Septiembre

Ijkuak omik Lázaro, Jesús okiteititi ika okimasikamat Marta niman María, imikniuan Lázaro. Ijkuak okitak kenon noyolkokouayaj, “ochokak” (Juan 11:32-35). Xochokak pampa xok keman kitaskia akin iuan nouikaya. Yejua kimatstoya ika kiyolitiskia. Ochokak pampa onoyolkoko ijkuak okitak kenon tlajyouiayaj imikniuan Lázaro. Jesús xtlajtlakole katka niman tejuamej kema. San ika, techpaleuiya ijkuak tiuelij kenon yejua oteasikamat. Niman tiktlasojtlaj Jesús ipampa kenon okinpaleui tlaltikpakchanejkej. Techyolchikaua pampa tikmatij ika aman Tekiuaj itech iTekiuajyo toTajtsin niman ika xok uejkauis kipopolos nochi tlajyouilistli. Pampa yejua noijki tlaltikpakchane katka, kinamiki makipopolo nochi tlen yotexchiuili tlen Satanás kiyekana. Melak tipakij ika tikpiyaj toTekiuaj akin kasikamati tlen techajmana (Heb. 2:17, 18; 4:15, 16). w19.03 17 párrs. 12, 13

Maski tikchiuaj tlen tiuelij niman ijkon tlaltikpakchanejkej makixmatikan toTajtsin, xtejuamej akin nochi tikchiuaj (1 Cor. 3:6, 7). Jehová yejua akin kinyoltilana tlaltikpakchanejkej. Sakin, tlaltikpakchanejkej yejuamej akin kitlapejpeniaj tla kiseliskej noso xkiseliskej iTlajtol toTajtsin (Mat. 13:4-8). Matikilnamikikan ika miyekej xokikakej Jesús, niman yejua melak kuajli temachtiaya. Kuakon, xkipiya ika toyolkokoskej tla miyekej akin tikinnojnotsaj xkineki techkakiskej. Melak techpaleuis tla titeasikamatij ijkuak titenojnotsaj. Tiyolpakiskej ijkuak titenojnotsaskej niman tipakiskej pampa tiktemakaskej. Yejon kichiuas ika tlaltikpakchanejkej makiselikan iTlajtol toTajtsin niman ijkon ueliskej nemiskej nochipa (Hech. 13:48). Kuakon, “nochipa ijkuak tiueliskej, nochimej ma tikinchiuilikan tlen kuajli” (Gál. 6:10). Tla ijkon tikchiuaj, melak tipakiskej pampa tikueyichiuaskej toTajtsin Jehová (Mat. 5:16). w19.03 25 párrs. 18, 19

Tekiuaj David okijkuilo: “Sanoyej ueyixtikaj toTEKO, niman yejua, kimelaua yekteneualistli” (Sal. 145:3). David kitlasojtlaya Jehová, niman yejon tlasojtlalistli okiyolmapeuj makiueyichiua Jehová ipan tlanechikojli (1 Crón. 29:10-13; Sal. 40:5). Ipan yejuin tonajli, uelis tikueyichiuaskej Jehová ijkuak titlanankiliaj ipan tlanechikoltin. Tikuelitaj tikinkakiskej kenon sesejneka ken tlanankiliaj ipan tlanechikojli. Se neskayotl, tikuelitaj tijkakiskej ijkuak tlanankiliaj kokonej, pampa kikuij tlajtojli tlen xouijtika niman tlen kisa ipan inyojlo. Techyolpaktia ijkuak yakaj ika pakilistli kijtoua itlaj tlen okinexti ipan Biblia. Niman techmojkatlachialtia ijkuak yakaj akin san pijpinaui noso akin nomachtijtika totlajtol noyolchikaua tlanankilia (1 Tes. 2:2). ¿Kenon uelis tikimititiskej ika tikpatiojkaitaj tlen kichiuaj? Uelis tikimititiskej tla ijkuak tlami tlanechikojli tikintlasojkamachiliaj itech ken otlanankilijkej niman tikimijliaj kenon melak otechyolchikaujkej. Noijki tikteititiaj ika tikinpatiojkaitaj ijkuak tejuamej titlanankiliaj. Ijkon xsan tikseliskej yolchikaualistli, noijki titeyolchikauaskej (Rom. 1:11, 12). w19.01 8 párrs. 1, 2; 9 párr. 6

Yejon majtlaktli tlakamej kipiayaj lepra niman xkimatiyaj tlenon kichiuaskej. Yokitekakilijkaj ika Jesús, akin Ueyi Tlamachtijketl, ueliya kipajtiaya maski san katlejua kokolistli. Kuakon, ijkuak se tonajli uejka okontakej, okitsajtsilijkej: “¡Jesús, Temachtijketl, xtechikneli niman xtechpaleui!”. Jesús okichiuj tlen kitlajtlanilijtoyaj niman okinpajti nochimej. Kuajli tikmatstokej ika melak okitlasojkamachilijkej tlen okichiujka inpampa. San ika, san se okiteititi ika kitlasojkamatiya. Yejon tlakatl samaritano okinek kiueyichiuas toTajtsin (Luc. 17:12-19). Noijki ken yejon tlakatl tiknekij tikijtoskej ika tikintlasojkamachiliaj oksekimej itech nochi tlen kichiuaj topampa. Jehová techititia kenon tikteititiskej ika titetlasojkamachiliaj. Yejua ijkon kichiua, ijkuak kinmaka tlen kinnamiki akin kiyolpaktiaj (2 Sam. 22:21; Sal. 13:6; Mat. 10:40, 41). Niman Biblia technauatia: “Xmouikakan itech ika Dios para nennemiskej ken yejua, pampa nemejuamej nentetlajsojkakoneuan yejua itech” (Efes. 5:1). Niman pampa tiknekij tiyeskej ken Jehová, tikteititiaj ika titetlasojkamachiliaj. w19.02 14 párrs. 1, 2, 4

