Junio

Yejuin tlen okimijli kanaj melak okinyolchikauj. Melauak ika Jesús xok uejkauiskia ika mikiskia, niman yejon katka itlaj tlen yejuamej ok xkuajli kasikamatiyaj. San ika, nochipa kipiyaskiaj tlen kinpaleuis. Ijkuak kitlajtlaniliskiaj Jehová makinpaleui matenojnotsakan itech Tekiuajyotl, yejua kinnankiliskia inteoyouan. Niman ijkon opanok, pampa san seki tonaltin sakin, okitakej kenon okinnankili (Hech. 4:29, 31). Noijki ijkon panoua ipan yejuin tonaltin. Tla nochipa tiktemakatokej tlakilyotl, kuakon iuan touikaskej Jesús. Noijki, kuajli tikmatstoskej ika Jehová technankilis ijkuak tiktlajtlaniliskej matechpaleui matikxikokan tlen tikixnamikiskej ijkuak titenojnotsaskej (Filip. 4:13, TNM). Melak tiktlasojkamatij ika Jehová kinnankilia toteoyouan niman ika touikaj iuan Jesús. Nochi yejuin techmaka kojtilistli tlen techkauilia nochipa matikpiyakan tlakilyotl (Sant. 1:17). w18.05 21 párrs. 17, 18

Panoskia makuijli xiuitl niman yejon tokniuan kitaskiaj kenon yejkoskia itonal Jehová ipan Jerusalén. Kasikamatiskiaj ika tlen Jesús okimijlika nochiujtoya niman nonekiya choloskej itech yejon kalpan (Hech. 2:19, 20, TNM; Luc. 21:20-22). Yejon tonajli oyejkok ipan xiuitl 70, ijkuak romanos okipopolojkej Jerusalén ken toTajtsin yokijtoka. Ipan yejuin tonaltin, miyek onka tlen techititia ika iyejkotika itonal Jehová, tlen ueyi yes niman melak temojtis (Joel 2:11). Niman itlajtoluan Sofonías 1:14 nochiujtokej ipan yejuin tonaltin: “¡Iueyi tonal Jehová iyejkotika! ¡Iyejkotika, niman totoka uajlauj!”. Ika yejon, Pablo techijlia: “Ma tiknemilikan ken ijki uelis tikinyoleuaskej oksekimej para ma notlajsojtlakan se iuan okse niman para ma kichiuakan on tlen kuajli” (Heb. 10:24). Yejuin kijtosneki, ika noneki tikchikaujtiaskej ken tajmanaj inpampa tokniuan niman ijkon tikinyolchikauaskej ijkuak nonekis. w18.04 20 párrs. 1, 2

ToTajtsin melak kuajli ken okiyolseui Josué ijkuak ikalakiskiaj ipan tlajli tlen yokimijlika kinmakas. Jehová xokinyolchikauj san seki itekipanojkauan, noijki okiyolchikauj nochi ikalpan. Se neskayotl, pampa kimatiya ika kalpan judío nonekiskia makiyolchikauakan ijkuak kuikaskiaj Babilonia, okijli yejuin tlajtoltin: “Maka xmomojti, pampa mouan ninemi. Maka xmojkamiki, pampa nejua nimoTajtsin. Nejua nimitsyolchikauas, kema, nejua nimitspaleuis. Nejua yemelak kuajli nimitskitskijtos ika nomayekma tlen melajki” (Is. 41:10). Akin kichiuayaj ken Cristo ipan kachtopa siglo noijki kuajli kimatstoyaj yejon, niman aman tejuamej noijki kuajli tikmatstokej (2 Cor. 1:3, 4). Jehová noijki okiyolchikauj ikoneuj, Jesús. Ijkuak Jesús onoapolakti, okikak se tlajtojli tlen ualeuaya iluikak niman kijtouaya: “Yejua in yejua notlajsojkaKonetsin yejuan itech nipaktikaj” (Mat. 3:17). Uelis tikmatstoskej ika yejuin tlajtoltin okiyolchikauj ijkuak tenojnotstinemiya. w18.04 16 párrs. 3-5

Miyekej ipan yejuin tonaltin kinemiliaj ika tlanauatijli tlen toTajtsin okimakak Adán kijtosnekiya ika xkinkauilijtoskia makichiuakan tlen yejuamej kinekiskiaj. San ika, yejon xmelauak. Xsan noijki kijtosneki tiuelis tiktlapejpenis tlenon tikchiuas niman tiuelis tejua tikijtos tlenon kuajli niman tlenon xkuajli. Adán niman Eva kipiayaj tlamakaualistli ika kitlapejpeniskej tla kitlakamatiskej toTajtsin noso ka. San ika, san Jehová kinamiki kijtos tlenon kuajli niman tlenon xkuajli. Yejon tlen kineskayotiaya kojtli tlen tetlalnamiktia tlen kuajli niman tlen xkuajli tlen onkatka ipan Xochitlalpan Edén (Gén. 2:9). Teajman ika Adán niman Eva okitlapejpenijkej xtetlakamatiskej. Pampa kinekiyaj nemiskej ken yejuamej kinekiyaj, okipolojkej melauak tlamakaualistli. Ika tlanauatijli tlen Jehová okinmakak Adán niman Eva, kiminmachtijtoya ika nonekiya kitlakamatiskej niman ijkon yemelak kipiyaskej tlamakaualistli. w18.04 5, 6 párrs. 9-12

