Julio

Tinemij ipan “sanoyej xkuajli tonaltin”, kampa melak ouijtika tinemis, niman ok melak ouijtika yes hasta ijkuak Jehová kipopolos tlen xkuajli niman kichiuas maonia melauak yolseuilistli (2 Tim. 3:1). Ika yejon, kuajli tla totlajtoltiaj: “¿Kanon nontlachia ijkuak nikneki manechpaleuikan niman manechyekanakan?”. Yeuejkaui, se akin okijkuilo se salmo okijto ika melak noneki matikonitstokan Jehová ijkuak tiknekiskej matechpaleuikan (Sal. 123:1-4). Okineskayoti yejuin ika tlen kichiua se tlapaleuijketl. Ijkuak okijto ika se tlapaleuijketl san konitstika ima iteko, xsan kijtosnekiya ika kimatstoya ika iteko kimakaskia tlakuajli niman kitlajpiyas. Noijki okijtosnek ika noneki nochipa kuajli kitstos niman ijkon kimatis tlenon kineki iteko niman yejon kichiuas. Tejuamej noijki ijkon, noneki mojmostla tomachtiskej iTlajtol toTajtsin, pampa ijkon uelis tikitaskej noso tikasikamatiskej tlenon kineki Jehová niman yejon tikchiuaskej. Tla ijkon tikchiuaj, kuajli tikmatstoskej ika yejua techpaleuis. w18.07 12 párrs. 1, 2

Jesús tlajtotoya ika techmakaua itech tlen melak kintlajyouiltia tlaltikpakchanejkej: ika titlanamaktin “itech on tlajtlakojli” (Juan 8:34). Tlajtlakojli xsan kichiua matikchiuakan tlen xkuajli, noijki xtechkauilia matikchiuakan tlen tikmatstokej ika kuajli noso nochi tlen tiueliskiaj. Yejuin tlen kijtosneki ika titlanamaktin itech tlajtlakojli. Yejuin kichiua matajmanakan, matitlajyouikan niman, sa ika nochi, matimikikan (Rom. 6:23). San ijkuak xok tikpiyaskej tlajtlakojli, tlen yeskia ken se cadena tlen ika tisalijtokej, hasta ijkuakon topaktiskej itech melauak tlamakaualistli tlen okipolojkej Adán niman Eva. Ijkuak Jesús okijto ika noneki timelajkanemiskej ipan itlajtol, kijtosnekiya ika noneki tikchiuaskej seki tlemach niman ijkon techmakas tlamakaualistli (Juan 8:31). Akin tikchiuaj ken Cristo xtiktejtemouaj tlen tiknekij, tiktlapejpeniaj tiktlakamatiskej itech tlen yejua kinnauatia inomachtijkauan manoteltikan (Mat. 16:24). Ijkon ken okijto, tikpiyaskej melauak tlamakaualistli ijkuak kichiuas matikselikan nochi tlateochiualistin tlen techmaka tlaxtlauijli. w18.04 7 párrs. 14-16

Jehová kajmana tlen kimachiliaj itekipanojkauan hasta ijkuak nopopolouaj. Matikitakan tlen ipan onochiuj Jonás. ToTajtsin okititlan Nínive makiteijliti tlen inpan panoskia akin ompa chantij. San ika, pampa onoyolkuepkej, okintlapopolui. Yejon melak okitlauelmikti Jonás pampa xonochiuj tlen yokijtoka. Jehová okijyoui iteotlajtokauj niman okipaleui makipatla tlen kinemiliaya (Jon. 3:10–4:11). Sakin, Jonás okasikamat tlen opanoka, niman toTajtsin hasta okichiuj ika Jonás makijkuilo tlen ipan opanok niman ijkon matechpaleui (Rom. 15:4). Tlen Jehová yokichiuj techpaleuiya matikmatstokan ika kimasikamati itekipanojkauan. Kitstika ken tokokouaj niman ken titlajyouiyaj. Kasikamati tlen tiknemiliaj niman tlen tikmachiliaj, noijki tlen xueli tikchiuaj. Niman techijlia ika xkitekauilis matechtlatlatakan itech tlen xuelis tikxikoskej (1 Cor. 10:13). ¿Xmelak ika yejuin techyolseuiya? w19.03 16 párrs. 6, 7

Tlanauatijli melak kinpaleuiaya israelitas. Akin okintlalijkej matlayekanakan xsan nonekiya kitaskej ken kiueyichiuayaj toTajtsin, noijki nonekiya kitaskej tlaueltin tlen xmelak uejueyimej niman ijkuak temiktiayaj. Matikitakan seki neskayomej. Ijkuak se israelita yakaj kimiktiaya, xnimantsin kimiktiayaj. Tlayekankej nonekiya kachtopa kitaskej kenon opanok niman kijtoskiaj tla noneki kimiktiskej (Deut. 19:2-7, 11-13). Noijki, nonekiya kitaskej miyek tlen panouaya, ken ijkuak xnomatiya tlenon nochiuas ika tlen intlatki katka niman hasta ijkuak nokualaniayaj akin yononamiktijkej (Éx. 21:35; Deut. 22:13-19). Ijkuak tlayekankej kichiuayaj tlen melajki niman israelitas kitlakamatiyaj tlanauatijli, nochimej kuajli nemiyaj niman kiueyichiuayaj Jehová (Lev. 20:7, 8; Is. 48:17, 18). Itech yejuin tikitaj ika Jehová kajmana nochi tlen panoua ipan tonemilis. Kineki matikintlasojtlakan oksekimej niman matikinchiuilikan tlen melajki. Noijki kita tlen tikijtouaj niman tlen tikchiuaj ijkuak toselti tinemij tochan. w19.02 23 párrs. 16-18

