Febrero

Ipan Biblia, melajkayotl kijtosneki tikchiuas tlen toTajtsin kijtoua ika kuajli niman xsan tiktlapejpenis katlejua tikchiuas. Matikitakan kenon Jesús okiteititi imelajkayo. Ijkuak yejua onen ipan tlaltikpaktli, judíos akin tlanauatiayaj ipan tlaneltokiltin kintlauelitayaj akin oksekan ualeuayaj, akin xuejueyixtoyaj niman xkintlakaitayaj siuamej. San ika, Jesús xotechikoitak, yejua nochimej san noijki kimitaya. Okinseli akin itech tlaneltokayaj maski oksekan ualeuayaj (Mat. 8:5-10, 13). Nochimej okinnojnots, akin kipiayaj tomin niman akin xkipiayaj (Mat. 11:5; Luc. 19:2, 9). Jesús nochipa okinpatiojkaitak siuamej, kuajli kiminotsaya niman kintlakaitaya, niman noijki ijkon okintlasojtlak akin miyekej kintlauelitayaj (Luc. 7:37-39, 44-50). Uelis noijki tikchiuaskej ken Jesús tla xtitechikoitaj niman tla tikinnojnotsaj nochimej akin kinekij techkakiskej. Maka matikitakan kanon ualeuaj noso tla okse tlamantik tlaneltokaj. Tokniuan tlakamej kichiuaj ken Jesús ijkuak kintlakaitaj siuamej. w19.05 2 párr. 1; 5 párrs. 15-17

Aman, tlayekankej noijki tenotsaj ika tlasojtlalistli ijkuak teyolseuiyaj ika Biblia. Xsan tlayekankej ueliskej kinyolseuiskej akin okinnajnauiltijkej. Tinochimej noneki tikchiuaskej yejuin: “Xmoyoltlalikan cada se inuan oksekimej” (1 Tes. 4:18). Tokniuan siuamej akin chikauak intlaneltok ueliskej kinpaleuiskej oksekimej tokniuan siuamej akin noneki makinyolseuikan. San matikonnemilikan yejuin, Jehová noita ken se nantli akin kiyolseuiya ikonetsin (Is. 66:13). Biblia technojnotsa itech miyekej siuamej akin okinpaleuijkej akin melak najmantoyaj (Job 42:11). Jehová kuelita kitas ika tokniuan siuamej kinpaleuiyaj oksekimej tokniuan siuamej akin noyolkokouaj. Kemantika, tlayekankej uelis kitlajtoltiskej se tokniuj akin chikauak itlaneltok tla uelis kipaleuis okse tokniuj siuatl akin tlajyouijtika. Ijkuak tikpaleuiskej se tokniuj maka matiktlajtoltikan tlen yejua xkineki kijtos (1 Tes. 4:11). w19.05 16, 17 párrs. 10-12

¿Tleka notlajtlani manemikan omemej akin okitakej tlen opanok niman ijkon tlayekankej uelis temelajkatlaliskej? Pampa Biblia ijkon kijtoua, niman yejon tlen kinamiki. Tla akin okichiuj se tlajtlakojli xkijtoua tlen okichiuj, noneki manemikan omemej akin okitakej tlen opanok niman ijkon kiteititiskej ika yemelak yonochiuj se tlajtlakojli. Tla ijkon nochiua, tlayekankej uelis kimelajkatlaliskej (Deut. 19:15; 1 Tim. 5:19). Tla akin kitlajtlakoltiaj xnokuitia, tlayekankej kinkakij akin okitakej tlen opanok. Tlayekankej akin temelajkatlaliaj nosentlaliskej tla yemelak nesi ika onochiuj se tlajtlakojli ipampa tlen kijtouaj omemej tlaltikpakchanejkej: tikteneujtokej akin oteteixpanti niman noijki akin kiteititia ika akin kitlajtlakoltijtokej yemelak otenajnauilti noso okichiuj itlaj okse tlen xkuajli. Tla xnemi okse akin okitak tlen opanok xkijtosneki tla akin teteixpantia tekajkayaujtika. Kuakon, maski xnemij omemej akin okitakej tlen opanok, tlayekankej kasikamatij ika kanaj onochiuj se ueyi tlajtlakojli. Kuakon, tlayekankej nochipa kinpaleuijtokej akin yokinchiuilijkej tlen xkuajli. Noijki, nochipa kitstokej kenon uelis kitlajpiyaskej tlanechikojli itech tlen xkuajli (Hech. 20:28). w19.05 11 párrs. 15, 16

