Enero

Nochimej akin tiktekichiuiliaj toTajtsin tiknekij tikmatiskej kenon kuajli tikchiuaskej tekitl tlen yotechmakakej (2 Tim. 4:5). Yejon tekitl ueyi kijtosneki niman melak noneki manochiua. San ika, kemantika xueli titenojnotsaj ijkon ken tiknekiskiaj. Onka okseki tlen noneki tikchiuaskej tlen techkuilia miyek tiempo niman tochikaualis. Kanaj melak noneki titekitiskej niman ijkon tikintlakualtiskej tochanejkauan. Noso kanaj tejuamej noso se tochanejkauj kualo, melak najmana noso melak youeuentsintiak. Xkipiya ika toyolkokoskej tla yejon tlen tikixnamikij xtechkauilia miyekpa matitenojnotsakan itech Jehová. Jesús kimatstoya ika xtinochimej san noijki tiueliskiaj tiktekichiuiliskiaj toTajtsin (Mat. 13:23). Jehová melak kipatiojkaita nochi tlen tikchiuaj niman ijkon tiktekichiuiliskej (Heb. 6:10-12). w19.04 2 párrs. 1-3

Itlakajkayaualisuan Satanás itech akin yomijkej kitsokuilouaj itoka toTajtsin. Satanás kinkajkayaua tlaltikpakchanejkej ijkuak kintlaneltokiltia ika akin yomijkej kintlajyouiltiaj ipan infierno. ¿Tleka yejuin kiteneua tlen xmelauak itech toTajtsin? Pampa teasikamachiltia ika Jehová, akin tetlasojtla, noijki ijkon ken Diablo (1 Juan 4:8). ¿Kenon kichiua matomachilikan yejuin? Niman, xnemili ¿kenon nomachilia Jehová? Maka matikilkauakan ika yejua kitlauelita ijkuak yakaj tetlajyouiltia (Jer. 19:5). Itlakajkayaualisuan Satanás itech mikilistli kichiua maka matitlaneltokakan itech imikilis Cristo (Mat. 20:28). Satanás noijki kijtoua ika tikpiyaj se alma tlen xkeman miki, yejon kentla kijtosnekiskia ika itikpiyaj se nemilistli tlen xkeman tlamis. Kuakon, Cristo xok nonekiskia manotemaka niman ijkon tejuamej matikpiyakan se nemilistli tlen xkeman tlamis. Matikilnamikikan ika Jesús okiteititi ika melak techtlasojtla ijkuak omik topampa (Juan 3:16; 15:13). ¿Kenon nomachiliaj Jehová niman Jesús ika san ipampa yejon tlakajkayaualistli kichiua manasikamati ika xtlaj kijtosneki tlen okitemakakej? w19.04 14 párr. 1; 16 párrs. 8, 9

¿Kanon onka tlen Jesús otemachti? Naui Evangelios kijtouaj miyek tlen Jesús okichiuj niman tlen okijto ipan tlaltikpaktli. Niman okseki tlen onka ipan Tlajkuiloltin ika Griego techpaleuiyaj kuajli matikasikamatikan kenon tlanemiliaya Jesús, pampa akin otlajkuilojkej onoyekankej ika espíritu santo niman tlanemiliayaj ken Cristo. Tlen Jesús otechmachti techpaleuiya ipan tonemilis. Techpaleuiya ipan tlen tikchiuaj tochan, ipan totekiyo noso kampa tomachtiaj, niman ipan totlanechikol (Gál. 6:2). Tikasikamatij tlenon kijtoua yejuin tlanauatijli ijkuak tikpouaj Tlajkuiloltin ika Griego niman ijkuak titlanemiliaj itech. Tiktlakamatij itlanauatil Cristo ijkuak tikchiuaj tlen otenajnauati Jesús niman tlen okijto, niman nochi yejuin onka ipan yejuin Tlajkuiloltin. Ijkuak tiktlakamatij itlanauatil Cristo, tiktlakamatij toTajtsin Jehová, pampa tlen Jesús otemachti ualeua itech toTajtsin (Juan 8:28). w19.05 3 párrs. 6, 7

Teajman ika tlakamej kichiuaj tlen Satanás kuelita. San ika, Jehová kuajli kimati tlen Satanás kichiua. Yejua kimati kenon titlajyouiyaj niman ika uelis techyolseuis. Melak techyolpaktia ika tiktekichiuiliaj se toTajtsin akin “techiknelijtikaj niman nochipa techyoltlalijtikaj”, yejua “techyoltlalia ipan nochi on tlen tikijyouiyaj, para tejuamej no uelis tikinyoltlaliskej on yejuan kipiyaj tlajyouilistli. Niman tikinyoltlaliskej sano ika on teyoltlalijli yejuan Dios ika techyoltlalia” (2 Cor. 1:3, 4). Akin intajuan xokintlajpixkej niman ijkon maka yakaj makinnajnauilti noso akin san no inchanejkauan okinnajnauiltijkej, melak noneki makinyolseuikan. Tekiuaj David kimatstoya ika Jehová yejua akin uelis melak kuajli techyolseuis (Sal. 27:10). Yejuin tekiuaj kineltokaya ika toTajtsin kintlajpiya ika tlasojtlalistli akin inchanejkauan kintlalkauiyaj. ¿Kenon kintlajpiya? Ika itekipanojkauan akin yolmelajkanemij. Tokniuan akin touan nosentlaliaj ipan tlanechikojli yejuamej tochanejkauan. Matiknemilikan yejuin, Jesús okijto ika akin kiueyichiuayaj toTajtsin ken yejua, yejua kimitaya ken ikniuan tlakamej, ken ikniuan siuamej niman ken inan (Mat. 12:48-50). w19.05 15, 16 párrs. 8, 9