Melak ouijtika tiyolyemankej yeskej ijkuak tokuaajmanaj. Niman kanaj uelis itlaj tikimijliskej oksekimej noso tikinchiuiliskej tlen xkuajli. Tla kemantika ijkon tokuaajmanaj, matitlanemilikan itech Jesús. Ijkuak achijtsin poliuiya ika kimiktiskiaj, melak miyek onkatka tlen kikuaajmanaya. Kimatstoya ika ikimiktiskiaj niman ika melak kitlajyouiltiskiaj (Juan 3:14, 15; Gál. 3:13). Ijkuak sa poliuiya seki metstli ika kimiktiskiaj, okijto ika melak noyolajmanaya (Luc. 12:50). Niman ijkuak sa poliuiya seki tonajli ika kimiktiskiaj, okijto: “Aman sanoyej ninoyolkokoua”. Tikitaj kenon yolyemanki katka niman okitlakamat toTajtsin ijkuak tikitaj tlen okijto ipan iteoyouj (Juan 12:27, 28). Ijkuak oyejkok tonajli ijkuak ikimiktiskej, onoyolchikauj niman onotemakak itech itlauelikniuan toTajtsin, akin okimiktijkej. Maski melak nokuaajmanaya niman tlajyouijtoya, Jesús yolyemanki katka niman okichiuj tlen toTajtsin kineki. Tikitaj ika okiteititi tlenon kijtosneki tiyolyemanki yes maski melak timokuaajmantos (Is. 53:10). w19.02 11 párrs. 14, 15

Kanaj itlaj tlen tikixnamiktokej uelis kichiuas maka matiuelikan matiakan tlanechikoltin. Tla ijkon panoua, noneki tiyolchikaujkej yeskej. Sekimej tokniuan kualoj, melak najmanaj noso noyolkokouaj. Oksekimej xkinkauiliaj mauiyan tlanechikojli inchanejkauan noso tekiuajkej. Matitlanemilikan intech tokniuan akin tsauktokej. ¿Yotiknemilijkaj ika uelis kinpaleuis tlen tikchiuaj? (Heb. 13:3). Ijkuak kimatij ika ok tiktekichiuiliaj Jehová maski ouijtika tlen tikixnamikij, kinchikauilia intlaneltokil, noyolchikauaj niman yejon kinpaleuiya makinekikan mayolmelajkanemikan. Ijkuak Pablo tsauktoya Roma, pakiya ijkuak kikakiya kenon ikniuan xkikajkauayaj kitekichiuiliaj toTajtsin (Filip. 1:3-5, 12-14). Ijkuak ikimakauaskiaj noso nimantsin ijkuak okimakaujkej, okintlajkuilouili hebreos. Ompa, okinnauati imikniuan ika maka makikajkauakan manosentlalikan (Heb. 10:25). w19.01 28 párr. 9

Satanás akin san itech tlanemilia, teixnamiki niman xkitlakamati Jehová, kineki ika tejuamej noijki ijkon matitlanemilikan niman matikchiuakan ken yejua. Yejua techsentlalia imiuan akin yokimijtlako. Kineki imiuan matinemikan pampa kichia ika makijtlakokan ken titlanemiliaj niman tlen tikchiuaj (1 Cor. 15:33). Satanás noijki kiyejyekoua kijtlakos toyojlo, kichiua matitlanemilikan ken tlaltikpakchanejkej niman xijkon ken toTajtsin (Col. 2:8). Se neskayotl, kineki matiknemilikan ika tikpiyaskej tomin yejon tlen melak ueyi kijtosneki, niman yejon uelis techijtlakos. ¿Tleka? Pampa ijkon, akin kinekij notomintiskej melak chikauak tekitiskej niman xkinajmanas tla kualoskej, tla xiuan nemiskej inchanejkauan niman hasta kikajkauaskej nouikaskej iuan Jehová (1 Tim. 6:10). Melak tiktlasojkamatij ika toTajtsin iluikakchane techpaleuiya kuajli matitlanemilikan itech kenon noneki tikitaskej tomin (Ecl. 7:12; Luc. 12:15). w19.01 15 párr. 6; 17 párr. 9

Achto ika Jesús uajlaskia ipan tlaltikpaktli niman kitemakas se melak kuajli neskayotl, itekipanojkauan toTajtsin ikasikamatiyaj ika melak nonekiya kinyolchikauaskej oksekimej. Matikitakan tlenon okichiuj tekiuaj Ezequías. Ijkuak asirios kinekiyaj kixnamikiskej Judá, Ezequías okinsentlali tlayekankej itech akin tlaixnamikij niman nochi kalpan, niman okimijli seki tlajtoltin tlen okinyolchikauj (2 Crón. 32:6-8). Matitlajtokan aman itech tlen ipan onochiuj Job. Yejua melak najmanaya, san ika, akin okiyolchikauatoj onochiujkej tlakamej akin tepajsolouayaj, niman san okijlikej tlajtoltin tlen teyolkokojkej. Maski ijkon, yejua okinmachti kenon kinyolchikauaskej oksekimej. Okimijli ika, tla yejua nonekiskia kinyolchikauas, kimijliskia tlajtoltin tlen teyolchikauaj niman tlen kichiuaskia kuajli manomachilikan (Job 16:1-5). Sa ika tlami, Elihú niman Jehová yejuamej akin okiyolchikaujkej Job (Job 33:24, 25; 36:1, 11; 42:7, 10). w18.04 16, 17 párrs. 6, 8, 9

