Abril

¿Niman tejuamej? ¿Titlanemiliaj ken toTajtsin noso ken tlaltikpakchanejkej? Kanaj toyekanaj ika itlajtolyekanalisuan Jehová. San ika ¿ijkon tikyekanaj totlamachilis? ¿Tikyejyekouaj titlanemiliskej ken Jehová? Tla ijkon tiknekij tikchiuaskej, noneki melak tokojtiliskej. San ika, xouijtika titlanemiliskej ken tlaltikpakchanejkej pampa Satanás tekiti ipan inyojlo (Efes. 2:2). Noijki, kanaj tiknekiskej titlanemiliskej ken oksekimej pampa tikitaj ika ijkon san totech titlanemiliaj. Kema, ouijtika titlanemiliskej ken Jehová, san ika, nion xouijtika titlanemiliskej ken tlaltikpakchanejkej. Tla titlanemiliaj ijkon ken tlaltikpakchanejkej, san tiknekiskej totech titlanemiliskej niman san tejuamej tiknekiskej tikijtoskej tlen kuajli noso tlen xkuajli (Mar. 7:21, 22). Ika yejon, melak noneki matiuelikan matitlanemilikan ijkon ken Jehová niman maka ken tlaltikpakchanejkej. w18.11 18 párr. 1; 19 párrs. 3, 4

Jesús kanaj melak onoyolchikauj pampa Jehová yexpa okijli ika kitlasojkaitaya. Ijkuak yejua san kemach yonoapolaktijka ipan atentli Jordán, Jehová okijli tlajtoltin itech tlaxelojli tlen aman tikitstokej. Nesi ika san Jesús niman Juan Teapolaktijketl okikakej yejuin tlajtoltin. Ijkuak poliuiya kanaj se xiuitl ika kimiktiskej Jesús, yeyimej itlatitlankauan okikakej ika toTajtsin okijto: “In yejua notlajsojkaKoneu yejuan itech nipaktikaj. Yejua xtenkakikan” (Mat. 17:5). Sa ika nochi, Jehová oksejpa okinots ikoneuj seki tonaltin achto ika mikiskia (Juan 12:28). Jesús kimatiya ika ken kimiktiskiaj melak tepinajti yeskia, tlaltikpakchanejkej kitlajtlakoltiskiaj ika okiuijuikaltijka toTajtsin. Maski ijkon, ipan se teoyotl okitlajtlan manochiua tlen kineki toTajtsin niman xtlen yejua kinekiya (Mat. 26:39, 42). “Yejua otlaxiko ipan se kojtli melaktik, okimapeuj pinauilistli”, niman xokitejtemo ika tlaltikpakchanejkej makitlasojkaitakan, san kinekiya kiyolpaktis iTajtsin (Heb. 12:2, TNM). w18.07 10, 11 párrs. 15, 16

Sakin ijkuak Jesús okipeualti iTlakualis, okiteititi ika yolchikauak katka. ¿Kenon? Ijkuak okichiuj tlen toTajtsin kineki, maski kimatstoya ika tlajyouis pampa kimiktiskiaj niman kitlajtlakoltiskiaj ika okiuijuikaltijka toTajtsin (Mat. 26:65, 66). Jesús nochipa oyolmelajkanen niman okiueyichiuj itokayo Jehová, okipaleui iueyitlayekanalis toTajtsin niman okichiuj ika tlaltikpakchanejkej akin noyolkuepaskiaj makipiyakan nemilistli tlen xkeman tlamis. Noijki okinmachti inomachtijkauan kenon kixnamikiskej tlen ouijtika. Jesús noijki okiteititi ika yolchikauak katka pampa xotlanemili itech tlen yejua kajmanaya, yejua okinemili itech tlen itlatitlankauan kinpolouaya. Sakin ijkuak okijli Judas makisa, okipeualti iTlakualis tlen xmiyek ononek niman yejon kinpaleuiskia inomachtijkauan tlapejpeniltin akin imiuan okichiuj yenkuik tlajtolkaualistli (1 Cor. 10:16, 17). w19.01 22 párrs. 7, 8

Jehová okuajnankili Jesús: “Yonikchiu para ma nechueyilikan, niman oksejpa nikchiuas para ma nechueyilikan”. Jesús melak najmanaya pampa nonekiya yolmelajkanemis itech Jehová. Kimatstoya ika kiuitekiskiaj niman kimiktiskiaj (Mat. 26:38). San ika, kiueyichiuas itoka iTajtsin yejon melak kajmanaya. Okitlajtolchijchiuilijkej niman kajmanaya ika imikilis makijtlako itech ken kitayaj toTajtsin. San ika, tlen okijto iTaj, yejon okichiuj kuajli makimati ika noueyichiuas itoka Jehová. Ijkon ken Jesús kanaj noijki techajmana manotsokuilo itoka Jehová. Kanaj texchiuiliaj itlaj tlen xkinamiki, ijkon ken okichiuilijkej Jesús. Noso kanaj techajmana tlen oksekimej xkuajli kijtouaj totech. Kemantika kanaj tiknemiliaj kenon yejuin kijtlakoua ken kitaj Jehová. Ijkuak ijkon panoua techyolchikaua tlen Jehová okijli Jesús. Jehová nochipa kiueyichiuas itoka (Sal. 94:22, 23; Is. 65:17). w19.03 11, 12 párrs. 14-16

