Marzo

Tla tiktlasojtlaj toTajtsin niman iTlajtol, techyolchikauas matiktlakamatikan Jehová hasta ijkuak akin ken tikimitaj noso toamigos texchiualtiskej matikpanoltikan costumbres tlen nochiua ijkuak yakaj miki. Kanaj uelis techijliskej ika tejuamej xtiktlasojtlayaj nion xtiktlakaitayaj akin yomik. Noso kanaj techijliskej ika totlajtlakol yes tla itlaj kinuajchiuilia. Ipan se país, miyekej kinemiliaj ika ijkuak yakaj miki, iespíritu uelis nokauas imiuan akin yoltokej niman ijkon notlakuepiltis. Se libro kijtoua ika espíritu uelis “kichiuas mapano tlen melak xkuajli ipan se pueblo”. Ipan seki países de África, kitlapachouaj teskatl kampa chantiya akin yomik niman kinkuepaj infotos. ¿Tleka? Pampa nemij akin kineltokaj ika akin yomik xkuajli tla oksejpa kita ken tlachiaya. Akin tiiteixpantijkauan Jehová xtikneltokaj nion se itlakajkayaualis Satanás nion xtikchiuaj yejon costumbres (1 Cor. 10:21, 22). w19.04 16 párrs. 11, 12

Jesús okimititi inomachtijkauan tlen kinpaleuiskia makinchiuilikan oksekimej tlen melajki. Matitlanemilikan itech tlen okijto Jesús, tlen kixmatij ken Regla de Oro. Tinochimej tiknekij matexchiuilikan tlen kuajli, kuakon, tejuamej noijki noneki ijkon tikinchiuiliskej oksekimej. ¿Tlenon panos tla ijkon tikchiuaj? Oksekimej noijki kinekiskej texchiuiliskej tlen kuajli. Niman ¿tla yotexchiuilijkej tlen xkuajli noso tlen xkinamiki? Jesús noijki okinmachti inomachtijkauan makineltokakan ika Jehová kinchiuilis tlen kinamiki akin “ikan tonajli niman yeuajli itech noueyikatsajtsilijtokej” (Luc. 18:6, 7). Yejuin tlen techijlitika toTajtsin akin melajki: yejua kimati tlen tikixnamiktokej ipan yejuin sa itlamiyan tonaltin, niman yejua kichiuas ika matexchiuilikan tlen melajki ijkuak yejua kitas ika nonekis (2 Tes. 1:6). Tla tikchiuaj tlen Jesús otemachti, tikinchiuiliskej oksekimej ijkon ken kinamiki. Niman, tla ipan tlaltikpaktli tlen kiyekana Satanás yotexchiuilijkej itlaj tlen xkinamiki, techyolseuiya tikmatiskej ika Jehová kichiuas matexchiuilikan tlen kinamiki. w19.05 5 párrs. 18, 19

Matikonnemilikan tlen ipan nochiua se telpochtli. Nochimej akin imiuan nomachtia nokuikatiaj himno nacional, san ika, yejua ka. Yejua kuelitaskia kiteijlis tlen Biblia kijtoua itech yejon, san ika, kimachilia ika ouijtika niman ika xuelis kichiuas. Kuakon, noneki kuajli nomachtis. Kimatstika tleka kipiya ika nomachtis. Pampa yejon kipaleuis melak kuajli makasikamati ika xkipiya ika nouikas ken “tlaltikpaktlakamej” niman yejua más kuajli kiteijlis tlen kineltoka itech Biblia (Juan 17:16). Kachtopa, kipiya ika notlajtoltis tleka akin imiuan nomachtia kijtouaj ika se noneki nokuikatis himno nacional. Sakin, noneki kitas tlenon kijtouaj toamatlajkuiloluan. Yejuin telpochtli kitas ika xouijtika kiteijlis tlen kineltoka. Miyekej kinemiliaj ika noneki nokuikatiskej himno nacional san pampa yakaj akin yejuamej kitlakaitaj ijkon yokimijli makichiuakan. San ika, ijkuak telpochtli kuajli nomachtia, kimati kenon kinankilis akin yemelak kineki kasikamatis seki tlemach (Col. 4:6). w19.05 29 párr. 13

Ijkuak teotlajtoketl Elías ononek cholos pampa kinekiyaj kimiktiskej, melak onajman hasta okinek mikis. Kuakon, Jehová okuajtitlan se iluikaktekitketl akin kojtik niman ijkon makiyolchikaua. Yejuin iluikaktekitketl okimakak Elías tlakuajli totonki niman okijli matlakua (1 Rey. 19:5-8). Yejuin techmachtia ika kemantika uelis tikpaleuiskej se tokniuj akin tlajyouiya maski tla xmiyek tikchiuaj ipampa. Uelis tikmakaskej itlaj tlen kikuas, uelis tiktlayokoliskej itlaj pitentsin noso uelis tikijkuilouiliskej se amatsintli, yejuin kichiuas makimatsto ika tiktlasojtlaj niman ika tiknekij tikpaleuiskej. Tla tikmachiliaj ika xtiuelij iuan titlajtouaj itech tlen ipan onochiuj noso tlen kiyolkokoua, kuakon uelis tikchiuaskej tlen yotikteneujkej. Jehová okimakak kojtilistli Elías niman ijkon uejka nejnemis hasta ajsis kampa tepetl Horeb, ompa uejka nemiskia itech akin kinekiyaj kichiuiliskej tlen xkuajli. ¿Tlenon tiuelij? Ika tla tiknekij tikinpaleuiskej akin yokinnajnauiltijkej, kachtopa noneki tikinpaleuiskej kuajli manomachilikan. Kanaj yakaj más kuajli nomachilis tla nemi ichan noso ipan Kajli kampa Tosentlaliaj. w19.05 16 párr. 11; 17 párrs. 13, 14

