Agosto

Tla tiknekij kuajli titemachtiskej, kachtopa noneki tejuamej tokauiliskej matechmachtikan (1 Tim. 4:15, 16). Ijkon tej, tla Jehová niman Jesús mitstekitiltiaj niman ijkon xtemelajkatlali, noneki tiyolyemanki yes niman tijkauilis Jehová mamitsyekana. Tla oksekimej kitaj ika tejua tiyolyemanki, mitstlakaitaskej niman xouijtika mitskakiskej ijkuak tikinnonotsas. Matikitakan neskayotl tlen Jesús otechkauili. Jesús okitlakamat iTaj ipan nochi, maski ijkuak melak ouijtika katka. Niman nochipa okijto ika itlamachilis niman itlamachtiluan ualeuayaj itech toTajtsin (Juan 5:19, 30). Pampa yejua yolyemanki katka niman tetlakamatiya, onochiuj se temachtijketl akin yolkuajli niman teiknelia, niman tlaltikpakchanejkej akin kuajli inyojlo kinekiyaj kinisiuiskej (Mat. 11:29). Itlajtoluan kinyolseuiaya akin noyolajmanayaj niman akin nomachiliayaj xkojtikej ken se akatl tlen yopostek noso se tlauijli tlen iseujtika (Mat. 12:20, TNM). Maski ijkuak itlatitlankauan san itech tlanemiliayaj niman kinekiyaj uejueyixtoskiaj, Jesús xonosiaujkauj. Ka, yejua okinyektlali ika tlasojtlalistli (Mar. 9:33-37; Luc. 22:24-27). w18.03 26 párrs. 15, 16

Pedro kiteneujtoya akajli tlen Noé kichijchiujtoya. Yejon akajli okichiuj ika nochimej makitakan ika Noé yonosentemakaka kichiuas tlen kineki toTajtsin. Tlaneltokaya niman okichiuj tlen Jehová okinauati. Ipampa yejon, Noé niman ichanejkauan omakiskej itech apachiuilistli. Ijkuak tlaltikpakchanejkej kitayaj akajli, kimatiyaj ika Noé tlaneltokaya itech toTajtsin. Noijki ijkon, ijkuak oksekimej kitaj yakaj noapolaktia, kimatij ika yejua inomachtijkauj Cristo niman ika yonosentemakak itech Jehová pampa tlaneltoka itech Cristo. Ijkon ken Noé, akin yonoapolaktijkej kitlakamatij toTajtsin niman kichiuaj tekitl tlen yokinnauati. Jehová okimakixti Noé ijkuak oyejkok apachiuilistli. Noijki ijkon kinmakixtis itekipanojkauan akin yolmelaujkej niman yonoapolaktijkej ijkuak kipopolos yejuin xkuajli tlaltikpaktli (Mar. 13:10; Apoc. 7:9, 10). Ika yejon, melak noneki timosentemakas niman timoapolaktis. Akin uejkaui ika noapolaktis, uelis kipolos itlamachialis ika nemis nochipa. w18.03 4 párrs. 3, 4

Sekimej tajtin kinemiliaj ika pampa inkoneuj ok xnoapolaktia xuelis kikixtiskej itech tlanechikojli. San ika, san nokajkayauaj. ¿Tleka? (Sant. 1:22). Tikasikamatij tleka tajtin kinekij ika inkoneuj manosentemaka itech Jehová niman manoapolakti hasta ijkuak yochikauj itlamachilis. San ika, nopopolojtoskiaj tla kinemiliaj ika xtlanankilis ixpan Jehová itech tlen kichiua san pampa ok xnoapolaktia. Pampa ijkuak nemokoneuj ikixmati tlen kuajli niman tlen xkuajli, ikipiya ika tlanankilis ixpan toTajtsin itech tlen kichiua (Sant. 4:17). Kuakon, tajtin akin tlamachilisejkej xkiyoleuaj inkoneuj ika manochia manoapolakti, yejuamej nokojtiliaj kimakaskej inkoneuj se kuajli neskayotl. Kiyejyekouaj kimachtiskej ijkuak ok pitentsin ika makipatiojkaita ika nochi iyojlo ken Jehová techijlia matoyekanakan (Luc. 6:40). Yejon melak kuajli kitlajpiyas, pampa yejuin kiyolmapeuas manoyekana ken Jehová technauatia (Is. 35:8). w18.03 11 párrs. 12, 13

Noé ijkon okichiuj itech 350 xiuitl sakin ika opanok Apachiuilistli (Gén. 9:28). ¡Se kuajli neskayotl itech kenon titlaneltokaskej niman titetlakamatiskej! Tejuamej uelis tikixkopinaskej ken kuajli tlaneltokaya niman tetlakamatiya Noé ijkuak tikpaleuiyaj imelajkayo toTajtsin, ijkuak xtikchiuaj ken oksekimej tlaltikpakchanejkej, niman ijkuak kachtopa tiktlaliaj iTekiuajyo toTajtsin (Mat. 6:33, TNM; Juan 15:19). Kuajli tikitaj ika pampa ken tikyekanaj tonemilis, miyekej tlaltikpakchanejkej techtlauelitaj. Se neskayotl, pampa kuajli yotikijtokej ika tiktlakamatiskej itlanauatiluan toTajtsin itech namiktilistli niman itech san akinomej ueliskej notekaskej, ipan seki kalpamej melak xkuajli tlajtouaj totech (Mal. 3:17, 18). San ika, ijkon ken Noé, xtikinmakasij tlaltikpakchanejkej, tejuamej tikmojkaitaj toTajtsin. Tikmatstokej ika san yejua uelis techmakas nemilistli tlen xkeman tlamis (Luc. 12:4, 5). Tinochimej noneki totlajtoltiskej: “¿Nochipa niktekichiuilis toTajtsin maski oksekimej nechpijpinaujtiskej noso nechtejteneuaskej? ¿Nikneltoka ika Jehová nechmakas tlen nechpoloua maski ijkuak ouijtika yes niknextis tlen noneki?”. Tla tikixkopina ken tlaneltokaya niman tetlakamatiya Noé, kuajli xmatsto ika Jehová mitstlajpiyas (Filip. 4:6, 7). w18.02 4 párrs. 4, 8; 5 párrs. 9,10

