niman notlakaitaj, niman xtlaj kinmojtia. Jehová kintlajtlakolmakas akin maski kixmatij itlanauatiluan xkintlakamatij (Heb. 13:4). Biblia techmachtia kenon tikmapeuaskej auilnemilistli. Se ken melak noneki tikchiuaskej yejua kuajli tikinyekanaskej toixtololojuan (Mat. 5:28, 29). Ika yejon, akin kichiuaj ken Cristo xkitaskej auilnemilistli nion xkikakiskej tlakuikaltin tlen kijtouaj tlen tsokuiltik (Efes. 5:3-5). w17.11 22 párrs. 9, 10

Itekipanojkauan Jehová miyek xiujtin yokitekitiltijkej tlakuikajli ika kiueyiteneuaj toTajtsin. Kuajli tikitaj ika ijkuak israelitas melajkanemiyaj itech Jehová, tlakuikajli melak ueyi kijtosnekiya itech ken kiueyichiuayaj. Xnemili yejuin, ijkuak tekiuaj David okitlali ken nochiuas tekitl ipan teopan, okintekitlali 4,000 levitas ika makiueyiteneuakan Jehová ika tlatsotsonajli. Itech yejuamej, 288 melak ueliyaj kikuikatiliayaj Jehová (1 Crón. 23:5; 25:7).Tlatsotsonajli niman tlakuikatilistli melak ueyi okijtosnek ijkuak onopeualti notekitiltia teopan. Biblia kijtoua: “Kuakon ijkuak tlapitskej niman akin nokuikatiaj kiueyichiujtoyaj niman kitlasojkamachilijtoyaj Jehová san sekan, niman ijkuak tlatsotsonajli opeuj chikauak kakisti intech trompetas, címbalos niman okseki tlen ika tlatsotsonaj ijkuak kiueyichiujtoyaj Jehová, [...] iueyilis Jehová okitemilti ikal toTajtsin akin melauak”. Kuajli tikmatij ika ijkuak onochiuj yejuin melak okinchikauili intlaneltokil israelitas (2 Crón. 5:13, 14; 7:6). w17.11 4 párrs. 4, 5

Jesús kimatiya ika itlamachtiluan kinxeloskia tlaltikpakchanejkej niman ika inomachtijkauan nonekiskia yolchikaujkej yeskej pampa kintlauelitaskiaj. Melauak, Jesús ouajla ipan yejuin tlaltikpaktli pampa otemachtiko tlen melauak, xokinxexeloko tlaltikpakchanejkej (Juan 18:37). San ika, yejon ueliskia panos. Kuakon Cristo kinekiya temachtis ika kemantika ouijtika yeskia kichiuaskej ken yejua, niman melak ouijtika yeskia ijkuak inchanejkauan noso akin imiuan nouikaj xkiseliskiaj tlen melauak. Akin yokiteititijkej ika kinmelaua inomachtijkauan Cristo yeskej, yokixikojkej ika kinpijpinaujtiaj niman ika inchanejkauan xok kinseliaj. San ika, miyek yokitlankej xijkon ken tlen yokipolojkej (Mar. 10:29, 30). Niman maski tochanejkauan xkinekij matiktekichiuilikan Jehová, tejuamej xtikajkauaj ika tikintlasojtlaj. San ika, matikilnamikikan ika kipiya kachtopa tiktlasojtlaskej toTajtsin niman Cristo (Mat. 10:37). Noijki kipiya tikilnamikiskej ika Satanás kiyejyekos ika totlasojtlalis itech tochanejkauan makichiua maka matiyolmelaujkanemikan itech Jehová. w17.10 13 párrs. 3-6

Itech yejuin tlen kita, kuajli techititia ika Jehová nion achijtsin xkixikoua ika ipan ikalpan maonia tlen xkuajli. Tla kita itlaj tlen xkuajli, nimantsin kipopolos (1 Cor. 5:13). Ijkon kiteititia iluikaktekitketl ijkuak nimantsin kitlalilia itentsaujkayo ika plomo ipan yejon chikijtli. Yejuin tlatlachalistli melak okinyolchikauj israelitas akin onenkej itech itonaluan Zacarías, pampa kuajli okinmachilti ika Jehová kipiyaskia chipauak ken kiueyichiuaj. Tlatlachalistli noijki okimilnamikti judíos ika nonekiya kipiyaskej chipauak ken kiueyichiuaj toTajtsin. Tlen xkuajli, xnoselia nion xkeman noselis ipan ikalpan Jehová. Yejua otechuajuikak ipan ikalpan tlen chipauak, kampa tikmachiliaj kenon techtlasojtla niman techtlajpiya. San ika, tejuamej kipiya titlapaleuiskej ika maonia chipauak. ¿Tiknektokej tikchiuaskej yejuin? Ipan ikalpan toTajtsin kampa onka yolseuilistli xkanaj onaki tlen xkuajli. w17.10 24 párrs. 14, 15; 25 párrs. 17, 18