Matiknemilikan ika tikpoujtokej Zacarías 12 itech Traducción del Nuevo Mundo, kampa noijtoua ika Mesías mikiskia (Zac. 12:10, TNM). Ijkuak tajsij ipan versículo 12, tikitaj ika kijtoua ika “ichanejkauan Natán” melak chokaskej pampa Mesías mikiskia. Maka san matikpanauikan yejon, matotlajtoltikan: “¿Tleka ichanejkauan Natán melak chokaskiaj ipampa Mesías?”. Kuakon, peuaj tomachtiaj. Se referencia marginal techijlia matikitakan 2 Samuel 5:14, kampa kijtoua ika Natán katka se ikoneuj David. Okse referencia techijlia matikitakan Lucas 3:31 kampa techijlia ika ipampa María, Jesús ualeuaya itech Natán. ¡Melak temojkatlachialti yejuin! Tikmatstoyaj ika yonoijtoka ika Jesús ualeuaskia itech David (Mat. 22:42). San ika, David kipiaya ipantsin 20 ikoneuan. Ijkuak tikitaj nochi yejuin, xtechmojkatlachialtia ika Zacarías makijto ika ichanejkauan Natán chokaskiaj pampa Mesías mikiskia. w19.05 30 párr. 17

Tla nochipa tomachtiaj, techpaleuis kuajli matikmatstokan ika tlen yotiuelkej ipan Biblia yejon tlen melauak. Noijki, kuajli tikmatstoskej ika itlanauatiluan Jehová kuajkualtin. Niman yejon kichiuas matochiuakan ken se kojtli tlen ineluayouan chikaujkej, kuakon, chikauak tikpiyaskej totlaneltok (Col. 2:6, 7). Maka matikilkauakan ika xakaj uelis kichikauas totlaneltok; kipiya ika tejuamej tikchikauaskej. Kuakon, matikyenkuilijtokan toyojlo niman totlamachilis. Nochipa matikchiuilikan teoyotl Jehová niman matiktlajtlanilikan matechmaka iespíritu. Matikxelokan tiempo niman matitlanemilikan, matikitakan kenon titlanemiliaj niman tleka ijkon titlanemiliaj. Matikintejtemokan amigos akin techpaleuiskej matikyenkuilikan ken titlanemiliaj. Tla tikchiuaj nochi yejuin, xtijkauiliskej matechijtlako yejuin tlaltikpaktli tlen kiyekana Satanás niman tijkixtiskej itech totlamachilis nochi tlanemililtin tlen xualeua itech toTajtsin (2 Cor. 10:5). w19.06 13 párrs. 17, 18

Ijkon ken Rut xkeman okitlalkaui Noemí, tejuamej noijki noneki nochipa matikinpaleuijtokan akin yomik imixnamik (Rut 1:16, 17). Paula kijtoua: “Ijkuak noueuentsin omik, miyekej nimantsin onechpaleuijkej. San ika, yolik opeuj kilkauaj ika nonemilis yonopatlaka niman xok sajnoye nechpaleuiayaj. Kuakon, melak tepaleui ijkuak oksekimej kasikamatij ika akin noyolkokojtika noneki makipaleuijtokan seki metstin noso hasta seki xiujtin”. Yemelak, tinochimej titlatlamantikej niman sekimej xmás uejkauij najmantokej, san ika, oksekimej kema. Ijkuak yejuamej kichiuaj itlaj tlen yeuejkaui kichiuayaj iuan imixnamik, peuaj najmanaj. Nochipa matikilnamikikan ika Jehová techijlia ika noneki tikinpaleuiskej akin yomik imixnamik, yejuin se kualtsin tekitl tlen Jehová yotechmakak. w19.06 24 párr. 16

Ijkuak xok techkauiliskej matikueyichiuakan toTajtsin, kipiya ika tikmatiskej kemanon xtinauatiskej (Ecl. 3:7). Noneki tiktlajpiyaskej tlen ueyi kijtosneki: intoka tokniuan, kanon tosentlaliaj, kenon titenojnotsaj niman kenon tikinseliaj amatlajkuiloltin. Nochi yejon xkipiya ika tikimijliskej tekiuajkej nion toamigos noso tochanejkauan akin chantij topaís noso akin chantij okseki países. Tla xtotlajpiyaj, uelis tikchiuaskej ika itlaj makinchiuilikan tokniuan. Maka matijkauilikan matechxelokan tlaueltin tlen xuejueyimej. Satanás kimatstok ika tla se familia noxexeloua, “on familia xuelis nemis” (Mar. 3:24, 25). Ika yejon, nochipa kiyejyekos techxelos. Kichia ika sa no tejuamej matoixnamikikan niman maka yejua matikixnamikikan. Hasta tokniuan akin chikauak intlaneltokil noneki notlajpiyaskej maka texexeloskej. Tla tokojtiliaj xtikpiyaskej tlauejli imiuan tokniuan, xitlaj uelis techxelos (Col. 3:13, 14). w19.07 11, 12 párrs. 14-16

