Julio

Matitlajtokan itech Sebná. Nesi ika yejua kitlajpiaya ichan Ezequías, kuakon ueyixtoya (Is. 22:15). Teajman ika opeuj noueyimati niman opeuj kitejtemoua sa no yejua noueyilis (Is. 22:16-18). Pampa Sebná san yejua noueyiliaya, toTajtsin okikuili itekiyo niman okimakak Eliaquim (Is. 22:19-21). Yejuin opanok ijkuak tekiuaj asirio Senaquerib kinemilijtoya konixnamikis Jerusalén. Sakin, Senaquerib okomintitlan uejueyixtokej tlakamej akin itech tekitiyaj niman noijki miyekej tlaixnamijkej niman ijkon kinmojtis judíos niman kichiuas ika tekiuaj Ezequías manotemaka (2 Rey. 18:17-25). Ezequías okititlan Eliaquim niman omemej tlakamej makinnamikitij yejon uejueyixtokej tlakamej asirios. Se akin okititlanka katka Sebná, akin aman tekititoya ken isecretario tekiuaj. Yejuin uelis techititis ika Sebná xokikauilijka ika ajmantli nion itlauel makiyekanakan niman noijki ika yonoyolyemanilijka, pampa okiselijka se tekitl tlen xijkon ueyixtoya ken okse tlen kipiaya. w18.03 25 párrs. 7, 8, 10

Tla tikitaj ika san titlanemiliaj itech tlemach tlen uelis tikpiyaskej niman itech iileuilisuan totlalnakayo, maka matosiaujkauakan. Nochipa matiktlajtlanikan espíritu santo, niman Jehová techpaleuis ika totlanemililuan maoniakan ipan tlen kuajli (Luc. 11:13). Xkilnamiki Pedro, itlatitlankauj Cristo. Kemantika yejua okichiuj ken akin xnoyekana ika iespíritu santo toTajtsin (Mat. 16:22, 23; Luc. 22:34, 54-62; Gál. 2:11-14). San ika, yejua xonosiaujkauj. Ika yolik, niman ika itlapaleuilis Jehová, Pedro ouel otlanemili ken Cristo. Tejuamej noijki tiueliskej ijkon tikchiuaskej. Niman sakin, Pedro okiteneuj kualneskayomej tlen noneki tiktejtemoskej (2 Ped. 1:5-8). Yejua okijto: “Xchiuakan kanika para uelis nenkichiuaskej on tlen kuajli”. Tla tokojtiliaj toselti toteltiskej, titlaxikoskej niman tikintlasojtlaskej oksekimej, techpaleuis matikchikauakan ken toyekanaj ika iespíritu santo toTajtsin. Melak kuajli yeskia tla mojmostla totlajtoltiaj: “¿Tlenon uelis nikchiuas aman niman ijkon nikchikauas ken ninoyekana ika iespíritu santo toTajtsin?”. w18.02 25, 26 párrs. 12, 13

Job kuajli kimasikamatiya itlajtolyekanalisuan Biblia. Yejua yemelak kixmatstoya toTajtsin niman yejon okiyolmapeuj makichiua tlen kuajli. Xnemili: Job kimatstoya ika xueliskia kiteijlis ika kitlasojtlaya toTajtsin niman kinchiuilis tlen xkuajli oksekimej (Job 6:14). Yejua xonoueyimat intech oksekimej, kimitaya kentla ichanejkauan yeskiaj, maski tla kipiayaj tomin noso ka. Job okijto: “¿Akin onexchijchiuj ipan ijti nonan xnoijki okinchijchiuj yejuamej?” (Job 31:13-22). Maski miyekej kixmatstoyaj niman kipiaya miyek tomin, yejua xokinokauili ika yejon makijtlako ken sa no yejua noitaya niman ken kimitaya oksekimej. Yejua xijkon katka ken tlaltikpakchanejkej akin kipiyaj tomin niman akin uejueyixtokej ipan yejuin tonaltin. Job xtlaj okiueyichiuj, nion ipan iyojlo. Yejua kimatstoya ika tla kiueyichiuaskia itlaj, kanaj itomin tlen kipiaya, ijkon kimapeujtoskia “toTajtsin akin tlakpak nemi” (Job 31:24-28). Yejua kitaya namiktilistli ken itlaj tlen melak chipauak tlen kinsetilia se tlakatl iuan se siuatl. Yejua hasta okichiuj se tlajtolkaualistli iuan ixtololojuan niman ijkon xkitas ika xkuajli ileuilistli nion se ichpochtli (Job 31:1). w18.02 11 párr. 16; 11, 12 párrs. 18, 19

Noé xsan kinekiya yes se kuajli tlakatl. Yejua noijki onochiuj se tenojnotsketl itech melajkayotl, niman ika yolchikaualistli okiteijli ika tlaneltokaya itech Jehová (2 Ped. 2:5). Pablo, itlatitlankauj Cristo, okijkuilo: “Pampa ijkin okineltokak Dios, Noé okititij nochi tlakatl yejuan nemiya ika tlajtlakojli” (Heb. 11:7). Niman Noé okipijpinaujtijkej, okitlauelitakej niman hasta kanaj kinekiyaj kichiuiliskej tlen xkuajli. San ika, yejua xokuekuetlakak “ixpan tlaltikpakchanejkej” (Prov. 29:25). Yejua okipix yolchikaualistli tlen Jehová kinmaka itekipanojkauan akin tlaneltokaj. Sakin ika Noé okitekichiuili toTajtsin ipantsin 500 xiuitl, Jehová okijli makichijchiua se akajli niman ijkon makisaskej tlaltikpakchanejkej niman yolkamej (Gén. 5:32; 6:14). Kanaj yejon nesiya melak ouijtika, niman xsan ika kenon kichijchiuaskia. Noé kuajli kimatstoya ika yejon kichiuaskia ika oksekimej melak makipijpinaujtikan niman makitlauelitakan. Maski ijkon, yejua otlaneltokak niman otetlakamat. “Okichiuj ijkon ken okinauatijkej” (Gén. 6:22). w18.02 4 párrs. 4, 6, 7

