Septiembre

Tikimiskaltis mokoneuan itech “melajkatlalilistli de innemilis niman ikan machtilistli” tlen ualeua itech Jehová, se tekitl tlen melak ueyi kijtosneki tlen kipiya se tajtli akin kitekichiuilia toTajtsin (Sal. 127:3). Kokonej israelitas uajtlakatiyaj ipan se kalpan tlen yonosentemakaka itech toTajtsin. San ika, kokonej akin intajuan kichiuaj ken Cristo, xijkon inpan nochiua. Niman noijki, tiktlasojtlas Jehová niman tlen melauak xsan nopanoltia. Ipan tonajli ijkuak se konetsintli uajtlakati, ijkuakon tajtin noneki peuaskej kitejtemoskej kipaleuiskej manochiua inomachtijkauj Cristo, manosentemaka itech toTajtsin niman manoapolakti. Yejuin tlen melak ueyi kijtosneki. ¿Tleka? Pampa tla yejua nosentemaka, noapolaktia niman nochipa kitekichiuilia toTajtsin, yejon tlen kichiuas manomakixti ipan ueyi tlajyouilistli tlen inisiuj onka (Mat. 24:13). Tiknekij ika nochimej tajtin makimachilikan yejon pakilistli tlen tikmachilis ijkuak tikitas ika mokoneuj nosentemaka itech Jehová niman noapolaktia. w18.03 12 párrs. 16, 17

Tajtin niman tlayekankej noneki kixkopinaskej Jesús ijkuak temelajkatlaliskej ika Biblia. Tla ijkon kichiuaj, kiteititiaj ika kinekij ika Jehová niman Jesús makinyekanakan. Ijkuak tikseliaj ken techmelajkatlalia Jehová niman titemelajkatlaliaj ken yejua niman Jesús kichiuaj, tikseliaj miyek tlateochiualistin. Tikpiyaj yolseuilistli iuan tochanejkauan niman ipan tlanechikojli. Tinochimej tikmachiliaj ika techtlasojtlaj, techpatiokaitaj niman xtomojtiaj, yejuin san seki tlateochiualistin tlen tikpiyaskej tlayekapan (Sal. 72:7). Kuakon, uelis tikijtoskej ika ken techmelajkatlalia Jehová techmachtia kenon tinemiskej san sekan ika yolseuilistli ken se familia tlen yejua kitlajpiya (Is. 11:9). Tla xkeman tikilkauaj yejuin, uelis tikitaskej ken techmelajkatlalia Jehová ijkon ken kinamiki: ika Jehová techmelajkatlalia pampa techtlasojtla. w18.03 26 párr. 15; 27 párrs. 17, 19

Akin yayaj kampa Juan niman ijkon makinapolakti kichiuayaj pampa ijkon kiteititiayaj ika noyolkuepayaj ika xokitlakamatkej Tlanauatijli tlen okimakakej Moisés (Mat. 3:1-6). San ika, apolaktilistli tlen Juan okichiuj niman tlen melak ueyi okijtosnek, xijkon katka ken okseki. Yejua okipix ueyi tlateochiualistli pampa okiapolakti Jesús, ikoneuj toTajtsin ipan tlaltikpaktli (Mat. 3:13-17, TNM). Jesús xtlajtlakole katka, kuakon xnonekiya itech itlaj noyolkuepas (1 Ped. 2:22). Jesús onoapolakti pampa ijkon okiteititi ika yonoyektlalijka niman ijkon kitekitiltis inemilis ika kichiuas tlen toTajtsin kineki (Heb. 10:7). Ijkuak Jesús otenojnots ipan tlaltikpaktli, inomachtijkauan noijki oteapolaktijkej (Juan 3:22, TNM; 4:1, 2, TNM). ¿Tlenon kiteititiaya yejuin apolaktilistli? Sa no yejua tlen kiteititiaya apolaktilistli tlen Juan kichiuaya: ika tlaltikpakchanejkej yonoyolkuepkaj pampa xokitlakamatkej Tlanauatijli. San ika, sakin ika omik niman oyoliuj Jesús, inapolaktilis akin kinekiskiaj inomachtijkauan yeskej kijtosnekiskia itlaj melak tlamantik. w18.03 5 párrs. 6, 7

Akin noyekana ika iespíritu santo toTajtsin xijkon ken oksekimej. Melak kineki nouikas iuan toTajtsin niman kiyejyekoua kixkopinas (Efes. 5:1). Yejuin kijtosneki ika kiyejyekoua tlanemilis ken Jehová, niman kitas nochi ijkon ken yejua kita. Yejua kimati ika toTajtsin yemelak nemi niman kitlakaita itlanauatiluan ipan nochi tlen kichiua (Sal. 119:33; 143:10). Nokojtilia xkichiuas tlen kineki itlalnakayo niman kiyejyekoua kiteititis “itlakilyo espíritu santo” (Gál. 5:22, 23, TNM). w18.02 19 párrs. 3, 6

