Abril

Aristarco ualeuaya Tesalónica, se ueyi kalpan tlen onkatka Macedonia. Yejua yemelak okiteititi ika nouikaya iuan apóstol Pablo, ijkon tikijtouaj pampa yejua xkeman okikauj. Ijkuak Biblia peua tlajtoua itech Aristarco, kijtoua ika yejua nemiya iuan Pablo ne Éfeso, ijkuak Pablo ika yexpa tenojnotstinemiya ken misionero. Ompa miyekej opeujkej kintlaueltokaj niman okajsikej Aristarco (Hech. 19:29). Ijkuak okimakaujkej, xokinemili yas oksekan kampa xitlaj ueliskiaj kichiuiliskiaj, yejua ompa onokauj iuan Pablo niman xkeman okitlalkaui. Sakin, ijkuak yopanoka seki metstin, Aristarco ok kistinemiya iuan Pablo ne Grecia maski miyekej kimixnamikiyaj niman kinekiyaj kimiktiskej Pablo (Hech. 20:2-4). Kanaj ipan xiuitl 58, okuikakej Pablo ipan se barco niman ijkon kontsakuaskiaj Roma. Maski uejka katka, Aristarco iuan oyaj, niman on omemej san sekan yayaj ipan yejon barco tlen oapolak (Hech. 27:1, 2, 41). Ijkuak yoajsikaj Roma, nesi ika Aristarco noijki okitsajkej iuan Pablo (Col. 4:10). Ipampa nochi yejuin, kuajli tikasikamatij tleka Pablo melak kuajli onomachili iuan Aristarco. Uelis tikchiuaskej ken Aristarco tla tinemij imiuan tokniuan ijkuak nemij ika inyojlo niman noijki ijkuak tlajyouiyaj. w20.01 9 párrs. 4, 5

Tokniuj akin yokitlapejpenijkej kanaj uelis kinemilis ika xkinamiki kiselis yejon tlateochiualistli, san ika, yejua xometlamati ika Jehová yokitlapejpeni. Ijkuak tlanemilia itech tlen kiselis, yejua melak yolpaki niman kitlasojkamachilia toTajtsin (1 Ped. 1:3, 4). ¿Kijtosneki ika tlapejpeniltin kinekij mikiskej niman ijkon yaskej iluikak? Apóstol Pablo technankilia yejuin ijkuak otlajto itech intlalnakayo akin tlapejpeniltin, yejua okijto: “Chika tinemij ikan totlaltikpaknakayo, titejeltiaj. In xkijtosneki ika tiknekij tikpoloskej totlaltikpaknakayo, yej tiknekij ma nopatla totlaltikpaknakayo ika on iluikaknakayotl para on tlaltikpaknakayososojli yejuan ueli miki ma popoliui ika on yenkuik nemilistli yejuan nochipa onyas” (2 Cor. 5:4). Kuakon tikitaj ika tlapejpeniltin kuelitaj nemiskej nikan ipan tlaltikpaktli, xkinekij miktiuetsiskej niman ijkon yaskej iluikak. Yejuamej melak yolpakij niman mojmostla chikauak kitekichiuiliaj Jehová imiuan ichanejkauan niman imiuan akin nouikaj. Maski ijkon, nochipa kilnamiktokej tlenon kiseliskej ika tlayekapan (1 Cor. 15:53; 2 Ped. 1:4; 1 Juan 3:2, 3). w20.01 23 párrs. 12, 13

ToTajtsin Jehová techmelajkatlalia ijkuak noneki pampa kineki matikchiuakan tlen kuajli. ¿Kenon kichiua? Kanaj tlen tikamapouaskej ipan Biblia noso tlen tijkakiskej ipan tlanechikojli techasikamachiltis ika noneki topatlaskej. Jehová noijki uelis kintekitiltis tlayekankej niman ijkon matechpaleuikan. Maski san kenon techmelajkatlalis Jehová, matikilnamikikan ika yejua ijkon kichiua pampa techtlasojtla (Jer. 30:11). Jehová techpaleuiya matitlaxikokan ijkuak titlajyouiyaj. ToTajtsin iluikakchane techtlajpiya ijkuak tikixnamikij tlen ouijtika, ijkon ken kichiua se tajtli akin kintlasojtla ikoneuan. Jehová kitekitiltia iespíritu santo niman ijkon techpaleuis matimelajkanemikan (Luc. 11:13). Noijki kitlajpiya totlamachilis. Techijlia ika melak kuajli tinemiskej ika tlayekapan, niman yejon techpaleuiya matitlaxikokan. Yemelak ika ijkuak itlaj tikixnamikij, melak titlajyouiyaj, san ika, maka matikilkauakan ika Jehová kichiuas oksejpa matinemikan ika toyojlo. Tlen tikixnamiktokej san panos, san ika, tlen Jehová techmakas xkeman tlamis (2 Cor. 4:16-18). w20.02 5 párrs. 14, 15

