Mayo

Tajtin, ¿tlenon uelis nenkichiuaskej niman ijkon nenkinmachtiskej nemokoneuan makitlasojtlakan Jehová? Xtlajtlanilikan Jehová mamechpaleui, ijkon ken okichiuj Manóah. Noijki, xchiuakan tlen nenkinmachtiaj nemokoneuan. Tajtin, tlen nenkimijliaj nemokoneuan melak ueyi kijtosneki, san ika, más ueyi kijtosneki tlen nemejuamej nenkichiuaj. Uelis kuajli tikmatstoskej ika José niman María melak kuajli okititijkej Jesús niman oksekimej inkoneuan kenon kichiuaskej tlen kuajli. José xsan chikauak tekitiya niman ijkon kintekipanos ichanejkauan, noijki kinyolchikauaya makiueyichiuakan Jehová (Deut. 4:9, 10). “Cada xipan”, José kinuikaya ichanejkauan Jerusalén niman ijkon konpanoltiskej “on iluitl itoka Pascua” (Luc. 2:41, 42). Kanaj sekimej tajtin kinemiliayaj ika melak ouijtika katka yaskej Jerusalén, ika melak uejka katka niman ika patioj kisaya. San ika, José kitaya ika melak ueyi kijtosnekiya kiueyichiuas Jehová niman okimititi ikoneuan ijkon makichiuakan. Aman matitlanemilikan itech María. Yejua melak kuajli kixmatiya tlen kijtouaya iTlajtol toTajtsin, niman ika tlen kichiuaya niman ika tlen kijtouaya okinmachti ikoneuan makitlasojtlakan iTlajtol toTajtsin. w19.12 24, 25 párrs. 9-12

Jehová nimantsin itlaj okichiuj ijkuak Adán otlajtlako, ijkon otechititi ika techtlasojtla. Pampa Adán xotetlakamat, yejua niman ikoneuan xok yeskiaj ichanejkauan Jehová (Rom. 5:12). San ika, ijkuak ijkon opanok, Jehová nimantsin okitak kenon kiyektlalis yejon. Maski Jehová okitlajtlakolmakak Adán, ikoneuan xsan ijkon okinkauj. Nimantsin okijto ika nochimej akin kitlakamatiskiaj oksejpa ueliskiaj yeskej ichanejkauan (Gén. 3:15; Rom. 8:20, 21). Niman yejuin uelis nochiuas pampa yejua okitemakak iKoneuj, Jesús, ken tlaxtlauijli. Ijkon okiteititi ika melak techtlasojtla (Juan 3:16). Xnemi okse Tajtli ijkon ken yejua. Yejua kinkaki toteoyouan, techmaka tlen techpoloua niman noijki techpaleuiya kuajli iuan matouikakan. Techmelajkatlalia niman techpaleuiya. Noijki, yokijto ika melak techteochiuas ika tlayekapan. ¿Xmelak ika techyolpaktia tikmatiskej ika toTajtsin techtlasojtla niman techtlajpiya? w20.02 6 párrs. 16, 17; 7 párr. 20

¿Itlaj mopan yonochiujka tlen melak omitsajman? Kanaj yakaj omitsteneuili itlaj noso itlaj omitschiuili. Noso kanaj mitsajmana tlen tejua otikchiuj noso tlen otikijto. Kanaj otikchiuj tlen xkuajli niman mitsajmana tla Jehová xkeman mitstlapopoluis. Ika yejon, kanaj tiknemilia: “Ijkon ninomachilia pampa xchikauak notlaneltokil, xkeman nikchiua tlen kuajli”. Matitlajtokan intech sekimej itekipanojkauan Jehová akin yeuejkaui onenkej. Ana, inan teotlajtoketl Samuel, melak tlaneltokaya. Maski ijkon, noyolajmanaya pampa yakaj akin chantiya ichan melak kitlajyouiltiaya (1 Sam. 1:7). Niman apóstol Pablo, maski chikauak kipiaya itlaneltokil, kajmanaya tlen inpan nochiuaya tokniuan (2 Cor. 11:28). Tekiuaj David noijki chikauak kipiaya itlaneltokil niman Jehová melak kitlasojtlaya (Hech. 13:22). Maski ijkon, okichiuj tlen xkuajli niman yejon melak kitekipachouaya (Sal. 38:4). Jehová okinyolseui yejuin itekipanojkauan niman okinpaleui maka sa manoyolajmanakan. w20.02 20 párrs. 1, 2

Timosentemakas kijtosneki tikchiuilis se teoyotl Jehová ika nochi moyojlo kampa tikijlis ika tikmaktilia monemilis. Ijkuak yakaj nosentemaka itech Jehová, “kelkaua nochi on tlen más kitlasojtla”. Desde yejon tonajli, Jehová kinoyaxkatia yejon tlaltikpakchane (Rom. 14:8). Ijkuak yakaj nosentemaka, kijlia Jehová ika ipan yejon tonajli ika tlayekapan san yejua kiyolpaktis pampa yejon tlen más ueyi kijtosneki ipan inemilis. ToTajtsin Jehová xtexchiualtia itech matosentemakakan, san ika, tla tosentemakaj, kichia matikchiuakan tlen tikijtouaj (Sal. 116:12, 14). Timosentemakas yejon itlaj tlen san moselti tikchiuas niman san tejua tikmatstos iuan Jehová. San ika, timoapolaktis yejon itlaj tlen tikchiuas imixpan oksekimej, ken ipan se ueyi tlanechikojli. Ijkuak timoapolaktis, tikimititis oksekimej ika yotimosentemakak itech Jehová niman ika tiktlasojtla “ikan nochi moyojlo, ikan nochi moalma, ikan nochi motlamachilis, niman ikan nochi mochikaualis”. Noijki tikteititis ika yotikijto nochipa tiktekichiuilis toTajtsin (Mar. 12:30). w20.03 9 párrs. 4, 5