Daniel okuikakej Babilonia, se ueyi kalpan kampa melak kinueyichiuayaj tajtsitsintin niman kampa onkatka naualyotl. Niman babilonios xkintlakaitayaj judíos, kinpijpinaujtiayaj niman noijki kipijpinaujtiayaj inTajtsin, Jehová (Sal. 137:1, 3). Kanaj ijkon ken Daniel, judíos noijki melak kinyolkokouaya yejuin. Ipan Babilonia kimijliayaj tlenon nonekiya kikuaskej. Yejuin ouijtika okixnamik Daniel pampa yejua xkinekiya notsokuilos “ika kuajli itlakual tekiuaj” (Dan. 1:5-8, 14-17). Daniel okixnamik okse tlauejli. Pampa yejua melak miyek ueliya kichiuaya, okimakakej miyek tekitl tlen ueyi kijtosnekiyaj (Dan. 1:19, 20). Yejua ika, ueliskia noueyimatis niman nokuepas se tlakatl akin tlajtolkojtik. San ika, yejua xijkon okichiuj. Yejua nochipa yolyemanki katka niman kimatiya ika xnochi ueliya kichiuaya, niman nochipa okijto ika Jehová yejua akin kipaleuiaya (Dan. 2:30). Niman tikitaj ika Daniel ok telpochtli katka ijkuak Jehová okijto ika kinamikiya manoteneua ken se neskayotl itech melajkayotl ijkon ken Noé niman Job (Ezeq. 14:14). Kuajli nesi ika Jehová melak tlaneltokaya itech, pampa ipan nochi inemilis Daniel otlaneltokak niman otetlakamat. w18.02 5 párrs. 11, 12

Jesús kitaya tlen ika timoyolpaktis ijkon ken kinamiki. Yejua oyaj kampa nochiuaya “se tlanamiktilistli” niman noijki ipan “se ueyi iluitl” (Juan 2:1-10). Ijkuak otlan vino ipan yejon “tlanamiktilistli”, ika se milagro okichiuj ika atl manokuepa vino. Maski ijkon, Jesús xokikuik inemilis san ika noyolpaktis. Ipan inemilis okitlali kachtopa Jehová niman okichiuj nochi tlen ouel ika kinpaleuis oksekimej. Niman okinek mikis ken melak tekoko ipan se kojtli melaktik niman ijkon miyekej ueliskiaj makisaskej. Nochimej akin kinekiskiaj kichiuaskej tlen yejua okichiuj, okimijli: “Dios mechtiochiuas nemejuamej ijkuak on tlakamej mechuijuikaltiaj, niman mechkojkokoskej, niman mechteneuiliskej tlajtlamach tlen xmelauak san pampa nennechneltokaj. Ijkuak ijkon mechchiuiliskej, xpakikan niman xnemikan ikan paktli, pampa ne iluikak nenkiseliskej se ueyi tetlayokolijli” (Mat. 5:11, 12). Tla yemelak tiktlasojtlaj toTajtsin tikmapeuaskej tlen tikmatij ika xkuelita, san ika, noijki tlen tiknemiliaj ika uelis xkuelitas (Mat. 22:37, 38). w18.01 26 párrs. 16-18

¿Tleka tikmakaj Jehová tlen tikpiyaj? Pampa tiktlasojtlaj niman tiktlasojkamatij nochi tlen kichiua topampa. Toyojlo paki ijkuak titlanemiliaj ipan yejuin. Tomachiliaj ijkon ken tekiuaj David, yejua okijto ika nochi tlen tikpiyaj ualeua itech Jehová niman, ika yejon, nochi tlen tikmakaj ualeua itech tlen yejua yotechmakak (1 Crón. 29:11-14). Techpaleuiya ijkuak tikuelitaj tiktemakaskej niman xsan titlaseliskej. Se neskayotl, matiknemilikan ika se konetl kintlayokolia intajuan itlaj ika tomin tlen yejuamej kimakanij. ¿Xmelak ika melak kitlasojkamatiskej? Noso matitlanemilikan ipan se telpochtli akin precursor niman chanti iuan itajuan, yejua kinmaka tomin niman ijkon tlapaleuis ipan tlen nonekis ipan ichan. Tajtin kanaj xkichiaj makinmaka tomin, san ika, kanaj kiseliliaj pampa ijkon inkoneuj kimititia ika kitlasojkamati tlen yokichiujkej ipampa. Noijki ijkon, Jehová kimati ika techpaleuiya tla tikmakaj itech tlen patioj tikpiyaj. w18.01 18 párrs. 4, 6

Xsan noneki ika tajtin makimijlikan inkoneuan tlenon kuajli niman tlenon xkuajli. Melak kinpaleuis tla kintlajtlaniliaj matlanemilikan itech yejuin tlajtoltilistin: “¿Tleka Biblia kijtoua maka matikchiuakan itlaj tlen uelis tikuelitaskej? ¿Tlenon mitstlaneltokiltia ika itlanauatiluan Biblia nochipa mitspaleuiya?” (Is. 48:17, 18). Ijkuak se tekoneuj kijtoua ika kineki noapolaktis, itajuan kipiya kipaleuiskej matlanemili itech tlen noneki kichiuaskej akin yonoapolaktijkej. ¿Tlenon kinemilia itech tlen aman nonekis kichiuas? ¿Tlen tlateochiualistin kiselis? ¿Tlenon ouijtika kixnamikis? ¿Tleka tlateochiualistin tlen kiselis miyek yes xijkon ken tlen ouijtika kixnamikis? (Mar. 10:29, 30). Melak noneki ika tekoneuj matlanemili itech yejuin tlajtoltilistin achto noapolaktis. Tla tajtin kipaleuiyaj matlanemili itech yejuin tlemach, kipaleuiskej ikoneuj kuajli makimatsto ika kitlakamatis itlanauatiluan Biblia yejon tlen nochipa melak kuajli. w17.12 21 párrs. 14, 15