Se ichpochtli akin nemi escuela kiteijlia ika xkipanoltis se iluitl tlen xkuelita toTajtsin. Se telpochtli akin techajchan tenojnotstiuj tlatetepinia ipan puerta kampa chanti se akin iuan nomachtia niman akin kinpijpinaujtia iteixpantijkauan Jehová. Se tajtli nemi kampa tekiti, niman iteko kijlia makichiua tlen xkinamiki kichiuas. Maski uelis kipolos itekiyo, kiteijlia ika xkineki tekajkayauas niman kitlakamati tlanauatiltin pampa yejon kintlajtlanilia toTajtsin itekipanojkauan (Rom. 13:1-4; Heb. 13:18). ¿Katlejua kualneskayotl tikijtoskia ika kiteititiaj yeyimej tokniuan akin otikinteneujkej? Kanaj uelis tikijtoskej, ika yolchikaujkej niman melajki noyekanaj. San ika, noijki onka okse: ika yejuamej yolmelajkanemij. Nochimej nochikauaj niman ijkon xkichiuaskej tlen Jehová kitlauelita niman kitlakamatiskej itlanauatiluan. Tikmatstokej ika Jehová okiyolpakti tlen okichiujkej. Tejuamej noijki tiknekij ika toTajtsin mapaki ika tlen tikchiuaj. w19.02 2 párrs. 1, 2

Tlanauatijli melak kintlajpiaya akin xueliyaj nopaleuiayaj san yejuamej, ken iknotsitsintin, siuakaualtin niman akin xchanejkej. Nochimej jueces israelitas nonekiya kitlakamatiskej yejuin: “Maka xkinchiuilikan on tlen xkuajli on yejuan iknotsitsimej, nion on yejuan xchanejkej. Nion maka nenkiseliliskej on kaualtsitsintli itlaj itlaken chika nenkichaj para mechtlaxtlauilis” (Deut. 24:17). Jehová melak najmanaya inpampa akin ueliskiaj kichiuiliskej tlen xkuajli niman kintlajtlakolmakaya akin kintlajyouiltiayaj (Éx. 22:22-24). Jehová kineki ika akin kipiyaj tlanauatijkayotl manajmanakan inpampa akin kintlajpiyaj. Kitlauelita tlajtlakoltin itech auilnemilistli niman kineki ika nochimej itekipanojkauan makintlajpiyakan niman makinchiuilikan tlen melajki, niman más yejon akin xkipiyaj akin makinpaleui (Lev. 18:6-30). Ijkuak tikmatstokej ika toTajtsin kichiua tlen melajki, ueyiya ken tiktlasojtlaj. Niman, ijkuak tiktlasojtlaj toTajtsin niman itlanauatiluan, noijki tikintlasojtlaj oksekimej niman tikchiuaj tlen melajki. w19.02 24, 25 párrs. 22-26

Matikitakan se neskayotl itech kenon totlajpiyaskej itech itlanemililuan Satanás. Jehová yotechmachti ika maka matitlajtokan itech auilnemilistli noso itlaj okse tlen tsokuiltik (Efes. 5:3). San ika ¿tlenon tikchiuaskej tla akin imiuan tomachtiaj noso imiuan titekitij peuaj tlajtouaj itech tlen tsokuiltik? Kuakon, kanaj totlamachilis techijlis ika yejon xkuajli (Rom. 2:15). ¿Tlenon tikchiuaskej? ¿Tijkakiskej yejuin tlajpixketl niman kentla tiktsakuaskiaj puerta? Kanaj uelis tiknekiskej tijkakiskej itech tlen tlajtouaj noso tikitaskej tlaixkopinaltin tlen noititijtokej. San ika, noneki matikpatlakan itech tlen tlajtotokej noso matiuiyan oksekan. Noneki yolchikaualistli niman ijkon akin imiuan tomachtiaj noso akin imiuan titekitij xtexchiualtiskej matikchiuakan noso matiknemilikan tlen xkuajli. Kuajli matikmatstokan ika Jehová kita kenon tokojtiliaj tikinmapeuaskej itlanemililuan Satanás niman ika Jehová techmakas kojtilistli niman tlamachilistli niman ijkon uelis tikixnamikiskej Satanás (2 Crón. 16:9; Is. 40:29; Sant. 1:5). w19.01 17, 18 párrs. 12, 13