Noneki ika tatajtin makinmachtikan inkoneuan kenon nomachtiskej. Kokonej kipiya ika ueliskej kenon nomachtiskej amatlajkuiloltin tlen noitas ipan tlanechikojli noso kenon kitejtemoskej itlaj tlen okixnamijkej ipan escuela (Heb. 5:14). Tla kokonej nomachtiaj inchan, kinpaleuis kuajli matlakaktokan ipan tlanechikoltin niman ipan uejueyimej tlanechikoltin. Xkita kech xiuitl kipiyaj mokoneuan niman kenon yejuamej, yejon mitspaleuis xkita kech uelis tiuejkauis imiuan timomachtis. Akin tikinmachtiaj itech Biblia noijki noneki makimatikan kenon nomachtiskej. Tiyolpakij ika yejuamej peuaj kitlapalyotiaj tlanankilistin ijkuak nomachtiaj amatlajkuiloltin tlen ika tikinmachtiaj noso tlen tijkuij ipan totlanechikoluan. San ika, noneki matikimititikan kenon kuajli nomachtiskej niman kenon kitejtemoskej tlen xkasikamatij ijkuak san yejuamej nomachtiskej. Ijkon ijkuak kixnamikiskej se tlauejli, yejuamej kimatiskej kenon kitejtemoskej ipan toamatlajkuiloluan. w19.05 26 párr. 2; 28 párrs. 10, 11

Satanás melak kineki kipatlas ken titlanemiliaj. Yejua kimatstika ika Biblia techpaleuiya kuajli matitlanemilikan. Ika yejon, yejua kikui miyek tlanemililtin niman ijkon kipatlas ken titlanemiliaj niman kichiuas matiometlamatikan. Satanás okichiuj ika Eva maometlamati ijkuak okitlajtolti: “¿Tlen melauak omechijlij Dios para...?” (Gén. 3:1). Niman Satanás ok ijkon kichiua. Ipan tlaltikpaktli tlen yejua kiyekana, miyekej techtlajtoltiaj tlen ueliskia kichiuas matiometlamatikan, techijliaj: “¿Melauak ika toTajtsin xkitekauilia manonamiktikan tlakamej iuan tlakamej niman siuamej iuan siuamej? ¿Melauak ika toTajtsin xmechkauilia xpanoltikan navidad niman cumpleaños? ¿Melauak ika nemoTajtsin xmechkauilia xmotlalilikan yestli? ¿Melauak ika toTajtsin akin tetlasojtlani xmechkauilia xmouikakan imiuan nemochanejkauan noso nemoamigos akin yokinkixtijkej itech tlanechikojli?”. Noneki kuajli tikasikamatiskej tlen tikneltokaj, pampa tla xijkon tikchiuaj, uelis peuas tiometlamatiskej niman xok titlaneltokaskej. w19.06 12, 13 párrs. 15-17

Jehová melak techtlasojtla (Juan 3:16). Tejuamej tiknekij titetlasojtlaskej ijkon ken yejua kichiua. Ika yejon, tikteititiaj ika tajmanaj ijkuak yakaj najmana, titeikneliaj niman titetlasojtlaj, niman más ijkon tikchiuaj imiuan tokniuan (Gál. 6:10). Ijkuak tokniuan kixnamikij tlen ouijtika, tejuamej tiknekij tikinpaleuiskej. ¿Kenon uelis tikyolseuiskej akin yomik ixnamik? Kachtopa noneki iuan tonojnotsaskej, maski kanaj xmás kuajli tikmatij tlenon tikijliskej. Paula, akin san totoka omik iueuentsin, kijtoua: “Nikasikamati ika miyekej xkuajli nomachiliaj ijkuak yakaj miki. Xkinekij itlaj kijtoskej pampa kinemiliaj ika uelis teyolkokoskej. San ika, más kuajli tla itlaj kijtouaj maski manopopolokan”. Akin noyolkokojtika kanaj xkichia matikijlikan itlaj tlen melak tetlanemililti. Paula kijtoua: “Niktlasojkamati ijkuak akin imiuan ninouika nechijliaj: ‘Nechyolkokoua tlen mopan onochiuj’”. w19.06 20 párr. 1; 23 párr. 14

Ijkuak xok techkauiliskej matikueyichiuakan toTajtsin, tlayekankej kuajli kitaskej tlenon kichiuaskej niman ijkon maka yakaj makimati ika tosentlalijtokej. Kanaj techijliskej san tiajachijtsitsintin matosentlalikan, niman kanaj kipatlatiaskej kampa tosentlaliskej noso kipatlatiaskej hora. ¿Niman ok uelis titenojnotsaskej? Miyekan ouijtika yes niman oksekan xmás. San ika, pampa tiktlasojtlaj Jehová niman melak tikuelitaj titlajtoskej itech iTekiuajyo, tiknextiskej kenon titenojnotsaskej (Luc. 8:1). Se ixtlamatki itoka Emily Baran okijto tlenon kichiuayaj iteixpantijkauan Jehová akin ualeuayaj antigua Unión Soviética: “Ijkuak tekiuajkej okimijlikej iteixpantijkauan Jehová ika xueliskiaj tenojnotsaskej, yejuamej kinnojnotsayaj iminvecinos, akin imiuan tekitiyaj niman iminamigos. Ijkuak okinuikakej campos de concentración pampa ijkon kichiuayaj, yejuamej kinnojnotsayaj akin noijki ompa tsauktoyaj”. Tokniuan nochipa otenojnotskej maski xkinkauiliayaj. Tejuamej noijki ijkon matikchiuakan. w19.07 11 párrs. 12, 13