Kema uelis tijkixtiskej nexikojli ipan toyojlo. Matitlajtokan intech ikniuan José. Ijkuak yopanokaj seki xiujtin, yejuamej okinextitoj José ne Egipto. Maski José okimixmat, yejua xokimijli ika yejua katka José, kachtopa kinekiya kitas tla yonopatlakaj. José otlanauati makintlakualtikan ikniuan, san ika, okiteijli más miyek tlakuajli makimakakan Benjamín, akin xokoyotl katka (Gén. 43:33, 34). Maski ijkon opanok, xkanaj tiknextiaj kampa makijto ika ikniuan okinexikolitakej Benjamín. Yejuamej okiteititijkej ika melak najmanayaj ipampa Benjamín niman ipampa intaj, Jacob (Gén. 44:30-34). Ikniuan ouel okikixtijkej nexikojli itech inyojlo, niman yejon okichiuj ika nochimej inchanejkauan oksejpa melak kuajli manouikakan (Gén. 45:4, 15). Noijki ijkon, tla tejuamej tikuiuitlaj noso tijkixtiaj nexikojli itech toyojlo, melak kuajli touikaskej imiuan tochanejkauan niman imiuan tokniuan akin nemij ipan tlanechikojli. Jehová melak kineki matijkixtikan nexikojli itech toyojlo niman matikchiuakan tlen nonekis niman ijkon maonia yolseuilistli. Tla tiyolyemankej, tla titetlasojkamachiliaj niman tla tiyolpakij san ika tlen tikpiyaj, xtitenexikolitaskej. w20.02 19 párrs. 17, 18

Uelis tikteititis ika tiktlasojkamati itlasojtlalis Jehová tla tikchiuilia teoyotl. Melak tiktlasojtlas tla tikijlia nochi tlen mitsajmana niman tla tiktlasojkamachilia nochi tlen kichiua mopampa. Niman ijkuak tikitas kenon yejua mitsnankilia, más kuajli iuan timouikas. Xtiometlamatis ika toTajtsin mitsasikamati. Aman tej, tla tikneki más kuajli timouikas iuan Jehová, noneki tikasikamatis kenon tlanemilia niman tlenon mitstlajtlanilia xchiua. Ika yejon, noneki nochipa xmomachti Biblia, iTlajtol toTajtsin. San Biblia mitspaleuis xmati nochi tlen melauak itech Jehová niman tlen kineki kichiuas mopampa. ¿Kenon uelis tikteititis ika tikpatiojkaita? Tla mojmostla tikamapoua, tla timomachtia achto mitsonmachtiskej itech Biblia niman tla tikchiua tlen tiueltiuj (Sal. 119:97, 99; Juan 17:17). ¿Mojmostla tikamapoua moBiblia? w20.03 5 párrs. 8, 9

Tla xok más tiuelij tinejnemij, uelis totlaliskej kampa miyekej panouaj niman matikinnojnotsakan. Noijki uelis titenojnotsaskej ika teléfono, ika cartas niman san kanon. Miyekej publicadores akin melak kualoj yolpakij pampa ijkon tenojnotsaj. Kuakon, uelis melak kuajli tiktekichiuiliskej toTajtsin maski tikualoj. Apóstol Pablo okijto: “On ueyi poder yejuan topan onkaj xtotech kisa, yej ualeua itech Dios” (2 Cor. 4:7). Yejua ononek kipiyas miyek kojtilistli ijkuak okualok kampa otenojnotsato. Okimijli gálatas: “Ye nenkimatstokej ika nikualouaya ijkuak onemechijlij on kuajli tlajtojli yejuan kiteijlia ken Dios temakixtia” (Gál. 4:13). Noijki ijkon, tla tikualoj, kuakon kanaj uelis tikinnojnotsaskej tepajtikej itech iTekiuajyo toTajtsin. Miyekpa ijkuak tokniuan yauej inchan yejuin tepajtikej, xompa nemij pampa tekititokej. w19.04 4, 5 párrs. 10, 11

Ipan xiuitl 2018, ipantsin 223,000 tenojnotskej chantiyaj kampa tekiuajkej xkinkauiliayaj makiueyichiuakan Jehová. Yejuin xtechmojkatlachialtia, pampa akin tikchiuaj ken Cristo tikmatstokej ika techtlaueltokaskej. Maski san kanon matichantikan, tekiuajkej uelis xok techkauiliskej matiktekichiuilikan Jehová. Tla xok techkauiliaj matikueyichiuakan toTajtsin, kanaj uelis tiknemiliskej ika Jehová xok techselia. San ika, yejon xmelauak. Matitlanemilikan itech apóstol Pablo. Kuajli tikmatstokej ika Jehová kiseliaya. Pablo okimijkuilo 14 cartas tlen onka ipan Biblia niman okitlapejpenijkej ken apóstol akin miyekan ontenojnotsaskia. Maski ijkon, melak okitlaueltokakej (2 Cor. 11:23-27). Tlen ipan onochiuj techmachtia ika Jehová kitekauilia makintlaueltokakan itekipanojkauan akin melajkanemij. w19.07 8 párrs. 1, 3

Jehová techpaleuiya matikimixnamikikan totlauelikniuan, ijkon techititia ika techtlasojtla. Satanás niman xkuajkualtin espíritus yejuamej akin melak techtlauelitaj. Jehová techijlia kenon melak xkuajkualtin, niman techpaleuiya matikimixnamikikan (Efes. 6:10-13). Tla tokauiliaj matechpaleui niman tla itech titlaneltokaj, uelis tikixnamikiskej Satanás. Uelis tomachiliskej ijkon ken apóstol Pablo, akin okijkuilo: “Tla Dios kipiya iyojlo para techpaleuis, ¿akinon uelis techixnamikis?” (Rom. 8:31). Akin melauak tikchiuaj ken Cristo xmiyek tiknekij tikmatiskej itech Satanás niman intech xkuajkualtin espíritus. Tejuamej san tiknekij tikixmatiskej Jehová niman tikmatiskej kenon tiktekichiuiliskej (Sal. 25:5). Maski ijkon, kipiya ika tikmatiskej tlenon kichiua Satanás niman ijkon maka techkajkayauas (2 Cor. 2:11). w19.04 20 párrs. 1, 2