Ijkuak itekipanojkauan toTajtsin tlajyouiyaj, yejua xsan kimiknelia, noijki kinpaleuiya. Matitlanemilikan itech yejuin. Ijkuak israelitas tlakeualtin katkaj Egipto, Jehová okimachili tlen yejuamej kinkokouaya niman yejon okichiuj makinmakixti. Okijli Moisés: “Nikitstikaj kenijki tlajyouiyaj nokoneuan [...]. Nikaktikaj ken chokaj [...] pampa on tlakamej yejuan tlatekitiltiaj chikauak sanoyej kinmailiaj. Nikinmiknelia pampa sanoyej tlajyouiyaj. Yejua ika, onitemoko para nikinmanauis intech on egipcios” (Éx. 3:7, 8). Pampa okimikneli, okinmakixti. Sakin, ijkuak nemiyaj ipan tlajli tlen okinmakaka, opeujkej kimixnamikij. ¿Tlenon okichiuj toTajtsin? Biblia kijtoua: “Ijkuak toTEKO kintaya ken kintlajyouiltiayaj kinmikneliaya”. Niman pampa okimasikamat, oksejpa okinpaleui, niman okintitlan jueces makinmakixtitij (Juec. 2:16, 18). w19.03 15 párrs. 4, 5

Kachtopa ome tlanauatijli kinnauatiaya israelitas san makiueyichiuakan toTajtsin niman xkinkauiliaya makinueyichiuakan tajtsitsintin (Éx. 20:3-6). Yejuin tlanauatiltin xkipaleuiaya Jehová, kinpaleuiaya israelitas. Yejuamej xkuajli onkisayaj ijkuak kinueyichiuayaj intajtsitsinuan oksekimej kalpamej. San ika, okinteochiuj israelitas ijkuak otetlakamatkej niman omelajkanenkej (1 Rey. 10:4-9). Jehová xkipiya tlajtlakojli ika akin kijtouaj ika kitlakamatij itlanauatiluan kintlajyouiltiaj itekipanojkauan. Maski ijkon, techtlasojtla niman kimatstok ijkuak texchiuiliaj tlen xmelajki. Ijkuak se nantli kita ken tlajyouiya ikonetsin, melak noyolkokoua, san ika, Jehová más noyolkokoua ijkuak kita kenon titlajyouiyaj. Kanaj toTajtsin xnimantsin kintlajtlakolmaka akin kichiuaj tlen xmelajki niman xnoyolkuepaj, san ika, kichiuas ijkuak nonekis. w19.02 22 párrs. 13-15

Ipan semanas ijkuak xiajsi ika noilnamikis imikilis Cristo, ipan tlanechikoltin tomachtiaj ineskayo Jesús niman kenon okiteititi ika yolyemanki pampa onotemakak topampa. Niman noijki tiknekij tiyolyemankej yeskej niman tikchiuaskej tlen toTajtsin kineki, maski kemantika ouijtika tlen tikixnamikiskej. Tiknemiliaj kenon Jesús yolchikauak katkaj ijkuak sa achijtsin poliuiya ika kimiktiskej. Kuajli kimatstoya ika itlauelikniuan kiuejuetskiliskiaj, kiuitekiskiaj niman kimiktiskiaj (Mat. 20:17-19). Maski ijkon, okinokauili makimiktikan. Ijkuak oyejkok yejon tonajli, okimijli inomachtijkauan akin imiuan nemiya Getsemaní: “Xmotelketsakan. Tiauij. Ye uajlau on yejuan nechtemaktilis” (Mat. 26:36, 46). Niman ijkuak melak miyekej ouajlakej ika kinekiyaj kajsiskej, okijto akinon katka niman okinnauati soldados makinkauilikan mauiyan inomachtijkauan (Juan 18:3-8). ¿Xmelak ika okiteititi ika yolchikauak katka? Ipan yejuin tonajli, tlapejpeniltin niman oksekimej borreguitos tikyejyekouaj tiyolchikaujkej yeskej ken yejua. w19.01 27 párrs. 7, 8

Ijkuak tiknekij tiktlapalyotiskej se cuadro, noneki tiktlaliliskej miyek colores. Noijki ijkon, tla tiknekij tiyolyemankej yeskej noneki tikpiyaskej miyek kualneskayomej. Noneki matitetlakamatkej, matiyolkuajkualtin niman matiyolchikaujkej. San akin yolyemankej kitlakamatij toTajtsin niman kichiuaj tlen yejua kineki. Niman yejua kineki matiyolkuajkualtin (Gál. 5:22). San ika, Satanás melak kualani ijkuak tikchiuaj tlen Jehová kineki. Ika yejon, maski tiyolyemankej niman tiyolkuajkualtin miyekej akin Satanás kinyekantika techtlauelitaj (Juan 15:18, 19). Kuakon, noneki matiyolchikaujkej. Se akin xyolyemanki, san kualantinemi niman xkitlakamati Jehová. Ijkon kichiua Satanás. Ika yejon, kintlauelita akin yolyemankej, pampa akin yolyemankej kiteititiaj ika Satanás melak xkuajli. Niman noijki kiteititiaj ika Satanás se tlakajkayaujketl pampa maski san tlenon makijto noso makichiua xuelis kichiuas ika akin yolyemankej maka sa makitekichiuilikan Jehová (Job 2:3-5). w19.02 8, 9 párrs. 3-5