Miyekej nemotech, tokniuan akin timechtlasojtlaj, nenkipiyaj uejueyimej kokolistin. Oksekimej nenkintlajpiyaj nemochanejkauan akin iueuentsintin, maski nemejuamej noijki ininuejueyimej. Sekimej melak nemosiauitiaj nenkinmakaskej nemochanejkauan xtlen patioj, san tlen yemelak noneki. Niman tikmatij ika miyekej xkixnamikij san se itech yejuin tlaueltin, kemantika miyek san sekan kixnamikij. Tla toTajtsin najmana ipampa tlen okichijchiuj niman tlen nion xyoltika, ¿tlenon kimachilia motech, akin tiktekichiuilia pampa tiktlasojtla, niman xpampa ijkon omitschijchiuj? (Sal. 19:1, 3, 14). ToTaj, akin melak tiktlasojtlaj, kuajli mitsixmati. Jesús okijto: “Hasta on tsontli ipan nemotsontekon nochi onkaj tlapouajli cada sesentetl” (Mat. 10:30). Niman se akin okijkuilo salmos kijtoua: “Jehová kimatstika tlenon kixnamikij akin xkipiyaj tlajtlakojli” (Sal. 37:18). Nochi yejuin techititia ika yejua kixmati tlaueltin tlen tejua tikixnamiktika niman ika uelis mitsmakas kojtilistli tlen ika tikinxikos. w18.01 7 párr. 1; 8 párr. 4

Pampa Pedro okiyoliti Tabita “miyekej otlaneltokakej itech on toTeko”. Yejuin yenkuikej nomachtijkej ueliskiaj tenojnotsaskej itech toTeko Jesús niman itech ikojtilis Jehová tlen ueli kinyolitia mijkatsitsintin (Hech. 9:36-42). Matitlajtokan aman itech okse yoliuilistli tlen noijki okitakej miyekej tlaltikpakchanejkej. Se tonajli, ipan Troas, tlen aman nokaua itech noroeste de Turquía, apóstol Pablo tenojnotstoya hasta tlajkoyouan ipan se kajli. Eutico, se telpochtli akin kikaktoya niman yeuatoya ipan se ventana, okoch niman ouetsiko itech yejon kajli yeyi nepantik. Akin kachtopa itech oajsik kanaj Lucas, akin tepajtiketl katka. Yejua okijto ika telpochtli xsan okipolojka itlamachilis, ka, yomijka. Pablo otemok ipan escaleras, okinapalo itlalnakayo niman okimijli nochimej ika Eutico yoltoya. Yejon milagro kanaj melak okinmojkatlachialti akin okitakej. Kanaj noijki melak okinyolchikauj ijkuak okimatkej ika yejuamej okitakej se yoliuilistli (Hech. 20:7-12). w17.12 5 párrs. 10, 11

¿Yemelak ika tlaltikpakchanejkej kinyektlalijtokej tlaueltin tlen yeuejkaui inuan uajnoxixikotiuej? Kuajli nesi ika tlaltikpakchanejkej ok xuelij kinteltiaj guerras. Melak nochiua tlen xkuajli, miyekej tlachtekij ipan Internet, teuisokij niman temiktiaj. Miyekej mikij pampa kimajsi se kokolistli. Akin tlayekanaj ipan política niman akin kitaj kenon notekitiltia tomin, san intech yejuamej tlanemiliaj niman xuelij kipopolouaj guerras, tlen xkuajli, kokolistin nion mayantli. San itekiuajyo toTajtsin uelis kichiuas. Matikitakan tlen kichiuas Jehová ipampa tlaltikpakchanejkej. Guerras. Itekiuajyo toTajtsin kipopolos tlen kichiua mapeuakan: ueyimatilistli, tekajkayaualistli, tlasojtlalistli itech inkalpan, tlaneltokijli tlen xmelauak niman Satanás (Sal. 46:9). Tlen xkuajli. Itekiuajyo toTajtsin kichiujtika aman itlaj tlen nion se tlanauatijketl xuelis kichiuas: kinmachtis melak miyekej tlaltikpakchanejkej manoititikan tlasojtlalistli niman manoneltokakan (Is. 11:9). Kokolistin. Jehová kinteochiuas itekipanojkauan pampa xok keman kualoskej (Is. 35:5, 6). Mayantli. Jehová kipopolos yejuin, niman kichiuas ika ikalpan maka itlaj makipolo niman kuajli manemi itech itlaneltokil (Sal. 72:12, 13). w17.11 24 párrs. 14-16

