Octubre

Maski tejuamej xueli tikitaj tlen oksekimej kipiyaj ipan inyojlo, ijkon ken Jehová niman Jesús uelij kichiuaj, kema uelis tikyejyekoskej tikasikamatiskej tlen kimachiliaj niman tlen kinpoloua (2 Cor. 11:29). Aman, nemij miyekej akin nexikolejkej, san ika, tejuamej tikyejyekouaj tikchiuaj tlen okijto Pablo: “Maka xchiuakan on tlen kuajli san para nemejuamej, yej no xkinchiuilikan oksekimej on tlen kuajli” (Filip. 2:4). Tlayekankej ipan tlanechikojli yejuamej akin melak noneki mateasikamatikan. Kimatstokej ika Jehová kinyolkuitis itech kenon kinpaleuiyaj akin yokiminmaktili (Heb. 13:17). Noneki kimasikamatiskej imikniuan tla kinekij kinpaleuiskej. ¿Kenon kiteititiaj yejon? Tlayekankej akin teasikamatij, imiuan nemij ikniuan ijkuak noneki. Imiuan tlajtouaj niman kuajli kinkakij. Yejuin melak noneki ijkuak se iborreguito Jehová kineki kintlapouilis inyojlo, san ika, xkimati kenon kichiuas (Prov. 20:5). Ijkuak tlayekankej kinektokej imiuan nemiskej tokniuan niman intech tlaneltokaj, yejon kichiua kuajli manouikakan niman manotlasojtlakan (Hech. 20:37). w19.03 17 párrs. 14-17

Titetlasojkamachilis kentla se tlakuajli, melak uelik ijkuak yakaj iuan tijkua. Ijkuak yakaj techtlasojkamachilia melak techyolpaktia. San ika, tikteijlis ika titetlasojkamachilia kinyolpaktia oksekimej. ¿Tleka? Pampa kimachiliaj ika tlen okichiujkej melak otepaleui. Yejon kichiua ika melak kuajli imiuan matouikakan. Tikteijlis ika titetlasojkamachilia melak ueyi kijtosneki ijkon ken techititia tlen kijtoua tlaxelojli tlen aman tikitstokej. ¿Xmelak ika tla se manzana de oro kikualnextiaj ika plata melak kualtsin yeskia? Niman noijki, melak patioj yeskia. ¿Kenon tomachiliskiaj tla yakaj techtlayokoliskia se manzana ijkon? Tikijlis yakaj ika tiktlasojkamachilia, noijki melak ueyi kijtosnekis. Niman, ijkon ken uejkauis tikpatiojkaitaskej manzana de oro, noijki akin tikijliskej ika tiktlasojkamachiliaj, uelis uejkauis kipatiojkaitas yejon tlajtoltin. w19.02 15 párrs. 5, 6

Ijkuak Adán niman Eva okikuajkej itech kojtli tlen tetlalnamiktia akinon kinamiki tlanauatis, okiteititijkej ika xtlaneltokayaj itech Jehová nion itech itlanauatiluan. Yejuamej okinejkej kitlapejpeniskej tlen kuajli noso tlen xkuajli. San ika ¿tlenon opanok? Xok onouikakej iuan Jehová niman xok ouel onenkej nochipa. Noijki okinpanoltilijkej inkoneuan tlajtlakojli niman mikilistli (Rom. 5:12). Itech tlen Adán niman Eva okichiujkej melak sejneka tlen okichiuj eunuco etíope ijkuak okinojnots Felipe. Yejuin tlakatl melak okitlasojkamat tlen Jehová niman Jesús yokichiujkaj ipampa, kuakon, nimantsin onoapolakti (Hech. 8:34-38). Ijkuak tosentemakaj itech toTajtsin niman toapolaktiaj ijkon ken etíope, tikteititiaj ika tiktlasojkamatij tlen Jehová niman Jesús yokichiujkej topampa. Niman, tikteititiaj ika titlaneltokaj itech Jehová niman tikseliaj ika yejua akin kinamiki kijtos tlen kuajli niman tlen xkuajli. w19.03 2 párrs. 1, 2

Tiyolmelajkanemis kijtosneki tiktlasojtlas Jehová niman nochipa tikueyichiuas niman tikchiuas tlen kuelita. Ipan Biblia, tlajtojli “yolmelajkanemilistli” ika hebreo kijtosneki sentetl noso xkokolisyo. Tlanauatijli kijtouaya ika ijkuak israelitas kiuentlaliliayaj Jehová se yolki, nonekiya maka makokolisyo (Lev. 22:21, 22). Itekipanojkauan toTajtsin xueliskiaj kimakaskiaj Jehová se yolki tla kipolouaya se ikxi, se inakas, se ixtololoj noso tla kualouaya. Jehová kitaya melak ueyi kijtosneki ika yejon yolki masentetl niman maka makokolisyo (Mal. 1:6-9). ¿Tleka Jehová kineki ika nochi tlen tikmakaskej masentetl? Yejuin techasikamachiltis. Ijkuak tijkouaj fruta xtiknekij makojkoyonki noso san tlajko. Tiknekij sentetl niman maka mapalanki. Noijki ijkon, ijkuak tikititiaj Jehová ika tiktlasojtlaj niman tiyolmelajkanemij itech, yejua noijki kineki sentetl niman maka itlaj makipiya tlen xkuajli. w19.02 3 párr. 3