¿Tlenon kachtopa kipiya ika tomachtiskej? Noneki mojmostla tomachtiskej iTlajtol toTajtsin. Aman, xok más ueyak tlen tikpouaj nochi semanas itech Biblia ipan tlanechikojli. Yejon kichiua matikpiyakan más tiempo niman ijkon titlanemiliskej niman okseki tomachtiskej. Xsan noneki tikpouaskej tlaxeloltin tlen ompa nestokej, noneki tijkauiliskej ika iTlajtol toTajtsin maajsi ipan toyojlo niman matechpaleui más matiknisiuikan Jehová (Sal. 19:14). Ijkuak tomachtiaj revista Amatl Tekakistilijketl kentla tomachtijtoskiaj Biblia. Ika yejon, noneki matikimitakan textos tlen ompa uajnestiuej, niman melak kuajli tla tikimitaj textos tlen nopouaskej ipan tlanechikojli. Kuajli matikitakan kenon tlajtoltin tlen uajlauej ipan textos kuajli kipaleuiya tlen noijtoua ipan párrafo. Noijki, matitlanemilikan itech textos niman matiknemilikan kenon uelis tikchiuaskej ipan tonemilis (Sal. 1:2). w19.05 27 párr. 5; 28 párr. 9

Jesús kuajli otechititi kenon tiktekichiuiliskej toTajtsin. Yejua kitaya ika melak ueyi kijtosnekiya tlajtos itech iTekiuajyo toTajtsin. Onejnen miyek kilómetros niman ijkon uelis melak miyekej kinnojnotsas. Nochipa ijkuak ouel, otenojnots techajchan niman kampa tojlan. Yejua nochipa okinek tenojnotsas. Ijkuak titenojnotsaj itech iTekiuajyo toTajtsin nochipa ijkuak tiuelij niman maski san kanon, tikchiujtokej ken Jesús. Tiknektokej tijkauaskej tlen tikuelitaj niman ijkon titenojnotsaskej (Mar. 6:31-34; 1 Ped. 2:21). Sekimej tokniuan uelis nochiuaskej precursores especiales, regulares noso auxiliares. Oksekimej yonomachtijkej se yenkuik tlajtojli noso yoyajkej kampa xmiyekej nemij akin tenojnotsaj. Niman maka matikilkauakan ika publicadores melak ueyi tekitl kichiuaj, niman nokojtiliaj chikauak tenojnotsaskej. Jehová xtechtlajtlanilia tlen xuelis tikchiuaskej. w19.04 4 párrs. 7, 8

Uelis totlajtoltiskej yejuin: “¿Nikmachilia ika ok nitenexikolita maski san achijtsin?” (1 Ped. 2:1). “¿Ninoueyimati ipampa tlen onikchiuj yeuejkaui, ipampa tlen oninomachti noso ipampa notomin?” (Prov. 16:5). “¿Nikimita ika xuejueyixtokej akin xkipiyaj tlen nejua nikpiya noso akin oksekan ualeuaj?” (Sant. 2:2-4). “¿Nechyoltilana tlen onka ipan tlaltikpaktli tlen Satanás kiyekana?” (1 Juan 2:15-17). “¿Nikuelita nikitas kampa uajnesi auilnemilistli niman tlauisokilistli?” (Sal. 97:10; 101:3; Amós 5:15). Kanaj ken tikinnankiliskej yejuin techititis kanon kipiya ika topatlaskej. Tinochimej tipeuaj titlanemiliaj ken akin imiuan touikaj (Prov. 13:20). Kampa tomachtiaj noso kampa titekitij, nemij miyekej akin xtechpaleuiyaj matitlanemilikan ken Jehová. San ika, ipan tlanechikoltin uelis tikinnextiskej amigos akin techpaleuiskej matitetlasojtlakan niman matikchiuakan tlen kuajli (Heb. 10:24, 25). w19.06 12 párrs. 13, 14

Jehová xkinekiya matikixnamikikan tlaueltin tlen aman tikixnamikij. Kuakon, tikasikamatij ika akin kixnamiktika tlen ouijtika kemantika san tlajtotikisa niman xkinemilia tlen kijtoua (Job 6:2, 3). Maski tla se tokniuj kijtoua tlen xmelauak itech Jehová noso totech, xkipiya ika tikualantiuetsiskej noso tiktejteneuaskej. Kemantika, akin kixnamiktika se ueyi tlauejli noneki yakaj akin makipaleui, makinojnotsa niman makimelajkatlali (Gál. 6:1). ¿Kenon tlayekankej uelis ijkon tepaleuiskej? Uelis tepaleuiskej tla kichiuaj ken Elihú, akin melak kuajli okikak Job niman okasikamat (Job 33:6, 7). Elihú okinojnots Job hasta ijkuak kuajli yokasikamatka tlenon kinemiliaya. Tlayekankej akin kichiuaj ken Elihú kuajli kinkakij tokniuan niman kiyejyekouaj kasikamatiskej tlenon kixnamiktokej. Ijkon, ijkuak yejuamej kinnojnotsaj tokniuan, más ajsi ipan inyojlo tlen kimijliaj. w19.06 22, 23 párrs. 10, 11

