Marzo

Kachtopa ome uejueyimej tlaxeloltin itech amoxtli Génesis kuajli techititiaj ika ipan Xochitlalpan xonkatka mayantli, mojkayotl nion tlajyouilistli. Adán niman Eva kipiayaj se tlamakaualistli tlen aman tlaltikpakchanejkej san kitemikij. Yejuamej xkipiayaj ika najmanaskej ipampa tlen kikuaskej, itech tekitl, itech kokolistli nion itech mikilistli (Gén. 1:27-29; 2:8, 9, 15). Itlaj tlen xnoneki tikilkauaskej yejua ika san Jehová kipiya tlamakaualistli itech nochi. Yejuin ijkon pampa yejua akin okichijchiuj nochi, akin nochi ueli kichiua niman akin Ueyixtika (1 Tim. 1:17; Apoc. 4:11). Ika yejon, akin yoltokej ipan iluikak niman tlaltikpaktli kipiyaj tlamakaualistli san itech seki tlemach. Noneki tikseliskej ika Jehová kipiya nochi tlanauatijkayotl ika kijtos hasta kanon toteltiskej, niman tlen kitlajtlani yejua yokitak ika noneki, melajki niman ueli nochiua. Niman yejon tlen okichiuj ijkuak opeuj kichijchiua nochi. w18.04 4 párrs. 4, 6

Ipan yejuin tlaltikpaktli tlen kiyekana Satanás, san Jehová uelis techpaleuis titlaxikoskej (2 Cor. 4:7, 8). San ika, matiknemilikan kenon kixnamikij tlauejli akin xnouikaj iuan toTajtsin. Ijkon ken Jesús, tikimikneliaj niman tikiminkakistiliaj kualtsin tlajtojli. Kuakon, matikinxikokan akin tikiminmachtiaj itech Biblia. Matikilnamikikan ika yejuamej kanaj xkeman kikakiyaj itlamachtiluan Biblia tlen tejuamej kuajli tikimixmatij. Noijki, miyekej kinemiliaj ika tlen kineltokaj kichiua ika san sekan manemikan imiuan ichanejkauan, kinpaleuiya kampa chantij niman ken chantij. Kachtopa kanaj nonekis tikpaleuiskej makipatiojkaita tlen temachtia Biblia niman sakin tiktlajtlaniliskej makikajkaua tlen kineltokaya. San ijkon uelis kipatlas tlen kineltokaya. Nochi yejuin, uelis uejkauis (Rom. 12:2). w19.03 22 párr. 10; 23 párrs. 12, 13

Ijkon ken Jehová okititi Jesús ika kitlasojtla niman okiyolchikauj, tejuamej noijki kipiya ika ijkon tikchiuaskej (Juan 5:20). Ijkuak yakaj akin tiktlakaitaj techititia ika techtlasojtla niman techijlia ika kuajli tlen yotikchiujkej, kuajli tomachiliaj. Tokniuan ipan tlanechikojli niman tochanejkauan noijki kinekij matikimititikan ika tikintlasojtlaj niman matikinyolchikauakan. Tla ijkon tikchiuaj, chikauis intlaneltokil niman melajkanemiskej itech Jehová. Melak noneki ika tajtin kuajli makinyolchikauakan inkoneuan niman makimititikan ika kintlasojtlaj. Ijkon kinpaleuiskej machikauikan. Ijkuak Jehová okijto “moka nipaktika”, yejua okiteititi kenon kuajli kimatstoya ika Jesús kichiuaskia tlen yejua kinekiya. Tla Jehová kuajli tlaneltokaya itech iKoneuj, tejuamej noijki uelis kuajli tikmatstoskej ika Jesús kichiuas nochi tlen Jehová yokijto (2 Cor. 1:20). Ijkuak titlanemiliaj itech Jesús, tiknekij tomachtiskej itech niman tikchiuaskej ken yejua (1 Ped. 2:21). w19.03 8 párr. 3; 9 párrs. 5, 6

Ijkuak yakaj techtlayokolia itlaj tlen ueyi kijtosneki, melak tiktlasojkamachiliaj. Noijki ijkon, Jehová okintlayokoli israelitas tlamakaualistli ijkuak okinkixti itech Egipto, kampa nemiyaj ken tlakeualtin. ¿Kenon okitakej tlen okiselijkej? San seki metstin sakin ika okinmakixtijkej, opeujkej melak kitejtemouaj tlen kikuayaj niman tlen koniyaj Egipto, niman opeujkej xkuajli tlajtouaj itech tlen Jehová kinmakaya. Hasta okijtokej ika kinekiyaj nokuepaskej Egipto. Yejuamej melak kipatiojkaitayaj michimej, xonakamej, pepinos, sandías, puerros niman ajos xijkon ken tlamakaualistli tlen kipiayaj ika kiueyichiuaskej Jehová. Xtechmojkatlachialtia ika Jehová sajnoye okualan (Núm. 11:5, 6, 10; 14:3, 4). Itech yejuin tiuelij itlaj tlen melak ueyi kijtosneki. Apóstol Pablo okinyolchikauj nochimej akin kichiuaj ken Cristo makipatiojkaitakan tlamakaualistli tlen Jehová otechmakak itechkopa iKoneuj, Jesucristo (2 Cor. 6:1). w18.04 9, 10 párrs. 6, 7