Tla tiknekij tiktlajpiyaskej toyojlo, xsan noneki maka matikinselikan xkuajkualtin tlanemililtin, noijki noneki matikinselikan tlen kuajkualtin. Yeuejkaui, ipan uejueyimej kalpamej tlen tsauktoyaj ika tepantin, se tlajpixketl kintsakuaya puertas niman ijkon xkinkauiliaya makalakikan itlauelikniuan. San ika, noijki kintlapouaya puertas pampa kitekauiliaya makikalaktikan tlakuajli niman okseki tlen kinpolouaya akin ompa chantiyaj. Tla xijkon kichiuaskia, akin ompa chantiyaj mikiskiaj ika apistli. Noijki, noneki tiktlaposkej toyojlo niman ijkon makalakikan itlamachtiluan Jehová. Ipan Biblia, tikinnextiaj itlanemililuan toTajtsin. Ika yejon, nochipa ijkuak tikpouaj, tijkauiliaj ika itlanemililuan makipaleui ken titlanemiliaj, tlen tikmachiliaj niman tlen tikchiuaj. Tla tiknekij matechpaleui tlen tikpouaj ipan Biblia, noneki tikchiuaskej ome tlemach. Kachtopa, noneki tikchiuaskej teoyotl niman ijkon kuajli matikasikamatikan tlen kipiya iTlajtol, tlen melak kualtsitsintin (Sal. 119:18). Ika ome, noneki titlanemiliskej itech tlen tikpoujtokej. Ijkuak tikchiuaj nochi yejuin, iTlajtol toTajtsin kalaki tlaijtik ipan toyojlo niman tipeuaj titlanemiliaj ijkon ken tlanemilia Jehová (Prov. 4:20-22). w19.01 18 párrs. 14, 15

Jehová kimatstika ika xsan noijki ijkon tiuelij tikchiuaj niman ika titlamantikej, niman yejua melak kipatiojkaita uentli tlen tiuelij tikmakaj. Matitlanemilikan itech uentli tlen kinseliliaya israelitas. Akin kipiayaj tomintsin, kiuentlaliliayaj se borreguita noso se chivita. Akin xkipiayaj tomintsin, kimakaya “ome kokotetsitsimej noso ome pichontsitsimej”. Niman tla se, nion ome tototl xueliya kiuentlaliaya, Jehová kiseliliaya “ome kilo de harina yejuan más kuajli” (Lev. 5:7, 11). Maski harina xpatioj katka, toTajtsin kipatiojkaitaya yejon uentli pampa katka “harina yejuan más kuajli”. ToTajtsin ok san noijki ijkon tlanemilia ipan yejuin tonajli. Ijkuak titlanankiliaj, yejua techasikamati niman xkichia melak kuajli matitlajtokan ijkon ken Apolos noso matitetlaneltokiltikan ken Pablo (Hech. 18:24; 26:28). Yejua san techtlajtlanilia matokojtilikan tikchiuaskej hasta kampa tiueliskej. Matikilnamikikan yejon siuakaualtsintli akin okitemakak san ome tomintsin. Jehová okipatiojkaitak pampa yejon siuakaualtsintli okitemakak nochi tlen kipiaya (Luc. 21:1-4). w19.01 8, 9 párrs. 3-5

Pampa tikchiuaj ken Cristo tikchiaj ika matechtlauelitakan Jesús yokijtoka ika inomachtijkauan melak kintlaueltokaskej ipan itlamiyan tonaltin (Mat. 24:9; Juan 15:20). Teotlajtoketl Isaías xsan okijto techtlauelitaskej, noijki okijto ika kitejtemoskej kenon melak techixnamikiskej. Kikuiskej tlakajkayaualistin, techistlakauiskej niman melak techtlajyouiltiskej (Mat. 5:11). Niman Jehová xkichiuas ika akin techtlaueltokaj manoteltikan (Efes. 6:12; Apoc. 12:17). San ika, maka matomojtikan. Jehová techijlia ika nochi tlen ika techixnamikiskej “xkuajli onkisas” (Is. 54:17). Ijkon ken se tepantli techpaleuiya ijkuak chikauak ajakakiyaui, Jehová noijki ijkon techpaleuiya itech akin xkuajkualtin (Is. 25:4, 5). Totlauelikniuan xnochipa techtlajyouiltijtoskej (Is. 65:17). Nochimej itlauelikniuan Jehová san noijki ontlamiskej: “Kintlaniskej niman mikiskej” (Is. 41:11, 12). w19.01 6, 7 párrs. 13-16

Telpokamej, Jehová kitlasojtla tlamakaualistli, niman yejua otexchijchiuj noijki ijkon matiktlasojtlakan. San ika, noijki kineki kuajli matijkuikan, pampa yejon techtlajpiya. Kanaj tikimixmati telpokamej akin kitaj auilnemilistli, akin auilnemij, nauiltiaj kampa uelis nokokoskej, kikuij drogas noso melak konij alcohol. Kanaj ijkuak kichiujtokej yejon melak yolpakij. San ika, melak xkuajli ontlamij: xok uelij kikajkauaj yejon, peuaj kualoj noso hasta mikij (Gál. 6:7, 8). Kinemiliaj ika xakaj uelis itlaj kimijlis tlenon kichiuaskej, san ika, sa no yejuamej nokajkayaujtokej (Tito 3:3). Tiktlakamatiskej Jehová techpaleuiya. Techpaleuiya maka matikualokan niman techpaleuiya matikpiyakan melauak tlamakaualistli (Sal. 19:7-11). Niman ijkuak kuajli tijkui motlamakaualis, kijtosneki ijkuak timoyekana ika itlanauatiluan toTajtsin niman itlajtolyekanalisuan, ijkon tikimititia motajuan niman Jehová ika uelis mitskauiliskej xtlapejpeni tlen tiknekis tikchiuas (Rom. 8:21). w18.12 22, 23 párrs. 16, 17