Se tlen ika okintlalijkaj uejueyimej kalpamej kampa nopaleuiayaj, katka kintlajpiyas israelitas itech tlajtlakojli ipampa yestli. Jehová kitlasojtla nemilistli niman kintlauelita “matin tlen kitoyauaj iyesyo akin yolkuajli” (Prov. 6:16, 17). Pampa toTajtsin yolmelauak niman chipauak, yejua kitaya ken itlaj melak ueyi ijkuak yakaj kikuiliaya inemilis okse tlaltikpakchane, maski tla xkinekiya kimiktis. Escribas niman fariseos xkixkopinayaj Jehová. Kuajli nesiya ika xkitlakaitayaj innemilis oksekimej. Jesús okimijli: “Xnenkinkauiliaj on tlakamej ma kajsikamatikan on tlajtlamach ika Dios. Nemejuamej xnenkiseliaj on tlajtlamach niman xnenkinkauiliaj oksekimej kiseliskej” (Luc. 11:52). Yejuamej kipiaya kinpaleuiskej tlaltikpakchanejkej makasikamatikan iTlajtol toTajtsin niman makiselikan nemilistli tlen xkeman tlamis. San ika, xokichiujkej yejon, yejuamej xkitekauiliayaj makitokakan Cristo, akin “kitemaka yenkuik nemilistli” (Hech. 3:15). Ipampa yejuin tlen kichiuayaj, yejon tlaltikpakchanejkej ueliskiaj kipoloskiaj innemilis. Yejon tlayekankej akin san intech tlanemiliayaj niman noueyimatiyaj, nion achijtsin xkitlakaitayaj innemilis oksekimej nion ika kuajli manemikan. ¡Melak xteikneliayaj niman xkuakualtin katkaj! w17.11 15 párrs. 9, 10

Ijkuak opeuj tomachtiaj Biblia iuan iteixpantijkauan Jehová, kanaj xtlaj otikimijlikej tochanejkauan. San ika, ijkuak ochikauj totlaneltokil, otikitakej ika nonekiya tiyolchikaujkej yeskej niman tikimijliskej tlen tikneltokaj. Tla pampa timelajkanemij itech Jehová yokichiuj imiuan matikpiyakan tlauejli, matikyejyekokan tikasikamatiskej tlen kinemiliaj. Tinochimej melak otiyolpajkej ijkuak otikixmatkej tlen melauak itech Biblia. San ika, sekimej itech tochanejkauan kanaj kinemiliaj ika yotechkajkayaujkej noso ika tinemij ipan se secta. Kanaj uelis kinemiliskej ika xok tikintlasojtlaj pampa xok imiuan tiiluipanouaj. Kanaj yejuamej kinemiliaj ika toTajtsin techtlajtlakolmakas sakin tla yotimijkej. Kipiya ika tikyejyekoskej tikasikamatiskej tlen kinemiliaj niman kuajli tikinkakiskej niman ijkon tikmatiskej tlenon kintekipachoua (Prov. 20:5). Uelis tikchiuaskej tlen okijto apóstol Pablo, akin nokojtiliaya kimasikamatis nochimej tlaltikpakchanejkej pampa yejuin kikauiliaya kiminojnotsas itech iTlajtol toTajtsin. Tla noijki ijkon tikchiuaj uelis techpaleuis matikinnojnotsakan tochanejkauan itech tlen tikneltokaj (1 Cor. 9:19-23). w17.10 15 párrs. 11, 12

Kanaj tomojtiaj tokuikatiskej pampa xtikmatij kenon tikchiuaskej. Matikitakan seki tlen techpaleuis matikyektlalikan ken tokuikatiaj. Itlaj tlen techpaleuis chikauak matokuikatikan yejua tla kuajli tijyotiaj. Ijkon ken electricidad kichiua kuajli matlikui se foco, timijyotis noijki kichiua chikauak matitlajtokan niman matokuikatikan. Kinamikiskia ika ijkon ken chikauak titlajtouaj noijki ijkon matokuikatikan. Niman Biblia kimijlia itekipanojkauan toTajtsin matsajtsikan ika pakilistli ijkuak kikuikatiliaj tlakuikaltin (Sal. 33:1-3). Matikchiuakan yejuin: matiktlapejpenikan ipan toamox ika tlakuikaltin se tlakuikajli tlen tikuelitaj niman chikauak matikpouakan tlen ijkuiliujtika; sakin, matitijyotikan niman ika yejon tijyo chikauak matikijtokan tlajtoltin niman matikisatij; sakin, ijkon chikauak matokuikatikan ken yotikpoujkej (Is. 24:14). Totlajtol chikauak kakistis, niman yejon kuajli. Maka matechmojti nion matipinauikan. w17.11 5, 6 párrs. 11-13

Ipan yejon ueyak ojtli, judíos miyekpa okinemilijkej kenon yeskia Jerusalén, tlen yeskia yenkuik inchan. Yokitekakilijkaj ika yejuin kalpan melak kualtsin katka. Niman akin iuejueyimej yokitakaj kenon teopan melak temojkatlachialtiaya ken tlachijchiujtli katka (Esd. 3:12). Tla imiuan tokuepaskiaj, ¿kenon tomachiliskiaj ijkuak tikixmatiskiaj Jerusalén? ¿Techajmanaskia tikitaskej kenon kaltin yososolijkaj niman tentoyaj ika xiujtli? ¿Tiknemiliskiaj ika Babilonia kipiaya ome tepantli iyeualiujyan, niman ika itepanuan Jerusalén yoxoxotonkaj, xok kipiaya puertas nion torres? Maski ijkon, judíos xonoyolajmankej, pampa yokitakaj kenon Jehová okintlajpix ipan nochi ojtli. Ijkuak oajsikej kachtopa okichijchiujkej se tlaixpan kampa onkatka teopan. Ompa mojmostla opeuj kiuentlaliliaj Jehová (Esd. 3:1, 2). w17.10 26 párrs. 2, 3.