Jehová kimatstoya ika akin chantiyaj Babilonia nomojtiskiaj. Soldados medopersas kixnamikiskiaj Babilonia. Jehová kinkuiskia yejuin soldados niman ijkon kimakixtiskia ikalpan (Is. 41:2-4). Ijkuak Babilonios niman oksekimej akin oksekan ualeuayaj okitakej ika intlauelikniuj nonisiuijtoya, xonomojtijkej niman noijliayaj: “Xmoyolchikaua”. Noijki, okinchijchiujkej sekimej tajtsitsintin pampa kichiayaj makintlajpiyakan (Is. 41:5-7). San ika, Jehová okiyolseui ikalpan ika yejuin tlajtoltin: “Tejua Israel, [xijkon ken oksekimej kalpamej,] tejua tinotekipanojkauj”. Niman pampa xkinekiya manomojtikan noijki okimijli: “Nejua nimoTajtsin” (Is. 41:8-10). Ika yejon tlajtoltin, Jehová kimijlitoya judíos akin yolmelajkej ika xkimilkauaya niman ika ok kimitaya ken ikalpan. San ika, noijki okimijli ika kinuikaskia niman kinpaleuiskia macholokan itech yejon kalpan. Kuajli tikmatstokej ika itlajtoluan Jehová okinyolchikauj judíos akin nemiyaj Babilonia (Is. 46:3, 4). w19.01 4 párr. 8

Marcos 1:9-11 techititia ijkuak kachtopa otlajto. Okijto: “Tejua tinotlajsojkaKonetsin, niman sanoyej moka nipaki”. Jesús melak oyolpak ijkuak okikak ika iTaj kitlasojtla niman itech tlaneltoka. Matikitakan yeyi tlen Jehová oteasikamachilti: ika Jesús iKoneuj, kitlasojtla niman ika kiyolpaktia. Ijkuak Jehová okijto “tejua tinoKoneuj”, yejua okiteasikamachilti ika onopatlak ken kitaya iKonetsin. Ijkuak Jesús xiuajlaya ipan tlaltikpaktli, ikatka iKoneuj toTajtsin. San ika, ijkuak onoapolakti okitlapejpenijkej ika espíritu santo niman oksejpa onochiuj iKoneuj toTajtsin. Yejon kijtosnekiya ika ijkuak nokuepaskia iluikak, yejua nochiuaskia Tekiuaj niman Ueyi Teopixki (Luc. 1:31-33; Heb. 1:8, 9; 2:17). Kuakon, ijkuak Jesús onoapolakti, kinamikiya ika iTaj makijto ika yejua iKonetsin (Luc. 3:22). w19.03 8 párrs. 3, 4

Tlen xkuajli kiteijliaj oksekimej xkemach opeuj. Satanás yejua akin kachtopa opeuj kimijlia tlaltikpakchanejkej tlen kimijtlakoskia. Xopinauj kijlis Eva ika yejua niman iueuentsin san yejuamej ueliskiaj kijtoskiaj tlenon kichiuaskej ipan innemilis pampa ijkon melak yolpakiskiaj (Gén. 3:1-6). Tikitaj ika Satanás san itech yejua tlanemilijtoya. Niman Satanás kinekiya ika Adán iuan Eva niman inchanejkauan san yejua makitlakamatikan niman yejua makiueyichiuakan, xkinekiya makiueyichiuakan Jehová. San ika, Jehová yejua akin yokinmakaka nochi tlen kipiayaj: innamiktilis, se kualtsin xochitlalpan kampa chantiyaj niman kuajli okinchijchiujka niman ijkon ueliskiaj nemiskej nochipa. Teajman, ika Adán iuan Eva xokitlakamatkej toTajtsin niman xok iuan onouikakej. Ken itikmatstika, yejuin okichiuj makixnamikikan tlen xkuajli. Opeujkej ueuentsintiaj niman mikij, ijkon ken ijkuak tikteki se xochitl, pilini niman sakin kuajli uaki. Ikoneuan noijki opeujkej tlajyouiyaj ipampa tlajtlakojli (Rom. 5:12). Niman maski ijkon, miyekej tlaltikpakchanejkej xkinekij kitlakamatiskej toTajtsin ipan yejuin tonaltin. Kichiuaj tlen yejuamej kinekij (Efes. 2:1-3, TNM). Kuajli nesi ika yemelak tlen kijtoua tlaxelojli tlen aman tikitstokej. w18.12 20 párrs. 3, 4