Ijkuak otlajtlako Adán, miyek onopatlak. Tlaltikpakchanejkej aman mikiskiaj niman yejuin kijtlakoskia namiktilistli. Pablo okijto yejuin ijkuak okimijli akin kichiuaj ken Cristo ika xok nonekiya noyekanaskej ika tlanauatijli tlen okimakakej Moisés. Yejua okijto ika ijkuak se miki, ompa tlami inamiktilis niman akin yoltok oksejpa uelis nonamiktis (Rom. 7:1-3). Itech Tlanauatijli tlen Jehová okimakak kalpan Israel, miyek tiuelij itech namiktilistli. Matikitakan se. Tlanauatijli kikauiliaya se tlakatl makinpiya miyekej isiuauan. Yejuin iuajnochiujtiaya ijkuak toTajtsin xikimakaya kalpan Israel yejon Tlanauatijli. Ika yejuin Tlanauatijli, Jehová kintlajpiaya siuamej niman kokonej. Se neskayotl, tla se israelita nonamiktiaya iuan itlakeual niman sakin iuan okse nonamiktiaya, nonekiya kimakas akin kachtopa isiuauj tlen kikuas, itlaken niman ok nonekiya iuan notekas. ToTajtsin kinnauatiaya tlakamej makintlajpiyakan insiuauan (Éx. 21:9, 10). Tejuamej xok tikchiuaj ken kijtoua Tlanauatijli tlen okimakakej Moisés, san ika, tikitaj ika toTajtsin kipatiojkaita namiktilistli. Yejuin techpaleuiya noijki ijkon matikpatiojkaitakan. w18.12 10 párr. 3; 11 párrs. 5, 6

Habacuc yokijlika Jehová nochi tlen kajmanaya. San ika, kanaj notlajtoltiaya tlenon kijliskia Jehová. Pampa Jehová kentla se tajtli akin kintlasojtla niman kimasikamati ikoneuan, xokajuak Habacuc ijkuak kijlitoya tlen kimachiliaya. ToTajtsin kimatstoya ika Habacuc tlajyouijtoya niman kitlajtlantoya makipaleuikan. Kuakon, okijli tlen inpan nochiuaskia israelitas akin xyolmelaujkanemiyaj niman ika sa achijtsin poliuiya ika panoskia yejon. Kanaj Habacuc yejua akin kachtopa okijlikej ika popoliuiskia tlen xkuajli nochiujtoya ipan yejon tonaltin. Jehová okititi Habacuc ika kinektoya kipaleuis niman ika ijkon kichiuaskia. Yejon tlaltikpakchanejkej akin xkuakualtin katkaj xok uejkauiskia ika kintlajtlakolmakaskiaj. Ijkuak Jehová okijto “ipan nemotonaluan”, kijtotoya ika tetlajtlakolmakaskia ipan itonaluan teotlajtoketl Habacuc niman ipan intonaluan akin ijkuakon nemiyaj. Aman, ¿yejon tlen kichiaya makinankili Jehová? Ka. Tla ijkon panoskia, nochimej akin chantiyaj Judá melak tlajyouiskiaj. w18.11 14, 15, párrs. 7, 8

¿Kenon tikimitaj akin xikixmatij tlen melauak? Apóstol Pablo okinnojnots itech toTajtsin akin achijtsin ikimatstoyaj itech Jehová ipan sinagogas. San ika, xsan okinnojnots akin judíos katkaj, noijki okinnojnots akin kinueyichiuayaj oksekimej tajtsitsintin. Se neskayotl, ijkuak Pablo kachtopa oyaj otenojnotsato ken misionero, akin chantiyaj Licaonia okinemilijkej ika Pablo niman Bernabé uejueyixtoyaj niman okinemilijkej ika katkaj tajtsitsintin Zeus niman Hermes. ¿Onoueyimatkej Pablo niman Bernabé? ¿Okinemilijkej ika yejon katka se tlateochiualistli pampa ipan okseki kalpamej okintlaueltokakaj? ¿Okinemilijkej ika tlen panotoya kichiuaskia ika oksekimej makinekikan kikakiskej kuajli tlajtoltin? ¡Ka! Yejuamej nimantsin okitsajtsayankej intlaken niman okintsatsilijkej: “¿Tlika nenkichiuaj yejua in? Tejuamej san titlakamej no ken nemejuamej” (Hech. 14:8-15). w18.09 4, 5 párrs. 8, 9

Tla tiknekij tikchiuaskej tlen techmachtia toTajtsin, noneki tiknektoskej tikpatlaskej ken titlanemiliaj niman tlen tikchiuaj. Pedro okijto yejuin: “Pampa nenikoneuan Dios yejuan nenkitlakamatij, ma ka xkauilikan on xkuajli eleuilistli mechyekanas yejuan nenkipiayaj ijkuak xnenkixmatiyaj Dios”. Niman noijki okijto: “Yej xchijchipajtiakan ikan nochi tlen nenkichiuaskej” (1 Ped. 1:14, 15). Matiknemilikan yejuin, yeuejkaui ipan ueyikalpan Corinto, melak miyekej tlaltikpakchanejkej kichiuayaj tlen xkuelita toTajtsin. Akin ompa chantiyaj niman nomachtijtoyaj tlen melauak ononek miyek kipatlaskej ipan innemilis. Noijki ijkon, ipan yejuin tonajli miyekej xok kichiuaj ken yeuejkaui, niman ijkon ouel okikoujkej tlen melauak. Pedro noijki okimijli tokniuan: “Ipan on tonaltin katkaj, nemejuamej onenkichijkej miyek xkuajli ken on yejuan xkixmatij Dios. Nenkichijtetsiyaj nochi xkuajli yejuan ouajlaj ipan nemotlamachilis, onenkeleuijkej on tlen xkuajli, niman onentlauantinenkaj. Onenkichijkej xkuajli iluimej, niman ipan iluimej sanoyej nentlauaniyaj, niman nenkinueyiliayaj on tlamachijchiualtin nemotajtsitsiuan yejuan Dios xmechkauilia” (1 Ped. 4:3). w18.11 6 párr. 13