Kuajli tikmatij ika Salomón miyek ouel itech kenon yolchikauak katka itaj. David ika yolchikaualistli okixnamik uejkapantlakatl Goliat. Ika itlapaleuilis toTajtsin, David okitlan yejuin tlauisojketl san ika se petstik tetl (1 Sam. 17:45, 49, 50). Kuajli tikmatstokej ika David yejua kimelauaya kiyoleuas Salomón niman ijkon manoyolchikaua niman makichijchiua teopan. Jehová kipaleuiskia hasta ijkuak tlamiskia teopan. Salomón otlanemili itech tlen okijli itaj, niman xokikauili makitelti ipan itekiyo ika yejua san telpochtli katka niman xmiyek kimatiya. Yejua okipix yolchikaualistli niman otekichiuj, niman ika itlapaleuilis Jehová otlan yejuin melak kualtsin teopan ipan chikome xiujtin uan tlajko. Ijkon ken okipaleui Salomón, Jehová uelis techpaleuis matiyolchikaujkej niman matikchiuakan totekiyo tlen tikpiyaj itech tochanejkauan niman ipan tlanechikojli (Is. 41:10, 13). Tla tiktekichiuiliaj Jehová ika yolchikaualistli, uelis kuajli tikmatstoskej ika Jehová techteochiuas aman niman ika tlayekapan. w17.09 28 párr. 3; 29 párr. 4; 32 párrs. 20, 21

Akin tiktekichiuiliaj Jehová kuajli tikmatstokej ika “itlajtol Dios kipia nemilistli niman kipia poder”. Yotikitakej ika tlen techijlia toTajtsin ipan Biblia kipiya kojtilistli tlen ueli kipatla tonemilis niman innemilis oksekimej. Ijkuak ok xnomachtiayaj, sekimej tlachtekiyaj, kikuiyaj drogas noso auilnemiyaj. Oksekimej melak kimixmatstoyaj noso kipiayaj tomin, san ika, yejon xkinyolpaktiaya (Ecl. 2:3-11). Sakin, ikojtilis Biblia ouel okichiuj ika akin xkipiayaj se tlamachialistli makipiyakan, niman aman kimatij kenon nemiskej. Tikmatij ika yotechyolpakti tikamapouaskej ipan Amatl Tekakistilijketl itech innemilis sekimej tlen nesi ipan tlamachtiltin “La Biblia les cambió la vida”. Niman maski tla tiTeixpantijkauan noso ka, yotikitakej ika tinochimej techpoloua matechpaleui Biblia niman ijkon tikchikaujtiaskej ken touikaj iuan Jehová. w17.09 23 párr. 1

Tlen ipan onochiuj Lot techmachtia ika Jehová kixmati tlaueltin tlen kixnamikij akin itech yolmelaujkanemij (Is. 63:7-9; Sant. 5:11; 2 Ped. 2:9, TNM). Jehová noijki techmachtia ika noneki matiteiknelikan. Matitlanemilikan itech se tlanauatijli tlen okimakak kalpan Israel. Tla se israelita yakaj kitlaneujtiaya tomin, ueliskia kajsis se itlaken tlen kichiuaskia makikuepili tlen okitlaneujti (Éx. 22:26, 27). Ueliskia panos ika akin tetlaneujtiaya kinekiskia kinokauilis yejon tlakentli niman akin teuikilia xkipiyaskia tlen ika notlapachos ika yeuajli. Ika yejon, Jehová okinnauati israelitas mateiknelikan niman matekuepilikan tlakentli “ijkuak kalakis tonajli”. ¿Tlenon tiuelij itech tlajtolyekanalistli tlen ika onotlali yejuin tlanauatijli? Ika tla se tokniuj kipoloua itlaj niman itlaj uelis tikchiuaskej, matikpaleuikan (Col. 3:12; Sant. 2:15, 16; 1 Juan 3:17). w17.09 9 párrs. 4, 5

Jesús okitlajtlanili Jehová makintlapopolui akin kimiktitoyaj. Jesús oyaj yolseujki niman oteijyoui maski melak okitlajyouiltijkej. ¡Melak kuajli neskayotl otechmakak! (1 Ped. 2:21-23). ¿Kenon uelis tikteititiskej yolseuilistli niman ijyouilistli? Se ken uelis tikteititiskej, yejua ijkuak titetlapopoluiyaj. Pablo okimijkuilouili akin kichiuaj ken Cristo: “Nemejuamej xtenotsakan, niman xmoyolyemanilikan iuan oksekimej, niman xmotlapojpoluikan iuan oksekimej ijkon ken Dios omechtlapojpoluij itechkopa Cristo” (Efes. 4:32). Kuajli nesi ika noneki tiyolseujkej yeskej niman titeijyouiskej niman ijkon tiktlakamatiskej yejuin tlanauatijli. Ijkuak ijkon tikchiuaj, titlapaleuiyaj ika ipan totlanechikol san sekan matouikakan. Jehová technauatia matotlakentikan ika yolseuilistli niman ijyouilistli. Yejuin kualneskayomej melak noneki matikinpiyakan tla tiknekij tinemiskej ipan yenkuik tlaltikpaktli (Mat. 5:5; Sant. 1:21). Niman tlen melak kuajli, tla tikinpiyaj, tikueyichiuaskej Jehová niman tikinpaleuiskej oksekimej makitlakamatikan tlen temachtia Biblia (Gál. 6:1; 2 Tim. 2:24, 25). w17.08 25, 26 párrs. 15-17

