Mayo

Ipan xiujtin tlen kemach yopanokej, miyekej yokikaujkej inchan niman aman oksekan yochantitoj. Kanaj uelis tipeuaskej tomachtiskej tikintlajpaloskej ika intlajtol. Noijki techpaleuis tla tiuelij seki tlajtoltin tlen kichiuas makinekikan techkakiskej. Sakin, uelis tikinnojnotsaskej itech página ipan Internet jw.org niman tikimititiskej videos niman amatlajkuiloltin tlen yokiskej ipan intlajtol. Jehová yotechmakak tlanechikojli Nemilistli niman Tekitl niman ijkon matechpaleui ipan totenojnotsalis. Tlen ompa tiuelij melak techpaleuiya kuajli matitenojnotsakan ijkuak ika okpa tontetlajpaloskej niman ijkuak titemachtiskej ika Biblia. Tajtin kinpaleuiyaj inkoneuan makipetlanaltikan intlauil ijkuak kinmachtiaj inkoneuan matlanankilikan ken yejuamej kasikamatij. Ijkuak se konetl kijtoua tlen yejua kimachilia, maski kijtoua tlen xouijtika, kichiua ika akin techontlajpalouaj makitakan ika yokinextijkej tlen melauak (1 Cor. 14:25). w18.06 22, 23 párrs. 7-9

Techpaleuis tikilnamikiskej ika yeuejkaui xtikixmatiyaj toTajtsin (Efes. 2:12). San ika, ika tlasojtlalistli yejua okichiuj matiknisiuikan (Os. 11:4; Juan 6:44). Niman Cristo noijki otechseli ika pakilistli. Otechkauili matikalakikan kampa nemij nochimej ichanejkauan toTajtsin. Tla Jesús yotechseli maski titlajtlakolejkej, ¿kenon tiueliskiaj tejuamej xtikinseliskej oksekimej? Iajsitika ijkuak popoliuis tlen xkuajli ipan tlaltikpaktli, kuakon tikmatij ika miyekej xsan sekan nemiskej, miyekiyas tlen xkuajli kinemiliaj itech oksekimej niman notlauelitalos (Gál. 5:19-21; 2 Tim. 3:13). Maski ijkon, akin tiktekichiuiliaj Jehová tiktejtemouaj tikpiyaskej “itlamatkilis Dios”, tlen xtechikoita niman kichiua maonia yolseuilistli (Sant. 3:17, 18). Techyolpaktia touikaskej imiuan akin ualeuaj itech okseki kalpamej, ika toyojlo tikseliaj tlen sejneka kichiuaj niman hasta tiknekij tiueliskej intlajtol. Ijkuak ijkon tikchiuaj, tikpiyaskej yolseuilistli ijkon “ken se atentli” niman melajkayotl “ken mar tlen koxontika” (Is. 48:17, 18). w18.06 12 párrs. 18, 19

Se soldado akin xkintlaliaya ikakuan noso zapatos, xueliskia ontlaixnamikis. Yejuin kaktin kintilauayaj ika yeyi cuero mekatl tlen kuajli sasalijtoyaj, niman kuajli kinmikxinamikiya. Ken tlachijchiujtin katkaj kichiuayaj melak matlaxikokan niman maka makimikxikoko. Soldados romanos kintlaliayaj yejuin kaktin ijkuak ontlaixnamikiyaj, san ika, akin tikchiuaj ken Cristo noijki kentla tikintlaliskiaj kaktin ijkuak tikominijliaj oksekimej kuajli tlajtoltin itech yolseuilistli (Is. 52:7; Rom. 10:15). Maski ijkon, noneki yolchikaualistli niman kuakon titenojnotsaskej nochipa ijkuak tiueliskej. Se telpochtli akin itoka Bo niman kipiya 20 xiuitl, kijtoua: “Yeuejkaui, nechmojtiaya nikinnojnotsas akin imiuan ninomachtiaya. Niknemilia pampa nipinauiya. Yemelak xnikmati tleka ijkon ninomachiliaya. Aman, melak nikuelita nikinnojnotsas notelpochikniuan”. Miyekej telpokamej yokitakej ika kuajli nomachiliaj tenojnotsaskej ijkuak kuajli yonoyektlalijkej. ¿Tlenon uelis tikchiuas niman noijki ijkon timomachilis? w18.05 29 párrs. 9-11

Jesús okimijlika itlatitlankauan: “Nejua nemechmaka noyolseuilis” (Juan 14:27). ¿Kenon techpaleuiya iyolseuilis matiktemakakan tlakilyotl? Ijkuak titlaxikouaj ipan tenojnotsalistli, tikmatij ika tikyolpaktiaj Jehová niman Jesús. Niman yejon kichiua nochipa matikmachilikan yolseuilistli (Sal. 149:4; Rom. 5:3, 4; Col. 3:15). Ijkuak yokimijlika itlatitlankauan ika kinekiya melauak mapakikan, Jesús okintomili ika melak nonekiya matetlasojtlakan niman maka makichiakan makinkuepilikan itlaj (Juan 15:11-13). Sakin, okimijli: “Nemechtokayotia notetlajsojkauan”. ¡Se tetlayokolijli melak kualtsin! ¿Niman tlenon nonekiya kichiuaskej itlatitlankauan niman ijkon nochipa nouikaskej iuan Jesús? Nonekiya kitemakatoskej tlakilyotl (Juan 15:14-16). Yopanoka ome xiuitl ika Jesús okinnauatijka makiteijlikan: “Ye uajlau on tonajli ijkuak Dios tlamandaros” (Mat. 10:7). Ijkon tej, ipan sa ika nochi yeuajli achto ika mikiskia, okinyoleuj matlaxikokan niman makichiujtiakan yejon tekitl (Mat. 24:13; Mar. 3:14). w18.05 20, 21 párrs. 15, 16