¿Kenon uelis tikiminextiskej akin melauak kinekij “kipiyaskej nemilistli tlen xkeman tlamis”? Ijkon ken ipan kachtopa siglo, san uelis tikiminextiskej tla titenojnotsaj. Ika yejon, noneki tikintejtemoskej ipan nochi uejueyimej kalpamej ijkon ken Jesús otechnauati (Mat. 10:11, TNM). Tikmatstokej ika xtechkakiskej akin xyolyemankej, akin noueyimatij noso akin xkinekij kixmatiskej toTajtsin. Tikintejtemouaj akin kipiyaj kuajli inyojlo, akin yolyemankej niman akin kinekij kixmatiskej tlen melauak. Noijki tikchiuaj ken yeuejkaui kichiuaya Jesús ijkuak kojxinketl katka. Yejua kachtopa kitaya katlejua kojtli kitekitiltis niman ijkon kichijchiuas se puerta, se yugo noso okse itlaj. Ijkuak kinextiaya, aman yejua kuajli kitekitiltiaya yejon tlen ika kojximaya. Ijkon tej, tejuamej kachtopa tikintejtemouaj tlaltikpakchanejkej akin kipiyaj kuajli inyojlo, niman sakin kuajli tiktekitiltiaj tlen tikpiyaj niman ijkon tikinpaleuiyaj manochiuakan inomachtijkauan Jesús (Mat. 28:19, 20, TNM). w18.10 12 párrs. 3, 4

Matikitakan tlenon ipan onochiuj Felipe, akin tenojnotsaya itech kuajli tlajtoltin. Yejua kuajli okiteititi ika maski itlaj nopatlas, melak kuajli tla se nochipa tenojnotsa. Felipe yokimakakaj se tekitl ipan tlanechikojli tlen onkatka Jerusalén (Hech. 6:1-6). San ika, itlaj onopatlak. Opeuj kintlaueltokaj akin kichiuayaj ken Cristo. Yejuin opanok sakin ika okimiktijkej Esteban. Yejon okichiuj ika tokniuan makisakan itech Jerusalén. San ika, pampa Felipe kinekiya kitekichiuilijtos Jehová, otenojnotsato Samaria kampa miyekej tlaltikpakchanejkej xikikakiyaj kuajli tlajtoltin (Mat. 10:5; Hech. 8:1). Felipe okinek yas maski san kanon kititlaniskia espíritu santo. Ika yejon, Jehová okitekitilti niman ijkon matenojnotsati kampa xakaj ontenojnotsaya. Ipan yejon tonaltin, miyekej judíos xkintlakaitayaj akin samaritanos katkaj. San ika, Felipe xokinchikoitak, niman yejon okichiuj ika melak kuajli manomachilikan. Xtechmojkatlachialtia ika miyekej melak kuajli okikakej (Hech. 8:6-8). Felipe nochipa nokojtiliaya kichiuas itekiyo Jehová. Ika yejon, Jehová melak okiteochiuj niman noijki okinteochiuj ichanejkauan (Hech. 21:8, 9). w18.10 29, 30 párrs. 14-16

Sejpa, ijkuak Jesús nemiya ne kampa kitokayotiaj Decápolis, “sekimej tlakamej okuajuikakej se tlakatl yejuan nakastsatsa katka niman tenenepochtikatka” (Mar. 7:31-35). Jesús ueliskia kipajtis teixpan, san ika, yejua “okuikak neka kampa xakaj nemi”. ¿Tleka ijkon okichiuj? Pampa yejon tlakatl “nakastsatsa katka”, niman kanaj xkuajli nomachiliaya kampa tojlan. Niman Jesús kanaj okasikamat yejon. Yemelak, tejuamej xtiuelij tikchiuaj milagros. San ika, kipiya ika tikitaskej tla tokniuan itlaj kinpoloua niman tikitaskej kenon nomachiliaj. ¿Kenon uelis noijki titeasikamatiskej ken okichiuj Jesús? Noijki, kipiya ika tikimasikamatiskej akin youeuentsintiakej niman akin kualoj. Miyekej xkitaj ika iteixpantijkauan Jehová melak kuajli titekitij, san ika, kema kitaj ika melak totlasojtlaj (Juan 13:34, 35). Niman yejuin tlasojtlalistli techyolmapeua matikchiuakan nochi tlen tiueliskej niman ijkon tikinpaleuiskej tokniuan akin youeuentsintiakej niman akin kualoj. Tikinpaleuiyaj mauiyan ipan tlanechikoltin noso matenojnotsatij. Ijkon tikchiuaj maski tokniuan xmiyek kichiuaj ken kinekiskiaj (Mat. 13:23). w18.09 29, 30 párrs. 7, 8

