Junio

Ana, inan teotlajtoketl Samuel, okijyoui miyek tlemach. Yejua xueliya kinpiaya ikoneuan (1 Sam. 1:2). Miyekej israelitas kinemiliayaj ika tla se siuatl xueliya kinpiaya ikoneuan, kijtosnekiya ika toTajtsin xkiteochiujtoya. Yejua ika, Ana melak xkuajli nomachiliaya (Gén. 30:1, 2). Niman xsan yejon okixnamik. Iueuentsin kipiaya okse isiuauj, itoka katka Peniná, akin kema ueliya kinpiaya ikoneuan. Niman Peniná nochipa kipijpinaujtiaya Ana. Ika yejon, Ana melak xkuajli nomachiliaya, yejua “sanoyej chokaya niman hasta xtlakuaya”. Ana yemelak noyolajmanaya (1 Sam. 1:7, 10). ¿Tlenon okiyolseui? Ana okichiuili teoyotl Jehová niman okijli nochi tlen kiyolkokouaya. Sakin ika okichiuj teoyotl, okijli ueyi teopixki Elí tlen ipan nochiujtoya. Elí okijli: “Xuiya ikan yolseuilistli, niman iDios Israel ma mitsmaka on tlen tiktlajtlanilia”. ¿Tlenon opanok sakin? Biblia kijtoua: “Ana onokuep kampa oualeu, niman otlakuaj. Niman xokaman onajman” (1 Sam. 1:17, 18). Teoyotl okipaleui Ana oksejpa manemi ika iyojlo. w20.02 21 párrs. 4, 5

Sa achijtsin poliui ika Jehová kipopolos yejuin tlaltikpaktli kampa tlayekana Satanás. San makisaskej akin melauak kinekiskej kipiyaskej nemilistli tlen xkeman tlamis (Hech. 13:48, TNM). Kuakon, xtemojkatlachialti ika tiknekij tikinnojnotsaskej tochanejkauan niman ijkon makitekichiuilikan Jehová. ToTajtsin iluikakchane “nion se tlakatl xkineki ma poliui, yej kineki para nochimej ma noyolpatlakan” (2 Ped. 3:9). Noneki tikilnamikiskej ika uelis titenojnotsaskej ken kinamiki noso ken xkinamiki. Kanaj yakaj akin xtikixmatij tiknojnotsaj ika tetlakaitalistli, san ika, kanaj akin tochanejkauan chikauak tikinnojnotsaj. ¿Tikilnamikij ijkuak kachtopa otikinnojnotskej tochanejkauan? Timiyekej kanaj tajmanaj ijkuak tikilnamikij kenon otikinnojnotskej niman tiknemiliaj ika ueliskia más kuajli tikinnojnotsaskiaj. Melak techpaleuis tla xtikilkauaj tlen apóstol Pablo okijto ipan tlaxelojli tlen aman tikitstokej ijkuak tikinnojnotsaskej tochanejkauan. Tla xijkon tikchiuaj, tochanejkauan kanaj xkinekiskej matikinnojnotsakan itech toTajtsin. w19.08 14, 15 párrs. 3-5

¿Kenon otimomachili ijkuak otikasikamat miyek tlemach itech Jesús? Jesús yejua ika ome akin más ueyixtika ne iluikak niman ipan tlaltikpaktli. Yejua okinek kitemakas inemilis topampa. Ijkuak yemelak tikteititiaj ika tikneltokaj ika yejua otechmakixti, toTajtsin uelis techtlapopoluis niman uelis iuan touikaskej, noijki uelis tikpiyaskej “nemilistli para nochipa” (Juan 3:16). Jesús noijki toUeyi Teopixkauj. Kineki matechpaleui tlen okichiuj topampa, niman noijki kineki techpaleuis kuajli matouikakan iuan toTajtsin (Heb. 4:15; 7:24, 25). Yejua Tekiuaj itech iTekiuajyo toTajtsin, yejua ika, Jehová kitekitiltis niman ijkon kichipauas itoka, kipopolos nochi tlen xkuajli niman nochipa techteochiuas ipan se xochitlalpan tlen onias ika tlayekapan (Mat. 6:9, 10; Apoc. 11:15). Jesús noijki melak kuajli otechititi kenon tiktekichiuiliskej Jehová. Yejua nochipa okichiuj tlen toTajtsin kinekiya, niman tejuamej noijki noneki ijkon tikchiuaskej (Juan 4:34). Ijkuak tikneltokas tlen Biblia temachtia itech Jesús, iKoneuj Jehová, melak tiktlasojtlas. Yejon tlasojtlalistli mitsyolmapeuas xmaktili monemilis toTajtsin, ijkon ken Jesús okichiuj. w20.03 10 párrs. 12, 13