Telpochtli, xtejtemo tikyolpaktis Jehová ipan monemilis niman xtejtemo chikauak tiktekichiuilis. Kanaj oksekimej telpokamej nochipa san noyolpaktijtokej niman mitsyolchikauaj noijki xchiua tlen yejuamej kichiuaj. Ajsis tonajli ijkuak nonekis tikteititis tla yemelak tikneki tikchiuas tlen yotiknemili. Maka xkauili ika tlen oksekimej mitschiualtiaj makichiua xkixtenpolo tlen tikchiuasneki. Onka miyek tlen uelis tikchiuas niman ijkon tikixnamikis tlen mitschiualtiaj oksekimej telpokamej. Se neskayotl, xtlalkaui nochi tlen tikitas ika uelis kichiuas xpiya tlatlatalistin (Prov. 22:3). Niman xtlanemili itech kenon melak xkuajli tontlamiskia tla tikchiuaskia tlen xkuajli. Okse tlen noijki mitspaleuis yejua tla tikselia ika noneki oksekimej mamitspaleuikan. Tla tiyolyemanki, tijkakis ika pakilistli ken mitsnonotsaskej motajuan niman oksekimej tokniuan akin chikauak intlaneltokil (1 Ped. 5:5, 6). ¿Tiyolyemanki niman tijkaki tlen mitsijliaj? w18.04 28, 29 párrs. 14-16

Itech tlen Jesús okimijli tlanechikoltin tlen onkatkaj Asia Menor, ones ika melak kipatiojkaitaya tlen kichiuayaj inomachtijkauan. Tikitaj ika opeuj kimijlia tlanechikojli tlen onkatka Tiatira yejuin tlajtoltin: “Nejua nikixmati motekiu, motetlajsojtlalis, motlaneltok, niman moijyouilis. Niman nikmatstikaj ika aman más titekiti xken achtopa” (Apoc. 2:19). Jesús xsan okijto ika melak miyek tlen yokichiujkaj, noijki okinteneuili inkualneskayouan tlen kinpaleuiaya kuajli matekitikan. Maski sekimej chikauak okinnots, opeuj niman otlan ika tlajtoltin tlen teyolchikauaj (Apoc. 2:27, 28). Jesús yejua kinyekana tlanechikoltin, kuakon kipiya tlanauatijkayotl. Ika yejon, xnoneki techtlasojkamachilis itech tlen tikchiuaj ipampa, maski ijkon kineki kichiuas. Tikmatij ika tlayekankej uelij miyek itech tlen Jesús okichiuj. w19.02 16 párr. 10

Ipan kachtopa siglo, Jehová okitekitilti grupo akin tlayekanaya ipan nochi tlanechikoltin makinyolchikaua nochimej akin kichiuayaj ken Cristo, niman noijki tokniuan akin kinyekanayaj tlanechikoltin. Yejuamej okintitlankej omemej tlakamej akin teuan nemiyaj ipan grupo, Pedro niman Juan, niman ijkon makitlajtlanilikan Jehová ika akin kemach yopeujkaj kichiuaj ken Cristo makiselikan espíritu santo (Hech. 8:5, 14-17). Kuajli tikmatstokej ika yejuin melak okiyolchikauj Felipe niman noijki nochimej akin kemach yopeujkaj kichiuayaj ken Cristo. Aman, Grupo akin Tlayekana ipan nochi tlanechikoltin itech iteixpantijkauan Jehová kinyolchikaua tokniuan akin tekitij Betel, akin chikauak kitekichiuiliaj toTajtsin niman, noijki nochimej tokniuan ipan tlaltikpaktli. Ijkon ken ipan kachtopa siglo, tinochimej tipakij ika tikseliaj inyolchikaualis. Noijki, Grupo akin Tlayekana ipan nochi tlanechikoltin okikixti ipan 2015 amatlajkuilojli Xmokuepa itech Jehová tlen kinyolchikaua tlaltikpakchanejkej ipan nochi tlaltikpaktli manokuepakan itech tlen melauak. w18.04 19 párrs. 18-20

Miyekej tlaltikpakchanejkej kinemiliaj ika tla kipiyaj miyek tlamakaualistli melak kuajli ontlamiskej. San ika, tlen melauak, tlamakaualistli tlen xtlaj kiteltia melak teijtlako ken se cuchillo tlen melak tlateki. San ika ¿kenon yeskia tlaltikpaktli tla xoniaskia itlaj tlen matechtelti? Se enciclopedia kijtoua: “Itlanauatiluan tlaltikpakchanejkej akin kuajli noyekanaj kichiuaj ika maonia tlen uelis se kichiuas niman noijki tlen xuelis kichiuas”. Yemelak, yejuin itlaj tlen ouijtika. San matikonnemilikan kenon melak miyek tlanauatiltin tlen tlakamej yokimijkuilojkej, niman noijki kenon melak miyekej abogados niman teyolkuitijkej nonekij niman ijkon makiteasikamachiltikan niman makintekitiltikan. Toyekanaskej ika tlen Jesús okijto kijtosneki tikchiuaskej ome tlemach. Kachtopa, tikseliskej tlamachtijli itech tlen melauak tlen yejua otemachti. Niman ika ome, tochiuaskej inomachtijkauan. Tla tikchiuaj, tikpiyaskej melauak tlamakaualistli. ¿Tlamakaualistli itech tlenon? Jesús sakin okijto: “Nochimej yejuan tlajtlakouaj, yejuamej tlanamaktin itech on tlajtlakojli”. Niman noijki okijto: “Tla Tekoneuj mechmakaua, yemelak nentlamakaualtin yeskej” (Juan 8:34; Juan 8:36, TNM). w18.04 6, 7 párrs. 13, 14