Isaías yokijtoka kenon Jehová kiyolchikauas ikalpan. Okijto: “Jehová akin melak ueyixtika, uajlas ika kojtilistli, niman ika ima tlayekantos” (Is. 40:10). Ijkuak Biblia kikui tlajtojli “ima” tlajtotika itech kojtilistli. Kuakon, ijkuak Isaías kijtoua yejuin, techtlalnamiktia ika Jehová yejua se Tekiuaj akin melak kojtik. Yeuejkaui, toTajtsin okikuik ikojtilis niman ijkon okipaleui niman okitlajpix ikalpan. Yejuin tonajli ok kinyolchikaua niman kintlajpiya akin itech tlaneltokaj (Deut. 1:30, 31; Is. 43:10). Ijkuak tlaltikpakchanejkej techtlaueltokaj, ijkuakon Jehová techmaka kojtilistli. Ipan okseki países, kiyejyekouaj kiteltiskej ika titenojnotsaj noso kipopoloskej ikalpan toTajtsin. Maski ijkon, xsajnoye techajmana ika techtlaueltokaj. Jehová kuajli techijlia ika techyolchikauas niman techpaleuis melak matitlaneltokakan. Yejua techijlia: “Nochi tlen ika mitsixnamikiskej, xkuajli onkisas” (Is. 54:17, TNM). w19.01 5, 6 párrs. 12, 13

Tejuamej xtijkomej ken yolkamej, tejuamej noneki tikitaskej kenon tikchikauaskej totlaneltokil, niman san toTajtsin uelis techpaleuis (Mat. 4:4). Ijkuak tijkakij tlen techijliaj, tikpiyaj asikamatilistli, tlamachilistli niman pakilistli. Jehová mitsmaka tlen mitspoloua itech motlaneltokil ika iTlajtol niman okseki tlamachtiltin tlen techmaka itechkopa “tekitketl” yolmelauak niman akin “kipia kuajli itlamachilis” (Mat. 24:45; Is. 65:13, 14). Tlamachtiltin tlen ualeuaj itech toTajtsin mitsmakas tlamachilistli niman mitspaleuis kuajli xtlanemili, niman yejuin miyekan mitspaleuis (Prov. 2:10-14). Se neskayotl, mitspaleuis xkita ika sekimej tlakajkayauaj pampa kijtouaj ika xnemi toTajtsin noso kiteijliaj ika tla tikneki tiyolpakis noneki tikpiyas tomin niman okseki tlemach tlen patioj. Noijki mitspaleuis xmapeua ileuilistin tlen xkuakualtin niman maka peuas tikchiuas tlen uelis mitsijtlakos. w18.12 20 párrs. 6, 7

Seki kojtin melak miyek xiuitl nemij. Tejuamej akin titlaltikpakchanejkej nonekiskia xtikpiyaskej nion se kokolistli niman ijkon uejkaujtipan tinemiskej. Yejuin tlen okijto Isaías kanaj tiknemiliskej ika san se temiktli. San ika, yejuin teotlajtojli yemelak nochiuas. Kuajli matikitakan kenon yejuin tlen toTajtsin yokijto kichiuas techititia ika onias se xochitlalpan. ToTajtsin kinteochiuas nochimej tlaltikpakchanejkej. Yejuamej xkinmakasiskej yolkamej, niman akin xkuakualtin xok keman kinchiuiliskej tlen xkuajli. Akin xtlachiaj uelis tlachiaskej, akin xtlakakij uelis tlakakiskej niman akin xuelij nejnemij uelis nejnemiskej. Tlaltikpakchanejkej kinchijchiuaskej inkaluan niman kitokaskej tlen uelik, niman uejkaujtipan nemiskej xijkon ken kojtin. Kema, Biblia techititia ika onias se xochitlalpan ika tlayekapan. Aman tej, kanaj sekimej kijtoskej ika san tikontlatlaliliaj tlen kijtouaj yejon teotlajtoltin. ¿Tleka uelis tikneltokaskej ika onias se xochitlalpan? Yejuin technankilia se tlakatl akin melak ueyixtika (Luc. 23:43). w18.12 5 párrs. 13-15

Tlen tijkauiliaj makalaki ipan totlamachilis niman ompa tijkauaj, yejon tlen kipatlas totlamachilis. Niman, tla titlanemiliaj itech tlen toTajtsin kineki, tikasikamatiskej ika ijkon ken yejua tlanemilia melak kuajli. Niman ijkon, nochipa tiknekiskej titlanemiliskej ken toTajtsin. Matiknemilikan yejuin, tla tiknekij tikyenkuiliskej totlamachilis xok kipiya tokauiliskej ika tlaltikpakchanejkej makiyekanakan totlanemililuan. Ika okseki tlajtoltin, kijtosneki ika noneki tikmapeuaskej yejon tlen kixnamiki itlanemililuan toTajtsin. Yejuin melak noneki ijkon matikchiuakan. Matikasikamatikan yejuin ika se neskayotl. Matiknemilikan ika pampa se tlaltikpakchane kineki kuajli nemis, peua kikua tlen uelis kipaleuis. San ika ¿uelis kuajli nemis tla ok kikua tlen xkipaleuiya? Noijki ijkon, tla xtikmapeuaj tlanemililtin tlen onka ipan yejuin tlaltikpaktli, kuakon, techtekiyomakas titlanemiliskej ken toTajtsin. w18.11 21 párrs. 14, 15