Satanás kichiua ika miyekej makilkaujtiakan Jehová. Ijkuak iapóstoles Jesús yomijkaj, sekimej akin kijtouayaj ika kichiuayaj ken Cristo opeujkej temachtiaj tlen xmelauak (Hech. 20:29, 30). Yejon okichiuj ika tlaltikpakchanejkej makilkaujtiakan toTajtsin akin melauak. Yejuamej xok kitlaliayaj ipan Biblia itoka toTajtsin, san kitlaliayaj “toTeko” noso okse tlamantik kijkuilouayaj. Yejua ika, akin kipouayaj Biblia xueliyaj kimatiyaj kemanon noteneujtoya Jehová niman kemanon oksekimej “tekomej” (1 Cor. 8:5). Okikuikej “toTeko” niman ijkon ika kitokayotiskej Jehová niman Jesús, yejon okichiuj maka manasikamati ika toTajtsin niman ikoneuj xsan no yejuamej (Juan 17:3). Niman yejuin noijki okichiuj manoneltoka itech trinidad, itlaj tlen Biblia xtemachtia. Yejua ika, miyekej kijtouaj ika toTajtsin xuelis tikixmatiskej nion xuelis tikmatiskej akinon yejua. ¡Yejon se ueyi tlakajkayaualistli! (Hech. 17:27). w19.06 4 párr. 11

Tla tokojtiliaj melak kuajli titemachtiskej, yejon techpaleuis melak kuajli matiktekichiuilikan toTajtsin (Prov. 1:5; 1 Tim. 4:13, 15). Melak tikpatiojkaitaj ika Jehová techkauilia iuan matitekitikan (1 Cor. 3:9). Ijkuak tikchiuaj tlen melak ueyi kijtosneki niman tiknemiliaj kenon tiktekichiuiliskej toTajtsin, yejon techyolpaktia (Filip. 1:10; Sal. 100:2). Akin tiktekichiuiliaj toTajtsin tikmatstokej ika yejua techpaleuis kuajli matikchiuakan totekiyo maski tla tikpiyaj se tlauejli noso tla itlaj techteltisneki (2 Cor. 4:1, 7; 6:4). Tla tiuelij miyekpa titenojnotsaj noso ka, melak techyolpaktis tla tiktekichiuiliaj toTajtsin ika nochi toyojlo (Gál. 6:4). Ijkuak kuajli tiktekichiuiliaj toTajtsin, tikteititiaj ika tiktlasojtlaj Jehová niman tlaltikpakchanejkej. ¿Kenon techpaleuiya yejuin? Biblia kijtoua: “Tla ijkin tikchiuas, timomakixtis niman no tikinmakixtis on yejuan mitskakiskej” (1 Tim. 4:16). w19.04 6 párr. 15; 7 párr. 17

Satanás niman xkuajkualtin espíritus kikuij naualyotl, yejuamej ijkon tekajkayauaj. Akin kichiuaj yejuin, kijtouaj ika kimatij noso kichiuaj tlen oksekimej xuelij kichiuaj. Sekimej kijtouaj ika uelij kitaj tlenon panos ika tlayekapan pampa tetlatejtemouiliaj. Oksekimej kijtouaj ika tlajtouaj imiuan akin yomijkej. Niman oksekimej kichiuaj brujería noso magia, niman ika yejon tenaualuiyaj. Ipan se estudio tlen onochiuj ipan 18 países de Latinoamérica niman Caribe, onoitak ika kanaj tlajkotipan okijtokej ika tlaneltokayaj ipan magia, brujería noso hechicería, niman miyekej kineltokayaj ika se uelis nonojnotsas imiuan xkuajkualtin espíritus. Okse estudio tlen onochiuj ipan 18 países de África, más de tlajkotipan akin okintlajtoltijkej okijtokej ika tlaneltokayaj ipan brujería. Maski san kanon tichantiskej, noneki totlajpiyaskej. w19.04 20, 21 párrs. 3, 4

ToTajtsin Jehová kitlauelita ijkuak nochiua tlen xkuajli (Sal. 5:4-6). San matikonnemilikan kenon melak kitlauelita ijkuak kinnajnauiltiaj kokonej. Yejon itlaj tlen melak xkuajli niman tsokuiltik. Tejuamej akin tiktekichiuiliaj Jehová noijki tiktlauelitaj ijkuak yakaj kinnajnauiltia kokonej niman xtikxikouaj ika ijkon manochiua ipan tlanechikojli (Rom. 12:9). Akin kinajnauiltia se konetl xkitlakamatstika “itlanauatil Cristo” (Gál. 6:2). Itlanauatil Cristo noyekana ika tlasojtlalistli niman kiteititia melajkayotl. Kema, yejon tlen okiteititi Jesús ika tlen okijto niman ika tlen okichiuj. Tejuamej akin yemelak tikchiuaj ken Cristo tiktlakamatij yejuin tlanauatijli, ika yejon, tikinpaleuiyaj kokonej kuajli manomachilikan niman makimatikan ika melak tikintlasojtlaj. San ika, akin kinnajnauiltiaj kokonej kiteititiaj ika melak xkuajli inyojlo niman san intech tlanemiliaj. Yejuamej kichiuaj ika kokonej maka manemikan ika inyojlo niman makinemilikan ika xakaj kintlasojtla. Teajman ika akin kitekichiuiliaj Jehová noijki yokimijtlako yejuin. ¿Tleka ijkon panoua? Pampa ipan yejuin tonaltin melak miyekej “on yejuan xkuajkualtin tlakamej niman tlakajkayajkej”, niman sekimej kanaj kinekiskej kalakiskej ipan tlanechikojli (2 Tim. 3:13). Niman xsan yejon, sekimej ipan tlanechikojli yopeuj ijtlakaui intlamachilis niman yotenajnauiltijkej. w19.05 8 párrs. 1-3