Akin noyekana ika iileuilisuan itlalnakayo san itech tlanemilia pampa kinokauilia makijtlakokan tlaltikpakchanejkej akin noyekanaj ika iileuilisuan. Pablo kijtoua ika yejuin tlanemilijli “tekiti ipan inyojlo on yejuan xkitlakamatij Dios” (Efes. 2:2). Yejuin tlanemilijli kichiua ika miyekej makichiuakan tlen oksekimej kichiuaj. Yejua ika, kichiuaj tlen kinemiliaj kuajli niman xnokojtiliaj kitlakamatiskej itlanauatiluan toTajtsin. Se tlaltikpakchane akin “noyekana ika iileuilisuan itlalnakayo” melak kineki ika nochimej makitlakaitakan niman kineki kipiyas miyek tlemach noso makitlakaitakan tlen kinemilia kinamiki kichiuas. Noijki san kichiua “on tlen xkuajli keleuiya” itlalnakayo (Gál. 5:19-21). Yejuin tlaltikpakchanejkej: nokalaktiaj ipan tlauejli, texexelouaj, kichiuaj ika oksekimej mateixnamikikan, notlateiluiliaj, xkintlakaitaj akin tlanauatiaj niman san kinemilijtokej tlakuaskej niman tlaoniskej. Niman ijkuak kixnamikij tlatlatalistin, nion achijtsin xnokojtiliaj kinxikoskej (Prov. 7:21, 22). w18.02 19 párrs. 3-5

Xtlajtlakojli timoyolpaktis san ken kinamiki ipan monemilis. Sekimej kinemiliaj ika noneki tijkauas nochi tlen ika uelis timoyolpaktis niman nochi tlen kuajli ipan tonemilis. San ika, xyejon tlen temachtia Jehová. Biblia kimijlia nochimej itekipanojkauan toTajtsin akin yolmelaujkej: “Xuiya, xtlakua ika yolpakilistli niman ika kuajli moyojlo xkoni vino” (Ecl. 9:7). Ijkuak 2 Timoteo 3:4 tlajtoua intech akin kitlasojtlaj tlen ika noyolpaktiaj, kinteneua akin inpan innemilis xkitejtemouaj toTajtsin. Matikitakan ika tlaxelojli xkijtoua ika yejuamej kitlasojtlaskiaj tlen ika noyolpaktiaj xijkon ken toTajtsin, pampa yejuin kijtosnekiskia ika maski san achijtsin kitlasojtlaskiaj. Kijtoua ika “kitlasojtlaskej tlen ika noyolpaktiskej maka ken kitlasojtlaskej toTajtsin”. Se ixtlamatki, kijtoua ika yejuin tlaxelojli “xkijtosneki ika yejuamej noijki kitlasojtlaj toTajtsin maski san achijtsin. Kijtosneki ika nion achijtsin xkitlasojtlaj”. Yejuin itlaj tlen kinchikajkanotsa akin melak kiueyiliaj intlasojtlalis itech tlen ika noyolpaktiaj. Tlajtoltin “kitlasojtlaskej tlen ika noyolpaktiskej” kuajli ompa kalakij akin “sa komatstokej ken ijki [...] pakiskej ipan innemilis” (Luc. 8:14). w18.01 25 párrs. 14, 15

Jehová se toTajtsin akin kuelita kitemakas. Nochi tlen tikpiyaj itech ualeua. Yejua iyaxka nochi oro, plata niman okseki tlen onka ipan tlaltikpaktli, niman kitemaka nochi tlen noneki niman ijkon maonia nemilistli (Sal. 104:13-15; Ageo 2:8). Se neskayotl, Jehová okinmakak israelitas maná niman atl ijkuak onenkej 40 xiujtin ipan tlaluaktli (Éx. 16:35, Neh. 9:20, 21). Itechkopa teotlajtoketl Eliseo, Jehová okichiuj se milagro kampa okimiyekili iaceite se siuakauajli akin yolmelaujki katka. Ipampa yejuin, yejon siuatl ouel okitlaxtlauj nochi tlen kiteuikiliaya niman ok onokauj itomintsin tlen ika nopanoltiskej yejua niman ikoneuan (2 Rey. 4:1-7). Niman noijki, Jehová okimakak Jesús kojtilistli tlen ika kichiuas milagro ika kitemakas tlakuajli niman hasta tomintsin ijkuak ononek (Mat. 15:35-38; 17:27). Jehová uelis kitekitiltis tlen yejua kinekis niman ijkon kuajli matekiti nochi tlen yokichijchiuj ipan tlaltikpaktli. Maski ijkon, yejua kinyolchikaua itekipanojkauan makipaleuikan ikalpan ika tlen kipiyaj (Éx. 36:3-7). w18.01 17 párrs. 1-3