Tinochimej tiknekij tikmachiliskej ika techtlasojtlaj niman ika kichiuaj totech tlen melajki. Ijkuak miyekpa techititiaj ika xtechtlasojtlaj niman texchiuiliaj tlen xmelajki, kanaj tajmanaskej niman tiknemiliskej ika xitlaj ika titepaleuiyaj. Jehová kimatstika ika tinochimej tiknekij matechtlasojtlakan niman matexchiuilikan tlen melajki (Sal. 33:5). Uelis kuajli tikmatstoskej ika Jehová melak techtlasojtla niman kineki matexchiuilikan tlen melajki. Ijkon tikitaj ipan tlanauatijli tlen Jehová okinmakak israelitas. Ijkuak tomachtiaj Tlanauatijli tlen okimakakej Moisés, tikitaj kenon toTajtsin melak techtlasojtla (Rom. 13:8-10). Uelis tikijtoskej ika Tlanauatijli tlen okimakakej Moisés kiteititiaya tlasojtlalistli pampa Jehová nochi kichiua ika tlasojtlalistli (1 Juan 4:8). Nochi tlanauatiltin tlen Jehová okitemakak kiteititiaya yejuin ome: tiktlasojtlas toTajtsin niman oksekimej (Lev. 19:18; Deut. 6:5; Mat. 22:36-40). Yejon ipantsin 600 tlanauatiltin kiteititiaj kenon Jehová techtlasojtla. w19.02 20, 21 párrs. 1-4

Job nochipa okitlajpix kenon imiuan nouikas siuamej (Job 31:1). Yejua kimatstoya ika xkuajli tla kiteititia ika kineki se siuatl akin xisiuauj. Ipan yejuin tonajli, melak miyek onka tlen ika techtlatlataj pampa kinekij matiauilnemikan. ¿Tikchiuaskej ken Job niman xtiknekiskej se siuatl akin xtoixnamik? ¿Tiknekiskej tikinmapeuaskej tlaixkopinaltin tsokuiltikej noso pornografía? (Mat. 5:28). Tla mojmostla kuajli toyekanaj, tiknekiskej tiyolmelajkanemiskej. Job noijki okitlakamat Jehová itech ken kitaya tlen kipiaya. Okijto ika tla nopaleuiya san itech tlen kipiya, melak xkuajli hasta nonekiskia makitlajtlakolmakakan jueces (Job 31:24, 25, 28). Ipan yejuin tonajli, miyekej kinekij notomintiskej niman kipiyaskej miyek tlemach. Tla kuajli titlanemiliaj itech tomintsin niman tlen uelis tikpiyaskej, ijkon ken Biblia techijlia matikchiuakan, techpaleuis matiknekikan matiyolmelajkanemikan (Prov. 30:8, 9; Mat. 6:19, 20). w19.02 6 párrs. 13, 14

Itech nochi tlen Jesús okichiuj, kuajli okiteititi kenon Jehová melak techtlasojtla (1 Juan 4:8, 9; 1 Juan 4:10, TNM). Niman yejuin tlasojtlalistli okiyolmapeuj makitemaka inemilis topampa. Tla titlapejpeniltin noso “oksekimej borregos”, uelis techpaleuis tlasojtlalistli tlen Jehová niman iKoneuj yotechititijkej ipampa imikilis Jesús (Juan 10:16; 1 Juan 2:2). Matikitakan noijki kenon ones ika Jesús okintlasojtlak niman okimasikamat inomachtijkauan ijkuak okipanoltijkej iTlakualis toTeko. Ken yotikitakej, Jesús xokinnauatij inomachtijkauan tlapejpeniltin makilnamikikan iTlakualis toTeko ika tlen melak ouijtika, okimititi ika xmiyek nonekiya. Nochi xiuitl, yononek makilnamikikan imikilis Cristo, maski san kanon noso kenon manemikan, kemantika hasta kampa tsauktokej (Apoc. 2:10). ¿Youelkej yokitlakamatkej tlen otlanauati Jesús? Kema. Akin yemelak kichiuaj ken Cristo, nochipa kilnamikij imikilis Jesús niman xkikajkauaj kichiuaj. w19.01 24 párrs. 13-15

“On tlen melauak” yotechmanaui noso yotechmakixti, yokichiuj ika maka matinemikan ipan tlaneltokijli tlen xmelauak, aman xok tiixtlapachiujtokej niman xok tikneltokaj tlen miyekej kineltokaj. Niman xsan yejon. Ika tlayekapan noijki tikpiyas yejon kualtsin tlamakaualistli tlen kipiyaskej ikoneuan toTajtsin (Rom. 8:21). San ika, hasta amantsin uelis tiyolpakis itech yejon tlamakaualistli tlen tikpiya. ¿Kenon? Tla timelajkanemi ipan tlen mitsijlia Cristo noso tla tiktlakamati itlamachtiluan (Juan 8:31). Ijkon tikixmatis tlen melauak, niman xsan pampa timomachtis yejon, tikixmatis pampa tikchiujtos ipan monemilis. Ipan yejuin tlaltikpaktli, tlen kitokayotiaj “kuajli nemilistli” nion xuejkaui. Xakaj kimati tlenon panos mostla (Sant. 4:13, 14). Ika yejon, melak kuajli tla nochipa tinejnemij ipan yejon ojtli tlen kitemaka “on yejuan melauak nemilistli”, nemilistli tlen xkeman tlamis (1 Tim. 6:19). Melauak, toTajtsin xtexchiualtia ompa matinejnemikan. Toseselti noneki tikijtoskej tla ompa tiaskej. Kuakon, xchiua ika Jehová manochiua motetlayokolil (Sal. 16:5). Xpatiojkaita nochi tlen kuajli mitsmaka (Sal. 103:5). Niman kuajli xmatsto ika yejua kichiuas xnemi ika moyojlo niman kichiuas nochipa xpiya pakilistli (Sal. 16:11). w18.12 28 párrs. 19, 21