Mojmostla matikchiuakan tlen tiuelij itech Biblia. Matotlalilikan ilpikatl noso cinturón itech tlen melauak. Itech tonaltin tlen kiteneua Biblia, soldados notlajkosalouayaj ika se cinturón tlen kintlapachouiliaya intlajkotian niman yejuin kinpaleuiaya ijkuak tlauijsokiyaj. Kema, nonekiya kuajli notiliniliskiaj, pampa tla xijkon kichiuayaj, xkinpaleuiskia. Tlen melauak itech Biblia yeskia kentla se cinturón. Tla kuajli totiliniliaj, techpaleuis itech tlanemililtin tlen xmelajkej niman techpaleuis matiktlapejpenikan tlen kuajli. Niman ijkuak tikixnamikiskej se tlauejli noso se tlatlatalistli, tlen melauak itech Biblia techpaleuis matiknekikan tikchiuaskej tlen kuajli. Se soldado xkeman yaskia ontlauijsokiskia tla xkitkiya icinturón. Noijki ijkon, maka keman matokixtilikan cinturón itech tlen melauak. Nochipa kuajli matotlalilikan niman nochipa matikchiuakan tlen melauak. w18.11 12 párr. 15

Noneki tokojtiliskej niman ijkon tiueliskej tlen melauak itech iTlajtol toTajtsin. Noijki, noneki tijkauaskej seki tlemach niman ijkon uelis tikpiyaskej tlen melauak. Ken okijto akin okijkuilo Proverbios, tla itikpiyaj tlen melauak, aman noneki tikitaskej maka tiknemakaskej noso tijkauaskej. Ijkuak itlaj kinekij techmakaskej niman techijliaj ika xtiktlaxtlauaskej, xkijtosneki ika xnonekis itlaj tiktemakaskej noso itlaj tikchiuaskej. Tlajtojli “xkoua” ika Hebreo tlen notekitiltia ipan Proverbios 23:23 noijki uelis kijtosnekis “xtejtemo”. Yejuin techmachtia ika se tlaltikpakchane noneki nokojtilis noso okse itlaj kitemakas niman ijkon kipiyas tlen kipatiojkaita. Matiknemilikan ika ipan se tienda kitlaliaj se amatl kampa kijtoua ika notetlayokolijtika pan. ¿Tiknemiliskia ika yejuin pan san ijkon uajnesis ipan tomesa? Tikmatstokej ika ka. Maski san kitetlayokolijtokej, noneki tikxeloskej tiempo niman noneki tokojtiliskej tiaskej tienda niman ijkon tikonkuiskej. Noijki ijkon, tejuamej xnoneki tiktlaxtlauaskej ika tomin niman ijkon tikpiyaskej tlen melauak, san ika, kema noneki tokojtiliskej noso itlaj okse tikchiuaskej. w18.11 4 párrs. 4, 5

Jesús okimijlika Pedro, Santiago niman Juan iuan mauiyan ipan se tepetl melak ueyi. Ompa okipixkej se tlatlachalistli. Jesús oixpetlan niman itlaken opeuj tsotlani. Omemej akin kineskayotiayaj Moisés niman Elías, opeuj tlajtouaj iuan Jesús itech kenon mikiskia niman yoliuiskia (Luc. 9:29-32). Sakin, se moxtli tlen tsotlani okintlapacho, niman ompa ouajkakistik se tlajtojli: otlajto toTajtsin. Tlatlachalistli tlen okitakej okiteititi iueyilis niman ikojtilis Jesús tlen kipiyaskia ijkuak nochiuaskia tekiuaj itech iTekiuajyo toTajtsin. Yejuin okiyolchikauj Jesús pampa tlajyouiskia niman xkuajli kichiuiliskiaj ijkuak kimiktiskiaj. Noijki, okinchikauili intlaneltokil inomachtijkauan. Okinyolchikauj mamelajkanemikan niman kuajli makichiuakan ueyi tekitl tlen kipiayaj. Apóstol Pedro okiteneuj yejuin tlatlachalistli ijkuak yopanoka 30 xiuitl, yejon kiteititia ika melak kuajli kilnamiktoya (2 Ped. 1:16-18). w19.03 9, 10 párrs. 7, 8

¿Kenon tlamantikej akin kichiuaj ken Cristo itech akin nemij ipan okseki tlaneltokiltin tlen xmelajkej? Ika akin tiktekichiuiliaj toTajtsin tikijtouaj “on tlen melauak” (Efes. 4:25). Tejuamej xkeman titekajkayauaj, nochipa tikimijliaj tlen melauak akin xtikimixmatij, akin imiuan titekitij, akin imiuan touikaj niman tochanejkauan. Tla tejua titelpochtli noso tiichpochtli, kanaj tikneki ika oksekimej mouan manouikakan. Yejua ika, timitsijliaj maka keman xchiua itlaj san tlaiyankan ijkon ken oksekimej. Ijkuak yejuin telpokamej nemij imiuan inchanejkauan noso imiuan tokniuan akin nemij ipan intlanechikol kiteititiaj ika kitlakamatij toTajtsin, san ika, ijkuak nemij imiuan telpokamej akin xkitekichiuiliaj Jehová, nemij ijkon ken akin xnomachtiaj. Noijki ijkon kichiuaj ipan redes sociales. Yejuamej kinkajkayaujtokej intajuan, tokniuan niman toTajtsin (Sal. 26:4, 5). San ika, Jehová kimatstika tla tikueyichiuaj san ika totlajtol niman tikchiuaj tlen xkuelita (Mar. 7:6). Melak kuajli tla tiktlakamati tlen kijtoua yejuin tlaxelojli: “Moyojlo maka makinnexikolita akin kichiuaj tlajtlakojli, tlen kema, makimakasi Jehová nochi tonajli” (Prov. 23:17). w18.10 9 párrs. 14, 15