Inomachtijkauan Jesús xueliyaj kineltokayaj tlen kemach yokikajkaj. Yejuamej kineltokayaj ika Jesús kiyektlaliskia tekiuajyotl ipan Israel, san ika, yejua okimijli ika tlajyouiskia niman mikiskia. Pedro, itlatitlankauj Jesús, okijli: “NoTeko, ¡Ma ka Dios kineki ijkon nochiuas! ¡Tejua xmitstocaroua para ijkon mopan nochiuas!”. Jesús okinankili: “¡Xnechtlalkaui nikan Satanás! Tejua tinechteltia para xnikchiuas on tlen Dios kineki. Tejua xtiknemilia ken Dios, yej tiknemilia ken on tlakamej” (Mat. 16:22, 23; Hech. 1:6). Ijkuak Jesús okijto yejuin, okiteititi ika melak nopatla ken tlanemilia toTajtsin niman ken tlanemiliaj tlaltikpakchanejkej akin Satanás kinyekantok (1 Juan 5:19). Tlen Pedro okijli Jesús okiteititi ika san itech tlanemiliaya ijkon ken miyekej tlaltikpakchanejkej. San ika, Jesús kimatstoya ika Jehová xijkon tlanemiliaya. Itlajtoluan Jesús kuajli okiteititi ika xkinekiya tlanemilis ken tlaltikpakchanejkej pampa yejua tlanemiliaya ken iTaj. w18.11 18 párrs. 1, 2

¿Tlenon kita Jehová ijkuak miyekej nosentlaliaj pampa kilnamikij iTlakualis toTeko? Xsan kita kenon tojlan; yejua kimita inseselti. Kimita akin yauej nochi xiujtin. Ompa nemij sekimej akin yauej maski kintlaueltokaj. Oksekimej xyauej tlanechikoltin tlen nopanoltia ipan semana, san ika, kinemiliaj ika noneki yaskej ijkuak noilnamiki imikilis Cristo. Jehová noijki kimita akin kemach yauej san pampa kinekij kitaskej kenon noilnamiki imikilis Cristo. Tikmatstokej ika Jehová kiyolpaktia ika miyekej makilnamikikan imikilis Cristo (Luc. 22:19). San ika, yejua más kita tleka yauej. ¿Tiknekij ika Jehová niman ikalpan matechmachtikan? (Is. 30:20; Juan 6:45). w19.01 26 párrs. 1-3

Jesús xsan onotemakak inpampa inomachtijkauan, noijki intech tlanemiliaya. Xkonnemili, imiuan nosentlaliaya maski melak siaujtoya noso noyolkokouaya (Luc. 22:39-46). Yejua otlanemili itech tlen ueliskia kitemakas, xitech tlen ueliskia kiselis (Mat. 20:28). Tinemij kampa toteititiaj melauak tlasojtlalistli niman ika toyojlo tikimijliaj oksekimej noijki manemikan kampa tejuamej tinemij. San ika, tiknekij melak tikinpaleuiskej akin tlaneltokaj ken tejuamej, akin xok touan nosentlaliaj nion xtenojnotsaj (Gál. 6:10). Tikimititiaj ika tikintlasojtlaj ijkuak tikimijliaj mauajlakan tlanechikoltin, niman noijki ijkuak noilnamiki imikilis Cristo. Ijkon ken Jehová niman Jesús, melak tiyolpakij ijkuak akin ijkon nemi oksejpa uajnokuepa itech toTajtsin (Mat. 18:14). w19.01 28 párr. 12; 29, 30 párrs. 14-16

Jesús okipeualti iTlakualis toTeko niman san okikuik pan niman vino tlen onokaujka ijkuak okipanoltijkej pascua. Okimijli itlatitlankauan ika yejuin ome tlemach kixneskayotiaya itlalnakayo tlen xkipiya tlajtlakojli niman iyesyo, tlen xok uejkauiskia kitemakaskia inpampa. Itlatitlankauan xokimojkaitakej tleka san yejuin ome okikuikej ijkuak okipanoltijkej iTlakualis toTeko. ¿Tleka xokimojkaitakej? Seki metstli achto, ijkuak Jesús okintlajpaloto akin imiuan nouikaya, Lázaro, Marta niman María, opeuj kinnojnotsa. Maski Marta ompa nemiya, opeuj kichijchiua miyek tlakuajli pampa akin okintlajpaloto ueyixtoya. San ika, Jesús ika tlasojtlalistli okijli ika xnonekiya makichijchiua miyek tlakuajli (Luc. 10:40-42). Sakin, ijkuak sa achijtsin poliuiya ika Jesús kitemakaskia inemilis, okichiuj ijkon ken okijlika Marta. Xmiyek ononek ijkuak okichiuj iTlakualis. w19.01 20, 21 párrs. 3, 4