Salomón, akin kipiaya melak miyek tomin niman melak ueyixtoya, okinek noyolpaktis ipan inemilis niman okinek kitas kenon ontlamiskia (Ecl. 2:1-10). Okinchijchiuj kaltin, jardines niman parques, niman okichiuj nochi tlen okinek. ¿Okiyolpakti nochi yejon? Yejua okijto ika ijkuak otlanemili itech nochi yejon, okitak ika xtlaj ika tepaleui ijkon ken kijtoua tlaxelojli tlen aman tikitstokej. ¿Mitspaleuiya ineskayo Salomón? Sekimej tlaltikpakchanejkej uelij ipan innemilis ijkuak kichiuaj itlaj tlen xkuajli niman ijkuak peuaj tlajyouiyaj. Jehová xkineki ijkon mopan manochiua. Yejua kineki xkaki niman xtlakamati. Ika yejon, noneki xpiya tlaneltokijli, niman xkeman timajmanas tla tiktlapejpenia itlaj ipampa motlaneltokil. Niman Jehová xkeman kilkauas kenon melak tiktlasojtla (Heb. 6:10). Kuakon, xmokojtili xchikaua motlaneltokil. Ijkon tejua tikitas ika nochi tlen mitsijlia moTajtsin iluikakchane mitspaleuis kuajli xnemi (Sal. 32:8). w18.12 22 párrs. 14, 15

Akin kipiya chikauak itlaneltokil kuajli tlaneltoka itech toTajtsin niman nokojtilia tlanemilis ijkon ken toTajtsin tlanemilia. Kitejtemoua itlayekanalis niman nochipa kinektika ijkon kichiuas (1 Cor. 2:12, 13). David ijkon kichiuaya. Ipan se tlakuikajli, yejua okijto: “Jehová yejua notetlayokolil, tlen yonechmakakej, niman nocopa” (Sal. 16:5). Kema, yejua kijtotoya ika melak kuajli iuan nouikaya toTajtsin niman itech nopaleuiaya (Sal. 16:1). Ika yejon, okijkuilo: “Nochi nonemilis nemi ika pakilistli”. Kema, yejua melak kuajli nouikaya iuan Jehová, niman san yejon kichiuaya mayolpaki (Sal. 16:9, 11). Akin san kitejtemouaj tomin noso kenon noyolpaktiskej, xuelis kipiyaskej pakilistli tlen okipix David (1 Tim. 6:9, 10). Tla tejua melak titlaneltoka itech Jehová niman tiktekichiuilia, tiyolpakis ipan monemilis niman tikmatstos tleka tinemi. ¿Tlenon mitspaleuis machikaui motlaneltokil? Noneki uejkaujtipan iuan tinemis. ¿Kenon uelis tikchiuas yejuin? Xpoua iTlajtol, xkita tlen yokichijchiuj, xtlanemili itech ikualneskayouan, niman xkita kenon melak mitstlasojtla (Rom. 1:20). w18.12 25 párrs. 7, 8

Ijkuak Pablo okijto yejuin, xsan kinekiya tlajtos itech namiktilistli. Yejua kinekiya ika akin kichiuaj ken Cristo makipatiojkaitakan namiktilistli. ¿Ijkon tikitaj namiktilistli niman tonamiktilis? Tla tikpatiojkaitaj namiktilistli niman tiktlakaitaj, tikchiujtokej ijkon ken Jesús. Ijkuak fariseos okitlajtoltijkej tla akin yononamiktijkej ueliskej nokauaskej ixpan tekiuajkej, yejua okinteneuili tlen Jehová okijto ijkuak kachtopa tlakatl niman kachtopa siuatl ononamiktijkej, okijto: “Yejua ika on tlakatl kauas itaj niman inan para nosentlalis iuan isiuau. Ijkon, tej, on omemej sa se uajnochiuaskej ken se tlakatl”. Niman noijki okijto: “Yejua ika ma ka yakaj tlakatl kixelos on tlen Dios okinsentlalij” (Mar. 10:2-12; Gén. 2:24). Ken tikitaj, Jesús kimatstoya ika toTajtsin yejua akin okitlali namiktilistli niman okijto ika tlen toTajtsin okisentlali maka yakaj makixelo. Jehová xokimijli Adán niman Eva ika ueliskiaj nokauaskej. Jehová kinekiya ika “on omemej” nochipa san sekan manemikan. w18.12 10, 11 párrs. 2-4

Ijkuak tiuelij tlen melauak itech iTlajtol toTajtsin, tikasikamatij ika melak noneki matikchiuakan tlen technauatia toTajtsin. San ika, ijkuak chikaujtiuj totlaneltokil, tikasikamatij kenon tlanemilia toTajtsin. Tikmatij tlenon kuelita niman tlenon xkuelita, niman tikmatij tlenon kinemilia itech seki tlemach. Tijkauiliaj ika nochi yejuin matechyekana itech tlen tiknekij tikchiuaskej niman itech tlen tiktlapejpeniskej. Maski techyolpaktia tiueliskej titlanemiliskej ken Jehová, kemantika ouijtika tikchiuaskej yejuin pampa titlajtlakolejkej. Se neskayotl, kanaj techtekiyomakas tikasikamatiskej tlenon kinemilia toTajtsin itech kenon tichipaujkanemiskej, itech tlemach tlen uelis tikpiyaskej, itech tenojnotsalistli niman itech yestli. ¿Tlenon techpaleuis matitlanemilijtokan ken Jehová? Kipiya ika tomachtiskej Biblia niman ijkon tikasikamatiskej kenon tlanemilia toTajtsin. Noijki kipiya ika titlanemiliskej itech ken tlanemilia toTajtsin niman tokojtiliskej titlanemiliskej ken yejua. w18.11 23, 24 párrs. 2-4