Jehová kinpatiojkaita nochimej itekipanojkauan. Jesús noijki kinpatiojkaita, niman okitemakak inemilis inpampa (Gál. 2:20, TNM). Tikintlasojtlaj tokniuan ika nochi toyojlo niman tiknekij tikintlajpiyaskej ika tlasojtlalistli. Ika yejon, matikchiuakan “on tlajtlamach yejuan kuajkij yolseuilistli” niman tlen “kimiskaltiaj oksekimej impan intlaneltok” (Rom. 14:19). Melak tiknekij maajsi tonajli ijkuak tinemiskej ipan Xochitlalpan kampa xok yakaj najmanas. Xok onias kokolistli nion guerras. Tlaltikpakchanejkej xok mikiskej ipampa tlajtlakojli, xok yakaj kintlaueltokas, xok kipiyaskej tlaueltin imiuan inchanejkauan, xok najmanaskej ipampa tlen yeuejkaui opanok. Ijkuak tlamis mil xiuitl, tlaltikpakchanejkej xok kipiyaskej tlajtlakojli. Akin tlaxikoskej hasta ijkuak panos tlen ouijtika, Jehová kinnoyaxkatis ken ikoneuan niman yejuamej “kipiyaskej kualtsin makixtilistli” (Rom. 8:21, TNM). Kuakon, nochipa matiteyolchikauakan ika tlasojtlalistli, niman matikinpaleuikan oksekimej noijki manemikan ipan yejon kualtsin tlaltikpaktli tlen toTajtsin yotechijli techmakas. w18.09 14 párr. 10; 16 párr. 18

Timomachtis itech toTajtsin xsan kijtosneki titlaamapouas niman tikneskayotis tlen kinankilia tlajtoltilistin. Ijkuak tomachtiaj, kuajli tikitaj tlenon techmachtisneki itech Jehová, itech kenon tlanemilia niman itech kenon kichiua. Tokojtiliaj tikasikamatiskej tleka technauatia matikchiuakan seki tlemach niman tleka seki techijlia matikmapeuakan. Noijki, tikitaj kenon uelis tikpatlaskej ken titlanemiliaj niman tlen tikchiuaj. Yemelak ika kanaj xnochipa uelis tikchiuaskej yejuin ijkuak tomachtiskej. San ika, melak noneki matikxelokan tiempo niman ijkon titlanemiliskej itech tlen tomachtiaj, kanaj hasta uelis tijkuiskej tlajko tiempo itech tlen tikxelouaj ika tomachtiskej (1 Tim. 4:15). Ijkuak nochipa titlanemiliaj itech iTlajtol toTajtsin, kuajli tikitaj ika itlanemililuan Jehová melajkej. Tipeuaj tikasikamatij tleka ijkon tlanemilia niman noijki tipeuaj ijkon titlanemiliaj (Rom. 12:2). Ijkuak tikyenkuiliaj totlamachilis, aman yenkuik ken titlanemiliaj. Niman ika yolik titlanemilijtiuej ken Jehová. w18.11 24 párrs. 5, 6

Apóstol Pablo okijto ika yejua niman oksekimej tokniuan tekititoyaj iuan toTajtsin pampa yejuamej kinnojnotsayaj niman kinmachtiayaj tlaltikpakchanejkej itech tlen melauak (1 Cor. 3:6). Ipan yejuin tonaltin, tejuamej noijki uelis titekitiskej iuan toTajtsin. ¿Kenon? Uelis tiktemakaskej noso tiktekitiltiskej totiempo, tokojtilis niman totomintsin niman ijkon tikchiuaskej tekitl tlen toTajtsin yotechmakak. ¡Yejuin se ueyi tlateochiualistli! Melak techyolpaktia ijkuak tiktemakaj noso tiktekitiltiaj totiempo niman tokojtilis ijkuak titenojnotsaj niman titemachtiaj. Yejon tlen kijtouaj miyekej tokniuan akin yakaj yokimachtijkej. Melak tipakij ijkuak tikitaj ika yakaj melak ixpaki ijkuak kasikamati tlenon yemelak temachtia Biblia, noijki ijkuak ueyiya itlaneltokil, ijkuak kipatla inemilis niman ijkuak kimijlia oksekimej tlen ueltiuj. Jesús noijki melak opak ijkuak 70 inomachtijkauan “onokuepkej ikan paktli” ijkuak otenojnotsatoj pampa melak kuajli tlen inpan onochiujka (Luc. 10:17-21). w18.08 20 párrs. 11, 12

Uelis peuas san totech titlaneltokaskej. Kanaj peuas tiknemiliskej ika kuajli tikasikamatij itlaj maski xtikmatij nochi tlen opanok. ¡Yejuin uelis techijtlakos! Noijki, uelis melak techtekiyomakas tikitaskej tla itlaj yemelak ijkuak techijliaj itlaj kampa kiteneuaj se tokniuj akin xkuajli iuan touikaj. Tla san nochipa titlanemilijtokej itech tlen xtikuelitiliaj, kanaj san tiknemilijtoskej ika xuelis itech titlaneltokaskej. Kuakon, tla tijkakij itlaj tlen xkuajli itech yejon tokniuj kanaj nimantsin tiknekiskej tikneltokaskej maski xnesi tla yemelak tlen kijtouaj itech. ¿Tlenon tiuelij itech yejuin? Tla tiknemiliaj tlen xkuajli intech tokniuan, uelis tiknemiliskej tlen xkinamiki niman tlen xmelauak (1 Tim. 6:4, 5). Kuakon, maka matijkauilikan ika nexikojli niman tlen xkuajli tikmachiliaj manoneluayoti ipan toyojlo. Maka keman matikilkauakan ika Jehová kineki matikintlasojtlakan tokniuan niman matikintlapopoluikan ika nochi toyojlo (Col. 3:12-14). w18.08 6 párr. 15; 7 párr. 18