¿Kenon uelis tikinpaleuiskej akin xkipiyaj se religión makitlasojtlakan toTajtsin niman manochiuakan inomachtijkauan Cristo? Noneki tikasikamatiskej ika xnochimej kuajli techkakiskej pampa xnochimej ualeuaj ipan sa no yejua kalpan. Akin ualeuaj Europa kanaj xijkon techkakiskej ken akin ualeuaj Asia. ¿Tleka? Ne Europa, miyekej kixmatstokej Biblia niman miyekpa kikakij ika toTajtsin yejua akin nochi okichijchiuj. San ika, ne Asia, miyekej xtlaj kimatij itech Biblia noso melak achijtsin kimatstokej, niman kanaj xkineltokaj ika nemi se toTajtsin akin otlachijchiuj. San ika, nochipa matiknemilikan tlen tepaleui. Nochi xiujtin, miyekej akin xkipiayaj inreligión nochiuaj iteixpantijkauan Jehová. Miyekej ikichiuayaj tlen kuajli niman xkuelitayaj kenon tekajkayauaj religiones, niman oksekimej kema kichiuayaj tlen melak xkuajli. Miyekej ononek kikauaskej tlen xueliyaj kikajkauayaj. Ika itlapaleuilis Jehová, uelis kuajli tikmatstoskej ika tikinnextiskej akin kinekij “kipiyaskej nemilistli para nochipa” (Hech. 13:48; 1 Tim. 2:3, 4). w19.07 20, 21 párrs. 3, 4

Maski tla tikchiaj tiaskej iluikak noso tikchiaj tinemiskej ipan xochitlalpan, tinochimej noneki totlalojtoskej niman titlaxikoskej hasta ijkuak titetlaniskej. Maski san tlenon tikixnamikiskej, maka matontlanemilikan ipan tlen yonokauj tlakuitlapan nion maka matijkauilikan ika itlaj matechtelti (Filip. 3:16). Kanaj tikitaj ika xnimantsin nochiua tlen tikchiaj noso ika xok tikojtikej ken yeuejkaui. Kanaj otikixnamijkej tlen ouijtika noso kanaj ouejkauj otechtlaueltokakej. Maski san tlenon yotikixnamijkej, maka matokuaajmanakan, matikijlikan Jehová nochi tlen techajmana. Yejua techmakas “yolseuilistli más ueyi yejuan xakaj uelis kajsikamatis” (Filip. 4:6, 7). Akin notlaloua, melak nokojtilia notlalos ijkuak sa achijtsin poliui niman ijkon tetlanis. Tejuamej noijki matokojtilikan titetlaniskej ipan yejuin ojtli tlen teuika ipan nemilistli. Hasta kampa tiueliskej, matokojtilijtokan niman ijkon uelis tikseliskej tlen toTajtsin yokijto techmakas. w19.08 7 párrs. 16, 17

Kanaj nion xtikmatij tlen tikijliskej akin melak noyolkokoua. San ika, matikilnamikikan ika melak kinpaleuis tla imiuan tichokaj. Ijkuak Lázaro omik, María, Marta niman oksekimej okichokilijkej ikniuj akin kitlasojtlayaj. Jesús oajsik ijkuak yopanoka naui tonajli ika yomijka, niman “Jesús ochokak”, maski kimatstoya ika kiyolitiskia (Juan 11:17, 33-35). Pampa ochokak okiteititi tlen Jehová kimachiliaya ika Lázaro omijka. Noijki okiteititi ika kitlasojtlaya yejon familia, yejon melak okinyolchikauj María niman Marta. Noijki ijkon, ijkuak tokniuan kitaj ika inpampa tajmanaj, kasikamatij ika xsan inselti nemij niman kimachiliaj ika kinpiyaj amigos akin kintlasojtlaj. Kemantika san noneki tijkakiskej on tokniuj akin najmantika. Matijkauilikan makijto tlen kimachilia niman maka matoyolkokokan tla kijtoua tlen xkinamiki (Job 6:2, 3). Kanaj melak ouijtika kitstika pampa ichanejkauan itlaj kichiualtijtokej makichiua. Kuakon, iuan matikchiuakan teoyotl niman matiktlajtlanilikan toTajtsin makiyolchikaua niman makimaka tlamachilistli (Sal. 65:2). w19.04 19 párrs. 18, 19