¿Kenon ok uelis tikueyichiujtoskej Jehová ijkuak xok techkauiliskej? Tokniuan akin nemij sucursal kimijliskej tlayekankej tlenon kichiuaskej. ¿Niman tla tokniuan akin nemij sucursal xuelij kiminotsaj tlayekankej? Kuakon, tlayekankej techijliskej tlenon tikchiuaskej, nopaleuiskej ika Biblia niman ika toamatlajkuiloluan, ijkon ok uelis tiktekichiuilijtoskej toTajtsin (Mat. 28:19, 20; Heb. 10:24, 25). Jehová yokijto ika itekipanojkauan nochipa kipiyaskej tlen ika kichikauaskej intlaneltokil (Is. 65:13, 14; Luc. 12:42-44). Kuakon, uelis kuajli tikmatstoskej ika ikalpan toTajtsin kichiuas nochi tlen uelis niman ijkon techmakas tlen techpaleuis matimelajkanemikan. San ika, tejuamej noijki uelis itlaj tikchiuaskej. Ijkuak xok techkauiliskej matikueyichiuakan Jehová, matiktejtemokan kanon uelis kuajli tikiyanaskej Biblia niman okseki amatlajkuiloltin. Kuajli matikitakan maka tikejyeuaskej yejuin tlen melak ueyi kijtosneki kampa ueliskej nimantsin kinextiskej, maski tla yejuin onka ipan amatl noso tla tikpiyaj ipan tocelular noso okse aparato. Tinochimej noneki itlaj tikchiuaskej niman ijkon chikaujtos totlaneltokil. w19.07 10 párrs. 10, 11

Yeuejkaui katka, miyekej kipiayaj se religión. San ika, ipan yejuin tonaltin tikitaj ika yejon yonopatlak. Melak miyekixtiuej akin xnemij ipan se religión. Niman ipan seki países, melak miyekej kimelajkaijtouaj ika xkipiyaj se religión (Mat. 24:12). ¿Tleka? Sekimej pampa “sa komatstokej kenijki [...] pakiskej ipan innemilis” noso pampa miyek tlemach kixnamiktokej (Luc. 8:14). Sekimej xok kineltokaj tla nemi toTajtsin. Niman oksekimej, maski tlaneltokaj itech toTajtsin, kinemiliaj ika xok tepaleui tikpiyas se religión, ika xitlaj kijtosneki niman ika tlen ompa noteijlia xnotlajtolnamiki iuan ciencia niman iuan tlen aman noneltoka. Kanaj kikakij ipan televisión ika tinemij ipampa evolución, niman kanaj iminamigos niman iminmaestros noijki ijkon kijtouaj. San ika, kanaj xmiyekpa kikakij tlen kiteititia ika nemi se toTajtsin. Oksekimej kinkualania ika teopixkej san kinekij uejueyixtoskej niman notomintiskej. Niman sekimej chantij kampa tekiuajkej xkinkauiliaj makiueyichiuakan toTajtsin. w19.07 20 párrs. 1, 2

Xnoneki melak tikojtikej yeskej niman ijkon uelis tikchikauaskej totlaneltokil. Miyekej tokniuan nokojtilijtokej chikauak kitekichiuilijtoskej Jehová maski xok kojtikej ken yeuejkaui (2 Cor. 4:16). ¿Yotiuejkaujkej tiktekichiuiliaj Jehová niman aman xok más tiuelij tiktekichiuiliaj ken yeuejkaui pampa tikualoj? Tla ijkon topan nochiua, maka matajmanakan. Matikilnamikikan ika Jehová kipatiojkaita nochi tlen yotikchiujkej (Heb. 6:10). Tla aman miyek noso xmiyek tikchiuaj ipan itekiyo Jehová, matikilnamikikan ika yejua kitstika ika yemelak tiktlasojtlaj. Kema, tikititiaj Jehová ika tiktlasojtlaj ijkuak tokojtiliaj chikauak tiktekichiuiliskej ika pakilistli (Col. 3:23). Jehová kimatstika tlenon xueli tikchiuaj niman xtechtlajtlanilia matikchiuakan tlen xuelis tikchiuaskej (Mar. 12:43, 44). w19.08 3 párr. 6; 5 párrs. 11, 12

Ika tlen kuajli kichiuaj tokniuan, Jehová kinyoltilana tlaltikpakchanejkej (Mat. 5:14, 15; 1 Ped. 2:12). Tla moixnamik xiteixpantijkauj Jehová, ¿kimixmatstok tokniuan akin imiuan timosentlalia? Xkijli mouan mauiya ipan tlanechikoltin (1 Cor. 14:24, 25). Tikchiaj maajsi tonajli ijkuak tochanejkauan makitekichiuilikan Jehová. San ika, maski tikchiuaskej nochi tlen tiueliskej niman ijkon tikinpaleuiskej, kanaj xkeman kinekiskej kitekichiuiliskej Jehová. Tla ijkon panoua, maka matotlajtlakoltikan ipampa tlen tochanejkauan kitlapejpeniaj kichiuaskej. Tejuamej xuelis tikinchiualtiskej matlaneltokakan itech Jehová. Maski ijkon, matikteititikan ika tipakij pampa tiktekichiuiliaj Jehová, yejon uelis kinyoltilanas noijki makitekichiuilikan. Matikchiuakan teoyotl inpampa, matikinnojnotsakan itech Biblia ika tetlakaitalistli niman nochipa matikinpaleuijtokan (Hech. 20:20). Matikneltokakan ika Jehová kiteochiuas tlen tikchiuaj inpampa. Niman tla tochanejkauan techkakij, yejuamej makisaskej. w19.08 18, 19 párrs. 15-17