Pampa yejua okinchijchiuj tlaltikpakchanejkej, tejuamej noijki tiiyaxkauan (Sal. 100:3; Apoc. 4:11). Maski ijkon, itech nochimej tlaltikpakchanejkej akin yonenkej, toTajtsin yokintlapejpeni seki grupos niman ijkon manochiuakan iyaxkauan. Se neskayotl, ipan Salmo 135 noijtoua ika itekipanojkauan toTajtsin akin yolmelaujkej katkaj niman yeuejkaui onenkej ipan kalpan israel, iyaxkauan katkaj niman melak tlasojtiyaj (Sal. 135:4). Noijki, amoxtli Oseas okijto ika sekimej akin xisraelitas yeskiaj noijki nemiskiaj iuan ikalpan Jehová (Os. 2:23). Yejuin teotlajtojli onochiuj ijkuak toTajtsin opeuj kinselia akin xjudíos katkaj niman ijkon noijki matekiuajtikan iuan Jesús ipan iluikak (Hech. 10:45; Rom. 9:23-26). Yejuin akin okintlapejpenijkej ika espíritu santo onochiujkej iyaxkauan toTajtsin niman akin melak tlasojtij (1 Ped. 2:9, 10). Niman, ¿tlenon uelis tikijtoskej itech akin kuajli kitekichiuiliaj toTajtsin ipan yejuin tonaltin niman kichiaj nemiskej ipan tlaltikpaktli? ToTajtsin noijki kimita ken ikalpan niman ken itlapejpenijkauan (Is. 65:22). w18.07 22 párrs. 1, 2

Tejuamej noijki tikixkopinaj Jesús, yejua kuajli otechititi hasta kenon se tlaltikpakchane uelis kitemakas tlen kipiya (Mat. 20:28). Kuakon, uelis totlajtoltiskej: “¿Uelis nikchiuas okseki niman ijkon kuajli nikixkopinas Jesús?” (1 Ped. 2:21). Tikyolpaktiaj Jehová ijkuak tikixkopinaj yejua niman ikoneuj. Ika yejon, noneki matikitakan kenon uelis tikinpaleuiskej oksekimej niman ijkon kuajli manemikan. Jesús otlajto itech se samaritano, niman ijkon okiteititi ika yejuin melak noneki matikchiuakan (Luc. 10:29-37). Yejua okinmachti inomachtijkauan ika nonekiya kinpaleuiskej oksekimej, maski san akinomej yeskiaj niman maski san kanon ualeuaskiaj. ¿Tikilnamikij tleka Jesús okiteijli yejon neskayotl? Pampa se judío okitlajtoltijka: “¿Akinonon notlaltikpakikniu yejuan noneki niktlajsojtlas?”. Tlen okijto Jesús techmachtia ika tla tiknekij tikyolpaktiskej Jehová, noneki matiktemakakan tlen tikpiyaj ijkon ken okichiuj yejon samaritano. w18.08 19 párrs. 5, 6

¿Jehová okiteochiuj María pampa okitlajpix niman okiskalti ikoneuj? Kema. Pampa Jehová okichiuj ika manotlali ipan Biblia tlen okijto niman tlen okichiuj María. Nesi ika, yejua xouel oyaj iuan Jesús ijkuak otenojnotstinen yeyi xiuitl. ¿Ononek nokauas Jerusalén pampa siuakauajli katka? Kanaj kema. Kuakon, yejua xokiseli miyek tlateochiualistin tlen oksekimej tlaltikpakchanejkej kema okiselijkej. San ika, kema onen iuan Jesús ijkuak yejua omik (Juan 19:26). Noijki, yejua nemiya inuan inomachtijkauan Jesús ipan Jerusalén seki tonaltin achto yejkoskia iluitl Pentecostés tlen onochiuj ipan xiuitl 33, ijkuak okiselijkej espíritu santo (Hech. 1:13, 14). Kanaj yejua noijki okiseli espíritu santo iuan akin ompa nemiyaj. Tla ijkon opanok, kijtosneki ika ueliskia nochipa nemis ne iluikak iuan Jesús. ¡Melak ueyi tlateochiualistli okiseli pampa nochipa oyolmelaujkanen! w18.07 9 párr. 11; 10 párr. 14

Ijkuak Jesús otenojnots ipan tlaltikpaktli, okimititi inomachtijkauan tlamachtiltin tlen melajkej niman ijkon makitakan tlenon inpan nochiuaskia tla itlaj kichiuayaj noso tla itlaj kinemiliayaj. Se neskayotl, okimijli ika tla titetlauelita kichiuas xtlaixnamiki, niman tla tiknemilia tlen xkuajli, kichiuas xauilnemi (Mat. 5:21, 22, 27, 28, TNM). Tla tokauiliaj matechyekanakan itlajtolyekanalisuan toTajtsin, kuakon, kuajli tikmachtijtoskej totlamachilis niman tiktlapejpeniskej tikchiuaskej tlen kiueyichiuas toTajtsin. ¿Tikchiaskiaj ika maka manopatla tlen tejuamej niman oksekimej tiktlapejpeniskej? Ka. Kanaj omemej tokniuan akin yokimachtijkej intlamachilis ika tlen kijtoua Biblia xsan noijki tlen kitlapejpeniskej itech se tlemach. Matitlanemilikan itech tikonis alcohol. Biblia kuajli kijtoua maka matitlauanikan niman maka ueyi matikonikan, san ika, kijtoua ika uelis tikonis san achijtsin (Prov. 20:1; 1 Tim. 3:8). Aman tej, ijkuak tiktlapejpeniskej tla tikoniskej noso ka, ¿san tiknemiliskej ika san achijtsin tikoniskej? Ka, xsan yejon. Noneki matikchiuakan tlen xkipajsolos totlamachilis, niman noijki noneki matiktlakaitakan ken tlanemiliaj oksekimej. w18.06 18 párrs. 10, 11

