Octubre

Tlamachilistli ualeua itech Jehová, niman yejua kuelita kinmakas oksekimej. Se ken uelis tochiuaskej tlamachilisejkej yejua tla tijkakij ken techmelajkatlalia Jehová. Tlamachilistli techtlajpiya itech tlen xkuajli niman techpaleuiya machikaui ken iuan touikaj (Prov. 2:10-12). Yejuin kichiua ika matinemikan itech “itetlajsojtlalis Dios” niman matikchiatokan “yenkuik nemilistli para nochipa” (Jud. 21). Ipampa totlajtlakol, ken otechiskaltijkej niman okseki tlemach, kanaj uelis xtijkakisnekiskej ken techmelajkatlaliaj noso xtikitaskej ken itlaj tlen tepaleui. San ika, ijkuak tikitaj kenon techpaleuiya ipan tonemilis, kichiua matikpatiojkaitakan niman tikitaj ika ijkin ken toTajtsin techititia itlasojtlalis. Proverbios 3:11, 12 techijlia: “Xseli, nokoneuj, mamitsmelajkatlali Jehová”. Niman noijki kijtoua: “Pampa Jehová kinyektlalia akin kintlasojtla”. Maka keman tikilkauaskej ika Jehová kineki kuajli matinemikan (Heb. 12:5-11). Jehová melak kuajli techixmati, ika yejon, nochipa techmelajkatlalia ken kinamiki. w18.03 28 párrs. 1, 2

Pedro, itlatitlankauj Cristo, okintlajkuilouili akin chajchayajtinemiyaj “inyeualikan Ponto, Galacia, Capadocia, Asia niman Bitinia”. Yejuamej kixnamiktoyaj tlen Pedro okitokayoti “on tekokoj tetlatlatalistli”. ¿Tlenon kinpaleuiskia akin kichiuayaj ken Cristo ipan yejon ouijtika tonaltin? (1 Ped. 1:1; 4:4, 7, 12). Matikitakan ika Pedro kimijlia tokniuan tlakamej niman siuamej kuajli makinselikan “oksekimej”, kijtosneki akin ikimixmatstoyaj niman imiuan inosentlaliayaj. ¿Kenon kinpaleuiskia kichiuaskej tlen okimijlikej? Kinpaleuiskia san sekan manemikan. Aman matitlanemilikan totech. Ijkuak se tokniuj otechnots matiakan ichan, ¿xmelak ika ok tikilnamikij tlen kualtsin opanok? Niman, ijkuak tejuamej otiknotskej se tokniuj, ¿xmelak ika ochikauj ken iuan touikaj? Kuajli titeseliskej techpaleuiya kuajli matikimixmatikan tokniuan. Ipan tonaltin tlen onen Pedro, ijkuak ijtlakaujtiaya ken nemiyaj, melak nonekiya ika akin kichiuayaj ken Cristo san sekan manemikan. Aman noijki ijkon topan nochiua ipan yejuin “sa itlajtlankan on tonajli” (2 Tim. 3:1). w18.03 14, 15 párrs. 1-3

Biblia kijtoua ika akin noyekanaj ika iespíritu santo toTajtsin melak pakij. Romanos 8:6 kijtoua ika melak kuajli tla toyekanaj ika iespíritu santo toTajtsin. Kijtoua: “Tla tikomatstikaj on tlajtlamach yejuan motlalnakayo kineki, sa no yejua mitsmiktis, pero tla tikomatstikaj on tlajtlamach yejuan on Espíritu Santo kineki, sa no yejua mitsmakas nemilistli niman yolseuilistli”. Tla titlanemiliaj itech tlen toTajtsin kineki, tinemiskej ika toyojlo niman noijki tikpiyaskej yolseuilistli iuan toTajtsin, niman ika tlayekapan uelis tinemiskej nochipa. Kampa tinemij nochiua tlen xkuajli niman uelis techijtlakos. Techyeualouaj tlaltikpakchanejkej akin xtlanemiliaj ken toTajtsin. Ika yejon, noneki tokojtiliskej niman ijkon tiktlajpiyaskej ken titlanemiliaj. Ijkuak yakaj xok noyekana ika iespíritu santo toTajtsin, kikauilia ika yejuin xkuajli tlaltikpaktli makiueliti makichiua tlen xkuajli niman matlanemili itech tlen kineki itlalnakayo. Judas, inomachtijkauj Cristo, okijto ika sekimej hasta kipoloskiaj iespíritu santo toTajtsin (Jud. 18, 19). w18.02 19 párrs. 5, 7; 20 párr. 8

Miyekej tlapajtikej kinpaleuiyaj akin kipiyaj se kokolistli tlen uelis nomauas. Kichiuaj pampa kinekij kinpaleuiskej. San ika, tla xkinekij makinmauakan, noneki notlajpiyaskej. Noijki ijkon, miyekej itekipanojkauan Jehová tinemij niman titekitij iuan tlaltikpakchanejkej akin tlanemiliaj niman kichiuaj tlen kixnamiki kualneskayomej tlen ualeuaj itech toTajtsin. Tla xtiknekij matechmauakan, noneki kuajli totlajpiyaskej. Ipan yejuin itlamiyan tonaltin, tlaltikpakchanejkej xkintlakaitaj itlanauatiluan toTajtsin itech tlen kuajli noso tlen xkuajli. Ipan ika ome iamatlajkuilol tlen okititlanili Timoteo, apóstol Pablo okiteneuj kenon yeskiaj tlaltikpakchanejkej akin uejka nemij itech toTajtsin (2 Tim. 3:1-5). Maski melak xtikuelitaj yejuin tlen panoua, ueliskia peuas titlanemiliskej, titlajtoskej niman tikchiuaskej ken tlaltikpakchanejkej akin techyeualouaj (Prov. 13:20). Ika yejon, noneki totlajpiyaskej niman ijkon xtechmauas ken tlaltikpakchanejkej xkuajli nemij ijkuak tikinpaleuiskej oksekimej makixmatikan toTajtsin. w18.01 27 párrs. 1, 2