Pablo, itlatitlankauj Cristo, ixtlamatki katka niman tlamachilise katka, noijki tlajtouaya ome tlajtojli (Hech. 5:34; 21:37, 39; 22:2, 3). Maski ijkon, xnoyekanaya ika tlamachilistli tlen kitemaka yejuin tlaltikpaktli, yejua noyekanaya ika iTlajtol toTajtsin (Hech. 17:2, 3; 1 Cor. 2:6, 7). Niman pampa ijkon okichiuj, melak kuajli otenojnots niman kichiaya kiselis nemilistli tlen xkeman tlamis (2 Tim. 4:8). Kuajli tikmatstokej ika itlanemililuan toTajtsin uejueyixtokej xijkon ken intlanemililuan tlaltikpakchanejkej. Kuakon, tla tikchiuaj tlen yejua kijtoua, tipakiskej niman kuajli tinemiskej. San ika, Jehová xtexchiualtia matitlanemilikan ken yejua. Nion “tekitketl” yolmelauak niman tlamachilise nion tlayekankej xtexchiualtiaj ijkon matikchiuakan (Mat. 24:45; 2 Cor. 1:24). Toseselti noneki tikitaskej tla titlanemiliskej ken toTajtsin. w18.11 20, 21 párrs. 12, 13

ToTajtsin okijto itechkopa Isaías ika ijkuak israelitas oksejpa nokuepaskiaj kampa chantiyaj, oniaskia yolseuilistli. Yejuamej xkinmakasiskiaj yolkamej nion xkuakualtin tlakamej. Kokonej niman akin iuejueyimej katkaj xtlaj inpan panoskia (Is. 11:6-9; 35:5-10; 51:3). Noijki, yejuin teotlajtojli techijlia ika tlaltikpaktli, kijtosneki, nochi tlaltikpaktli “temis ika itlaixmatilis Jehová ijkon ken mar tentika ika atl”. Yejuin xsan nochiuaskia ipan kalpan Israel. San ika ¿kemanon panoskia yejuin? Isaías kuajli okijto ika akin uajnokuepaskiaj itech Babilonia, xkinmakasiskiaj yolkamej nion xkuakualtin tlakamej. Tlajli melak tlatlakiltiskia pampa oniaskia ueyi atl, ijkon ken katka Xochitlalpan Edén (Gén. 2:10-14; Jer. 31:12). ¿San ijkuakon nochiuaskia yejuin teotlajtojli? Matikitakan ika yejuin teotlajtojli kijtoua ika akin xtlachiaj uelis tlachiaskej, akin xuelij nejnemij uelis nejnemiskej, niman akin xtlakakij uelis tlakakiskej. San ika, yejuin xinpan onochiuj israelitas. Kuakon, toTajtsin kijtotoya ika yejuin nochiuaskia ika tlayekapan. w18.12 5 párrs. 11, 12

Tiknekij nochipa tinejnemiskej ipan tlen melauak. ¿Tlenon techpaleuis nochipa matiknektokan tinejnemiskej ipan tlen melauak? Nochipa matikxelojtokan tiempo niman ijkon tomachtiskej iTlajtol toTajtsin niman itech titlanemiliskej. Tla nochipa tomachtijtokej, melak tiktlasojtlaskej tlen melauak niman xtiknekiskej tijkauaskej. San ika, xsan noneki tikmatiskej tlenon kijtoua, noijki noneki tikchiuaskej ipan tonemilis. Proverbios 23:23 kijtoua ika noneki tijkouaskej “tlamachilistli niman melajkatlalilistli niman asikamatilistli”. Tijkouas tlamachilistli kijtosneki tikchiuas tlen timomachtia. Ijkuak tikpiyaj asikamatilistli, san sekan tiktlaliaj tlen tomachtiaj ika tlen itikmatstokej. Niman, kemantika tlen melauak itech Biblia techmelajkatlalia, pampa techititia tlenon noneki tikpatlaskej ipan tonemilis. Nochipa noneki matokauilikan matechmelajkatlali, pampa Biblia kijtoua ika yejon melak patioj xijkon ken plata (Prov. 8:10). w18.11 9 párr. 3; 11 párrs. 13, 14

Itech nochi tlemach tlen tikpiyaj, ¿tlenon melak tikpatiojkaitaj? ¿Tikpatlaskiaj ika itlaj okse tlen xijkon maueyi makijtosneki? Akin tiktekichiuiliaj toTajtsin xtechtekiyomaka tikinnankiliskej yejuin tlajtoltilistin. Tejuamej tikpatiojkaitaj ika touikaj iuan Jehová, niman xtiknekiskiaj tikpatlaskej ika okse tlemach. Noijki, melak tikpatiojkaitaj tlen melauak itech Biblia pampa techpaleuiya matouikakan iuan toTajtsin iluikakchane (Col. 1:9, 10). Jehová yejua toUeyi Tlamachtijkauj, yejua techmachtia ika iTlajtol Biblia. Techijlia kenon itoka, tlenon kijtosneki itoka, niman noijki technojnotsa itech ikualneskayouan. Yejua techijlia ika melak techtlasojtla niman hasta topampa okitemakak iKoneuj, Jesús. Noijki technojnotsa itech yejon Tekiuajyotl kampa Jesús yejua Tekiuaj niman ika uelis tinemiskej ipan xochitlalpan. Jehová noijki techijlia kenon noneki tinemiskej. Nochi yejuin melak tikpatiojkaitaj pampa techpaleuiya matonisiuikan itech toTajtsin akin otexchijchiuj niman techpaleuiya matiyolpakikan ipan tonemilis. w18.11 3 párrs. 1, 2