Tinochimej akin tikchiuaj ken Cristo noneki tikpatiojkaitaskej namiktilistli, ijkon ken Jehová niman Jesús. San ika, kemantika sekimej xijkon kichiuaj pampa titlajtlakolejkej (Rom. 7:18-23). Yejua ika, xkipiya ika techmojkatlachialtis ika sekimej akin kichiuayaj ken Cristo ipan kachtopa siglo okipixkej tlaueltin. Pablo okijkuilo ika “on siuatl ma ka ma nokakaua noso noxotoni iuan iueuentsin”, san ika, sekimej xijkon okichiujkej (1 Cor. 7:10). Pablo xokijto tleka sekimej onoxelojkaj. Tikmatstokej ika teueuentsin xoauilnen, pampa tla ijkon yeskia, tesiuauj ueliskia kikauas niman ueliskia oksejpa nonamiktis. Pablo okijkuilo ika tesiuauj akin yonoxelojka xnonekiya nonamiktis iuan okse tlakatl, niman tla ueli “ma noyoltlali iuan iueuentsin”. Ixpan inTajtsin “on omemej” ok san sekan nemiyaj. Pablo okimijli akin yononamiktijkej ika tla xakaj oauilnen, manotlapopoluikan maski san katlejua tlauejli makixnamiktokan. Akin yononamiktijkej ueliskiaj kimijliskej tlayekankej makinpaleuikan. w18.12 13 párrs. 14, 15

Ipan yejuin tonaltin, Jehová kineki iuan matouikakan niman kineki chikauak matitenojnotsakan (Mat. 28:19, 20, TNM; Sant. 4:8). Yakaj kanaj techijlis matijkajkauakan ika titenojnotsaj. Se neskayotl, matiknemilikan ika akin itech titekitij techmakasneki se ueyi tekitl niman melak kuajli techtlaxtlauilis. San ika, aman yejon tekitl xtechkauilis kuajli matiktekichiuilikan Jehová. Noso tla titelpochtli, xnemili ika mitsijliaj ika mitspaleuiskej niman ijkon uelis timomachtis, san ika, nonekis oksekan tonchantis. ¿Hasta ijkuakon nonekis tiktejtemos itlayekanalis Jehová, noso tikitas tlenon kijtouaj toamatlajkuiloluan niman ijkon tikitas tlenon tikchiuas? ¿Xkuajli yeskia tla amantsin tiktejtemoua tlenon kinemilia Jehová niman timokojtilia titlanemilis ken yejua? Tla ijkon tikchiuaj, xouijtika tikmatiskej tlenon tikchiuaskej tla kemantika tikixnamikij yejuin. Kuajli tikmatstoskej tlenon tiknekij tikchiuaskej ipan itekiyo Jehová niman xitlaj tijkauiliskej matechtsakuili. Tikchiuaskej tlen itikmatstoskej ika kuajli. w18.11 27 párr. 18

Salomón melak telpochtli katka ijkuak onochiuj tekiuaj ipan kalpan Israel. Ijkuak opeuj tekiuajti, Jehová okinojtiti ipan se temiktli niman okijli: “Xtlajtlani tlen tikuelitaskia manimitsmaka”. Salomón okijli ika yejua san telpochtli katka akin xitlaj kimatiya, kuakon, okitlajtlanili makimaka se iyojlo tlen matetlakamati (1 Rey. 3:5-10). Pampa okitlajtlan yejon, okiteititi ika kimatiya ika xnochi ueliya kichiuaya. Yejua ika, xtikmojkaitaj tleka Jehová melak okitlasojtlak (2 Sam. 12:24). Pampa Jehová melak okuelkak tlen okitlajtlan Salomón, okimakak se iyojlo tlen tlamachilise niman tetlakamati (1 Rey. 3:12). Ijkuak Salomón oyolmelajkanen, nochipa okiseli miyek tlateochiualistin. Yejua okichijchiuili “itoka Jehová” se teopan (1 Rey. 8:20). Melak miyekej okixmatkej pampa kipiaya ueyi tlamachilistli tlen toTajtsin okimakak. Niman ika iespíritu santo toTajtsin okijkuilo yeyi amoxtli itech Biblia, niman se itech yejuin katka, Proverbios. w19.01 14 párrs. 1, 2

Sekimej xkinekij ika yakaj makiyekana ken tlanemiliaj. Yejuamej kijtouaj: “Xnikneki yakaj nopampa matlanemili”. Kanaj kinemiliaj ika san yejuamej kitlapejpeniaj tlen kichiuaj, niman yejon xkijtosneki tla xkuajli. Yejuamej xkinekij makinyekanakan niman xkinekij makinchiualtikan manochiuakan ken oksekimej. Uelis kuajli tikmatstoskej ika titlanemiliskej ken Jehová xkijtosneki ika tejuamej xok uelis itlaj tiknemiliskej. Ken kijtoua 2 Corintios 3:17 itech Traducción del Nuevo Mundo, “kampa onka iespíritu Jehová, onka tlamakaualistli”. Jehová techkauilia matiktlapejpenikan kenon tiyeskej, uelis tikijtoskej tlenon tikuelitaj niman tiktlapejpeniskej tlen tikitaj techpaleuis. Ijkon otexchijchiuj toTajtsin. San ika, yejuin xkijtosneki ika uelis tikchiuaskej nochi tlen tiknekiskej (1 Ped. 2:16). Jehová kineki matoyekanakan ika iTlajtol ijkuak nonekis tikitaskej tla itlaj kuajli noso xkuajli. w18.11 19 párrs. 5, 6