Tinochimej kuajli tomachiliaj ijkuak tinemij imiuan akin najmanaj ipampa tlen tikmachiliaj niman ken tinemij. Yejuamej nokojtiliaj kasikamatiskej tlen tiknemiliaj niman tlen tikmachiliaj. Techpaleuiyaj ijkuak kitaj tlen techpoloua, kemantika hasta maski xitikintlajtlaniliaj. Tikintlasojkaitaj akin najmanaj intech oksekimej noso teasikamatij. Akin tikchiuaj ken Cristo tiknekij titeasikamatiskej. San ika, noijki tikmatstokej ika kemantika noneki tokojtiliskej tikchiuaskej yejon. ¿Tleka? Pampa titlajtlakolejkej niman san titlanemiliaj totechkopa (Rom. 3:23). Sekimej kanaj ouijtika kitaj ipampa ken onoskaltijkej niman tlen inpan onochiuj. Noijki, techijtlakoua tlen oksekimej kichiuaj, pampa ipan yejuin tonaltin miyekej san yejuamej notlasojtlaj, xakaj najmana itech tlen oksekimej inpan nochiua (2 Tim. 3:1, 2). San ika, uelis tikchiuaskej ken Jehová niman Jesús niman tajmanaskej inpampa oksekimej. w19.03 14 párrs. 1-3

Tlanauatijli majtlaktli xtekauiliaya titenexikolitas, kijtosneki melak tikileuis tlen okse itlatki (Deut. 5:21; Rom. 7:7). Ika yejuin tlanauatijli, Jehová okinmachti itekipanojkauan ika nonekiya kitlajpiyaskej tlen kinemiliaj niman tlen kimachiliaj, kijtosneki, inyojlo. Yejua kimatstika ika tlen xkuajli tikchiuaj ualeua itech tlen xkuajli tiknemiliaj niman itech tlen xkuajli tikmachiliaj. Ijkon ipan onochiuj tekiuaj David. Xkijtosneki tla xkuajli katka iyojlo, san ika, se tonajli okileui se siuatl akin yononamiktijka, niman yejon okichiuj matlajtlako (Sant. 1:14, 15). Iuan oauilnen, okiyejyeko kikajkayauas iueuentsin niman noijki okichiuj makimiktikan ipan se guerra (2 Sam. 11:2-4; 12:7-11). Jehová xsan kita tlen nesi. Yejua kita tlen tikpiyaj ipan toyojlo (1 Sam. 16:7). Xuelis tikiyaniliskej tlen tiknemiliaj, tlen tikmachiliaj nion tlen tikchiuaj. Yejua kitejtemoua tlen kuajli tikchiuaj niman techpaleuiya manoskalti. San ika, noijki kineki matikitakan tlen xkuajli tiknemiliaj niman kineki matijkixtikan, ijkon xkichiuas matitlajtlakokan (2 Crón. 16:9; Mat. 5:27-30). w19.02 21 párr. 9; 22 párr. 11

Biblia kijtoua ika “Moisés sen tlakatl yejuan sanoyej yolyemanki katka xken yakaj okse ipan in tlaltikpaktli” (Núm. 12:3). ¿Kijtosneki yejuin ika yejua xkojtik katka, xkimatiya tlen kichiuas niman xyolchikauak? Ijkon kimixmatij akin yolyemankej. San ika, yejon xmelauak. Moisés yejua yolchikauak katka, kojtik niman kuajli kimatstoya tlen kichiuas. Ika itlapaleuilis Jehová okixnamik ueyi tekiuaj itech Egipto, okinyekan kanaj 3 millones ipan tlaluaktli niman okinpaleui israelitas makintlanikan intlauelikniuan. Tikmatstokej ika tejuamej xtikpiyaj tlaueltin ken Moisés, san ika mojmostla imiuan tinemij tlaltikpakchanejkej noso onka itlaj tlen kichiua ouijtika matikmachilikan tiyolyemankej yeskej. San ika, onka tlen ika noneki tiyolyemankej yeskej. Pampa Jehová kijtoua ika akin “yolyemankej itech toTEKO, kiseliskej on kuajli tlajli” (Sal. 37:11). Matotlajtoltikan: “¿Niknemilia ika nejua niyolyemanki? ¿Ijkon nechitaj oksekimej?”. w19.02 8 párrs. 1, 2

Tinochimej akin titlaltikpakchanejkej tikpiyaj totlamachilis. Adán niman Eva kipiayaj intlamachilis. Sakin ika xokitlakamatkej itlanauatil toTajtsin, oniyankej. Yejuin okiteititi ika intlamachilis kinpasolouaya. Totlamachilis techijlia tlenon kuajli niman tlenon xkuajli, niman techpaleuiya matoyekanakan ipan tonemilis. Uelis tikijtoskej ika yeskia kentla se brújula. Se brújula tlen kuajli, kipaleuiya akin kiyekana barco niman ijkon makuika kampa noneki yas. San ika ¿tlenon panoua tla yoijtlakauj? Ajakatl niman mar uelis oksekan kuikaskej barco. Noijki ijkon, ijkuak totlamachilis kuajli tekiti pampa kuajli yotikmachtijkej, uelis kuajli techyekanas, san ika, ijkuak totlamachilis xkuajli tikmachtiaj uelis techuikas kampa uelis topan nochiuas tlen xkuajli. Tla xkuajli tikmachtiaj totlamachilis, xtechijlis ijkuak itlaj xkuajli niman ika xkipiya tikchiuaskej (1 Tim. 4:1, 2). Hasta uelis techtlaneltokiltis ika “tlen xkuajli yejon tlen kuajli”. w18.06 16, 17 párrs. 1-3