Tla titlapaleuiyaj Betel noso tla okse tekitl tikchiuaj ipan ikalpan Jehová, tikintlasojtlaj tlaltikpakchanejkej niman hasta tomatij kampa titlapaleuiyaj. Yejua ika, melak toyolkokouaj ijkuak noneki oksekan tiaskej. Tikintemouaj akin yotikimixmatkaj niman tajmanaj inpampa, niman más ijkon tikmachiliaj tla kampa tinemiyaj xok notekauilia makiueyichiuakan Jehová (Mat. 10:23; 2 Cor. 11:28, 29). Noijki, ijkuak oksekan tajsis, aman noneki ompa timomatis, maski tla se yauj kampa achtopa chantiya. Noijki, kanaj tikmachiliskej ouijtika tla xtikpiyaj tomin. Kanaj tajmanaskej niman xika toyojlo tomachiliskej. ¿Tlenon uelis techpaleuis? Matinemikan nisiuj itech Jehová (Sant. 4:8). Niman yejon uelis tikchiuaskej tla titlaneltokaj ika Jehová nochipa techkakis ijkuak tiknotsaskej (Sal. 65:2). Jehová “uelis kichiuas miyek más de on yejuan tejuamej tiktlajtlaniaj noso on yejuan tiknemiliaj” (Efes. 3:20). Jehová xsan kichiua tlen tiktlajtlaniliaj ipan teoyotl. Yejua kichiua tlen nion xtikchiaj niman ijkon techpaleuis ika tlen techajmana. w19.08 21 párrs. 5, 6

Miyekej kinemiliaj ika Armagedón melak xkuajli, kinemiliaj ika yejon se guerra kampa kintoponiskej bombas noso ika yejon se tonajli ijkuak ixpoliuis tlaltikpaktli. San ika, tlen Biblia kijtoua itech Armagedón melak techyolpaktia (Apoc. 1:3). Armagedón xkichiuas matipoliuikan; Armagedón techmakixtis. ¿Kenon kichiuas? Armagedón kinpopolos tekiuajkej, akin xkuajkualtin niman kinmakixtis akin yolmelajkej, niman xkitekauilis ika tlaltikpaktli mapopoliui (Apoc. 11:18). Tlajtojli Armagedón san sejpa uajnesi ipan Biblia, niman ika tlajtojli hebreo kijtosneki Tepetl tlen onka Meguidó (Apoc. 16:16). Niman yeuejkaui, Meguidó katka se ueyikalpan tlen onkatka Israel (Jos. 17:11). San ika, Armagedón xse ueyikalpan. Armagedón kijtosneki ijkuak “on reyes ipan on tlaltikpaktli” nosentlaliskej niman ijkon kixnamikiskej Jehová (Apoc. 16:14). w19.09 8 párrs. 1-3

Yejuin siuatsintli melak kinekiya makipaleuikan. Yokimitatoya miyekej tepajtikej, san ika, yopanoka 12 xiuitl niman xakaj ueliya kipajtiaya. Niman Tlanauatijli kijtouaya ika yejua xchipauak katka (Lev. 15:25). Oajsik tonajli ijkuak yejuin siuatsintli okitekakili ika Jesús tepajtiaya, kuakon, okitejtemoto. Ijkuak okinexti, okajsik itenpan itlaken niman opajtik. San ika, Jesús xsan okipajti. Yejua noijki okichiuj ika yejuin siuatsintli makimachili ika kitlasojtlayaj niman ika kitlakaitayaj. Jesús okinots ika tlakaitalistli niman okijli “nokoneu”. San xkonnemili kenon melak oyolseuj yejuin siuatsintli (Luc. 8:44-48). Tla kuajli tikitaj, yejuin siuatsintli yejua akin okitejtemoto Jesús. Tejuamej noijki noneki ijkon tikchiuaskej. Noneki tokojtiliskej niman ijkon tiknisiuiskej Jesús. Ipan yejuin tonaltin, Jesús xkichiua milagros niman ijkon kinpajtis akin kinisiuiyaj. San ika, yejua ok techijlitika: “Notech xuajlakan [...] niman nejua nemechyolseuis” (Mat. 11:28, TNM). w19.09 20 párrs. 2, 3

Teotlajtoketl Zacarías okijtoka itlaj ken yejuin. Okijkuilo: “Ipan yejon tonaltin majtlaktli tlakamej itech nochi tlajtoltin tlen onka ipan países kajsiskej, kema, kajsiskej itlaken se judío, kijtojtoskej: ‘Tiknekij nemouan tiaskej, pampa yotiktekakilijkej ika toTajtsin nemouan nemi’” (Zac. 8:23, TNM). Akin tiiteixpantijkauan Jehová tikmatstokej ika noneki titenojnotsaskej ika miyek tlajtoltin niman ijkon manemikan ipan yejuin grupo nochimej akin tlajtouaj “oksesekneka tlajtoltin”. Aman toamatlajkuiloluan kisaj ipantsin 900 tlajtoltin. Kuajli tikitaj ika Jehová kichiujtika se milagro: yejua kinsentlalijtika nochimej tlaltikpakchanejkej akin nochiuiyan ualeuaj. Pampa toamatlajkuiloluan notlajtolkuepaj ika miyek tlajtoltin, nochimej itekipanojkauan toTajtsin san sekan kitekichiuiliaj Jehová. Kimixmatij ika kuelitaj tenojnotsaskej niman ika kintlasojtlaj imikniuan. ¿Xmelak ika yejuin kichikaua totlaneltokil? (Mat. 24:14; Juan 13:35). w19.09 30, 31 párrs. 16, 17