Miyekpa, tlaltikpakchanejkej xsan techkakij tla pampa kinekij kimatiskej tlenon tikteijlitinemij, yejuamej noijki techkakij pampa kuelitaj kenon tikinnojnotsaj. Melak kuelitaj ika kualtsin tikinnotsaj, ika tikintlakaitaj niman ika tikimititiaj ika tiknekij tikinpaleuiskej. Xtikinchiualtiaj matechkakikan, tikyejyekouaj tikasikamatiskej tlenon kinemiliaj itech religión niman tleka ijkon kinemiliaj. Noijki tikyejyekouaj tikasikamatiskej kenon nomachiliaj. Matitlanemilikan itech yejuin, ijkuak okinnojnots judíos, Pablo okikuik Biblia niman ijkon kintlanemililtis. San ika, ijkuak okinnojnots filósofos griegos ne Areópago, yejua xkeman okijto ika tlen kijtotoya kikixtijtoya ipan Biblia (Hech. 17:2, 3, 22-31). ¿Kenon uelis tikchiuaskej ken Pablo? Tla tiknextiaj yakaj akin xtlaneltoka itech Biblia, kanaj nonekis xtikteneuiliskej Biblia ijkuak iuan tonojnotstoskej. Tla tikitaj ika yakaj xkuajli nomachilia ijkuak tikititiaj Biblia pampa xkineki makitakan, kuakon, matikititikan tlaxeloltin itech Biblia ipan tocelular noso ipan totableta. w19.07 21 párrs. 5, 6

Satanás melak tlamachilise, yejua okiyejyeko ika israelitas makinueyichiuakan okseki tajtsitsintin. Yejua okitak ika kinekiyaj tlenon kikuaskej, niman ika yejon okintlatlatak. Ijkuak okalajkej ipan Tlajli tlen Jehová yokimijlika kinmakas, ononek nomachtiskej kenon ompa tokaskej. Ipan Egipto kiatekiayaj intlal ika atl tlen kikixtiayaj ipan atentli Nilo. San ika, ipan Tlajli tlen Jehová yokimijlika kinmakas xonkatka se atentli kampa ueliskiaj konkuiskiaj atl. Ompa san kiyaujtli niman ajuachtli kichiuaya matlatlaki (Deut. 11:10-15; Is. 18:4, 5). Ika yejon, israelitas kipiaya ika nomachtiskiaj kenon tokaskej ipan yejon tlajli. San ika, ¿tleka Jehová okimijli israelitas maka makinueyichiuakan tajtsitsintin tlen xmelajkej ijkuak kimijlitoya ika okse tlamantik tokaskiaj? Jehová kimatstoya ika israelitas kinekiskiaj yaskej intech kalpamej kampa xkitekichiuiliayaj Jehová niman ijkon ueliskej kenon tokaskej. San ika, tla ijkon kichiuayaj, israelitas xkuajli onkisaskiaj pampa cananeos tlaneltokayaj itech Baal (Núm. 25:3, 5; Juec. 2:13; 1 Rey. 18:18). w19.06 3 párrs. 4-6

Ijkuak apóstol Pablo, Silas, Lucas niman Timoteo oajsikej Filipos, miyekej akin ompa nemiyaj kinekiyaj kikakiskej iTlajtol toTajtsin. Yejuin nauimej itekipanojkauan toTajtsin otlapaleuijkej niman ijkon maonia se tlanechikojli. Nochimej akin yopeujkaj nomachtiayaj opeuj nosentlaliaj. Kanaj nosentlaliayaj ichan tokniuj Lidia akin melak kuajli kinseliaya tokniuan (Hech. 16:40). Tokniuan itech tlanechikojli Filipos nimantsin opeuj kixnamikij tlen ouijtika. Satanás okichiuj ika miyekej tlaltikpakchanejkej makintlaueltokakan yejon nauimej itekipanojkauan toTajtsin pampa tenojnotstinemiyaj. Tekiuajkej okimajsikej Pablo niman Silas, otlanauatijkej makinuijuitekikan niman okintsajkej. Uajmostla, okinkixtijkej kampa tsauktoyaj. ¿Tlenon kichiuaskiaj aman ika yokinmakaujkaj? Yejuamej okimitatoj tokniuan akin kemach yopeujkaj nomachtiayaj niman ijkon kinyolchikauaskej. Sakin, Pablo, Silas niman Timoteo oksekan oyajkej otenojnotsatoj, niman nesi ika Lucas onokauj Filipos. ¿Tlenon panoskia imiuan tokniuan? ¿Ok kitekichiuiliskiaj Jehová? Espíritu santo okinpaleui tokniuan chikauak makitekichiuilijtokan Jehová (Filip. 2:12). San matikonnemilikan kenon Pablo yolpakiya pampa tokniuan melajkanemiyaj. w19.08 8 párrs. 1, 2