Noneki tikitaskej niman tikmapeuaskej tlanemililtin tlen onka ipan yejuin tlaltikpaktli maski xnesis tla techijtlakos. Se neskayotl, ipan se noticia uelis itlaj kijtoskej niman ijkon tetlanemililtiskej ika melak kuajli tlen sekimej kinemiliaj itech política. Noijki, uelis kipanoltiskej itlaj kampa kinyolchikauaj tlaltikpakchanejkej makichiuakan tlen miyekej kuelitaskiaj kichiuaskej. Ipan seki películas niman amoxtin, kijtouaj ika san tejuamej niman ika san tochanejkauan melak ueyi kijtosneki. San ika, yejuin kixnamiki iTlajtol toTajtsin pampa ompa techmachtia ika tla tiknekij tinemiskej ika toyojlo, noneki tiktlasojtlaskej Jehová, niman yejuin noijki kichiuas ika tochanejkauan mapakikan (Mat. 22:36-39). Yejuin xkijtosneki ika xkuajli tla toyolpaktiaj ika tlen xkipiya tlen xkuajli. San ika, noneki matotlajtoltikan: “¿Nikixmatstika katlejua tlanemililtin ualeuaj itech yejuin tlaltikpaktli maski xnesi tla teijtlakoua? ¿Nikinkauilia nokoneuan nochi makipouakan niman makitakan? ¿Ninotlajpiya nejua? ¿Nikinmachtia nokoneuan tlen kinemilia Jehová niman ijkon xtlanemiliskej ken tlaltikpakchanejkej?”. w18.11 22 párrs. 18, 19

Jehová techititia ika touan nemi pampa techtlasojtla niman najmana topampa. Matikitakan kenon kiteititia ika techtlasojtla ijkuak techijlia: “Tejua yotimochiuj melak kualtsin ixpan noixtololojuan, yomitstlakaitakej, niman nejua yonimitstlasojtlak” (Is. 43:4, TNM). Xakaj nion xitlaj uelis kichiuas ika Jehová makikajkaua ika kintlasojtla itekipanojkauan. Yejua xkeman techkauas (Is. 54:10). Jehová xtechijlia tla techkixtilis nochi tlen techtlajyouiltiaj, san ika, yejua xkitekauilis melak matechijtlakokan, ijkon ken atl mitsamimiktis noso tlitl mitstlatis. Kuajli techijlia ika touan nemis niman techpaleuis matikixnamikikan tlauejli tlen tikpiyaskej. Niman techpaleuis matikpiyakan yolseuilistli niman matiyolmelajkanemikan maski tla timikij (Is. 41:13; 43:2). Tla titlaneltokaj itech Jehová, yejua touan nemis, noijki tikxikoskej tlauejli tlen tikpiyaskej ika kojtilistli niman ika yolchikaualistli. w19.01 3 párrs. 4-6

Tla titelpochtli, kanaj akin mitsmachtiaj ipan kaltlamachtijli, akin kiteijliaj tlenon uelis ipan titekitis noso oksekimej, kanaj yejuamej yomitsijlikej xmomachti ipan se ueyi kaltlamachtijli niman ijkon sakin tiktlanis ueyi tomin. San ika, Jehová mitsijlia xkajsi okse ojtli. Melauak, yejua kineki kuajli xmomachti niman ijkon kuajli titekitis tla yotlan timomachtia (Col. 3:23). San ika, ijkuak itlaj tiknekis tiktlapejpenis tlen ueyi kijtosneki ipan monemilis, Jehová mitsijlia xmoyekana ika itlajtolyekanalis. Yejuin tlajtolyekanalistin mitspaleuiskej xnemili tlenon kineki matikchiuakan ipan yejuin sa itlamiyan tonaltin (Mat. 24:14, TNM). Jehová kimatstok tlenon ipan nochiuas yejuin tlaltikpaktli niman ika sa achijtsin tonaltin kipoloua (Is. 46:10; Mat. 24:3, 36, TNM). Niman yejua melak kuajli techixmatstika. Kimatstok tlenon techyolpaktia niman tlenon kichiua matinemikan ika toyojlo, niman kimatstok tlenon techyolkokoua niman tlenon techajmana. Yejua ika, maski nesi ika sekimej kuajli techtlajtolpaleuiyaj, xtlaj ika techpaleuis tla xnoyekanaj ika iTlajtol toTajtsin. w18.12 19 párrs. 1, 2