¿Tlenon kijtosneki yejuin tlajtoltin? Ika noneki tinemiskej san ika tlen noneki, kijtosneki san se tlemach tikitstoskej, maka oksekan matontlachiakan. Jesús ijkon okichiuj, yejua san se tlemach konitstoya. Yejua nochipa okitejtemo tenojnotsas niman okinmachti inomachtijkauan san makinemilikan kenon tenojnotsaskej itech Jehová niman itech iTekiuajyo. Tejuamej tikchiuaj ken Jesús ijkuak nochipa tiktejtemouaj titenojnotsaskej itech iTekiuajyo niman imelajkayo toTajtsin (Mat. 6:33). Tla tinemij san ika tlen noneki, san titlanemiliskej itech kenon tiktekichiuiliskej toTajtsin niman ijkon uelis más tikinpaleuiskej oksekimej makixmatikan niman makitlasojtlakan Jehová. Matiknemilikan, ¿uelis xmiyek horas noso tonaltin titekitiskej niman ijkon titenojnotsaskej okseki tonaltin? ¿Uelis tikitaskej ika maka matechkuili miyek tiempo tlen ika toyolpaktiaj? w19.04 5, 6 párrs. 12, 13

Xiuejkaui, miyekej tokniuan akin youejkaujkaj kitekichiuiliaj toTajtsin oksekan okintitlankej. Miyekej itech yejuin tokniuan xkuajli onomachilijkej pampa onopatlak innemilis. Miyekej melak onajmankej, pampa xok kichiuaskiaj yejon tekitl tlen uejkaujtipan yokichiujkaj niman tlen melak yokuelitakaj. San ika, sakin onomatkej. ¿Tleka? Pampa melak kitlasojtlaj Jehová. Yejuamej kimatstoyaj ika xokijlikej Jehová ika kitekichiuiliskiaj san tla kinmakaya se tekitl ipan ikalpan (Col. 3:23). Maski san kanon nemij, yejuamej pakij pampa ok kitekichiuiliaj Jehová ika yolyemanilistli. Yejuin tokniuan kimaktiliaj Jehová nochi tlen kinmajmana pampa kimatstokej ika Jehová kineki kinpaleuis (1 Ped. 5:6, 7). Ijkuak tiyolyemankej, más kuajli tikimixnamikij tlaueltin niman noijki más tonisiuiyaj itech toTajtsin iluikakchane. w19.09 6, 7 párrs. 15-17

Jehová xsan okitekitlali David makinyekana inchanejkauan, noijki okitekitlali makiyekana kalpan Israel. Pampa yejua tekiuaj katka, ueliya tlanauatiaya. San ika, kemantika xkuajli otlayekan niman okichiuj tlen melak xkuajli (2 Sam. 11:14, 15). Maski ijkon, okiteititi ika kinokauiliaya Jehová makiyekana pampa kiseliaya ijkuak kiyektlaliaya. Ika nochi iyojlo kinotsaya toTajtsin niman nokojtiliaya kichiuas tlen yejua kijliaya (Sal. 51:1-4). Noijki, melak yolyemanki katka pampa kinkakiya oksekimej tlakamej niman siuamej (1 Sam. 19:11, 12; 25:32, 33). Kilnamikiya kanon onopopolojka niman xok ijkon kichiuaya, niman nochipa okitekichiuili Jehová. David kimatstoya ika melak kipaleuiskia tla kinokauiliaya Jehová makiyekana. Aman, uelis tikitaskej ika akin kinokauiliaj Jehová makinyekana melak sejneka nemij xijkon ken akin xkinokauiliaj makinyekana. Akin kinokauiliaj Jehová makinyekana xitlaj kinmajmana pampa nemij “ikan paktli ipan iminyojlo” (Is. 65:13, 14). w19.09 17 párr. 15; 19 párr. 21

Ipan 1935, iteixpantijkauan Jehová kuajli okasikamatkej akinomej nemij ipan grupo kampa nemi “sanoyej miyek tlakatl”. Okasikamatkej ika yejuin grupo xnoneki nemis ne iluikak niman ijkon nemis “ixpan on trono niman ixpan on borreguito”. Okasikamatkej ika yejuin san itlaj kixneskayotia. Maski yejuin grupo nemis ipan tlaltikpaktli, uelis nemis “ixpan on trono” tla kitlakamati toTajtsin niman tla kasikamati ika san yejua kinamiki matlayekana (Is. 66:1). Niman yejuin grupo uelis nemis “ixpan on borreguito” tla tlaneltoka itech tlaxtlauijli tlen okitemakak Jesús. Ipan Mateo 25:31, 32 ijkuiliujtika itlaj tlen kuajli techasikamachiltia yejuin. Ompa kijtoua ika nochimej “on tlakamej de nochiuiyan países”, hasta on akin xkuajkualtin, ixpan nosentlaliskej Jesús niman nemiskej ixpan itrono. Kuajli tikitaj ika países onokej ipan tlaltikpaktli, xonokej ne iluikak. Kuakon, melak kuajli tlen onasikamat ipan 1935. Ipampa yejuin, tikasikamatij tleka Biblia xkijtoua ika yejuin grupo yas iluikak. San yejon grupo kampa nemij 144,000 tlapejpeniltin yaskej iluikak kampa xkeman mikiskej niman tlayekanaskej ipan tlaltikpaktli iuan Jesús (Apoc. 5:10). w19.09 28 párr. 9