Ijkuak otiuelkej tlen melauak, otikasikamatkej ika melak ueyi kijtosneki tiktekichiuilis Jehová xijkon ken yejon tlen ueliskiaj tikpiyaskej. Ika toyojlo otiknejkej tijkauaskej seki tlemach niman ijkon tinejnemiskej ipan tlen melauak. San ika, kanaj yopanok seki xiujtin, niman tikitaj ika oksekimej kinokouiliaj yenkuikej aparatos electrónicos noso kipiyaj miyek tlemach, niman kanaj tikmachiliaj ika itlaj topolouilijtokej. Tla xtipakij pampa tikpiyaj san tlen noneki, kanaj peuas titlanemiliskej itech tlen ueliskia tikpiyaskej, niman xok titlanemiliskej itech kenon kuajli tiktekichiuiliskej Jehová. Yejuin techilnamiktia tlen ipan onochiuj Demas. Yejua okitlasojtlak “tlajtlamach ipan in tlaltikpaktli” niman yejon okichiuj maka sa makitekichiuilijtinemi toTajtsin iuan Pablo. Biblia xtechijlia tla Demas melak okitlasojtlak yejon tlen ueliskia kipiyas xijkon ken kitekichiuilis toTajtsin, noijki xtechijlia tla xok kinekiya kikauas miyek tlemach niman ijkon iuan tlapaleuis Pablo. Maski san kenon, yejuin techmachtia ika noneki totlajpiyaskej maka tiknekiskej oksejpa tikpiyaskej miyek tlemach, pampa yejon uelis kichiuas maka sa matiktlasojtlakan tlen melauak. w18.11 10 párr. 9

Itlakajkayaualis Satanás melak xkuajli katka pampa yejua kimatstoya ika tla Eva kineltokaya niman kikuaya yejon kojtlakilyotl, Eva mikiskia. Eva niman iueuentsin xokitlakamatkej Jehová niman sakin omijkej (Gén. 3:6; 5:5). Niman xsan yejon, ipampa tlajtlakojli nochimej mikij niman “nochimej on tlakamej yejuan onenkej [...] omikej maski intlajtlakoluan xijki katka ken itlajtlakol Adán” (Rom. 5:12, 14). Aman, tlaltikpakchanejkej xok uelij nemij nochipa ijkon ken toTajtsin kinekiya. San nemij 70 xiuitl, niman tla se melak kojtik nemi 80 xiuitl, niman tla ijkon panoua, nemi “ika tlauejli niman ajmantli” (Sal. 90:10). ¡Nochi yejuin opanok pampa Satanás otekajkayauj! Jesús okijto yejuin itech Satanás: “Xkeman kijtoua on tlen melauak, pampa xkipia ipan iyojlo on tlen melauak” (Juan 8:44). Niman Satanás ok ijkon kichiua. Yejua kikajkayaujtika “nochi tlakatl chanej ipan in tlaltikpaktli” (Apoc. 12:9). San ika, tejuamej xtiknekij matechkajkayaua Satanás. w18.10 6, 7 párrs. 1-4

Yemelak tej, akin kitejtemouaj maonia yolseuilistli melak yolpakij. Santiago, inomachtijkauj Cristo, okijkuilo: “Yejuamej kichiuaj kanika para onyas yolyemanalistli niman ijkon yolmelajkanemij” (Sant. 3:18). Tla otokualanijkej iuan se tokniuj akin nemi ipan totlanechikol noso iuan se tochanejkauj, matiktlajtlanilikan Jehová matechpaleui niman ijkon maka sa iuan matokualanijtokan. Yejua techmakas iespíritu santo niman techpaleuis matikpiyakan kualneskayomej niman matipakikan. Jesús kuajli okijto ika tejuamej noneki tiktejtemoskej maonia yolseuilistli. Yejua okijto: “Tla ijkuak tiktemaka mouen ne tlaixpan tikelnamiki ika okse itlaj ika motech kualani, xkaua mouen ne ipan on tlaixpan niman xuiya itech on tlakatl. Achtopa iuan xmoyoltlaliti, niman kemaj oksejpa xuiya ne itech on tlaixpan niman xtemaka mouen” (Mat. 5:23, 24). w18.09 21 párr. 17

Ipan yeuajli ijkuak sa achijtsin poliuiya ika mikis, Jesús nemiya iuan inomachtijkauan niman miyekpa okiteneuj tlasojtlalistli, kanaj 30. Yejua kuajli okimijli ika nonekiya notlasojtlaskej semej iuan oksekimej (Juan 15:12, 17). Melak miyekej kitaskiaj ika yejuamej notlasojtlayaj niman kimatiskiaj ika melauak kitokayaj Cristo (Juan 13:35). Yejuin tlasojtlalistli tlen okiteneuj Jesús xsan kijtosneki tikmachilis ika titetlasojtla, kijtosneki tikchiuas seki tlemach inpampa oksekimej. Jesús okijto: “On tetlajsojtlalistli más ueyi yejuan se uelis kipias sa no yejua on ika ma miki impampa itetlajsojkauan. Niman nemejuamej nennotetlajsojkauan tla nenkichiuaj tlen nejua nemechnauatia” (Juan 15:13, 14). Ipan yejuin tonaltin, akin kitekichiuiliaj toTajtsin kimixmatij ika melauak notlasojtlaj, ika nopaleuiyaj niman ika san sekan nemij (1 Juan 3:10, 11). Tokojtiliaj ijkon titetlasojtlaskej maski oksekan tiualeuaj, okse tlajtojli titlajtouaj noso tlamantik otoskaltijkej. w18.09 12 párrs. 1, 2