Biblia tlajtoua itech sekimej akin yeuejkaui oyolmelaujkanenkej niman okinemilijkej ika xok ueliskiaj tlaxikoskej (Job 7:7). San ika, xokikajkaujkej tlen kichiujtoyaj, yejuamej okitlajtlanilijkej Jehová makinmaka kojtilistli. Niman toTajtsin xsan okinkauj pampa yejua “kimaka kojtilistli akin siaujtika” (Is. 40:29). Teajman ika amanin, sekimej itekipanojkauan toTajtsin yokinemilijkej ika tlen kinpaleuis kixnamikiskej tlen ouijtika yejua “noseuiskej achijtsin itech tlen melauak”, kentla tlen kichiuaj akin kitokaj Cristo yetik yeskia niman xse tlateochiualistli. Ika yejon, kikajkauaj ika kipouaj Biblia, ika yaskej tlanechikoltin niman ika tenojnotsaskej, nochi tlen Satanás kichia makichiuakan. Satanás kuajli kimati ika chikauak tiktekichiuilijtoskej toTajtsin techkojtilia. Niman yejua xkineki matikpiyakan kojtilistli. Ika yejon, ijkuak tejua tikitas ika yotisiauj ipan motlalnakayo niman tlen tikmachilia, maka xtlalkaui Jehová. Ijkuakon melak noneki xnisiui. Xkilnamiki ika Biblia kijtoua ika yejua “mechmelajkapias, mechkojtilis” (1 Ped. 5:10; Sant. 4:8). w18.01 7, 8 párrs. 2, 3

Eliseo yejua okichiuj ika ome yoliuilistli itech tlen tlajtoua Biblia. Ipan ueyikalpan Sunem, chantiya se ueyixtika israelita akin xkinpiaya ikoneuan niman iueuentsin iueyi katka. Pampa yejua kuajli okiseli Eliseo, toTajtsin okiteochiuj ika se ikoneuj. Seki xiujtin sakin, ikoneuj omik. Kuajli tikmatstoskej ika yejua melak najmantoya. Iueuentsin okikauili makitati teotlajtoketl, akin nemiya kampa tepetl Carmelo, tlen onkatka kanaj 30 kilómetros ika uejka. Eliseo okititlan Guehazí mayakatstiuj niman mauiya Sunem. San ika, yejua xouel okiyoliti. Sakin oajsik inan yejon konetl niman Eliseo (2 Rey. 4:8-31). Teotlajtoketl okalak ipan kajli niman okichiuj teoyotl inisiuj konetl akin yomijka. Kuakon, Jehová oksejpa okimakak inemilis. Ijkuak inan okitak, melak oyolpak (2 Rey. 4:32-37). Kema, ijkuak toTajtsin okikuiteuj ikoneuj siuatl akin chantiya Sunem, okiteititi ika yejua ueli kinyolitia mijkatsitsintin. w17.12 4, 5 párrs. 7, 8

Akin kipiya tlamachilistli kiteititia ika kuajli tlanemilia. Aman tej, kuajli titlanemilis xualeua itech kech xiuitl tikpiyas, ualeua itech tikmojkaitas Jehová niman tiknekis tiktlakamatis itlanauatiluan (Sal. 111:10). Telpokamej akin yopeuj chikaui intlaneltokil xnimantsin “kipatlatetsij intlamachilis” ipampa tlen kileuiyaj noso ipampa tlen oksekimej kinchiualtiaj makichiuakan (Efes. 4:14). Pampa yokimachtijkej intlamachilis youelkej “kasikamatij tlen kuajli niman tlen xkuajli” (Heb. 5:14, TNM). Kiteititiaj ika yopeujkej kuajli tlanemiliaj ijkuak ika tlamachilistli kitlapejpeniaj tlen kichiuaskej. Yejuin tlamachilistli melak noneki itech temakixtilistli (Prov. 24:14). Ika yejon, melak noneki kuajli matikimititikan tokoneuan ika toyekanaj ika Biblia. Tlen tajtli kijtoua niman kichiua kipiya kimititis ika noyekana ika itlanauatiluan iTlajtol toTajtsin (Rom. 2:21-23). w17.12 20, 21 párrs. 12, 13

Miyekej kinemiliaj ika tlaltikpakchanejkej ueliskej kiyektlaliskej tlaueltin. Yejuin tlanemilijli uelis kinyoltilanas miyekej pampa tla ijkon yeskia kijtosnekiskia ika xkinpoloua toTajtsin niman uelis kichiuaskej tlen kinekiskej. Noijki, kanaj nesis ika kema ijkon pampa ixtlamatkej kijtouaj ika guerras, tlen xkuajli, kokolistin niman mayantli itlantiuej. Se amatlajkuilojli kijtoua: “Tlaltikpaktli inoyektlalijtiuj pampa tlaltikpakchanejkej yokinotekimakakej kiyektlaliskej tlaltikpaktli”. Ijkuak tijkakiskej se tlanemilijli tlen kixnamiki tlen tikneltokaj, kuajli matomachtikan tlen kijtoua Biblia niman matitlajtokan iuan se tokniuj akin chikauak itlaneltokil. Matiknemilikan tleka tlaltikpakchanejkej kuelitaj yejon tlanemilijli, tleka xmelauak niman kenon tikteititiskej ika xmelauak. Tinochimej totlajpiyaskej itech ken tlanemilia yejuin tlaltikpaktli tla tikchiuaj tlen Pablo okijto ipan tlaxelojli tlen aman tikitstokej. w17.11 24 párrs. 14, 17