Melak titlapaleuiskej san sekan matinemikan tla tikteititiaj tlasojtlalistli ijkon ken kichiua Jehová, toTajtsin akin yejua tetlasojtlalistli (1 Juan 4:8). Maka keman matikijtokan itlaj ken yejuin: “Nikmatstika ika noneki nikinxikos tokniuan, san ika, xkipiya ika imiuan kuajli ninouikas”. Titlanemilis ijkon kixnamiki itlajtoluan Pablo tlen kijtoua ika akin kichiuaj ken Cristo kipiya noijyouiskej semej iuan oksekimej  “ika on tetlajsojtlalistli” (Efes. 4:2). Matikitakan ika xsan okijto matoijyouikan semej iuan oksekimej, okijto matoijyouikan  “ika on tetlajsojtlalistli”. ¿Xmelak ika yejuin ome xsan noijki? Jehová yokichiuj mauajlakan ipan tlanechikojli tlaltikpakchanejkej akin tlatlamantikej (Juan 6:44). Ijkon tej, yejua kita miyek tlen ika kintlasojtlas. Kuakon, ¿kenon tiueliskiaj tikijtoskej ika se tokniuj xkimelaua matiktlasojtlakan? Xakaj kipiya tikteltiliskej tlasojtlalistli tlen Jehová technauatia matikteititikan (1 Juan 4:20, 21). w18.01 16 párr. 14

Sekimej tajtin kinemiliaj ika kuajli yeskia tla inkoneuj nomachtia ipan se ueyi kaltlamachtijli niman kipiya se kuajli tekitl achto noapolaktis. Kanaj ijkon tlanemiliaj pampa kinekij tlen kuajli itech inkoneuj. San ika, ¿kipaleuis yejon yemelak mayolpaki inkoneuj? Niman, tlen melak ueyi kijtosneki, ¿yejon tlen temachtia iTlajtol toTajtsin? Melak noneki matikilnamikikan ika yejuin tlaltikpaktli niman nochi tlen ipan onka kixnamikij tlen Jehová kineki niman tlen kinemilia (Sant. 4:7, 8; 1 Juan 2:15-17; 5:19). Ijkuak se konetl kuajli nouika iuan Jehová yejon kitlajpiya itech Satanás, itech yejuin tlaltikpaktli niman ken tlanemilia. Tla tajtin kachtopa kitejtemouaj miyek kipiyaskej ipan yejuin tlaltikpaktli, inkoneuj uelis kinemilis ika tlen onka ipan tlaltikpaktli melak ueyi kijtosneki xijkon ken nouikas iuan Jehová. Yemelak, nion se tajtli akin kitekichiuilia Jehová xkineki ika yejuin tlaltikpaktli makiyekana tlen kitlapejpenis kichiuas ikoneuj. Maka matikilkauakan ika san uelis yemelak tiyolpakiskej tla kachtopa tiktejtemouaj Jehová ipan tonemilis (Sal. 1:2, 3). w18.03 11 párrs. 10, 11

Miyekej yokitakej ika nemiskej san ika tlen yemelak kinpoloua xsan kichiua melak mayolpakikan, noijki kinkauilia makipiyakan tiempo tlen ika uelis kitekichiuiliskej Jehová. Se tokniuj akin itoka Jack kipiaya se ueyi ikal niman se kuajli tekitl, san ika okinnemakak niman ijkon nochiuas precursor iuan isiuauj. Techtomilia: “Ipan miyek xiujtin, ninokuepaya nochan ika ueyi ajmantli ipampa tlaueltin ipan notekiyo. Niman nosiuauj, akin precursora, nochipa melak ika iyojlo nemiya. Yejua kijtouaya: ‘Niktekichiuilia akin melak kuajli tlayekana’. Aman ika nejua noijki niprecursor, tiomemej tiktekichiuiliaj yejua, Jehová”. ¿Tlenon techpaleuis matikmatikan tlenon yemelak tiknemiliaj itech tomin? Noneki totlajtoltiskej niman tokuitiskej: “¿Kiteititia nonemilis ika yemelak nikneltoka tlen Biblia kijtoua itech tomin? ¿Melak ueyi kijtosneki ipan nonemilis niktlanis tomin? ¿Melak nechajmana tlen uelis nikpiyas xijkon ken ninouikas iuan Jehová niman akin nechyeualouaj? ¿Yemelak nitlaneltoka ika Jehová nechmakas tlen melauak nechpoloua?”. Uelis kuajli tikmatstoskej ika toTajtsin xkeman kinkauas akin itech tlaneltokaj. w18.01 25 párrs. 12, 13