Tlaltikpakchanejkej xueliskej kikajkayauaskej Jehová, pampa “nochi tlen onkaj niman nemi panestikaj niman pantlantitikaj ixpan” (Heb. 4:13). Matikitakan tlenon okichiujkej Ananías niman Safira. Yejuamej okinemakakej se tlajli niman okimijlikej itlatitlankauan Cristo ika kitemakatoyaj nochi tomin tlen okintlaxtlauilijkej. Yejuamej tekajkayaujtoyaj pampa xnochi kitemakatoyaj. Kinekiyaj ika oksekimej tokniuan makitakan tlenon kichiujtoyaj niman kinekiyaj makinemilikan ika melak kuelitayaj tetlayokoliskej. San ika, Jehová kimatstoya ika tekajkayaujtoyaj, yejua ika, okintlajtlakolmakak (Hech. 5:1-10). ¿Kenon kimita Jehová akin tekajkayauaj? Satanás niman nochimej akin tekajkayauaj pampa kinekij kichiuaskej tlen xkuajli niman xnoyolkuepaj, yejuamej yaskej “ne tliko”. Kijtosneki ika kinpopoloskej niman xok keman nemiskej (Apoc. 20:10; 21:8; Sal. 5:6). Tikmatstokej ika Jehová “xse tlakatl akin kijtoua tlen xmelauak”. Niman toTajtsin “xkeman kijtoua on tlen xmelauak” (Núm. 23:19; Heb. 6:18). Biblia kijtoua ika Jehová kitlauelita “nenepijli tlen tekajkayaua” (Prov. 6:16, 17). Tla tiknekij tikyolpaktiskej Jehová, noneki tiktlakamatiskej niman tikijtoskej tlen melauak. w18.10 8 párrs. 10-13

Matiknemilikan ika akin itech titekitij techijlia matiktemakakan tomin ipampa se iluitl tlen kichiuaj akin nemij ipan tlaneltokijli tlen xmelauak. ¿Tlenon tikchiuaskej? Maka matikchiakan hasta ijkuak mapano yejuin niman ijkon tikitaskej tlenon tikchiuaskej, ¿tleka xtiknemiliaj amantsin tlenon kinemilia Jehová itech yejon? Tla ijkon tikchiuaj, xtechtekiyomakas tikchiuaskej niman tikijtoskej tlen kuajli. Tla amantsin tiknemiliaj ika noneki timelajkanemiskej itech toTajtsin, techpaleuis ijkuak nonekis nimantsin matechpajtikan. Melauak ika kuajli yotikijtokej xtikseliskej yestli noso itech yejon naui tlen ika tlachijchiujtli yestli (Hech. 15:28, 29). San ika, onka seki tlemach tlen tepajtikej kinekiskej kitekitiltiskej niman tlen san tejuamej nonekis tikijtoskej tla tikseliskej noso ka. Ika yejon, noneki tomachtiskej itlajtolyekanalisuan toTajtsin kampa kijtoua tlenon kinemilia itech yejuin. Kema, yejon xnoneki tiknemiliskej ijkuak itinemij ipan hospital, pampa ijkuakon kanaj tokokojtoskej noso kanaj melak kinekiskej matikimijlitiuetsikan tlenon tikchiuaskej. Noneki amantsin matomachtikan, noneki matikijkuilokan ipan se amatl kenon tiknekij matechpajtikan niman noijki noneki matitlajtokan iuan totlapajtijkauj. w18.11 24 párr. 5; 26 párrs. 15, 16

Jehová techtlajpiya niman techmanauiya itech totlauelikniuan. Yejuin melak techyolseuiya pampa sa achijtsin poliui ika kipopolos tlen xkuajli. Jehová ok kintlajpiyas nochimej itekipanojkauan ijkuak panos ueyi tlajyouilistli, tlen san achijtsin poliui ika peuas (Apoc. 7:9, 10). Kuakon, tla titelpokamej noso itiuejueyimej, tla tikualoj noso xtikualoj, xtomojtiskej ijkuak peuas ueyi tlajyouilistli. Kema, ijkuakon tikilnamikiskej tlen okijto Jesús: “Ijkuak peuas nochiuas in tlajtlamach, xmoyoleuakan niman sa xonajkotlachixtiakan, pampa saniman mechmakixtiskej” (Luc. 21:28). Kuajli tikmatstokej ika Jehová techtlajpiyas ijkuak techixnamikis Gog, kema, ijkuak miyekej kalpamej tlen kipiyaj kojtilistli san sekan tekitiskej niman ijkon techixnamikiskej (Ezeq. 38:2, 14-16). ¿Tleka kuajli tikijtouaj yejon? Pampa tikmatstokej ika Jehová xnopatla. Nochipa kiteititis ika yejua se Temakixtijketl akin tetlasojtla niman teasikamati (Is. 26:20). w18.09 26, 27 párrs. 15, 16