Ipan itonaluan Habacuc, melak nochiuaya tlen xkuajli. Yejua melak najmanaya pampa tlaltikpakchanejkej kichiuayaj tlen xkuajli niman san nokalaktiayaj ipan tlauejli. ¿Kemanon popoliuiskia tlen xkuajli? ¿Tleka Jehová xtlaj kichiuaya? Maski san kanon ontlachiaya, Habacuc kitaya ika sa no ichanikniuan israelitas kinochiuiliayaj tlen xkuajli niman sa no yejuamej tetlajyouiltiayaj. Yejua kimachiliaya ika xakaj ueliskia kipaleuis, kuakon, okitlatlaujti Jehová itlaj makichiua. Habacuc kanaj yopeujka kinemiliaya ika Jehová xkajmanaya tlen nochiujtoya niman ika melak nouejkaujtoya. ¿Kemantika ijkon yotomachilijkaj? ¿Xok tlaneltokaya Habacuc itech Jehová? ¿Kinemiliaya ika Jehová xkichiuaskia tlen yokijtoka? Ka, xijkon opanok. Habacuc kitlajtlanilijtoya Jehová makipaleui ika tlen xkasikamatiya niman ika itlaueluan, niman yejuin techititia ika yejua ok kineltokaya ika ueliskia noyektlalis tlen nochiujtoya. Habacuc najmanaya pampa xkasikamatiya tleka toTajtsin xitlaj kichiuaya niman tleka kitekauiliaya matlajyoui. w18.11 14 párrs. 4, 5

Ijkuak Jesús okimijli Pedro niman Andrés makintejtemokan tlakamej niman makinmachtikan itech toTajtsin, “yejuamej nimantsin okajkej inmatl niman iuan oyajkej” (Mat. 4:18-20). Yejuin xkijtosneki ika nochimej akin nomachtiaj tlen melauak noneki kikauaskej intekiyo, pampa noneki tekitiskej niman ijkon kintlajpiyaskej inchanejkauan (1 Tim. 5:8). San ika, ijkuak ueliskej tlen melauak, aman xok ijkon kitaskej yejon tlemach tlen ueliskia kipiyaskej. Kitaskej katlejua melak ueyi kijtosneki ipan innemilis. Matikitakan tlenon okichiuj María. Yejua melak kinekiya ueyixtos ipan golf niman kinekiya kitlanis miyek tomin. San ika, opeuj nomachtia Biblia. María melak kuelitaya tlen ueltiaya niman opeuj ijkon kichiua ipan inemilis. Okasikamat ika melak ouijtika yeskia nouikas iuan Jehová niman kichiuas tlen kinekiya ipan inemilis (Mat. 6:24). Kuakon, okikauj yejon tlen ueliskia kipiyas tla nosentemakaskia ipan golf. Aman yejua precursora, niman kijtoua ika melak ika iyojlo nemi niman melak kuajli nomachilia. w18.11 5, 6 párrs. 9, 10

Ijkuak Jesús okajxilti 30 xiuitl, okikajkauj ika tekiti ken kojxinketl niman opeuj temachtia itech itekiuajyo toTajtsin. Kimatstoya ika yejon tlen nonekiya kichiuas, pampa okijto ika yejon tlen ika toTajtsin okuajtitlanka ipan tlaltikpaktli (Mat. 20:28; Luc. 3:23; 4:43). Jesús nochipa otenojnots, niman yejua kinekiya ika oksekimej noijki ijkon makichiuakan (Mat. 9:35-38). Timiyekej xtikojxinkej, san ika, tinochimej titenojnotsaj niman titemachtiaj kuajli tlajtoltin. ToTajtsin noijki kichiua yejuin tekitl pampa melak ueyi kijtosneki. Niman, Biblia kijtoua ika tejuamej “tiitekipanojkauan toTajtsin” (1 Cor. 3:9, TNM; 2 Cor. 6:4). Tikmatstokej ika yemelak tlen okijto salmista ijkuak okijto: “Tlen kipiya motlajtol melauak” (Sal. 119:159, 160). Ika yejon, tiknekij melak kuajli tiktekitiltiskej iTlajtol toTajtsin ijkuak tontenojnotsaskej (2 Tim. 2:15). Kuakon, noneki matokojtilikan niman kuajli matiktekitiltikan Biblia, pampa yejuin tlen melak tiktekitiltiaj ijkuak titemachtiaj tlen melauak itech Jesús, Jehová niman iTekiuajyo. w18.10 11 párrs. 1, 2

Ijkuak se teueuentsin tetlasojtla ken Jesucristo, akin kinyekana teueuentsitsinuan, kuakon, isiuauj xkitekiyomakas “kitlakaitas iueuentsin” (Efes. 5:22-25, 33). Niman noijki, tesiuauj kasikamatis iueuentsin. Tla kokonej kitaj ika intajuan nasikamatij, kuakon, yejuamej noijki ijkon kichiuaskej. Tajtin noneki kinmachtiskej inkoneuan mateasikamatikan. Matiknemilikan yejuin, tajtin uelis kinmachtiskej maka manotlatlalojtinemikan ipan Kajli kampa Tosentlaliaj. Noso ijkuak nosentlaliskej imiuan oksekimej, uelis kimijliskej inkoneuan makinkauilikan akin youeuentsintiakej kachtopa manotlakualtekilikan. Tla se konetl techpaleuiya noso itlaj okse tlemach kichiua topampa, kanaj techtlapouilia puerta, kuakon, matikijlikan ika kuajli tlen kichiua. Niman tla ijkon tikimijliaj, yejon konetl kuajli nomachilis niman kuajli kasikamatis ika “más paki on yejuan kitemaka xken on yejuan kiselia”. w18.09 29 párrs. 5, 6