Akin melak najmana kanaj kinemilia ika xkinamiki kinotsas Jehová. Tla tiknekij tikpaleuiskej, iuan matikchiuakan teoyotl niman matijkuikan itoka. Matikijlikan Jehová ika tejuamej niman noijki tlanechikojli melak tiktlasojtlaj yejon tokniuj. Niman matiktlajtlanilikan Jehová makipaleui maka melak matlajyoui tokniuj akin melak tlasojti. Tla ijkon tikchiuaj teoyotl, uelis melak titeyolseuiskej. Matiknemilikan kachtopa tlenon tikijtoskej. Tla xtiknemiliaj tlen tikijtouaj, uelis titeyolkokoskej, san ika, tla tikijtouaj tlen kuajli, uelis titeyolseuiskej (Prov. 12:18). Kuakon, matiktlajtlanilikan Jehová matechpaleui matikijtokan tlen mateyolseui niman tlen makichiua kuajli manomachili akin noyolkokoua. Matikilnamikikan ika tlajtoltin tlen melak teyolseuiyaj tikinnextiaj ipan Biblia, pampa ualeuaj itech Jehová (Heb. 4:12). Ijkuak tikinyolseuiyaj oksekimej, tikimilnamiktiaj ika toTajtsin kintlasojtla. Niman maka keman matikilkauakan ika toTajtsin noijki kichiua tlen melajki. Yejua kita ijkuak yakaj kinajnauiltiaj. ToTajtsin nochi kita, niman yejua kintlajtlakolmakas akin tenajnauiltiaj niman xnoyolkuepaj (Núm. 14:18). w19.05 18 párr. 18; 19 párrs. 19, 21

Satanás kineki matijkauakan Jehová. Ika yejon, kiyejyekoua kijtlakos ken titlanemiliaj, kineki matitlanemilikan ijkon ken yejua kineki. Kikui tlen tikileuiyaj niman ijkon techkajkayauas niman kichiuas matikchiuakan tlen yejua kineki (Col. 2:4). ¿Yemelak ika Satanás uelis techkajkayauas? Kema. Matikilnamikikan ika Pablo xokimijkuilouili Colosenses 2:8 akin xkichiuayaj ken Cristo, yejua okimijkuilouili tokniuan akin tlapejpeniltin katkaj (Col. 1:2, 5). Satanás ueliskia kinkajkayauas yejuin tokniuan, niman tejuamej noijki uelis techkajkayauas ipan yejuin tonajli (1 Cor. 10:12). ¿Tleka? Pampa Satanás okuajtlakalkej ipan tlaltikpaktli niman kineki kinkajkayauas nochimej itekipanojkauan toTajtsin (Apoc. 12:9, 12, 17). Noijki, tinemij ipan tonaltin ijkuak más ijtlakaujtiuj inyojlo “xkuajkualtin tlakamej niman tlakajkayajkej tlakamej” (2 Tim. 3:1, 13). w19.06 2 párrs. 1, 2

Ijkuak Jezabel okijto ika kimiktis Elías, Elías melak onomojti. Kuakon ocholoj niman oyaj Beer-seba. Melak yonajmanka, hasta okitlajtlanili Jehová makikixtili inemilis. ¿Tleka ijkon onomachili? Pampa yejua “sano ijki tlakatl katka ken tejuamej” niman noijki tlajtlakole katka (Sant. 5:17). Kanaj tlen kixnamiktoya melak yokisiauitijka niman yokimojkamiktijka. Niman kanaj kinemiliaya ika nochi tlen okichiujka niman ijkon manoueyichiua Jehová san nenka katka, kinemiliaya ika nion se israelita xnoyolkuepaya niman ika san yejua kitekichiuilijtoya Jehová (1 Rey. 18:3, 4, 13; 19:10, 14). San ika, Jehová kasikamatiya niman xokajuak ijkuak okijli kenon nomachiliaya. ToTajtsin okipaleui Elías oksejpa makipiya kojtilistli (1 Rey. 19:5-7). Sakin, okititi ikojtilis niman ika yejon okimelajkatlali ika tlasojtlalistli. Noijki okijli ika ok nemiyaj 7,000 israelitas akin xkiueyichiuayaj Baal (1 Rey. 19:11-18). Jehová ijkon okititi Elías ika melak kitlasojtlaya. w19.06 15, 16 párrs. 5, 6

Matikchiuakan tlen techijliskej. Tla tikchiuaj tlen techijliaj tokniuan akin yokintekitlalijkej, xtikixnamikiskej tlauejli. Matitlanemilikan itech yejuin. Ipan se país kampa xkitekauiliaj manoueyichiua Jehová, okimijlikej tokniuan maka makintemakakan amatlajkuiloltin ijkuak ontenojnotsaskiaj. San ika, se precursor okinemili ika yejua más tlamachilise katka niman xotetlakamat. ¿Tlenon opanok? Se tonajli ijkuak tenojnotstinemiyaj, policías okitlajtlajtoltijkej tokniuj niman noijki on oksekimej tokniuan. Nesi ika policías kinpijpixtinemiyaj niman kipiayaj nochi amatlajkuiloltin tlen tokniuan yokintemakakaj. ¿Tlenon techmachtia yejuin? Ika noneki tikchiuaskej tlen techijliaj maski tiknemiliskej ika tejuamej más titlamachilisejkej. Jehová nochipa techteochiuas tla tikinpaleuiyaj tokniuan akin yokintekitlali niman ijkon matechyekanakan (Heb. 13:7, 17). w19.07 12 párr. 17

