Agosto

Ipan tlanechikoltin, miyekpa techilnamiktiaj tlen Jehová niman Jesús yokichiujkej topampa. Tejuamej melak tiktlasojkamatij, ika yejon tikyejyekouaj mojmostla tikchiuaskej ijkon ken Jesús (2 Cor. 5:14, 15). Toyojlo techmapeua matikueyichiuakan Jehová pampa okitemakak iKoneuj. Niman tikteititiaj yejuin ijkuak ika nochi toyojlo titlanankiliaj ipan tlanechikoltin. Tikteititiaj kenon melak tiktlasojtlaj toTajtsin niman iKoneuj tla tiknektokej tikchiuaskej miyek tlemach inpampa. Miyekpa, tias tlanechikoltin nonekis tikchiuas miyek tlen ouijtika. Xnemili, miyekej tlanechikoltin nosentlaliaj ipan semana ijkuak nochimej yokiskej ipan intekiyo, niman tosentlaliaj maski kanaj melak tisiaujtokej. Niman okse tlanechikojli nochiua ijkuak ontlami semana, ijkuak tlaltikpakchanejkej noseuiyaj. ¿Kita Jehová ika tiauej tlanechikojli maski melak tisiaujtokej? Kema, kema kita. Niman, tla melak tochikauaj, Jehová kitlasojkaitas yejon tlasojtlalistli tlen tikititiaj (Mar. 12:41-44). w19.01 28, 29 párrs. 12, 13

Jesús noijki otlajyoui ken tlaltikpakchanejkej. Xnemili, nesi ika onoskalti imiuan se familia akin xkipiayaj tomin. Pampa otekit iuan itlakpataj José, ouel kichiua chikauak tekitl (Mat. 13:55; Mar. 6:3). Niman kanaj okimachili kenon timoyolkokos ijkuak miki se mochanejkauj, pampa José omik ijkuak Jesús xipeuaya tenojnotsa. Noijki, okimat kenon timomachilis tikinpiyas mochanejkauan akin xtlaneltokaj ken tejua (Juan 7:5). Yejuin niman okseki tlen ipan onochiuj okipaleui makimasikamati tlaltikpakchanejkej. Ones ika Jesús melak oteasikamat ijkuak okichiuj milagros. Xokichiuj pampa nonekiya kichiuas, okichiuj pampa okimikneli akin tlajyouiayaj (Mat. 20:29-34; Mar. 1:40-42). Jesús okimachili tlen okimachilijkej oksekimej niman yejon okimapeuj makinpaleui (Mar. 7:32-35; Luc. 7:12-15). w19.03 16 párrs. 10, 11

San achijtsin poliuiya ika ikimiktiskiaj Jesús. Matiknemilikan kenon melak nokuaajmantoya ipan yejon yeuajli. San ueliskia kinpaleuis miyekej tlaltikpakchanejkej tla melajkanemiskia hasta makimiktikan. San ika ¿ueliskia kichiuas? (Rom. 5:18, 19). Noijki, ika tlen kichiuaskia ueliskia nopatlas tlen kinemiliayaj itech Jehová (Job 2:4). Ijkuak kipanoltijtoyaj iTlakualis toTeko, inomachtijkauan “opeu notenkuikuij de on akinon más ueyixtias”. Maski ijkon opanok, Jesús xokualan niman okiminnots ika kuajli tlajtojli. Okinmelajkaijli tlenon nonekiya kichiuaskej. Sakin, okimijli ika melak kuajli pampa xkeman okitlalkauijkej (Luc. 22:24-28; Juan 13:1-5, 12-15). Uelis ijkon tikchiuaskej ken Jesús maski melak tokuaajmantoskej, maka matikualanikan. Uelis ijkon tikchiuaskej tla tikilnamikij ika tinochimej tikijtouaj niman tikchiuaj tlen sekimej kinkualania (Prov. 12:18; Sant. 3:2, 5). Noijki, matikimijlikan akin tikimixmatij tlen kuajli kichiuaj (Efes. 4:29). w19.02 11, 12 párrs. 16, 17

Tlanauatijli tlen okimakakej Moisés tepaleuiaya niman ijkon ouijtika katka yakaj kitlajtolchijchiuiliskiaj. ¿Kenon? Kachtopa, akin kitlajtolchijchiuiliayaj ueliskia kitlajtlanis kimatis akinon ijkon kichiujtoya (Deut. 19:16-19; 25:1). Niman, nonekiya omemej akin okitakej tlen opanok niman ijkon uelis noneltokas tlen noijtotoya itechkopa (Deut. 17:6; 19:15). Aman, ¿tla yakaj itlaj kichiuaya niman san se nemiya akin okitak? Akin ijkon yokichiujka xkipiaya ika kinemilis ika xtlaj ipan nochiuas, pampa Jehová nochi yokitaka. Kema, Jehová kuajli techititia kenon xtikchiuaskej tlen xmelajki. Kinteochiua akin melajkanemij niman kitlakamatij itlanauatiluan, san ika, kintlajtlakolmaka akin xkuajli kitekitiltiaj intlanauatijkayo (2 Sam. 22:21-23; Ezeq. 9:9, 10). Uelis nesis ika sekimej akin kichiuaj tlen xkuajli xtlaj inpan nochiua, san ika, Jehová tetlajtlakolmaka ijkuak kinamiki (Prov. 28:13). Niman tla xnoyolkuepaj, xuejkaui kasikamatij ika “sanoyej temojtij tla se onuetsis ipan itlauel on Dios yejuan nochipa nemi” (Heb. 10:30, 31). w19.02 23, 24 párrs. 20, 21