Kachtopa 39 amoxtin itech Biblia okimijkuilojkej israelitas noso judíos. Yejuamej akin kachtopa “Dios okinmakak para kejeuaskej iYektlajkuilol” (Rom. 3:1, 2). Maski ijkon, ipan siglo 3 i.x.x. 1, miyekej judíos xok kasikamatiyaj tlajtojli hebreo. ¿Tleka? Pampa Alejandro Magno miyek kalpamej okinoyaxkatijka, niman aman griegos miyekan tekiuajtitoyaj (Dan. 8:5-7, 20, 21). Kuakon tlajtojli griego yejua tlen tlajtouayaj nochimej akin kinyekanayaj, noijki judíos akin semoyaujtoyaj ipan intlaluan. Yejuin okichiuj ika miyekej judíos makinouijmaka kasimatiskej Tlajkuiloltin ika hebreo. ¿Kenon noyektlaliskia yejuin? Onotlajtolkuepkej ika griego, niman otlankej kitlajtolkuepaj kanaj 100 xiujtin achto ika uajtlakatiskia Jesús. Yejuin amoxtli tlen onokixti ipan griego onoixmat ken Septuaginta. Yejuin kachtopa amoxtli itech Tlajkuiloltin ika hebreo tlen onotlajtolkuep tlen hasta aman nomati. w17.09 20 párrs. 7-9

Kanaj akin itech tekitij kemantika kintlajtlanilia matekitikan okseki horas ipan tonajli ijkuak kiueyichiuaj toTajtsin iuan inchanejkauan, ijkuak tenojnotsaj noso ijkuak yauej tlanechikoltin. Noneki kipiyaskej yolchikaualistli niman ijkon nochipa kijtoskej ika ka. Niman ijkon, kinmakaj se kuajli neskayotl inkoneuan. Tajtin noijki teititiaj yolchikaualistli ijkuak kinpaleuiyaj inkoneuan makitejtemokan kitekichiuiliskej toTajtsin niman kinpaleuiyaj makichiuakan. Kanaj seki tajtin kinenemiliaj tla kinyoleuaskej inkoneuan makikuikan innemilis ken precursor, mauiyan kampa nonekij tenojnotskej, matekitikan Betel, kampa nochijchiuaj Kaltin kampa tonechikouaj noso kampa nochiuaj ueyi tlanechikoltin. Kanaj kinmojtia ika inkoneuan xueliskej kintlajpiyaskej tla yejuamej youeuentsintiakej. San ika, tla tajtin tlamachilisejkej, kiteititiskej yolchikaualistli niman tlaneltokaskej ika Jehová kichiuas nochi tlen yokijto (Sal. 37:25). Ijkuak tajtin temakaj yejuin kuajli neskayotl, kinpaleuiyaj inkoneuan mayolchikaujkej niman matlaneltokakan itech Jehová (1 Sam. 1:27, 28; 2 Tim. 3:14, 15). w17.09 30 párrs. 14, 15

Tajtin, ¿kenon uelis nenkinpaleuiskej nemokoneuan mauelikan manoteltikan inselti? Kuajli tikitaj ika yejuamej xuajtlakatij ika yejuin kualneskayotl, kuakon nemejuamej kipiya nenkimititiskej ika nemoneskayo (Efes. 6:4). Tla nenkitaj ika nemokoneuan xuelij kiteltiaj tlen kimachiliaj, xmotlajtoltikan tlen neskayotl nenkinmakatokej. Xkilnamikikan ika melak ueyi kijtosneki tla nochipa nemontenojnotsaj, nemonechikouaj niman nenkiueyichiuaj toTajtsin ken familia. Maka xmomojtikan nenkijliskej “ka” nemokoneuan ijkuak nonekis. Tlen Jehová okimijli Adán niman Eva ika xuelis kichiuaskiaj, ueliskia kimititis ika kipiaya kitlakaitaskej itlanauatijkayo. Noijki ijkon, tikinmelajkatlalis niman nemoneskayo uelis kinmachtiskej nemokoneuan inselti manoteltikan. Tlasojtlalistli itech itlayekanalis Jehová niman tlakaitalistli itech itlanauatiluan, yejon tlen melak ueyi kijtosneki tlen tajtin uelis kinmakaskej inkoneuan (Prov. 1:5, 7, 8). w17.09 7 párr. 17