Jehová kichia matikintlajpiyakan tochanejkauan. Xtlanemili itech yejuin, sekimej tekitij niman ijkon kinmakaskej inchanejkauan tlen kinpoloua. Miyekej nantin nokauaj inchan niman ijkon kimiskaltiskej inkoneuan pipitikej. Niman ijkuak totajuan xok miyek tlemach uelij kichiuaj, tejuamej noijki tikintlajpiyaj. Yejuin melak noneki matikchiuakan. Tla tikchiuaj yejon tekitl tlen yotikteneujkej, kanaj xmiyek tikchiuaj ipampa Jehová ijkon ken tikuelitaskiaj. San ika, ¡maka matajmanakan! Jehová yolpaki ijkuak tikintlajpiyaj tochanejkauan (1 Cor. 10:31). ¿Tlenon uelis tikchiuaskej tla tejuamej xtikpiyaj yejon tekitl tlen yotikteneujkej? Kanaj uelis tikinpaleuiskej tokniuan akin iuejueyimej, akin kualoj noso akin noneki makinpaleuikan. Noijki uelis tikinpaleuiskej akin kintlajpiyaj tokniuan. ¿Tleka xtikitaj tla ipan totlanechikol nemi yakaj akin uelis tikpaleuiskej? Tla ijkon tikchiuaj, titekititoskej iuan Jehová niman tiknankilijtoskej inteoyouan yejuin tokniuan (1 Cor. 10:24). w18.08 24 párrs. 3, 5

Jacob kinpiaya miyekej inkoneuan, san ika, akin melak kitlasojtlaya katka José. Ika yejon, ikniuan kinexikolitayaj, niman ijkuak José okajxilti 17 xiuitl okinemakakej ken tlakeuajli (Gén. 37:2-4, 23-28). Kanaj 13 xiuitl otlajyoui ne Egipto. Yejua kachtopa otekit ken tlakeuajli niman sakin okitsajkej. José melak uejka nemiya itech itaj akin melak kitlasojtlaya. ¿Tlenon okipaleui José maka maajmankamiki niman maka matlauelmiki? José tlajyouijtoya ijkuak nemiya ipan cárcel, san ika, kuajli tikmatstokej ika yejua nochipa tlanemilijtoya itech kenon Jehová kipaleuijtoya (Gén. 39:21; Sal. 105:17-19). Kanaj tlanemiliaya itech tlen yeuejkaui okitemik niman okasikamat ika toTajtsin iuan nemiya (Gén. 37:5-11). Kuajli tikmatstokej ika José miyekpa okijli Jehová nochi tlen kajmanaya (Sal. 145:18). Niman Jehová okinankili, pampa okasikamachilti ika yejua iuan nemiskia maski san tlenon panoskia. w18.10 28 párrs. 3, 4

Uelis peuas yakaj tikchikoitaskej san pampa kipiya miyek tomin noso pampa xmiyek kipiya. ¿Kenon yakaj uelis peuas techikoitas san pampa kita ika yakaj kipiya tomin noso pampa xmiyek kipiya? Espíritu santo okichiuj ika Salomón makijkuilo yejuin tlajtoltin tlen yemelak panoua, ijkon ken nesi ipan tlaxelojli tlen aman tikitstokej. ¿Tlenon techmachtia yejuin tlaxelojli? Tla xtotlajpiyaj, kanaj san tiknekiskej touikaskej imiuan tokniuan akin kipiyaj miyek tomin niman kanaj xtiknekiskej touikaskej imiuan akin xmiyek kipiyaj. ¿Tleka melak teijtlako tikinchikoitas oksekimej san pampa kipiyaj tomin noso xmiyek kipiyaj? Pampa uelis titexejxeloskej ipan tlanechikojli. Yejuin tlen panouaya ipan seki tlanechikoltin ipan kachtopa siglo, niman Santiago okinmelajkaijli manotlajpiyakan (Sant. 2:1-4). Maka matitexejxelokan ipan totlanechikol niman maka matitechikoitakan san ika tlen tikitaj. w18.08 10 párrs. 8-10

Noijki tikteititiaj ika tiktlasojkamatij ika kuajli touikaj iuan Jehová ijkuak tikinchiuiliaj tokniuan tlen kuajli. Yejuamej noijki iyaxkauan toTajtsin. Tla xkeman tikilkauaj yejuin, nochipa kualtsin tikinnotsaskej niman tikimititiskej ika tikintlasojtlaj (1 Tes. 5:15). Jesús okimijli akin kitokayaj: “Tla nemotlajsojtlaj semej iuan oksekimej, nochi tlakatl kitas ika nennotemachtijkauan” (Juan 13:35). Noijki noneki matikitakan ika Malaquías kijtoua ika Jehová kita niman kuajli kikaki kenon itekipanojkauan nouikaj imiuan oksekimej (Mal. 3:16). Kuajli tikmatij ika Jehová kimixmatstika akin iyaxkauan (2 Tim. 2:19). Yejua kimatisneki nochi tlen tikijtouaj niman tlen tikchiuaj (Heb. 4:13). Ijkuak tikinchiuiliaj tokniuan tlen xkuajli, Jehová kita yejon. San ika, kuajli matikmatstokan ika noijki kita niman kilnamiki ijkuak titetlapopoluiyaj, ijkuak kuajli titeseliaj, ijkuak tikinmakaj oksekimej tlen tikpiyaj niman ijkuak tikinchiuiliaj tlen kuajli (Heb. 13:16). w18.07 26 párrs. 15, 17