Ipan “on temojtij tlajyouilistli”, miyekej nomojtiskej ijkuak kitaskej ika peua popoliui nochi yejon tlemach tlen kinemiliayaj xkeman popoliuiskiaj. Yejuamej “xkimatiskej tlinon kichiuaskej” niman mojkamikiskej pampa kitaskej ika uelis mikiskej ipan yejon tonaltin (Sof. 1:14, 15). Kanaj ijkuakon, tinochimej tikixnamikiskej tlen ouijtika, kema, hasta akin tiktekichiuiliaj Jehová. Kanaj titlajyouiskej pampa xtikchiuaj ken miyekej tlaltikpakchanejkej. Kanaj xtikpiyaskej seki tlen mojmostla tijkuij niman tlen melak techpoloua. “Tekitketl” yolmelauak niman tlamachilise techyektlalijtika niman ijkon matimelajkanemikan ipan “on temojtij tlajyouilistli” (Mat. 24:45). Melak miyek ken yotechpaleui, san ika, san se matikonteneuakan: toueyitlanechikoluan tlen otikinpixkej ipan 2016 a 2018. Yejuin uejueyimej tlanechikoltin yotechpaleuijkej matikimiskaltikan kualneskayomej tlen noneki tikinpiyaskej aman ika sa achijtsin poliui ijkuak yejkos itonal Jehová. w19.10 14 párr. 2; 16 párr. 10; 17 párr. 12

Ijkuak tiktolouaj tlen tijkuaj, totlalnakayo peua san iselti tekiti niman ijkon matechpaleui tlen yotikuajkej. Tla tijkuaj tlen tepaleuij, xtikualoskej, san ika, tla tijkuaj tlen xtepaleuij, uelis techijtlakos. Yejuin xnimantsin nesi, san ika, sakin kema melak kuajli nesi. Noijki ijkon, ijkuak tiktlapejpeniaj tlenon ika toyolpaktiskej, tejuamej tikijtouaj tlenon tijkalaktiskej ipan totlamachilis. San ika, sakin, tlen otiktlapejpenijkej uelis kijtlakos tlen tiknemiliaj noso tikmachiliaj. Tla tiktlapejpeniaj tlen kuajli, kichiuas kuajli matomachilikan, san ika, tla tiktlapejpeniaj tlen xkuajli, uelis techijtlakos (Sant. 1:14, 15). Kanaj xnimantsin nesis kenon techijtlakoua, san ika, sakin, kema kuajli nesis. Ika yejon, Biblia techijlia: “Tlen kitôkas sen tlakatl, sano yejua kipixkas. Tla tiktôkaskej on tlen xkuajli yejuan keleuiya totlalnakayo, ikan totlalnakayo tikpixkaskej on xoxotonilistli niman mikilistli” (Gál. 6:7, 8). Kuakon, melak noneki matikmapeuakan nochi tlen Jehová kitlauelita (Sal. 97:10). w19.10 29, 30 párrs. 12-14

ToTajtsin okiteititi ika techtlasojtla pampa okitemakak iKoneuj niman ijkon techmakixtis (Juan 3:16). ¿Kenon noijki uelis tikchiuaskej ken Jehová? Tla tikinpatiojkaitaj tokniuan niman tla tikinseliaj ika tlasojtlalistli akin uajnokuepaj itech Jehová (Sal. 119:176; Luc. 15:7, 10). Tikteititiaj ika tikintlasojtlaj tokniuan tla tikinpaleuiyaj ijkuak kixnamikij tlen ouijtika (1 Juan 3:17). Jesús okinnauati inomachtijkauan matetlasojtlakan ken yejua okichiuj (Juan 13:34, 35). Yejuin tlanauatijli yenkuik, pampa xonkatka ipan Tlanauatijli tlen toTajtsin okimakak ikalpan Israel. Jesús okijto ika noneki tikintlasojtlaskej tokniuan ijkon ken yejua otechtlasojtlak. Noneki más tikintlasojtlaskej xken tejuamej totlasojtlaj, hasta tiknekiskej tiktemakaskej tonemilis inpampa, ijkon ken Jesús okichiuj. w19.05 4 párrs. 11-13