Kuajli tikmatstokej ika Moisés kitejtemouaya itlayekanalis Jehová. Xsan yejon, yejua “kitstikatka Dios yejuan xakaj ueli kita” (Heb. 11:24-27). Onochiuj se ueyi tlauejli ijkuak nion xpanouaya ome metstli ika israelitas okiskej itech Egipto, niman xiajsiyaj ipan tepetl Sinaí. Israelitas opeuj kualanij pampa xtlaj onkatka atl niman okitsajtsilitoj Moisés. Melak oueyiyak tlauejli, kuakon, Moisés okitlajtlanili Jehová: “¿Tlenon nikchiuas iuan yejuin kalpan? ¡Sa achijtsin poliui niman nechtemojmotlaskej!” (Éx. 17:4). Jehová okinankili, niman okijli tlenon nonekiya kichiuas: ika itlakouj kipiaya ika kiuitekis se tetl tlen onkatka Horeb, niman kuakon, ompa uajkisaskia ueyi atl. Biblia kijtoua: “Moisés ijkon okichiuj imixpan tlayekankej itech Israel”. Israelitas oatlikej, oaixuikej niman ijkon onoyektlali tlauejli (Éx. 17:5, 6). w18.07 13 párrs. 4, 5

Jehová noijki kitekitiltia tlanechikojli niman ijkon techyolchikauas ika tlasojtlalistli. Ijkuak tikintlasojtlaj tokniuan, tikteititiaj ika tiktlasojtlaj Jehová. Tikchiuaj nochi tlen tiuelij niman ijkon tikinpaleuiyaj tokniuan makitakan ika toTajtsin kintlasojkaita niman kintlasojtla (1 Juan 4:19-21). Apóstol Pablo okijto: “Xmoyoleuakan se iuan okse, niman xmoyolchikauakan ikan tlaneltoktli iuan oksekimej ijki ken nenkichijtokej” (1 Tes. 5:11). Melauak, xsan tlayekankej noneki kichiuaskej yejuin. Tinochimej uelis tikinyolseuiskej niman tikinyolchikauaskej tokniuan ijkon ken kichiua Jehová niman Jesús (Rom. 15:1, 2). Sekimej tokniuan akin melak najmanaj noso noyolkokouaj kanaj nonekis konitaskej se tlapajtiketl niman makinmakakan tlen koniskej noso tlen kitoloskej (Luc. 5:31). Tlayekankej niman oksekimej tokniuan kuajli kimatstokej ika yejuamej xtlapajtikej, san ika, melak ueyi kijtosneki ijkuak kinpaleuiyaj niman kinyolseuiyaj. Kimatstokej ika noneki kitlakamatiskej yejuin tlanauatijli: “Xkinyoleuakan on yejuan notsinkixtiaj; xkimpaleuikan on yejuan xkojtikej ipan intlaneltok, niman xpiakan ijyouilistli inuan nochimej” (1 Tes. 5:14). w18.09 14, 15 párrs. 10, 11

Totlaneltokil chikaui ijkuak kuajli tikixmatij Jehová. Niman san uelis tikixmatiskej tla tikpouaj Biblia niman tla titlanemiliaj itech tlen tikpouaj. Biblia kijtoua tlen melauak opanok kampa techititia kenon yeuejkaui Jehová okitlajpix ikalpan. Niman yejon techpaleuiya matikneltokakan ika aman noijki ijkon techtlajpiyas. Matiknemilikan kenon Isaías kineki techasikamachiltis ika toTajtsin techtlajpiya. Kijtoua ika Jehová ken se tlajpixketl akin kintlajpiya iborreguitos. Yejua kijtoua: “Ika ima kinsentlalis iborreguitos, niman kintlalis ipan iyelpan” (Is. 40:11). Ijkuak tikmachiliaj kenon Jehová technapaloua, tinemij ika toyojlo niman xtomojtiaj. Tla tiknekij tinemiskej ika toyojlo maski tikixnamikiskej tlen melak ouijtika, matikilnamikikan tlen kijtoua tlaxelojli tlen aman tikitstokej. Tla ijkon tikchiuaj, techyolchikauas niman techpaleuis machikaui totlaneltokil niman ijkon uelis tikixnamikiskej maski san katlejua tlauejli. w19.01 7 párrs. 17, 18

¿Yotiknemili tlenon okseki tekitl ueliskia tikchiuas ipan ikalpan toTajtsin? Kanaj aman timochikaujtok mojmostla tikamapouas iTlajtol toTajtsin, melak kuajli titlanankilis niman tikpanoltis tlamachtiltin ipan motlanechikol niman kuajli tijkuis Biblia ijkuak tontenojnotsa. ¿Kenon timomachilia ijkuak tikita ika kuajli tonkisa niman ijkuak oksekimej noijki kitaj niman mitsijliaj ika kuajli tlen tikchiujtok? Kuajli tikmatstokej ika yejon melak mitsyolpaktia. Niman ijkon noneki xmomachili, pampa tikchiujtika tlen toTajtsin kineki niman xtikchiujtika san tlen tejua tikneki, ijkon ken okichiuj Jesús (Prov. 27:11). Tla timokojtilia tikchiuas okseki tekitl ipan ikalpan toTajtsin, tiyolpakis niman tikmatis tleka tinemi. Pablo, itlatitlankauj Cristo, okijkuilo: “Ma ka xkauilikan itlaj ma mechejkuani itech nemotlaneltok. Nochipa xchiuakan itekiu toTeko ikan nochi nemoyojlo, pampa ye nenkimatstokej ika on tekitl xsanenkaj nenkichiuaskej ijkuak nenkichiuaj san sekan iuan toTeko” (1 Cor. 15:58). Tlaltikpakchanejkej akin san kitejtemouaj kipiyaskej tlen onka ipan yejuin tlaltikpaktli xkipiyaj pakilistli, yejuamej kinekij kitlaniskej tomin noso kinekij miyekej makimixmatikan (Luc. 9:25). w18.12 22 párrs. 12, 13