Jehová kichia ika akin tiitekipanojkauan kuajli matikisakan itech Ueyixtika Babilonia. San ika, xsan yejon noneki tikchiuaskej. Noneki nochipa tiktekichiuilijtoskej toTajtsin. Matikitakan kenon uelis tikchiuaskej yejuin. Kachtopa, noneki yemelak tiktlakamatiskej itlanauatiluan Jehová. Xuelis tikchiuaskej noso tinemiskej ken tlaltikpakchanejkej. Tejuamej tiktlauelitaj nochi auilnemilistli, noijki ijkuak se tlakatl nonamiktia iuan se tlakatl noso ijkuak se siuatl nonamiktia iuan se siuatl niman okseki tlemach tlen kichiuaj (Mat. 19:4, 5; Rom. 1:26, 27). Ika ome, noneki tikueyichiujtoskej Jehová imiuan tokniuan. Tikueyichiuaj toTajtsin maski san kanon, ipan Kaltin kampa tosentlaliaj, niman tla noneki, tosentlaliaj inchan tokniuan noso hasta san ichtaka tosentlaliaj. Maski san tlenon panos, nochipa tosentlaliskej niman ijkon tikueyichiuaskej toTajtsin. Niman melak noneki matosentlalikan ipan yejuin tonaltin “pampa tikmatij ika ye nisiu uajlas toTEKO” (Heb. 10:24, 25). w19.10 15, 16 párrs. 6, 7

Jehová kineki matiyolpakikan. Biblia kijtoua ika “xitlaj onkaj okse más kuajli kichiuas on tlakatl, yej san ma tlakua niman ma tlaoni, niman ma paki ika on tlen okitlan ijkuak otekit” (Ecl. 2:24). San ika, miyek tlen ika noyolpaktilo melak teijtlakoua, pampa kichiua maka matiktlakamatikan toTajtsin niman matikchiuakan noso hasta matiktlasojtlakan tlen iTlajtol toTajtsin kijtoua ika xkuajli. Tiknekij san Jehová tikueyichiuaskej, kuakon, xuelis titlakuaskej “ipan imesa toTEKO” niman “ipan inmesa on xkuajkualtin espíritus” (1 Cor. 10:21, 22). Miyekpa, ijkuak titlakuaj iuan yakaj kijtosneki ika iuan touikaj. Tla tiktlapejpeniaj toyolpaktiskej ika tlen kipiya naualyotl, auilnemilistli, noso kampa uajnesi kenon nouisokilo noso okseki tlen xkuajli, san noijki kentla titlakuaskiaj imiuan itlauelikniuan toTajtsin niman tijkuaskiaj tlen yejuamej okichijchiujkej. Tla ijkon tikchiuaj, san tejuamej toijtlakouaj niman xok kuajli touikaskej iuan toTajtsin. w19.10 26 párr. 2; 29 párrs. 11, 12

Tla yakaj akin kiyekana se barco kineki kuajli nopaleuis ika ajakatl, noneki kichiuas ome tlemach. Kachtopa, noneki kuikas barco hasta kampa ajakatika. Tla xkejkuania barco itech itempan mar, barco xkanaj uelis yas. Ika ome, noneki kuajli kinpatlauas velas, pampa san ijkon ajakatl uelis kuikas barco. Noijki ijkon, san uelis tiktekichiuilijtoskej Jehová tla techpaleuijtika espíritu santo. Ika yejon, noneki tikchiuaskej ome tlemach. Kachtopa, noneki tiaskej kampa ajakatika, kijtosneki, tikchiuaskej nochi yejon tlen techpaleuis matikselikan iespíritu toTajtsin. Ika ome, noneki “kuajli tikinpatlauaskej velas”, kijtosneki, tokojtiliskej nochipa tikchiuaskej yejon tlen techpaleuis matikselikan iespíritu toTajtsin (Sal. 119:32). Tla ijkon tikchiuaj, espíritu santo techpaleuis niman ijkon matiktekichiuilijtokan Jehová maski tikixnamikiskej tlen ouijtika. w19.11 9 párr. 8; 10 párr. 11