Ijkuak sa achijtsin poliuiya ika mikiskia, toTeko Jesús okijto ika tlaltikpakchanejkej kintlauelitaskiaj akin kinekiskiaj nochiuaskej inomachtijkauan (Juan 17:14). Ika yejon, akin xkitekichiuiliaj Jehová melak yokintlaueltokakej itekipanojkauan toTajtsin. Niman tikmatstokej ika itlamiyan tonaltin techtlaueltokaskej xsan ijkon ken aman (Mat. 24:9). ¿Tlenon uelis tikchiujtoskej tlen techpaleuis ijkuak techtlaueltokaskej? Xkipiya ika tiknemiliskej nochi tlen ueliskia topan nochiuas, pampa tla ijkon tikchiuaj, uelis timojkamikiskej niman xok tiknekiskej tiktekichiuiliskej Jehová maski kanaj nion xitlaj tikixnamikij (Prov. 12:25; 17:22). Totlauelikniuj “on Diablo” kineki matomojtikan, niman yejon tlen ika techtlajkalisneki (1 Ped. 5:8, 9). Ika yejon, melak noneki kuajli matouikakan iuan Jehová niman noneki tikchiuaskej desde aman. w19.07 2 párrs. 1-3

Sakin ika oyoliuj, Jesús okimijli inomachtijkauan manosentlalikan ipan se tepetl tlen onkatka Galilea niman ijkon ompa kimitaskia. Xkonnemili kenon yolpakiyaj ijkuak nochimej ompa yonosentlalijkaj (Mat. 28:16). Kanaj ijkuakon Jesús “okinnotitij más de makuijli ciento tokniuan” (1 Cor. 15:6). ¿Tleka Jesús okimijli inomachtijkauan ompa manosentlalikan? Pampa kinekiya kinmakas se kualtsin tekitl, yejua okimijli: “Xuiyan niman xkinmachtikan tlaltikpakchanejkej ipan nochi kalpamej” (Mat. 28:18-20, TNM). Inomachtijkauan Jesús akin okikakej yejuin onenkej ipan ikalpan toTajtsin ipan kachtopa siglo. Yejuamej nonekiya kinmachtiskej tlaltikpakchanejkej niman kichiuaskej manochiuakan inomachtijkauan Cristo. Ipan yejuin tonajli, melak timiyekej akin tinemij ipan ikalpan toTajtsin niman ok tikchiujtokej yejon tekitl. w19.07 14 párrs. 1, 2

Se tlayekanketl ipan circuito akin ualeua Noruega kijtoua ika sekimej akin xkinekij tlajtoskej itech toTajtsin kema kinektokej tlajtoskej itech tlen panotika ipan tlaltikpaktli. Tokniuj kachtopa tetlajpaloua niman sakin tetlajtoltia: “¿Tiknemilia más kuajli tinemiskej ika tlayekapan? ¿Akinon tiknemilia uelis tlayektlalis? ¿Tiknemilia ika políticos, científicos noso yakaj okse?”. Niman sakin ika kuajli kikaki ken tlanankiliaj, tokniuj kipoua se tlaxelojli itech Biblia kampa nesi ika kuajli tinemiskej ika tlayekapan. Sekimej kinmojkatlachialtia ika Biblia kijtoua ika tlaltikpaktli xkeman popoliuis niman ika akin kichiuaj tlen kuajli nochipa ipan chantiskej (Sal. 37:29). Melak kuajli tla xsan itech se tlemach titlajtouaj imiuan nochimej. ¿Tleka? Pampa kanaj yakaj melak kuelitas tlajtos itech itlaj, san ika, kanaj okse xkuelitas yejon. Sekimej kinektokej tlajtoskej itech toTajtsin noso itech Biblia, san ika, oksekimej kanaj más kinekiskej techkakiskej tla tipeuaj titlajtouaj itech okseki tlemach. Maski san kenon, noneki tikinnojnotsaskej nochimej tlaltikpakchanejkej (Rom. 1:14-16). Jehová yejua akin kichiua ika akin kitlasojtlaj tlen melajki makinekikan kitlakamatiskej (1 Cor. 3:6, 7). w19.07 22, 23 párrs. 10, 11

Tla tikitaj kenon Jehová melak techtlasojtla, noijki tiknekiskej tikintlasojtlaskej tokniuan (1 Juan 4:20, 21). Kanaj tiknemiliaj ika xouijtika tikchiuaskej yejon. Niman kanaj ijkon tiknemiliaj pampa tiktekichiuiliaj Jehová niman tokojtiliaj tikchiuaskej ken yejua niman ken Cristo, akin melak otechtlasojtlak niman hasta okitemakak inemilis topampa. Maski ijkon, kemantika kema ouijtika tikitaj tikintlasojtlaskej tokniuan. Tokniuan Evodia niman Síntique melak chikauak kitekichiuiliayaj Jehová niman san sekan otekitkaj iuan Pablo. Maski ijkon, yejuin tokniuan kanaj onokualanijkej niman xok onouikakej. Pablo okinteneuj ipan icarta niman okinchikajkanots. Okimijli ika nonekiya kipiyaskej “san se inyojlo ken iknijtin” (Filip. 4:2, 3). Pablo noijki okitak ika nonekiya kijlis tlanechikojli yejuin tlajtoltin: “Nochi tlen nenkichiuaskej, xchiuakan, pero maka tlamach xkijtokan nion maka xmokamauijsokikan” (Filip. 2:14). w19.08 9 párrs. 6, 7