Ken techyekana toTekiuaj Cristo, techpaleuis aman niman noijki ika tlayekapan. Ika yejon, matiknemilikan kenon melak yotechpaleui tlen yokipatlak ikalpan toTajtsin. Ijkuak tomachtiskej imiuan tochanejkauan, uelis titlajtoskej itech kenon yotechpaleui tlen yokipatlak ikalpan toTajtsin ipan tenojnotsalistli niman ipan tlanechikoltin. Kuajli tikmatstokej ika yejuin techyolchikauas. Tla tikilnamikij ika melak kuajli tlen panoua ijkuak tikchiuaj tlen technauatia ikalpan toTajtsin, kuakon, xtechtekiyomakas titetlakamatiskej niman tomachiliskej ika toyojlo. Techyolpaktia ika ikalpan toTajtsin xok ueyi kipopolojtika tomin pampa xok miyek kinchijchiua amatlajkuiloltin ken yeuejkaui, aman kitekitiltia tlen yenkuik kistika. Niman pampa ikalpan toTajtsin ijkon kichiujtika, miyekej tlaltikpakchanejkej uelij kixmatij tlen kualtsin techijlia toTajtsin. Ika yejon, ¿tiktekitiltokej tocelular noso totableta niman ompa tikitaskej toamatlajkuiloluan, videos niman grabaciones? Tla ijkon tikchiuaj, tikteititiskej ika ijkon ken Jesús, tiknekij kuajli manotekitilti tlen techmaka ikalpan toTajtsin. Ijkuak tikchiuaj tlen Cristo technauatia, tikinpaleuiyaj tokniuan makipiyakan chikauak intlaneltokil niman kuajli manouikakan semej iuan oksekimej. w18.10 25, 26 párrs. 17-19

Ijkuak titetlasojtlaj ken toTajtsin, uelis tikpaleuiskej yakaj akin melak najmantika (2 Cor. 1:3-6). San ika, maka matiknemilikan ika tokniuan xkeman nopopoloskej. Matitlanemilikan ken kinamiki. Tla tikchiaj ika tokniuan maka manopopolokan yejon kichiuas matikualanikan tla kemantika xijkon kichiuaj ken tikchiayaj (Ecl. 7:21, 22). Matikilnamikikan ika Jehová xkichia matikchiuakan itlaj tlen kimatstika ika xtiuelij tikchiuaj. Kuakon, tla tiknekij tikchiuaskej ijkon ken Jehová, noneki toijyouiskej semej iuan oksekimej (Efes. 4:2, 32). Maka matikimijlikan ika xnokojtiliaj ken noneki, niman maka matikitakan tla ueyi kichiuaj noso xueyi kichiuaj, pampa yejon kinyolkokos. Kuakon, matomatikan tikimijliskej tlen kuajli kichiuaj. Yejon kinyolchikauas niman kinpaleuis makitekichiuilikan Jehová ika pakilistli (Gál. 6:4). w18.09 16 párrs. 16, 17

Jesús okijto ika kichiuas tlen kineki toTajtsin kentla itlakual yeskia. ¿Tlenon kijtosnekiya? Matiknemilikan yejuin: ijkuak tijkuaj tlakuajli tlen tepaleuij, texchikaua niman kuajli tomachiliaj. Noijki ijkon, ijkuak tikchiuaj tlen kineki toTajtsin, chikaui totlaneltokil niman kuajli tomachiliaj. Ijkuak tikchiuaj tlen toTajtsin techmachtia, tochiuaj tlamachilisejkej (Sal. 107:43). Niman yejon melak techpaleuiya. Biblia kijtoua ika xtlaj onka tlen melak matlasojti ken tlamachilistli, noijki kijtoua: “Akin itech najsij kitaj ken se kojtli itech nemilistli, niman akin kuajli itech najsitokej yolpakiskej” (Prov. 3:13-18). Jesús okimijli inomachtijkauan: “Tla nenkimatij yejuin tlemach, nenpakiskej tla nenkichiuaj” (Juan 13:17, TNM). Inomachtijkauan Jesús pakiskiaj tla nochipa kitlakamatiyaj. Nonekiskia kiteititiskej ipan innemilis ika kichiuayaj tlen kinnauatiaya niman ika kixkopinayaj. w18.09 4 párrs. 4, 5

Maski Adán niman Eva san inselti nemiyaj ipan Xochitlalpan Edén, nonekiya tlanemiliskiaj intech oksekimej. ¿Tleka? Pampa toTajtsin okinmakak miyek tekitl. Yejua okimijli makinpiyakan inkoneuan, makitemiltikan yejuin tlaltikpaktli niman makikuepakan se xochitlalpan (Gén. 1:28). Ijkon ken Jehová okinek ika nochimej akin nemiskiaj ipan tlaltikpaktli mapakikan, Adán niman Eva noijki nonekiya tlanemiliskej itech kenon inkoneuan noijki ueliskiaj pakiskej. ToTajtsin kinekiya ika ikoneuan Adán niman Eva san sekan matekitikan niman ijkon kikuepaskiaj nochi tlaltikpaktli se xochitlalpan. ¡Yejon tekitl melak ueyi katka! Ijkuak tlaltikpakchanejkej kikuepaskiaj tlaltikpaktli se xochitlalpan, nonekiskia kitlakamatiskej toTajtsin niman ijkon kichiuaskiaj tlen yejua kineki. Tla ijkon kichiuayaj, toTajtsin kinseliskia (Heb. 4:11). Xnemili kenon melak pakiskiaj tla kichiuaskiaj yejuin tekitl. Jehová melak kinteochiuaskia pampa xtsotsokamej yeskiaj niman pampa kinpaleuiskiaj oksekimej. w18.08 18 párr. 2; 19, 20 párrs. 8, 9