¿Tlenon tikchiuaj ijkuak yakaj akin najmana techijlia tlen kimachilia? ¿Kuajli tijkakij? Uelis tiknemiliskej ika kuajli titekakis kijtosneki san ompa titlamatstoskej, san tiktlajtlataskej niman xtlaj tikijtoskej. San ika, xsan yejon kijtosneki. Tla kuajli tijkakij, uelis tikititiskej ika tiktlasojtlaj niman tikikneliaj. Kemantika, tla kuajli tiknemiliaj tlen tikijliskej, uelis kichiuas makasikamati tlen tejuamej tikmachiliaj. Uelis tikijliskej: “Melak nechyolkokoua tlen mopan onochiuj”. Niman tla tiknekij tikmatiskej ika kuajli otikasikamatkej tlen otechijli, kanaj uelis tikijliskej: “Ijkuak otikijto yejuin, onikasikamat ika..., ¿yejon tlen tikijtosnekiya?”. Tla ijkon tikijliaj, yejua kasikamatis ika kuajli tikaktokej niman ika tikyejyekouaj tikasikamatiskej (1 Cor. 13:4, 7). Noneki matotlajpiyakan maka nimantsin titlajtoskej. Maka matiktlajtolkotonakan yakaj niman ijkon tikyektlaliskej noso tikijliskej itlaj makichiua. Maka matosiaujkauakan. Niman maka matikijlikan kenon kiyektlalis itlaj, matikititikan ika tikikneliaj niman tiktlasojtlaj (1 Ped. 3:8). w19.05 17, 18 párrs. 15-17

Ipan se familia, teueuentsitsinuan kipiya ika kintlasojtlaskej insiuauan ijkon ken Jesús okitlasojtlak tlanechikojli (Efes. 5:28, 29). Kiteititiaj ika tetlasojtlaj ken Jesús ijkuak kinmakaj insiuauan tlen kinpoloua niman tlen kinekij, niman noijki ijkuak achtopa tlanemiliaj inpampa imixnamik. Sekimej tlakamej xuelij kichiuaj yejuin pampa kampa onoskaltijkej xtetlasojtlaj nion xkitechiuiliaj tlen kinamiki. Maski kimachiliskej ouijtika kikauaskej tlen yonomatkej kichiuaj, noneki nopatlaskej tla kinekij kitlakamatiskej itlanauatil Cristo. Teueuentsitsinuan akin ijkon tetlasojtlaj kinotlaniliaj ika insiuauan makintlakaitakan. Niman tatajtin akin yemelak kintlasojtlaj inkoneuan xkeman kinchiuiliskej tlen xkuajli nion xkimijliskej tlen kinyolkokos (Efes. 4:31). Tatajtin noneki kimititiskej inkoneuan ika kintlasojtlaj niman ika pakij inpampa. Ijkon, kokonej kintlasojtlaskej intajuan niman intech tlaneltokaskej. w19.05 6 párr. 21

Kanaj uelis totlajtoltiskej tlenon okinemili María ijkuak okikak yejuin tlajtoltin. ¿Okinemili tla Jesús kitekipatlaskia Herodes noso okse tekiuaj ipan Israel? ¿Okinemili ika aman yejua ueyixtoskia niman ika inchanejkauan chantiskiaj ipan ueyi kajli kampa chanti tekiuaj? Biblia xkijtoua tla María okitlajtlan ueyixtos ipan Tekiuajyotl. María melak yolyemanki katka. Nochipa matikilnamikikan ika tejuamej tomachtiaj Biblia niman amatlajkuiloltin pampa tiknekij melak nisiuj tinemiskej itech Jehová. Niman noijki pampa tiknekij tikitaskej kenon tikyekantokej tonemilis niman tlenon noneki tikchiuaskej niman ijkon tikyolpaktiskej toTajtsin (Sant. 1:22-25; 4:8). Ika yejon, nochipa ijkuak tomachtiskej, melak noneki matiktlajtlanilikan Jehová iespíritu santo. Noijki, noneki matiktlajtlanilikan matechpaleui kuajli matomachtikan niman matoitakan ijkon ken yejua techita. w19.05 31 párrs. 18, 19

Kemantika, tikixnamikij miyek tlaueltin. Xkonnemili yejuin, se tokniuj itoka John, akin kipiya se kokolistli itoka esclerosis múltiple, melak onoyolkoko ijkuak isiuauj okikauj maski san sekan yonenkaj 19 xiuitl. Sakin, omemej ichpochuan xok okitekichiuilijkej Jehová. Okse tokniuj akin itoka Bob niman isiuatsin Linda, noijki miyek tlen okixnamijkej. Xok kipiayaj tekitl niman sakin okinkuilijkej inkal pampa xok ouel okitlaxtlaujkej. Niman Linda okijlikej ika kipiaya se kokolistli ipan iyojlo tlen ika ueliskia mikis niman noijki okinextilijkej okse kokolistli tlen kichiuaskia nochipa makualoto. Uelis kuajli tikmatstoskej ika toTajtsin Jehová, akin techtlasojtla niman akin otexchijchiuj, kasikamati ika tlajyouilistli melak techijtlakoua. Niman yejua kineki techpaleuis matikixnamikikan tlaueltin (Filip. 4:6, 7). Ipan iTlajtol, tiknextiaj tlenon okixnamijkej itekipanojkauan niman techijlia kenon Jehová okinpaleui. w19.06 14 párrs. 2, 3