Ipan Biblia miyekpa tiknextiaj neskayomej tlen teititiaj ika Jehová okichiuj tlen nion xnochiaya. Se neskayotl, ijkuak Ezequías tekiuaj katka, Senaquerib akin tekiuajtiya Asiria, okixnamik Judá niman okinotlatkiti miyek kalpamej, sa onokauj Jerusalén (2 Rey. 18:1-3, 13). Sakin, Senaquerib noijki okijli yejuin kalpan ika kixnamikiskia. ¿Tlenon okichiuj Ezequías? Okichiuili teoyotl Jehová niman okitlajtolti teotlajtoketl Isaías tlenon kichiuas (2 Rey. 19:5, 15-20). Noijki okitejtemo kenon kiyektlalis yejuin ika tlamachilistli, ika yejon, okitlaxtlauili Senaquerib tlen kitlajtlaniliaya (2 Rey. 18:14, 15). Sakin, Ezequías, okiyektlali ikalpan niman ijkon tlaxikos ijkuak uejkaujtipan kiyeualoskiaj (2 Crón. 32:2-4). ¿Kenon otlamito nochi? Jehová okuajtitlan se iluikaktekitketl akin okinmikti 185,000 isoldados Senaquerib san ipan se yeuajli. Nion Ezequías xkichiaya ika mapano itlaj ken yejuin (2 Rey. 19:35). w17.08 10 párr. 7; 11 párr. 12

¿Kenon uelis timoyektlalis niman ijkon chikauak tiktekichiuilis Jehová? Kachtopa, melak noneki xmochikaua tikpiyas kualneskayomej. Yejuin mitspaleuis melak kuajli xtekichiuili Jehová. Ika yejon, xmomachti itlajtol toTajtsin mojmostla, kuajli xtlanemili itech tlen kijtoua niman xmokojtili tikijtos tlen tikneltoka ijkuak titlanankilis ipan tlanechikojli. Ijkuak ok tinemis ipan kaltlamachtijli, uelis timomachtis niman tikyektlalis ken kuajli titenojnotsas. Xmomachti kenon tikteititis ika timajmana inpampa tlaltikpakchanejkej ijkuak tikintlajtoltis ika tlakaitalistli tlen kinemiliaj niman ika tijkakis ken mitsnankiliaj. Noijki uelis titlapaleuis ika tekitl ijkuak nochipaua niman noyektlalia Kajli kampa Tosentlaliaj. Jehová kuelita kintekitiltis akin yolyemankej niman kinektokej tlapaleuiskej (Sal. 110:3; Hech. 6:1-3). Pablo itlatitlankauj Cristo, okinots Timoteo manochiua misionero pampa “tokniuan [...] kuajli kitlakaitayaj” (Hech. 16:1-5). w17.07 23 párr. 7; 26 párr. 14

Tla tlaltikpakchanejkej noso iluikaktekitkej ok xkuajli kinankiliaj itech akinon kinamiki matlayekana, xuelis onias yolseuilistli nion xuelis nemilos san sekan. San ika, ijkuak noteititis ika san Jehová melauak kinamiki tlayekanas, nochimej nemiskej kualtsin niman ika nochipa itech itlayekanalis. Ipan tlaltikpaktli niman ipan iluikak onias yolseuilistli (Efes. 1:9, 10). Noteititis ika san Jehová melauak kinamiki tlayekanas, niman ika melak xkuajli ken tlayekanaj Satanás niman tlaltikpakchanejkej, ika yejon kinpopoloskej. Itlayekanalis toTajtsin melak kuajli onkisas ika itekiuajyo kampa Jesucristo tekiuajtis. Ijkuak ajsis yejon tonajli, noteititis ika tlaltikpakchanejkej yolmelaujkej ouelkej nochipa oyolmelaujkanenkej niman otlapaleuijkej ipan itlayekanalis toTajtsin (Is. 45:24). ¿Tikuelitaskiaj matechpouakan iuan akin yolmelaujkanemiskej? ¡Kema! Niman uelis tikchiuaskej yejon tla tikasikamatij ika melak ueyi kijtosneki manoteititi ika Jehová melauak kinamiki tlayekanas. w17.06 23 párrs. 4, 5

Pampa ken tomachiliaj xsan noijki, xnochimej san noijki uejkauij ika noyolkokouaj. Ika yejon, noneki matitepaleuikan maka san ijkuak kemach panoua, ijkuak miyekej inchanejkauan noso akin inuan nouikaj ompa nemij. Noijki noneki titepaleuiskej ijkuak yopanokej seki metstin ijkuak oksekimej yonokuepkej ipan intekiyouan. Kuakon tejuamej noneki titeyolseuiskej nochi kech uejkaujtipan nonekis (1 Tes. 3:7). Matikilnamikikan ika ajmantli uelis oksejpa kimachiliskej san katlejua tonajli. Yejuin uelis yes ipampa yejko tonajli ijkuak ononamikti, se tlakuikajli, se tlaixkopinajli, se tekitl tlen nochiua, hasta ika itlaj tlen ijnekuisti, tlen kakisti noso itech tonaltin tlen itlaj tetlalnamiktiaj. Akin kauajli yonokauj uelis yes melak ouijtika kichiuas itlaj sa iselti tlen kichiuaya iuan ixnamik, ken yas ipan se ueyi tlanechikojli noso ijkuak noilnamiki imikilis Cristo. Maka matikilkauakan ika xsan noneki titeyolchikauaskej ipan tonajli ijkuak itlaj teilnamiktia. w17.07 16 párrs. 17-19