Nochi kech ok tinemiskej kampa Satanás tlayekana, ok titlajyouijtoskej pampa xtlaj tekitl, ipampa temojtikej kokolistin, tlaueltotokalistli, itech tlen tlaixpoloua itech tlaltikpaktli, tlachtekilo niman okseki tlaueltin. Noneki melak matiteiknelikan niman matopaleuikan semej iuan oksekimej. Teiknelilistli techpaleuis matikinchiuilikan oksekimej tlen kuajli (Efes. 4:32). Yejuin kualneskayomej techpaleuiskej matikixkopinakan toTajtsin niman tikinyolseuiskej oksekimej (2 Cor. 1:3, 4). Uelis panos ika ipan totlanechikol nemij akin ualeuaj itech okse país noso akin xkipiya miyek tomintsin. ¿Kenon uelis tikinchiuiliskej tlen melak kuajli? Matouikakan imiuan niman matikinpaleuikan makitakan ika melak tikimintlasojtlaj ipan tlanechikojli (1 Cor. 12:22). Noijki, miyekej Teixpantijkej yopeujkej nomachtiaj se yenkuik tlajtojli pampa kimikneliaj akin ualeuaj okseki países (1 Cor. 9:23). Niman yejuin melak yotlapaleui. w17.08 23, 24 párrs. 7-9

Tinochimej noneki matiknektokan titlamachiaskej niman maka tosiaujkauaskej. ¿Tlenon techpaleuis matikchiuakan? Matiktlajtlanilikan toTajtsin matechmaka iespíritu. Matikilnamikikan ika noneki tikpiyaskej espíritu santo niman ijkon tiueliskej titlamachiaskej ika yolseuilistli (Efes. 3:16, TNM; 6:18; 1 Tes. 5:17-19). Ika nochi toyojlo matiktlajtlanilikan Jehová matechpaleui matitlaxikokan ika yolseuilistli. Matikilnamikikan noijki tleka Abrahán, José niman David ouelkej okichiakej ika yolseuilistli makichiua Jehová tlen yokimijlika. Ijkon okichiujkej pampa tlaneltokayaj itech Jehová niman pampa kimatiyaj ika nochipa kuajli tlen kichiua. Xsan intech otlanemilijkej nion xsan okitejtemojkej tlen yejuamej kinpaleuiskia. Titlanemiliskej ipan tlateochiualistin tlen okiselijkej techpaleuis matitlamachiakan. Maski tikixnamikiskej tlen ouijtika, kipiya ika tiknektoskej titlamachiaskej itech Jehová. Melauak ika kemantika uelis tiktlajtoltiskej Jehová: “¿Kech uejkauis?” (Is. 6:11). San ika, ika ikojtilis espíritu santo, noijki uelis tikijtoskej yejon tlajtoltin tlen okijto Jeremías niman tlen nesij ipan tlaxelojli tlen aman tikitstokej. w17.08 7 párrs. 18-20

Ijkuak san konetl katka, Jesús nauiltiaya niman noyolpaktiaya. Ken kijtoua itlajtol toTajtsin, onka “ijkuak tiuetskas” niman “ijkuak timijtotis” (Ecl. 3:4). San ika, Jesús noijki onomachti iTlajtol iTajtsin tlen okichiuj kuajli manouika iuan. Ijkuak kipiaya 12 xiuitl, tlamachtijkej ipan teopan melak otlamojkaitakej itech ken “kuajli itlamatkilis yejuan ika tenankiliaya” itech tlamachtijli tlen ualeua itech toTajtsin (Luc. 2:42, 46, 47). Ijkuak Jesús yonoskaltijka, yolpakiya pampa kichiuaya tlen toTajtsin kinekiya. Se neskayotl, ipampa tlen iTajtsin kinekiya yejua okijto: “Nikinmachiltis on mayankej tlakamej on kuajli temachtilistli” niman “nikimpaktis on yejuan noyolajmanaj” (Luc. 4:18). Yejua kuelitaya kinmachtis oksekimej itech iTajtsin iluikakchane (Luc. 10:21). Se tonajli, ijkuak yokimachtijka se siuatl kenon kiueyichiuas toTajtsin, okimijli inomachtijkauan: “Ijkuak nikchiua tlen kineki on yejuan onechajtitlan [...], in tekitl sa no ijki ken notlakual” (Juan 4:31-34). Kiteititis itlasojtlalis ipampa Jehová niman ipampa oksekimej, okichiuj ika Jesús mayolpaki. Tejua noijki uelis mitsyolpaktis yejon. w17.07 23 párrs. 4, 5