Akin tiktekichiuiliaj Jehová totlasojtlaj semej iuan oksekimej. Tikimitaj tokniuan kentla tochanejkauan (1 Juan 4:21). Kemantika ueyi tlen tikchiuaj inpampa. San ika, melak kuajli nesi ika tikintlasojtlaj pampa miyekpa tikimijliaj tlen kinyolchikaua, miyekpa tikinpaleuiyaj noso itlaj okse tlemach tikchiuaj inpampa. Ijkuak titeasikamatij niman tikchiuaj tlen kuajli, tikixkopintokej toTajtsin iluikakchane, “ken itlasojkakoneuan” (Efes. 5:1). Jesús melak kuajli okixkopin iTaj. Yejua nochipa okinpaleui tlaltikpakchanejkej ika tlasojtlalistli. Okijto: “Xuajlakan notech nemochimej yejuan yonensiaukej, [...] niman nejua nemechmakas neseuijli”. Noijki okijto: “Pampa nejua niyolsejki niman niyolyemanki” (Mat. 11:28, 29). Ijkuak tikchiuaj ken Jesús niman tikteititiaj ika titeasikamatij, tikyolpaktiaj Jehová niman tejuamej noijki tiyolpakij (Sal. 41:1). Kuakon, matikteititikan totlasojtlalis ijkuak tikteititiaj ika tikimasikamatij tochanejkauan, tokniuan akin nemij ipan totlanechikol niman akin tikinnojnotsaj itech toTajtsin. w18.09 28 párrs. 1, 2

Uelis titekitiskej iuan Jehová tla titlapaleuiyaj kampa tlaixpoliui. Se neskayotl, uelis tiktemakaskej tomintsin (Juan 13:34, 35; Hech. 11:27-30). Noijki kanaj uelis titlachipauaskej noso tikinyektlaliskej kaltin. Gabriela, se tokniuj akin ualeua Polonia okipolojka ikal ijkuak oapachiuilok. San ika, melak opak ijkuak tokniuan okipaleuitoj. Yejon tokniuan nemiyaj ipan tlanechikoltin tlen nisiuj onkatkaj. Ijkuak yejua tlanemilia itech tlen ipan onochiuj, kijtoua ika xkineki tlajtos itech tlen okipolo, yejua kineki tlajtos itech tlen okiseli. Yejua kijtoua: “Yejuin tlen nopan onochiuj nechasikamachiltia ika melak teyolpakti tinemis ipan ikalpan Jehová niman ika se tlateochiualistli”. Miyekej akin ijkon yokinpaleuijkej noijki ijkon kijtouaj. Akin tekitij iuan Jehová niman ijkon kinpaleuiskej tokniuan melak pakij niman kuajli nomachiliaj (Hech. 20:35; 2 Cor. 9:6, 7). w18.08 26 párr. 12

Tla tiknekij tiktlajpiyaskej toyojlo, noneki tiueliskej tikixmatiskej tlen uelis techijtlakos niman tikmapeujtiuetsiskej. Tlajtojli “xkejeua” techtlalnamiktia itech tlajpixkej akin onenkej ipan itonaluan Salomón. Yejuamej kitlajpiayaj itepanuan ueyikalpan, niman tla kitayaj ika intlauelikniuan nonisiuiayaj, nimantsin kuajteijliayaj. Yejuin neskayotl techasikamachiltia tlenon noneki tikchiuaskej tla xtiknekij ika Satanás makijtlako totlamachilis. Yeuejkaui, tlajpixkej imiuan nopaleuiayaj akin tlajpiayaj ipan ipuerta ueyikalpan (2 Sam. 18:24-26). San sekan nopaleuiayaj niman ijkon puertas kuajli matsauktokan ijkuak intlauelikniuan nonisiuiayaj (Neh. 7:1-3). Ijkuak Biblia yokimachti totlamachilis uelis tekitis ken se tlajpixketl. ¿Kenon? Nimantsin techijlis ijkuak Satanás kijtlakosnekis toyojlo, kijtosneki, ijkuak kinekis kijtlakos totlanemililuan, tlen tikmachiliaj niman tlen tikileuiyaj. Nochipa ijkuak totlamachilis ijkon techijlis, noneki tijkakiskej niman maka matijkauilikan Satanás makalaki ipan toyojlo. w19.01 17 párrs. 10, 11

Tlayekankej xkipiya kinchikoitaskej tokniuan telpokamej san ipampa tlen yejuamej kinemiliaj niman tlen kinemiliaj inchanikniuan. Noneki makitakan tlenon kijtoua iTlajtol toTajtsin (2 Tim. 3:16, 17). Tla tlayekankej tlanemiliaj ken inchanikniuan niman xkitaj tlen kijtoua Biblia, kanaj xkiteijliskej ika sekimej tokniuan uelis tekitiskej ken tlayekankej noso ken tlapaleuijkej maski ikichiujtokej tlen notlajtlani. Ipan se kalpan, se tlapaleuijketl miyek tekitl kichiuaya ipan tlanechikojli, niman tlayekankej okitakej ika kichiujtoya nochi tlen Biblia kitlajtlani niman ijkon tekitis ken tlayekanketl. San ika, sekimej tlayekankej akin iuejueyimej katkaj okijtokej ika nesiya melak telpochtli niman xkinamikiya manochiua tlayekanketl. Kuakon, xokiteijlikej ika ueliskia tekitis ken tlayekanketl. Teajman ika ijkon okichiuilijkej yejuin tokniuj san pampa nesiya melak telpochtli. Niman nesi ika miyekej tlayekankej ijkon tlanemiliaj. Melak noneki matikitakan tlenon kijtoua Biblia niman maka matikchiuakan tlen tejuamej tiknemiliaj noso tlen oksekimej kinemiliaj. Tla ijkon tikchiuaj, tiktlakamatstoskej Jesús niman xtitechikoitaskej san ipampa tlen tikitaj (Juan 7:24). w18.08 12 párrs. 16, 17