Jesús kuajli okimijli inomachtijkauan maka manotsokuilokan ika “intlaxokolilis” noso intlamachtiluan yeyi grupos: intech fariseos, saduceos niman intech akin kipaleuiayaj tekiuaj Herodes (Mat. 16:6, 12). Noneki matikilnamikikan ika yejuin tlen okijto opanok sakin ika sekimej galileos kinekiyaj ika Jesús manochiua intekiuaj. Ijkuak tlaneltokijli noneloua iuan política, nimantsin kichiua ika miyekej matlaixnamikikan. Jesús okimijli inomachtijkauan ika ijkuak panoskia yejon, melak nonekiya maka kanaj manokalaktikan. Ika yejon, uejueyixtokej teopixkej niman fariseos, okinemilijkej kimiktiskej Jesús. Kitayaj ken se intlauelikniuj itech tlaneltokijli niman itech política, se akin ueliskia kichiuas makipolokan intekiyo. Kijtouayaj: “Tla ijki tikauiliskej ma kichiua, nochi tlakatl kineltokas niman on romanos kixoxotoniskej toueyi tiopan niman in topaís” (Juan 11:48). Ika yejon, ueyi teopixki Caifás okitak kenon kimiktiskiaj Jesús (Juan 11:49-53; 18:14). w18.06 6, 7 párrs. 12, 13

Satanás kitekitiltia okse tlakajkayaualistli tlen yokichiuj ika miyekej ompa mauetsitij, yejuin panoua ijkuak sekimej kinekij kixmatiskej naualyotl. Yejua xsan kitekitiltia tlaneltokijli tlen xmelauak niman ijkon kinyoltilanas tlaltikpakchanejkej makixmatisnekikan xkuakualtin espíritus, noijki kitekitiltia yejon tlen ika noyolpaktilo. Kintekitiltia películas niman tlen timauiltis ipan aparatos, niman okseki tlemach tlen kichiua manesi ika naualyotl tepakti. ¿Tlenon uelis tikchiuaskej niman ijkon xtechajsis yejon teposchikojli? Xkipiya tikchiaskej ika ikalpan toTajtsin matechijkuilouili nochi tlenon ika uelis toyolpaktiskej niman tlenon ka. Toseselti noneki tikmachtiskej totlamachilis niman ijkon matlanemili ijkon ken Jehová tlanemilia (Heb. 5:14). Tiktlapejpeniskej tlen kuajli tla tiktlakamatij tlen okijto apóstol Pablo. Matotlajtoltikan: “Tla se akin kemach nomachtijtika Biblia kitaskia ika tlenon ninoyolpaktia, ¿kinemiliskia ika nikchiua tlen nikteijlia ijkuak nontenojnotsa, noso ika nikpiya ome noxayak?”. Tla tikchiuaj tlen tikijtouaj ijkuak titenojnotsaj, yejuin techpaleuis maka matiuetsikan ipan itlakajkayaualisuan Satanás (1 Juan 3:18). w18.05 25 párr. 13

¿Kenon uelis tikixkopinaskej ineskayo Pablo? Kachtopa, nochipa melak matiknekikan tikinnextiskej akin kinektokej kipiyaskej “nemilistli para nochipa”. Ika ome, matiktlajtlanilikan toTajtsin makintlapouili inyojlo akin kixmatisnekij (Hech. 13:48; 16:14). Silvana, akin ikipiya kanaj 30 xiujtin ken precursora, kijtoua: “Achto ika nikontetepinis se puerta, niktlajtlanilia Jehová manechpaleui manitlanemili ipan tlen kuajli”. Noijki ika nochi toyojlo matiktlajtlanilikan toTajtsin ika iluikaktekitkej matechyekanakan kampa nemij akin kipiyaj kuajli inyojlo (Mat. 10:11-13; Apoc. 14:6). Se tokniuj akin itoka Robert niman kipiya ipantsin 30 xiujtin ken precursor kijtoua: “Sajnoye teyolpakti titekitis imiuan iluikaktekitkej, pampa yejuamej kimatij tlenon panotok ipan innemilis tlaltikpakchanejkej”. Niman ika yeyi, matikyejyekokan tikitaskej tlen kuajli kichiuaj tlaltikpakchanejkej. Se tlayekanketl akin itoka Carl techijlia: “Niktejtemoua tlen kuajli kichiua se tlaltikpakchane, maski mapitentsin, itlaj tlen manechititi ika kuajli iyojlo, kanaj mitsixuetskilis, ixpaki, noso tla tetlajtoltia pampa melauak kimatisneki”. Tla tikchiuaj nochi yejuin, nochipa tikpiyaskej tlakilyotl, ijkon ken Pablo. w18.05 15 párr. 13; 16 párr. 15

Tlen melak techyolpaktia yejua tikmatiskej ika akin otikiminpaleuijkej yeuejkaui aman ok kitekichiuilijtokej Jehová. Apóstol Juan okijkuilo: “Xitlaj onkaj yejuan más nechpaktia xken ijkuak nikaki ika nokoneuan kitlakamatij on tlen melauak” (3 Juan 4). Miyekej precursores kuajli kijtouaj ika melak mitsyolchikauas tikmatis ika akin yeuejkaui otikmachti itech Biblia aman ok melajkanemi itech Jehová noso noijki yonochiuj precursor. Ika yejon, tla tikilnamiktia se precursor akin noyolajmana nochi tlen yokichiuj ipampa oksekimej, uelis kipaleuis kuajli manomachili. Miyekej tlayekankej ipan circuito yokijtokej kenon melak kuajli yonomachilijkej yejuamej niman insiuauan ijkuak kiseliaj se amatsintli kampa se tokniuj kimijlia ika kitlasojkamati ika okitlajpalotoj tlanechikojli. Niman noijki ijkon kimachiliaj tlayekankej, misioneros, precursores niman betelitas ijkuak kintlasojkamachiliaj ken kuajli kitekichiuiliaj Jehová. w18.04 23 párrs. 14, 15