Tlen okichiuj niman tlen okijto Jesús ijkuak onen ipan tlaltikpaktli, kuajli okiteititi itlasojtlalis, iteasikamatilis niman iteiknelilis iTajtsin, Jehová (Juan 5:19). Jesús okuajtitlankej makinyolseuiki akin najmantokej niman noyolkokojtokej (Is. 61:1, 2; Luc. 4:17-21). Tlaltikpakchanejkej kitayaj kenon Jesús melak teikneliani katka, ika kasikamatiya kenon tlajyouiayaj niman yemelak kinekiya kinpaleuis (Heb. 2:17). Biblia kijtoua ika: “Ijkon ken Jesucristo katka, aman ok ijki, niman nochipa ijki yes” (Heb. 13:8). Yejua akin kitemaka nemilistli niman kimati kenon timomachilis ijkuak titlajyouis, ika yejon, uelis kinpaleuis akin kintlatlataj noso tlajyouiyaj (Hech. 3:15; Heb. 2:10, 18). Kuakon, kuajli matikmatstokan ika noyolkokoua ijkuak techita titlajyouiyaj. Yejua kasikamati kenon titlajyouiyaj niman techyolseuis “ijkuak itlaj techpolos” (Heb. 4:15, 16). w17.07 13 párrs. 6, 7; 14 párr. 10

Ipan yejuin tlamachtijli, yotomachtijkej ika melak ueyi kijtosneki matiktlasojkaitakan tlen patioj techmaka toTajtsin. San ika, melak noneki maka matijkauilikan ika Satanás niman tlen kiyekana makichiuakan mapopoloui totlasojtlalis itech tlen tiktlasojkaitaj. Tla xtotlajpiyaj, uelis peuas techyoltilanas ijkuak techtekiuiltiskej se tekitl kampa techtlaxtlauiliskej miyek tomin noso tinemiskej ika miyek tlemach tlen patioj. Juan, itlatitlankauj Cristo, otechmelajkaijli ika tlen onka ipan yejuin tlaltikpaktli niman tlen techtekiuiltia xok uejkauis popoliuis (1 Juan 2:15-17). Ika yejon, melak noneki nochipa matiktlasojkamatikan niman matiktlajpiyakan tlen patioj techmaka toTajtsin. Matiknekikan tikmapeuaskej nochi tlen uelis kichiuas mapopoliui totlasojtlalis itech Tekiuajyotl. Matiknekikan titenojnotsaskej ika yolchikaualistli niman maka keman matikpolokan totlasojtlalis itech totenojnotsalis. Nochipa matiktejtemokan tomachtiskej okseki tlen melauak itech Biblia. Ijkuak tikchiuaskej yejuin, tiksentlaliskej “riquezas ne iluikak [...], niman kampa on tlachteketl xuelis kalakis nion itlakuanyo konixpolos” (Luc. 12:33). w17.06 13 párrs. 19, 20

Itlayekanalis Jehová xteyolkokoua. Akin kitlakamatij kuajli nomachiliaj niman yolpakij (2 Cor. 3:17). David okijto itech Jehová: “Kampa yejua nemij tlatsotlani niman onka ueyilistli; kampa chanti onka kojtilistli niman pakilistli” (1 Crón. 16:7, 27). Salmista Etán okijkuilo: “Paki kalpan akin kixmati tsajtsis ika pakilistli. Jehová, yejuamej nejnemij ipan itlauil moxayak. Yejuamej yolpakij ipan motokayo nochi tonajli, niman ipan momelajkayo kinueyiteneuaj” (Sal. 89:15, 16). Ijkuak melak titlanemiliaj kenon Jehová melak yolkuajli, kuajli tikneltokaj ika melak kuajli ken tlayekana. Jehová okinemili kenon texchijchiuas. Ika yejon, kuajli kimati tlenon kichiua matiyolpakikan. Yejua kuelita techmakas xsan tlen techpoloua. Nochi tlen Jehová techtlajtlanilia matikchiuakan kichiua pampa kineki kuajli matinemikan. Niman hasta tla nonekis itlaj tikpatlaskej, nochipa tiyolpakiskej tla tiktlakamatij Jehová (Is. 48:17). w17.06 29 párrs. 10, 11