Melak teijtlako nimantsin tikintitlanis correos niman mensajes. Ipan seki kalpamej xtechkauiliaj matitenojnotsakan. Akin techtlauelitaj kanaj kiteijliskej itlaj niman ijkon techmojtiskej noso techtlanemililtiskej ika xuelis titlaneltokaskej intech tokniuan. Matitlanemilikan itech tlen opanok yeuejkaui ipan Unión Soviética. Policía akin kimixmatiyaj ken KGB okiteijlikej ika sekimej tokniuan akin miyekej kimixmatstoyaj okinkajkayaujkej itekipanojkauan Jehová. Miyekej tokniuan okineltokakej yejuin tlen xmelauak katka, niman okikaujkej ikalpan Jehová. Sakin, miyekej ouajnokuepkej, san ika, sekimej xkeman ouajnokuepkej. Tlen okimijlikej okijtlako intlaneltokil (1 Tim. 1:19). ¿Tlenon uelis tikchiuaskej niman ijkon maka topan nochiuas yejon? Maka keman matikteijlikan tlen oksekimej kijtouaj tla xtepaleui noso tla xtikasikamatij tleka ijkon kijtouaj. Maka nochi matikneltokakan tlen tijkakij. Nochipa kuajli matikitakan tla ijkon opanok. w18.08 4 párr. 8

Akin yeuejkaui tlajkuilouayaj ika griego, xnochipa kuajli kitekitiltiayaj signos de puntuación. Kuakon, kanaj totlajtoltiaj: ¿Kijtotoya Jesús: melauak nimitsijlia: ipan yejuin tonajli nouan tinemis ipan xochitlalpan? ¿Noso kijtotoya: melauak nimitsijlia ipan yejuin tonajli: nouan tinemis ipan xochitlalpan? Matikilnamikikan tlen Jesús okimijlika inomachtijkauan ijkuak ximikiya. Yejua okijto: “Nejua yejuan oninochiu Tlakatl yeyi tonajli niman yeyi yeuajli ninemis ne ijtik on tlajli” (Mat. 12:40; 16:21; 17:22, 23; Mar. 10:34; Hech. 10:39, 40, TNM). Kuakon, Jesús xoyaj ipan se xochitlalpan ijkuak yejua niman akin inakastlan nemiya omijkej. Biblia kijtoua ika Jesús onen seki tonaltin ipan Hades, niman sakin Jehová okiyoliti (Hech. 2:31, 32, TNM). Yejon xkuajli tlakatl xokitlapejpenijkaj mauiya iluikak. Yejua nion xkimatiya ika Jesús yonotlajtolkaujka inuan itlatitlankauan ika san sekan tekiuajtiskej ne iluikak (Luc. 22:29, TNM). Yejon xkuajli tlakatl nion xnoapolaktiaya (Juan 3:3-6, 12, TNM). Ika yejon, Jesús tlajtotoya itech se xochitlalpan tlen onias tlayekapan. w18.12 6, 7 párrs. 17, 18, 20, 21

Israelitas nimantsin opeuj kiueyichiuaj se uakaxkonetl tlachijchiujtli ika oro. Kimatstoyaj ika xkitlakamatstoyaj toTajtsin, san ika, sa no yejuamej onokajkayaujkej niman okinemilijkej ika ok nemiyaj iuan Jehová. Aarón hasta okijto ika kiiluichiuilijtoyaj toTajtsin. San ika, Jehová okimachili ika okikajkayaujkaj. Okijli Moisés ika israelitas melak xkuajli tlen okichiujkaj niman ika xokitlakamatkej tlen okimijli maka makichiuakan. Jehová melak okualan imiuan, hasta okinemili kipopolos nochi ikalpan (Éx. 32:5-10). San ika, Jehová melak teikneliani, xokinpopolo israelitas (Éx. 32:14). Maski Aarón yejua akin okichijchiujka yejon uakaxkonetl, sakin onoyolkuep niman okitlapejpeni nemis iuan Jehová imiuan nochimej levitas. Pampa ipan yejon tonajli melak miyekej israelitas omijkej pampa okiueyichiujkej se intajtsin tlen xmelauak katka. Niman akin onenkej iuan Jehová, okimijlikej ika kinteochiuaskiaj (Éx. 32:26-29). w18.07 20 párrs. 13-16

Xnoneki tiktejtemoskej tlen miyekej kitejtemouaj ipan yejuin tlaltikpaktli. Miyekej kinekij makimixmatikan pampa melak onomachtijkej, pampa melak kuajli ken tekitij, pampa uelij nauiltiaj noso itlaj uelij kichijchiuaj. Kuakon, ¿akinon melak noneki matechixmati niman matechtlasojkaita? Pablo technankilia ijkuak okijto: “Aman ika nemejuamej yonenkixmatkej toTajtsin, noso, nikijtosneki, toTajtsin yomechixmat, ¿kenon aman oksejpa nemokueptokej itech yejon kachtopa tlajtlamach tlen xkojtikej niman xtepaleuijkej niman nenkinekij nemochiuaskej oksejpa intlakeualuan?” (Gál. 4:9, TNM). ¡Se ueyi tlateochiualistli ika ToTajtsin akin Ueyixtika, uelis techixmatis! Jehová techixmati, techtlasojtla, niman kineki iuan matouikakan. Ijkuak Jehová otexchijchiuj, yejua kinekiya iuan matouikakan (Ecl. 12:13, 14). w18.07 8 párrs. 3, 4