Jehová okimakak ueyilistli ken Jesús nion xkichiaya. Okiyoliti niman “okimakak más ueyilistli yejuan xakaj okse kipia”. Noijki, okimakak itlaj tlen xakaj okse kiseliaya ipan yejon tonaltin: nemis ken se espíritu akin xok uelis mikis (Filip. 2:9; 1 Tim. 6:16). ¡Melak ueyi tlateochiualistli okiseli pampa oyolmelaujkanen! ¿Tlenon techpaleuis maka matiktejtemokan matechtlasojkaitakan tlaltikpakchanejkej? Tla xkeman tikilkauaj ika Jehová nochipa kintlasojkaita niman ika miyekpa kinteochiua akin yolmelaujkanemij ken nion xkichiayaj. Yemelak ika xtikmatij kenon techteochiuas Jehová ika tlayekapan, san ika, tikmatstokej ika kema kichiuas. Kuakon, ijkuak tikixnamikiskej tlaueltin ipan yejuin tlaltikpaktli, matikilnamikikan ika yejuin tlaltikpaktli xok uejkauis (1 Juan 2:17). ToTajtsin Jehová, akin melak techtlasojtla, yejua yolmelaujki, niman xkilkauas totekiyo nion tlasojtlalistli tlen tikititiaj (Heb. 6:10). w18.07 11 párrs. 17, 18

Ipan sa ika tlami yeuajli ijkuak otlakua inuan itlatitlankauan, Jesús melak kinekiya ika inomachtijkauan san sekan manemikan. Ijkuak kichiujtoya teoyotl inuan itlatitlankauan, okijto ika kinekiya nochimej inomachtijkauan san sekan manemikan, ijkon ken yejua niman itaj san sekan nemij. Tla inomachtijkauan san sekan nemiyaj, kuakon kuajli nesiskia ika Jehová yemelak yejua akin okuajtitlanka Jesús ipan yejuin tlaltikpaktli. Ken notlasojtlaskiaj semej inuan oksekimej kiteititiskia ika yejuamej katkaj akin yemelak kitokayaj Jesús, niman yejuin kichiuaskia san sekan manemikan (Juan 13:34, 35). Xtemojkatlachialti tleka Jesús melak okijto ika nonekiya san sekan manemikan. Yejua yokitaka ika itlatitlankauan xkuajli nouikayaj. Yejuamej san kemach yonotenkuikuikaj “ika on akinon más ueyixtias”, niman xsan sejpa ijkon yokichiujkaj (Luc. 22:24-27; Mar. 9:33, 34). Okse tonajli, Santiago niman Juan okitlajtlanilijkaj Jesús ika ipan iTekiuajyo makinkauili manemikan inakastlan (Mar. 10:35-40). w18.06 8 párrs. 1, 2

Jehová kineki ika akin yononamiktijkej nochipa melak manotlasojtlakan (Mat. 19:3-6). Tikajkayauas moixnamik yejon tlen melak xkuajli uelis tikchiuas. Ika yejon, ika chikome tlanauatijli xtekauiliaya manochiua yejuin tlajtlakojli (Deut. 5:18). Tiauilnemis kentla titlajtlakos itechkopa toTajtsin niman melak tikyolkokos moixnamik (Gén. 39:7-9). Niman tlen kimachilis moixnamik uelis melak uejkauis. Jehová noijki kineki melak kuajli manemikan kokonej. Xsan okiminauati tajtin makitakan ika kuajli manemikan inkoneuan, noijki okimijli makinmachtikan makiueyichiuakan toTajtsin. Nonekiya ika nochiuiyan niman nochipa kinmachtiskiaj itech itlanauatiluan toTajtsin niman kinmachtiskiaj makitlasojtlakan (Deut. 6:6-9; 7:13). Se israelita xnonekiya kimitas ikoneuan kentla itlaj tlen xnoneki notlajpiyas noso ika uelis kichiuilis tlen kinekis. Nonekiya kitaskej kentla se tetlayokolijli tlen Jehová kinmaka niman kintlajpiyaskej ika tlasojtlalistli (Sal. 127:3). w19.02 21 párrs. 5, 7

Job kuajli kimatstoya ika toTajtsin kema kitaskia tla yolmelajkanemi noso ka. Maski kitlatlatayaj, kimatstoya ika Jehová kiteochiuaskia niman tikmatij ika yejuin okipaleui mayolmelajkanemi. Jehová melak okiyolpakti tlen Job okichiuj. Melak okiteochiuj maski ok tlajtlakole katka (Job 42:12-17; Sant. 5:11). Niman ika tlayekapan kiselis melak miyek tlateochiualistin. ToTajtsin xnopatla (Mal. 3:6). Tla tikilnamikij ika Jehová kitlasojkaita ijkuak tiyolmelajkanemij yejon kichiuas matitlamachixtokan ken kualtsin tinemiskej (1 Tes. 5:8, 9). Kanaj kemantika tikmachiliskej ika san tejuamej tiknekij tiyolmelajkanemiskej. San ika, xsan tejuamej tinemij. Nochiuiyan nemij tokniuan akin noijki nochikauaj yolmelajkanemiskej. Noijki, tinemiskej imiuan tlakamej niman siuamej akin oyolmelajkanenkej maski hasta okinejkej kinmiktiskej (Heb. 11:36-38; 12:1). w19.02 7 párrs. 15, 16