Xakaj melak kojtik, tlamachilise niman tetlasojtlani ken toTajtsin. Ika yejon, kinamiki ika itech matopepechokan niman iuan matinemikan (Sal. 96:4-6). San ika, sekimej akin katkaj itekipanojkauan Jehová xokichiujkej yejon. Matikitakan tlenon ipan onochiuj Caín. Yejua kinemiliaya ika kiueyichiuaya Jehová, niman xakaj okse. Maski ijkon, Jehová xkiseliaya ken kiueyichiuaya, pampa okitak ika ipan iyojlo kipiaya tlen xkuajli (1 Juan 3:12). Kuakon, Jehová okimelajkaijli Caín: “Tla tikchiua tlen kuajli, ¿xok oksejpa mitstlakaitaskej? San ika, tla xtikchiua tlen kuajli, tlajtlakojli sa mitschiatok ipan puerta, niman kineki mitstlanis; san ika, tejua, ¿uelis tiktlanis?” (Gén. 4:6, 7). Kentla Jehová kijlitoskia ika, tla noyolkuepaya niman nemiya iuan, yejua noijki iuan nemiskia. San ika, Caín xokitlakamat tlen Jehová okijli. w18.07 17 párrs. 1, 3; 18 párr. 4

Noijki tikpetlanaltiaj totlauil ijkuak titenojnotsaj itech Tekiuajyotl niman tikinmachtiaj oksekimej (Mat. 28:19, 20, TNM). Tinemiskej ken Cristo noijki tepaleuiya manoueyichiua Jehová. Ijkuak titenojnotsaj, tlaltikpakchanejkej kitaj tlenon tikchiuaj. Tikominuetskilis niman tikintlajpalos ika pakilistli kichiua kuajli matlanemilikan totechkopa niman noijki itech toTajtsin akin tiktekichiuiliaj. Jesús okimijli inomachtijkauan: “Ijkuak nenkalakiskej ipan se kajli, [...] xtetlajpalokan” (Mat. 10:12). Kampa yejuamej tenojnotsayaj, miyekej tlaltikpakchanejkej kimijliayaj akin komintayaj mapanokan inchan maski xkimixmatiyaj. Kanaj kampa tejuamej tichantij xijkon panoua. Miyekej nomojtiaj noso kualanij ijkuak yakaj akin xkixmatij ajsi inchan. San ika, tla tejuamej kuajli tikiminotsaj niman tikintlakaitaj, kanaj kuajli nomachiliskej. Miyekpa, kuajli techkakij tla kitaj ika tiixpaktiuej. Noijki ijkon panoua ijkuak titenojnotsaj ika carritos kampa tojlan nojuitilo. Kanaj yotikitakej ika miyekej kuajli tlanankiliaj ijkuak tikintlajpalos niman tikominuetskilis. w18.06 22 párrs. 4, 5

Pedro, itlatitlankauj Cristo, yonomatka nouikas san inuan akin judíos katkaj. San ika, ijkuak toTajtsin kuajli okiteititi ika akin kichiuayaj ken Cristo xkipiaya ika techikoitaskej, Pedro okinojnots se soldado romano akin itoka katka Cornelio (Hech. 10:28, 35). Ipan yejon tonajli opeuj tlakua niman nouika imiuan akin oksekan ualeuayaj, kema, imiuan akin xjudíos katkaj. Maski ijkon, seki xiujtin sakin, xok imiuan tlakuaya sekimej tokniuan akin xjudíos katkaj ipan ueyi kalpan Antioquía (Gál. 2:11-14). Ijkuak opanok yejon, Pablo okichikajkanots, niman Pedro okikak. ¿Tleka tikmatij yejon? Pampa, ijkuak okijkuilo kachtopa iamatlajkuilol tlen okintitlanili judíos niman akin xjudíos katkaj ipan Asia Menor, ika tlasojtlalistli otlajto intech “nochimej tokniuan” (1 Ped. 1:1; 2:17). Kuajli nestika ika, ipampa ineskayo Jesús, itlatitlankauan ouelkej kintlasojtlaj nochimej tlaltikpakchanejkej (Juan 12:32, TNM; 1 Tim. 4:10). Maski achijtsin ouejkaujkej, okipatlakej ken tlanemiliayaj. Ijkuak yokiselijkaj “nemilistli yejuan yenkuik”, akin yeuejkaui kichiuayaj ken Cristo opeuj kitaj ika tlaltikpakchanejkej san noijkimej, ijkon ken kimita toTajtsin (Col. 3:10, 11). w18.06 11 párrs. 15, 16

Ipan kachtopa siglo, yelpantepostli tlen kitekitiltiayaj soldados romanos tlachijchiujtli katka ika hierro tlen ueueyakej niman nenepanijtiayaj. Nonekiya ika soldados miyekpa makitakan ika yejon tepostin tlen pajpatlajkej niman ueueyakej kuajli manajsitokan niman masalijtokan niman ijkon xkikokouiliskej iyojlo noso oksekan kampa uelis kimiktiskej. Yejon yelpantepostli kuajli kineskayotia kenon itlanauatiluan Jehová tlen melajkej kuajli kitlajpiyaj toyojlo (Prov. 4:23). Ijkon ken se soldado xkipatlaskia yejon yelpantepostli ika okse tlen xijkon chikauak, tejuamej noijki xtikpatlaskej itlanauatiluan toTajtsin ika totlanemililuan. Tejuamej xmiyek tikmatij, niman xtiuelij tiktlajpiyaj toyojlo (Prov. 3:5, 6). Ika yejon, melak noneki miyekpa matikitakan ika yelpantepostli kuajli masalijto niman ijkon makitlajpixto toyojlo. Niman tla melak tikintlasojtlaj yejon tlamachtiltin tlen melajkej, kuakon xouijtika tikitaskej tikmamajtoskej yejon yelpantepostli itech “yolmelaualistli”, kijtosneki tinemiskej ken kijtouaj itlanauatiluan toTajtsin (Sal. 111:7, 8; 1 Juan 5:3). w18.05 28 párrs. 3, 4, 6, 7