David kiteneujtoya yejon tonajli ijkuak nochimej tlaltikpakchanejkej ueliskiaj kitlakamatiskej itlanauatiluan toTajtsin tlen melajkej (2 Ped. 3:13). Isaías 65:22 kijtoua: “Pampa itonaluan nokalpan yes ken itonaluan se kojtli”. Yejuin kijtosneki ika tlaltikpakchanejkej nemiskej melak miyek xiuitl. Apocalipsis 21:1-4 kijtoua ika xok onias mikilistli ipan yenkuik tlaltikpaktli, niman toTajtsin ompa kinteochiuas itekipanojkauan akin yolmelaujkej. Tlen Biblia temachtia itech Xochitlalpan melak kuajli nasikamati. Adán niman Eva xok ouel onenkej ipan Xochitlalpan, san ika, ika tlayekapan yejuin tlaltikpaktli yes se xochitlalpan. ToTajtsin okijto ika kinteochiuas nochimej tlaltikpakchanejkej. Niman ToTajtsin okichiuj ika David makijto ika akin melajkanemij niman akin yolmelaujkej nemiskej ipan xochitlalpan niman nochipa ompa chantiskej (Sal. 37:11). Niman teotlajtoltin tlen okijto Isaías techpaleuiya matikchiakan ika pakilistli yejon tonajli ijkuak Jesús kichiuas tlen okijli yejon xkuajli tlakatl akin nemiya inakastlan (Is. 11:6-9; 35:5-10; 65:21-23). Tejua uelis tinemis ipan yejon xochitlalpan. w18.12 7 párrs. 22, 23

Kema, ouijtika xtikinkakiskej tlen kinemiliaj tlaltikpakchanejkej pampa xuelis tikisaskej itech yejuin tlaltikpaktli (1 Cor. 5:9, 10). Ijkuak tontenojnotsaj, tijkakij tlaneltokiltin tlen xmelajkej. San ika, tla tikinkakij tlanemililtin tlen onka ipan yejuin tlaltikpaktli, noneki maka san itech yejon matitlanemilijtokan, matikinkixtikan itech totlamachilis. Ijkon ken Jesús, noneki nimantsin matikmapeuakan tlanemililtin tlen Satanás kineki matikinpiyakan ipan totlamachilis. Noijki, uelis tikitaskej kenon xsajnoye tijkakiskej tlen kinemiliaj tlaltikpakchanejkej. Matikitakan kenon uelis tikchiuaskej. Se neskayotl, noneki kuajli matikitakan akinomej imiuan touikaskej. ITlajtol toTajtsin techijlia ika tla tosentlaliaj imiuan akin xkitekichiuiliaj Jehová, noijki ijkon tipeuaskej titlanemiliskej (Prov. 13:20; 1 Cor. 15:12, 32, 33). Tla tikmapeuaj tlanemililtin tlen tlajtoua itech evolución, auilnemilistli niman tlen xkuajli, xtijkauilijtoskej makalaki ipan totlamachilis tlen kixnamiki tlen toTajtsin kinemilia (2 Cor. 10:5). w18.11 21 párrs. 16, 17

¿Tlenon techpaleuis nochipa matiknektokan tinejnemiskej ipan tlen melauak? Matokojtilikan matikinmachtikan oksekimej tlen melauak itech Biblia. Ijkon ken se soldado noneki kuajli kajsitos iespada, tejuamej noijki ijkon noneki kuajli tikajsitoskej “itlajtoltsin Dios” (Efes. 6:17). Tinochimej uelis tokojtiliskej niman ijkon kuajli titemachtiskej niman melajki tikteijliskej “in tlajtojli tlen melauak” (2 Tim. 2:15). Tla tiktekitiltiaj Biblia niman ijkon tikinpaleuiyaj oksekimej makikouakan tlen melauak niman makimapeuakan tlen kiteititia yejuin tlaltikpaktli, kuakon, yejon tlen melauak onias ipan toyojlo niman ipan totlamachilis. Yejuin techpaleuis nochipa matiknektokan tinejnemiskej ipan tlen melauak. Tlen melauak itech Biblia se tetlayokolijli tlen ueyi kijtosneki niman tlen ualeua itech toTajtsin iluikakchane. Techpaleuiya matouikakan iuan Jehová, niman yejuin itlaj tlen melak tikpatiojkaitaj. Jehová melak miyek yotechmachti, niman, yejuin san ika tipeuaj. Yejua yokijto ika nochipa techmachtijtos. Ika yejon, matikitakan tlen melauak itech Biblia ijkon ken se perla tlen melak patioj. Nochipa matijkoujtokan niman maka keman matiknemakakan (Prov. 23:23). w18.11 8 párr. 2; 12 párrs. 15-17