Tonajli ijkuak imikiskia, Jesús melak nokuaajmantoya. Kimatstoya ika sa achijtsin poliuiya ijkuak itlauelikniuan kitlajyouiltiskiaj niman kimiktiskiaj. San ika, onkatka okse tlen kajmanaya. Yejua kinekiya kiyolpaktis iTaj pampa melak kitlasojtlaya. Niman kimatstoya ika tla melajkanemiskia maski kixnamikiskia tlen ouijtika, yejon tepaleuiskia manochipaua itoka toTajtsin. Noijki, Jesús kintlasojtlaya tlaltikpakchanejkej niman kasikamatiya ika ueliskiaj kipiyaskej nemilistli tlen xkeman tlamis tla yejua melajkanemiya hasta ijkuak mikiskia. Maski melak miyek tlen kixnamiktoya, Jesús nochipa yolseujtoya. Jesús kipiaya iyolseuilis toTajtsin, kijtosneki, nemiya ika iyojlo ijkon ken nomachilia akin kuajli nouika iuan Jehová. Yejon kimachiliaya Jesús ipan itlamachilis niman ipan iyojlo (Filip. 4:6, 7). Tejuamej xtikixnamikiskej tlen Jesús okixnamik. San ika, nochimej inomachtijkauan tikixnamikiskej tlen ouijtika (Mat. 16:24, 25; Juan 15:20). Niman ken Jesús, kemantika tokuaajmanaskej. w19.04 8 párrs. 1-3

Matotlajtoltikan: “¿Nikpatiojkaita ika ninemi ipan ikalpan Jehová?”. Jehová kuajli yotechititi ika kipaleuijtika ikalpan. Kinamiki matiktlasojkamachilikan (1 Tes. 5:18). ¿Kenon uelis tikteititiskej ika tikpaleuijtokej ikalpan Jehová? Uelis tikteititiskej tla tikchiuaj tlen kijtoua Biblia niman tlen notlalia ipan toamatlajkuiloluan, tla tikchiuaj tlen techijliaj ipan tlanechikoltin niman uejueyimej tlanechikoltin, niman tla chikauak titenojnotsaj niman tla tikinpaleuiyaj oksekimej noijki manochiuakan inomachtijkauan Cristo (1 Cor. 15:58). Matokojtilikan tikyolpaktiskej Jehová niman ijkon makiseli tlen tikchiuaj ipampa. Matiktekichiuilikan Jehová pampa tiktlasojkamachiliaj. Matikmakatokan tlen más kuajli pampa tiktlasojtlaj ika nochi toyojlo. Niman matikpaleuikan ikalpan tlen aman kiyekantika. Tla tikchiuaj nochi yejuin, tikititiskej Jehová ika tikpatiojkaitaj tiktekichiuiliskej niman tiyeskej iteixpantijkauan. w19.11 25 párrs. 17, 18

Jesús xkijtosnekiya tla kichiuaskiaj milagros ken yejua okichiuj. Yejua kijtosnekiya ika melak tenojnotsaskiaj niman melak miyekej kinmachtiskiaj, yejuamej más uejkaujtipan kichiujtoskiaj yejuin tekitl xijkon ken yejua. Tla tikpiyaj se totekiyo, matotlajtoltikan: “¿Nechixmatij ken yakaj akin kuajli kichiua itekiyo? ¿Nitlami notekiyo ijkuak noneki niman nikchiua nochi kech niueli?”. Tla ijkon tikchiuaj, kanaj akin itech titekitij melak totech tlaneltokas, niman kanaj akin imiuan titekitij kinektoskej techkakiskej ijkuak tikinnojnotsaskej itech iTlajtol toTajtsin. Noijki noneki matotlajtoltikan: “¿Nechixmatij ken yakaj akin nokojtilia tenojnotsas niman temachtis? ¿Kuajli ninomachtia achto ika nontetlajpalos? ¿Oksejpa ninokuepa nikomintlajpaloua akin kuajli nechkakij? Niman ¿nikchiua okseki tlemach ipan itekiyo Jehová?”. Tla ijkon tikchiujtokej, kuakon, kanaj melak techyolpaktia tikchiuaskej yejuin tekitl. w19.12 5 párrs. 14, 15

Akin yokinemilijkej kinpiyaskej inkoneuan, noneki tlajtoskej itech yejuin: kachtopa, kemanon kinekij kinpiyaskej niman, ika ome, kechmej kinekij kinpiyaskej. ¿Tleka niman kemanon kinamiki matlajtokan itech yejuin? Kinamiki matlajtokan itech yejuin achto ika nonamiktiskej pampa san sekan noneki kitlapejpeniskej tla kinpiyaskej inkoneuan. Noijki kipiya ika kinemiliskej tla yemelak iueliskej kiskaltiskej se konetl. Sekimej akin kemach yononamiktijkej, kikauiliaj mapano se noso ome xiuitl achto ika kinpiyaskej inkoneuan. Kasikamatij ika tla kinpiyaj inkoneuan, noneki kixeloskej tiempo niman ijkon kintlajpiyaskej. Pampa xnimantsin kinpiyaj inkoneuan, yejuamej uelij san sekan nemij niman más notlasojtlaj. w19.12 23 párrs. 4, 5