Miyekej tokniuan, kichiuaj nochi tlen uelij niman ijkon akin chikauak kitekichiuiliaj Jehová matlapaleuijtokan kampa nemij. Sekimej kinyolchikauaj ompa manokauakan, kinmakaj tomin noso okseki tlen kinpoloua, noso kintlajpiliaj inchanejkauan. Nochi yejuin tlen kichiuaj melak ueyi kijtosneki. ¿Tlenon uelis tikchiuaskej tla ipan totlanechikol yejko se tokniuj akin chikauak kitekichiuilia Jehová? Maka matiknemilikan ika ompa oajsik pampa xkuajli okichiuj itekiyo noso pampa okichiuj itlaj tlen xkuajli. Melak kuajli tla tikpaleuiyaj manomati kampa tinemij. Kuajli matikselikan niman matikijlikan ika melak kuajli nochi tlen yokichiuj, maski aman xmiyek ueli kichiua pampa kualo. Matokojtilikan kuajli tikixmatiskej. Matokauilikan matechmachti nochi tlen kimati. Kachtopa, kanaj nonekis ika tokniuj makipaleuikan makinexti kanon chantis, kanon konajsis carro, kanon tekitis noso okseki tlen noneki. w19.08 23 párrs. 12, 13

Gog tlaneltokas itech isoldados (2 Crón. 32:8). San ika, tejuamej titlaneltokaskej itech toTajtsin Jehová. Kanaj uejueyimej kalpamej kinemiliskej ika xtitlamachilisejkej pampa ijkon tikchiuaj. Pampa, maski Ueyixtika Babilonia kojtik katka, intajtsitsinuan xokimakixtijkej itech “on xkuajli yolki” nion itech “on majtlaktli kuakuautli” (Apoc. 17:16). Kuakon, Gog kinemilis ika nimantsin uelis tetlanis. Ken moxtli kitlapachoua se país, Gog ijkon kixnamikis ikalpan Jehová. San ika, nimantsin kasikamatis ika xok uelis makisas. Ijkon ken ipan onochiuj faraón ipan mar Rojo, Gog kasikamatis ika kixnamiktok Jehová (Éx. 14:1-4; Ezeq. 38:3, 4, 18, 21-23). Cristo niman iiluikaktekitkauan kinmanauiskej itekipanojkauan toTajtsin niman kipopoloskej Gog niman nochimej akin iuan nemij (Apoc. 19:11, 14, 15). ¿Niman tlenon ipan nochiuas Satanás akin itlauelikniuj Jehová, pampa yejua akin okinkajkayauj niman okinuikak uejueyimej kalpamej kampa Armagedón? Jesús kontlajkalis Satanás imiuan idemonios kampa tlauejkatlan, niman ompa tsauktoskej mil xiuitl (Apoc. 20:1-3). w19.09 12 párrs. 14, 15

Tinochimej tiknekij ika toTajtsin makichijtiuetsi tlen yokijto kichiuas. San ika, ijkuak tikitaj ika xnimantsin nochiua tlen tikchiaj, uelis kichiuas maka sa matiyolpakikan. Kanaj hasta tajmanaskej (Prov. 13:12). Yejuin tlen inpan onochiuj sekimej tokniuan ipan 1914. Miyekej tokniuan tlapejpeniltin kichiayaj yaskej iluikak ipan yejon xiuitl. Pampa yejon xopanok, ¿tlenon okichiujkej yejuin tokniuan akin yolmelajkej? Xokikajkaujkej ika kitekichiuiliaj Jehová. Yejuamej kinekiyaj kitekichiuilijtoskej toTajtsin niman xsan tlanemilijtoyaj itech tlen toTajtsin kinmakaskia. Yejuamej kinekiyaj notlalojtoskej niman tlaxikoskej. Yemelak, tiknekij ika Jehová makiteititi ika san yejua ueli tlayekana niman makichiua tlen yokijto. Uelis kuajli tikmatstoskej ika yejuin nochiuas ipan tonajli tlen toTajtsin yokitlapejpeni. Kuakon, chikauak matiktekichiuilijtokan toTajtsin, maka matajmanakan tla xnimantsin nochiua tlen tikchiaj, nochipa matotlalojtokan. w19.08 4, 5 párrs. 9, 10

Matotlajtoltikan: “¿Nechixmatij ika xnimantsin nikualani niman ika niyolyemanki? ¿Niknektika nikchiuas se tekitl tlen xueyi kijtosneki niman ijkon nikinpaleuis oksekimej? ¿Kuajli nitenotsa?”. Jesús melak kiyolpaktiaya kinmachtis inomachtijkauan. Kichiuaya ika nochimej mayolseujtokan niman kuajli manomachilikan (Luc. 10:1, 19-21). Kinyolchikauaya makitlajtlajtoltikan niman kuajli kikakiya tlen kinemiliayaj (Mat. 16:13-16). Matontlanemilikan itech yejuin, ijkuak yakaj tlatoka ijtik se invernadero, yejon tlen kitoka kualtsin noskaltia niman tlaki. Noijki ijkon, ken Jesús okinmachti inomachtijkauan okichiuj ika yejuamej melak kuajli matekitikan. Matotlajtoltikan: “¿Kenijki nitlayekana nochan noso kampa nitekiti? ¿Niyolseujki? ¿Niknektika manechtlajtlajtoltikan? Niman ¿nikneki nijkakis tlenon kinemiliaj oksekimej?”. Maka matikchiuakan ken fariseos, yejuamej kintlauelitayaj akin kintlajtlajtoltiayaj niman kintlaueltokayaj akin xtlanemiliayaj ken yejuamej (Mar. 3:1-6; Juan 9:29-34). w19.09 20 párr. 1; 23 párrs. 9-11