Tla iyejkotika ijkuak noilnamikis imikilis Cristo, kinamiki matotlajtoltikan: “¿Kenon uelis kuajli nitetlasojtlas ken Jesús? ¿Nitlanemilia itech tlen kinpoloua nokniuan noso san itech tlen nechpoloua? ¿Nikchia makichiuakan tlen xuelij, noso nikasikamati ika kichiuaj tlen uelij?”. Nochipa matikchiuakan ken Jesús niman matikteititikan ika titeasikamatij. Xok uejkauis, xok nonekis matikilnamikikan imikilis Cristo. Ijkuak Jesús “uajlas” ipan ueyi tlajyouilistli, kinuikas iluikak akin “yokintlapejpeni” akin ok nemiskej ipan tlaltikpaktli. Kuakon xok noilnamikis imikilis Cristo (1 Cor. 11:26; Mat. 24:31). Uelis kuajli tikmatstoskej ika, ijkuak xok noilnamikis imikilis Cristo, tikilnamikiskej ika tlasojtlalistli ken nochiuaya, onoteititi yolyemanilistli, yolchikaualistli niman tlasojtlalistli tlen nion se tlaltikpakchane xkiteititia. w19.01 25 párrs. 17-19

Tiktlajpiyaskej tlen tikpiyaj tlaijtik san noijki ken ijkuak tiktlajpiyaj kuajli matinesikan. Se neskayotl, tla tiknekij kuajli tinemiskej, noneki kuajli totlakualtiskej niman nochipa tikchiuaskej ejercicio. Noijki ijkon, tla tiknekij kuajli tikpiyaskej totlaneltokil, kipiya ika nochipa tikiskaltiskej. Uelis ijkon tikchiuaskej ijkuak tikchiuaj tlen tomachtiaj niman titenojnotsaj itech tlen tikneltokaj (Rom. 10:8-10; Sant. 2:26, TNM). Ken tinesij uelis kiteititis ika kuajli tinemij maski tla tikualoj. Noijki ijkon, ken tikueyichiuaj toTajtsin techtlanemililtis ika totlaneltokil chikaujtok maski ipan toyojlo tikpiyaj xkuajkualtin ileuilistin (1 Cor. 10:12; Sant. 1:14, 15). Matikilnamikikan ika Satanás kineki matitlanemilikan ken yejua tlanemilia. w19.01 15 párrs. 4, 5

Matotlajtoltikan: “¿Nikchiua ken okichiuj yejon samaritano akin Jesús okiteneuj? Ijkuak nikita ika oksekimej tlajyouiyaj, ¿nikimiknelia?” (Luc. 10:30-35). “¿Uelis nikchiuas okseki niman ijkon nikinpaleuis? Se neskayotl, ¿nikinpaleuiya tokniuan akin iuejueyimej, tokniuan siuakaualtsitsintin niman telpokamej akin intajuan xnomachtiaj? ¿Uelis nikinyolseuis akin najmanaj?” (1 Tes. 5:14; Sant. 1:27). Ijkuak tikinpaleuiyaj oksekimej, tikitaj ika “más paki on yejuan kitemaka xken on yejuan kiselia”. Niman noijki tikmatij ika tikyolpaktijtokej Jehová (Hech. 20:35; Heb. 13:16). Tekiuaj David okijto yejuin itech akin teiknelia: “Jehová kitlajpiyas niman kichiuas mayolto. Yejua kiteneuaskej ika nemi ika pakilistli ipan tlaltikpaktli” (Sal. 41:1, 2). Tla tikimikneliaj oksekimej, Jehová techiknelis, niman yejuin kichiuas nochipa matinemikan ika pakilistli (Sant. 2:13). w18.09 19, 20 párrs. 11, 12

Yoshiko, se tokniuj siuatl, okijlikej itlaj tlen melak okajman. Tlapajtiketl okijli ika sa seki metstli nemiskia. ¿Tlenon okichiuj tokniuj? Nimantsin okilnamik tlen kijtoua tlaxelojli tlen aman tikitstokej, tlen yejua melak kuelita. Ika yolseuilistli, okijli itlapajtijkauj ika xnomojtiaya pampa Jehová kikitskijtoya ima. Yejuin tlaxelojli okiyolseui tokniuj niman yokipaleui matlaneltoka itech Jehová ika nochi iyojlo. Tejuamej noijki ijkon uelis techpaleuis ijkuak tikixnamikiskej tlen melak xkuajli. Jehová okijlika Isaías yejuin tlajtoltin pampa kinekiya kinyolchikauas judíos akin okinuikakej Babilonia. San ika, noijki okinek manoijkuilo pampa kinekiya makinyolchikaua itekipanojkauan akin yeuejkaui onenkej niman akin nemij ipan yejuin tonaltin (Is. 40:8; Rom. 15:4). Ipan yejuin tonajli, nochiujtok “tlen sanoyej xkuajli”, niman melak tiknekij matechyolchikaua tlen kijtoua amoxtli Isaías (2 Tim. 3:1). w19.01 2 párrs. 1, 2