Ijkuak tikchiuaj itlaj niman ijkon tikinpaleuiskej akin xok kipiyaj imixnamik, tikimasikamachiltiaj ika tikintlasojtlaj. Aman ika san inselti nemij, nonekij akin imiuan manouikakan. ¿Kenon uelis tikimititiskej ika yemelak imiuan touikaj? Uelis tikinnotsaskej touan matlakuakan, imiuan tonpajxaloskej noso uelis imiuan tontenojnotsaskej. Noijki uelis tikinnotsaskej ijkuak tikueyichiuaskej toTajtsin iuan tochanejkauan. Tla ijkon tikchiuaj, tikyolpaktiskej Jehová, pampa yejua “nemi nisiu para kinyoltlalia on yejuan sanoyej noyolkokouaj” niman “kinmanauiya on kakaualtsitsimej” (Sal. 34:18; 68:5). Sa achijtsin poliui ijkuak iTekiuajyo toTajtsin tlanauatis ipan tlaltikpaktli niman “on tlajyouilistin” xok yakaj kimilnamikis. Melak tiknekij mayejkotiuetsi yejon tonajli ijkuak “on tlen yonochiu, nochimej kelkauaskej” niman “xokaman yakaj kelnamikis” (Is. 65:16, 17). Chika yejko yejon tonajli, ika tlen tikijtouaj niman ika tlen tikchiuaj matikteititikan ika yemelak tikintlasojtlaj tokniuan niman san sekan matopaleuikan (1 Ped. 3:8). w19.06 25 párrs. 18, 19

Yeuejkaui, Amatl Tekakistilijketl okijto: “Akin kuajli kixmatis toTajtsin yejua akin melak itech tlaneltokas ijkuak kitlaueltokaskej”. Yejon itlaj tlen melauak. Tla tiknekij titlaxikoskej ijkuak techtlaueltokaskej, noneki tiktlasojtlaskej Jehová niman itech titlaneltokaskej ika nochi toyojlo (Mat. 22:36-38; Sant. 5:11). Mojmostla matikpouakan Biblia pampa tiknekij tiknisiuiskej Jehová (Sant. 4:8). Ijkuak tikpouaskej Biblia, matitlanemilikan itech ikualneskayouan toTajtsin. Matikitakan kenon techtlasojtla ika tlen kijtoua niman tlen kichiua (Éx. 34:6). Sekimej kanaj ouijtika kimachiliaj kineltokaskej ika toTajtsin kintlasojtla pampa xakaj kimititia ika kintlasojtla. Tla ijkon tomachiliaj, ¿tleka xtikijkuilouaj mojmostla ipan se amatl kenon toTajtsin yotechititi ika techiknelia niman techtlasojtla? (Sal. 78:38, 39; Rom. 8:32). Kanaj uelis miyek onias tlen tikijkuiloskej tla titlanemiliaj itech tlen topan yonochiuj yeuejkaui niman tla titlanemiliaj itech tlen yotikpoujkej ipan Biblia. Ijkuak más tikpatiojkaitaskej tlen Jehová kichiua, más kuajli iuan touikaskej (Sal. 116:1, 2). w19.07 2, 3 párrs. 4, 5

Jehová xotechtekitlali niman ijkon matikijtokan tlenon kichiuaskej tokniuan. Akin kintlaliaj tlanauatiltin tlen xok nonekij xkintlajpiyaj tokniuan, yejuamej kentla kinekiskiaj kinnauatiskej tokniuan kenon tlaneltokaskej. Satanás xkikajkauas ika kintlaueltokas itekipanojkauan Jehová akin melajkanemij (1 Ped. 5:8; Apoc. 2:10). Satanás niman akin kipaleuiyaj kiyejyekoskej maka sa matikueyichiuakan toTajtsin. San ika, xkipiya ika tomojtiskej (Deut. 7:21). Jehová touan nemi niman nochipa techpaleuis maski xok techkauiliskej matikueyichiuakan (2 Crón. 32:7, 8). Matikchiuakan ijkon ken tokniuan akin onenkej ipan kachtopa siglo, yejuamej okimijlikej tekiuajkej: “Xkixtlalokan nemejuamej ixpan Dios. ¿Akinon kitocarouaj tiktlakamatiskej, nemejuamej noso Dios? Tejuamej tej, xuelis tikajkauaskej ika tikijtoskej on tlajtlamach yejuan yotikitakej niman yotikakej” (Hech. 4:19, 20). w19.07 12, 13 párrs. 18-20