Kuajli tikmatij ika Noé okimijli oksekimej ika iajsitoya ijkuak tlapopoliuiskia. Matikitakan tlenon okijto Jesús: “Ipan on tonaltin, ijkuak xe apachiuilo, on tlakamej tlakuayaj, atliyaj, nonamiktiayaj niman kitemakayaj inichpochuan para ma nonamiktikan hasta ipan on tonajli ijkuak Noé okalak ipan barco. Niman yejuamej xokichiuilijkej cuenta on tlen nochijtikatka, yej hasta ijkuak opeu kiaui niman on atl nochimej okinmiktij. Ijkon, tej, ken ipan on tonaltin onochiu, no ijki nochiuas ijkuak nejua yejuan oninochiu Tlakatl niuajlas” (Mat. 24:38, 39). Maski tlaltikpakchanejkej xkikakisnekiyaj, Noé okichiuj itekiyo niman okimijli tlen uajlaskia. Ipan yejuin tonajli, titenojnotsaj itech Tekiuajyotl pampa ijkon tlaltikpakchanejkej ueliskej kimatiskej tlenon kineki kichiuas Jehová topampa. Ijkon ken Jehová, ika nochi toyojlo tiknekij makikakikan yejuin tlajtoltin niman nochipa manemikan (Ezeq. 18:23). Niman noijki, titenojnotsaskej techajchan niman kampa tojlan nojuitilo techkauilia tikinmachiltiskej miyekej ika iTekiuajyo toTajtsin uajlas niman ijkon kipopolos nochi tlen xkuajli (Ezeq. 3:18, 19; Dan. 2:44; Apoc. 14:6, 7). w18.05 19 párrs. 8, 9

Aman matiknemilikan ika tekiuajkej xtechkauiliaj matiktekichiuilikan Jehová niman ika techtlajtlajtoltiaj itech tokniuan. ¿Kipiya ika tikimijliskej nochi tlen tikmatstokej? ¿Tlenon okichiuj Jesús ijkuak se tekiuaj romano kiyolkuitijtoya? Jesús okichiuj tlen kijtoua Biblia kampa techmachtia ika onka ijkuak noneki titlajtoskej niman noijki onka ijkuak xnoneki titlajtoskej. Niman kemantika Jesús xtlaj okijto (Ecl. 3:1, 7; Mat. 27:11-14). Tla kemantika ijkon topan nochiua, noneki kuajli tiknemiliskej tlenon tikijtoskej niman ijkon tokniuan xkinchiuiliskej tlen xkuajli (Prov. 10:19; 11:12). ¿Tlenon tikchiuaskej tla yakaj akin iuan touikaj noso se tochanejkauj yokichiuj se tlajtlakojli niman tejuamej tikmatstokej? Tikijtoskej tlen melauak. Ika yejon, tejuamej kipiya ika tikimijliskej tlayekankej nochi tlen opanok niman maka itlaj matikiyanakan. Tlayekankej noneki kimatiskej nochi tlen yemelak opanok, niman ijkon, yejuamej uelis kitaskej kenon kipaleuiskej akin okichiuj tlajtlakojli niman ijkon oksejpa manouika iuan Jehová (Sant. 5:14, 15). w18.10 10 párrs. 17, 18

Uelis tikinyolchikauaskej oksekimej tla kuajli tikinkakij (Sant. 1:19). Tikteititiaj ika titetlasojtlaj ijkuak tikinkakij niman tikimasikamatij akin najmanaj. ¿Kenon uelis tikyolchikauaskej akin najmana? Matiknemilikan kenon tomachiliskiaj tejuamej tla ijkon topan nochiujtoskia, niman matiktlajtoltikan tlen techpaleuis matikasikamatikan kenon nomachilia. Noneki nesis ipan toxayak ika tiknekij tikpaleuiskej niman ika tiktlasojtlaj. Tla tokniuj kineki techijlis nochi tlen kajmana, matikteititikan ijyouilistli niman maka matiktlajtolkotonakan. Tla kuajli tijkakij, uelis tikasikamatiskej tlenon kajmana. Yejua kuajli nomachilis niman noijki kinekis techkakis. Ijkuak kitas ika tiknekij tikpaleuiskej, ika iyojlo nomachilis niman tikyolseuiskej. w18.09 14 párr. 10; 15 párr. 13

Tiempo itlaj tlen tinochimej noneki matikxelokan niman ijkon tijkouaskej tlen melauak. Noneki tiempo niman ijkon tijkakiskej tlajtoltin itech Tekiuajyotl, tikpouaskej Biblia niman toamatlajkuiloluan, tomachtiskej achto ika tiaskej totlanechikol niman tonechikoskej. Noneki matikitakan katlejua tlemach xmelak noneki tikchiuaskej, niman yejon tiempo tijkuiskej ika tikchiuaskej tlen yotikteneujkej (Efes. 5:15, 16). ¿Kech tiuejkauij ika tiuelij tlamachtiltin tlen kachtopa noneki tomachtiskej itech Biblia? Xnochimej tlaltikpakchanejkej uejkauij ijkon ken oksekimej. San ika, nochipa onias tlen nonekis tomachtiskej itech itlamachilis Jehová, itech kenon yejua niman itech tlen yokichiuj (Rom. 11:33). Kachtopa revista itech The Watch Tower okijto ika tlen melauak itech Biblia kentla “se xochitsintli” niman okijto: “Maka xmokaua san ika se xochitl itech tlen melauak. Tla san nonekiskia tikpiyas se, toTajtsin xmiyek techmakaskia. Ok xkintejtekto; ok xkintejtemojto”. Maski ijkuak tikpiyaskej se nemilistli tlen xkeman tlamis, ok nonekis tomachtijtoskej itech Jehová. Kuakon, melak noneki kuajli matikitakan kenon tikxelouaj totiempo niman ijkon uelis tijkouaskej tlen melauak. w18.11 5 párr. 7