Ken yotikitakej, sa no tejua timotekimakas ipampa momakixtilis melak ueyi kijtosneki. Ika yejon, kipiya timomachtis Biblia niman itech titlanemilis, tikchiuilis teoyotl toTajtsin niman titlanemilis ipan tlateochiualistin tlen yejua yomitsmakak. Nochi yejuin mitspaleuis kuajli xmatsto ika timouika iuan Jehová. Niman yejon kichiuas xtlajto itech tlen tikneltoka (Sal. 73:28). Jesús okijto: “Tla yakaj kineki nouan yas, ma kelkaua on tlen kineki, ma nemi listo para tlajyouis noso mikis nopampa, niman ma nouan uiya” (Mat. 16:24). Kuajli nesi ika tikchiuas tlen okijto Jesús kijtosneki tiksentemakaskej tonemilis niman toapolaktiskej. Yejuin techkauilis matikselikan miyek tlateochiualistin aman niman noijki nemilistli tlen xkeman tlamis ipan yenkuik tlaltikpaktli tlen toTajtsin yokijto kuajkuis. Ika yejon, miyek tikpiyaj tlen techyolchikaua sa no tejuamej matotekimakatiakan ipampa tomakixtilis. w17.12 27 párrs. 18, 19

Ijkuak tajtin kipiyaj ijyouilistli, inkoneuan ika yolik kasikamatstiuej kenon “patlauak, niman ueyak, niman uejkatlan, niman tlakpak on” tlaneltokijli (Efes. 3:18). Ijkuak kinmachtiskej noneki kitaskej kech xiuitl kipiyaj inkoneuan niman kech kasikamatij. Ijkuak kokonej melak kuajli kineltokaj tlen kinmachtijtiuej, yejuin kinpaleuis kijtoskej ipan kaltlamachtijli niman ixpan oksekimej tleka ijkon tlaneltokaj (1 Ped. 3:15). Se neskayotl, ¿uelij kitetomiliaj ika Biblia tlenon panoua ijkuak timikij? ¿Kinemiliaj tleka yejuin melauak ijkon? Kuajli nesi ika noneki ijyouilistli niman ijkon kuajli tikimititis mokoneuan itlamachtiluan Biblia, san ika, melak kinpaleuis (Deut. 6:6, 7). Melauak, tajtin akin kinekij ika inkoneuan makineltokakan tlen melauak, noijki noneki yejuamej makinmakakan se kuajli neskayotl. Stephanie, akin kipiya yeyi ichpoch, kijtoua: “Ninotlajtoltiaya: ‘¿Nikinmasikamachiltia tleka nejua kuajli nikmatstika ika nemi Jehová niman ika yejua melajki niman tetlasojtlani?’. Xuelis nikchias nokoneuan matlaneltokakan tla nejua xnitlaneltoka”. w17.12 20 párrs. 8-10

¿Tleka Marta kuajli kimatstoya ika ikniuj oksejpa yoliuiskia? Pampa, ijkuak san ichpokakonetl katka, achto ika Jesús peuaskia tenojnotsas, kanaj okikak itech yejuin milagros kampa chantiya noso ipan sinagoga. Niman kanaj tejuamej tikualilnamikij yeyi itech tlen Biblia tlajtoua. Xtlanemili itech kachtopa yoliuilistli itech tlen Biblia tlajtoua. Yejuin okichiuj teotlajtoketl Elías, opanok ipan tonaltin ijkuak Jehová okimakak kojtilistli ika makichiua milagros. Ipan se ueyikalpan fenicio tlen onka itempan mar, itoka Sarepta, se siuakauajli akin xmiyek kipiaya kuajli okiseli teotlajtoketl. Kuakon, toTajtsin okichiuj ika maka matlami iaceite nion iharina, niman ijkon yejua niman ikoneuj omakiskej (1 Rey. 17:8-16). Sakin, ikoneuj okualok niman omik. San ika, Elías okikitski mijkatsintli niman okichiuj teoyotl: “Oh Jehová noTajtsin, nimitstlajtlanilia, xchiua ika inemilis yejuin konetl itech manokuepa”. Jehová okikak iteoyouj Elías niman okichiuj ika oksejpa manemi (1 Rey. 17:19-22). Kuajli tikmatstokej ika Marta kixmatiya yejuin temojkatlachialti milagro. w17.12 3 párr. 1; 4 párrs. 3, 5, 6

Miyekej techijliaj matijkuikan tonemilis niman tokojtilis ika tikseliskej se ueyi tlamachtijli ipan yejuin tlaltikpaktli. Kanaj techijliskej ika ijkon techtlakaitaskej, tiuejueyixtoskej niman tikpiyaskej tomin. Yejuin tlen melak kitejtemouaj miyekej tlaltikpakchanejkej, ika yejon, sekimej akin kichiuaj ken Cristo ueliskiaj noijki ijkon tlanemiliskej. ¿Yemelak ika teyolpaktia kuajli tonkisas itech se ueyi tlamachtijli ipan yejuin tlaltikpaktli, tlen kijtouaj temaka ueyilistli niman tlakaitalistli? Ka. Matikilnamikikan tlenon opanok iuan Satanás. Yejua melak kinekiya kinyekanas oksekimej niman makiueyikaitakan. San ika, maski uelis tikijtoskej ika okichiuj yejon, xyolpaki, yejua kualantika (Mat. 4:8, 9; Apoc. 12:12). Yolpakilistli tlen temaka se ueyi tlamachtijli ipan yejuin tlaltikpaktli san ontlami. Nion achijtsin xkinisiuiya pakilistli tlen tikmachiliaj ijkuak tikinpaleuiyaj oksekimej makixmatikan toTajtsin niman itlamachtiluan tlen uelis kichiuas manemikan nochipa. Noijki, yejuin tlaltikpaktli kampa notlatlanij kichiua ika tlaltikpakchanejkej manonexikolitakan niman makitejtemokan uejueyixtoskej xijkon ken oksekimej. San ika, tlen yemelak, nochi yejon nion xtepaleui san kentla “tiknekis tikonajsis ejekatl” (Ecl. 4:4). w17.11 23 párrs. 11-13