¿Tlenon uelis tikchiuaskej tla yakaj techtlajtolchijchiuilia? Jesús niman Juan Teapolaktijketl okixnamijkej yejuin (Mat. 11:18, 19). ¿Tlenon okichiuj Jesús? Yejua xompa onokauj imiuan nokamatlatlantok niman ijkon kintlaneltokiltis ika tlen kijtouayaj xmelauak katka. Yejua okinyolchikauj sa no yejuamej makitakan tlen yemelak panouaya, kinekiya makitakan tlen kichiuaya niman tlen temachtiaya. Ijkon ken okijto, tlamachilistli “noteititia yejua ika on tlen nochiua” (Mat. 11:19). Tejuamej uelis tikchiuaskej ijkon ken okichiuj Jesús. Kemantika, tlaltikpakchanejkej uelis techtejteneuaskej, niman kanaj yejuin techijtlakos pampa oksekimej xok kuajli techitaskej. ¿Uelis itlaj tikchiuaskej? Tla yakaj techtlajtolchijchiuilia, matikteititikan ika xmelauak tlen kijtouaj ika tlen tikchiuaj. Ijkon ken okichiuj Jesús, tla tejuamej kuajli tikyekanaj tonemilis, miyekej kitaskej ika xmelauak tlen kijtouaj totech. w18.08 6 párrs. 11-13

Caín, Salomón niman israelitas, nochimej ueliskiaj noyolkuepaskiaj niman nopatlaskiaj (Hech. 3:19). Kuajli nestika ika Jehová xnimantsin kinkaua itekipanojkauan ijkuak nopopolouaj. Matikilnamikikan ika okitlapopolui Aarón. Aman, Jehová uelis kitekitiltis Biblia, toamatlajkuiloluan noso se tokniuj niman ijkon texchikajkanotsas. Ijkuak tikchiuaj tlen techijliaj, kuajli tikmatstokej ika Jehová techiknelis. Itlasojtlalis Jehová tlen xtekaua, techpaleuiya (2 Cor. 6:1). Techkauilia “ma tikajkauakan nochi tlen xkuajli niman nochi eleuilistli yejuan onkaj ipan in tlaltikpaktli” (Tito 2:11, 12). Ipan yejuin tlaltikpaktli nonekis tikteititiskej tla yemelak san tikueyichiuaj toTajtsin. Nochipa matokojtilikan tinemiskej iuan Jehová. w18.07 21 párrs. 20, 21

¿Kenon uelis tiktejtemoskej ika Jehová matechixmati niman matechtlasojkaita niman maka yejuin tlaltikpaktli? Noneki matikilnamikikan yejuin ome tlemach tlen ueyi kijtosneki. Kachtopa, ika Jehová nochipa kimixmati niman kintlasojkaita itekipanojkauan akin yolmelaujkej (Heb. 6:10; 11:6). Yejua yemelak kinpatiojkaita nochimej itekipanojkauan, niman kimachilia ika xkinamikiskia san ijkon kominilkauas. Jehová kitstika tlen kichiuaj akin yolmelaujkanemij niman kimatstika kenon kinmakixtis ijkuak itlaj kitlatlatas intlaneltokil (Sal. 1:6; 2 Ped. 2:9, TNM). Ika ome, noijki noneki matikilnamikikan ika Jehová techtlasojkaitas niman techteochiuas ken nion xtikchiaj. ToTajtsin xkinteochiuas akin kichiuaj tlen kuajli san pampa kinekij ika oksekimej makimitakan. ¿Tleka? Pampa Jesús okijto ika akin ijkon kichiuaj “ye kipiaj intetlayokolil” (Mat. 6:1-5). San ika, noijki okijto ika iTaj kimita akin xkintlasojkamachiliaj ijkuak kinpaleuiyaj oksekimej. w18.07 9 párrs. 8, 10

Pedro xkasikamatiya tlenon kijtosnekiya yejon tlajtoltin. Nimantsin, itech oajsikej sekimej tlakamej akin Cornelio okintitlanka. Espíritu santo okiyekan Pedro mauiya ichan Cornelio, kuakon, yejua oyaj imiuan yejon tlakamej. Tla Pedro techikoitaskia san ipampa tlen kitaya, xkeman yaskia ichan Cornelio. Judíos xkeman yayaj inchan akin xjudíos katkaj. Kuakon, ¿tleka oyaj Pedro? Maski yejua kinchikoitaya akin xjudíos katkaj, yejon tlatlachalistli tlen okitak niman itlayekanalis espíritu santo okichiuj maka sa ijkon matlanemili. Sakin ika Pedro okikak Cornelio, yejua okijto: “Aman nikmati ika melauak Dios xkichikoita se tlakatl iuan okse, yej kiselia san katlejua tlakatl yejuan kitlakaita niman kuajli kichiua maski ualeua san katleua país” (Hech. 10:34, 35). Yejuin tlen yenkuik okasikamat Pedro melak okimojkatlachialti, niman yejuin kinpaleuiskia nochimej akin kichiuaj ken Cristo. w18.08 9 párrs. 3, 4