Teueuentsitsinuan noneki kasikamatiskej insiuauj niman kintenkakiskej (1 Ped. 3:7). Se teueuentsin akin teasikamati kimatstika ika yejua iuan isiuauj tlamantikej, san ika, xkeman kinemilia tla xmaluijli (Gén. 2:18). Yejua kitlakaita isiuauj niman kasikamati ijkuak itlaj kimachilia. Teueuentsin akin teasikamati noijki kita tlen kimachilia isiuatsin. Kema, ijkuak nemi imiuan oksekimej siuamej xkichiua itlaj niman ijkon makinemilikan ika kinuelita, niman xnajmana inpampa ijkon ken xok kinamiki. Yejua xijkon kichiua nion ipan redes sociales, niman xkalaki ipan páginas itech Internet kampa uajnesi tlen xkuajli (Job 31:1). Xkikajkayaua isiuauj pampa kitlasojtla niman noijki kitlasojtla Jehová niman pampa kitlauelita tlen xkuajli (Sal. 19:14; 97:10). w18.09 29 párrs. 3, 4

¿Tleka techtekiyomaka tikchiuaskej tlen techmachtia iTlajtol toTajtsin? Matikteneuakan se: pampa san uelis tikchiuaskej tlen kuajli tla tiyolyemankej. Niman ipan yejuin itlamiyan tonaltin melak ouijtika tiyolyemankej yeskej. Toyeualiyan nemij tlaltikpakchanejkej akin tsotsokamej, kitlasojtlaj tomin, noteneuaj uejueyixtokej, noueyimatij, niman xkiteltiaj ineleuilis (2 Tim. 3:1-3). Akin tiktekichiuiliaj toTajtsin, tikmatstokej ika xkuajli tlen kichiuaj tlaltikpakchanejkej, san ika, kemantika uelis tikitaskej ika akin ijkon kichiuaj melak kuajli nemij niman melak pakij (Sal. 37:1; 73:3). Hasta kanaj totlajtoltiaj: “¿Yemelak noneki kachtopa manikita kenon uelis nikinpaleuis oksekimej? Tla niyolyemanki, ¿ok nechtlakaitaskej?”. Miyekej tlaltikpakchanejkej san intech tlanemiliaj. Tla tokauiliaj matechmauakan, xok kuajli touikaskej imiuan tokniuan, niman oksekimej kintekiyomakas kitaskej tla tikchiuaj ken Cristo. Ika yejon, melak techpaleuis tla tikitaj niman tikixkopinaj tlen kuajli okichiujkej sekimej tlaltikpakchanejkej akin Biblia kinteneua. w18.09 3 párr. 1

Yeuejkaui, Jehová san iselti nemiya. Sakin, okinemili kinchijchiuas iluikaktekitkej niman tlaltikpakchanejkej. Nochimej okinmakak innemilis. Yejua “toTajtsin akin paktika” niman melak kuelita kitemakas tlen kuajli (1 Tim. 1:11, TNM; Sant. 1:17). Niman pampa Jehová kineki noijki matipakikan, techmachtia matiktemakakan tlen tikpiyaj (Rom. 1:20). ToTajtsin okinchijchiuj tlaltikpakchanejkej ijkon ken yejua (Gén. 1:27). Yejuin kijtosneki ika Jehová otexchijchiuj ika kualneskayomej tlen yejua kinpiya. Aman tej, noneki tikixkopinaskej niman ijkon yemelak tipakiskej niman tikpiyaskej itlateochiualis. Noneki matiknemilikan kenon uelis tikinpaleuiskej oksekimej niman kenon tikinmakaskej tlen tikpiyaj (Filip. 2:3, 4; Sant. 1:5). ¿Tleka? Pampa toTajtsin ijkon otexchijchiuj. Maski titlajtlakolejkej, uelis tikixkopinaskej Jehová niman tiktemakaskej tlen tikpiyaj. Jehová kineki matikixkopinakan, ika yejon, melak yolpaki ijkuak tejuamej tiktemakaj tlen tikpiyaj (Efes. 5:1). w18.08 18 párrs. 1, 2; 19 párr. 4

Tikteititiaj ika tijkakij Jesús xsan ijkuak tikpouaj itlajtoluan, tikchiuaj ijkuak tiktlakamatij. Tlen techajmana ipan tonemilis xtijkauiliaj makichiua maka matijkakikan Jesús (Luc. 21:34). Tikitaj ika melak ueyi kijtosneki tiktlakamatiskej itlanauatiluan Jesús, maski tikixnamikij tlen ouijtika. Niman maski ijkon panoua, tokniuan melajkanemij itech Jehová. Niman ijkuak tikinpaleuiyaj akin Jesús yokintlali matechyekanakan, noijki tikteititiaj ika tijkakij Jesús (Heb. 13:7, 17). Ipan yejuin xiuitl tlen yopanok, ikalpan toTajtsin miyek yokipatlak. Yenkuik yotechititi kenon titenojnotsaskej niman noijki yotechmakak tlen ika titenojnotsaskej. Yokipatlak ken nochiua tlanechikojli tlen tikpiyaj itlajkotian semana, noijki yokipatlak ken kinchijchiuaj niman kinyektlaliaj kaltin kampa tosentlaliaj. ¿Xmelak ika tiktlasojkamatij ika kuajli techyekanaj ika tlasojtlalistli? Uelis kuajli tikmatstoskej ika Jehová techteochiuas pampa tokojtiliaj tiktlakamatiskej ikalpan. w19.03 10, 11 párrs. 11, 12