Ipan xiuitl 33, ijkuak Jesús yoyoliujka okinnotiti kanaj 500 tlakamej, siuamej niman kanaj hasta kokonej. Yejuin uelis yes yejon tonajli ijkuak okijto yejuin tlajtoltin (1 Cor. 15:6). Ijkon tej, nesi ika miyekej akin kitokayaj Jesús ompa nemiyaj ijkuak yejua otenauatij makinmachtikan tlaltikpakchanejkej. Noijki, okijto ika nochimej akin kinekiskiaj nochiuaskej inomachtijkauan nonekiya noapolaktiskej (Mat. 11:29, 30). Akin kinekiskiaj kiyolpaktiskej toTajtsin nonekiya kiseliskej tlen Jesús kichiua ipan tlen toTajtsin kineki manochiua. San ijkon ueliskiaj noapolaktiskej. San yejuin apolaktilistli kiseliskia toTajtsin. Biblia miyekpa techititia ika ipan kachtopa siglo, akin nochiuayaj inomachtijkauan Cristo kasikamatiyaj tlen kijtosnekiya apolaktilistli niman xuejkauiyaj ika kichiuayaj (Hech. 2:41; 9:18; 16:14, 15, 32, 33, TNM). w18.03 5 párr. 8

Ipan yejuin tonaltin, tinemij ipan se tlaltikpaktli kampa yoijtlakauj ken tlaltikpakchanejkej nouikaj niman ken tlaneltokaj ipampa Ueyixtika Babilonia, tlen kinyekana tlaneltokiltin xmelajkej, se “chanyotl para nochi tlajtlamach xkuajkualtin ajakamej” (Apoc. 18:2). San ika, tejuamej kentla xnikan tochan yeskia. Yejua ika, tejuamej noijki titlamantikej, niman tlaltikpakchanejkej techpijpinaujtiaj (Mar. 13:13). Kuakon, ijkon ken Daniel, matonisiuikan itech Jehová. Ijkuak itech titlaneltokaj niman tiktlakamatij ika yolyemanilistli, tejuamej noijki tochiuaj melak tlasojtikej ixpan Jehová (Ageo 2:7). Tajtin ueliskej nomachtiskej itech itajuan Daniel. ¿Kenon? Maski onkatka tlen melak xkuajli ipan Judea ijkuak Daniel ok konetl katka, Daniel okitlasojtlak toTajtsin. Kuajli tikitaj ika itajuan kuajli okimachtijkej (Prov. 22:6). Hasta itokayo Daniel, tlen kijtosneki “ToTajtsin yejua akin noteyolkuitijkauj”, kiteititia ika itajuan kitlasojtlayaj toTajtsin. Kuakon tajtin, ika ijyouilistli xkinmachtikan nemokoneuan itech Jehová. Maka xsiauikan (Efes. 6:4). Noijki, xchiuakan teoyotl imiuan niman inpampa. Ijkuak nemokojtiliaj nenkitlaliskej ipan inyojlo tlen melauak temachtia Biblia, Jehová melak mechteochiuas (Sal. 37:5). w18.02 5 párr. 12; 6 párrs. 14, 15

Okse tlen ika tikmakaj Jehová tlen tikpiyaj yejua pampa ijkon tikueyichiuaj. Ipan se tlatlachalistli, apóstol Juan okinkak itekipanojkauan toTajtsin ipan iluikak kijtouayaj: “ToTeko Dios, tejua mitsmelaua para tikselis ueyilistli, tetlakaitalistli, niman poder, pampa tejua nochi tlajtlamach otiktlalij niman ken tejua otiknek otikintlalij niman onokej” (Apoc. 4:11). Yemelak, Jehová kinamiki nochi ueyilistli niman tetlakaitalistli, ika yejon, noneki tikmakaskej tlen melak kuajli itech tlen tikpiyaj. Ipan itonaluan Israel, Jehová okinauati yejuin kalpan itechkopa Moisés makichiuakan yeyi iluitl ipan se xiuitl. Tlanauatijli kijtouaya: “Niman nion se xkipiya san mapijpilkatias ijkuak yas ixpan Jehová” (Deut. 16:16). Ken tikitaj, kimakaskej Jehová tlen kipiayaj ipan yejuin iluimej noijki ijkon kiueyichiuayaj. Amanin, tiktemakas niman xtikchias mamitskuepilikan noijki ijkon tikueyichiuaj Jehová. Ijkuak tikchiuaj, tikteititiaj ika tikpatiojkaitaj niman tikpaleuiyaj tekitl tlen kichiua ikalpan Jehová ipan tlaltikpaktli. w18.01 18 párrs. 4, 5

Jesús okimijli inomachtijkauan makichiuakan tlen kinnauatiaya. Sakin noijki okijto: “Temachtijli yejuan nejua nemechmaka xtepopoloj para nenkitlakamatiskej, niman on tlanauatijli yejuan nejua nemechmaka no xtepopoloj” (Mat. 11:29, 30). ¡Tlen okijto melauak ijkon! Kemantika, melak tisiaujtokej ijkuak tiauej tlanechikoltin niman tontenojnotsaj. San ika ¿xmelak ika ijkuak tiuajtokuepaj tochan tikmachiliaj melak tikojtikej niman ika otechmakak tlen ika tikixnamikiskej tlaueltin? Kuajli tikitaj ika tikchiuaskej tlen Jesús technauatia yemanki niman xouijtika tikchiuas. Matikitakan tlenon ipan onochiuj se tokniuj siuatl akin kipiya síndrome de fatiga crónica, melak najmana niman chikauak kikokoua itsontekon. Uelis tikasikamatiskej ika ipampa tlen kipiya kemantika ouijtika kita yas tlanechikoltin. San ika, se tonajli, sakin ika onochikauj yas tlanechikojli, okijkuilo: “Tlamachtijli tlajtouaya itech ijkuak tikmachilis ika xok tikpiya kojtilistli. Tokniuj okipanolti tlamachtijli ika yemanki tlajtojli niman melak teasikamatiya, ika yejon, hasta onexchokti. Onikasikamat ika nejua noneki ninemis ipan tlanechikoltin”. Yejuin tokniuj melak opak pampa onochikauj yas. w18.01 8, 9 párrs. 6, 7