Sekimej tekiuajkej kemantika kiteneuaj yejuin ijkuak kijtouaj kenon países ueliskej más kuajli nouikaskej. San ika, yejon tlajtoltin tlen kijtoua Biblia niman tlen kijtoskej tekiuajkej melak tlamantik yes. ¿Tleka? Ijkuak tekiuajkej kijtoskej yejon tlajtoltin, miyekej kineltokaskej ika tekiuajkej yemelak yokichiujkej maonia yolseuilistli ipan tlaltikpaktli. San ika, “nimantsin uajlas tlaxoxotonilistli” pampa peuas ueyi tlajyouilistli (Mat. 24:21). Xtikmatij tlenon kichiuas ika tekiuajkej makijtokan yejuin tlajtoltin niman xtikmatij kenon kichiuaskej. Noijki xtikmatij tla tekiuajkej san sejpa kijtoskej yejuin tlajtoltin noso tla miyekpa kijtoskej. Maski san kenon, onka itlaj tlen kema tikmatstokej: ika xtokauiliskej matechkajkayauakan niman ika xtikneltokaskej tla tekiuajkej kichiuaskej maonia yolseuilistli ipan nochi tlaltikpaktli. Yejon techititis ika ipeuas “itonal Jehová” (1 Tes. 5:2). w19.10 8, 9 párrs. 3, 4

Guerra tlen itoka Armagedón kichiuas mapopoliui tlen kiyekana Satanás. San ika, tejuamej xkipiya ika tikmakasiskej yejuin guerra. ¿Tleka? Pampa yejuin iguerra toTajtsin (Prov. 1:33; Ezeq. 38:18-20; Zac. 14:3). Ijkuak Jehová kijtos, Jesucristo kiyekanas yejuin guerra. Tlapejpeniltin akin kinyolitiskej niman miyekej iluikaktekitkej tlauijsokiskej iuan Jesucristo. San sekan kixnamikiskej Satanás, idemonios niman akin imiuan nokalaktiskej (Apoc. 6:2; 17:14). Jehová yotechmelajkaijli: “Xakaj kichijchiua on arma yejuan uelis mitsmiktis” (Is. 54:17). Miyekej itekipanojkauan Jehová makisaskej itech “on temojtij tlajyouilistli”. Yejuamej ok kiueyichiujtoskej toTajtsin (Apoc. 7:9, 13-17). ¿Xmelak ika Jehová kuajli techititia ika techmakixtis? Tikmatstokej ika Jehová kintlajpiya “yejuan xkaman kitlalkauiyaj” (Sal. 31:23). Tinochimej akin tiktlasojtlaj Jehová niman tikueyichiuaj melak tiyolpakiskej ijkuak kichipauas itoka (Ezeq. 38:23). w19.10 18, 19 párrs. 17, 18

Pampa tinemij ipan sa ika tlami itlamiyan tonaltin, kanaj tikixnamikij tlen melak ouijtika (2 Tim. 3:1). Matikitakan tlen onochiuj ipan se país tlen onka África. Sakin ijkuak yokitlapejpenijkaj tekiuaj, miyekej opeujkej teixnamikij niman teuisokij. Ipantsin chikuasen metstli, tokniuan akin ompa nemiyaj melak xkuajli tlen inpan nochiujtoya. ¿Tlenon okinpaleui? Sekimej onopaleuitoj inchan oksekimej tokniuan akin chantiyaj kampa xmás onkatka tlauejli. Se tokniuj okijto: “Ipan yejon tonajli, onipak ika nikinpiaya amigos. Toyolchikauayaj se iuan okse”. Ipan “on temojtij tlajyouilistli” noso ueyi tlajyouilistli, melak tipakiskej ika tikinpiyaj amigos akin techtlasojtlaj (Apoc. 7:14). Ika yejon, noneki ika aman melak kuajli matouikakan imiuan tokniuan (1 Ped. 4:7, 8). ¿Tleka? Pampa totlauelikniuan techtlajtolchijchiuiliskej niman kinekiskej techxeloskej, kiyejyekoskej maka sa matopaleuikan. San ika, xueliskej techxeloskej pampa melak totlasojtlaj. Xueliskej kichiuaskej ika ok maka matouikakan. w19.11 2 párrs. 1, 2; 7 párr. 19