Tikmatij ika tinochimej tikmapeuaj tlen toTajtsin kitlauelita. Maski ijkon, kemantika tikixnamikij itlaj tlen Biblia xtlaj kijtoua itech yejon. Ijkuak ijkon panos, ¿kenon tikmatiskej tlenon kineki Jehová matikchiuakan? Tla kuajli yotikmachtijkej totlamachilis ika tlen kijtoua Biblia, kuakon, tiktlapejpeniskej tlen kuajli. Jehová techtlasojtla, ika yejon, yotechmakak tlajtolyekanalistin tlen kiyekanaj totlamachilis. Niman yejua techijlia: “Nejua, Jehová, moTajtsin, Akin mitsmachtia kuajli xnemi, Akin mitsyekana ipan ojtli kampa noneki tinejnemis” (Is. 48:17, 18). Ijkuak titlanemiliaj ipan itlajtolyekanalisuan Biblia niman tikchiuaj ika maajsikan ipan toyojlo, kuakon, tikmachtijtokej, tikmelajkatlalijtokej niman tikyektlalijtokej totlamachilis. Niman ijkuak ijkon tikchiuaj, totlamachilis techpaleuiya matiktlapejpenikan tlen kuajli. Ijkuak titlajtouaj itech se tlajtolyekanalistli, tikteneujtokej se tlamachtijli tlen melauak tlen kiyekana tlen tiknemiliaj niman noijki tlen tikchiuaj. Tikasikamatiskej itlajtolyekanalisuan Biblia, techpaleuiya matikasikamatikan kenon tlanemilia Jehová niman tleka okintlali seki tlanauatiltin. w18.06 17 párr. 5; 18 párrs. 8-10

Yejuin tlen kinekiyaj kichiuaskej akin kipaleuiayaj Herodes: “Tla Jesús xkuajli tlajtouaya itech impuesto, ueliskiaj kitlajtlakoltiskej ika kimixnamiki tekiuajkej, san ika, tla kijtouaya ika nonekiya notlaxtlauas, akin kitokayaj kanaj kikauaskiaj”. Pampa xkanaj kinekiya nokalaktis, Jesús ononek kuajli kitas kenon tlanankilis. Kema, kimatstoya ika miyekej tominsentlalijkej tlachtekiyaj. San ika, yejua xkinekiya ika yejon makichiua makilkaua tlen melak ueyi kijtosnekiya: ika san iTekiuajyo toTajtsin uelis kiyektlalis intlaueluan tlaltikpakchanejkej. Ijkon, otechtlalili se neskayotl tlen tinochimej noneki tikixkopinaskej. Maski uelis tikitaskej ika itlaj tepaleuis, xkeman kipiya tokalaktiskej ipan política. Niman xkipiya ika melak tiknemiliskej tla itlaj melajki onochiuj noso ka, nion tiktejteneuaskej tlen tetlajyouiltia. Akin tikchiuaj ken Cristo tiktejtemouaj iTekiuajyo niman imelajkayo toTajtsin (Mat. 6:33, TNM). Miyekej iteixpantijkauan Jehová youelkej yokikaujkej tlen kichiuayaj ipan política. w18.06 6 párrs. 9-11

Uelis tiknemiliskej ika Satanás xsan okitekitilti auilnemilistli niman ijkon kinyoltilanas iluikaktekitkej, kanaj noijki okimijli ika kinyekanaskiaj tlaltikpakchanejkej. Nesi ika kitejtemouaya maka mayejko ikoneuj “yejon siuatl” akin toTajtsin yokijtokaj uajnemiskia (Gén. 3:15). San ika, Jehová okuajkuik se ueyi apachiuilistli niman ijkon okitelti tlen kinekiya kichiuas Satanás niman xkuakualtin espíritus. Kuakon, maka matiknemilikan ika tejuamej xuelis techijtlakos auilnemilistli noso ueyimatilistli. Iluikaktekitkej akin oyajkej iuan Satanás yotekichiujkaj melak miyek xiujtin ixpan Jehová. Maski ijkon, miyekej iluikaktekitkej okikauilijkej ika xkuakualtin ileuilistin manoskaltikan niman maueyiyakan ipan inyojlo. Tejuamej noijki ijkon, kanaj yotiktekichiuilijkej Jehová miyek xiujtin ipan ikalpan tlen chipauak. San ika, maski tinemij ipan ikalpan chipauak, uelis tijkauiliskej ika xkuakualtin ileuilistin manoskaltikan ipan toyojlo (1 Cor. 10:12). Melak noneki ika nochipa matiktlachilijtokan tlenon onka ipan toyojlo niman matijkixtikan ueyimatilistli niman xkuakualtin tlanemililtin (Gál. 5:26; Col. 3:5). w18.05 25 párrs. 11, 12