Maski yokitakaj kenon Moisés kuajli kinyekanaya, israelitas xkuajli tlajtouayaj itechkopa, kitlajtlakoltiayaj ika xkipiayaj atl (Núm. 20:1-5, 9-11). Ipampa tlen panotoya, okichiuj ika Moisés makualani. Aman, okintlauelnots niman okimijli ika yejua kichiuaskia milagro niman xokiteititi ika tlaneltokaya itech Jehová. Kuakon, okpa okiuitek yejon ueyi tetl, niman ouajkis ueyi atl. Pampa onoueyimat niman otlauelmik okichiuj tlen xkuajli (Sal. 106:32, 33). Pampa xonoyolyemanili, Jehová xokikauili makalaki ipan tlajli tlen yokimijlika kinmakas (Núm. 20:12). ¿Tlenon tiuelij itech tlen ipan onochiuj Moisés? Kachtopa, matochikauakan nochipa tiyolyemankej yeskej. Tla xijkon tikchiuaj, peuas toueyimatiskej niman ijkon tikijtoskej niman tikchiuaskej tlen xkuajli. Ika ome, tla tokuaajmanaj uelis techtlajkalis, kuakon, matochikauakan matiyolyemankej maski melak tokuaajmantokej. w19.02 12, 13 párrs. 19-21

¿Tikmachiliskej ika ouijtika tiktlakamatiskej itlanauatil Jesús kampa techijlia matitenojnotsakan? Ka, xijkon. Sakin ika otlajto itech itemekayo uvas, Jesús kuajli okijto ika tikpiyaskej pakilistli tlen yejua kipiya tla titenojnotsaj itech Tekiuajyotl (Juan 15:11). ¿Tleka panoskia yejon? Ipan se neskayotl okijto ika yejua katka itemekayo uvas niman ika inomachtijkauan katkaj imatsitsinuan (Juan 15:5). Atl niman tlen kichikaua temekatl, noijki kiseliaj imatsitsinuan tlen itech tlaktokej. Noijki ijkon, tejuamej tikmachiliskej yejon pakilistli tlen Jesús kimachilia ijkuak kichiua tlen iTaj kineki san tla iuan tinentokej niman tikchiuaj ken yejua okichiuj (Juan 4:34, TNM; Juan 17:13; 1 Ped. 2:21). Hanne, akin ikipiya ipantsin 40 xiujtin ken precursora, kijtoua: “Pakilistli tlen nikmachilia ijkuak nikisa nontenojnotsa nechyolchikaua sanken maniktekichiuilijto Jehová”. Kema ijkon, yejuin ueyi pakilistli techmaka kojtilistli niman ijkon xtijkajkauaskej titenojnotsaskej, maski kampa ouijtika titenojnotsas (Mat. 5:10-12). w18.05 17 párr. 2; 20 párr. 14

Apóstol akin miyek okichiuj niman ijkon kinyolchikauas imikniuan kanaj katka Pablo. Espíritu santo okititlan apóstol Pablo makinnojnotsati griegos niman romanos, akin kinueyichiuayaj miyek tajtsitsintin (Gál. 2:7-9). Pablo okistinen ipan nochi kech ueyi niman patlauak tlen aman itoka Turquía, niman noijki ipan Grecia niman Italia, niman okinchijchiuj tlanechikoltin kampa nemiyaj akin xjudíos katkaj. Akin kemach yopeujkaj kichiuayaj ken Cristo niman chantiyaj ipan yejon ueyi kalpamej nonekiya makinyolchikauakan pampa san no inchanejkauan kintlaueltokayaj (1 Tes. 2:14). Ipan amatlajkuilojli tlen okimijkuilouili yenkuik tlanechikojli tlen onkatka Tesalónica, kanaj ipan xiuitl 50, Pablo okimijli: “Nochipa tikmakaj tlaxtlauijli Dios para nochimej nemejuamej, niman nochipa temechelnamikij ikan tooración. Temechelnamikij ixpan Dios toTajtsin ken ijki ipampa nemotlaneltok nenkichiuaj miyek tekitl, niman ken ijki ipampa nemotetlajsojtlalis nenkitekipanouaj, niman ken ijki [...] nenmelajkanemij” (1 Tes. 1:2, 3). Noijki, okinnauati yejuin: “Xmoyoleuakan se iuan okse, niman xmoyolchikauakan ikan tlaneltoktli iuan oksekimej” (1 Tes. 5:11). w18.04 18, 19 párrs. 16, 17