¿Tlenon uelis kichiuaskej tajtin tla inkoneuj peua ometlamati itech itlaneltokil sakin ika onoapolakti? Se neskayotl, se telpokatl uelis peuas kiyoltilanas tlen onka ipan tlaltikpaktli noso peuas notlajtoltis tla kitlakamatis itlanauatiluan Biblia yejon tlen yemelak kuajli (Sal. 73:1, 3, 12, 13). Tajtin noneki kitaskej ika tlen kichiuaskej ijkuak panos yejuin, uelis kichiuas inkoneuj ok makitekichiuili Jehová noso ka. Maski tla inkoneuj itelpochtli noso ok pitentsin, kipiya kiyejyekoskej maka iuan nokualaniskej. Kipiya kuajli kimachiltiskej ika kitlasojtlaj niman ika kinekij kipaleuiskej. Kema, yejon telpokatl akin yonoapolakti yokijto kitlasojtlas niman kichiuas achtopa tlen Jehová kineki (Mar. 12:30). ToTajtsin kita melak ueyi kijtosneki yejuin tlen yakaj kijlia kichiuas, niman noijki noneki ijkon kitaskej akin yonosentemakakej itech (Ecl. 5:4, 5). w17.12 22 párrs. 16, 17

Ijkon ken Marta, itekipanojkauan Jehová akin yolmelaujkej katkaj kimatiyaj ika tlayekapan oniaskia se yoliuilistli. Isaac katka akin Abrahán youejkaujka ika kichiatoya, yejua kiseliskia nochi tlen iyaxka katka. Jehová okijli: “Xkajsi, nimitstlajtlanilia, mokoneuj, mosentekoneuj akin melak tiktlasojtla, Isaac, niman [...] xtemaka [...] ken se uentli tlen notlatia” (Gén. 22:2). Matiknemilikan kenon onomachili. Jehová yokijlika ika inpampa ikoneuan nochi kalpamej noteochiuaskiaj (Gén. 13:14-16; 18:18; Rom. 4:17, 18). Noijki, yokijlika ika yejon tlateochiualistli uajlaskia “itech Isaac” (Gén. 21:12). San ika ¿kenon nochiuaskia nochi tlen okijtoka tla Abrahán kiuentlaliaya Isaac? ToTajtsin okichiuj ika Pablo matechtomili ika Abrahán kineltokaya ika toTajtsin ueliskia kiyolitis ikoneuj (Heb. 11:17-19). Yejua xueliskia kimatis kemanon kiyolitiskiaj Isaac. San ika, kineltokaya ika Jehová oksejpa kimakaskia inemilis. w17.12 6 párrs. 12-14

Ijkon ken Pablo, tejuamej noijki kipiya ika tokojtiliskej tikitaskej nemilistli ken kita Jehová. Yejua “kineki para nochimej ma noyolpatlakan” (2 Ped. 3:9). ¿Tejua noijki tikneki yejuin? Tla tikyejyekouaj tikteititiskej teiknelilistli, chikauak titenojnotsaskej niman melak tiyolpakiskej. Okse ken tikteititiaj ika tikitaj nemilistli ken Jehová kita yejua ijkuak tiktlakamatij tlanauatiltin itech kenon totlajpiyaskej. Noneki kuajli matikitakan ika ijkuak tikinuikaskej carros niman ijkuak titekitiskej maka tokokoskej, niman noijki ijkuak titekitiskej kampa kalchijchiualo noso kampa tlayektlalilo, niman ijkuak tiaskej ipan se tlanechikojli noso ueyi tlanechikojli. Totlajpiyaskej niman kuajli tinemiskej, melak ueyi kijtosneki xijkon ken miyek tikchiuas, tomintsin noso nimantsin titlamis. ToTajtsin nochipa kichiua tlen kuajli niman tlen kinamiki, niman tejuamej tiknekij tiyeskej ijkon ken yejua. Tlayekankej akin kachtopa kipiya kuajli notlajpiyaskej niman noijki akin nemij inyeualiyan (Prov. 22:3). Ika yejon, tla se tlayekanketl techilnamiktia kenon noneki totlajpiyaskej, kipiya tijkakiskej (Gál. 6:1). Tla tikitaj nemilistli ijkon ken Jehová kita, xtikpiyaskej “tlajtlakojli ipampa yestli”. (Deut. 19:10). w17.11 16 párrs. 11, 12