¿San kemach yotochanpatlakej? Kemantika, patioj kisa oksekan tonchantis, ika yejon, kanaj tiknekiskej totlaneuiskej. Kuakon, maka matotlaneuikan niman ijkon tijkouaskej itlaj tlen xnoneki (Prov. 22:3). Ijkuak tikixnamikij itlaj, ken ijkuak noneki tiktlajpiyaskej se akin tiktlasojtlaj, kanaj ouijtika tikitaskej kech tomin totlaneuiskej. Ijkuak ijkon topan nochiuas, matikilnamikikan ika tla tiknotsaj Jehová, yejua uelis techpaleuis matiktlapejpenikan tlen kuajli. Jehová kichiuas matinemikan ika toyojlo, niman techpaleuis kuajli matitlanemilikan (Filip. 4:6,7; 1 Ped. 5:7). Matikinpiyakan amigos. Matikimijlikan toamigos tlenon tikmachiliaj niman tlenon topan nochiua, niman más tla yejuamej yokixnamijkej tlen tikixnamiktokej. Yejon kichiuas kuajli matomachilikan (Ecl. 4:9, 10). Toamigos akin otikimixmatkej kampa tinemiyaj, ok yeskej toamigos. w19.08 22 párrs. 9, 10

¿Tleka ijkuak Jehová otlajto itech iueyi guerra okiteneuj Meguidó? Pampa miyekej nouijsokiyaj ipan Meguidó niman valle tlen nisiuj onkatka tlen itoka Jezreel. Kemantika, Jehová okinpaleui akin ompa onouijsokej. Se neskayotl, “nisiu de on río Meguidó”, Jehová okipaleui juez Barac makintlani cananeos akin kinyekanaya Sísara. Barac niman siuateotlajtoketl Débora okitlasojkamachilijkej Jehová pampa okinpaleui matetlanikan. Ipan se tlakuikajli, okijtokej: “Desde ipan cielo [...], nochimej on sitlalimej otechpaleuijkej para otiktlankej Sísara. Ijkon ma mikikan nochimej motlauelikniuan toTEKO. Niman on yejuan mitstlajsojtlaj, ma petlanikan ken petlani nochiuiyan on tonaltsintli ijkuak tlakualispan” (Juec. 5:19-21, 31). Ipan Armagedón, noijki mikiskej itlauelikniuan Jehová niman makisaskej akin kitlasojtlaj. San ika, Armagedón melak tlamantik yes itech guerra kampa otlauijsok Barac. Ipan Armagedón, itekipanojkauan toTajtsin xtlauijsokiskej nion xkikuiskej armas. Kojtitoskej tla ika inyojlo nemij niman tla tlaneltokaj itech Jehová niman itech iiluikaktekitkauan (Is. 30:15; Apoc. 19:11-15). w19.09 9 párrs. 4, 5

Tonisiuiyaj itech Jesús ijkuak tomachtiaj nochi tlen okijto niman tlen okichiuj (Luc. 1:1-4). Toseselti noneki tikitaskej tlenon kijtoua Biblia itech inemilis Jesús. Noijki tiknisiuiyaj ijkuak tikijtouaj tikchiuaskej ken yejua niman ijkuak toapolaktiaj. Noijki tonisiuiyaj itech Jesús ijkuak tikintlajtlaniliaj tlayekankej matechpaleuikan. Yejuamej se tetlayokolijli tlen Jesús yotechmakak, yejua yokintekitlali niman ijkon matechtlajpiyakan (Juan 21:16; Efes. 4:7, 8, 11; 1 Ped. 5:1-3). San ika, tejuamej akin noneki tikintlajtlaniliskej tlayekankej matechpaleuikan. Maka matiknemilikan ika tlayekankej kimatstokej tlenon tiknemilijtokej noso ika kimatstokej kemanon tiknekij matechpaleuikan. Matikitakan tlenon okijto se tokniuj akin itoka Julian, yejua okijto: “Onikinnots tlayekankej niman nikita ken se tlateochiualistli ika onechtlajpalotoj”. Tlayekankej, ken akin okitatoj Julian, uelis techpaleuiskej matikmatikan “tlen toTEKO kinemilia”, kema, techpaleuiskej matikasikamatikan kenon tlanemilia Jesús niman matikchiuakan ken yejua okichiuj (1 Cor. 2:16; 1 Ped. 2:21). Ijkuak tlayekankej ijkon techpaleuiyaj, tikitaj ika se tlateochiualistli tlen kichiuaj topampa. w19.09 21 párrs. 4, 5

Biblia kinteneua itekipanojkauan toTajtsin, tlakamej niman siuamej, akin xnemij ipan grupo kampa nemij on 144,000, maski toTajtsin okinyekanka ika iespíritu, ken Juan Teapolaktijketl niman David (Mat. 11:11; Hech. 2:34). Yejuamej niman oksekimej tlaltikpakchanejkej kinyolitiskej niman ijkon nemiskej ipan tlaltikpaktli. Yejuamej niman grupo kampa nemi “sanoyej miyek tlakatl”, uelis kiteititiskej ika melajkanemij itech Jehová niman ika kipaleuiyaj iueyitlayekanalis. Jehová yokinsentlali melak miyekej tlaltikpakchanejkej akin nochiuiyan ualeuaj niman ijkon makiueyichiuakan, xkeman ijkon panouaya. Maski tla tikchiaj tiaskej iluikak noso tinemiskej ipan tlaltikpaktli, tinochimej noneki tikinpaleuiskej oksekimej tlaltikpakchanejkej niman ijkon machantikan ipan tlaltikpaktli. Sa achijtsin poliui, Jehová kichiuas mapeua “on temojtij tlajyouilistli” niman ijkon kinpopolos tekiuajkej niman religiones tlen melak yotetlajyouiltijkej. Nochimej akin nemiskej ipan tlaltikpaktli nochipa kitekichiuilijtoskej Jehová, ¿xmelak ika yejuin yes se ueyi tlateochiualistli? (Apoc. 7:14). w19.09 31 párrs. 18, 19