Tla se telpokatl kineki kitejtemos kiyolpaktis Jehová, noneki kuajli kitlachilis kenon tenojnotsa. Titenojnotsas se tlen kachtopa noneki tiktejtemos. Ika yejon, ¿yotiknemili tiktejtemos miyekpa titenojnotsas noso kanaj timochiuas precursor? Aman tej, ¿tlenon uelis tikchiuas tla xmelak mitsyolpaktia titenojnotsas? Niman ¿tlenon mitspaleuis kuajli xkisati ijkuak titlajtos itech Jehová? Xchiua yejuin ome tlen tepaleuij: kuajli xmoyektlali niman maka xkajkaua tikimijlis oksekimej tlen tikmatstika. Kanaj mitsmojkatlachialtis tikitas ika melak mitsyolpaktis tikchiuas yejuin. Uelis tipeuas ika timoyektlalis tiknankilis itlaj tlen ueliskia mitstlajtoltiskej akin imiuan timomachtia. Ipan jw.org niman okseki amatlajkuiloltin onka tlamachtiltin tlen onochijchiujkej niman ijkon telpokamej mauelikan makiyektlalikan kenon kinankiliskej tlen miyekej tetlajtoltiaj. Se neskayotl, tlajtoltilistli “¿Tleka nitlaneltoka itech toTajtsin?”, tlen uajlauj ipan tlamachtijli “¿Nonekiskia nitlaneltokas itech evolución?” tlen onka ipan amatlajkuilojli Nonankiliaj 10 tlen notlajtoltiaj telpokamej niman ichpokamej, uelis mitspaleuis xyektlali kenon titlanankilis. w18.04 27 párrs. 10, 11

Maski ijkuak opeujkej nemij Adán niman Eva kipiayaj tlamakaualistli niman ueliyaj kichiuayaj miyek tlemach, Jehová okitlali seki tlen nonekiya kichiuaskej. Maski seki itech yejon yonomatkaj kichiuaj, xyejuamej kitlapejpeniayaj kichiuaskej. Se neskayotl, tla kinekiyaj nemiskej, nonekiya nijyotiskej, tlakuaskej niman kochiskej, niman okseki tlemach. San ika, xkinemiliayaj tla yejuin kinkuiliaya intlamakaualis. Jehová okichiuj ika mapakikan maski nonekiya mojmostla kichiuaskej yejuin (Sal. 104:14, 15; Ecl. 3:12, 13). Jehová okinnauati Adán niman Eva makitemiltikan niman makitlajpiyakan tlaltikpaktli. ¿Okinkuili yejuin tlanauatijli tlamakaualistli tlen kipiayaj? Ka, xijkon opanok. Yejuin kinkauiliaya nochimej tlaltikpakchanejkej matlapaleuikan itech tlen toTajtsin kineki: ika tlaltikpaktli manochiua se xochitlalpan kampa tlaltikpakchanejkej manemikan nochipa (Sl. 127:3; Isa 45:18). Ken tikitaj, Adán niman Eva ueliskiaj nochipa kinyolpaktis innamiktilis niman inkoneuan. w18.04 4, 5 párrs. 7, 8

Tla tikimijyouiyaj akin tikiminmachtiaj, xtikchiaskej nimantsin makasikamatikan niman makiselikan tlen kijtoua Biblia. Xnemili ika titemachtiaj kenon uelis tinemiskej nochipa ipan se Xochitlalpan. Miyekej kinemiliaj ika ijkuak se miki nochi ompa tlami noso ika akin kichiuaj tlen kuajli yauej iluikak. Se tokniuj techijlia tlenon kichiua niman ijkon kinpaleuis. Kachtopa, kipoua Génesis 1:28 niman tetlajtoltia kanon niman kenon kinekiya toTajtsin machantikan tlaltikpakchanejkej. Miyekej tlanankiliaj ika nikan ipan tlaltikpaktli niman ika pakilistli. Kuakon, tokniuj kipoua Isaías 55:11 niman tetlajtoltia tla toTajtsin yokipatlak tlen kinekiya. Tlaltikpakchanejkej tlanankiliaj ika, ka. Ontlami ika Salmo 37:10, 11, sakin tetlajtoltia: “Ken kijtoua Biblia, ¿kenon chantiskej tlaltikpakchanejkej ika tlayekapan?”. Ijkon, yokichiuj ika miyekej makasikamatikan ika toTajtsin ok kineki ika tlaltikpakchanejkej akin kuajkualtin manemikan nochipa ipan se Xochitlalpan. w19.03 24 párrs. 14, 15; 25 párr. 19

Jehová kuajli okijto ika kinekiya matijkakikan niman matiktlakamatikan tlen okijto iKoneuj. Jesús okinmachti inomachtijkauan matenojnotsakan itech iTekiuajyo toTajtsin niman miyekpa okimilnamikti ika noneki tlatlachixtoskej (Mat. 24:42; 28:19, 20). Noijki miyekpa okimijli melak manokojtilikan niman okinyolchikauj maka masiauikan (Luc. 13:24). Noijki, kuajli okimijli ika nonekiya notlasojtlaskej, san sekan nemiskej niman makitlakamatikan itlanauatiluan (Juan 15:10, 12, 13). Tlen okimijli aman noijki melak techpaleuiyaj. Jesús okijto: “Nochimej yejuan kitlakamatij on tlen melauak, kakij tlen nejua nikijtoua” (Juan 18:37). Tikteititiaj ika tijkakij itlajtol ijkuak tikchiuaj yejuin: “Xpiyakan ijyouilistli iuan oksekimej, niman xtlapojpoluikan tla yakaj xkuajli itlaj mechchiuilia” (Col. 3:13; Luc. 17:3, 4). Noijki tikteititiaj ika tijkakij itlajtol ijkuak titenojnotsaj ika pakilistli “ijkuak on tlakamej kinekiskej kakiskej niman ijkuak xkinekiskej” (2 Tim. 4:2). w19.03 10 párrs. 9, 10