Matikilnamikikan ika uelis techkajkayauaskej ijkuak xnochi techijliaj. Matikitakan tlenon inpan onochiuj israelitas akin onenkej ipan itonaluan Josué niman chantiyaj kampa ikalakiyan tonajli itech atentli Jordán (Jos. 22:9-34). Yejuamej okitekakilijkaj ika israelitas akin chantiyaj kampa ikisayan tonajli okichijchiujkaj se ueyi tlaixpan nisiuj atentli. Yejon tlen okitekakilijkej yemelak ijkon opanoka, san ika, xnochi okimijlikaj. Niman okinemilijkej ika imikniuan xok kinekiyaj kitlakamatiskej toTajtsin (Jos. 22:11, 12). San ika, achto yaskej, israelitas akin chantiyaj kampa ikalakiyan tonajli okintitlankej sekimej tlakamej makitatij tlenon yemelak opanok. ¿Tlenon okasikamatitoj? Israelitas akin chantiyaj kampa ikisayan tonajli xokichijchiujkaj se tlaixpan niman ijkon kinuentlaliliskej tajtsitsintin akin xmelajkej. Yejuamej okichijchiujkaj pampa kinekiyaj ika nochimej makimatikan ika yejuamej kiueyichiuayaj Jehová. Kuajli tikmatstokej ika israelitas melak opajkej pampa xokimixnamikitoj imikniuan. Yejuamej achtopa okinejkej kasikamatiskej tlenon yemelak opanok. w18.08 5 párrs. 9, 10

Ken techilnamiktia Pablo, hasta akin kiueyichiuaj toTajtsin uelis kichiuaskej tlen xkuajli. Akin kichiuaj se tlajtlakojli kanaj kinemiliaj ika ok nouikaj iuan Jehová. San ika, tla yakaj kineki nouikas iuan toTajtsin noso kijtoua ika itech melajkanemi, yejon xnochipa kijtosneki ika toTajtsin yemelak kiselia (1 Cor. 10:1-5, TNM). Ken yotikitakej, israelitas onosiaujkaujkej pampa Moisés ouejkauj ipan tepetl Sinaí. Ijkon ken yejuamej, akin tikchiuaj ken Cristo noijki uelis tosiaujkauaskej tla tiknemiliaj ika melak youejkauj yenkuik tlaltikpaktli niman yejon tonajli ijkuak Jehová teyolkuitis. Kanaj tikitaj ika melak ueyi poliui ika nochiuas nochi tlen tikchiaj noso ika nion xnochiuas pampa melak kualtsin kakisti. Tla xtotlajpiyaj, yejon tlanemililtin uelis kichiuas matiktejtemokan tlen tejuamej tiknekij niman xok tiktejtemoskej tlen Jehová kineki. Sakin, uelis toxeloskej itech toTajtsin niman tikchiuaskej tlen xkeman otiknemilijkaj tikchiuaskiaj. w18.07 21 párrs. 17, 18

Tejuamej noijki tikseliaj kualtsitsintin tlateochiualistin ijkuak Jehová techixmati toseselti. San ika ¿tlenon noneki tikchiuaskej niman ijkon touikaskej iuan toTajtsin? Tiktlasojtlaskej niman itech tosentemakaskej (1 Cor. 8:3). Aman tej, noneki matiktlajpiyakan ken touikaj iuan toTajtsin iluikakchane. Ijkon ken tokniuan akin chantiyaj Galacia niman akin Pablo okintlajkuilouili, noneki kuajli tikitaskej maka tochiuaskej tlakeualtin itech “yejon kachtopa tlajtlamach tlen xkojtikej niman xtepaleuijkej” tlen onka ipan yejuin tlaltikpaktli, noijki maka tiktejtemoskej yejon ueyilistli tlen kitemaka (Gál. 4:9, TNM). ToTajtsin yokimixmatka yejuin tokniuan akin onenkej ipan kachtopa siglo. San ika, Pablo okimijli ika oksejpa kitejtemojtoyaj tlen xitlaj kijtosneki. Kentla kimijlitoskia: “Nemejuamej yonenkiskaltijkej nemotlaneltokil, ¿tleka oksejpa nenkinekij nemokuepaskej itech nochi tlen yonenkikaujkaj tlakuitlapan?”. w18.07 8 párrs. 5, 6

Xnoneki tikmachiliskej tlen xkuajli panoua ijkuak se xkitlakamati toTajtsin niman ijkon tiueliskej se ueyi tlamachtijli. Uelis tomachtiskej yejon tla tikpouaj ipan Biblia kenon onopopolojkej oksekimej niman tla titlanemiliaj itech yejon. Yejuin tlamachtijli ualeua itech toTajtsin, niman xonka okse tlen ijkon ma kuajli. Se neskayotl, matiknemilikan kenon melak otlajyoui David ijkuak xokitlakamat toTajtsin niman oauilnen iuan Bat-seba (2 Sam. 12:7-14). Ijkuak tikpouaskej tlen ipan onochiuj, uelis titlanemiliskej ipan yejuin tlajtoltilistin: “¿Tlenon ueliskia kichiuas David niman ijkon xtlajyouiskia? Tla nejua nikixnamikiskia itlaj ken yejon, ¿tlenon nikchiuaskia? ¿Nicholoskia, ijkon ken okichiuj José, noso nikchiuaskia yejon tlajtlakojli ijkon ken okichiuj David?” (Gén. 39:11-15). Tla titlanemiliaj itech tlen xkuajli panoua ijkuak se tlajtlakoua, kichiuas maueyiya ken tiktlauelitaj tlen xkuajli (Amós 5:15). w18.06 17 párrs. 5, 7