Pampa más inonisiuijtiuj tonajli ijkuak kipopoloskej tlen kiyekana Satanás, miyekej kinekiskej matijkauakan Jehová niman maka sa matikpaleuikan iTekiuajyo. Kanaj miyekej techpijpinaujtiskej. Ijkon texchiuiliskej pampa kitaskej ika xtikpaleuiyaj nion se tekiuaj. Maka keman matijkauakan Jehová, matikchiujtokan yejuin pampa ijkon uelis timelajkanemiskej ipan “on temojtij tlajyouilistli”. Ipan “on temojtij tlajyouilistli”, itlaj inpan nochiuas tokniuan akin aman kiyekanaj tenojnotsalistli ipan tlaltikpaktli. Ajsis tonajli ijkuak nochimej tlapejpeniltin akin ok nikan nemiskej ipan tlaltikpaktli yaskej ne iluikak niman ijkon teuan tlauisokiskej ipan Armagedón (Mat. 24:31; Apoc. 2:26, 27). Yejuin kijtosneki ika tokniuan itech Grupo akin Tlayekana ipan nochi tlanechikoltin xok nikan nemiskej ipan tlaltikpaktli. Maski ijkon, kintlapejpeniskej tokniuan niman ijkon makinyekanakan itekipanojkauan Jehová akin chantiskej ipan tlaltikpaktli. Tla tiknekij timelajkanemiskej itech Jehová, nonekis tikinpaleuiskej yejuin tokniuan niman tikchiuaskej tlen techijliskej. Tla tikintlakamatij, kuakon, timakisaskej. w19.10 17 párrs. 13, 14

Noemí okitlasojtlak Jehová niman nochipa okitekichiuili. San ika, ijkuak omik iueuentsin niman omemej ikoneuan, yejua xok kinekiya makitokayotikan Noemí, aman kinekiya makijlikan Mará, tlen kijtosneki “Chichiyalistli” (Rut 1:3, 5, 20, nota, 21). Rut, isiuamon Noemí, iuan onen ijkuak kixnamiktoya tlen ouijtika, xsan okipaleui makipiya tlen kikuas, noijki okiyolseui ika itlajtoluan. Rut okititi ika melak kitlasojtlaya pampa okijli tlen melak kualtsin niman tlen teyolseui. Noneki matikinpaleuikan tokniuan akin yomik imixnamik. Uelis tikijtoskej ika akin yononamiktijkej kentla yeskiaj ome kojtin tlen san sekan yonoskaltijkej. Kuakon, ineluayouan yejuin kojtin yonomamatilojkej. Niman ijkuak se kojtli kiuiuitlaj niman uaki, yejon okse kojtli noijki uakisneki. Noijki ijkon inpan nochiua tokniuan akin miki imixnamik, yejuamej uejkaujtipan tlajyouijtokej. w19.06 23 párrs. 12, 13

Xsan noneki kuajli tiknemiliskej tlenon ika toyolpaktiskej. Noijki noneki tikitaskej kech tiuejkauij ijkuak toyolpaktiaj, pampa, tla xijkon tikchiuaj, uelis melak tiuejkauiskej toyolpaktijtoskej niman xok sajnoye tiktekichiuiliskej Jehová. Kachtopa, noneki tikitaskej kech yemelak tiuejkauij ijkuak toyolpaktiaj. Ika yejon, uelis tikijkuiloskej ipan se amatl kech horas ipan se semana tikitstokej televisión, tikalakij ipan Internet niman tauiltiaj ika tocelular noso totableta. Tla tikitaj ika melak tiuejkauij ijkuak tikchiuaj nochi yejuin, matikchijchiuakan se horario. Kachtopa matikijkuilokan tlen melak noneki tikchiuaskej niman sakin matikijkuilokan kech tiuejkauiskej toyolpaktiskej. Sakin, matiktlajtlanilikan Jehová matechpaleui ijkon matikchiuakan ken yotikijkuilojkej. Ijkon tiueliskej tomachtiskej Biblia, tikueyichiuaskej toTajtsin imiuan tochanejkauan, tiaskej ipan tlanechikoltin, titenojnotsaskej niman titemachtiskej. Noijki, tomachiliskej ika toyojlo ijkuak toyolpaktiskej pampa kachtopa otikchiujkej tlen noneki. w19.10 30 párrs. 14, 16; 31 párr. 17

Kanaj ipan xiuitl 55, tokniuan corintios okitlapejpenijkej itlaj tlen ueyi kijtosnekiya. Okimatkej ika tokniuan akin chantiyaj Jerusalén niman Judea xkipiayaj tomintsin, ika yejon, okijtokej kinpaleuiskej (1 Cor. 16:1; 2 Cor. 8:6). San ika, opanok seki metstin niman apóstol Pablo okimat ika xitlaj kichiuayaj. Ika yejon, kanaj xkititlaniskiaj intomin iuan tlen okseki tlanechikoltin kontitlaniskiaj (2 Cor. 9:4, 5). Melak kuajli tlen okijtokaj kichiuaskej tokniuan corintios, niman Pablo okimijli ika kuajli tlen kichiujtoyaj pampa chikauak onkatka intlaneltokil niman melak kinekiyaj tepaleuiskej. San ika, noijki okimijli matlamikan tlen okipeualtijkaj (2 Cor. 8:7, 10, 11). Yejuin techititia ika hasta tokniuan akin chikauak intlaneltokil noneki nokojtiliskej kichiuaskej tlen kijtouaj. ¿Tleka? Pampa titlajtlakolejkej niman nochipa san tikijtotokej ika sakin tikchiuaskej. Noso kemantika topan nochiua tlen xtikchiayaj niman xnimantsin tikchiuaj tlen yotikijtokaj (Ecl. 9:11). w19.11 26, 27 párrs. 3-5