Satanás, “imintataj on yejuan tlakajkayauaj”, kintekitiltia tlaltikpakchanejkej niman ijkon makijtokan tlen xmelauak itech Jehová niman intech tokniuan (Juan 8:44). Miyekej akin techtlauelitaj techtlajtolchijchiuiliaj niman kijtouaj tlen xmelauak itech ikalpan Jehová, ijkon kichiuaj ipan Internet, ipan televisión niman miyekan. Yejon tlakajkayaualistin ualeuaj itech Satanás. ¿Tlenon tikchiuaskej tla yakaj peua techijlia yejon tlakajkayaualistin? Nion xtiknekiskej tikinkakiskej. ¿Tleka? Pampa titlaneltokaj itech Jehová niman intech tokniuan. Kema, noijki xtonojnotsaj imiuan yejon akin techtlajtolchijchiuiliaj, maski san tiknekiskiaj tikmatiskej tlenon kijtouaj totech. Xtijkauiliaj ika itlaj noso yakaj makichiua imiuan matokualanikan nion makijtlako ken touikaj iuan Jehová noso totlaneltok. ¿Xtikinkakij noso xtonojnotsaj imiuan akin kijtouaj tlen xmelauak itech ikalpan Jehová? Melak kuajli tla ijkon tikchiuaj. San ika, noneki titlatlachixtoskej pampa Satanás uelis techmojmotlas ika okseki “flechas yejuan tlikuitiu”. w19.11 15 párr. 8; 16 párr. 11

Ijkuak itlaj tiktlapejpeniskej tikchiuaskej, matikasikamatikan tleka tiknekij tikchiuaskej yejon. Jehová kita tlenon tikpiyaj ipan toyojlo, yejua ika, noijki kita tleka tiknekij itlaj tikchiuaskej. Noneki toixtlaloskej niman ijkon tikasikamatiskej tlenon tikpiyaj ipan toyojlo. ¿Tleka? Pampa tla xijkon tikchiuaj, ouijtika tikitaskej titlamiskej tlen otikpeualtijkej. Matiknemilikan yejuin, se telpochtli kitlapejpenia nochiuas precursor, san ika, sakin kita ika xueli kajxiltia ihoras niman xnemi ika iyojlo ijkuak tenojnotsa. Kanaj kinemiliaya ika onochiujka precursor pampa kinekiya kiyolpaktis Jehová. San ika ¿xmelak ika kanaj okichiuj pampa kinekiya kinyolpaktis itajuan noso yakaj akin kitlakaita? Matitlanemilikan itech yejuin. Se akin nomachtijtika Biblia kijtoua ika xok pokis. Nokojtilia xpokis kanaj ome semana, san ika, oksejpa peua poki. Sakin, yejua kuajli kikajkaua ika poki pampa kitlasojtla Jehová niman pampa kineki kiyolpaktis (Col. 1:10; 3:23). w19.11 27 párr. 9; 29 párr. 10

Apóstol Pablo kuajli kimatstoya ika tetlaniskia kampa notlalojtoya niman ika kiteochiuaskiaj. Pampa tlapejpenijli katka, kichiaya yas iluikak. San ika, kimatstoya ika nonekiya tlaxikos tla kinekiya tetlanis niman kiselis yejon tlateochiualistli (Filip. 3:14). Pablo okimijli filipenses itlaj tlen kinpaleuiskia maka makilkauakan tlen kiseliskiaj. Pablo okimilnamikti filipenses ika yejuamej chanejkej katkaj ne iluikak (Filip. 3:20). ¿Tleka nonekiya nochipa makilnamiktokan yejuin? Ipan yejon tonaltin, melak ueyi kijtosnekiya tla se romano katka. San ika, tokniuan tlapejpeniltin yejuamej chanejkej katkaj ne iluikak niman yejon más kuajli katka. Melak kinpaleuiaya ika ompa chanejkej katkaj. Ipan yejuin tonajli, miyekej tokniuan tlapejpeniltin ijkon kichiuaj. Yejuamej nokojtilijtokej tlaxikoskej niman ijkon yaskej iluikak. w19.08 6 párrs. 14, 15

Yejon manauilistli noso makixtilistli tlen okijto Jesús melak ueyi kijtosneki xijkon ken tlen israelitas kipiayaj ipan Jubileo (Lev. 25:8-12). San matikonnemilikan yejuin, tla yakaj kimakixtiayaj ipan Jubileo, yejua sakin oksejpa ueliskia yes se tlakeuajli, niman ajsiskia tonajli ijkuak mikiskia. Ipan Pentecostés itech xiuitl 33, Jehová okintlapejpeni ika espíritu santo akin apóstoles katkaj niman oksekimej akin melajkanemiyaj. Okijto ika yejuamej yonochiujkaj ikoneuan, ijkon, yejuamej ueliskiaj yoliuiskej niman tlayekanaskej iuan Jesús ne iluikak (Rom. 8:2, 15-17). Yejuamej akin kachtopa okiselijkej yejon makixtilistli tlen okiteneuj Jesús ijkuak “okalak ipan on sinagoga” ne Nazaret (Luc. 4:16-19, 21). Tokniuan tlapejpeniltin xok kineltokayaj tlamachtiltin tlen xmelajkej, niman xok kichiuayaj costumbres tlen tlayekankej judíos ipan tlaneltokiltin san yokinejnemilijkaj. ToTajtsin noijki kimitaya ika yejuamej xok kipiayaj yejon tlajtlakojli tlen kichiua matimikikan. Jubileo tlen aman tikteneujtokej opeuj ijkuak okintlapejpenijkej inomachtijkauan Cristo ipan xiuitl 33, niman tlamis hasta ijkuak Jesús yotekiuajtik Mil Xiuitl. w19.12 11 párrs. 11, 12