Akin noxelouaj ok tlanamiktiltin niman ok kipiyaskej tlaueltin. Pablo, itlatitlankauj Cristo, okiteneuj itlaj tlen kiteititia ika noneki san sekan manemikan. Yejua okijkuilo: “Ijkon ma kichiua pampa se tlakatl yejuan xkineltoka Cristo kiselia se tlatiochiualistli itech Dios pampa isiuau kineltoka Cristo. Niman no ijki se siuatl yejuan xtlaneltoka kiselia se tlatiochiualistli pampa iueuentsin tlaneltoka. Tla xijkon yeskia, inkoneuan xueliskiaj kiseliskiaj itlatiochiualis Dios, pero aman kiseliaj” (1 Cor. 7:14). Miyekej iteixpantijkauan Jehová akin yolmelaujkanemij, kuajli yokijtokej ika nochipa nemiskej iuan imixnamik akin xiteixpantijkauj Jehová maski ouijtika mapanokan. Sekimej melak yokinyolpakti ika otlajxikojkej pampa aman imixnamik noijki yopeuj kitekichiuilia Jehová (1 Cor. 7:16; 1 Ped. 3:1, 2). Ipan tlanechikoltin nemij miyekej akin yononamiktijkej niman melak pakij. Kanaj ipan totlanechikol nemij akin yononamiktijkej niman melak yolpakij. Tikitaj ika teueuentsin kitlasojtla niman xkikajkayaua isiuauj, niman tesiuauj kitlasojtla niman kitlakaita iueuentsin. Yejuamej kiteititiaj ika kema uelis notlakaitas namiktilistli (Heb. 13:4). w18.12 14 párrs. 18, 19

Tlajtojli Edén kijtosneki “Yolpakilistli”, kema, yejon Xochitlalpan melak teyolpakti katka. Melak onkatka tlakuajli, melak tlakualtsinkan katka niman tlaltikpakchanejkej niman yolkamej nemiyaj ika yolseuilistli (Gén. 1:29-31). Tlajtojli “xochitlalpan” ika hebreo, notlajtolkuepa ken parádeisos ika tlajtojli Griego. Se amoxtli kijtoua ika ijkuak se akin tlajtouaya Griego kikakiya tlajtojli parádeisos, yejua kinemiliaya se ueyi xochitlalpan tlen melak kualtsin kampa xnochiua tlen xkuajli, kampa onkatij kualtsitsintin kojtin tlen kitemakaj tlatlamantik tlakilyomej. Noijki kinemiliaya ika miyekan notlalojtika chipauak atl, niman kampa notlaloua yejon atl melak tlaxoxojkan, niman ompa tlakuajkuatinemij antílopes niman borregos (Cyclopaedia, tlen okijkuilo M’Clintock niman Strong; noijki xkita Génesis 2:15, 16). ToTajtsin okichiuj ika Adán niman Eva manemikan ipan se xochitlalpan ken yotikteneujkej, san ika, sakin okinkixtij pampa xokitlakamatkej. Kema, Adán niman Eva xok ouel onenkej ipan Xochitlalpan, nion inkoneuan (Gén. 3:23, 24). Xok yakaj onen ipan yejon Xochitlalpan niman nesi ika opoliuj ijkuak opanok ueyi Apachiuilistli. w18.12 3, 4 párrs. 3-5

Tajtin kuajli kinmachtiaj inkoneuan. Tla tekoneuan kichiuaj ijkon ken okinmachtijkej intajuan, melak kuajli tlen kitlapejpeniskej kichiuaskej niman xkipiyaskej ajmantli nion tlauejli. Pampa Jehová se kuajli tajtli, yejua kineki ika ikoneuan kuajli manemikan (Is. 48:18). Ika yejon, techmaka itlajtolyekanalisuan tlen nonekij niman techijlia kenon tinemiskej niman kenon touikaskej inuan oksekimej. Yejua techijlia matitlanemilikan ken yejua niman matikchiuakan ken yejua. ¿Tiknemilia ika yejuin xtechkauilia tejuamej matitlanemilikan? Ka, yejuin techpaleuiya kuajli matitlanemilikan (Sal. 92:5; Prov. 2:1-5; Is. 55:9). Techpaleuiya matiktlapejpenikan tlen techyolpaktis niman techkauilia matikchiuakan tlen tikuelitaj (Sal. 1:2, 3). Kuajli tikitaj ika titlanemiliskej ken Jehová techpaleuiya. w18.11 19, 20 párrs. 7, 8