Ijkon ken se escudo melak kuajli techtlajpiya, totlaneltokil noijki techtlajpiya itech tlen xkuajli nochiua ipan tlaltikpaktli, ken auilnemilistli, tlauijsokilistli niman nochi tlen Jehová xkuelita. Tejuamej akin tikueyichiuaj Jehová tinemij ipan se guerra, “titouijsokij inuan on xkuajkualtin espíritus” (Efes. 6:10-12). ¿Kenon uelis tikmatiskej tla yemelak chikauak totlaneltokil niman ika uelis titlaxikoskej ijkuak tikixnamikiskej itlaj tlauejli? Kachtopa, noneki tiktlajtlaniliskej Jehová matechpaleui. Sakin, noneki tiktekitiltiskej Biblia niman ijkon toitaskej ken Jehová techita (Heb. 4:12). Biblia kijtoua: “Xtlali nochi moyojlo itech toTEKO. Maka xtlali moyojlo itech on tlen tejua tiknemilia ika kuajli” (Prov. 3:5, 6). Melak kuajli tla tikilnamikij tlenon san kemach otikixnamijkej niman tlenon otikchiujkej. Se neskayotl, ¿xtikpiayaj tomin? ¿Otikilnamijkej Hebreos 13:5 kampa Jehová techijlia: “Xkaman nimitskauas nion nimitstlalkauis”? ¿Okichiuj matikneltokakan ika Jehová xkeman techkauaskia? Tla ijkon otikchiujkej, kuakon kuajli ken onka totlaneltokil. w19.11 14 párrs. 1, 4

Tajtli niman nantli noneki kixeloskej tiempo niman ijkon kuajli kintlajpiyaskej inkoneuan. Yejua ika, tla melak miyekej inkoneuan kinpixtiuetsij, kanaj xueliskej kintlajpiyaskej ijkon ken noneki. Sekimej yokijtokej ika pampa ijkon okichiujkej, nion xok kimatiyaj tlenon kichiuaskej. Kanaj nantli nochipa siaujtos niman xok uelis nomachtis, kanaj xok kichiuas teoyotl niman xok ontenojnotsas. Noijki kanaj xok kuajli tlakaktos ipan tlanechikoltin niman xitlaj uelis. Teueuentsin akin kitlasojtla isiuatsin nokojtilis kipaleuis ipan tlanechikoltin niman noijki kampa chantij. Teueuentsin noijki kitas tlenon poliui inchan niman kipaleuis isiuatsin. Noneki nokojtilis ika ichanejkauan makinyolpakti ijkuak san sekan kiueyichiuaskej toTajtsin niman miyekpa imiuan ontenojnotsas. w19.12 24 párr. 8

¿Kenon kinpaleuiaya Jubileo nochimej israelitas? Matikonnemilikan ika se israelita onotlaneuijka niman ononek kinemakas itlal niman ijkon uelis tlatlaxtlauas. Ipan Jubileo, kikuepiliayaj itlal. Kuakon, oksejpa itlatki katka yejon tlajli niman sakin ueliskia kinpanoltilis ikoneuan. Noso, matitlanemilikan itech se israelita akin xmiyek kipiaya tomintsin, pampa ononek kitlaxtlauas tlen kiteuikiliaya, kanaj okinemakak se ikoneuj ken tlakeuajli noso kanaj hasta sa no yejua ononemakak. Ipan xiuitl tlen noixmatiya ken Jubileo, yejon tlakeuajli nokuepaya imiuan ichanejkauan (Lev. 25:10). Ijkon, nochimej akin tlakeualtin katkaj kimatstoyaj ika ajsiskia se tonajli ijkuak kinmakixtiskiaj. Niman Jehová noijki okijtoka: “Ijki xnemiskej mayankej nemotsajlan pampa nemoTEKO Dios mechtiochiuas ipan on tlajli yejuan yejua mechmakas ken herencia” (Deut. 15:4). Tikitaj ika yeuejkaui xijkon panouaya ken aman. Ipan yejuin tonajli, akin kipiya tomin más notomintijtiuj niman akin xitlaj kipiya más xitlaj kipiya. w19.12 8, 9 párrs. 3, 4

Ijkuak Jesús okixnamik tlen ouijtika, yejua okinots iTaj “ikan chikauak itlajtol niman ikan ixayo” (Heb. 5:7). Tlen kijtouaya ipan iteoyouan kiteititiaya ika nochipa kinekiya kitlakamatis Jehová niman yejon okipaleui nochipa itech mamelajkanemi. Jehová okitak iteoyouan Jesús ken yejon tlen ajuiyak katka niman tlen notlatiaya yeuejkaui. Jesús okiteititi ika san Jehová kinamiki tlayekanas, niman Jehová okuelitak nochi tlen okichiuj Jesús. Uelis tikchiuaskej ken Jesús tla tokojtiliaj tiktlakamatiskej Jehová niman tla itech timelajkanemij. Tla tikixnamikij itlaj tlauejli, matiktlajtlanilikan Jehová matechpaleui pampa tiknekij tikyolpaktiskej. Tikmatstokej ika Jehová xtechkakis tla tikchiujtinemij tlen yejua kitlauelita. San ika, tla tikchiuaj tlen yejua kuelita, kuajli matikmatstokan ika Jehová kitas toteoyouan ken yejon tlen melak ajuiyak. Niman uelis tikmatstoskej ika toTajtsin Jehová yolpaki pampa xkeman tijkauaj niman pampa tiktlakamatij. w19.11 21, 22 párrs. 7, 8