Ijkon ken apóstol Pablo, tokniuan tlapejpeniltin ipan yejuin tonajli kichiaj kiseliskej se nemilistli ipan iluikak (Filip. 3:14, TNM). Melak kinekij nemiskej iuan Jesús ipan iTekiuajyo tlen onka iluikak niman san sekan kinpaleuiskej tlaltikpakchanejkej maka sa makipiyakan tlajtlakojli (Apoc. 20:6). ¡Melak kualtsin tlamachialistli yokinmakak Jehová! Okseki borreguitos kipiyaj okse tlamachialistli. Kichiaj kiseliskej nemilistli tlen xkeman tlamis ipan tlaltikpaktli, niman yejuin melak kinyolpaktia (2 Ped. 3:13). Pablo kinekiya kinpaleuis mamelajkanemikan ikniuan tlapejpeniltin niman makiselikan tlen kichiaj, ika yejon okimijli: “Xtlanemilikan itech on tlajtlamach yejuan onkaj ne iluikak” (Col. 3:2). Nonekiya nochipa kilnamiktoskej yejon kualtsin tlamachialistli ika kiseliskiaj nemilistli ipan iluikak (Col. 1:4, 5). Kuajli matikmatstokan ika titlanemiliskej itech tlateochiualistin tlen Jehová yokijto kinmakas itekipanojkauan, techpaleuis maka matikixtenpolokan tlen tikchiaj tikseliskej (1 Cor. 9:24). w17.11 25 párrs. 1, 2

Miyek tlakuikaltin itech Xkuikatili Jehová ika pakilistli ijkuiliujtokej kentla yeskiaj se teoyotl tlen tikchiuilijtoskiaj toTajtsin. Yejuin techkauilia matikijlikan tlen tikmachiliaj. Okseki tlakuikaltin kichiua matikinyoleuakan tokniuan matetlasojtlakan niman makichiuakan tlen kuajli (Heb. 10:24). Ika yejon, kinamiki kuajli matikixmatikan tlatsotsonajli, kenon tokuikatiskej niman tlen kijtouaj tlakuikaltin. Tla ipan tochan tomajmachtiaj tlakuikaltin, tiueliskej tokuikatiskej chikauak niman ika nochi toyojlo. Matikilnamikikan ika tokuikatiskej melak noneki itech ken tikueyichiuaj toTajtsin. Ijkin ueli kuajli tikititiaj Jehová ika tiktlasojtlaj niman tiktlasojkamachiliaj (Is. 12:5). Ijkuak tokuikatiaj ika pakilistli niman ika nochi toyojlo, tikinyolchikauaj oksekimej noijki ijkon makichiuakan. Tinochimej ipan tlanechikojli maski tla titelpokamej, tiuejueyimej noso kemach tomachtijtokej, uelis ijkin tikueyichiuaskej toTajtsin. Ika yejon, maka okpa matiknemilikan tijkuikatiliskej ika nochi toyojlo. Kema, ¡matijkuikatilikan Jehová ika pakilistli! w17.11 7 párrs. 18, 19

Ipan yejuin tonajli, miyekej akin kikauaj inchan ualeuaj ipan países kampa xnotekauilia manotenojnotsa. Pampa iteixpantijkauan Jehová tenojnotsaj ika chikaualistli, melak miyekej akin kikauaj inchan kemach kikaktokej “itlajtol Dios” (Mat. 13:19, 23). Miyekej akin melak najmantokej kinextiaj yolseuilistli niman kuajli nomachiliaj ipan tlanechikoltin niman totoka kijtouaj: “Dios melauak nemotsajlan nemi” (Mat. 11:28-30; 1 Cor. 14:25). Tejuamej noneki matitlamachilisejkej niman kuajli matikitakan kenon tikinnojnotsaj akin kikauaj inchan (Prov. 22:3). Matikpiyakan ijyouilistli ijkuak tijkakiskej tlen techijliaj, san ika, maka matitlajtokan itech política. Noneki matikchiuakan tlen techijliaj itech sucursal niman tekiuajkej. Tla ijkon tikchiuaj, nion tejuamej nion oksekimej xtikpiyaskej tlauejli. Pampa akin kikauaj inchan ualeuaj itech okse tlaneltokijli niman xsan noijki tlanemiliaj ken tejuamej, noneki tikixmatiskej niman tiktlakaitaskej ken nomachiliaj niman tlanemiliaj. Se neskayotl, sekimej tlaltikpakchanejkej ualeuaj ipan países kampa kitaj melak ueyi kijtosneki ken notlakentiaj siuamej. Kuakon ijkuak tikominnojnotsaskej, noneki totlakentiskej ika tlen xkichiuas xkuajli manomachilikan. w17.05 8 párrs. 17, 18

Uelis tiktlajtlaniliskej Jehová matechmaka iespíritu santo niman ijkon uelis tikinnojnotsaskej tochanejkauan akin xtlaneltokaj ika tlajtojli yemanki. Xkipiya ika tikyejyekoskej titlajtlatoskej itech nochi tlen xmelauak kineltokaj. Tla itlaj kijtouaj noso itlaj texchiuiliaj tlen techyolkokoua, uelis tikimixkopinaskej apóstoles. Pablo okijkuilo: “Ijkuak techuijuikaltiaj, tiktlajtlaniliaj Dios ma kintiochiua on yejuan techuijuikaltiaj. Niman ijkuak techtlauelitaj niman techtlajyouiltiaj, tejuamej tikimijyouiyaj. Ijkuak techteneuiliaj on tlen xkuajli, tikinnankiliaj ika tlajtojli yejuan yemanki” (1 Cor. 4:12, 13). Maski yemanki tlajtojli uelis techpaleuis matinemikan ika yolseuilistli iuan tochanejkauan, tla ika tonemilis tiktemakaj se kuajli neskayotl, yejuin uelis melak techpaleuis (1 Ped. 3:1, 2, 16). Tla tiktemakaj se kuajli neskayotl, uelis tikchiuaskej makitakan ika iteixpantijkauan Jehová yolpakij ipan innamiktilis, kintlajpiyaj ikoneuan, innemilis chipauak niman nemij ika inyojlo. Niman maski tla tochanejkauan xkeman nomachtiskiaj, uelis tiyolpakiskej pampa tikmatstoskej ika tikpaktiaj Jehová pampa itech tiyolmelaujkanemij. w17.10 15 párrs. 13, 14