Okijto ika “akin yolyemankej nemiskej ipan tlaltikpaktli, niman melauak kinextiskej inyolpakilis ika ueyi yolseuilistli”. ToTajtsin okichiuj ika David noijki makijto yejuin tlajtoltin: “Akin yolmelaujkej nemiskej ipan tlaltikpaktli, niman nochipa ipan chantiskej” (Sal. 37:11, 29; 2 Sam. 23:2). ¿Kenon okinpaleui yejuin tlajtoltin akin kinekiyaj kichiuaskej tlen toTajtsin kineki? Okinpaleui makineltokakan ika onias se xochitlalpan ika tlayekapan kampa san nemiskej akin yolmelaujkej, ijkon ken katka Xochitlalpan Edén. Sakin, miyekej israelitas akin kijtouayaj ika kitekichiuiliayaj toTajtsin okitlalkauijkej. Ika yejon, toTajtsin okitekauili ika Babilonia makinotlatkiti kampa yejuamej chantiyaj, makixpolokan país niman makinuikakan israelitas (2 Crón. 36:15-21; Jer. 4:22-27). San ika, iteotlajtokauan toTajtsin okijtokej ika panoskia 70 xiuitl niman israelitas oksejpa nokuepaskiaj inchan. Niman kema ijkon onochiuj. San ika, yejuin teotlajtoltin noijki techpaleuiyaj ipan yejuin tonaltin techititiaj ika onias se xochitlalpan ika tlayekapan. w18.12 4 párrs. 9, 10

Ipan yejuin tonaltin, ¿uelis techpaleuis tlen kijtouaj tlaltikpakchanejkej xijkon ken iTlajtol toTajtsin? Jesús okijto ika tlamachilistli “noteititia yejua ika on tlen nochiua” (Mat. 11:19). Maski tlaltikpakchanejkej kitekitiltiaj miyek tecnología, xuelij kiyektlaliaj uejueyimej tlaueltin tlen kichiua maka matipakikan. Miyekej techikoitaj, onka guerras niman nochiua tlen xkuajli. Noijki melak kitekauiliaj maauilnemilo. ¿Tikitaj tla nochi yejuin yokichiuj ika tlaltikpakchanejkej maka sa makipiyakan tlaueltin inuan inchanejkauan, maka maoniakan kokolistin niman okseki tlaueltin? Ka, ken miyekej yokitakej, yejuin san yokichiuj mamiyekiya tlen xkuajli. San ika, akin kichiuaj ken Cristo niman tlanemiliaj ken toTajtsin yolpakij inuan inchanejkauan, xkimajsi kokolistin tlen kimajsi akin auilnemij niman yolpakij imiuan imikniuan ipan nochi tlaltikpaktli (Is. 2:4; Hech. 10:34, 35; 1 Cor. 6:9-11). ¿Xmelak ika itlanemililuan toTajtsin melak uejueyixtokej xijkon ken intlanemililuan tlaltikpakchanejkej? w18.11 20 párrs. 8-10

Melauak ika tikyejyekouaj nochipa kuajli touikaskej imiuan tochanejkauan niman tokojtiliaj tikinchiuiliskej tlen kuajli. San ika, noneki totlajpiyaskej maka tikchiuaskej tlen toTajtsin kitlauelita san pampa tiknekiskej tikinyolpaktiskej. San tiknekij melak touikaskej imiuan akin kitlasojtlaj Jehová. Nochimej akin nejnemij ipan tlen melauak noneki chipaujkanemiskej (Is. 35:8; 1 Ped. 1:14-16). Ijkuak otiuelkej tlen melauak, ononek seki tikpatlaskej ipan tonemilis. Sekimej melak ones ika onopatlakej. Maski san kenon, noneki totlajpiyaskej maka tochiuaskej ken tlaltikpakchanejkej akin xkitekichiuiliaj toTajtsin. ¿Tlenon techpaleuis? Titlanemiliskej itech tlen okichiuj Jehová niman ijkon uelis tichipaujkej yeskej. Yejua otlatlaxtlauj ika iyesyo iKoneuj, Jesucristo (1 Ped. 1:18, 19). Tla tikilnamikij kenon melak ueyi kijtosneki tlen Jesús okichiuj, nochipa tichipaujkanemiskej ixpan Jehová. w18.11 11 párrs. 10, 11

Miyekej tokniuan akin chikauak kitekichiuiliaj Jehová kuajli kijtouaj ika ijkuak itlaj onopatlak ipan innemilis melak okinpaleui tenojnotsaskej. Kuakon, tla tikchiuaj nochi tlen tiuelij niman tla titlaneltokaj itech Jehová, tikpiyaskej yolseuilistli maski san tlenon mapano. Kanaj sakin tikitaskej ika pampa xotijkauilijkej ika melak matechajmana ijkuak itlaj onopatlak ipan tonemilis, aman kuajli touikaj iuan Jehová. Ipan yejuin tonaltin, uelis nimantsin itlaj nopatlas ipan tonemilis. Kanaj techijliskej ika aman okse tekitl tikchiuaskej ipan itekiyo toTajtsin, kanaj tipeuaskej tikualoskej noso kanaj nonekis tikinpaleuiskej tochanejkauan. San ika, maski san tlenon mapano, uelis kuajli tikmatstoskej ika toTajtsin najmanas topampa niman techpaleuis ijkuak nonekis (Heb. 4:16; 1 Ped. 5:6, 7). Kuakon, amantsin matokojtilikan tikchiuaskej nochi tlen tiuelij. Matikchiuilikan teoyotl toTajtsin Jehová niman nochipa itech matitlaneltokakan. Tla ijkon tikchiuaj, tikpiyaskej yolseuilistli tlen ualeua itech Jehová maski san tlenon mapano. w18.10 30 párr. 17; 31 párrs. 19, 22