Matitlanemilikan itech se neskayotl. Se tokniuj siuatl chanej Inglaterra melak kinekiya kinpiyas ikoneuan. Ijkuak okimat ika xueliskia kinpiyas ikoneuan aman, yejua melak onajman. Kuakon yejua iuan iueuentsin okinemilijkej kiskaltiskej se konetl. San ika, maski ijkon ok melak onoyolkoko seki tonaltin. Yejua okijto: “Nikmatiya ika tikiskaltiskej se konetl xsan noijki ken tla nejua nikpiyaskia nokoneuj”. Biblia kijtoua ika se siuatl “nomakixtis ijkuak kinemitis ikoneuan” (1 Tim. 2:15). San ika, yejuin xkijtosneki ika yejua kipiyas nemilistli tlen xkeman tlamis san pampa kinpiya ikoneuan. Kuakon, ¿tlenon kijtosneki yejuin? Se nantli kipiya melak miyek tekitl pampa kintlajpiya ikoneuan ipan ichan. Yejuin uelis kipaleuis maka kichiuas seki tlemach ken tetejteneuas noso nokalaktis kampa xnoneki (1 Tim. 5:13). w17.06 5, 6 párrs. 6-8

¿Okijtosnek Elihú ika ijkuak tochikaua tiktekichiuiliaj toTajtsin xtlaj kijtosneki? Ka. Jehová xokiyektlali Elihú, ijkon ken okinyektlali yejon yeyi tlakamej. Elihú kijtosnekiya ika Jehová xkipoloua matikueyichiuakan. Yejua xtlaj kipoloua makimakakan. Xtlaj uelis tikchiuaskej tlen uelis kichiuas makipiya tlen patioj noso makipiya chikaualistli. Niman xsan yejon, nochi kualneskayomej tlen tikinpiyaj noso tlen tiueltokej ualeua itech toTajtsin, niman yejua kitaj kenon tikintekitiltiaj. Ijkuak tikimititiaj tlasojtlalistli tlen xtekaua itekipanojkauan Jehová, yejua kita. Yejua kita tlen kuajli tikinchiuiliaj oksekimej kentla yejua tikchiuiliskiaj. Proverbios 19:17 kijtoua: “Akin kipaleuiya akin itlaj kipoloua kitlaneujtia Jehová, niman yejua kitlaxtlauilis ipampa tlen kichiua”. Nochipa ijkuak yakaj tikititiaj iknelilistli, Jehová kita. Maski yejua Akin okichijchiuj nochi tlen onka ipan iluikak niman ipan tlaltikpaktli, yejua kimachilia ika techuikilia ijkuak tikchiuaj itlaj tlen kuajli ipampa oksekimej niman techtlaxtlauilia ika miyek tlateochiualistin. Hasta ikoneuj toTajtsin otemachti ika yemelak ijkon (Luc. 14:13, 14). w17.04 28 párrs. 3, 4

¿Tlenon okse uelis techpaleuis niman ijkon melak tiktlasojtlaskej tlen melauak itech Biblia? Noneki nochipa tiaskej ipan tlanechikoltin, kampa techmachtia Jehová. Nochi semanas tomachtiaj Biblia ika Amatl Tekakistilijketl, niman itech nochi yejuin se tlen melak notekitiltiaj ika tomachtiaj. Tla tiknekij kuajli topaleuiskej itech yejuin tlanechikojli, noneki kachtopa kuajli toyektlaliskej. Se neskayotl, matikintejtemokan nochi textos tlen ompa uajnestiuej. Ipan yejuin tonajli, miyekej xouijtika kipouaskej noso kitemoltiskej Amatl Tekakistilijketl pampa onka ika miyek tlajtoltin ipan jw.org niman ipan aplicación JW Library. Seki formatos electrónicos techpaleuiyaj nimantsin matikinnextikan textos itech Biblia tlen ompa uajlauej. San ika, maski san kenon tomachtiskej, kipiya ika kuajli tikpouaskej textos itech Biblia niman melak intech matitlanemilikan. Tla ijkon tikchiuaj, totlasojtlalis itech tlen melauak itech Biblia ueyiyas. w17.05 18 párr. 14