Ipan itonaluan Jesús, tlatsotsonajli ok melak nonekiya ipan tlaneltokijli melauak. Sakin ika okiteijli manoilnamiki iTlakualis toTeko, ipan yejuin yeuajli tlen melak ueyi kijtosneki, Jesús onokuikati tlakuikaltin inuan inomachtijkauan. Akin kichiuayaj ken Cristo ipan kachtopa siglo otechmakakej se neskayotl pampa san sekan kikuikatiliayaj toTajtsin ijkuak kiueyichiuayaj. Melauak ika xok nosentlaliayaj ipan teopan, yej san techan. Maski ijkon, yejuin xokintelti ika manokuikatikan ika pakilistli. ToTajtsin okichiuj ika apóstol Pablo makimijli ikniuan ipan tlanechikojli: “Xmomachtikan niman xmoyoleuakan iuan oksekimej ikan nochi tlamatkilistli. Xtlakuikatikan itech Dios ikan tlaxtlauijli” (Col. 3:16). Ijkon noneki tokuikatiskej “tlakuikalmej itech Dios” tlen tikinpiyaj ipan toamox ika tlakuikaltin. Yejuin tlakuikaltin noijki tlakuajli tlen techmaka “tekitketl” yolmelauak niman akin “kipia kuajli itlamachilis” (Mat. 24:45). w17.11 4 párrs. 7, 8

Xouijtika katka tajsis ipan yejon chikuasen uejueyimej kalpamej kampa nopaleuiayaj. Jehová otlanauati maoniakan yejyeyi kalpamej inajnakastlan atentli Jordán. Ijkon, akin otemikti ueliskia nimantsin ajsis niman xkitekiyomakas (Núm. 35:12-14). Israelitas nonekiya kuajli kinpiyaskej ojtin tlen teuikayaj ipan yejuin kalpamej (Deut. 19:3). Noijki, nomati ika judíos, kintlaliayaj tlen kititiaya ojtli akin otemikti. Pampa onkatka yejuin kalpamej, akin otemikti xnonekiya cholos itech okse kalpan, kampa kanaj ueliskia kinueyichiuas tajtsitsintin xmelajkej. Matiknemilikan yejuin: Jehová otlanauati ika akin temiktiayaj makinmiktikan, san ika, akin xsan okinejkej otemiktijkej okichiuj ika yejuamej mauelikan makiselikan teiknelilistli niman tlapaleuilistli. Se ixtlamatki itech tlen kijtoua Biblia okijkuilo: “Nochi onotlali ika maka matepopolo, maka maouijtika niman totoka manasikamati”. Jehová xse temojti teyolkuitijketl akin kineki kintlajtlakolmakas itekipanojkauan. Ka, yejua ueyi iteiknelilis (Efes. 2:4). w17.11 14 párrs. 4, 5

Se tlajkuilolamatl tlen patlani, se siuatl tsauktika ipan se chikijtli niman omemej siuamej akin kipiyaj mastlakapalmej ijkon ken se cigüeña niman najkokuij ika ejekatl. Tikinnextiaj yejuin temojkatlachialtikej tlatlachalistin ipan amoxtli tlen okijkuilo teotlajtoketl Zacarías (Zac. 5:1, 7-9). ¿Tleka Jehová okimakak Zacarías yejuin tlatlachalistin? Ika chikuasen niman ika chikome tlatlachalistli tlen okitak Zacarías kinchikajkanotsa akin xnoyekanaj ika melajkayotl. Noijki, techilnamiktiaj ika Jehová xkixikoua tlen xkuajli. Itekipanojkauan kipiya tiktlauelitaskej tlen xkuajli. Ika yejuin tlatlachalistin, Jehová kuajli techititia ika tla tokojtiliaj tikyolpaktiskej xtikseliskej nion se tlauijuikaltilistli. Yejua techtlajpiyas niman techteochiuas. Niman kuajli tikmatstokej ika techpaleuis matiktlanikan yejuin xkuajli tlaltikpaktli niman ijkon tichipaujkanemiskej. w17.10 21 párr. 1; 25 párr. 19

Tokniuan siuamej akin nemij inselti, aman melak miyek onka kampa uelis kitekichiuiliskej Jehová. Uelis yeskej precursoras, yaskej kampa nonekij akin tenojnotsaskej, tekitiskej ipan Tekitl tlen nochiua itech Diseño niman Construcción, niman kitemiltiskej amatl niman ijkon uelis yaskej itech Tlamachtijli tlen kiseliaj Akin Tenojnotsaj itech iTekiuajyo toTajtsin. Sekimej hasta uelis yaskej niman kiseliskej iTlamachtil Galaad. Tinochimej melak tikintlasojtlaj tokniuan iuejueyimej ipan tlanechikojli niman tiktlasojkamatij ika touan nemij. Yemelak ika sekimej xok uelij kichiuaj nochi kech kinekiskiaj ipan itekiyo toTajtsin, san ika, ok uelis kiteititiskej yolchikaualistli niman tlapaleuiskej ipan tlanechikojli. Se neskayotl, tla tlayekankej kintlajtlaniliaj makinotsakan se tokniuj akin ichpochtli ika melak noneki manotlakenti ken kinamiki, nonekis noyolchikauaskej kichiuaskej yejon. Yejuamej xkimajuaskej tokniuan, ka, kiyejyekoskej kinyolchikauaskej matlanemilikan ika ken notlakentiaj uelis kimijtlakoskej oksekimej (1 Tim. 2:9, 10). Intlasojtlalis niman pampa kinekij tepaleuiskej, kipaleuiya tlanechikojli. w17.09 31, 32 párrs. 17, 18