Fariseos kinemiliayaj ika xkipiaya ika teikneliskej, pampa kimitayaj oksekimej ken nion xitlaj kijtosnekiyaj (Luc. 18:9-14). Maka keman tochiuaskej ken fariseos. Matikixkopinakan Jehová niman matiteiknelikan (Efes. 4:32). Se ken uelis tikixkopinaskej yejua tikchiuaskej ika oksekimej xouijtika makitakan techtlajtlaniliskej matikintlapopoluikan (Luc. 17:3, 4). Matotlajtoltikan: “¿Nikimititia oksekimej ika niknektika nikintlapopoluis nochipa ijkuak nonekis? ¿Niknektika ninoyolseuis inuan akin onechyolkokojkej?”. Noneki tiyolyemankej yeskej niman ijkon titetlapopoluiskej. Fariseos xkinekiyaj tetlapopoluiskej pampa nomatiyaj uejueyixtokej xijkon ken oksekimej. San ika, akin tikchiuaj ken Cristo ika yolyemanilistli noneki tikimitaskej ika oksekimej “más uejueyixtokej” xken tejuamej, niman tikintlapopoluiskej ika nochi toyojlo (Filip. 2:3). Uelis totlajtoltiskej: “¿Nikixkopintok Jehová niman niyolyemanki?”. Tla ijkon, oksekimej xouijtika kitaskej techtlajtlaniliskej matikintlapopoluikan, niman tejuamej xouijtika tikitaskej tikintlapopoluiskej. Nochipa matiknektokan titeikneliskej niman maka nimantsin matoyolkokokan (Ecl. 7:8, 9). w17.11 14, 15 párrs. 6-8

Kanaj tipinauij niman tikmachiliaj ika xtiuelij tokuikatiaj ijkuak tikinkakij akin ueltokej nokuikatiaj. San ika, yejuin xkipiya techteltis ika matijkuikatilikan Jehová ken noneki. Kuakon, tlakpak matikteketsakan toamox ika tlakuikaltin, matijkuiteuakan totsontekon niman matokuikatikan ika toyojlo (Esd. 3:11). Ipan yejuin tonaltin, ipan miyek Kaltin kampa Tosentlaliaj kipiyaj pantallas kampa nesi letra itech tlen tokuikatiaj. Yejuin uelis techpaleuis chikauak matokuikatikan. Niman noijki, aman ipan Tlamachtijli itech iTekiyo Tekiuajyotl tlen kiseliaj tlayekankej noijki nokuikatiaj tlakuikaltin itech Tekiuajyotl. Yejuin kuajli techititia ika melak noneki ika tlayekankej makitemakakan se kuajli neskayotl ijkuak nokuikatiskej ipan tlanechikojli. Oksekimej tokniuan xnoyolchikauaj nokuikatiskej chikauak pampa xkuelitaj ken nokuikatiaj. San ika, matiknemilikan yejuin. Ijkuak titlajtouaj, miyekpa topopolouaj, san ika, xtijkajkauaj titlajtouaj ipampa yejon (Sant. 3:2). Noijki ijkon, xtijkajkauaskej tijkuikatiliskej Jehová san pampa xsajnoye kualtsin tokuikatiaj. w17.11 4, 5 párrs. 9, 10

Ijkuak Zacarías otlan kita ika chikome tlatlachalistli, kipiaya miyek tlen kinemilis. Kanaj melak okiyolpakti kikakis ika Jehová okijto ika kintlajtlakolmakas akin xmelajkanemij. San ika, nochi ok ijki onkatka. Miyekej ok xmelajkanemiyaj niman kichiuayaj tlen xkuajli. Noijki, judíos ok xtlamiyaj ika oksejpa kichijchiuayaj iteopan Jehová. ¿Tleka nimantsin okikajkaujkej tekitl tlen toTajtsin okinmakaka? ¿San onokuepkej Jerusalén okitejtemotoj kuajli nemiskej? Jehová kimatiya tlen kinpolouaya judíos. Ika yejon, okimakak Zacarías okse sa ika nochi tlatlachalistli kampa kinmachiltiaya ika kintlasojtlaya niman kitlasojkamatiya nochi tlen hasta aman yokichiujkaj. Noijki kinekiya makimatikan ika kintlajpiyaskia tla oksejpa kichiuayaj tekitl tlen yokinnauatijka. Jehová okimijli tlen kijtoua tlaxelojli tlen aman tikitstokej ijkuak otlajto itech teopan tlen oksejpa nochijchiuaskia. w17.10 26 párr. 1; 27 párr. 5

Tlakamej nochiuaj se tlateochiualistli ipan tlanechikoltin ijkuak kinektokej kiseliskej okseki tekitl (1 Tim. 3:1). San ika, uelis sekimej kiokpanemiliskej kiseliskej se tekitl ipan tlanechikojli. ¿Tleka? Kanaj pampa yeuejkaui itech itlaj onopopolojkej niman aman kinemiliaj ika xkinnamiki yeskej tlapaleuijkej noso tlayekankej. Noso kimachiliaj ika xkuajli kichiuaskej tekitl. Tla tejua ijkon tiknemilia, Jehová uelis mitspaleuis (2 Cor. 4:7). Xkilnamiki ineskayo Moisés. Yejua noijki kimachiliaya ika xueliskia kichiuas tlen toTajtsin yokinauatijka (Éx. 3:11). San ika, Jehová okipaleui manoyolchikaua niman makichiua tlen okinauatijka. Ika yejon, tla tejua mitspoloua yolchikaualistli, xtlajtlanili Jehová mamitspaleui niman mojmostla xpoua Biblia. Noijki mitspaleuis titlanemilis ipan inneskayo yeuejkaui itekipanojkauan Jehová akin yolchikaujkej katkaj. Uelis ika yolyemanilistli tikintlajtlanilis tlayekankej mamitsmajmachtikan, niman xkimijli ika tiknektika titlapaleuis san ipan tlenon. w17.09 32 párr. 19