Tla tiknekij tikseliskej espíritu santo, noneki miyekpa tiktlajtlaniskej ipan teoyotl (Luc. 11:13). Jesús okijto se neskayotl ipan Lucas 11:5-9 tlen techpaleuiya matikasikamatikan tleka Jehová techmakas espíritu santo. Tlakatl akin Jesús okiteneuj kinekiya kuajli kiselis akin okitlajpaloto maski melak itlayoua katka. Kimachiliaya ika nonekiya kitlakualtis, san ika, xitlaj kipiaya. Jesús okijto ika ivecino yejon tlakatl okimakak pan pampa miyekpa okitlajtlanili. ¿Tlenon kinekiya techmachtis? Ika, tla se tlakatl akin tlajtlakole kinektika kipaleuis ivecino akin miyekpa kitlajtlanilia, kuakon, toTajtsin akin melak tetlasojtla más kinekis kinmakas iespíritu santo akin miyekpa kitlajtlaniliaj. Kuakon, uelis tiktlajtlaniliskej Jehová iespíritu santo pampa tikmatstokej ika technankilis (Sal. 10:17; 66:19). Tikmatstokej ika uelis titlaxikoskej maski Satanás nochipa techixnamiktos. w19.11 13 párrs. 17-19

Jesús kimatstoya ika kemantika yejua niman inomachtijkauan nonekiya noseuiskej. San ika, ipan yejon tonaltin, miyekej tlanemiliayaj ken yejon tlakatl akin Jesús okiteneuj ipan se neskayotl. Yejon tlakatl kijtouaya: “Xmoseui, xtlakua, xatli, niman xmopakti” (Luc. 12:19; 2 Tim. 3:4). Yejuin tlakatl san kinekiya noseuis niman noyolpaktis, ken aman miyekej kichiuaj. San ika, Jesús niman inomachtijkauan xijkon tlanemiliayaj, yejuamej xsan tlanemilijtoyaj kenon noyolpaktiskej. Tejuamej tokojtiliaj tikchiuaskej ken Jesús. Ijkuak xtitekitij, xsan toseuiyaj, noijki titenojnotsaj niman tiauej tlanechikoltin. Tikitaj ika melak ueyi kijtosneki tikchiuaskej yejuin ome tlemach niman nochipa tiknekij tikchiuaskej (Heb. 10:24, 25). Kema, maski tikpiyaj vacaciones noso maski san kanon tikistinemij, tejuamej tiauej tlanechikoltin niman tikitaj kenon uelis titenojnotsaskej (2 Tim. 4:2). w19.12 7 párrs. 16, 17

Jehová techkauilia matiktlapejpenikan tlenon tikchiuaskej ipan tonemilis. Yejua techmachtia matiktlapejpenikan tlen kuajli. Ijkuak tiktlapejpeniaj tlen kiyolpaktia, yejua techpaleuiya kuajli makisati tlen tiktlapejpeniaj (Sal. 119:173). Kuakon, tla tikchiuaj ken kijtoua Biblia, tiktlapejpeniskej tlen techpaleuis (Heb. 5:14). Aman tej, maski tla yotikijtokej tikchiuaskej itlaj tlen techpaleuis, kanaj nonekis tokojtiliskej niman ijkon titlamiskej tlen otikpeualtijkaj. Matikitakan tlen kemantika panoua. Se telpochtli kijtoua kipouas nochi Biblia. Panoua seki semanas niman melak kuajli kipoujtiuj, san ika, sakin kikajkaua. Se tokniuj siuatl kijtoua ika nochiuas precursora, san ika, xueli nochiua pampa nochipa san kijtotika ika nochias okse achijtsin. Sekimej tokniuan akin tlayekanaj ipan se tlanechikojli kijtouaj nokojtiliskej komintaskej tokniuan niman kinyolchikauaskej, san ika, panoua miyek metstli niman xakaj kontlajpalouaj. Maski tlatlamantik tlen tokniuan okijtokej kichiuaskej, ¿otikitak tlenon opanok? Nochimej xokichiujkej tlen okijtokaj kichiuaskej. w19.11 26 párrs. 1, 2

Jesús okijto ika yejuin tonaltin ken “on tonaltin ijkuak nemiya Noé”, niman kuajli tikitaj ika aman nochiua “tlen sanoyej xkuajli” (2 Tim. 3:1; Mat. 24:37). Yejua ika, miyekej akin yononamiktijkej yokijtokej ika amantsin xkinpiyaskej inkoneuan pampa kinekij chikauak kitekichiuiliskej Jehová. Akin kinemilijtokej tla kinpiyaskej inkoneuan niman kechmej kinpiyaskej, noneki tlanemiliskej itech tlen kijtoua Lucas 14:28, 29. Tajtin akin kinpiyaj inkoneuan kimatstokej ika tesiauiti tikiskaltis se konetl, noijki nonekis tikpopolos tomin niman tikxelos tiempo. Ika yejon, melak noneki ika akin kinemilijtokej kinpiyaskej inkoneuan manotlajtoltikan: “¿Nonekis titekitiskej tiomemej niman ijkon tikpiyaskej tlen noneki? ¿Tiomemej tikasikamatij tlenon kijtosneki tijkouaskej san tlen noneki? Tla tiomemej nonekis titekitiskej, ¿akinon kintlajpiyas tokoneuan? ¿Akinon kinpaleuis makichiuakan tlen kuajli niman matlanemilikan ken kinamiki?”. Akin notlajtoltiaj yejuin noijki kitaj tlen kijtoua tlaxelojli tlen aman tikitstokej. w19.12 23 párrs. 6, 7