Ipan nochi tlaltikpaktli, miyekej itekipanojkauan Jehová noyolajmanaj pampa kixnamikij tlen ouijtika. Sekimej tokniuan melak kualoj noso yomik se inchanejkauj. Oksekimej melak najmanaj pampa se inchanejkauj noso se akin iuan nouikaj xok kitekichiuilia Jehová. Niman oksekimej tokniuan melak tlajyouiyaj pampa tlaixpoliui kampa chantij. Noneki yakaj makinyolseui yejuin tokniuan. ¿Kenon uelis tikinpaleuiskej? Tla nochipa imiuan touikaj. ¿Kenon tikteititiaj ika xtikinkauaj akin imiuan touikaj? Ijkuak tikxelouaj tiempo noso ijkuak tikchiuaj okse itlaj inpampa. Matikitakan tlenon inpan onochiuj sekimej tokniuan. Tokniuj Peter okijlikej ika kipiaya se kokolistli tlen melak kitlajyouiltiskia niman kimiktiskia. Isiuauj, Kathryn, kijtoua: “Se tokniuj iuan isiuauj akin nemij ipan totlanechikol otechuikakej kampa tlapajtiketl akin otechijli tlen kokolistli kipiaya Peter. Ijkuakon, yejon tokniuan okijtokej ika xkeman techkauaskiaj toselti pampa kimatstoyaj ika melak titlajyouiskiaj, niman ijkon okichiujkej, yejuamej nochipa touan nemij ijkuak tiknekij ika yakaj matechpaleui”. ¿Xmelak ika techyolchikaua tikinpiyaskej amigos akin techpaleuiyaj ijkuak titlajyouiyaj? w20.01 8 párr. 1; 9 párr. 5; 10 párr. 6

Tla tejua ompa teuan tinemiskia ipan yejon cuarto tlen onkatka ikuatipan se kajli, xkeman tikilkauaskia yejon iluitl Pentecostés itech xiuitl 33. Kuajli tikmatstoskia ika yomitstlapejpenijkaj ika espíritu santo (Hech. 2:5-12). San ika, ¿nochipa panoua tlen temojkatlachialti ijkuak toTajtsin tetlapejpenia ika espíritu santo? Matikitakan kemanon okintlapejpenijkej inomachtijkauan Jesús akin onenkej ipan kachtopa siglo. Ipan iluitl Pentecostés itech xiuitl 33, xsan okintlapejpenijkej ika espíritu santo yejon 120 inomachtijkauan Jesús akin nemiyaj ipan se kajli. Ika teotlak, sa no ipan yejon tonajli, okseki 3,000 inomachtijkauan Jesús okinmakakej espíritu santo tlen Jesús okijtoka kiseliskiaj. Yejuamej okintlapejpenijkej ijkuak onoapolaktijkej (Hech. 2:37, 38, 41, TNM). San ika, seki xiuitl ika tlayekapan, xnochimej okintlapejpenijkej ijkuak onoapolaktijkej. Samaritanos okintlapejpenijkej sakin ika yonoapolaktijkaj (Hech. 8:14-17, TNM). Jehová noijki otetlapejpeni ken xkeman kichiuaya, yejua okintlapejpeni Cornelio niman ichanejkauan ijkuak nion xinoapolaktiayaj (Hech. 10:44-48, TNM). w20.01 20, 21 párrs. 2-4

Ipan naui Evangelios, yejua melak miyekpa okiteneuj Jehová ken “noTajtsin”. ¿Tleka melak miyekpa otlajto itech Jehová? Pampa yejua kinekiya ika oksekimej makitakan Jehová ken se Tajtli tetlasojtlani (Juan 17:25). ¿Tikilnamikij tlenon okichiuj Jehová ipampa iKonetsin, Jesús? Matitlajtokan itech yejuin niman matikitakan tlenon tiuelij itech Jehová. ToTajtsin xsan kikakiya iKoneuj ijkuak kichiuiliaya teoyotl, noijki kinankiliaya (Juan 11:41, 42). Maski Jesús okixnamik miyek tlen ouijtika, yejua nochipa okitak kenon iTajtsin okipaleui niman okitlasojtlak (Luc. 22:42, 43). Jehová okiteititi ika yejua se Tajtli tetlasojtlani pampa okichiuj ika Jesús kuajli makimatsto ika nochipa kipaleuiskia (Mat. 26:53; Juan 8:16). Melauak ika xokichiuj maka matlajyoui, san ika, kema okipaleui makixiko tlen kixnamikiya. Jesús kimatiya ika tlen kixnamikiskia san panoskia (Heb. 12:2). Jehová melak kuajli okiteititi ika kitlajpiaya iKoneuj, kema, yejua okikak, okimakak tlen kipolouaya, okimachti niman okipaleui (Juan 5:20; 8:28). w20.02 3 párrs. 6, 7, 9

Ijkuak tiktlapejpeniskej tlen tikchiuaskej noso tlen xtikchiuaskej, noneki matitlanemilikan itech intlamachilis tokniuan niman oksekimej. Xtiknekij ika oksekimej mauetsikan topampa (Mar. 9:42). Noijki, xtiknekij tikinkualaniskej akin xiteixpantijkauan Jehová. Tla tikintlasojtlaj, kichiuas matikinnotsakan ika tetlakaitalistli, niman ijkon tikueyichiuaskej Jehová. Niman, ximiuan tokamauisokiskej noso xtikinpijpinaujtiskej ipampa tlen kichiuaj. Matikilnamikikan ika melak tepaleui ijkuak titetlasojtlaj. Tla titetlakaitaj niman titeasikamatij, hasta uelis noyolyemaniskej akin techtlauelitaj. Matikimijlikan akin ken tikimitaj niman tovecinos ika tiiteixpantijkauan Jehová (Is. 43:10). Tla niman tikchiuaj yejuin, uelis xouijtika tikitaskej tla kemantika melak kualanij. Maka keman matipinauikan tikijtoskej tlen melauak (Rom. 1:16). w19.04 17, 18 párrs. 14-16