Kemantika akin uejueyixtokej yokiyejyekojkej ika tlaltikpakchanejkej maka makipiyakan nion makipouakan Biblia. Maski ijkon, akin kitlasojtlaj toTajtsin yokixnamijkej miyek niman ijkon kichiuaskej oksekimej makipiyakan Biblia. Se itech yejuamej itoka katka John Wyclef. Yejuin tlakatl akin katka teólogo akin ualeuaya Inglaterra niman onen ipan siglo 14, kuajli kimatstoya ika nochimej kipiaya ueliskej kipouaskej iTlajtol toTajtsin. San ika, ipan itonaluan xakaj ipan Inglaterra ueliya kipiaya Biblia. Ipan 1382, okis Biblia tlen okitlajtolkuep John Wyclef niman akin iuan otekitkej. Akin lolardos katkaj kitlasojtlayaj Biblia. Onejnenkej nochi Inglaterra, kajkalpan yayaj. Kinpouiliayaj tlaltikpakchanejkej Biblia niman kinkauiliayaj amatsitsintin itech tlen kijtouaya Biblia tlen yejuamej kijkuilouayaj. Ipan seki siglos sakin, ipan Europa niman okseki kalpamej ipan tlaltikpaktli, opeuj notlajtolkuepa niman nosemoyaua Biblia pampa kinekiyaj ika nochimej itech manopaleuikan. w17.09 20, 21 párrs. 10-12

Ijkuak tesiuauj xueli kipiya ikoneuj, kanaj uelis melak noyolkokos (Prov. 13:12). Yeuejkaui, melak ueyi kijtosnekiya ika siuamej manonamiktikan niman makinpiyakan inkoneuan. Ika yejon Raquel, isiuauj Jacob, melak onoyolkoko ijkuak xueliya kinpiaya ikoneuan niman ikniuj kema (Gén. 30:1, 2). Okse tlajyouilistli tlen uelis kipiyaskej akin yononamiktijkej yejuin: ijkuak miki imixnamik. Niman maski yejuin xkeman kinemiliaj inpan nochiuas, miyekej yononek kixikoskej yejuin tlen melak ouijtika. Akin kichiuaj ken Cristo yemelak kineltokaj ika onias yoliuilistli, niman yejuin melak kinyolseuiya (Juan 5:28, 29). Ipan iTlajtol, toTajtsin Jehová techijlia miyek tlen kichiuas tlen ika techyolseuis ijkuak tikixnamikij tlen ouijtika. w17.06 4 párr. 1; 5 párr. 6; 6 párr. 9

Se tonajli, toTajtsin okinotiti Moisés niman okijli itokayo niman seki ikualneskayouan. Yejua xokiteneuj ika melak tlamachilise noso ika kipiya kojtilistli, yejua kachtopa okijli ika tetlapopoluiyani niman teikneliani (Éx. 34:5-7). Jehová kimatiya ika Moisés kinekiya kimatis tla yemelak kipaleuiskia, ika yejon, okijli ikualneskayouan tlen teititiaj ika kinektika kinpaleuis itekitkauan (Éx. 33:13). Jehová otexchijchiuj matiuelikan matiteiknelikan. San ika, pampa Adán otechpanoltili tlajtlakojli, miyekpa san totech titlanemiliaj. Kemantika uelis ouijtika yes tiktlapejpeniskej tla tikpaleuiskej okse tlaltikpakchane noso tla san totech titlanemiliskej. ¿Tlenon techpaleuis matikteititikan teiknelilistli? Kachtopa, matikitakan kenon Jehová niman oksekimej tlaltikpakchanejkej yokiteititijkej teiknelilistli. Sakin tikitaskej kenon tiueliskej tikixkopinaskej Jehová niman kenon techpaleuis tla tikchiuaj. w17.09 8 párr. 1; 9 párr. 3

Tlen kipiya techmapeuas matiyolyemankej, yejua ika tiknekij tikueyichiuaskej Jehová, niman xpampa tiknekij kuajli matlajtokan totechkopa. Matikilnamikikan ika hasta se iluikaktekitketl akin xkipiaya tlajtlakojli, otlajtlako pampa onoueyimat (uelis tikitas Ezequiel 28:17). Tejuamej melak techouijmaka tikmapeuaskej ueyimatilistli pampa titlajtlakolejkej. Maski ijkon, uelis totlakentiskej ika yolyemanilistli. ¿Kenon? Noneki mojmostla tikxeloskej tonajli niman titlanemiliskej itech tlen tikpouaj ipan Biblia (Deut. 17:18-20). Itlaj tlen melak techpaleuis, yejua tla titlanemilia ipan itlamachtiluan Jesús niman ikuajli neskayo itech yolyemanilistli (Mat. 20:28). Yejua sajnoye yolyemanki katka, hasta okinmikxipajpak itlatitlankauan (Juan 13:12-17). Noijki noneki nochipa matiktlajtlanilikan iespíritu toTajtsin niman ijkon uelis tokixtiliskej tlanemililtin tlen kichiua matomachilikan tiuejueyimej xijkon ken oksekimej (Gál. 6:3, 4). w17.08 25 párrs. 11, 12