Tajtin, xkinpaleuikan nemokoneuan kuajli makintlapejpenikan akinon imiuan nouikaskej. Tajtli niman nantli noneki kimatiskej imiuan akinon nosentlaliaj inkoneuan niman tlenon kichiuaj. Noijki noneki kimatiskej imiuan akinon nonojnotsaj ipan redes sociales niman ipan teléfono. Kokonej peuaj kichiuaj niman tlanemiliaj ijkon ken iminamigos. Miyekej tajtin kichiuaj nochi tlen uelij niman ijkon inkoneuan manosentlalikan imiuan tokniuan akin chikauak kitekichiuiliaj Jehová. Yejuin tlen okichiujkej tokniuan Dani niman Bella, akin ualeuaj Costa de Marfil. Nochipa ijkuak uajlaya tokniuj tlayekanketl ipan circuito, yejuamej kijliayaj manokaua inchan. Dani kijtoua: “Yejuin melak okipaleui tokoneuj. Onochiuj precursor niman kemantika noijki komintlajpaloua tlanechikoltin ipan circuito”. Melak kuajli tla niman nenpeuaj nenkinmachtiaj nemokoneuan (Prov. 22:6). Ijkon okichiuj inan Timoteo, akin itoka katka Eunice, niman iabuelita, Loida. Yejuamej opeuj kimachtiaj Timoteo itech Jehová desde ijkuak onemiko (2 Tim. 1:5; 3:15). w19.12 25 párr. 14; 26 párrs. 16, 17

Xsan noneki tikimijliskej tokniuan ika tikinpaleuiskej, noneki tikchiuaskej tlen tikimijliaj (Mat. 5:37; Luc. 16:10). Akin kinekij yakaj makinpaleui kuajli nomachiliaj ijkuak kitaj ika uelis tlaneltokaskej totech. Se tokniuj techijlia tleka ijkon nomachiliaj, yejua kijtoua: “Tinemis ika moyojlo pampa tikmatstos ika akin omitsijli mitspaleuis, melauak ijkon kichiuas ijkuak nonekis”. Akin kixnamikij tlen ouijtika noso najmanaj melak yolseuij ijkuak tlajtouaj iuan se iminamigo akin itech tlaneltokaj. Noneki titeijyouiskej tla tiknekij ika oksekimej totech matlaneltokakan. Matitlajtokan itech Zhanna. Yejua melak najmanaya pampa iueuentsin okikauj. ¿Tlenon okipaleui mayolseui? Yejua kimijliaya akin imiuan nouikaya tlen kajmanaya. Kijtoua: “Maski kemantika kanaj sa no yejua tlen nikijtouaya, yejuamej kuajli nechkakiyaj niman nechijyouiayaj”. Kuakon, tla kuajli tikinkakij akin techijliaj tlen kinyolkokoua, tikteititiskej ika kuajli imiuan touikaj. w20.01 10, 11 párrs. 9-11

Biblia kinteneua miyekej itekipanojkauan toTajtsin akin omelajkanenkej niman okinmakakej espíritu santo, san ika, yejuamej xokintlapejpenijkej yaskej iluikak. Se neskayotl, iespíritu santo toTajtsin okiyekan David (1 Sam. 16:13). Ipampa espíritu santo, David ouel okixmat Jehová niman ouel okijkuilo seki tlen onka ipan Biblia (Mar. 12:36). Maski ijkon, apóstol Pedro okijto ika David “xotlejkok iluikak” (Hech. 2:34). Aman matitlajtokan itech Juan Teapolaktijketl, yejua noijki okimakakej espíritu santo (Luc. 1:13-16). Jesús hasta okijtoka ika Juan Teapolaktijketl melak ueyixtoya xijkon ken yakaj okse. Maski ijkon, okijto ika Juan xtekiuajtiskia ne iluikak (Mat. 11:10, 11). Jehová okitekitilti iespíritu santo niman ijkon kinpaleuis itekipanojkauan makichiuakan miyek tlemach tlen temojkatlachialti, san ika, xokitekitilti iespíritu niman ijkon ika kintlapejpenis mauiyan iluikak. ¿Kijtosneki yejuin ika yejuamej xoyolmelajkanenkej? Ka, yejuin san kijtosneki ika Jehová kinyolitis ijkuak tlaltikpaktli yes se xochitlalpan (Juan 5:28, 29; Hech. 24:15). w20.01 23 párr. 15

Jehová kineki matochiuakan ichanejkauan. Yejua kimita ken ichanejkauan nochimej akin itech yonosentemakakej niman akin kuajli kineltokaj ika iKoneuj okitemakak inemilis topampa. Akin tiichanejkauan Jehová melak tiyolpakij. ¿Tleka ijkon tikijtouaj? Pampa aman itikmatstokej tlenon tikchiuaskej ipan tonemilis, niman techyolpaktia tikmatiskej ika ajsis tonajli ijkuak tikseliskej se nemilistli tlen xkeman tlamis, sekimej kiseliskej yejon nemilistli ne iluikak niman sekimej nikan ipan tlaltikpaktli. Pampa Jehová melak techtlasojtla, okichiuj itlaj niman ijkon uelis techitas ken ichanejkauan (Juan 3:16). Biblia techijlia ika Jehová “sanoyej patioj” otechkouj (1 Cor. 6:20). Ipampa yejon tlaxtlauijli, uelis kuajli touikaskej iuan Jehová. Uelis tikitaskej Jehová, akin melak ueyixtika, ken toTaj. Niman xnemi okse Tajtli ken yejua. Kanaj noijki totlajtoltiaj ijkon ken se itekipanojkauj toTajtsin akin okijkuilo Biblia, yejua onotlajtoltijka: “¿Kenijki uelis niktlaxtlauilis toTEKO nochi on tlen kuajli yokichiu nopampa?” (Sal. 116:12). Tikmatstokej ika xkeman uelis tiktlaxtlauiliskej toTajtsin nochi tlen yokichiuj topampa. Maski ijkon, pampa yejua techtlasojtla, tejuamej noijki tiknekij tiktlasojtlaskej. w20.02 8 párrs. 1-3