Xnemili kenon melak okinyolchikauj israelitas itlajtoluan Jehová. Kuajli matikmatstokan ika toTajtsin noijki techtlasojtla niman techpatiojkaita. Jehová kimijlia itekipanojkauan: “Ken akin kipiya kojtilistli, temakixtis. Melak pakis motech ika ueyi pakilistli” (Sof. 3:16, 17). Jehová kuajli yokijto ika kinyolchikauas niman kinyolseuis itekipanojkauan maski san tlenon inpan panos. Itech amoxtli Isaías yejua okijto: “Nemejuamej nenchichiskej niman nejua nemechuikas ipan nopitsajkan, niman nemechuiuixos ipan noteteponuan” (Is. 66:12, 13). ¡Xnemili kenon kualtsin nomachilia se konetsintli ijkuak inan kinapaloua niman iuan nauiltia! Jehová noijki ijkon, melak techtlasojtla niman kineki kuajli matinemikan. Maka keman xnemili ika Jehová xmitspatiojkaita (Jer. 31:3). w18.09 13, 14 párrs. 6, 7

Kemantika ononek ika israelitas matlapaleuikan ipan se tekitl (Éx. 36:2; Neh. 11:2). Ipan yejuin tonaltin, tejuamej noijki uelis titlapaleuiskej ika totiempo, ika tlen tiuelij tikchiuaj, niman ika totomintsin, niman ijkon tikinpaleuiskej tokniuan. Tla ijkon tikchiuaj, melak tipakiskej niman tikseliskej miyek tlateochiualistin. Miyekpa, yejon tokniuan akin ontlapaleuiyaj kampa kinchijchiuaj Kaltin kampa Tosentlaliaj kimixmatij oksekimej tokniuan niman peuaj imiuan nouikaj. Se tokniuj akin itoka Margie yotekit 18 xiuitl kinchijchiujtinemi Kaltin kampa Tosentlaliaj. Itech nochi yejon xiujtin, yejua okinmachti tokniuan ichpokamej kenon tekitiskej. Yejua kijtoua ika ijkuak nochiua yejon tekitl, nochimej melak noyolchikauaj (Rom. 1:12). Niman, ijkuak okixnamik tlen ouijtika ipan inemilis, yejon tokniuan akin imiuan nouikaya niman akin okimixmatka kampa otekitkej melak okiyoltlalijkej. ¿Kemantika yotitlapaleuitoj kampa tokniuan kalchijchiuaj? w18.08 25 párr. 9; 26 párr. 11

Ijkuak Pablo okijkuilouili yejuin, Timoteo kipiaya kanaj 30 xiuitl. Maski ijkon, Pablo okimakak miyek tekitl tlen melak ueyi kijtosnekiya. ¿Tlenon tiuelij itech yejuin? Xkipiya ika tikinchikoitaskej tokniuan telpokamej san pampa xiuejueyimej. Matikilnamikikan ika Jesús melak miyek okichiuj ijkuak san kipiaya kanaj 33 xiuitl. Ipan seki kalpamej, tlaltikpakchanejkej xkintlakaitaj akin telpokamej. Ika yejon, sekimej tlayekankej xkiteijliaj tla se tokniuj uelis tekitis ken tlapaleuijketl noso ken tlayekanketl, maski yejua ikichiujtika tlen notlajtlani. Tlayekankej noneki makilnamikikan ika Biblia xkeman kijtoua kech xiuitl noneki kipiyas akin iuelis tekitis ken tlapaleuijketl noso ken tlayekanketl (1 Tim. 3:1-10, 12, 13; Tito 1:5-9). w18.08 11, 12 párrs. 15, 16

Noneki matikmatikan tlen yemelak opanok niman ijkon kuajli tikitaskej tlenon tikchiuaskej. Ika yejon, noneki kuajli matiktlapejpenikan tlenon tikpouaskej (Filip. 4:8, 9). Maka matikpolokan tiempo tikimitstoskej páginas ipan Internet tlen xnochi kijtouaj tlen melauak noso tikinpoujtoskej correos noso mensajes de texto kampa kijkuilouaj tlen san kitekakiliaj. Melak noneki maka matikalakikan ipan páginas ipan Internet kampa akin kixnamikij tlen melauak kijtouaj tlen yejuamej kinemiliaj. Yejuamej kinekij maka sa matitlaneltokakan niman kinekij techkajkayauaskej. Yejon tlen kijtouaj, uelis kichiuas matikchiuakan tlen xkinamiki. Maka keman matiknemilikan ika xtechijtlakos tlen kijtouaj. Xnemili yejuin, ijkuak nemiya Moisés, 12 tlakamej oichtakatlachiatoj ipan Tlajli tlen yokimijlikaj kinmakaskej. Ijkuak ouajnokuepkej, majtlaktli ichtakatlachixkej okijtokej tlen xteyolchikaua (Núm. 13:25-33). Yejuamej okseki okontlatlalilijkej tlen okitatoyaj niman israelitas onomojtikej niman onajmankej (Núm. 14:1-4, 6-10). Yejuamej xokitakej tla tlen okimijlikaj yemelak katka nion xotlaneltokakej itech Jehová, san okineltokakej tlen xmelauak katka. w18.08 4 párrs. 4, 5