Pablo miyekpa otlajyoui, niman kemantika hasta imikiya (2 Cor. 11:23-28). Yejua noijki okijto ika kipiaya kentla se “uitstli” ipan itlalnakayo, kema, kanaj kipiaya se kokolistli (2 Cor. 12:7). Noijki melak onajman ijkuak Demas, akin iuan kitekichiuiliaya toTajtsin, okitlalkaui pampa “más okeleuij tlen onkaj ipan in tlaltikpaktli” (2 Tim. 4:10). Maski Pablo melak yolchikauak katka niman melak kinpaleuiaya tokniuan, kemantika noijki noyolajmanaya (Rom. 9:1, 2). Jehová okiyolseui niman okiyolchikauj Pablo. ¿Kenijki? Okitekitilti iespíritu santo (2 Cor. 4:7; Filip. 4:13, TNM). San ika, noijki okintekitilti tokniuan. Apóstol Pablo hasta okijto ika sekimej tokniuan melak kiyolseuiayaj (Col. 4:11). Okinteneuj miyekej tokniuan, ken Aristarco, Tíquico niman Marcos. Yejuamej okiyolseuijkej niman okipaleuijkej matlaxiko. w20.01 8 párrs. 2, 3

Jesús okiteasikamachilti ika yakaj akin xtlapejpenijli xuelis kasikamatis kenon nomachiliaj akin oksejpa tlakatij noso akin “tlakatij ikan on Espíritu Santo” (Juan 3:3-8). ¿Kenon nopatla itlanemilil se tokniuj akin kitlapejpeniaj? Achto kitlapejpeniskiaj, yejua noijki kinekiya chantis nikan ipan tlaltikpaktli niman kipiyas se nemilistli tlen xkeman tlamis. Noijki kichiaya yejon tonajli ijkuak toTajtsin kipopolos nochi tlen xkuajli niman ijkuak kikuepas tlaltikpaktli se xochitlalpan. Kanaj yokinemilijka kenon kinselis ichanejkauan noso iamigos ijkuak yoliuiskej. San ika, ijkuak okitlapejpenijkej, itlanemilil onopatlak. ¿Tleka onopatlak? ¿Kanaj xok kinekiya chantis ipan yejuin tlaltikpaktli? ¿Kanaj melak noyolajmanaya noso tlajyouiaya? Noso ¿kanaj okinemili ika tlatsiuiskia nemis nochipa ipan yejuin tlaltikpaktli? Ka, xyejon opanok. Jehová okikuik iespíritu santo niman ijkon okipatili itlanemilil, niman aman kichia yas iluikak. w20.01 22 párrs. 9-11

Tlanauatijli tlen toTajtsin okinmakak israelitas kijtouaya ika jueces niman tlayekankej kitaskiaj kenon se kiueyichiujtoya toTajtsin, noijki kitaskiaj tlen panouaya ipan kalpan niman tlen xkuajli nochiuaya. San ika, itlanauatil Cristo kimititia tlayekankej ika xok yejon intekiyo. Ijkuak nochiua itlaj tlen xkuajli, tlayekankej san kitaj kenon se kiueyichiujtika toTajtsin (Gál. 6:2). Kasikamatij ika toTajtsin yokinkauili tekiuajkej makitakan tlen nochiua ipan tlaltikpaktli. Ika yejon, tekiuajkej uelij kinchiualtiaj matlatlaxtlauakan akin kichiuaj tlen xkuajli noso uelij tetsakuaj (Rom. 13:2-4). Kuakon, ¿tlenon kichiuaj tlayekankej ijkuak nochiua se ueyi tlajtlakojli? Kikuij Biblia niman ijkon kimatiskej tlenon kichiuaskej. Xkilkauaj ika itlanauatil Cristo noyekana ika tlasojtlalistli. Yejuin kualneskayotl kinpaleuiya tlayekankej makimatikan kenon kipaleuiskej akin yokichiuilijkej tlen xkuajli. Niman tlasojtlalistli noijki kinpaleuiya makimatikan tla yonoyolkuep akin okichiuj tlajtlakojli niman tla uelis kipaleuiskej oksejpa manouika iuan toTajtsin. w19.05 7 párrs. 23, 24