Tla tiknekij nochipa tinejnemiskej ipan tlen melauak, noneki tokojtiliskej maka tikchiuaskej tlen oksekimej texchiualtiskej. Ijkuak otikixmatkej tlen melauak, tochanejkauan niman akin imiuan touikayaj akin xkitekichiuiliaj Jehová xok ijkon otechnotskej ken yeuejkaui. Sekimej xtlaj otechijlikej ipampa tlen otikneltokakej, san ika, oksekimej xokuelitakej. Kanaj tochanejkauan, noso akin imiuan tomachtiaj ipan kaltlamachtijli, noso akin imiuan titekitij techijliskej imiuan matikpanoltikan iluimej. ¿Tlenon techpaleuis maka tikpanoltiskej yejon iluimej tlen kitlauelita Jehová? Noneki kuajli tikmatstoskej tleka Jehová xkineki matikpanoltikan yejon iluimej. Noijki uelis tomachtiskej toamatlajkuiloluan niman ijkon tikilnamikiskej kanon ualeuaj yejon iluimej. Ijkuak titlanemiliaj tleka xtikpanoltiaj yejon iluimej, kuajli tikasikamatij ika tikyolpaktijtokej toTajtsin (Efes. 5:10). Tla titlaneltokaj itech Jehová niman itech iTlajtol, xtechmojtis tlen oksekimej kijtoskej (Prov. 29:25). w18.11 11 párrs. 10, 12

Ijkuak itlaj nopatla ipan tonemilis, kanaj nimantsin tajmanaj niman kanaj san titlanemilijtokej itech nochi tlen xkuajli topan nochiua. Kanaj noijki yejon okimachili José. San ika, yejua opeuj kichiua nochi tlen ueliya niman ijkon Jehová ueliskia kiteochiuas. Ika yejon, maski tsauktoya, yejua nochipa onokojtili kichiuas nochi tlen kinauatiaya akin ompa tlayekanaya. Okichiuj ijkon ken ijkuak tekitiya itech Potifar (Gén. 39:21, 22). Ijkon ken José, kemantika kanaj tikixnamikiskej itlaj tlen xuelis tikpatlaskej. San ika, tla tikpiyaj ijyouilistli niman tikchiuaj nochi tlen tiuelij, Jehová techteochiuas (Sal. 37:5). Kemantika kanaj xtikasikamatiskej tlenon panotika, san ika, nochipa onias tlen uelis tikchiuaskej (2 Cor. 4:8). Tla nochipa chikauak tiktekichiuiliaj Jehová, yejua touan nemis. w18.10 29 párrs. 11, 13

Matiknemilikan ika tiknamikij yakaj akin tikixmatstokej niman tiktlakaitaj, san ika, yejua xkilnamiki totokayo niman nion xtechilnamiki. ¿Kenon tomachiliskiaj? Kanaj melak tajmanaskiaj, pampa tinochimej tiknekij matechixmatikan niman matechtlasojkaitakan. San ika, xsan tiknekij makimatstokan akinon tejuamej, tiknekij matechtlasojkaitakan niman makipatiojkaitakan tlen yotikchiujkej ipan tonemilis (Núm. 11:16; Job 31:6). San ika, ijkon ken panoua ika okseki tlen tiknekij, uelis tiknekiskej matechixmatikan niman matechtlasojkaitakan ken xok kinamiki. Noijki, tlaltikpaktli tlen kiyekana Satanás uelis kichiuas melak matiknekikan tiuejueyixtoskej niman melak miyekej matechixmatikan. Ijkuak panoua yejon, xtikueyichiuaj niman xtiktlakaitaj toTajtsin iluikakchane, Jehová, ken yejua kinamiki (Apoc. 4:11). w18.07 7 párrs. 1, 2

Xtechmojkatlachialtia ika Satanás niman xkuakualtin espíritus kichiuaj ika tlaltikpakchanejkej akin uejueyixtokej matekajkayauakan (1 Tim. 4:1, 2). Melak xkuajli ika tlayekankej ipan tlaneltokiltin tekajkayauaj. ¿Tleka? Pampa tla yakaj kineltoka tlen yejuamej kiteititiaj niman kichiua tlen toTajtsin xkuelita, kuakon, yejon tlaltikpakchane xuelis kipiyas se nemilistli tlen xkeman tlamis (Os. 4:9). Ijkuak Jesús ouajla ipan tlaltikpaktli, yejua kimatstoya ika tlayekankej ipan tlaneltokiltin kinkajkayauayaj tlaltikpakchanejkej. Yejua okimixkoijli: “¡Xkuajli tlen mexchia, escribas niman fariseos omexayakyejkej!, pampa nenkipanauiyaj mar niman tlaluaktli niman ijkon nenkichiuaskej yakaj matlaneltoka ken nemejuamej, niman ijkuak yotlaneltokak, nenkichiuaj okpa makinamiki mauiya Gehena [xok keman nemis] xijkon ken nemejuamej” (Mat. 23:15, TNM). Jesús chikauak okiminnots, niman okimijli: “Nemejuamej nemotaj yejua on diablo”, akin se “temiktijketl” (Juan 8:44). w18.10 7 párrs. 5, 6