ToTajtsin okiyekan tlen onoijkuilo ipan Biblia, san ika, yejuin xkijtosneki ika noijki okinyekan akin okitlajtolkuepkej Septuaginta, iBiblia Wyclef, King James Version (Versión del Rey Jacobo), noso okse. Maski ijkon, tlen opanok ijkuak onochijchiujkej yejuin niman okseki, teititia ika ijkon ken Jehová okijto, iTlajtol xkeman poliui. Yejuin kichikaua totlaneltokil ika noijki nochi okseki tlen yokijto Jehová noijki nochiuas (Jos. 23:14). Ijkuak tikitaj kenon toTajtsin yokitlajpix iTlajtol, nochikaua totlaneltokil niman totlasojtlalis itech yejua. Matitlanemilikan itech yejuin: ¿Tleka Jehová otechmakak iTlajtol niman otechmelajkaijli ika xkeman poliuiskia? Pampa techtlasojtla niman kineki techmachtis kenon kuajli tonkisaskej (Is. 48:17, 18). Kuakon melak kinamiki ika matiktlasojtlakan niman matiktlakamatikan itlanauatiluan (1 Juan 4:19; 5:3). w17.09 21, 22 párrs. 13, 14

Tla toixnamik xkitekichiuilia Jehová, kanaj ouijtika yes tikinmachtiskej kokonej makitlakamatikan yejuin tlanauatijli. Tiktemakaj se kuajli neskayotl tla tiktlakaitaj toixnamik. Matikitakan tlen kuajli kichiua niman matiktlasojkamachilikan. Maka matiktejteneuakan ixpan kokonej. Tlen kema, noneki kuajli matikimijlikan ika nochimej toselti kipiya tiktlapejpeniskej tla tiktekichiuiliskej toTajtsin noso ka. Ken kuajli nouikaj kokonej, uelis kichiuas ika toixnamik makineki kixmatis Jehová. Sekimej tlakamej kanaj xkikauiliaj isiuauj akin kitekichiuilia Jehová makinmachti inkoneuan itech Biblia noso makinuika tlanechikoltin. San ika, maski ipan panos yejuin, tokniuj kichiua nochi tlen ueli ika kinmachtia inkoneuan tlen melauak (Hech. 16:1; 2 Tim. 3:14, 15). Maski tokniuj kitlakaita tlen iueuentsin yokijto, kema uelis kinnojnotsas itech tlen kineltoka nochipa ijkuak uelis. Ijkon kinmachtis itech Jehová niman itech tlen tlanauatia (Hech. 4:19, 20). w17.10 14 párrs. 9, 10

Ken tikitaj, Jehová teikneliani. Tejuamej titlachijchiujtin ika itlachialis. Ika yejon, tiknekij oksekimej kuajli manemikan. Maski akin xkixmatij toTajtsin akin melauak, noijki teikneliaj (Gén. 1:27). Ipan Biblia tiknextiaj miyek neskayomej itech akin oteiknelijkej. Se neskayotl, matikimilnamikikan ome siuamej akin onotsajtsilijkej ixpan Salomón ika akinon melauak katka inan se konetsintli. Ijkuak tekiuaj otlanauati makitlajkotekikan, akin yemelak nantli sanoyej onajman niman hasta okinek makimakakan okse siuatl pampa xkinekiya makimiktikan (1 Rey. 3:23-27). Noijki matikilnamikikan tlen ipan opanok ichpoch Faraón. Ijkuak okinexti Moisés ipan atentli, okimat ika se inkonetsin hebreos niman ika xkipiaya kimakixtis. San ika, “yejua okikneli” niman okitlapejpeni kiskaltis kentla ikoneuj (Éx. 2:5, 6). w17.09 8, 9 párrs. 2, 3

Jehová kineki ika tinochimej tiitekitkauan matiyolyemankej. Tla ijkon tikchiuaj, tikseliskej miyek tlateochiualistin (Prov. 22:4) Se neskayotl, ijkon titlapaleuiyaj ika san sekan matinemikan niman maonia yolseuilistli ipan tlanechikojli. Noijki, Jehová techmakas iteiknelilis. Apóstol Pablo okijto: “Xmouikakan iuan oksekimej ikan yolyemanilistli pampa on Yektlajkuilojli kijtoua: Dios xkinselia on yejuan noueyimatkej, pero yejua kimpaleuiya ikan iteiknelilis on yejuan yolyemankej” (1 Ped. 5:5). Ipan yejuin tonajli, nemij akin kinemiliaj ika akin yolseujkej niman teijyouiyaj, nion xkojtikej. San ika, yejuin xmelauak. Yejuin kualtsitsintin kualneskayomej ualeuaj itech Jehová, akin melak kojtik ipan nochi tlaltikpaktli niman iluikak. Yejua akin kitemaka melak kuajli neskayotl itech yolseuilistli niman ijyouilistli. Yejuin tikitaj itech kenon ika iiluikaktekitkauan okinankili Abrahán niman Lot ijkuak miyek okitlajtoltijkej (Gén. 18:22-33; 19:18-21). Noijki, kanaj itech mil quinientos xiujtin, Jehová melak okijyoui kalpan Israel akin melak xtetlakamatiya (Ezeq. 33:11). w17.08 25 párrs. 13, 14