Kuajli tikmatstokej ika ijkuak nochiua tlen xkinamiki, miyekej peuaj kixnamikij intlayekanalis tekiuajkej. Ipan itonaluan Jesús, miyekej xok kixikouayaj kitlaxtlauaskej impuestos. Akin nemiyaj ipan itekiuajyo Roma, niman sekimej akin kikakiyaj Jesús, nonekiya kitlaxtlauaskej miyek impuestos, ipampa intlaluan, inkaluan niman itech okseki tlen kipiyaskiaj. Niman, pampa akin kitlajtlaniyaj impuesto melak tlachtekiyaj, tlaltikpakchanejkej kimachiliayaj ika xok ueliyaj ika nochi tlen kintlajtlaniliayaj. Kemantika, yejon tominsentlalijkej kintlaxtlauiliayaj akin uejueyixtoyaj niman ijkon tekitiskej ken tlayekankej, niman sakin kikuiyaj intlayekanalis niman ijkon notomintiskej. Zaqueo, akin kinyekanaya tominsentlalijkej ipan Jericó, melak onotominti pampa kintlachtekiliaya oksekimej (Luc. 19:2, 8). Uelis tiknemiliskej ika xsan yejua akin ijkon kichiuaya. Akin kitlauelitayaj Jesús okiyejyekojkej kikalaktiskej ipan tlen tekiuajkej yokinnauatijkaj itech impuestos. Pampa kinekiyaj kikajkayauaskej, okitlajtoltijkej itech “impuestos” tlen nochimej nonekiya kitlaxtlauiliskej Roma. Kema, tekiuajkej kitlajtlaniyaj makintlaxtlauilikan se denario (Mat. 22:16-18). Yejuin impuesto melak kinkualaniaya judíos, pampa kimilnamiktiaya ika Roma kinyekanaya. w18.06 5, 6 párrs. 8-10

Kech kipolouaj akin kipaleuiyaj Satanás nochipa melak miyek xijkon ken tlen kiseliaj (Job 21:7-17; Gál. 6:8). ¿Kenon techpaleuiya tikmatiskej kech kojtilistli kipiya Satanás? Se, techkauilia matikasikamatikan ika Jehová kineki matikintlakaitakan tekiuajkej niman akin tlayekanaj ipan tlaltikpaktli (1 Ped. 2:17). Yejua kichia matikintlakamatikan intlanauatiluan tekiuajkej tlen maka makixnamiki tlen yejua technauatia (Rom. 13:1-4). San ika, noijki tikmatij ika xkipiya tikpaleuiskej se partido político nion tiktokaskej se akin ompa tlayekana (Juan 17:15, 16; 18:36). Noijki, pampa tikitaj kenon Satanás kiyejyekoua kitsokuilos itokayo niman ken kitaj Jehová, melak tiknekij tikinmachtiskej oksekimej tlen melauak itech toTajtsin. Tiktekitiltiaj niman techpaktia tikitkiskej itokayo. Tikmatij ika tiktlasojtlaskej toTajtsin techmaka miyek tlen kuajli xijkon ken tla tiktlasojtlaskiaj tomin noso tlemach tlen uelis tikpiyaskej (Is. 43:10; 1 Tim. 6:6-10). w18.05 24 párrs. 8, 9

¿Ueliskej nokauaskej akin yononamiktijkej tla kipiayaj tlaueltin? Biblia xkijtoua tlenon uelis kichiuas ika yakaj manoxelo itech ixnamik. Pablo okijkuilo: “Niman tla yej, yejua on tokniu siuatl kipia iueuentsin yejuan xtlaneltoka, niman on tlakatl maski ijkon paki para iuan chanti, ma ka ma nokakaua noso noxotoni iuan” (1 Cor. 7:12, 13). Yejuin tlaxelojli ok ijkon techyekana ipan yejuin tonajli. Tikmatstokej ika kemantika teueuentsin akin “xtlaneltoka” kiteititia ika xpaki “para iuan chantis” isiuauj. Kanaj melak kitlajyouiltia noso sajnoye kiuisoki, uelis kikokolismakas niman hasta uelis kimiktis. Kanaj xkineki kinmakas isiuauj niman ichanejkauan tlen kinpoloua noso kanaj xkinkauilia makitekichiuilikan Jehová niman itech mamelajkanemikan. Ijkuak ijkon panoua, tesiuauj akin iteixpantijkauj Jehová uelis kijtos ika, maski san tlenon makijto iueuentsin, yejua xpaki “para iuan chantis” niman ika nonekis noxelos. San ika, sekimej tokniuan siuamej akin noijki ijkon panouaj xijkon kichiuaj. Yotlaxikojkej niman yokiyejyekojkej kiyektlaliskej intlaueluan. w18.12 13 párrs. 14, 16; 14 párr. 17

Ipan neskayotl tlen tlajtoua itech tokaketl tlen tiknextiaj ipan Lucas 8:5-8, 11-15, xinachtli kijtosneki “itlajtol Dios”, noso tlen titenojnotsaj itech Tekiuajyotl. Tlajli kineskayotia inyojlo tlaltikpakchanejkej. Xinachtli tlen oxin ipan kuajli tlajli ononeluayoti niman oitsmolin se yenkuik xiujtli niman sakin okipix cien itlakilyo. Ijkon ken se yenkuik xiujtli kitemaka yenkuik xinachtli, niman xyenkuikej xiujtin, tejuamej tiktemakaj yenkuik xinachtli itech Tekiuajyotl, xyenkuikej inomachtijkauan Cristo. ¿Kenon tiktemakaj yenkuik xinachtli? Ijkuak titenojnotsaj itech Tekiuajyotl. Nochipa ijkuak titenojnotsaj kentla tikxinijtoskiaj yejon xinachtli tlen okitokakej ipan toyojlo (Luc. 6:45; 8:1, TNM). Ika yejon, yejuin neskayotl techmachtia ika tiktemakaskej tlakilyotl tla xtijkajkauaj titenojnotsaj niman titlaxikouaj. w18.05 14 párrs. 10, 11