¿Kemantika yotomachilijkej ijkon ken Pablo? Kanaj otiktlajtlanilijkej toTajtsin matechpaleui itech tlen tiktlapejpeniskej tikchiuaskej niman nesiya ika toyekanayaj ika espíritu santo. San ika, kanaj tlen opanok sakin xyejon tlen tikchiayaj. Kanaj otikixnamijkej tlaueltin noso itlaj tlen okichiuj melak matikpatlakan ken tinemiyaj (Ecl. 9:11). ¿Tlenon uelis tikchiuaskej niman ijkon xtajmanaskej niman tikpiyaskej “yolseuilistli” tlen techmaka toTajtsin? Tlen Pablo okimijkuilouili filipenses techititia ika teoyotl yejua tlen kipopoloua ajmantli. Kuakon nochipa ijkuak melak tajmanaskej, matikchiuakan teoyotl (1 Ped. 5:6, 7). Niman matikchiuakan ika tlaneltokijli, kuajli matikmatstokan ika Jehová kinektika techpaleuis. Noijki matiktlasojkamachilikan nochi tlateochiualistin tlen techmaka. Totlaneltokil itech yejua chikauis ijkuak tikilnamikiskej ika “ueli kichiuas miyek más de on yejuan tejuamej ueli tiktlajtlaniaj noso on yejuan tiknemiliaj” (Efes. 3:20). w17.08 9 párrs. 4, 6; 10 párr. 10

Miyekej tokniuan onochiujkej precursores ijkuak telpokamej katkaj, niman yejuin yokinpaleui mayolpakikan. Tla tejua titelpochtli, ¿tleka xtikijlia se itech yejuin tokniuan tlen tiknemilia tikchiuas ipan monemilis? Tikmatij ika yejuin tokniuan mitsijliskej ika chikauak tiktekichiuilis toTajtsin mitsmachtis miyek tlen mitspaleuis ipan nochi monemilis. Itaj Jesús okimachti miyek ijkuak onen iluikak. San ika, xonotelti ika nomachtis ijkuak otenojnots ipan tlaltikpaktli. Se neskayotl, okitak ika kiyolpaktiaya ijkuak tlen kinmachtiaya tlaltikpakchanejkej ajsiya ipan inyojlo, niman noijki yolmelajkanemis ijkuak kixnamikiya tlatlatalistin (Is. 50:4; Heb. 5:8; 12:2). Jesús okijto: “Xuiyan [...] xkinmachtikan nochimej on tlakamej para [...] no nonomachtijkauan yeskej” (Mat. 28:19, 20). Tla tiknemilia tikchiuas yejuin tekitl, melak tiyolpakis niman tikchiuas makiseli ueyilistli toTajtsin. w17.07 23 párrs. 6, 7

Uelis kuajli tikmatstoskej ika toTajtsin Jehová akin teikneliani yejua akin itech ualeua nochi yolseuilistli (2 Cor. 1:3, 4). Akin yomik se inchanejkauj noijki uelis kinextiskej yolseuilistli ipan tlanechikojli (1 Tes. 5:11). ¿Kenon uelis tikinyolchikauaskej niman tikinyolseuiskej “akin noyolajmana”? (Prov. 17:22). Matikilnamikikan ika onka “kemanon xtitlajtos niman kemanon titlajtos” (Ecl. 3:7). Se tokniuj siuakauajli itoka Dalene kijtoua: “Akin noyolkokouaj kinekij kijtoskej tlen kinemiliaj niman tlen kimachiliaj. Ika yejon, kuajli matikinkakikan niman maka matikintlajtolkotonakan. Yejuin tlen melak noneki tikchiuaskej inpampa”. Okse tokniuj itoka Junia, akin ikniuj sa no yejua onomikti, kijtoua: “Maski xuelis nochi tikasikamatiskej kenon noyolkokouaj, tlen ueyi kijtosneki ika tiknekij tikasikamatiskej kenon nomachiliaj”. Noijki noneki tikilnamikiskej ika xsan noijki tlen tikmachiliaj niman ken tikteititiaj ika toyolkokouaj. w17.07 13 párr. 3; 14 párrs. 11-13

Ipan yejuin tonajli, miyekej tlaltikpakchanejkej kitaj melak ueyi kijtosneki tomin. Yejuamej san tlanemiliaj niman najmanaj itech yejuin. Ika yejon, uejkauij kiyejyekouaj kipiyaskej miyek tomin noso kejyeuaskej tlen ikipiyaj. Oksekimej kitaj ika melak ueyi kijtosneki inchanejkauan, kipiyaskej kuajli innemilis noso itlaj tlen yejuamej kineki kichiuaskej. San ika, onka tlen melak ueyi kijtosneki xijkon ken itlaj okse. Titlajtouaj itech yejuin: manoteititi ika san Jehová melauak kinamiki tlayekanas. Melak noneki ika maka keman tijkauaskej titlanemiliskej itech yejuin. Tla xtotlajpiyaj, uelis melak miyek tikchiujtoskej mojmostla ipan tonemilis noso san tajmantoskej itech tlaueltin tlen tikixnamikij niman tikilkauaskej ika melak ueyi kijtosneki yejuin. Tla tikpaleuiyaj iueyitlayekanalis Jehová, melak kuajli tikixnamikiskej tlaueltin niman tonisiuiskej itech. w17.06 22 párrs. 1, 2