Pablo melak najmanaya pampa miyekej judíos xkinekiyaj kikakiskej tlajtoltin itech Tekiuajyotl. Maski ijkon, yejua xsan ompa okikauj itekiyo. Matikitakan tlenon okitetomili sakin ipan iamatlajkuilol tlen okintitlanili tokniuan akin chantiyaj Roma itech tlen kimachiliaya inpampa judíos. Okijto: “Ikan nochi noyojlo nikneki niman nikchiua oración ika on hebreos ma kipiakan temakixtilistli. Nejua impan nitlajtoua ika yejuamej sanoyej notlajkalij itech Dios pero yejuamej xe ixtlajtlapouij” (Rom. 10:1, 2). Pablo okitetomili ika yejua tenojnotsaya pampa ika nochi iyojlo kinekiya ika sekimej judíos makipiyakan makixtilistli (Rom. 11:13, 14). Yejua kitlajtlaniliaya toTajtsin makinpaleui sekimej judíos makiselikan tlajtoltin itech Tekiuajyotl. Noijki okijto: “Yejuamej sanoyej notlajkalij itech Dios”. Pablo kitaya tlen kuajli kichiuayaj tlaltikpakchanejkej. Niman sa no yejua kuajli kimatstoya ika ijkuak kuajli kiyekanaj akin melak chikauak tekiti, sakin nochiua se inomachtijkauj Cristo akin melak chikauak kitekichiuilia. w18.05 13 párr. 4; 15, 16 párrs. 13, 14

Tinochimej noneki tajmanaskej inpampa tokniuan niman tikitstoskej tlen kinpoloua. Pablo okimijli tokniuan hebreos: “Xmoyoleuakan niman xmoyolchikauakan. Más xmouikakan ipan on kuajli ojtli para on yejuan mechajtokaskej, maski xkojtikej ipan intlaneltok, ma ka nokuepaskej ipan xkuajli ojtli, yej más kitokaskej on kuajli ojtli” (Heb. 12:12, 13). Hasta telpokamej ueliskej kinyolchikauaskej tokniuan ika intlajtoluan. Pablo okimijli yejuin akin nemiyaj ipan tlanechikojli tlen onkatka Filipos: “Yejua ika, xnechajxiltilikan on paktli. Xpiakan san se tlanemilijli. Cada se xmomatikan san ikan se tetlajsojtlalistli. San se moyojlo niman san se tlamachilistli xpiakan. Ma ka itlaj xchiuakan ikan nexikojli nion pampa nenkinekij nemoueyimatiskej, yej ikan yolyemanilistli xmomatikan ika oksekimej más uejueyixtokej xken nemejuamej. Ma ka xchiuakan on tlen kuajli san para nemejuamej, yej no xkinchiuilikan on oksekimej on tlen no kuajli para yejuamej” (Filip. 2:2-4). w18.04 22 párr. 10; 23 párr. 12

Jehová yotechmakak tlamakaualistli itech tlajtlakojli niman mikilistli itechkopa Jesús niman ijkon matiktekitiltikan nochi tonemilis ipan itekiyo. ¿Tlenon techkauilis kuajli matiktekitiltikan totlamakaualis niman maka oksejpa tochiuaskej tlakeualtin itech iileuilisuan niman tlen melak kineki yejuin tlaltikpaktli? Chikauak titekititoskej ipan tlen technauatia toTajtsin (Gál. 5:16). Matikitakan tlen ipan onochiuj Noé niman ichanejkauan. Maski chantiyaj ipan se tlaltikpaktli kampa tentoya ika auilnemilistli niman tlauisokilistli, xonokauilijkej makinyoltilana ileuilistin niman tlen kitejtemouayaj oksekimej. ¿Kenon ouel okichiujkej? Nochipa tekititoyaj ipan tlen Jehová okinnauatijka: kichijchiuaskej se akajli, kisentlaliskej tlakuajli tlen yejuamej niman yolkamej kikuaskiaj, niman kimijliskiaj tlaltikpakchanejkej ika itlamiskia itonaluan yejon tlaltikpaktli. Biblia techijlia: “Noé okichiuj nochi tlen toTajtsin yokinauatijka. Niman okichiuj ijkon ken okinauatijkej” (Gén. 6:22). Yejuin okichiuj ika Noé niman ichanejkauan mamakisakan (Heb. 11:7). w18.04 10 párr. 8; 11 párrs. 11, 12

Satanás niman xkuakualtin espíritus xsan kintekitiltiaj tekiuajyomej niman ijkon kikajkayauaskej “nochi tlakatl chanej ipan in tlaltikpaktli”, noijki kitekitiltiaj tlaneltokijli tlen xmelauak niman ken notekitiltia tomin (Apoc. 12:9). Itechkopa tlaneltokijli tlen xmelauak, Satanás kisemoyaua tlakajkayaualistin itech Jehová. Niman nesi ika kuajli yokijto kichiuas ika melak miyekej tlaltikpakchanejkej makilkauakan itokayo toTajtsin (Jer. 23:26, 27). Ipampa yejuin, miyekej kineltokaj ika kiueyichiuaj toTajtsin, san ika, tlen yemelak, yejuamej kinueyichiujtokej xkuakualtin espíritus (1 Cor. 10:20, TNM; 2 Cor. 11:13-15). Itechkopa ken notekitiltia tomin, Satanás kisemoyaua okseki tlakajkayaualistin. Se neskayotl, kichiua ika tlaltikpakchanejkej makineltokakan ika san uelis yemelak tipakis tla tikpiya miyek tomin niman miyek tlemach (Prov. 18:11). Akin kineltokaj yejuin tlakajkayaualistli, ipan nochi innemilis san kitejtemouaj kipiyaskej “tomin” niman xkitejtemouaj Jehová (Mat. 6:24). Tlasojtlalistli tlen kimachiliaj ipampa yejon tlemach tlen uelis kipiyaskej, kichiua mapopoliui intlasojtlalis tlen kimachiliaj ipampa toTajtsin (Mat. 13:22; 1 Juan 2:15, 16). w18.05 23 párrs. 6, 7