Tiuelij tikasikamatij tleka amanin miyekej tlaltikpakchanejkej miyek kipatlaj ipan innemilis ijkuak nomachtiaj iTlajtol toTajtsin. Yejuin noijki opanok inuan akin kichiuayaj ken Cristo ipan kachtopa siglo, akin kipiayaj intlamachialis ika yaskej iluikak (1 Cor. 6:9-11). Apóstol Pablo okijto akinomej xkiseliskej iTekiuajyo toTajtsin, niman sakin okimijli ika sekimej intech yejuamej kichiuayaj “on ken on tlajtlakojli”. San ika, iTlajtol toTajtsin niman espíritu santo okinpaleui manopatlakan. Sekimej hasta ijkuak ikichiuayaj ken Cristo ueyi ken onopopolojkej niman okijtlakojkej ken nouikayaj iuan Jehová. Se neskayotl, Biblia tlajtoua itech se tlapejpenijli akin ononek kikixtiskej itech tlanechikojli. San ika, sakin okipatlak tlen nonekiya, niman oksejpa ouajnokuep tlanechikojli (1 Cor. 5:1-5, TNM; 2 Cor. 2:5-8). Techyolchikaua tikitaskej kenon miyekej tokniuan yonopatlakej ika itlapaleuilis iTlajtol toTajtsin. Kuajli tikmatij ika tiknekij kuajli tiktekitiltiskej. w17.09 23, 24 párrs. 2, 3

Itech Jehová ualeua tlasojtlalistli tlen ueyixtika (1 Juan 4:7). Yejuin tlasojtlalistli ualeua itech tlen melauak, niman Biblia kitekitiltia ika griego, tlajtojli agápe ijkuak kiteneua. Yejuin tlasojtlalistli xsan kijtosneki ijkuak tikmachilis yakaj tikneki, noijki noteititia ika tlen tikchiuaj inpampa oksekimej maski xtechpaleuiya tejuamej. Se diccionario techijlia ika yejuin tlasojtlalistli “san uelis noixmatis ipampa tlen kichiua manochiua”. Techyolpaktia niman kichiua matomachilikan ika toyojlo. Jehová okintlasojtlak tlaltikpakchanejkej maski ijkuak ok xkinchijchiuaya Adán niman Eva. Yejua okichijchiuj tlaltikpaktli niman ijkon manochiua tochan kampa nochipa tinemiskiaj niman makipiya xsan tlen ika tinemiskej, noijki maonia tlen ika melak tiyolpakiskej. Okichiuj nochi yejon niman ijkon matechpaleui, maski yejua xtlaj kitlani. Noijki, okiminmakak tlaltikpakchanejkej tlamachialistli ika ueliskej nemiskej nochipa ipan xochitlalpan. w17.10 7 párrs. 1, 2

Santiago noijki okijto: “Tla nenkichikoitaj se tlakatl iuan okse, nentlajtlakouaj” (Sant. 2:9). Tla tikintlasojtlaj oksekimej, kichiuas maka matiknemilikan tlen xkuajli itech oksekimej ipampa kech onomachtijkej, inraza noso ken kimitaj oksekimej. Xtitechikoitas xuelis san ika moxayak tikteititis, yejuin kipiya ika onias ipan tonemilis tlen yenkuik. Tlasojtlalistli noijki teijyouiya, yolkuajli niman xnoueyimati (1 Cor. 13:4). Ika yejon, noneki matikpiyakan yolseuilistli, matiktechiuilikan tlen kuajli niman matiyolyemankej, ijkon uelis tikinnojnotsaskej oksekimej itech Tekiuajyotl (Mat. 28:19, TNM). Yejuin kualneskayomej noijki techkauiliskej kuajli matouikakan iuan nochimej tokniuan ipan tlanechikojli. Tla tinochimej ijkin titetlasojtlaj, tlanechikoltin san sekan nemiskej niman kiueyichiuaskej Jehová. Noijki, oksekimej kinekiskej kixmatiskej tlen melauak. Ika yejon, ijkuak Biblia techtomilia itech yenkuik nemilistli ijkin ontlami: “Xmotlajsojtlakan iuan oksekimej, pampa on tetlajsojtlalistli kajxitia nochi in tlajtlamach” (Col. 3:14). w17.08 26 párrs. 18, 19

Noijki ijkon, tejuamej noijki matikimiknelikan akin xkixmatij toTajtsin, niman ok uelis noyolkuepaskej niman iuan nouikaskej. Jehová xkineki nion yakaj mapopoliui (2 Ped. 3:9). Ika yejon, aman ika ok ueli, matikimijlikan tlen panos nochimej tlaltikpakchanejkej niman ijkon uelis kiseliskej iteiknelilis toTajtsin. Noijki uelis tomachtiskej itech ineskayo Jesús. Ijkuak okitak ika tlaltikpakchanejkej akin kitokayaj katkaj kentla borreguitos akin okinkokojkej niman san yokinkaujkaj, ¿tlenon okichiuj? Okimikneli niman “opeu kinmachtia miyek tlajtlamach” (Mat. 9:36; Mar. 6:34). Jesús xijkon tlanemiliaya ken fariseos, akin xkinekiyaj kinpaleuiskej akin xuejueyixtoyaj (Mat. 12:9-14; 23:4; Juan 7:49). ¿Tikchiuaj ken Jesús niman yemelak tiknekij tikinpaleuiskej akin ok xkixmatij Jehová? w17.09 10 párrs. 6, 9