Pablo xsan kinektoya kinyolchikauas imikniuan, noijki kinekiya kichiuas okseki. Okimijli: “No niktemakas nonemilis ipampa nemoalma” (2 Cor. 12:15). Noijki ijkon, tlayekankej aman xsan kipiya ika kinyolchikauaskej niman kinyolseuiskej tokniuan ika tlajtoltin, noijki ika tlen kichiuaj. Ijkon kiteititiaj ika yemelak najmanaj inpampa (1 Cor. 14:3). Tlayekankej kemantika noneki kinnonotsaskej noso kinyektlaliskej imikniuan niman ijkon kinyolchikauaskej. Tla kinekij kuajli teyolchikauaskej, noneki kilnamikiskej tlen temachtia Biblia. Sakin ika omik niman oyoliuj, Jesús okitemakak se melak kuajli neskayotl itech yejuin, ijkuak ononek kinmelajkanotsas seki tlanechikoltin itech Asia Menor. Tlanechikoltin tlen onkatkaj ipan Éfeso, Pérgamo niman Tiatira kachtopa okimijli ika tlasojtlalistli tlen kuajli kichiujtoyaj achto ika kinyektlalis (Apoc. 2:1-5, 12, 13, 18, 19). Tlayekankej nokojtiliaj kixkopinaskej Cristo ijkuak noneki kinnonotsaskej oksekimej. w18.04 22 párrs. 8, 9

Tajtin, tikmatstokej ika nemejuamej nemokojtiliaj nenkintlajpiyaskej nemokoneuan pampa xnenkinekij makualokan. Se neskayotl, nenkichipauaj nemokal niman nenkitlajkalij nochi tlen uelis kichiuas xkualokan. Noijki ijkon, kipiya ika nenkintlajpiyaskej nemokoneuan itech películas tlen kitaj, tlen panoua ipan televisión, itech videojuegos niman nochi tlen onka ipan Internet tlen uelis kichiuas matlanemilikan ken Satanás. Jehová yomechmakak tlanauatijli pampa kineki xkintlajpilikan intlaneltokil nemokoneuan (Prov. 1:8). Kuakon, maka xmomojti tikimijlis makichiuakan tlen kisa ipan Biblia. Xkimijlikan nemokoneuan tlenon uelis kitaskej niman tlenon xuelis kitaskej, xkinpaleuikan makasikamatikan tleka ijkon nenkimijliaj (Mat. 5:37). Niman ijkuak noskaltijtiaskej, xkinpaleuikan san inselti makitakan tlen kuajli niman tlen xkuajli ijkon ken kijtoua toTajtsin (Heb. 5:14). Niman xkilnamikikan ika nemokoneuan melak ueliskej itech tlen mechitaj nenkichiuaj nemejuamej (Deut. 6:6, 7; Rom. 2:21). w19.01 16 párr. 8

Telpokamej uelis kitejtemoskej kinpaleuiskej tokniuan akin iuejueyimej. Uelis kintlajtlaniliskej makinnojnotsakan itech tlen inpan yonochiuj pampa kitekichiuiliaj Jehová. Ijkon, tokniuan akin iuejueyimej niman telpokamej melak noyolchikauaskej niman melak kinekiskej kipetlanaltiskej itlauil tlen melauak. Niman noijki, tinochimej uelis tiktejtemoskej kuajli tikinseliskej akin uajlauej ipan Kajli kampa Tosentlaliaj. Akin kiyekanaj tlanechikojli tlen nochiua achto ika ontenojnotsaskej, uelis tlapaleuiskej ika tokniuan akin iuejueyimej nochipa melak mapetlanto intlauil. Ika yejon, noneki kuajli makitakan ika yejuin tokniuan matenojnotsakan kampa uelis kichiuaskej. Kemantika, uelis kitlajtlaniliskej yakaj akin ok telpokatl imiuan makisa niman makinpaleui. Noijki, noneki nokojtiliskej kimasikamatiskej akin xok uelij miyek kichiuaj ipan tenojnotsalistli pampa kualoj noso kipiyaj okseki tlaueltin. Tla kimasikamatij, kinpaleuiskej nochimej matenojnotsakan ika pakilistli, maski tla telpokamej noso iuejueyimej, yenkuikej noso akin youejkaujkej tenojnotsaj (Lev. 19:32). w18.06 23, 24 párrs. 10-12

Matikpatiojkaitakan ika Jehová otechmakauj itech tlajtlakojli niman mikilistli, tlen techpiayaj ken tlakeualtin. Ipampa yejuin tlaxtlauijli, uelis tiktekichiuiliskej Jehová ika totlamachilis chipauak niman yejuin kichiua matipakikan (Sal. 40:8). Ijkon ken noneki tiktlasojkamatiskej, noijki kipiya totlajpiyaskej maka tiktekitiltiskej ken xkinamiki totlamakaualis. Apóstol Pedro otechmelajkaijli maka matijkuikan yejuin tlamakaualistli ika tikchiuaskej tlen xkuajli tikileuiyaj. Yejuin tlen otechmelajkaijli techilnamiktia tlen okichiujkej israelitas ipan tlaluaktli. Ipan yejuin tonajli melak techpaleuiyaj yejuin tlajtoltin, kanaj xijkon ken ipan yejon tonaltin. Satanás niman tlaltikpaktli tlen kiyekana, mojmostla kikixtia miyek tlemach tlen tikuelitas itech tlakentli, tlakuajli niman tlen tikonis, niman itech tlen ika timoyolpaktis, niman itech okseki. Ijkuak techititiaj nochi yejuin miyekpa kintlaliaj akin kualtsin nesij niman ijkon techtlaneltokiltiskej ika noneki tijkouaskej tlemach tlen nion xnoneki. Xouijtika tokajkayauaskej niman tiktekitiltiskej ken xkinamiki totlamakaualis. w18.04 9, 10 párrs. 7, 8