Ipan Biblia miyek onka tlen techititia ika Jehová kimasikamati itekipanojkauan. Xnemili kenon Jehová okipaleui Samuel makijli ueyi teopixki Elí tlen xkuajli ipan nochiuaskia ken nestika ipan 1 Samuel 3:1-18. ITlanauatil Jehová kinnauatiaya kokonej makintlakaitakan akin youeuentsintiakaj. Kema, nonekiya kintlakaitaskej akin tlayekanayaj (Éx. 22:28; Lev. 19:32). Yejua ika, xuelis tiknemiliskej tla Samuel saniman onokuiteuj niman okijlito Elí ika toTajtsin kitlajtlakolmakaskia. Biblia techijlia ika Samuel “nomojtiaya kijlis Elí yejon tlatlachalistli”. San ika, toTajtsin okasikamachilti Elí ika yejua akin kinotstoya Samuel. Kuakon, Elí okijli Samuel maka makiyanili tlen toTajtsin okijlika. Samuel okitlakamat Elí niman nochi okijli, niman tlen okijto Samuel san noijki tlen yokijlikaj Elí (1 Sam. 2:27-36). Yejuin tlen inpan opanok Samuel niman Elí techmachtia ika toTajtsin melak teasikamati niman ika melak tlamachilise. w18.09 23 párr. 2; 24 párrs. 4, 5

Melak miyekej tekajkayauaj. Se revista tlen miyekej kixmatij otlajto itech “Tleka titekajkayauaj”, ompa onoijkuilo yejuin: “Miyekej yokitakej ika titekajkayauas itlaj tlen nochipa tikchiuaj”. Miyekej tlaltikpakchanejkej tekajkayauaj pampa xkinekij itlaj inpan manochiua noso xkinekij makitakan tlen xkuajli kichiujtokej, noijki tekajkayauaj pampa kinekij kipiyaskej se ueyi tekitl, tomin noso okseki tlemach. Noijki kijtoua ika sekimej xkintekiyomaka kinkajkayauaskej “akin xkimixmatij, akin imiuan tekitij, akin imiuan nouikaj niman inchanejkauan”. ¿Kenon ontlami ijkuak se tekajkayaua? Xok itech tlaneltokaj niman xok iuan nouikaj. David okijli Jehová ipan se teoyotl: “Tejua mitsyolpaktia tlen melauak onka ipan iyojlo se tlaltikpakchane” (Sal. 51:6). Kema, David kimatstoya ika toTajtsin kiyolpaktia tlen tikpiyaj ipan toyojlo. Akin tikchiuaj ken Cristo nochipa tikijtouaj tlen melauak (Efes. 4:25). w18.10 7 párr. 4; 8 párrs. 9, 10; 10 párr. 19

Kanaj ipantsin yeyi millones israelitas okiskej itech Egipto ipan xiuitl 1513 ijkuak xpeuaya xiuitl 1. Yayaj miyekej kokonej, akin iuejueyimej, niman kanaj noijki yayaj akin kualouayaj. Nonekiya ika akin kinyekanaskia makintlasojtla niman makimasikamati. Niman Jehová ijkon okinyekan itechkopa Moisés. Ika yejon, israelitas xonomojtijkej ijkuak okikaujkej inchan (Sal. 78:52). ¿Tlenon okichiuj Jehová niman ijkon maka manomojtikan? Yejua okichiuj ika israelitas manoteuipantlalikan ijkon ken kichiuaj akin tlauisokij ipan guerra (Éx. 13:18). Pampa ijkon okiskej, yejuamej kuajli okasikamatkej ika toTajtsin kuajli kimatstoya kenon kinmakixtis. Ika tonajli, Jehová kitekitiltiaya se moxtli, niman ika yeuajli kitekitiltiaya se tlitl tlen kintlauiluiaya. Ijkon okichiuj pampa kinekiya kimititis ika imiuan nemiya (Sal. 78:14). Kentla kimilijtoskia: “Maka xmomojtikan. Nikan ninemi niman ijkon nimechyekanas niman nimechtlajpiyas”. w18.09 26 párrs. 11, 12

Yeuejkaui, sekimej itekipanojkauan toTajtsin akin oyolmelaujkanenkej melak xkuajli onomachilijkaj niman hasta xok kinekiyaj nemiskej. Se neskayotl, Job melak najmantoya niman hasta okijto ika xok kinekiya nemis, yejua kinekiya mikis (Job 7:16). Jonás melak xkuajli onomachili pampa xopanok tlen yejua kinekiya, niman okijto: “Aman, oh Jehová, xnechkuili nonemilis, pampa kuajli yes tla nimiki niman xok niyoltos” (Jon. 4:3). Niman teotlajtoketl Elías melak xkuajli onomachilijka hasta okitlajtlanili toTajtsin makikauili mamiki. Okijli: “¡San ijkon! Aman, oh Jehová, xnechkuili nonemilis” (1 Rey. 19:4). San ika, Jehová kintlasojtlaya itekipanojkauan akin yolmelaujkej katkaj niman kinekiya manemikan. Yejua xokimajuak pampa ijkon tlanemiliayaj. Yejua okinpaleui niman ijkon oksejpa makinekikan nemiskej niman ok makitekichiuilijtokan ika yolmelaujkanemilistli. w18.09 13 párr. 4