Sakin ika yotoapolaktijkej, xtiknekij tijkajkauaskej tiktekichiuiliskej toTajtsin ijkon ken otikijtokej ijkuak otosentemakakej. Ijkuak yotikijlikej ika tiktekichiuiliskej Jehová xkipiya ika tikpatlaskej totlajtol. Se akin onsiaui ika kitekichiuilia Jehová noso onsiaui ika kichiua ken Cristo xuelis kijtos sakin ika yejua xmelauak onosentemakak itech toTajtsin niman ika xtlaj okijtosnek iapolaktilis. Tla se akin yonosentemakak itech Jehová kichiua se tlajtlakojli, kipiya ika noyolkuitis itech Jehová niman itech tlanechikojli. Xkeman tiknekiskiaj tochiuaskej ken akin Jesús okimijli: “Xok tinechtlajsojtla ken achtoj otinechtlajsojtlak”. Tejuamej tiknekij ika yejua makijto yejuin totechkopa: “Nejua nikixmati motekiu, motetlajsojtlalis, motlaneltok, niman moijyouilis. Niman nikmatstikaj ika aman más titekiti xken achtopa” (Apoc. 2:4, 19). Tiknekij tikyolpaktiskej Jehová ijkuak kuajli tikteititiskej ika yotosentemakakej. w17.04 7 párrs. 12, 13

“¿Xkichiuas tlen melajki akin Teyolkuitijketl ipan nochi tlaltikpaktli?” (Gén. 18:25). Abrahán xotetlajtolti yejuin pampa ometlamatiya. Tlen otetlajtolti okiteititi ika yejua kineltokaya ika Jehová kintlajtlakolmakaskia ika melajkayotl uejueyimej kalpamej Sodoma niman Gomorra. Yejua kuajli kimatstoya ika Jehová xkeman kichiuas ika akin melajki mamiki iuan akin kichiua tlen xkuajli. Yejuin nion xuelis kinemiliskia Abrahán. Yejua kineltokaya ika Jehová nochipa kichiuaskia tlen melajki pampa Jehová yejua temaka melak ueyi neskayotl itech melajkayotl niman tlen melajki. Kema, tlajtoltin “melajkayotl” niman “melajki” miyekpa san sekan notekitiltiaj ipan Tlajkuiloltin ika hebreo pampa san noijki tlen kijtosnekij. Ika yejon, pampa Jehová itlanauatiluan nochipa melaktikej, nochipa tetlajtlakolmaka ken kinamiki. Biblia kijtoua: “Yejua kitlasojtla tlen melaktik niman melajkayotl” (Sal. 33:5). w17.04 15 párrs. 1, 2

Tajtin, melak noneki xkinmakakan se kuajli neskayotl nemokoneuan tla nenkinekij kuajli manouikakan iuan Jehová niman nochipa manemikan. Ijkuak nemokoneuan kitaskej ika nemejuamej kachtopa nenkitejtemouaj iTekiuajyo toTajtsin, yejuamej kineltokaskej ika Jehová kinmakas tlen kinpoloua mojmostla (Mat. 6:33, 34). Kachtopa xchiua itekiyo Jehová niman maka san xtejtemo miyek tlemach tlen patioj. Xmopanolti san ika achijtsin niman xyejyeko maka tikteuikilis tomin. Xtejtemo kenon tikpiyas “riquezas ne iluikak”, kijtosneki, makiseli Jehová tlen tikchiua, niman maka xtejtemo tomin noso inueyilis tlakamej (Mar. 10:21, 22; Juan 12:43). Maka keman xpiya miyek tlen tikchiuas niman ijkon uelis tikinmakas tiempo mokoneuan. Xkimijli ika melak kuajli timomachilia pampa kitlapejpeniaj kitlaliskej kachtopa Jehová ipan innemilis niman xsan kitejtemoua ueyilistli, notomintiskej noso mitstomintiskej. Maka xnemilikan ika nemokoneuan noneki mechmakaskej miyek tlemach niman ijkon melak kuajli ninnemiskej. Xkilnamikikan ika “tatajtin yejuamej noneki kintekipanoskej inkoneuan, niman xejuamej on inkonekuan kitekipanoskej intauan” (2 Cor. 12:14). w17.05 9, 10 párrs. 3, 4