Ipan 1919, Jesús okitlali se grupo kampa nemiskiaj sekimej tokniuan tlapejpeniltin, yejuamej yeskiaj on “tekitketl” yolmelauak niman tlamachilise. Yejuin “tekitketl” kiyekana tenojnotsalistli niman techmaka tlen techpoloua niman ijkon machikaujto totlaneltokil. Satanás niman akin kipaleuiyaj yokiyejyekojkej kiteltiskej nochi tekitl tlen kichiua “tekitketl” yolmelauak niman tlamachilise. Yejuin “tekitketl” xkuajli onkisaskia tla toTajtsin xkiyekanaskia. Yopanokej ome uejueyimej guerras, yokintlaueltokakej itekipanojkauan Jehová, kemantika xitlaj tomin, san ika, maski ijkon, “tekitketl” ok kinmakatika itekipanojkauan Jehová tlen kinpoloua niman ijkon makiueyichiujtokan Jehová. San matikonnemilikan kenon miyek amatlajkuiloltin tikinpiyaj. Toamatlajkuiloluan notlajtolkuepaj ipantsin 900 tlajtoltin niman xtechtlajtlaniliaj tomin niman ijkon tikinpiyaskej. Yejuin kuajli techititia ika toTajtsin kinyekantika tokniuan akin tlayekanaj. Tikitaj ika Jehová noijki techteochiujtika pampa techpaleuiya matitenojnotsakan. ITlajtol toTajtsin noteijlitika “nochiuiyan ipan in tlaltikpaktli” (Mat. 24:14). w19.11 24 párrs. 15, 16

Ipan Tonajli ijkuak Notlapachouayaj Tlajtlakoltin, tlen nochiuaya sejse xiuitl, ueyi teopixki nonekiya kitlatis tlen ajuiyak achto ika kinuentlalis yolkamej. Ijkuak ijkon kichiuaya, kuajli kasikamatiya ika yokiyolpaktijka Jehová. Ijkuak Jesús ouajla nikan ipan tlaltikpaktli, yejua ononek kichiuas itlaj achto ika kitemakas inemilis topampa, niman tlen ononek kichiuas más ueyi okijtosnek xijkon ken kinmakixtis tlaltikpakchanejkej. Jesús kinekiya ika toTajtsin makiseli tlen kichiuaskia topampa, ika yejon, nochipa okitlakamat. Ijkon okiteititi ika melak kuajli tla se kitlakamati Jehová. Jesús noijki okiteititi ika Jehová tlayekana ika melajkayotl. Jesús melak kuajli okitlakamat Jehová ijkuak nikan onen ipan tlaltikpaktli. Maski okixnamik tlatlatalistin, yejua nochipa kinekiya kiteititis ika melak kuajli ken tlayekana iTaj (Filip. 2:8). w19.11 21 párrs. 6, 7

Ijkuak otenojnots, Jesús okixnamik tlen ouijtika. San ika, apóstoles okiteititijkej ika yemelak nouikayaj iuan Jesús (Prov. 18:24). Jesús melak kintlasojkaitaya. Matikilnamikikan ika ipan yejon tonaltin nion se ikniuj xitech tlaneltokaya (Juan 7:3-5). Niman hasta ichanejkauan okinemilijkej ika yokipolojka itlamachilis (Mar. 3:21). San ika, apóstoles xijkon katkaj. Ijkuak imikiskia, Jesús okimijli tlen kijtoua tlaxelojli tlen aman tikitstokej. Apóstoles miyekpa onopopolojkej. San ika, Jesús xyejon okitak, yejua okitak kenon tlaneltokayaj itech (Mat. 26:40; Mar. 10:13, 14; Juan 6:66-69). Ipan yeuajli ijkuak ikajsiskiaj, okimijli: “Nemechtokayotia nennotlajsojkaikniuan pampa yonemechijlij nochi tlen noTajtsin onechijlij” (Juan 15:15). Tikmatstokej ika itlasojkaikniuan Jesús noso iamigos melak okiyolchikaujkej. w19.04 11 párrs. 11, 12

¿Kenon kimati yakaj ika yas iluikak? Apóstol Pablo okiteasikamachilti yejuin ijkuak okintlajkuilouili sekimej tlapejpeniltin akin nemiyaj Roma. Yejua okimijli tlen kijtoua tlaxelojli tlen aman tikitstokej. Niman noijki okijto: “On Espíritu Santo yejuan onenkiselijkej xmechuika para nenesclavos yeskej oksejpa itech on nemojtijli, yej kichiua para nentekoneuan itech Dios. Yejua ika, tikijtouaj: ‘Abba, toTajtsin’” (Rom. 1:7; 8:15). Tikitaj ika itechkopa iespíritu santo, toTajtsin kuajli kimasikamachiltia tlapejpeniltin ika yaskej iluikak (1 Tes. 2:12). Jehová kichiua ika tlapejpeniltin kuajli makimatstokan ipan intlamachilis niman ipan inyojlo ika yaskej iluikak (1 Juan 2:20, 27, TNM). Yejuamej xnoneki yakaj makimijli ika yejuamej tlapejpeniltin. w20.01 22 párrs. 7, 8