Itekipanojkauan toTajtsin kimixmatij ken akin kuajli kiminseliaj akin “xchanejkej” (Heb. 13:2). ITlajtol toTajtsin kinteneua miyekej akin kuajli oteselijkej. Niman techmachtia kenon tejuamej noijki uelis kuajli titeseliskej (Gén. 18:1-5). Kuakon, nochipa ijkuak tiueliskej, matikinpaleuikan oksekimej, maski tla tokniuan noso xtokniuan (Gál. 6:10). Uelis titekitiskej iuan Jehová tla tikinseliaj noso tikinseuiyaj tokniuan akin chikauak kitekichiuiliaj Jehová (3 Juan 5, 8). Melak techpaleuiya ijkuak ijkon tikchiuaj pampa toyolchikauaj (Rom. 1:11, 12). ITlajtol toTajtsin kinyolchikaua tokniuan tlakamej akin nemij ipan tlanechikojli matekitikan iuan Jehová. Kinyolchikaua matekitikan ken tlapaleuijkej niman ken tlayekankej (1 Tim. 3:1, 8, 9; 1 Ped. 5:2, 3). Akin ijkon tekitij, melak kinekij kinpaleuiskej tokniuan kuajli makipiyakan intlaneltokil niman kinpaleuiyaj ika tlen kinpoloua (Hech. 6:1-4). Tokniuan melak pakij ijkuak tlapaleuiyaj ipan tlanechikojli. w18.08 24, 25 párrs. 6, 7; 25 párr. 10

Maski Timoteo tlayekanaya ipan tlanechikojli, yejua kipiaya ika kintlakaitas tokniuan niman kimiknelis. ¿Tlenon uelis tikijtoskej tla se akin iueyi kichiua tlen xkuajli maski kimatstika ika xkipiya ika kichiuas noso kiteijlia manochiua itlaj tlen xkiyolpaktia Jehová? Maski iueyi niman kitlakaitaj, Jehová kitlajtlakolmakas. Matikitakan tlenon kijtoua Isaías 65:20: “Akin tlajtlakos kiuijuikaltiskej, maski makipiya cien xiuitl”. Ipan tlatlachalistli tlen okitak Ezequiel noijki yejon techmachtia (Ezeq. 9:5-7). Ijkon tej, tikitaj ika melak noneki matiktlakaitakan Jehová, “Akin yeuejkaui itech Tonaltin” (Dan. 7:9, 10, 13, 14). Tla tiktlakaitaj, tikpiyaskej yolchikaualistli niman ijkon tikpaleuiskej akin noneki makimelajkatlalikan, maski tla melak iueyi (Gál. 6:1). w18.08 11 párrs. 13, 14

Melak noneki kuajli matikitakan tla itlaj yemelak noso xyemelak. Yejuin itlaj tlen melak noneki matiuelikan matikchiuakan (Prov. 3:21-23; 8:4, 5). Tla xijkon tikchiuaj, Satanás niman tlaltikpakchanejkej nimantsin ueliskej techkajkayauaskej (Efes. 5:6; Col. 2:8). Yemelak, noneki nochi kuajli matikmatstokan niman ijkon kuajli yes tlen tiknemiliskej. Ipan yejuin tonaltin, nochiuiyan tijkakij niman tikitaj miyek tlemach. Seki tikitaj ipan Internet, ipan televisión noso oksekan tijkakij. Kanaj noijki tikinseliaj miyek correos, mensajes de texto niman tlen techuajtitlaniliaj akin imiuan touikaj. Kuakon, noneki matotlajpiyakan niman kuajli matikitakan tla yemelak tlen tikpouaj niman tlen tijkakij. Akin imiuan touikaj kanaj itlaj techijliaj pampa kinekij techpaleuiskej, san ika, nemij oksekimej tlaltikpakchanejkej akin kiteijliaj tlen xmelauak noso xnochi kuajli kiteijliaj. w18.08 3 párrs. 1, 3

Ijkuak oyejkok tonajli ika ikoneuj tlakatiskia ipan tlaltikpaktli, Jehová okitlapejpeni se ichpochtli akin itoka katka María niman ijkon yejua makitlakatili. Yejua chantiya Nazaret, se kalpan tlen xmiyekej kixmatiyaj niman uejka nokauaya itech Jerusalén niman itech kualtsin teopan tlen ompa onkatka (Luc. 1:26-33). María okiteititi ika kuajli nouikaya iuan toTajtsin ijkuak iuan otlajto Elisabet, se akin ichanejkauj katka (Luc. 1:46-55). Kema, Jehová kuajli yokitaka María, niman pampa yejua yolmelaujkanemiya, okimakak yejuin tlateochiualistli tlen xkichiaya. Ijkuak Jesús otlakatiko, Jehová xokimijli tekiuajkej akin uejueyixtoyaj ipan Jerusalén niman Belén. Yejua okintitlan sekimej iluikaktekitkej makimijlitij sekimej tlakamej akin kintlajpiayaj inborreguitos nisiuj Belén (Luc. 2:8-14). Yejon tlajpixkej okitatoj konetsintli akin kemach yotlakatka (Luc. 2:15-17). Kanaj María niman José melak okinyolpakti ijkuak okitakej kenon Jesús okimakakej ueyilistli. w18.07 9, 10 párrs. 11, 12