Jehová nochipa kitekitiltia ikojtilis ika tlasojtlalistli. Akin tlayekanaj itech inchanejkauan niman tlayekankej akin kitlasojtlaj iueyitlayekanalis Jehová kixkopinaj niman xteyolkokouaj ken tlayekanaj. Pablo onochikauj kixkopinas toTajtsin niman iKoneuj. Yejua xokinpinaujti oksekimej nion xokinchiualti makichiuakan tlen melajki. Yejua ika tlasojtlalistli okichiuj makinekikan kichiuaskej tlen melajki (Rom. 12:1; Efes. 4:1; Filem. 8-10). Ijkuak Pablo okichiuj yejuin, okixkopin Jehová. Ijkuak tikimititiaj tlasojtlalistli oksekimej, tikpaleuiyaj iueyitlayekanalis Jehová. Noijki tikpaleuiyaj itlayekanalis Jehová ijkuak ika tlakaitalistli tikintlakamatij akin yokinmakakej tlanauatijkayotl. Maski ijkuak xtikasikamatij kuajli noso xtikuelitaj tlen yokitlapejpenijkej nochiuas, tikinpaleuiyaj manochiua. Tlaltikpakchanejkej xkichiuaj yejuin, san ika, tejuamej kema tikchiuaj pampa tikseliaj Jehová ken toTekiuaj (Efes. 5:22, 23; 6:1-3; Heb. 13:17). w17.06 30 párrs. 14, 15

Tokniuan akin xok kipiyaj yolchikaualistli, akin noyolkokouaj noso kipiyaj okseki tlaueltin noneki tikinpaleuiskej, tikinyolchikauaskej niman tikinyolseuiskej (Prov. 12:25; Col. 4:11, TNM). Matikimititikan ika tikintlasojtlaj “más on yejuan kineltokaj Jesucristo”, noso tokniuan, ika totlajtol niman ika tlen tikchiuaj (Gál. 6:10). Biblia kijtoua ika ipan sa itlamiyan tonaltin kampa tlayekana Satanás miyekej san najmanaskiaj intechkopa niman kinekiskiaj miyek tlemach (2 Tim. 3:1, 2). Tejuamej akin tikchiuaj ken Cristo, noneki tochikauaskej niman tikueyiliskej totlasojtlalis itech Jehová, itech iTlajtol niman itech tokniuan. Pampa titlajtlakolejkej, kanaj kemantika uelis tikpiyaskej se pitentsin tlauejli iuan tokniuan. San ika, pampa totlasojtlaj se iuan okse, tochikauaskej tikyektlaliskej ika tlasojtlalistli san katlejua tlauejli niman totoka (Efes. 4:32; Col. 3:14). Kuakon, noneki nochipa matikchiuakan ika maueyiya totlasojtlalis itech Jehová, itech iTlajtol niman itech tokniuan. w17.05 19, 20 párrs. 17, 18

Akin tikchiuaj ken Cristo tikmatij ika kiyauak itech tlanechikojli topan nochiuas tlen xkinamiki. San ika, totlaneltokil uelis notlatlatas tla tikitaj ika tlen xkinamiki topan nochiua ipan tlanechikojli. Tla ijkon panoua, ¿tlenon tikchiuaskej? ¿Tijkauiliskej ika yejon matechtlajkali? Tinochimej titlajtlakolejkej niman topopolouaj. Ika yejon, uelis yakajtexchiuilis tlen xkinamiki noso tejuamej uelis yakaj tikchiuiliskej tlen xkinamiki ipan tlanechikojli. Yejuin san kemantika panoua. Maski ijkon, akin tikchiuaj ken Cristo xkipiya ika timojkatlachiaskej noso techtlajkalis ijkuak panoua itlaj tlen xkinamiki. Jehová yotechmakak tlajtolpaleuilistli ipan Biblia tlen techpaleuis matiyolmelaujkanemikan tla se tokniuj texchiuilia itlaj tlen xkinamiki (Sal. 55:12-14). w17.04 16 párrs. 4, 5

Tla toixnamik xiteixpantijkauj Jehová, kanaj onias okseki tlen techkuaajmanas ipan tonamiktilis. Maski ijkon, tla toixnamik xkineki kitekichiuilis Jehová yejon xkichiua ika aman itech matoxelokan noso iuan matokauakan ixpan tekiuajkej (1 Cor. 7:12-16). Tesiuatsin akin kichiua ken Cristo kipiya kitlakaitas iueuentsin ken akin tlayekana itech ichanejkauan maski maka makinmachti itech toTajtsin. Noijki ijkon, teueuentsin akin kichiua ken Cristo kipiya kitlasojtlas isiuauj niman kimaluis maski xkitekichiuilia Jehová (Efes. 5:22, 23, 28, 29). ¿Tlenon uelis tikchiuaskej tla toixnamik xtechkauilia matiktekichiuilikan Jehová ken tiknekiskiaj? Se neskayotl, se teueuentsin akin isiuauj iteixpantijkauj Jehová okijli ika san matenojnotsa seki tonaltin ipan semana. Tla tikixnamikij itlaj ken yejuin, matotlajtoltikan: “¿Nexchiualtijtika manikajkaua ika niktekichiuilia Jehová? Tla xijkon, ¿uelis niktlakamatis niman nikchiuas tlen nechtlajtlanilia?”. Tla kuajli tiknemiliaj uelis techpaleuis maka matikinpeualtikan tlaueltin (Filip. 4:5). w17.10 13 párrs. 7, 8

Ijkon ken okijto teotlajtojli, tlaltikpakchanejkej “itech nochi tlajtoltin” uajlatokej ipan ikalpan Jehová (Zac. 8:23). San ika, tla mokoneuan xkasikamatij kuajli tlajtojli tlen tejua titlajtoua, kanaj melak ouijtika yes tikinmachtis tlen melauak. Yejuamej monomachtijkauan itech Biblia akin kachtopa noneki tikimitas, niman tlen tikinmachtis itech Jehová kijtosnekis nemilistli tlen xkeman tlamis (Juan 17:3). Mokoneuj uelis nomachtis itech itlamachtiluan Jehová tla tejua iuan titlajtoua miyekpa itech yejon (Deut. 6:6, 7). Mokoneuan kanaj nomachtiskej tlajtojli tlen tlajtouaj kampa nenchantij aman ipan kaltlamachtijli niman itech oksekimej. San ika, yejuamej san ueliskej tlajtojli tlen nentlajtouaj tla miyekpa ika yejuin nenkinnotsaj. Ijkuak nemokoneuan tlajtoskej nemotlajtol, xouijtika yes nemouan tlajtoskej niman mechijliskej kenon nomachiliaj. San ika, onka okse tlen ika tepaleui. Ijkuak mokoneuan nomachtiskej tlajtoskej xsan ipan se tlajtojli, melak kinpaleuis totoka matlanemilikan niman makasikamatikan ken tlanemiliaj oksekimej. w17.05 10 párrs. 5, 6