¿Tleka Jesús okijto yejuin? Yejua sakin okijto: “Xpakikan niman xnemikan ikan paktli, pampa ne iluikak nenkiseliskej se ueyi tetlayokolijli. On tlakamej no ijki okintlauelitakej niman tlajtlamach ika okintlajyouiltijkej on tiotlajtojkej yejuan onemikoj yeuejkaui ijkuak xe nennemiyaj” (Mat. 5:12). Ijkuak itlatitlankauan Cristo okinchiuilijkej tlen xkuajli niman okinnauatijkej maka matenojnotsakan, yejuamej “ouajkiskej ne imixpan on tetlakanojnotskej ikan paktli”. Melauak, xokinyolpaktij ika okinuijuitekej, yejuamej pakiyaj pampa okinpijpinaujtijkaj ipampa Jesús (Hech. 5:41). Ipan yejuin tonaltin, akin tiktekichiuiliaj Jehová noijki tikxikouaj ika pakilistli ijkuak techtlaueltokaj noso ijkuak tikixnamikij uejueyimej tlaueltin ipampa Jesús (Sant. 1:2-4). Ijkon ken itlatitlankauan Cristo, tejuamej noijki xtechyolpaktia matechtlajyouiltikan noso matechtlaueltokakan. San ika, tla tiyolmelaujkanemij itech Jehová, yejua techmakas kojtilistli niman ijkon titlaxikoskej. Ijkuak tikyolpaktiaj Jehová, “toTajtsin akin paktika”, tejuamej tiyolpakij maski techtlaueltokaj niman maski techtlauelitaj tochanejkauan (1 Tim. 1:11, TNM). w18.09 21 párrs. 18-20

Pampa tinemij ipan tonaltin tlen melak xkuajkualtin, miyekej tlaltikpakchanejkej melak najmanaj niman xok kinekij nemiskej (2 Tim. 3:1-5). Nochi xiujtin nomiktiaj ipantsin 800,000 tlaltikpakchanejkej, kijtosneki ika ijkuak panoua 40 segundos nomiktia se tlaltikpakchane. Teajman ika hasta sekimej tokniuan ijkon yonomachilijkej niman yonomiktijkej. Ipan yejuin tonaltin, miyekej tokniuan kixnamiktokej tlen melak ouijtika niman noneki matikinyolseuikan niman matikintlasojtlakan. Sekimej kintlaueltokaj noso kinpijpinaujtiaj. Oksekimej kintlajtolchijchiuiliaj ipan intekiyo niman xkuajli intech tlajtouaj. Noso kanaj melak yosiaujkej pampa miyek horas yotekitkej noso melak kintsontekonsiauitia intekiyo. Niman nemij akin kipiyaj ueyi tlauejli imiuan inchanejkauan, pampa kanaj imixnamik xtlaneltoka itech Jehová niman san kintejteneujtika. Pampa ijkon inpan nochiua, miyekej tokniuan kimachiliaj ika xok kipiyaj kojtilistli niman hasta kanaj kinemiliaj ika xakaj kinpatiojkaita. w18.09 13 párrs. 3, 5

Tajtin akin kichiuaj ken Cristo tekitij iuan Jehová ijkuak kinpaleuiyaj inkoneuan makinemilikan kenon ueliskej kitekichiuiliskej Jehová ika tlayekapan. Miyekej tajtin ijkon yokichiujkej. Niman aman inkoneuan chikauak kitekichiuiliaj toTajtsin, hasta uejka ontlapaleuiyaj. Sekimej tekitij ken misioneros, oksekimej tlapaleuiyaj ken precursores kampa nonekij tenojnotskej niman oksekimej tekitij ipan Betel. Niman melauak ika ijkuak inkoneuan uejka nemij, intajuan xmiyekpa kimitaj ken kuelitaskiaj. Maski ijkon, yejuamej kinyolchikauaj inkoneuan makitekichiuilijtokan Jehová maski san kanon nemiskej. ¿Tleka? Pampa yejuamej melak kinyolpaktia kitaskej ika inkoneuan kachtopa kichiujtokej tlen kineki Jehová ipan innemilis. Miyekej itech yejon tajtin kanaj nomachiliaj ken Ana, akin okijto ika okitlaneujtika Jehová ikoneuj Samuel. Yejon tajtin kitaj ika se ueyi tlateochiualistli ika ijkon tekitij iuan Jehová (1 Sam. 1:28). w18.08 24 párr. 4