Ijkuak José tsauktoya Egipto, nion xkinemiliaya ika nokuepaskia ika ome akin melak ueyixtoskia ipan yejon país. Noijki xkinemiliaya tla Jehová kitekitiltiskia yejua niman ijkon kichiuaskia ika ichanejkauan maka mamikikan ika apistli (Gén. 40:15, nota; 41:39-43; 50:20). Melauak, Jehová okichiuj miyek okseki tlen José xkichiaya. Sara nion xkinemiliaya ika maski iueyi katka, Jehová kikauiliskia makipiya ikoneuj. Ijkuak otlakat Isaac, kanaj Sara nion xkeman okinemili ika panoskia (Gén. 21:1-3, 6, 7). Yejuin xkijtosneki matikchiakan ika Jehová makichiua se milagro niman ijkon makinpopolo totlaueluan aman ijkuak xiyejko yenkuik tlaltikpaktli. Noijki xtiktlajtlaniliaj makichiua itlaj tlen melak temojkatlachialti ipan tonemilis. San ika, tikmatij ika yeuejkaui toTajtsin okinpaleui ika tlen temojkatlachialti itekitkauan. Niman yejua xnopatla (Is. 43:10-12). Kuajli tikmatstokej ika yejua kichiuas nochi tlen nonekis niman ijkon techmakas kojtilistli tlen ika tikchiuaskej tlen kineki (2 Cor. 4:7-9). Kema, tla tiyolmelaujkanemij itech Jehová, yejua uelis techpaleuis matikixnamikikan tlen melak ouijtika. w17.08 11 párrs. 13, 14

Ijkuak chikauak tiktekichiuilia toTajtsin, uejkaujtipan tipanoua iuan oksekimej akin noijki chikauak kitekichiuiliaj toTajtsin. Yejuin mitspaleuis machikaui motlaneltokil. Miyekej yokitakej ika chikauak kitekichiuiliskej Jehová ijkuak telpokamej katkaj, yokinpaleui ipan innamiktilis. Miyekpa akin onochiujkej precursores ijkuak xinonamiktiayaj ok uelij kichiuaj iuan imixnamik ijkuak yononamiktijkej (Rom. 16:3, 4). Tlen tiknemiliaj tikchiuaskej teititia tlen tikpiyaj ipan toyojlo. Salmo 20:4 kijtoua itech Jehová: “Mamitsmaka yejua tlen kineki moyojlo niman makichiua kuajli xkisati itech nochi tlen tiknemilia tikchiuas”. Kuakon xnemili tlenon tikneki tikchiuas ika monemilis, itech tlen Jehová kichiujtika ipan yejuin tonajli niman itech tlenon uelis tikchiuas ipan itekiyo. Sakin xnemili tikchiuas tlen kiyolpaktia Jehová. Tiktekichiuilis nochi kech tiuelis toTajtsin kichiuas melak xyolpaki, pampa tijkuis monemilis ika tikueyichiuas. Kema, “xnexti kualtsin yolpakilistli itech Jehová, niman yejua mitsmakas tlen kineki moyojlo” (Sal. 37:4). w17.07 26 párrs. 15-18

Ijkuak yakaj kichiua se melak kuajli tekitl noso kiteititia se kualtsin kualneskayotl, kinamiki kuajli matlajtokan itech. Tla yejuin ijkon panoua iuan tlaltikpakchanejkej, kuakon ok melak kinamiki matikueyiteneuakan toTajtsin Jehová. Tejuamej uelis tikueyiteneuaskej ipampa ueyi ikojtilis, tlen nesi itech tlen kualtsin okichijchiuj, noso pampa teititia ika kintlasojtla tlaltikpakchanejkej, ken ijkuak okitemakak iKoneuj ken tlaxtlauijli. Tlajkuilojketl itech Salmo 147 melak kinekiya kiueyiteneuas Jehová. Niman noijki okinyolchikauj ika oksekimej makiueyiteneuakan toTajtsin iuan yejua (Sal. 147:7, 12). Xtikmatij akinon okijkuilo yejuin Salmo, san ika, akin okijkuilo nesi ika onen ijkuak Jehová okinkixti israelitas itech Babilonia niman oksejpa okinuajuikak Jerusalén (Sal. 147:2). Pampa ikalpan toTajtsin oksejpa kiueyichiuaskiaj kampa kinamiki, okichiuj ika salmista makineki kiueyiteneuas Jehová. ¿Tleka tejuamej noneki tikueyiteneuaskej Jehová ipan tonemilis? (Sal. 147:1; 104:35, nota). w17.07 17 párrs. 1-3

Jesús kimatiya ika miyekej inomachtijkauan noijki ouijtika yeskia kinextiskej tlen ika nopanoltiskej ipan yejuin tlaltikpaktli kampa xonka melajkayotl. ¿Tleka okijto Jesús ika “riquezas” katkaj “de yejua in tlaltikpaktli”? Biblia xkijtoua tleka, san ika, kema kuajli teititia ika ken notekitiltia tomin ipan yejuin tlaltikpaktli xyejon tlen kinekiya toTajtsin. ¿Tleka tikijtouaj yejuin? Pampa ipan xochitlalpan Edén Jehová okinmakak Adán niman Eva xsan tlen kinpolouaya, okinmakak miyek okseki (Gén. 2:15, 16). Noijki, ijkuak toTajtsin okinmakak iespíritu santo tlapejpeniltin ipan kachtopa siglo, “xakaj kijtouaya tla itlaj iyaxka katka on tlen kipiaya, yej nochi on tlajtlamach insepanyaxka katka” (Hech. 4:32). Teotlajtoketl Isaías yokijtoka ika yejkoskia tonajli ijkuak nochimej tlaltikpakchanejkej yolpakiskiaj itech tlen temakaskia tlajli (Is. 25:6-9; 65:21, 22). San ika, aman inomachtijkauan Jesús nonekiskia kipiyaskej tlamachilistli niman ijkon kinextiskej tlen ika nopanoltiskej ika “riquezas de yejua in tlaltikpaktli”, niman noijki, nonekiskia nochikauaskej kiyolpaktiskej toTajtsin (Luc. 16:8). w17.07 8 párrs. 4-6