Miyekej tlaltikpakchanejkej kipiyaj kualneskayomej, niman maski xkiueyichiuaj Jehová kichiuaj tlen kuajli. Tla akin imiuan touikaj ijkomej, ¿kijtosneki ika xtechijtlakoskej? Noneki totlajtoltiskej tla pampa imiuan touikaj techpaleuiya matouikakan iuan Jehová. Noijki, noneki matiknemilikan tlenon kipiyaj ipan inyojlo. Se neskayotl, ¿nochipa tlajtouaj itech yenkuikej tlakentin, tomin, aparatos tlen yenkuikej, itech tlen ika timoyolpaktis niman okseki tlen uelis tijkouas? ¿Kuelitaj tetejteneuaskej noso kamanaloskej itech tlen tsokuiltik? Jesús kuajli otemelajkaijli: “Tlen kisa ipan tekamak ualeua ne ipan teyojlo kampa yejua ika tlatentok” (Mat. 12:34). Ijkon tej, tla tikitaj ika touikaskej iuan yakaj uelis kijtlakos ken touikaj iuan Jehová, nimantsin matikpatlakan tlen tikchiuaj niman maka melak matouikakan imiuan akin ijkomej, noso tla noneki, maka sa imiuan matouikakan (Prov. 13:20). w18.07 19 párr. 11

Ijkuak Moisés kipiaya 80 xiuitl, Jehová okijli makikixti kalpan Israel itech Egipto kampa melak kintekitiltiayaj (Éx. 3:10). Miyekpa, Moisés okijto ika xueliskia, san ika, Jehová okijyoui Moisés niman hasta okichiuj ika Moisés maueli makichiua milagros (Éx. 4:2-9, 21). Yejua ueliskia kitekitiltis ikojtilis niman ijkon kimojtis Moisés niman kichiualtis makitlakamati. San ika, Jehová okijyoui niman okikneli, niman kuajli okijli itekipanojkauj akin yolyemanki katka ika iuan nemiskia. ¿Tlenon opanok pampa ijkon okichiuj? Kuajli tlen sakin opanok. Moisés okinyekan itekipanojkauan toTajtsin, niman melak kuajli okichiuj itekiyo. Yejua onokojtili teijyouis niman teasikamatis ijkon ken kichiua Jehová. Tla tejua titlayekana, melak noneki xkixkopina Jehová, xkimasikamati oksekimej, xkimikneli niman xkimijyoui (Col. 3:19-21; 1 Ped. 5:1-3). Tla tikchiuaj ken Jehová niman ken Jesucristo, akin noijki kixmatij ken Ueyi Moisés, kuakon, oksekimej xnomojtiskej touan tlajtoskej, niman tejuamej uelis tikinyolchikauaskej (Mat. 11:28, 29). w18.09 24, 25 párrs. 7-10

¿Tleka xtiktejtemouaj tikinyolchikauaskej tokniuan niman titlapaleuiskej san sekan matinemikan iuan tokniuan? Tla itikchiujtokej, yejon melak kuajli. San ika ¿uelis tikyejyekoskej tikimixmatiskej oksekimej niman noijki kuajli tikimixmatiskej tokniuan? (2 Cor. 6:11-13). ¿Uelis tokojtiliskej niman ijkon itlauil tlen melauak itech Biblia mapetlani kampa tichantij? Tla kuajli tikinnotsaj akin chantij nisiuj tochan, kanaj kinekiskej kixmatiskej tlen melauak. Matotlajtoltikan: “¿Tlenon kinemiliaj notechkopa akin chantij nisiuj nochan? ¿Kenon nikpiya nokal niman iyeualiujyan? ¿Tlakualnextia kampa tichantij? ¿Niknektika nikinpaleuis oksekimej?”. Matikintlajtoltikan tokniuan kenon yejon tlen kuajli kichiuaj niman pampa kuajli tenotsaj yokinpaleui inchanejkauan, akin imiuan nomachtiaj noso akin imiuan tekitij. Kanaj techijliskej tlen kualtsin inpan yonochiuj (Efes. 5:9). w18.06 24 párrs. 13, 14

Yejon tlen kinemiliayaj akin okimiktijkej Esteban, se inomachtijkauj Cristo, niman noijki yejon tlen yokinemilijkej akin yokichiujkej ken yejuamej (Hech. 6:8, 12; 7:54-60). Miyekej akin kijtouaj ika tlaneltokaj itech toTajtsin niman yotemiktijkej, kijtouaj ika kitekichiuiliaj toTajtsin, san ika, yejuamej xkitlakamatstokej itlanauatiluan toTajtsin (Éx. 20:13). Kuajli nestika ika intlamachilis kinkajkayaujtika. ¿Tlenon uelis tikchiuaskej niman ijkon maka matechkajkayaua totlamachilis? Itlanauatiluan niman itlajtolyekanalisuan toTajtsin “techmachtia on tlen melauak, techchikajkanotsa, kiyektlalia on tlen xkuajli, niman temachtia ken ijki onyas se nemilistli melajki” (2 Tim. 3:16). Ika yejon, tla tiknekij ika totlamachilis kuajli matechyekana niman matechpaleui matitlanemilikan ken toTajtsin, kuakon, noneki kuajli tomachtiskej Biblia, tiknemiliskej tlen kijtoua niman tikchiuaskej tlen techmachtia. w18.06 17 párrs. 3, 4