Salomón xotetlakamat niman sakin ononamikti iuan 700 siuamej niman okinpix 300 itlakpasiuauan noso concubinas (1 Rey. 11:3). Miyekej itech yejon siuamej xkatkaj israelitas niman kinueyichiuayaj tajtsitsintin tlen xmelajkej. Ijkon, Salomón noijki xokitlakamat tlanauatijli tlen kijtouaya ika israelitas xkipiaya ika nonamiktiskej iuan siuamej akin xkatkaj israelitas (Deut. 7:3, 4). Salomón okipolojtiaj ken kitlasojtlaya itlanauatiluan toTajtsin niman miyek okichiuj tlen melak xkuajli katka. Okichijchiuili inantsin Astoret se tlaixpan niman noijki itajtsin Kemós. Ompa, iuan isiuauan kominueyichiuaya xmelajkej tajtsitsintin. Hasta okinchijchiuili intlaixpan ipan se tepetl tlen onkatka ixpan Jerusalén, kampa okichijchiujka iteopan Jehová (1 Rey. 11:5-8; 2 Rey. 23:13). Kanaj sa no yejua onokajkayauj niman okinemili ika toTajtsin xkualaniskia tla xkikajkauaya ika konuenchiuaya ipan iteopan. San ika, Jehová xkeman san kipanoltia tlajtlakojli. w18.07 18 párrs. 7-9

Seki “flechas yejuan tlikuitikaj” tlen Satanás uelis ika mitsmotlas yejua tlakajkayaualistin itech Jehová, kanaj kinekis mitstlaneltokiltis ika xnajmana mopampa niman xmitstlasojtla. Ida, se ichpochtli akin kipiya 19 xiuitl, kijtoua: “Kemantika, nikita ika Jehová melak uejka nemi, niman ika xkineki iuan maninouika”. ¿Tlenon kichiua ijkuak ijkon nomachilia? Yejua techtomilia: “Tlanechikoltin kichikauaj notlaneltokil. Yeuejkaui san ompa nonnotlaliaya niman xkeman nitlanankiliaya. Niknemiliaya ika xakaj kinekis kinkakis notlanankililuan. San ika, aman ninoyektlalia achto ika nias kampa totlanechikoluan niman nikyejyekoua okpa noso yexpa nitlanankilis”. Tlen ipan onochiuj Ida techititia se ueyi tlamachtijli. Escudo tlen ika notsakuiliayaj soldados romanos kipiaya kech ika ueyi katka, san ika, totlaneltokil, tlen noijki kentla se escudo, uelis nochiuas melak ueyi noso melak pitentsin. Tejuamej tiktlapejpeniskej kenon tiknekij maonia (Mat. 14:31; 2 Tes. 1:3). Ika yejon, melak noneki matikchikauakan totlaneltokil. w18.05 29, 30 párrs. 12-14

Matikitakan ika yejon tlajpixketl okipatlak ken tlanemiliaya niman okitlajtlan makipaleuikan sakin ika opanok tlalolinalistli (Hech. 16:25-34). Noijki ijkon, kanaj sekimej tlaltikpakchanejkej akin xkikakiyaj tlen kijtoua Biblia nopatlaskej niman kitlajtlaniskej makinpaleuikan sakin ika itlaj inpan nochiua. Kanaj sekimej xkimatij tlenon kichiuaskej ijkuak san totoka kipolouaj intekiyo, noso ijkuak kimijliaj ika kipiyaj se kokolistli tlen temojti noso ijkuak miki se inchanejkauj. Kanaj hasta notlajtoltiaj tlen yejon tlajpixketl onotlajtolti: “¿Tlinon noneki nikchiuas para nimakisas?”. Ijkuak tikominextiaj kampa titenojnotsaj, kanaj aman kinekiskej kikakiskej tlajtoltin itech tlamachialistli tlen tikimitkiliaj. Ijkon tej, tla xkeman tijkajkauaj ika titenojnotsaj, uelis tikinyolseuiskej tlaltikpakchanejkej ijkuak kinektoskej kiseliskej (Is. 61:1). w18.05 19, 20 párrs. 10-12

Ipan tonaltin tlen aman tinemij, Satanás yokimixtlapacho miyekej tlaltikpakchanejkej niman nemij ken tlakeualtin itech xmelauak tlaneltokijli, itech ken notekitiltia tomin niman itech ken miyekej noyekanaj (2 Cor. 4:4). Se tlateochiualistli tiktokaskej ineskayo Jesús niman tikinpaleuiskej oksekimej noijki makixmatikan niman makitekichiuilikan Jehová, toTajtsin itech tlamakaualistli (Mat. 28:19, 20, TNM). Yejuin se tekitl tlen ouijtika, niman onka miyek tlaueltin. Ipan seki países, tlaltikpakchanejkej melak xkinekij itlaj kimatiskej niman kemantika hasta kualanij. Tlen noneki totlajtoltiskej yejua tla tiueliskiaj tiktekitiltiskej totlamakaualis niman ijkon chikauak titekitiskej ipampa iTekiuajyo toTajtsin. Melak techyolchikaua tikitaskej ika melak miyekej itekipanojkauan Jehová yokitejtemojkej nemiskej san ika tlen melak noneki niman ijkon tekitiskej ken precursores, yejuamej kasikamatij ika tinemij sa itlamiyan yejuin tonaltin (1 Cor. 9:19, 23). Sekimej tlapaleuiyaj ipan intlanechikol, niman oksekimej yauej kampa nonekij tenojnotskej. ¡Melak kualtsin ika miyekej kuajli kitekitiltiaj tlamakaualistli niman ijkon kitekichiuiliskej Jehová! (Sal. 110:3). w18.04 11, 12 párrs. 13, 14