Ipan amoxtli Job, se itech amoxtin tlen ika opeuj noijkuiloua Biblia, tikpouaj ika Satanás okijto ika tla Job melak tlajyouiskia kimapeuaskia toTajtsin. Niman Satanás hasta okijli toTajtsin makitlajyouilti Job. Jehová xokinek kichiuas yejon, san ika, yejua okikauili Satanás makitlatlata Job. Nimantsin, Job okipolo tlen kipiaya niman itekitkauan. Sakin omijkej majtlaktli ikoneuan. Satanás okichiuj manesi ika toTajtsin kichiuilijtoya Job tlen xkuajli (Job 1:13-19). Niman sakin, Satanás okichiuj ika Job makipiya se kokolistli tlen melak xkuajli niman tekoko (Job 2:7). Niman okichiuj itlaj tlen noijki melak xkuajli, isiuauj niman yeyimej tlakamej akin kijtouayaj iuan nouikaj okiyolkokojkej ika intlajtol niman okichiujkej maka kuajli manomachili (Job 2:9; 3:11; 16:2). ¿Melauak katka tlen okijto Satanás? Ka. Maski Job melak otlajyoui ika tlen xkuajli, xkeman okimapeuj Jehová (Job 27:5). w17.06 24 párrs. 9, 10

Ipan yejuin tonajli, noijki ijkon, Jehová yokinnauati akin tlayekanaj itech inchanejkauan ika makinmakakan tlen kinpoloua. Ika yejon, yejuamej noneki chikauak tekitiskej niman ijkon kichiuaskej yejuin. San ika, aman ipan sa itlamiyan tonaltin, tekitl uelis melak techkuaajmanas. Nemij miyekej tlaltikpakchanejkej akin kitejtemouaj tekitl. Ipampa yejuin, nochimej kichiuaj nochi tlen uelij ika kipiyaskej se tekitl. Miyekej kimachiliaj ika noneki tekitiskej miyek horas maski san achijtsin makintlaxtlauilikan. Empresas kiyejyekouaj kichiuaskej miyek tekitl ika achijtsitsintin tekitkej. Yejuin kichiua ika sekimej tekitkej manokuaajmanakan, melak masiauikan niman hasta makualokan. Miyekej kinajmana ika uelis kipoloskej intekiyo tla xkichiuaj ken kintlajtlaniliaj kampa tekitij. Akin tikchiuaj ken Cristo melak noneki maka keman tijkauaskej Jehová san ipampa totekiyo noso yakaj okse (Luc. 10:27). Totekiyo techpaleuiya matiknextikan tlen techpoloua niman techkauilia matiktekichiuilikan toTajtsin. San ika, tla xtotlajpiyaj, totekiyo uelis techtsakuilis matikueyichiuakan Jehová. w17.05 22, 23 párrs. 5-7

Kemantika, akin yenkuikej uelis techtlajtlaniliskej matikinpaleuikan ika kinmachtiskej inkoneuan itech Jehová. Ijkuak se tajtli techtlajtlanilia matomachtikan itech Biblia iuan ikoneuj, kuajli tla tikilnamikij ika xtechmakaj intekiyo ken tajtin (Efes. 6:1-4). Kemantika kanaj uelis tomachtiskej iuan se konetl akin itajuan xnomachtiaj itech Biblia. Ijkuak tomachtiskej iuan kokonej akin xtokoneuan, melak kuajli tla tomachtiaj ipan inchan ijkuak intajuan noso okse tokniuj, akin chikauak ipan itlaneltokil, ompa nemij noso matikchiuakan kampa uelis techitaskej. Ijkon xtikchiuaskej manasikamati itlaj tlen xkuajli. Ika tlayekapan, kanaj tajtin ueliskej kinmachtiskej inkoneuan itech Jehová. w17.06 8 párrs. 15, 16

Tla kokonej xnomachiliaj ijkon ken intajuan itech ken tlanemiliaj niman ken kichiuaj, kanaj xkinekiskej nomachtiskej tlajtojli tlen tlajtouaj intajuan niman intlaneltokil. Tajtin akin kichiuaj ken Cristo noneki kachtopa tlanemiliskej itech tlen kinpoloua inkoneuan niman maka san itech tlen yejuamej kinekij (1 Cor. 10:24). Se tokniuj itoka Samuel kijtoua: “Nejua iuan nosiuauj kuajli otikitakej ika tlen tlajtojli ueliskia ajsis tlen melauak ipan inyojlo tokoneuan, niman otiktlajtlanilijkej toTajtsin tlamachilistli. Ijkuak otikitakej ika yejuamej xueyi kinpaleuiaya tlanechikoltin ika totlajtol, otiknemilijkej tiaskej ipan tlanechikojli ika tlajtojli tlen tlajtouaj kampa tichantij aman. San sekan nochipa tiayaj tlanechikoltin niman tontenojnotsayaj. Noijki otikinnotskej tokniuan ipan yejon tlanechikojli touan matlakuakan niman mapaxialokan. Nochi yejuin okinpaleui tokoneuan kuajli makimixmatikan tokniuan niman makixmatikan Jehová, xsan ken inTajtsin, noijki ken akin kuajli iuan nouikaj. Otikitakej ika yejuin melak noneki xijkon ken kuajli makasimatikan totlajtol”. w17.05 12 párrs. 11-13