Jesús kuajli okijto ika iTajtsin yejua akin okimakak inemilis niman nochi tlen kichiuaya mayolto. Jesús otlaneltokak itech iTajtsin, niman Jehová okimakak tlen kipolouaya. Noijki okitlajpix kampa más nonekiya, kema, Jehová okipaleui Jesús mamelajkanemi (Mat. 4:4). Jehová noijki techmakatok tlen noneki niman ijkon kuajli iuan matouikakan. Ipan iTlajtol yotechmachti kenon yejua, tlenon kineki kichiuas, tleka otexchijchiuj niman tlenon panos ika tlayekapan. Pampa yejua okinek techpaleuis toseselti, okintekitilti totajuan noso oksekimej tokniuan niman ijkon matikixmatikan. Niman hasta aman techmachtijtika itechkopa tlayekankej niman oksekimej tokniuan akin chikauak intlaneltokil. Noijki kintekitiltia tlanechikoltin niman ijkon tinochimej akin tiitekipanojkauan más matikixmatikan. Ipampa nochi yejuin, kuajli tikitaj ika Jehová techititia ika yejua se Tajtli akin kineki kuajli matinemikan (Sal. 32:8). w20.02 3 párr. 8; 5 párr. 13

Xuelis onias yolseuilistli kampa nonexikolitalo. Ika yejon, noneki matijkixtikan nexikojli itech toyojlo niman maka matikchiuakan ika oksekimej matenexikolitakan. Aman tej, ¿tlenon uelis tikchiuaskej niman ijkon tikinpaleuiskej oksekimej maka matenexikolitakan?, niman ¿kenon uelis titlapaleuiskej niman ijkon maonia yolseuilistli? Tlen tikchiuaj niman ken tikyekanaj tonemilis uelis kinpaleuis noso kimijtlakos oksekimej. Tlaltikpakchanejkej akin xkitlakamatij Jehová kinekij matoueyimatikan ipampa tlen tikpiyaj (1 Juan 2:16). Yejuin kichiua ika miyekej manonexikolitakan. Tejuamej xtiknekij ika nexikojli manoskalti ipan inyojlo oksekimej. Yejua ika, xtikijtojtinemij tlen tikpiyaj niman tlen tiknemiliaj tijkouaskej. Noijki, xtikteijlitinemij nion xtoueyimatstinemij ipampa nochi tekitl tlen tikchiuaj ipan tlanechikojli. Tla san nochipa tikijtojtinemij tlen tekitl tikpiyaj ipan ikalpan Jehová, kichiuas ika oksekimej matechnexikolitakan. San ika, ijkuak tajmanaj inpampa niman tikitaj tlen kuajli kichiuaj, yejuamej kuajli nomachiliaj niman tinochimej kuajli touikaj niman tinemij ika yolseuilistli. w20.02 18 párrs. 15, 16

Xkita tlen okichijchiuj Jehová niman ijkon uelis más tikixmatis (Apoc. 4:11). Xnemili kenon toTajtsin okinchijchiuj xochimej niman yolkamej niman xkita kenijki yejon techititia ika yejua melak tlamachilise. Xmomachti más itech kenon titlachijchiujtin (Sal. 139:14). Noijki xnemili kech kojtilistli okitlali toTajtsin ijtik tonaltsintli, niman xkilnamiki ika yejuin san se sitlalin itech nochi sitlalimej tlen okinchijchiuj toTajtsin (Is. 40:26). Ijkuak ijkon tikchiuas, más tiktlakaitas toTajtsin. Niman tla tikasikamati ika Jehová melak tlamachilise niman kojtik, yejon mitspaleuis iuan xmouika. Yejua ika, noneki xkixmati Jehová pampa ijkon uelis tiktlasojtlas ika nochi moyojlo. Noneki melak kuajli xneltoka ika Jehová kineki mitspaleuis. Xkilnamiki ika tla tejua tiktejtemoua, yejua mitspaleuis xkixmati (1 Crón. 28:9). ToTajtsin okichiuj xmonisiui itech, ken kijtoua Juan 6:44. Tla más kuajli tikasikamatstiuj tlen Jehová yokichiuj mopampa, más tiktlasojtlatias. w20.03 4 párrs. 6, 7

Apóstol Pablo noijki kuajli tlen techmachtia. Ijkuak ika okpa otenojnotsato Corinto ken misionero, ononek kinchijchiuas kajkaltin. Yejua okichiuj yejuin tekitl niman ijkon kipiyas tlen ika nopanoltis, ijkon ueliskia kinnojnotsas corintios, niman ijkon xyejuamej nochi makitlaxtlauilikan (2 Cor. 11:7). Maski apóstol Pablo nonekiya tekitis, yejua nochipa okitejtemo kenon tenojnotsas, niman tenojnotsaya nochi sábados. Sakin, ouel más tenojnotsa niman ijkuakon yejua “san ika nokauaya kiteijliaya on temachtijli niman kimixpantiliaya on hebreos ika Jesús yejua Cristo yejuan Dios okitlalij para tlamandaros” (Hech. 18:3-5; 2 Cor. 11:9). Sakin, ijkuak okitsajkej Roma ome xiuitl, kinnojnotsaya akin kontlajpalouayaj niman kinchijchiuaya cartas (Hech. 28:16, 30, 31). Kuajli yokinemilijka kitekichiuilis toTajtsin niman maka itlaj makitelti. w19.04 4 párr. 9