Ijkuak titenojnotsaskej, noneki tokojtiliskej tikasikamatiskej tleka miyekej tlamantik ken tlanemiliaj. Apóstol Pablo judío katka, kuakon, uelis tikijtoskej ika okitak kenon kinnojnotsas akin xjudíos katkaj, akin xitlaj kimatiyaj noso achijtsin kimatiyaj itech Jehová niman itech Biblia. Tejuamej noijki tikimasikamatiskej akin tikinnojnotsaj tla titetlajtoltiaj kenon tlanemiliaj akin ompa chantij (1 Cor. 9:20-23). Tiknekij tikinnextiskej akin kipiyaj kuajli inyojlo niman ijkon tikinmachtiskej (Mat. 10:11). Uelis tikinnextiskej yejuin tlaltikpakchanejkej tla tikinkauiliaj makijtokan tlenon kinemiliaj niman tla kuajli tikinkakij. Se tokniuj akin chanti Inglaterra kintlajtoltia akin kinnojnotsa tlenon kinemiliaj noneki se kichiuas tla kineki yolpakis iuan ixnamik, tla kineki kuajli kinmachtis inkoneuan noso tla kineki kuajli kixnamikis tlen ouijtika. Sakin ika kinankiliaj, tokniuj kintlajtoltia: “¿Tiknemilia ika yejuin tlen onoijkuilo yeuejkaui uelis techpaleuis?”. Kuakon, kimititia ipan iteléfono seki tlaxeloltin itech Biblia, san ika, xkimijlia tla kimititijtika Biblia. w19.07 21 párrs. 7, 8

¿Kenon noneki tiktlasojtlaskej toTajtsin? Matikitakan tlen Jesús okijli se fariseo, yejua okijto: “Xtlajsojtla moTEKO Dios ikan nochi moyojlo, ikan nochi moalma niman ikan nochi motlamachilis” (Mat. 22:36, 37). Xtiknekij san achijtsin tiktlasojtlaskej toTajtsin, tiknekij más maueyixtiuj totlasojtlalis tlen tikmachiliaj ipampa. Tla tiknekij tiktlasojtlaskej toTajtsin, noneki tikixmatiskej. Biblia kijtoua: “On yejuan xtetlajsojtla xkixmati Dios, pampa Dios yejua tetlajsojtlalistli” (1 Juan 4:8). Pablo noijki okijtoka ika totlasojtlalis ueyixtiuj ijkuak tikixmatstiuej Jehová niman ijkuak titlanemilijtiuej ken yejua tlanemilia (Filip. 1:9). Ijkuak opeuj tomachtiaj Biblia, opeuj tikixmatij toTajtsin niman opeuj tiktlasojtlaj. San ika, aman ika más yotikixmatkej, más tiktlasojtlaj. Kuajli tikitaj ika melak noneki mojmostla tomachtiskej iTlajtol toTajtsin niman itech titlanemiliskej (Filip. 2:16). w19.08 9 párrs. 4, 5

Tla oksekan omitstitlankej xtekichiuili Jehová, noneki tikintejtemoskej akin imiuan touikaskej. Tla tiknekij tikinpiyaskej amigos, noneki kuajli titenotsaskej. Matikimijlikan kenon Jehová yotechteochiuj niman ijkon makitakan ika melak tiyolpakij pampa tiktekichiuilijtokej. Tla oksekan otechtitlankej pampa toixnamik opeuj kualo, maka matiktlajtlakoltikan. Niman tla tejuamej opeuj tikualoj, maka matotlajtlakoltikan nion maka matiknemilikan ika tikchiuaj manoyolkoko toixnamik. Matikilnamikikan ika tejuamej tochiuaj “san se tlalnakayotl” niman ika otikijlikej Jehová ika totlajpiyaskej maski san tlenon mapano (Mat. 19:5, 6). Noijki, tla oksekan otechtitlankej pampa tosiuauj okoneuajtiak, matikijlikan tokoneuj ika yejua melak ueyi kijtosneki xijkon ken kampa tinemiyaj. Nochipa matikijlikan ika tikitaj ken se itetlayokolil Jehová (Sal. 127:3-5). Noijki, matiknojnotsakan itech nochi tlen kualtsin topan yonochiuj, yejon uelis kichiuas ika yejua noijki makineki kitekichiuilis Jehová, ken tejuamej otikchiujkej. w19.08 22 párrs. 10, 11

Ueyixtika Babilonia, tlen kijtosneki nochi tlaneltokiltin xmelajkej, melak yokitsojkuiloti itoka toTajtsin. Yotemachti tlen xmelauak itech toTajtsin niman kichiua ken se siuatl tlakapapatlaketl, pampa kinpaleuiya tekiuajkej itech yejuin tlaltikpaktli. Pampa kipiya kojtilistli, yokinchiuili tlen yejua yokinek akin itech tlaneltokaj. Niman yokinmikti miyekej tlaltikpakchanejkej niman sekimej itekipanojkauan toTajtsin (Apoc. 18:24; 19:2). Jehová kinkuis on “majtlaktli ikuakuauuan” tlen kipiya “on xkuajli yolki [...] chichiltik” niman ijkon kipopolos on siuatl tlakapajpatlaketl. Yejuin xkuajli yolki kijtosneki Organización de las Naciones Unidas, niman majtlaktli ikuakuauan kijtosneki tekiuajkej akin aman kipaleuiyaj. Ijkuak toTajtsin kijtos, yejuin tekiuajkej kixnamikiskej Ueyixtika Babilonia. “Yejuamej kitlakijkixtiliskej, kitetsotsoloskej”, kikuiliskej nochi itomin niman kiteititiskej kenon melak xkuajli yejuin Ueyixtika Babilonia (Apoc. 17:3, 16). Pampa nimantsin kipopoloskej, ken “san ipan se tonajli”, kinmojkatlachialtis akin kipaleuiayaj, pampa yejua nochipa kijtouaya: “Nejua [...] xkaman nichokas” (Apoc. 18:7, 8). w19.09 10 párrs. 10, 11