Ijkuak Pablo okijkuilo iamatlajkuilol tlen okintitlanili efesios, soldados romanos tlaixnamikiyaj ika se espada tlen 50 centímetros ika ueyak katka. Soldados melak kuajli kitekitiltiayaj tlen ika tlaixnamikiyaj pampa mojmostla nomajmachtiayaj. Pablo okijto ika iTlajtol toTajtsin yeskia kentla se espada tlen yotechmakak Jehová. Aman tej, noneki kuajli tiktekitiltiskej ijkuak tikmanauiyaj tlen tikneltokaj noso ijkuak tiknekij tikpatlaskej ken titlanemiliaj (2 Cor. 10:4, 5; 2 Tim. 2:15). Kuakon, xkipiya ika tikinmakasiskej Satanás nion xkuajkualtin espíritus. Kema kojtikej, san ika, uelis tikintlaniskej. Niman yejuamej uelij mikij. Xok uejkauis, ijkuak Jesús Tekiuajtis Mil Xiuitl, kintsakuaskej kampa xok itlaj uelis kichiuaskej. Sakin, kinpopoloskej (Apoc. 20:1-3, 7-10). Tikixmatij totlauelikniuj, itlakajkayaualisuan niman tlen kineki kichiuas. Ika itlapaleuilis Jehová, uelis timelajkanemiskej ijkuak techixnamikis Diablo. w18.05 30 párr. 15; 31 párrs. 19-21

Adán kuajli kimatiya ika kouamej xtlajtouaj. Ika yejon, ijkuak se kouatl otlajto iuan Eva, kanaj okinemili ika akin yemelak tlajtotoya katka se espíritu (Gén. 3:1-6). Adán niman Eva xmiyek kimatiyaj itech yejon espíritu. Maski ijkon, Adán okitlapejpeni xkitlakamatis iTaj iluikakchane akin tetlasojtlani niman oteixnamik iuan yejuin espíritu akin nion xkixmatiya (1 Tim. 2:14). Jehová nimantsin opeuj tlajtoua itech yejuin totlauelikniuj akin okimixpolojka Adán niman Eva, noijki kuajli okijto ika kipopoloskia yejon teixnamijketl. San ika, noijki okijto ika seki tonaltin yejuin espíritu kimixnamikiskia akin kitlasojtlaj toTajtsin (Gén. 3:15). Pampa Jehová melak tlamachilise, xkeman techijlia kenon itoka yejon iluikaktekitketl akin okixnamik. Niman onochiak 2,500 xiujtin achto ika techijlis katlejua tlajtojli kitekitiltia ijkuak kiteneua yejon iluikaktekitketl (Job 1:6). w18.05 22 párrs. 1, 2

Titenojnotsas itech Tekiuajyotl kampa melak achijtsitsintin kinekij kikakiskej uelis kichiuas ika se manajmana. Tla tejua ijkon mopan yopanoka, kuakon tikasikamati kenon onomachili apóstol Pablo. Ijkuak yejua otenojnotstinen, tlen ouejkauj kanaj 30 xiujtin, okinpaleui melak miyekej tlaltikpakchanejkej manochiuakan inomachtijkauan Cristo (Hech. 14:21; 2 Cor. 3:2, 3, TNM). San ika, xouel okichiuj ika miyekej judíos makichiuakan ken Cristo. Niman xsan yejon, miyekej okimapeujkej Pablo niman hasta okitlaueltokakej (Hech. 14:19; 17:1, 4, 5, 13). Pablo kuajli okijto ika xkuajli onomachili pampa xkinekiyaj kikakiskej. Okijto: “Nikpia sanoyej ueyi ajmantli niman nochipa ninoyolkokojtikaj” (Rom. 9:1-3). ¿Tleka ijkon onomachili? Pampa melak kuelitaya tenojnotsas niman kintlasojtlaya tlaltikpakchanejkej. Yemelak kinekiya kinpaleuis judíos, ika yejon, melak kajmanaya ijkuak kitaya ika xkiseliayaj iteiknelilis toTajtsin. Ken Pablo, matitenojnotsakan pampa yemelak tajmanaj intechkopa oksekimej (Mat. 22:39; 1 Cor. 11:1). w18.05 13 párrs. 4, 5

Pablo okiteititi ika hasta akin teyolchikauaj noijki noneki makinyolchikauakan. Akin kichiuayaj ken Cristo niman chantiyaj Roma okimijkuilouili: “Sanoyej nikneki nemechitas para nemechmakas itlaj tetlayokolijli yejuan kisa itech on Espíritu Santo para xmelajkanemikan. Nikijtosneki ma titoyoleuakan se iuan okse  ika on tlaneltoktli yejuan tikpiaj” (Rom. 1:11, 12). Ken tikitaj, hasta Pablo kipolouaya kemantika makiyolchikauakan (Rom. 15:30-32). Miyekej tokniuan melak nokojtiliaj niman ijkon chikauak kitekichiuiliskej Jehová. ¿Akinomej noijki noneki matikinyolchikauakan? Tokniuan akin xnonamiktiaj pampa kitlakamatij tlanauatijli tlen kijtoua ika san manonamiktikan “iuan se yejuan kineltoka toTeko” (1 Cor. 7:39). Niman xkipiya tikimilkauaskej tokniuan akin yolmelaujkanemij maski kintlaueltokaj noso melak kualoj (2 Tes. 1:3-5). w18.04 21 párrs. 3-5