Ijkuak tikchiuaj miyek tlen kuajli inpampa oksekimej, techpaleuiya matikilkauakan totlaueluan. Se neskayotl, miyekej tokniuan siuamej, yononamiktijkej noso ka, kimatij ika ijkuak tenojnotsaj kuajli tlajtoltin itech Tekiuajyotl, tekititokej iuan Jehová niman kichiuaj tlen yejua kineki. Yejuin kichiua mayolpakikan. Uelis tikijtoskej ika tinochimej uelis tikteititiskej ika tajmanaj inpampa oksekimej tla tikinnojnotsaj itech kuajli tlajtoltin. Niman ijkuak tikchiuaj tlen kuajli ipampa tokniuan, kichiua kuajli imiuan matouikakan. Yejon tlen Pablo, itlatitlankauj Cristo, okichiuj. Yejua okinpaleui oksekimej ken se “nantli yejuan kimiskaltia ikonetsitsiuan ikan tetlajsojtlalistli”. Pablo noijki okinyolseui niman okinyolchikauj ikniuan ken se “tajtli iuan ikoneuan” (1 Tes. 2:7, 11, 12). Kokonej akin yonomachtijkej kitlasojtlaskej Jehová uelis kinyolseuiskej niman kinyolchikauaskej inchanejkauan. ¿Kenon? Ijkuak kintlakaitaj intajuan niman tekitij chikauak ika kinpaleuiskej itech tlen noneki. Noijki ijkuak kokonej yolmelaujkanemij itech Jehová, yejuin kinyolchikaua nochimej inchanejkauan. w17.06 7 párrs. 13, 14; 8 párr. 17

Kuajli tikitaj ika melak miyekej tlaltikpakchanejkej xkipiyaj nion achijtsin tomin niman oksekimej kipiyaj tomin tlen ika kimiskaltiskej hasta ika okpa noso yexpa imixuiuan. Jesús kimatiya ika san iTekiuajyo toTajtsin ueliskia kipatlas ken notekitiltia tomin ipan yejuin tonajli. Ipan Apocalipsis 18:3, Biblia tlajtoua itech “tlasemankej”, tlen kineskayotiaj ken notekitiltia tomin niman xnochiua ika melajkayotl. Ken notekitiltia tomin, política niman tlaneltokijli tlen xmelauak nochi yejuin kiyekana Satanás. Itekipanojkauan toTajtsin xnemij ipan política nion itech tlaneltokijli tlen xmelauak. San ika, miyekej xuelij nochi kitlalkauiyaj ken notekitiltia tomin kampa Satanás tlayekana. Akin tikchiuaj ken Cristo noneki titlanemiliskej itech kenon tikitaj ken notekitiltia tomin. Matotlajtoltikan: “¿Kenon uelis nikteititis ika tlen nikpiya ika niyolmelaujkanemi itech toTajtsin? ¿Tlenon uelis nikchiuas niman ijkon niktlalkauis nochi kech niuelis ken notekitiltia tomin? ¿Tlenon neskayomej teititiaj ika akin tiktekichiuiliaj toTajtsin titlaneltokaj nochipa itech?”. w17.07 7, 8 párrs. 1-3

Jesús kimatiya ika ipan yejuin tonaltin oniaskia tlen techkuaajmanas, tikixnamikiskiaj tlen ouijtika niman miyek ajmantli. Ipan se neskayotl kampa Jesús okiteneuj se tokaketl, okijto ika sekimej tlaltikpakchanejkej kiseliskiaj “itlajtol Dios” niman kachtopa kinyolpajtiskia. San ika, sakin pampa “sa komatstokej ken ijki nopanoltiskej, niman sanoyej kinekij notomintiskej”, ueliskia “kelkaua[skej] itlajtol Dios”, niman xok kinyolpaktiskia (Mat. 13:19-22; Mar. 4:19). Tla xtotlajpiyaj, tlen techajmana mojmostla ipan tonemilis, uelis kichiuas maka kuajli matiktekichiuilikan Jehová. Ijkon ken Pedro, uelis tikteititiskej ika tiktlasojtlaj Cristo tla kachtopa tiktejtemouaj titenojnotsaskej ipan tonemilis. ¿Kenon uelis kuajli tikmatstoskej ika ijkon tikchiujtokej? Uelis totlajtoltiskej: “¿Nechyolpaktia niktekichiuilis Jehová? ¿Noso nechyolpaktia nikchiuas okseki tlemach?”. w17.05 22 párrs. 3, 4