Jesús kineki ika nochimej ijkon makichiuakan. Yejua xkeman kimapeuaskia akin yemelak kineki kitekichiuilis toTajtsin (Juan 6:37, 38). Nochimej akin kichiuaj ken Cristo uelis kichiuaskej yejon tekitl tlen Jehová yokimakak Jesús. Uelis kuajli tikmatstoskej ika Jesús nochipa techpaleuis matikchiuakan yejuin tekitl (Mat. 28:18-20, TNM). Akin yolyemankej katkaj kinekiyaj kinisiuiskej Jesús (Mat. 19:13, 14; Luc. 7:37, 38). ¿Tleka? Pampa yejua xijkon katka ken fariseos. Yejon tlakamej nion achijtsin xtetlasojtlayaj niman melak noueyimatiyaj (Mat. 12:9-14). San ika, Jesús melak tetlasojtlaya niman yolyemanki katka. Fariseos kinekiyaj uejueyixtoskej niman ika miyekej makimixmatikan. San ika, Jesús okimititi inomachtijkauan mayolyemankej niman matetekichiuilikan (Mat. 23:2, 6-11). Fariseos kinmojtiayaj oksekimej niman ijkon san yejuamej makintlakamatikan (Juan 9:13, 22). San ika, Jesús kinyolseuiaya pampa kinchiuiliaya tlen kuajli niman pampa kualtsin kinnotsaya. ¿Tikchiujtokej ijkon ken Jesús? w19.09 20 párr. 1; 21 párrs. 7, 8; 23 párr. 9

Tlanechikoltin techpaleuiyaj melak matiknisiuikan Jehová. ¿Nochipa tiauej tlanechikoltin? Yejon techititis tla titlaxikoskej noso xtitlaxikoskej ijkuak techtlaueltokaskej (Heb. 10:24, 25). Matikitakan tleka ijkon tikijtouaj. Tla aman xtiauej tlanechikoltin pampa topan nochiua itlaj tlen xueyi kijtosneki, ¿tlenon panos ijkuak xok techkauiliskej matosentlalikan imiuan tokniuan? Aman matiknemilikan yejuin, tla aman tokojtiliaj nochipa tiaskej tlanechikoltin, akin techixnamikiskej xuelis kichiuaskej maka sa matosentlalikan. Yejua ika, noneki aman matikinpatiojkaitakan totlanechikoluan. Kuakon, maski techtlaueltokaskej niman maski tekiuajkej techixnamikiskej, nochipa tiktlakamatiskej toTajtsin (Hech. 5:29). Matikintsontekontlalikan tlaxeloltin tlen tikinuelitaj (Mat. 13:52). Melauak, kanaj xnochi tiuelij tiktsontekontlaliaj, san ika, Jehová uelis kikuis iespíritu niman kichiuas matikimilnamikikan tlaxeloltin (Juan 14:26). Yejuin tlaxeloltin techpaleuiskej matimelajkanemikan niman matinemikan nisiuj itech Jehová. w19.07 3 párr. 5; 4 párrs. 8, 9

¿Otitlakat ijkuak yopanoka xiuitl 1914? Tla kema, kuakon yotinen nochi monemilis ipan “itlamiyan tonaltin”. Tinochimej yotijkakej ipan noticias kenon nochiujtika tlen Jesús okijtoka nochiuas: onka guerra, apistli, miyek kokolistli, miyekan tlalolini, yomiyekiyak tlen xkuajli niman kintlaueltokaj tokniuan (Mat. 24:3, 7-9, 12; Luc. 21:10-12). Noijki yotikitakej tlenon kichiuaj miyekej tlaltikpakchanejkej ipan yejuin tonaltin, yejuamej kichiuaj ken okijto apóstol Pablo. Tejuamej akin tiitekipanojkauan Jehová kuajli tikmatstokej ika tinemij ipan sa ika tlami “itlamiyan tonaltin” (Miq. 4:1, TNM). Pampa desde 1914 hasta aman yopanok miyek tiempo, uelis tikijtoskej ika tinemij ipan sa ika tlami “itlamiyan tonaltin”. Sa achijtsin poliui ijkuak kipopoloskej nochi tlen xkuajli tlen onka ipan yejuin tlaltikpaktli, ika yejon, noneki tiknankiliskej yejuin: ¿Tlenon nochiuas ipan sa ika tlami “itlamiyan tonaltin”? Niman ¿tlenon kineki Jehová matikchiujtokan? w19.10 8 párrs. 1, 2

Uelis titlaxikojtoskej tla titlaneltokaj itech Jehová, xkipiya ika tiknemiliskej ika san uelis titlaxikoskej ijkuak tikitaskej ika tlen tikixnamiktokej uelis noyektlalis (Rom. 12:12). Tlen okijto Jesús ipan tlaxelojli tlen aman tikitstokej kijtosneki ika noneki timelajkanentoskej maski tikixnamikiskej san katlejua tlauejli. Tla aman titlaxikouaj, totlaneltokil chikauis achto ika yejkos “on temojtij tlajyouilistli”. Maka matiknemilikan ika san uelis tiyolchikaujkej yeskej tla melak miyek tlemach tiuelij tikchiuaj. Tejuamej san uelis tiyolchikaujkej yeskej niman titlaxikoskej tla titlaneltokaj itech toTajtsin. ¿Tlenon techpaleuis más matitlaneltokakan itech toTajtsin? Tla mojmostla tikpouaj Biblia niman tla titlanemiliaj itech kenon Jehová okinmakixti itekipanojkauan akin yeuejkaui onenkej (Sal. 68:20; 2 Ped. 2:9). Ijkuak tekiuajkej techixnamikiskej ipan “on temojtij tlajyouilistli”, melak nonekis tiyolchikaujkej yeskej niman más titlaneltokaskej itech Jehová (Sal. 112:7, 8; Heb. 13:6). Tla aman itech titlaneltokaj, xtechpolos yolchikaualistli ijkuak techixnamikis Gog. Kuajli tikmatstokej ika timakisaskej pampa Jehová techpaleuis (1 Cor. 13:8). w19.10 18 párrs. 15, 16