ToTajtsin techmakas yolseuilistli tla tikchiuaj teoyotl. San ika, itech “yolseuilistli” tlen techmaka toTajtsin, Pablo okijto ika “más ueyi de nochi kech se tlakatl uelis kajsikamatis”. Kuakon, kijtotoya ika “yolseuilistli” tlen techmaka toTajtsin melak ueyi ken nion xuelis tiknemiliskej. ¿Tlenon techmachtia yejuin? Ika maski kemantika xtikitaj kenon tikyektlaliskej se tlauejli, Jehová kema kita. Niman yejua uelis kichiuas tlen melak techmojkatlachialtis (2 Ped. 2:9). ¿Tlenon uelis tikchiuaskej niman ijkon xtikpoloskej “yolseuilistli” tlen techmaka toTajtsin ijkuak tikixnamikiskej tlaueltin? Tiktlajpiyaskej ken touikaj iuan Jehová. Tiuelij touikaj iuan Jehová ipampa Cristo Jesús, akin ika inemilis otechmakixti itech tlajtlakojli. Tlaxtlauijli okse tlen melak temojkatlachialti yokichiuj Jehová. Yejua kitekitiltia tlaxtlauijli ijkuak techtlapopoluilia totlajtlakoluan, niman yejuin techkauilia matikpiyakan kuajli totlamachilis niman iuan matouikakan (Juan 14:6; Sant. 4:8; 1 Ped. 3:21). w17.08 10 párr. 7; 12 párr. 15

Kemantika, san akin tlajyouiya kasikamati tlen kiyolkokoua, niman kanaj ouijtika tetomilis yejuin. Niman maski tla se kijtoua tlen kimachilia, kanaj oksekimej xuelis kasikamatiskej tlen kineki kijtos. Ipampa nochi yejuin, uelis ouijtika tikmatiskej tlenon tikimijliskej akin noyolkokouaj. Maski ijkon, miyekpa, melak titepaleuiskej tla tikchiuaj yejuin: “Xchokakan inuan on yejuan chokaj” (Rom. 12:15). Tla xueli tikijliaj itlaj ika totlajtol ijkuak iuan tinemij, kanaj xouijtika tikitaskej tikijkuilouiliskej se amatsintli, se correo ipan Internet, se mensaje de texto noso se amatlajkuilojli. Uelis tikteneuaskej se texto tlen teyolseuiya, tikijtoskej itlaj tlen kualtsin itech akin omik noso itlaj tlen kualtsin tikilnamikij itech. Noijki maka matikilkauakan kenon melak tepaleui tikchiuas teoyotl inpampa akin tlajyouiyaj niman tikchiuas teoyotl imiuan. w17.07 14, 15 párrs. 13-16

Akin yononamiktijkej kanaj kimachiliskej ouijtika nemiskej san sekan xijkon ken kinemiliayaj. Kanaj hasta uelis kipiyaskej uejueyimej tlaueltin. Uelis tlanemiliskej itech ken Jehová onouikak yeuejkaui iuan ikalpan Israel. Jehová okijto ika yejua kentla yeskia iueuentsin ikalpan (Is. 54:5; 62:4). Yejon kalpan miyekpa okiyolkoko Jehová. Ken nouikayaj onochiuj kentla ijkuak akin yononamiktijkej ouijtika ken nemij. San ika, Jehová xnimantsin onosiaujkauj iuan ikalpan. Yejua okintlapopolui miyekpa niman okichiuj tlen yokimijlikaj (Sal. 106:43-45). Tokniuan akin yononamiktijkej niman kitlasojtlaj Jehová kiyejyekouaj kixkopinaskej. Maski kipiyaj tlaueltin ipan innamiktilis, xkitejtemouaj matlami innamiktilis ika itlaj tlen xkijtoua Biblia. Yejuamej kimatij ika Jehová kita melak ueyi kijtosneki tlen onoijlikej kichiuaskej ijkuak ononamiktijkej niman kineki ika teueuentsin niman tesiuauj manosentlalikan. San ipampa auilnemilistli se akin yononamikti uelis kikauas ixnamik ixpan tekiuajkej niman uelis oksejpa nonamiktis (Mat. 19:5, 9). Ijkuak tokniuan kichiuaj nochi tlen uelij niman ijkon kuajli makisati innamiktilis, yejuamej kipaleuiyaj iueyitlayekanalis Jehová. w17.06 31 párrs. 17, 18

Satanás okichiuj manonemili ika Jehová xkinamiki matlayekana. Yejua kineki ika tlaltikpakchanejkej makinemilikan ika Jehová xkuajli tlayekana niman ika teteltilia tlen kuajli. Noijki okichiuj manasikamati ika tlaltikpakchanejkej melak yolpakiskiaj tla san yejuamej noyekanaskiaj (Gén. 3:1-4). Otetlanemililti ika tla tlaltikpakchanejkej kixnamikij tlajyouilistli, nochimej kikauaskej itlayekanalis Jehová (Job 2:4, 5). Jehová yokikauili mapanokan tonaltin niman ijkon nochimej makitakan ika tla xkinyekana toTajtsin tlaltikpakchanejkej melak xkuajli onkisaj. Kema, Jehová kimati ika tlen Satanás okijto xmelauak. Kuakon, ¿tleka yokikauili miyek tonaltin ika Satanás makiteititi tla yemelak tlen okijto? Pampa nochimej, ipan iluikak niman ipan tlaltikpaktli, noneki makitakan kenon nonankilis (Sal. 83:18). Adán niman Eva okimapeujkej itlayekanalis Jehová, niman miyekej oksekimej noijki ijkon yokichiujkej. Yejuin ueliskia kichiuas manonemili ika Satanás yemelak tlen okijto. w17.06 22, 23 párrs. 3, 4