Sa achijtsin poliui ijkuak nochimej ipan tlaltikpaktli kinekiskej kipaleuiskej san itlayekanalis Jehová. ¡Melak tiknekij mayejko yejon tonajli! Tomachiliskej ken Débora niman Barac akin onokuikatijkej: “Ijkon mamikikan nochimej motlauelikniuan, Jehová, san ika, akin mitstlasojtlaj manochiuakan ijkon ken tonajli ijkuak uajkisa ika iueyilis” (Juec. 5:31). Yejon panos ijkuak Jehová kipopolos nochi tlen Satanás kiyekana. Ijkuak peuas Armagedón, Jehová xtechtlajtlanilis matikpaleuikan niman ijkon kinpopolos itlauelikniuan. Tejuamej san titlamachiaskej niman tikitaskej kenon Jehová techmakixtia (2 Crón. 20:17). San ika, ipan yejuin tonajli, kema uelis tikpaleuiskej itlayekanalis Jehová ika yolchikaualistli niman ika nochi toyojlo. Débora niman Barac opeuj kiueyiteneuaj Jehová, niman nion xse tlakatl, ipan se tlakuikajli ika otetlankej. Yejuamej onokuikatijkej: “Pampa kalpan onotemakak ika iyojlo tlapaleuis, ¡xueyiteneuakan Jehová!” (Juec. 5:1, 2). Noijki ijkon, ijkuak tiktekichiuiliaj Jehová ken yejua kineki, oksekimej noijki uelis kinyolchikauas makiueyiteneuakan Jehová. w17.04 32 párrs. 17, 18

Ipan 13 xiujtin ijkuak tlen xkinamiki ipan onochiuj José, okiteititi ika kitaya tlen panouaya ijkon ken Jehová kita (Gén. 45:5-8). Yejua xkeman okitlajtlakolti Jehová itech tlen ipan nochiujtoya. Kema, José xokilkauj tlajyouilistli tlen xkinamiki ipan onochiuj, san ika, yejuin xokichiuj maka mayolpaki. Okse tlen melak ueyi kijtosneki, yejua xokikauili ika intlajtlakol oksekimej niman tlen xkuajli okichiujkej makixelo itech Jehová. Pampa José oyolmelaujkanen, ouel okitak kenon Jehová okipopolo nochi tlen xkinamiki ipan nochiujtoya, okiteochiuj yejua niman ichanejkauan. Ijkon ken José, tejuamej noneki tiktlasojkaitaskej niman tiktlajpiyaskej ken touikaj iuan Jehová. Maka keman matijkauilikan ika intlajtlakoluan tokniuan matechxelo itech toTajtsin akin tikueyichiuaj niman tiktlasojtlaj (Rom. 8:38, 39). Tla tejuamej tikixnamikij itlaj tlen xkinamiki ipan tlanechikojli, matikchiuakan ijkon ken José niman melak matonisiuikan itech Jehová. Matikyejyekokan tikitaskej tlen panoua ijkon ken Jehová kita. Matikchiuakan nochi tlen tiuelij niman ijkon tikyektlaliskej tlauejli ika tlajtolyekanalistin itech Biblia. Niman sakin noneki matijkauilikan Jehová tlen panotok. Uelis titlaneltokaskej ika yejua kiyektlalis ken nonekis niman ijkuak kitas kuajli. w17.04 18 párr. 12; 19, 20 párrs. 15, 16

Ana okichiuj ijkon ken yokijlika Jehová. Yejua okuikili Elí, ueyi teopixki, ikoneuj Samuel ipan tabernáculo tlen onkatka ipan Siló niman okijto: “Itechkopa yejuin konetl onikchiuj teoyotl, niman Jehová onechmakak tlen oniktlajtlanili. Niman aman, nejua, niktlaneujtis Jehová. Nochi kech tonaltin nemis, nomaktilis itech Jehová” (1 Sam. 1:24-28). Kuakon ipan yejon tonajli ika tlayekapan, Samuel opeuj nemi ipan tabernáculo. Biblia kijtoua ika “telpokatsin Samuel onoskaltijtiaj ixpan Jehová” (1 Sam. 2:21). Ana okitak ouijtika kichiuas tlen yokijtoka. Yejuin kijtosnekiya ika yejua xueliskia iuan nemis ikoneuj akin melak kitlasojtlaya. Ana noijki xueliskia kitas kenon noskaltijtiaskia ikonetsin. San ika, yejua okitak melak ueyi kijtosnekiya kichiuas tlen yokijlika Jehová. Yejua ouel okichiuj tlen yokijlika toTajtsin pampa okinek kitemakas tlen kitlasojtlaya (1 Sam. 2:1, 2; Sal. 61:1, 5, 8). w17.04 5 párrs. 7, 8

Pablo, itlatitlankauj Cristo, okijto ika ipan san itlamiyan tonaltin yeskia “sanoyej xkuajli tonaltin”. Kuakon noijki okijto ika “xkuajkualtin tlakamej niman tlakajkayajkej tlakamej, inyojlo más ijtlakautias” (2 Tim. 3:2-5, 13). ¿Yotikitak ika panotika yejuin? Timiyekej yotitlajyouijkej inpampa yejon xkuakualtin tlaltikpakchanejkej, pampa kichiuaj tlen melak xkuajli, tetlaueltotokaj niman techikoitaj ika tlauejli. Sekimej nion xkiyakanaj tlen xkuajli kichiuaj. Oksekimej nesi ika kinekij kinpaleuiskej tlaltikpakchanejkej, san ika, yejon xmelauak, pampa san kinekij kinchiuiliskej tlen xkuajli. San ika, maski tla xtexchiuiliaj itlaj tlen xkuajli, kema techijtlakoua pampa nemij xkuakualtin tlaltikpakchanejkej. Melak xkuajli tomachiliaj ijkuak tijkakij kenon kintlayouiltiaj kokonej, ueuentsitsintin niman oksekimej akin xuelij nopaleuiyaj. Yejon xkuakualtin tlaltikpakchanejkej ika tlen kichiuaj nesi kentla yolkamej noso espíritus xkuakualtin (Sant. 3:15, TNM). San ika, melak teyolpakti pampa onka tlamachialistli tlen temaka iTlajtol toTajtsin. w17.04 11 párr. 4