Tla tiknekij ika itlanauatiluan toTajtsin matechpaleui, noneki tikintlasojtlaskej niman tikintlakaitaskej (Amós 5:15). Tla tomachtiaj titlanemiliskej ijkon ken Jehová tlanemilia, kuakon uelis tiktlasojtlaskej niman tiktlakaitaskej tlen technauatia. Matiknemilikan ika ikipiya seki tonaltin ika xtiuelij kuajli tikochij. Kuakon, se tepajtiketl techijlia tlenon xkipiya tijkuaskej, technauatia matikchiuakan ejercicio niman matikpatlakan seki tlen tikchiuayaj. Tla tikitaj ika kuajli tomachiliaj pampa tikchiuaj tlen otechnauati, ¿xmelak ika melak tiktlakaitaskej yejon tepajtiketl niman noijki tlen techijlia? Noijki ijkon, toTajtsin akin otexchijchiuj yotechmakak tlanauatiltin tlen techpaleuiyaj maka matitlajyouikan ipampa tlajtlakojli niman noijki kichiua kuajli matinemikan. Se neskayotl, matiknemilikan kenon melak techpaleuiya tiktlakamatiskej Biblia ijkuak techijlia ika xkipiya tikijtoskej tlen xmelauak, titekajkayauaskej, titlachtekiskej, tiauilnemiskej, titeixnamikiskej nion tiktejtemoskej naualyotl (Prov. 6:16-19; Apoc. 21:8). Ijkuak tikitaj kenon melak techpaleuiya tiktlakamatiskej Jehová, ueyiya ken tiktlasojtlaj niman tikpatiojkaitaj yejua niman itlanauatiluan. w18.06 17 párrs. 5, 6

Ijkuak tekiuajtitoya, Pilato melak kajmanaya ika tlaltikpakchanejkej makixnamikikan itlayekanalis. Ika yejon, kanaj kimojtiaya ika Jesús makichiua ika oksekimej makixnamikikan. San ika, Jesús okinankili: “NoTekiuajyo xonka ipan yejuin tlaltikpaktli” (Juan 18:36, TNM). Yejua xnokalaktiskia ipan política, pampa iTekiuajyo yeskia se tekiuajyotl tlen oniaskia iluikak. Noijki, kuajli okijli ika ouajlaka ipan tlaltikpaktli pampa otemachtiko “on tlen melauak” (Juan 18:37). Jesús kuajli kimatiya katlejua tekitl nonekiya kichiuas. Tla tejuamej noijki tikmatij katlejua totekiyo, xtikpaleuiskej yejon tlen miyekej kichiuaj pampa kinekij noxeloskej, nion ipan toyojlo xkipiya tikpaleuiskej yejon. Yejuin uelis techtekiyomakas. Se tlayekanketl ipan circuito, kijtoua: “Kampa titlapaleuiyaj, tlaltikpakchanejkej melak xkuajli ken tlanemiliaj. Nochimej melak kitlasojtlaj inpaís, niman miyekej kinemiliaj ika kuajli nemiskej tla noxelouaj itech ken tlayekanaj tekiuajkej. Maski ijkon, melak kuajli ika tokniuan nokojtiliaj san sekan nemiskej pampa kitejtemouaj tenojnotsaskej itech kuajli tlajtoltin itech Tekiuajyotl. Kineltokaj ika toTajtsin kiyektlalis tlen xkuajli nochiua niman okseki tlaueltin tlen tikpiyaj”. w18.06 4, 5 párrs. 6, 7

Tlajtojli Satanás, tlen kijtosneki “Teixnamijketl”, san nesi ipan yeyi amoxtin itech Tlajkuiloltin ika Hebreo: 1 Crónicas, Job niman Zacarías. ¿Tleka Jehová xmiyek okijto itech yejuin totlauelikniuj achto ika uajlaskia Mesías? Nesi ika Jehová xokinek melak makiueyikaitakan Satanás. Ika yejon, xokichiuj ika ipan Tlajkuiloltin ika Hebreo miyek manoijkuilo itech nion tlen kichiua. Jehová okichiuj manoijkuilo yejon amoxtin itech Biblia pampa kinekiya kinpaleuis tlaltikpakchanejkej makixmatikan Mesías niman makitokakan (Luc. 24:44; Gál. 3:24). Jehová okitekitilti Mesías ijkuak oyejkok niman noijki inomachtijkauan niman ijkon makitemachiltikan tlen aman tikmatij itech Satanás niman itech iluikaktekitkej akin iuan oteixnamijkej. Niman kinamiki ika ijkon okichiuj, pampa Jehová kitekitiltis Jesús niman tlapejpeniltin ijkuak kipopolos Satanás niman akin kitokaj (Rom. 16:20; Apoc. 17:14; 20:10). Xkilnamiki, ikojtilis Satanás san ontlami. Niman Jehová techpaleuiya, noijki Jesús niman iluikaktekitkej yolmelaujkej. Ika intlapaleuilis, ueli tikxikouaj ijkuak techixnamiki. w18.05 22, 23 párrs. 2-4