Itlanauatil Cristo melak kuajli tlachijchiujtli pampa noyekana ika tlasojtlalistli (Gál. 6:2). Jesús okiteititi ika tetlasojtla. Jesús otemachti, otepajti, otetlakualti niman oteyoliti, yejua okichiuj yejon pampa teikneliaya, niman iteiknelilis ualeuaya itech itetlasojtlalis (Mat. 14:14; 15:32-38; Mar. 6:34; Luc. 7:11-15). Jesús nochipa tepaleuiaya niman ika iyojlo kichiuaya. Niman xsan yejon, yejua okiteititi ika melak tetlasojtlaya pampa okitemakak inemilis inpampa oksekimej. Uelis tikchiuaskej ken Jesús tla tikinpaleuiyaj oksekimej. Noijki uelis tikchiuaskej ken yejua tla tikimikneliaj akin tikinnojnotsaj, yejon kichiuas matikinnojnotsakan itech iTekiuajyo toTajtsin. Tla ijkon tikchiuaj, tiktlakamatstoskej itlanauatil Cristo. w19.05 4 párrs. 8-10

Jesús okinmakixti tlaltikpakchanejkej itech tlen temachtiayaj akin tlayekanayaj ipan tlaneltokiltin. Miyekej judíos melak miyek costumbres kichiuayaj niman noijki kineltokayaj tlen xmelauak (Mat. 5:31-37; 15:1-11). Akin kijtouayaj tlayekanayaj ipan tlaneltokiltin nion xkitekichiuiliayaj toTajtsin, yejon tlayekankej xkasikamatiyaj tlen toTajtsin kinekiya. Pampa xokiselijkej Mesías, yejuamej xokasikamatkej tlen kinekiya Jehová niman yejua xokintlapopolui (Juan 9:1, 14-16, 35-41). Jesús okimititi akin yolyemankej kenon makisaskiaj pampa okinmachti tlen melauak niman okimititi tlenon kichiuaskiaj (Mar. 1:22; 2:23–3:5). Jesús noijki ouel okichiuj ika tlaltikpakchanejkej mamakisakan itech tlajtlakojli. Pampa Jesús okitemakak inemilis, toTajtsin uelis kintlapopoluis akin yemelak tlaneltokaj itech tlen Jesús okichiuj topampa (Heb. 10:12-18). w19.12 10 párr. 8; 11 párrs. 10, 11

Jehová kitekitiltia iespíritu santo niman ijkon kuajli kimasikamachiltis nochimej tokniuan akin tlapejpeniltin ika melauak yokintlapejpeni niman kinmelajkaititis ika yejuamej nemiskej iluikak niman xnemiskej nikan ipan tlaltikpaktli (2 Cor. 1:21, 22). ¿Kijtosneki ika akin tlapejpenijli xok itlaj uelis kiteltis mauiya iluikak? Ka, xyejon kijtosneki. San kijtosneki ika yejua yokitlapejpenijkej mauiya iluikak. San ika, noneki kilnamikis yejuin tlajtoltin: “Nokniuan, xchiuakan kanika para nenkimatiskej ikan nochi nemoyojlo ika Dios melauak yomechnots niman yomechtlapejpenij. Tla ijkon [...] nenkichiuaskej xkaman nenuetsiskej” (2 Ped. 1:10). Kuakon, maski tla yakaj yokitlapejpenijkej, san uelis yas iluikak tla melajkanemi (Filip. 3:12-14; Heb. 3:1; Apoc. 2:10). w20.01 21, 22 párrs. 5, 6

On yeyimej tlakamej akin kijtouayaj ika iuan nouikayaj Job nion achijtsin xokiknelijkej pampa xokiyejyekojkej kasikamatiskej tlenon yemelak ipan nochiujtoya Job. Ika yejon, okinemilijkej tlen xkinamikiya niman melak okajuakej. ¿Tlenon techpaleuis maka ijkon tikchiuaskej? Matikasikamatikan ika san Jehová kimatstika tlenon kixnamikij itekipanojkauan. Kuajli matijkakikan tlen techijlis akin tlajyouijtika. Maka san matijkakikan tlen techijlia, noijki matikyejyekokan tikmachiliskej tlen yejua kimachilia. Tla ijkon tikchiuaj, uelis tikititiskej tokniuj ika noijki techajmana tlen ipan nochiujtika. Tla titeikneliaj, xtiknekiskej tikintejteneuaskej oksekimej ipampa tlen kixnamiktokej. Akin tetlajtolchijchiuilia san texexeloua niman kichiua ika tokniuan ipan tlanechikojli maka san sekan manemikan (Prov. 20:19; Rom. 14:19). Tlen kijtotinemi uelis kichiuas más manoyolkoko akin itlajyouijtika (Efes. 4:31, 32). Kuakon, melak tepaleui tla tikitaj tlen kuajli kichiuaj oksekimej niman tla tiknemiliaj kenon uelis tikinpaleuiskej matlaxikokan. w19.06 21, 22 párrs. 8, 9