On 12 apóstoles okistinenkej iuan Jesús ijkuak yejua ouajlaka ipan tlaltikpaktli. San ika, apóstol Pablo opeuj kitekichiuilia Jehová sakin ika Jesús yomijka niman yoyoliujka. Maski sakin Pablo okitlapejpenijkej ken apóstol akin miyekan ontenojnotsaskia, yejua xteuan tlapouajli katka intech on 12 apóstoles (Rom. 11:13; Hech. 1:21-26). Maski ijkon, yejua kitlasojkamatiya tlen Jehová kimakaya niman xokinnexikolitak on 12 apóstoles, akin okistinenkej iuan Jesús. Tla tiyolyemankej niman tla tiyolpakij san ika tlen tikpiyaj, tikchiuaskej ken Pablo niman noijki tikintlakaitaskej tokniuan akin Jehová yokinmakak se tekitl (Hech. 21:20-26). Yejua yokintekitlali sekimej tokniuan matlayekanakan ipan tlanechikojli. Maski yejuamej noijki nopopolouaj pampa tlajtlakolejkej, Jehová kimita ken “tetlayokoliltin” (Efes. 4:8, 11). Ijkuak tikintlakaitaj tlayekankej niman tikchiuaj ika yolyemanilistli tlen yejuamej techijliaj, kuajli touikaj iuan Jehová niman tinemij ika yolseuilistli imiuan tokniuan. w20.02 17 párrs. 13, 14

Ijkuak xtimomachtiaya imiuan iteixpantijkauan Jehová, kanaj itikpatiojkaitaya Biblia niman kanaj itiktlasojtlaya Jesús. Niman, aman ika imiuan timomachtia kanaj melak tikuelita imiuan timosentlalis. San ika, yejon tlen tikmachilia, kanaj xkichiuas xmosentemaka itech Jehová niman xmoapolakti. Aman tej, ¿tlenon noneki mitsyolmapeuas xmoapolakti? Tla melak tiktlasojtla toTajtsin. Niman ijkuak más tiktlasojtlas toTajtsin xijkon ken okseki tlemach, xitlaj nion xakaj uelis mitstsakuilis xtekichiuili. Kema, yejon tlasojtlalistli xsan mitspaleuis xmoapolakti, noijki mitspaleuis nochipa xtekichiuili toTajtsin Jehová. Jesús techijlia: “Xtlajsojtla moTEKO Dios ikan nochi moyojlo, ikan nochi moalma, ikan nochi motlamachilis, niman ikan nochi mochikaualis” (Mar. 12:30). ¿Tlenon mitspaleuis xtlasojtla niman xtlakaita Jehová ijkon ken techijlia Jesús? Noneki titlanemilis itech kenon yejua techititia ika techtlasojtla. w20.03 4 párrs. 4, 5

Melak kuajli tiktekichiuiliskej toTajtsin kijtosneki tikchiuaskej nochi kech tiuelij ijkuak titenojnotsaskej niman titemachtiskej. San ika, Jehová xkita tla miyek horas titenojnotsaj, yejua kita tleka tikchiuaj. Tla titenojnotsaj pampa tikintlasojtlaj tlaltikpakchanejkej niman Jehová, yejon kichiuas melak kuajli matiktekichiuilikan toTajtsin (Mar. 12:30, 31; Col. 3:23). Niman melak kuajli tiktekichiuiliaj toTajtsin ijkuak tiktemakaj nochi tlen tikpiyaj, tokojtilis niman tochikaualis. Tla tikpatiojkaitaj titenojnotsaskej, tikyejyekoskej tikinnojnotsaskej melak miyekej tlaltikpakchanejkej. Kanaj tejuamej xueli melak titenojnotsaj ijkon ken tiknekiskiaj. San ika, yejon tlen melak tikuelitaskiaj tikchiuaskej. Tokojtiliaj ika akin tikinnojnotsaj maajsi ipan inyojlo iTlajtol toTajtsin. San ika, pampa tikpiyaj miyek tlen tikchiuaskej, kanaj totlajtoltiaj kenon uelis nochipa tiktejtemoskej tiktekichiuiliskej toTajtsin. w19.04 2 párr. 3; 3 párrs. 4, 6

Itlakajkayaualisuan Satanás itech mikilistli melak tetlajyouiltiaj. Xnemili, akin miki se inkoneuj kimijliaj ika omik pampa toTajtsin kinekiya okse angelito. ¿Xmelak ika itlakajkayaualis Satanás san kintlajyouiltia niman xkinyolchikaua? Satanás noijki kijtoua ika tiauej infierno. Ika yejon, yeuejkaui miyekej okintlatijkej pampa kixnamikiyaj tlen noijtouaya teopan. Se libro tlen tlajtoua itech Inquisición Española, kijtoua ika akin ijkon otlanauatijkej kinemiliayaj ika ijkon kimititijtoyaj kenon tlajyouiskiaj ijkuak yaskiaj infierno. Yejuamej kinekiyaj manoyolkuepakan achto ika mikiskiaj niman ijkon xyaskiaj infierno. Niman oksekan, tlaltikpakchanejkej kinemiliaj ika noneki kinueyichiuaskej akin yomijkej. Oksekimej miyek kichiuaj inpampa akin yomijkej pampa xkinekij itlaj makinchiuilikan. Teajman ika itlakajkayaualisuan Diablo xteyolseuiyaj, san kichiua ika miyekej matlajyouikan niman manomojtikan. w19.04 14 párr. 1; 16 párr. 10