¿Tleka Jehová melak okualan iuan Salomón? Biblia kijtoua: “Pampa iyojlo xok onkatka iuan Jehová [...] akin okpa ixpan ononexti niman kuajli okijlika yejuin, ika xkipiaya yas intech oksekimej tajtsitsintin. San ika, yejua xokitlakamat tlen Jehová okinauatijka”. Ipampa tlen okichiuj, toTajtsin xok okipaleui niman xok okiseli. Israel tlen san se tekiuajyotl katka, onotlajkoxelo, yejuin okijtosnek ika ikoneuan Salomón xok otlanauatijkej itech nochi Israel, niman melak miyek xiujtin okixnamijkej tlaueltin tlen melak okintlajyouilti (1 Rey. 11:9-13). Ijkon ken ipan onochiuj Salomón, tla touikaj iuan akin xkasikamatij itlanauatiluan Jehová noso xkintlakaitaj, yejon uelis melak techijtlakos. Niman uelis yeskej sekimej akin nemij ipan tlanechikojli, san ika, xok kuajli nouikaj iuan Jehová. Noijki, uelis yeskej tochanejkauan, akin nisiuj iuan tichantij, noso akin imiuan titekitij noso akin imiuan tomachtiaj niman xkitekichiuiliaj Jehová. Maski san kenon, tla akin imiuan touikaj xkitlakaitaj itlanauatiluan Jehová, ajsis tonajli ijkuak xok tiknekiskej touikaskej iuan Jehová. w18.07 18, 19 párrs. 9, 10

Satanás kitekitiltia películas niman nochi tlen panoua ipan televisión pampa ijkon kisemoyaua itlanemililuan. Kimatstika ika tikuelitaj tijkakiskej tlen inpan nochiua oksekimej niman kimatstika ika yejuin xsan techpaktia; kijtlakoua tlen tikmachiliaj, tlen tikchiuaj niman ken titlanemiliaj. Jesús okintekitilti historias ika otemachti. Ijkon okichiuj ijkuak otlajto itech se samaritano niman itech se tekoneuj akin yopoliujka (Mat. 13:34; Luc. 10:29-37; 15:11-32). Noijki, akin yokimijtlako Satanás uelis techkakitiskej historias tlen uelis techijtlakoskej. Ika yejon, noneki melak matotlajpiyakan. Kema, onka películas niman okseki tlen panoua ipan televisión tlen uelis techmachtiskej itlaj niman xkijtlakoua totlamachilis. San ika, matikitakan kemanon tikchiuaskej niman kech tiuejkauiskej. Ijkuak itlaj tiknekiskej tikitaskej, matotlajtoltikan: “¿Yejuin película noso programa kineki nechititis ika kuajli tla nitlanemilia itech xkuajkualtin ileuilistin?” (Gál. 5:19-21; Efes. 2:1-3). Tla tikitaj ika kichiua matitlanemilikan ken Satanás, nimantsin matiktlalkauikan ijkon ken tiktlalkauijtoskiaj se kokolistli tlen temaua. w19.01 15, 16 párrs. 6, 7

Ijkon ken se casco kitlajpiaya itsontekon soldado, “tlamachalistli de temakixtilistli” kintlajpiya totlanemililuan (1 Tes. 5:8; Prov. 3:21). Satanás uelis kiyejyekos matokixtilikan casco tlen kineskayotia totlaneltokil. ¿Kenon? Xtlanemili itech tlen okichiuili Jesús. Satanás kimatiya ika Jesús kichiaya tekiuajtiskia ipan tlaltikpaktli ika tlayekapan. San ika, achtopa nonekiskia tlajyouis niman mikis, niman sakin kichiaskia yejon tonajli ijkuak Jehová kitekitlaliskia. Kuakon Diablo okinek kitlatlatas, okijli ika ueliskia nimantsin kipiyas tlen kichiaya. Okijli ika, tla maski san sejpa yejua kiueyichiuaya, ueliskia nimantsin nochi kipiyas (Luc. 4:5-7). Noijki ijkon, Satanás kimatstok ika Jehová yotechijli techmakas miyek tlemach tlen kualtsin ipan yenkuik tlaltikpaktli. San ika, achtopa noneki titlamachiaskej niman kanaj tikimixnamikiskej tlaueltin. Kuakon Diablo noijki techtlatlata, kijtoua ika uelis kuajli tiyolpakiskej aman ipan yejuin tlaltikpaktli. Kineki matiktejtemokan kachtopa tlemach tlen uelis tikpiyaskej niman sakin iTekiuajyo toTajtsin (Mat. 6:31-33, TNM). w18.05 30, 31 párrs. 15-17

Jehová kineki xyolpaki. Se tlen mitspaleuis ijkon mopan manochiua yejua tiktejtemos chikauak tiktekichiuilis niman nochipa tikitas tlenon kinemilia Jehová ipan nochi tlen tikneki tikchiuas. Tla nimantsin tipeua tikchiua yejuin ipan monemilis, noijki nimantsin tikitas kenon Jehová mitsyekana, mitspaleuiya niman mitsteochiua. Xtlanemili itech kenon melak kuajli mitsnonotsa ika Biblia niman xchiua yejuin tlajtoltin: “Xkilnamiki, aman, moUeyitlachijchiujkauj ipan tonaltin ijkuak titelpochtitika” (Ecl. 12:1). Telpokamej akin kitekichiuiliaj Jehová kinnamiki matikimilijkan ika kuajli tlen kichiuaj pampa kitejtemojtokej chikauak kitekichiuiliskej Jehová. Yejuamej nokojtiliaj tenojnotsaskej, kichiuaskej tlen yokinemilijkej ipan itekiyo toTajtsin niman xkikauiliskej ika yejuin tlaltikpaktli makichiua makixtenpolokan tlen ueyi kijtosneki. Telpochtli noso ichpochtli, uelis kuajli tikmatstos ika tlen timokojtilijtika tikchiuas xsanenka yes niman noijki ika nochimej tokniuan mitstlasojtlaj niman kinektokej mitspaleuiskej. Tla nochipa tikita tlen kinemilia Jehová ipan tlen tikneki tikchiuas, kuajli tonkisas ipan monemilis. w18.04 29 párrs. 17, 19