Jesús xokijto tla xuelis kalakis, yejua noijki okijto: “Dios mechtiochiua nemejuamej pobres, pampa nenkalakiskej ne kampa Dios tekiuajtitikaj” (Luc. 6:20). Ika yejon tlajtoltin xokijtosnek ika nochimej akin xkipiayaj tomin kikakiskiaj niman kiseliskiaj tlateochiualistin. Melak miyekej akin xkipiayaj tomin xokitokakej Jesús. Yemelak tej, xuelis tikijtoskej ika yakaj uelis iuan nouikas toTajtsin san pampa kipiya tomin noso pampa xmiyek kipiya. Ipan ikalpan Jehová nemij tokniuan akin kipiyaj tomin niman noijki nemij akin xmiyek kipiyaj. Maski ijkon, nochimej kitlasojtlaj Jehová niman kitekichiuiliaj ika nochi inyojlo. Biblia kinnauatia akin kipiyaj tomin maka “ma kitlalikan inyojlo itech on miyek tlen kipiaj, pampa on san panos”. Noijki kimijlia: “Más kuajli tla yej itech Dios kitlaliskej inyojlo” (1 Tim. 6:17-19). Niman noijki kimijlia nochimej akin kitekichiuiliaj Jehová, maski akin kipiyaj tomin noso xmiyek kipiyaj, ika melak teijtlako tiktlasojtlas tomin (1 Tim. 6:9, 10). Tla tikimitaj tokniuan ijkon ken kimita Jehová, xtikinchikoitaskej san ipampa tlen kipiyaj noso xkipiyaj. w18.08 10, 11 párrs. 11, 12

Tikmatij ika melak tiknektokej tikititiskej Jehová ika tiktlasojkamatij pampa otechtlapejpeni matinemikan ipan ikalpan. Tikmatij ika melak kuajli tlen otikchiujkej ijkuak otiktlapejpenijkej tikmakaskej nochi tonemilis. Tikmapeuaj nochi tlen xkuajli. Niman tikintlasojtlaj niman tikintlakaitaj tokniuan, pampa tikmatstokej ika yejuamej noijki iyaxkauan Jehová (Rom. 12:10). Biblia kuajli techijlia yejuin: “Jehová xkitlalkauis ikalpan, nion xkikauas tlen iyaxka” (Sal. 94:14). Yejua kichiuas tlen yotechijli maski san tlenon topan manochiua. Niman maski tla timikij, Jehová xtechilkauas (Rom. 8:38, 39). “Tla tinemij noso tla timikij, titeyaxkauan itech toTeko [Jehová]” (Rom. 14:8). Melak tiknekij ika mayejko tonajli ijkuak Jehová oksejpa kinyolitis akin iuan nouikaj niman akin itech oyolmelaujkanenkej (Mat. 22:32). Niman hasta amantsin tikpiyaj miyek tlateochiualistin. Ken Biblia kijtoua, “yolpaki se país akin iTajtsin Jehová, se kalpan akin yejua okitlapejpeni itlatki yes” (Sal. 33:12). w18.07 26 párrs. 18, 19

Sekimej kanaj kineltokaj ika onka tlen uelis kitlapejpeniskej inseselti, ken itech tlenon nomachtiskej niman itech tlenon tekitiskej. Kijtouaj ika uelis kitlapejpeniskej kichiuaskej tlen yejuamej kinekiskej tla intlamachilis kinkauilia. Kanaj kilnamikij tlen Pablo okimijli itech tlakuajli akin chantiyaj Corinto: “¿Tlika xuelis nikchiuas on tlen nikneki san ipampa itlamachilis okse tlakatl?” (1 Cor. 10:29). Melauak, tikpiyaj tlamakaualistli ika tiktlapejpeniskej yejuin. Maski ijkon, kipiya tikilnamikiskej ika san itech seki tlemach tikpiyaj tlamakaualistli niman ika tlen tiktlapejpeniskej kichiuas matikixnamikikan tlen kuajli noso tlen xkuajli. Itech yejuin, tikasikamatij tleka Pablo okijto yejuin tlajtoltin itech tlaxelojli tlen aman tikitstokej. Yejuin kuajli techasikamachiltia ika, tlen tejuamej tikuelitaj xyejon tlen itech noneki toyekanaskej ijkuak tiktlapejpeniskej tlenon tikchiuaskej. w18.04 10 párr. 10

Se tokniuj kanaj uelis kijtos ika kiueyichiua toTajtsin, san ika, ipan inemilis kichiujtika tlen xkuajli (Jud. 11). Kanaj melak tenojnotsa niman yauj nochi tlanechikoltin, san ika, noijki kitemiltijtika itsontekon ika auilnemilistli, ika kipiyas miyek tomin noso kanaj ika ken kitlauelita se tokniuj (1 Juan 2:15-17; 3:15). Yejuin uelis kichiuas matlajtlako. Kanaj oksekimej xkimatij tlenon tiknemiliaj noso tikchiuaj, san ika, Jehová kema kita nochi niman kimati tla yemelak iuan tinemij noso ka (Jer. 17:9, 10). Maski ijkon, Jehová xnimantsin kinemilia ika xok uelis toyektlaliskej. Tla yejua kita ika itiktlalkauijtokej, yejua techijlia yejuin: “Notech xuajmokuepakan”. Yejua kineki matikmapeuakan tlen xkuajli, yejuin melak noneki ijkuak tikixnamiktokej itlaj tlen uelis kichiuas matitlajtlakokan (Is. 55:7). Tla ijkon tikchiuaj, yejua kijtoua ika techpaleuis niman techmakas kojtilistli tlen ika uelis tikpopoloskej nochi xkuakualtin ileuilistin (Gén. 4:7). w18.07 18 párrs. 5, 6