Tekitl ika tikinmachtis oksekimej uelis mitsmachtis miyek. Se neskayotl, mitsmachtis xmochiua se kuajli tekitketl, kuajli manasikamati tlen tikteijlia, maka timomojtis itech tlen tikchiuas niman titetlakaitas ijkuak titenotsas (Prov. 21:5; 2 Tim. 2:24). Noijki, yejuin tekitl kichiua xyolpaki pampa mitspaleuis kuajli xkixmati tlen kijtoua Biblia itech tlen tikneltoka, niman timomachtis titekitis nisiuj iuan Jehová (1 Cor. 3:9). ¿Niman tla tichanti kampa xmiyekej kinekij mitskakiskej ijkuak titenojnotsa? Maski ijkon, titemachtis itech Biblia uelis kichiuas xyolpaki. ¿Tleka? Pampa tinochimej ipan tlanechikojli topaleuiyaj niman ijkon tikinnextiskej tlaltikpakchanejkej akin kipiyaj kuajli inyojlo. Maski san se tokniuj kinextis yakaj akin kinekis kikakis tlen melauak, tinochimej titlapaleuiyaj ijkuak notejtemouaj niman tinochimej tipakij. Se neskayotl se tokniuj itoka Brandon opanok chikome xiuitl tlapaleuijtoya ken precursor kampa xmiyekej kinekiyaj kikakiskej kuajli tlajtoltin itech tekiuajyotl. Yejua kijtoua: “Maski ok xakaj nikpaleuiya manoapolakti, oksekimej tokniuan kema. Melak nipaki pampa oniknemili niktekichiuilis chikauak toTajtsin ipan tekitl ika tikinmachtis oksekimej” (Ecl. 11:6). w17.07 23 párr. 7; 24 párrs. 9, 10

Ana kinekiya kinpiyas ikoneuan, san ika, xueliya. Niman okse isiuauj iueuentsin, Peniná, kema kinpiaya miyek ikoneuan (1 Sam. 1:4-6). Peniná kipijpinaujtiaya Ana nochi xiujtin ipampa yejon, niman kichiuaya xkuajli manomachili. Ana melak kiyolkokouaya yejon. Kuakon, yejua okichiuili teoyotl Jehová (1 Sam. 1:12). Yejua kuajli kimatiya ika Jehová uelis kimakaskia se ikoneuj noso kiyolseuiskia ika itlaj okse. Pampa tinochimej titlajtlakolejkej niman tinemij kampa Satanás tlayekana, ok tikpiyaskej tlajyouilistin (1 Juan 5:19). San ika, tikpiyaj tlen techpaleuiya. Uelis tikchiuiliskej teoyotl Jehová, akin “nochipa techyoltlalijtikaj” (2 Cor. 1:3). Yejuin tlen Ana okichiuj. Yejua okijli Jehová kenon yemelak nomachiliaya niman okitlatlaujti makipaleui. Noijki ijkon, ijkuak titlajyouijtoskej, xsan noneki tikijliskej Jehová tlenon techajmana. Noneki tiktlatlaujtiskej matechpaleui niman tikijliskej kenon yemelak tomachiliaj (Filip. 4:6, 7). w17.06 6 párrs. 10, 11

Jesús, akin yoyoliujka, kimatstoya ika inomachtijkauan Jesús nion se michin xokajsikej ijkuak omichtlajtlamajkej, kuakon okimijli: “‘Xkonchapanikan nemomatlau iyekmakopa on barco niman nenkimajsiskej michimej’. Ijki okichijkej niman kemaj xok ueliyaj kixtiayaj on inmatlau ne ijtik on atl pampa sanoyej miyek michin ijtik uajlaya” (Juan 21:1-6). Ipan yejon kualkan, Jesús okintlakualti inomachtijkauan ika pan niman michimej. Kuakon okonitak Simón Pedro niman okijli tlen kijtoua tlaxelojli tlen aman tikitstokej. Nesi ika Jesús kitlajtoltiaya Pedro tla kitlasojtlaya yejua niman tlen yotemachtijka xijkon ken itekiyo ika michtlajtlamas. Kuakon Pedro okinankili: “NoTeko, tejua tikmati ika nimitstlajsojtla” (Juan 21:15). Pedro onomachti yejuin: itlasojtlalis itech Cristo noneki melak ueyi makijtosneki xijkon ken itlasojtlalis itech itlaj okse. Ipan yejon tonajli ika tlayekapan, yejua okiteititi itlasojtlalis itech Cristo ijkuak nochipa melak onochikauj tenojnotsas niman miyek tekitl okichiuj ipan tlanechikojli. w17.05 21 párrs. 1, 2

Itlaneltokil Pablo itech Jehová okipaleui makixiko tlen okixnamik ipan inemilis. Maski Pablo okixnamik tlen ouijtika, yejua xkeman okipolo itlaneltokil itech Jehová. Yejua tlaneltokaya ika “Dios techyoltlalia ipan nochi on tlin techpajsoloua” (2 Cor. 1:3, 4). Teoyotl techpaleuiya kuajli matouikakan iuan Jehová (Sal. 86:3; 1 Tes. 5:17; Rom. 12:12). Ijkuak tikijliaj toTajtsin itech tlen yemelak tiknemiliaj niman tlen tikmachiliaj, tonisiuiyaj itech (Sal. 65:2). Noijki, totlasojtlalis itech Jehová ueyiya ijkuak tikitaj kenon kinankilia toteoyouan. Tejuamej titlaneltokaj ika “Jehová nisiuj nemi itech nochimej akin kinotsaj” (Sal. 145:18). Tikneltokaskej ika Jehová techtlasojtla niman techpaleuiya kichiuas matiuelikan tikixnamikiskej maski san tlenon tlauejli aman niman ika tlayekapan. w17.05 17 párr. 9; 18 párr. 10