Satanás kiyekana yejuin tlaltikpaktli, niman kikui tlaltikpaktli niman ijkon kichiuas matikchiuakan tlen tikileuiyaj niman ouijtika matikitakan tikixnamikiskej tlen xkuajli (Efes. 2:1-3). Kineki matiktlasojtlakan okseki tlemach niman maka san Jehová matikueyichiuakan. Sakin ika apóstol Pedro yokijtoka ika popoliuis tlaltikpaktli tlen kiyekana Satanás niman ika oniaskia se yenkuik tlaltikpaktli, noijki okijto: “Notlajsojkaikniuan, chika nemejuamej nenkimachixtokej on tonajli, xchiuakan kanika para Dios mechnextijtejkos nenkipiyaj yolseuilistli, nenyolchipajkej niman xikan tlajtlakojli” (2 Ped. 3:14). Ijkuak tikchiuaj tlen okijto apóstol Pedro niman tikueyichiuaj Jehová ken yejua kuelita, kuakon tikteititiaj ika san Jehová tikueyichiuaj. Satanás niman tlaltikpaktli tlen kiyekana ok texchiualtisnekiskej matikchiuakan tlen yejuamej kuelitaj (Luc. 4:13). San ika, maski san tlenon tikixnamikiskej, matokojtilikan ika Jehová nochipa manemi ipan toyojlo. Yotikijtokej ika nochipa san Jehová tikueyichiuaskej, ijkon ken kinamiki. w19.10 27 párr. 4; 31 párrs. 18, 19

Kuajli tla techajmana seki tlemach. Se neskayotl, tiknekij tikyolpaktiskej Jehová niman Jesús (1 Cor. 7:32). Tla tikchiuaj se tlajtlakojli, tiknekij oksejpa touikaskej iuan Jehová. Noijki tiknekij tikyolpaktiskej toixnamik niman tiknekij ika tochanejkauan niman tokniuan kuajli manemikan (1 Cor. 7:33; 2 Cor. 11:28). San ika, tla melak tajmanaj uelis techijtlakos. Kanaj uelis kichiuas matiknekikan tikpiyaskej miyek tlen tijkuaskej niman tlen ika totlakentiskej (Mat. 6:31, 32). Kuakon, kanaj tiknekiskej chikauak titekitiskej niman ijkon tokouiliskej miyek tlemach. Tla ijkon tikchiuaj, xok chikaujtos totlaneltokil niman xok kuajli ken tikueyichiuaskej Jehová (Mar. 4:19; 1 Tim. 6:10). Noijki kanaj melak tajmanaskej pampa tiknekij ika oksekimej kuajli matechitakan. Niman kanaj melak techajmanas ika oksekimej matechpijpinaujtikan noso matechtlaueltokakan niman kanaj xok tiknekiskej tikyolpaktiskej Jehová. Kuakon, tla xtiknekij ijkon topan manochiua, noneki tiktlajtlaniliskej Jehová makichikaua totlaneltokil niman matechyolchikaua (Prov. 29:25; Luc. 17:5). w19.11 15 párrs. 6, 7

Seki tlemach tlen otiktlapejpenijkej tikchiuaskej xtiknekij tikpatlaskej. Yotikijtokej nochipa tiktekichiuiliskej Jehová niman xtikajkayauaskej toixnamik (Mat. 16:24; 19:6). San ika, onka okseki tlen kanaj nonekis tikpatlaskej. ¿Tleka? Pampa kanaj itlaj uelis nopatlas. ¿Kenon uelis tiktlapejpeniskej tlen techpaleuis? Matiktlajtlanilikan toTajtsin tlamachilistli. Tinochimej techpoloua “tlamatkilistli” noso tlamachilistli ipan seki tlemach. Yejua ika, matiktlajtlanilikan Jehová matechpaleui ijkuak itlaj tiktlapejpeniskej tikchiuaskej niman ijkuak nonekis tikpatlaskej tlen yotikijtokaj tikchiuaskej. Tla ijkon tikchiuaj, Jehová techpaleuis. Kuajli matomachtikan. Matikitakan tlenon kijtoua iTlajtol toTajtsin, matikinpouakan toamatlajkuiloluan niman matonojnotsakan iuan yakaj akin itech titlaneltokaj (Prov. 20:18). Melak noneki matikchiuakan yejuin ijkuak tiknemilijtoskej tla okse tekitl tikchiuaskej, tla tochanpatlaskej noso tlenon tomachtiskej niman ijkon tikpiyaskej se totekiyo tlen matechkauili matiktekichiuilikan Jehová. w19.11 27 párrs. 6-8