Tla tiknekij ika Jehová matechita ken itekipanojkauan, noneki tikpiyaskej tlakilyotl (Mat. 13:23; Mat. 21:43, TNM). Kuakon, itech tlen Jesús okijto ipan Juan 15:1-5, tikpiyas noso tiktemakas tlakilyotl xuelis kijtosnekis tikchiuas ika oksekimej manochiuakan inomachtijkauan Cristo (Mat. 28:19, TNM). ¿Tleka xyejon kijtosneki? Pampa yejuin kijtosnekiskia ika yejon tokniuan yolmelaujkej akin xuelij kichiuaj ika oksekimej manochiuakan inomachtijkauan Cristo pampa kampa tenojnotsaj san achijtsitsintin kinkakij kentla yeskiaj yejon imatsitsinuan temekatl tlen xtlatlakitiaj tlen okiteneuj Jesús. San ika, yejuin nion xuelis tiknemiliskej ika ijkon, pampa xuelis tikinchiualtiskej tlaltikpakchanejkej makiselikan itech tlen tikiminojnotsaj. Niman noijki, Jehová techtlasojtla niman xkeman techmapeuaskia san pampa xtikchiuaj itlaj tlen xipan toma onka. Yejua xkeman techtlajtlanilia tlen xuelis tikchiuaskej (Deut. 30:11-14). Kuakon, ¿tlenon yejon tlakilyotl tlen noneki tikpiyaskej? Kuajli tikmatstokej ika yejon tlakilyotl itlaj tlen tinochimej uelis tikchiuaskej. ¿Niman katlejua tekitl yotechnauatij Jehová matikchiuakan tinochimej akin tiitekipanojkauan? Titenojnotsaskej itech iTekiuajyo (Mat. 24:14, TNM). w18.05 14 párrs. 8, 9

Ipan yejuin tonaltin, melak miyekej akin tlayekanaj ipan tlaneltokiltin. Sekimej kimijliaj pastores, teopixkej noso okse tlamantik kimixmatij. Ijkon ken fariseos, yejuamej “xkauiliaj ma nopantlanti on tlen melauak” itech iTlajtol toTajtsin niman yokipatlakej “on tlen melauak itech ika Dios yejua ika on tlen tlakajkayaualistli” (Rom. 1:18, 25). Kiteititiaj tlen xmelauak, kijtouaj ika titlatlaskej kampa infierno, ika alma xueli miki niman ika akin yomijkej oksejpa uajnemij ika okse intlalnakayo. Niman kiteititiaj ika toTajtsin kinselia tlakamej noso siuamej akin san sekan notekaj niman nonamiktiaj iuan akin ijkon ken yejuamej. Akin tlayekanaj ipan política noijki yokinkajkayaujkej tlaltikpakchanejkej. Sa achijtsin poliui, kijtoskej se ueyi tlakajkayaualistli. Kiteijliskej ika “tinemij ika yolseuilistli niman ika toyojlo”. San ika, “nimantsin inpan uajlas tlapopolouilistli”. Kuakon, xkipiya ika tikinneltokiliskej tlen kijtouaj tlayekankej itech política. Yejuamej xkinekiskej kiteijliskej ika tlaltikpaktli melak xkuajli onka, san ika, tejuamej kuajli tikmatstokej ika “itonal Jehová yejkos ijkon ken se akin tlachteki ipan yeuajli” (1 Tes. 5:1-4, TNM). w18.10 7, 8 párrs. 6-8

Jesucristo techmaka yolchikaualistli niman tlayekanalistli itechkopa “ikoneuan tekiuaj”, kijtosneki tlayekankej, akin tlapejpeniltin niman noijki akin nopouaj intech okseki borreguitos. Tlayekankej xkinnauatiaj ken tlaneltokaskej imikniuan, yejuamej tekitij inpampa niman ijkon mamelajkanemikan niman mapakikan. Yejuamej kinekij techpaleuiskej matipakikan niman matiyolmelaujkanemikan (Is. 32:1, 2; 2 Cor. 1:24). Tlayekankej melak kuajli kichiuaj ijkuak kixkopinaj ineskayo apóstol Pablo. Yejua okintlajkuilouili akin kichiuayaj ken Cristo akin kintlaueltokayaj ipan Tesalónica: “Nemejuamej temechpialiaj miyek tetlajsojtlalistli yejuan hasta tiknekiskiaj temechmakaskiaj, xsan yejua on kuajli tlajtojli yejuan kitemaka temakixtilistli, yej no hasta tonemilis pampa tejuamej otemechtlajsojtlakej sanoyej” (1 Tes. 2:8). Pampa Pablo kinekiya kiteititis ika kemantika xsan noneki se tlajtojli ika titeyolchikauas, okimijli tlayekankej akin chantiyaj Éfeso tlajtoltin itech tlaxelojli tlen aman tikitstokej. w18.04 21, 22 párrs. 6-8

Tla tiknekij tikpiyaskej yejon tlamakaualistli niman noijki matechpaleui, noneki tokuepaskej itech Jehová (2 Cor. 3:16). Yejuin kijtosneki ika noneki matiktejtemokan kuajli iuan touikaskej. Israelitas akin nejnemiyaj ipan tlaluaktli okitakej tlen panotoya san ken tlaltikpakchanejkej kitaj niman xken Jehová kita. Kentla se tlakentli kintlapachouilijtoskia intlanemililuan niman inyojlo. San kinekiyaj kitekitiltiskej intlamakaualis ika kipiyaskej tlen kileuiayaj (Heb. 3:8-10). San ika, tlamakaualistli tlen techmaka Jehová melak kuajli xijkon ken xsan titsauktos. Iespíritu Jehová techmakaua itech tlajtlakojli niman mikilistli, niman noijki itech tlaneltokijli tlen xmelauak niman tlen ompa nochiua. Yejuin itlaj tlen tlakamej xkeman uelis kichiuaskej (Rom. 6:23; 8:2). Yejuin se tlamakaualistli tlen melak kualtsin. Niman uelis kipiyas hasta akin nemi ken tlakeuajli noso tsauktika ipan cárcel (Gén. 39:20-23). w18.04 9 párrs. 3-5