¿Tlenon tikchiuaskia tla tlayekankej kijtoua manochiua itlaj tlen xtikasikamati noso xtikneki ijkon manochiua? Ijkuak panos itlaj ken yejuin, uelis notlatlatas totlaneltokil itech Jehová niman itech kenon kiyekana tlanechikojli ipan yejuin tonajli. ¿Kenon yolyemanilistli techpaleuis tla tikixnamikij itlaj ken yejon? Matikitakan ome. Kachtopa, tla tiyolyemankej, tikasikamatiskej ika xtikmatij nochi tlen panoua. Hasta ijkuak tiknemiliaj ika onka nochi tlen techititiaj ika tikmatij tlen panoua, san Jehová kimati tlen onka ipan iyojlo se tlaltikpakchane. Ijkuak tikilnamikiskej yejuin, matikselikan ika yolyemanilistli ika xnochi ueli tikmatij niman ika noneki tikpatlaskej ken titlanemiliaj. Ika ome, tla yotikitakej noso topan yonochiuj itlaj tlen xkinamiki, yolyemanilistli techpaleuis matitetlakamatikan, matikpiyakan ijyouilistli niman matitlamachiakan ika Jehová kiyektlalis tlen panotok. Biblia kijtoua: “Xkuajli onkisas akin kichiua tlen xkuajli, nion xuejkauis inemilis pampa san se tlaseuilyotl” (Ecl. 8:12, 13). Tla nochipa tiyolyemankej, melak techpaleuis tejuamej niman oksekimej (1 Ped. 5:5). w17.04 24 párrs. 10, 11

Kuajli tikmatij ika José okixiko tlen xkinamikiya. Yejua noijki kuajli okijto ika yejua xkipiaya tlajtlakojli itech tlen kitlajtlakoltiayaj. Ika yejon, okijli copero makinotsa itech yejua Faraón. ¿Tlenon kinekiya mapano? Yejua okijto: “Niman ijkon tinechkixtis nikan kampa nitsauktika” (Gén. 40:14). ¿Tikijtoskia ika xtlaj okiyejyeko kichiuas José itech tlen ipan nochiujtoya? Ka, xijkon. José kimatiya ika ipan yonochiujka miyek tlen xkinamiki. Ika yejon, yejua okijli copero tlen ipan nochiujtoya, pampa kinekiya ika yejon tlakatl makipaleui. San ika, Biblia xkijtoua tla José okimijli oksekimej, nion Faraón xokijli, ika ikniuan katkaj akin okichtejkej. Ika yejon, ijkuak ikniuan oajsikej Egipto niman iuan onoyolseuijkej, Faraón kuajli okinseli niman okinnots ika manochantikan Egipto niman mayolpakikan ipan tlajli (Gén. 45:16-20). w17.04 18 párr. 12; 19 párr. 13

Jehová noijki kinamiki matlayekana pampa kipiya tlaixmatilistli niman tlamachilistli tlen ika kitlajpiyas tlen yokichijchiuj. Yejuin tikitaj ijkuak okichiuj ika ikoneuj maueli kinpajtis akin kualouayaj tlen nion se tepajtiketl xueli kichiuaya (Mat. 4:23, 24; Mar. 5:25-29). Maski yejon tejuamej tikitaj ken milagros, Jehová xkita ken milagros. Pampa yejua kuajli kasikamati ken tekiti totlalnakayo niman uelis kipajtis maski san itech tlenon. Yejua noijki uelis oksejpa kinmakas innemilis akin yomijkej niman kiteltis tlen tlaixpoloua itech tlaltikpaktli. Satanás xuelis kuajkuis yolseuilistli ipan se país noso itech okseki países ipan tlaltikpaktli tlen kiyekana. San Jehová kipiya tlamachilistli niman ijkon kichiuas maonia yolseuilistli ipan tlaltikpaktli (Is. 2:3, 4; 54:13). Tomachiliaj ijkon ken Pablo, itlatitlankauj Cristo, ijkuak okijto tlajtoltin itech tlaxelojli tlen aman tikitstokej. w17.06 28 párrs. 6, 7

Miyekej tlaltikpakchanejkej ipan yejuin tonajli, xtlanemiliaj ken noneki itech namiktilistli. Yejuamej kinemiliaj ika tla xkuajli onkisa innamiktilis, uelis nokauaskej ixpan tekiuajkej. San ika, akin kichiuaj ken Cristo xijkon kitaj namiktilistli (1 Cor. 7:27). Yejuamej kasikamatij tlen okijtokej kichiuaskej ixpan toTajtsin. Tla yejuamej xkichiuaskej tlen yokijtokej, kentla kikajkayaujtoskiaj toTajtsin, niman yejua kintlauelita akin tlakajkayauaj (Lev. 19:12; Prov. 6:16-19). Jehová noijki kintlauelita akin kikajkayauaj imixnamik pampa kineki nokauaskej itech tekiuajkej (Mal. 2:13-16). Jesús otemachti ika Biblia kijtoua ika se san uelis tekauas tla ixnamik kikajkayaua iuan okse niman tla akin okikajkayaujkej xkineki kitlapopoluis ixnamik (Mat. 19:9; Heb. 13:4). ¿Aman tlenon uelis tikijtoskej itech ijkuak se noxeloua itech ixnamik? Biblia noijki techmelajkaijlia itech yejuin (1 Cor. 7:10, 11). Ipan Biblia xnoijtoua itlaj tlen makinkauili manoxelokan akin yononamiktijkej. San ika, kemantika kanaj uelis se akin kichiua ken Cristo kinemilis ika yemelak noneki noxelos itech ixnamik. Se neskayotl, sekimej kanaj kuajli kimatstoskej ika innemilis noso ken nouikaj iuan Jehová melak ijtlakauis tla ok nemij iuan ixnamik akin melak kiuisoki noso aman kixnamiki tlen melauak. w17.04 7, 8 párrs. 14-16