Akin tlaixnamikiyaj itech Jabín kinpiayaj 900 carros tlen ika tlauisokij tlen okintlalilijkej hoces tlachijchiujtin ika tepostli. San ika, israelitas xkinpiayaj armas tlen ika ueliskia tlaixnamikiskej nion tlen ika notlatsakuiliskej (Juec. 4:1-3, 13; 5:6-8). San ika, Jehová okijli Barac makichiua tlen kijtoua tlaxelojli tlen aman tikitstokej. Barac niman 10,000 tlakamej oyajkej otlaixnamikitoj kampa itoka Taanac (Juec. 4:14-16). ¿Okinpaleui Jehová yejon israelitas? Kema. San totoka, opeuj chikauak ajakakiyaui niman kampa noixnamiktoyaj melak osokitiak. Yejuin okinpaleui israelitas. Barac okintlaueltokak akin tlaixnamikij itech Sísara hasta kampa itoka Haróset tlen nokauaya 24 kilómetros ika uejka. Kanaj ipan yejon ojtli, icarro Sísara osaliuito ipan sokitl. Kuakon Sísara otemok niman onotlalo hasta Zaananim. Ompa, oniyan ichan se siuatl itoka Jael. Pampa melak yosiaujka, nimantsin okoch. Ijkuak Sísara kochiya, Jael onoyolchikauj niman okimikti (Juec. 4:17-21). Ijkon Jehová okinpaleui israelitas makintlanikan intlauelikniuan. w17.04 29 párrs. 6-8

¿Onias okse organización ipan tlaltikpaktli ijkuak yopanok Armagedón? Biblia kijtoua: “Tejuamej tikmachixtokej on yenkuik cielo iuan on yenkuik tlaltikpaktli yejuan Dios otechprometerouilij. Ompa, tej, nochimej nouikaskej yolmelajkej” (2 Ped. 3:13). Iluikamej niman tlaltikpaktli tlen xyenkuikej kijtosneki xkuakualtin tekiuajkej niman tlaltikpakchanejkej akin kinyekanaj. ¿Tlenon kinpatlas ijkuak yopopoliujkej? “Yenkuik cielo iuan on yenkuik tlaltikpaktli”. “Yenkuik cielo” noso yenkuik iluikamej kijtosneki se yenkuik tekiuajyotl, Tekiuajyotl tlen okimakakej Jesucristo niman 144,000 akin iuan tekiuajtiskej. Yenkuik tlaltikpaktli kijtosneki tlaltikpakchanejkej akin kinyekanas iTekiuajyo toTajtsin. Jesús niman akin iuan tekiuajtiskej kiteititiskej ikualneskayouan Jehová, toTajtsin akin kuelita nochi kuajli manoyekana (1 Cor. 14:33). Kuakon, “yenkuik tlaltikpaktli” melak kuajli noyekanas. Nemiskej kuakualtin tlakamej akin kitaskej nochi kuajli manochiua (Sal. 45:16). Yejon tlakamej kinyekanas Cristo niman 144,000. San xkonemili kenon yes ijkuak nochimej xkuakualtin organizaciones nopatlaskej san ika se tlen san sekan nemis niman xkeman kichiuas tlen xkuajli. w17.04 12 párrs. 8, 9

Namiktilistli okitlali toTajtsin. Jehová kita ika melak ueyi kijtosneki tlen kijtoua kichiuas se ijkuak nonamiktia. Ijkuak akin nonamiktiaj noijliaj tlen kichiuaskej, kichiuaj ixpan Jehová niman imixpan nochimej akin ompa nemij. Yejuamej noijliaj ika notlasojtlaskej, notlajpiyaskej niman notlakaitaskej se iuan okse kech uejkaujtipan nemij san sekan ipan tlaltikpaktli ijkon ken toTajtsin okitlali namiktilistli. Oksekimej kanaj xkijtouaj ika yejuin tlajtoltin, san ika, yejuamej noijki kijtouaj kichiuaskej itlaj ixpan toTajtsin. Ijkuak yejuamej yokijtokej tlenon kichiuaskej, aman kimatij ika yononamiktijkej. Namiktilistli noneki mauejkaui nochi innemilis (1 Cor. 7:39). Jesús okijto: “Ma ka yakaj tlakatl kixelos on tlen Dios okinsentlalij”. Akin kinekij nonamiktiskej xkipiya ika kinemiliskej ika pampa xkuajli nouikaj uelis tlamis innamiktilis niman nokauaskej ixpan tekiuajkej (Mar. 10:9). Pampa tinochimej titlajtlakolejkej, xnemij akin yononamiktijkej niman maka makipiyakan tlajtlakojli. Ika yejon, Biblia techijlia ika nochimej akin nonamiktiaj kemantika kipiyaskej tlen “kimpajsoloua ipan” innemilis (1 Cor. 7:28). w17.04 7, 8 párrs. 14, 15