Ijkuak “akin xchanejkej” chantij uejka itech oksekimej iteixpantijkauan Jehová akin tlajtouaj intlajtol, noneki nosentlaliskej ipan tlanechikojli ika tlajtojli tlen tlajtouaj kampa chantij aman (Sal. 146:9). San ika, tla onka se tlanechikojli ika intlajtol, akin tlayekana itech ichanejkauan noneki kitlapejpenis katlejua tlanechikojli melak kinpaleuis ichanejkauan. Achtopa kitlapejpenis tlenon nochiuas, yejua noneki kuajli tlanemilis niman kichiuas teoyotl itech yejon. Yejua noijki kipiya ika tlajtos iuan isiuauj niman ikoneuan (1 Cor. 11:3). Tajtin noneki tlanemiliskej itech tlen yemelak kinpoloua inkoneuan. Tla noneki ika tekoneuan kuajli makasikamatikan tlen melauak temachtia Biblia, xsan noneki kikakiskej seki horas tlamachtijli itech Biblia ipan tlanechikoltin nochi semanas. San ika, xtlanemili itech yejuin: ipan tlanechikoltin tlen nopanoltia ika tlajtojli tlen yejuamej kuajli kasikamatij, kokonej uelis kinpaleuis san ika ompa nemij, kanaj nomachtiskej miyek hasta ken nion xkinemiliaj intajuan. Yejuin xuelis ijkon panos ijkuak kokonej xkuajli kasikamatij se tlajtojli (1 Cor. 14:11). w17.05 11, 12 párrs. 10, 11

Tinochimej noneki matotlajtoltikan: “¿Nitlaneltoka niman niyolchikauak niman ijkon nikpaleuis Jehová ika nochi tlen nikpiya? ¿Niknemilijtika nias ipan okse ueyikalpan noso okse país niman ijkon melak niktlanis tomin niman melak kuajli ninemis? Tla kema, ¿nikchiuilijtika teoyotl Jehová ika manechititi kenon yejuin uelis kijtlakos nochanejkauan niman tlanechikojli?”. Jehová techititia ika techtlakaita ijkuak techkauilia matikpaleuikan itlayekanalis. Ipan itonaluan Adán niman Eva, Satanás opeuj kitejtemoua ika tlaltikpakchanejkej makixnamikikan Jehová. San ika, ijkuak tikpaleuiyaj itlayekanalis Jehová, kuajli tikititiaj Satanás ika tejuamej tinemij iuan toTajtsin. Totlaneltokil niman toyolmelaujkanemilis itech toTajtsin techyolmapeua ika matiknekikan totemakaskej ipan itekiyo toTajtsin, niman yejuin melak kiyolpaktia (Prov. 23:15, 16). Tla tejuamej tikpaleuiyaj niman tiktlakamatij ToTajtsin, yejuin kipaleuis ika kinankilis itlakajkayaualisuan Satanás (Prov. 27:11). Ijkuak tiktlakamatij Jehová, tikmakaj itlaj tlen melak kitlasojkaita niman kiyolpaktia. w17.04 32 párrs. 15, 16

Tlanauatijli tlen okimakakej Moisés, kijtoua ika tla se tlakatl kijlia Jehová itlaj kichiuas, “yejua xkipiya ika notlajtolkuepas. Yejua kipiya ika kichiuas nochi tlen yokijto kichiuas” (Núm. 30:2). Sakin Salomón okijkuilo tlen kijtoua tlaxelojli tlen aman tikitstokej. Jesús otemachti ika tikijlis toTajtsin itlaj tikchiuas melak ueyi kijtosneki ijkuak okijto: “Ma ka ijki tikauas on tlen tikprometeroua, yej xchiua on tlen ikan tlajtolpaleuilistli tikprometeroua itech toTeko [Jehová]” (Mat. 5:33). Kuajli nesi ika noneki tikitaskej ika melak ueyi kijtosneki ijkuak tikijliaj Jehová itlaj tikchiuaskej. Ken tikitaj, tlen tikijtouaj tikchiuaskej uelis kipaleuis noso kijtlakos ken touikaj iuan Jehová. David kuajli okijto yejuin ijkuak otetlajtolti: “¿Akinon uelis tlejkos ipan itepeuj Jehová, niman akinon uelis nokuiteuas kampa yejua itlachipaujkan?”. Kuakon yejua otlanankili ijkuak okijto ika Jehová kiselis nochi “akin xkitemaka itlajtol ika tlakajkayaualistli” (Sal. 24:3, 4). w17.04 4 párrs. 3, 4

Tla tiknemiliaj ika topan yonochiuj tlen xkinamiki ipan tlanechikojli, noneki melak kuajli matikitakan ika maka titlajtotinemiskej iuan oksekimej itech yejon. Kema melauak ika tla se tokniuj yokichiuj se ueyi tlajtlakojli, noneki tikimijliskej tlayekankej niman tikintlajtlaniliskej tlapaleuilistli (Lev. 5:1). San ika, miyekpa xse ueyi tlajtlakojli tlen nochiua. Ijkuak ijkon panos, uelis toyolseuiskej iuan tokniuj niman nion xnonekis tikijliskej yakaj okse tlen opanok, kanaj nion tlayekankej (Mat. 5:23, 24; 18:15). Matiyolmelaujkanemikan ijkuak ijkon topan nochiuas niman matikchiuakan tlajtolyekanalistin itech Biblia. Kanaj kemantika tikitaskej ika xkuajli otikasikamatkej tlen panotoya niman kanaj xmelauak topan onochiuj tlen xkinamiki. Kuakon tiktlasojkamatiskej ika xotikchiujkej maueyiya tlen panotoya, pampa xotikijtokej tlen xkuajli itech se tokniuj. Matikilnamikikan ika maski tla melauak tlen tikmatij noso ka, tikijtoskej itlaj tlen teyolkoko xkeman kiyektlalis tlen panotok. Tla xtijkauaj Jehová nion tokniuan, techpaleuis maka matopopolokan itech yejuin. w17.04 19 párr. 14