Melak tiyolpakij tikmatiskej ika Jehová okitak kenon techmakixtiskia itech tlajtlakojli. Jesús kichiuaskia se tekitl tlen melak ueyi kijtosnekiskia. Ipan siglo 8 i.x.x. 1, teotlajtoketl Isaías otlajto itech se makixtilistli tlen sakin nochiuaskia, yejuin makixtilistli melak tepaleuiskia xijkon ken Jubileo tlen kipanoltiayaj israelitas. Isaías okijkuilo: “IEspíritu toTEKO nopan nemi, pampa yejua yonechtlapejpenij para nias nikinmijlis on mayankej on kuajli tlajtojli, para nikimpajtis on yejuan noyolkokouaj, para nikinmachistis ika kinmakauaskej on yejuan okinuikakej” (Is. 61:1). ¿Itech akinon tlajtoua yejuin teotlajtojli? Yejon teotlajtojli tlen tlajtoua itech se makixtilistli opeuj nochiua sakin ika Jesús opeuj tenojnotsa. Ijkuak oyaj ipan “on kalpan Nazaret kampa onoskaltij” niman “okalak ipan on sinagoga”, yejua okinpouili judíos sa no yejua teotlajtojli tlen okijkuilojka Isaías. Yejuin teotlajtojli tlajtoua itech Jesús (Luc. 4:16-19). w19.12 9, 10 párrs. 6-8

Tla tiknekij titlaxikoskej ijkuak techtlaueltokaskej, noneki tiyolchikaujkej yeskej. ¿Tlenon uelis tikchiuaskej tla tikmachiliaj ika xtiyolchikaujkej? Maka matiknemilikan ika san tiyolchikaujkej yeskej tla tiueuejkapamej noso tla tikojtikej. Matikitakan tlen ipan onochiuj David. Ijkuak yejua telpochtli katka, okixnamik Goliat, se tlakatl akin melak uejkapan katka. David pitentsin katka niman xmás kojtik katka ken yejon filisteo. Noijki xueliya tlauisokiya ipan guerra niman nion xkipiaya se espada. San ika, melak yolchikauak katka niman xonomojti kixnamikis yejon tlakatl akin uejkapan katka. ¿Tleka David melak yolchikauak katka? Pampa kuajli kimatstoya ika Jehová iuan nemiya (1 Sam. 17:37, 45-47). David xokinemili ika yejua xueyixtoya ixpan Goliat, David okinemili ika Goliat nion achijtsin xueyixtoya ixpan Jehová. Itech yejuin tiuelij itlaj: tiyolchikaujkej yeskej tla tikneltokaj ika Jehová techpaleuiya niman tla kuajli tikmatstokej ika akin techixnamikij xuejueyixtokej xijkon ken toTajtsin akin nochi ueli kichiua (2 Crón. 20:15; Sal. 16:8). w19.07 5 párrs. 11-13

Apóstol Pablo nouikaya iuan Tíquico niman itech tlaneltokaya (Hech. 20:4). Kanaj ipan xiuitl 55, Pablo okijto ika nosentlaliskia tomin tlen ika kinpaleuiskiaj tokniuan akin chantiyaj Judea, niman kanaj okitlajtlanili Tíquico matlapaleui ipan yejuin tekitl (2 Cor. 8:18-20). Sakin, ijkuak ika sejpa okitsajkaj Pablo ne Roma, Tíquico melak okipaleui. Komintemamakaya cartas niman kimijliaya tokniuan akin chantiyaj Asia tlen Pablo kinekiya kimijlis niman ijkon kinyolchikauas (Col. 4:7-9). Tíquico xkeman okitlalkaui Pablo (Tito 3:12). Tíquico katka se tokniuj akin ueliskia itech titlaneltokas. Ijkon tikitaj ipampa tlen Pablo okijkuilo kanaj ipan xiuitl 65 ijkuak ika okpa okitsajkej ne Roma. Yejua okijto ika miyekej tokniuan akin ualeuayaj Asia xok iuan nosentlaliayaj, kanaj pampa kinmakasiyaj akin kintlauelitayaj (2 Tim. 1:15). San ika, Pablo kema tlaneltokaya itech Tíquico niman okimakak okse tekitl (2 Tim. 4:12). Kuajli nesi ika Pablo yolpakiya pampa kipiaya se amigo akin ueliskia itech tlaneltokas. w20.01 10 párrs. 7, 8

Kanaj timotlajtoltia tla Jehová yomitstlapejpeni ika iespíritu santo. Tla ijkon tiknemilia, xmotlajtolti: ¿melak tikneki tikchiuas tlen toTajtsin kineki?, ¿melak tikuelita titenojnotsas?, ¿tikuelita timomachtis Biblia niman tiuelis “tlajtlamach yejuan más ueyi kijtosnekij itech Dios”?, ¿yotikitak ika toTajtsin melak mitspaleuiya ijkuak titenojnotsa?, ¿tikita ika melak noneki tikinpaleuis oksekimej niman ijkon kuajli manouikakan iuan toTajtsin?, ¿yotikitak ika Jehová melak yomitspaleui ipan nochi monemilis? Tla otikijto “kema”, ¿kiteititia yejuin ika yomitstlapejpenijkej niman ijkon tias iluikak? Ka, xyejon kijtosneki, pampa tinochimej akin tiktekichiuiliaj Jehová, maski titlapejpeniltin noso ka, uelis ijkon tomachiliskej. Tla tejua xkuajli tikmati tla titlapejpenijli, kijtosneki ika xtitlapejpenijli. Akin yokintlapejpenijkej xometlamatij, yejuamej kuajli kimatstokej ika yokintlapejpenijkej. w20.01 23 párr. 14