Ipan tonajli ijkuak imikiskia, Jesús miyekpa okichiuj teoyotl. Ijkuak okinmachti inomachtijkauan kenon kilnamikiskej imikilis, okichiuj se teoyotl ijkuak okinpanoltili pan niman noijki ijkuak okinpanoltili vino (1 Cor. 11:23-25). Noijki, ijkuak otlankej kilnamikij Pascua, okichiuj se teoyotl (Juan 17:1-26). Ijkuak oajsikej monte de los Olivos, Jesús miyekpa okichiuj teoyotl (Mat. 26:36-39, 42, 44). Niman ijkuak imikiskia, okinots iTaj (Luc. 23:46). Ken tikitaj, Jesús nochipa kinotsaya Jehová niman ijkon kijlis tlen ipan nochiujtoya ipan yejon tonajli. Jesús otlaxiko pampa nochipa okitlajtlanili iTaj makipaleui. San ika, iapóstoles xijkon okichiujkej, ika yejon, xyolchikaujtoyaj ijkuak nonekiya (Mat. 26:40, 41, 43, 45, 56). ¿Tlenon techmachtia yejon? Ika san uelis timelajkanemiskej tla nochipa tikchiuaj teoyotl, ken Jesús. w19.04 9 párrs. 4, 5

Jehová kitlauelita naualyotl. Yejua okimijli israelitas: “Maka kaman yakaj kiuentlalis ipan tlitl sen ikoneu, nion maka kejekos para tetlatejtemouilis, nion maka kinekis kiteijlis on tlen nochiuas sakin, nion maka kejekos on nauajlotl. Maka yakaj kejekos xkuajli tlaixkajkayaualistli, nion maka kintejtemos on tetlatejtemouilijkej niman on yejuan kiminnotsaj ajakamej, nion maka tlajtos iminuan mikatsitsimej. Maka yakaj ijki kichiuas pampa toTEKO sanoyej kikualaniaj on yejuan kichiuaj nochi in tlajtlamach. Niman ijkuak nenkitaj nemoTEKO Dios kinkixtia on naciones, on pampa yejuamej kichiuaj nochi on tlajtlamach tlen sanoyej xkuajli” (Deut. 18:10-12). Akin tikchiuaj ken Cristo xok noneki tiktlakamatiskej Tlanauatijli tlen Jehová okinmakaka israelitas. San ika, tikmatstokej ika Jehová ok kitlauelita naualyotl. Jehová techijlia maka matikchiuakan naualyotl pampa kimatstika ika Satanás kikui yejon niman ijkon kimijtlakos oksekimej. Yejua ijkon tekajkayaua, ken ijkuak kijtoua ika akin yomijkej ok yoltokej (Ecl. 9:5). Noijki kikui naualyotl niman ijkon temojmojtis niman kichiuas ika miyekej maka manonisiuikan itech toTajtsin. Satanás kineki ika akin kichiuaj naualyotl matlaneltokakan intech xkuajkualtin espíritus niman maka itech Jehová. w19.04 21 párrs. 5, 6

Akin tenajnauiltia kichiua se ueyi tlajtlakojli. Akin tenajnauiltiaj kichiuaj ika kokonej melak matlajyouikan. Yejuamej kimatstokej ika kokonej intech tlaneltokaj, kuakon, kinchiuiliaj tlen xkuajli. Niman yejon kichiua ika kokonej maka sa ika inyojlo manemikan. Tejuamej noneki tikintlajpiyaskej kokonej niman ijkon maka yakaj makinnajnauilti. Niman noijki noneki tikinyolseuiskej niman tikinpaleuiskej akin yokinnajnauiltijkej (1 Tes. 5:14). Tla yakaj akin nemi ipan tlanechikojli tenajnauiltia, kipinaujtia tlanechikojli (Mat. 5:16; 1 Ped. 2:12). Xtikxikouaj ika touan manemi akin kichiua tlen xkuajli niman xnoyolkuepa, niman kipinaujtitika tlanechikojli. Tla yakaj ipan tlanechikojli xkichiujtika tlen kijtouaj tlanauatiltin, ken ijkuak kinajnauiltia se konetl, kuakon, xkintlakamatstika tekiuajkej (uelis tikitas Hechos 25:8). Maski xintekiyo tlayekankej kitaskej ika manochiua ken kijtouaj tlanauatiltin, yejuamej xkipaleuiyaj akin yotlajtlako. Kimatstokej ika aman kipiya ika kixnamikis tlen tekiuajkej kijliskej. w19.05 9 párrs. 4-7

Jehová yejua toUeyi Tlamachtijkauj. Ika yejon, uelis tikixnamikiskej maski san katlejua tlauejli pampa yejua techpaleuis (Is. 30:20, 21). ITlajtol toTajtsin techmachtia kenon uelis toyektlalijtiaskej niman ijkon tikchiuaskej nochi tlen kuajli (2 Tim. 3:17). Ijkuak tikchiuaj tlen kijtoua Biblia, tochiuaj más tlamachilisejkej xijkon ken akin noyekanaj ika “tlamatkilistli yejuan kisa ipan in tlaltikpaktli” (Sal. 119:97-100). Tlamachilistli tlen kisa ipan yejuin tlaltikpaktli kichiua matiknekikan matikchiuakan tlen kileuiya totlalnakayo. Kuakon, kanaj ouijtika tikitaj xtitlanemiliskej noso xtikchiuaskej ken akin xkitekichiuiliaj Jehová. Ika yejon, Biblia techijlia: “Xmotakan sano nemejuamej. Maka yakaj xkauilikan mechkajkayaua ika on xkuajli temachtilistli tlen xmelauak. On ken on tlajtlamach temachtilistli, san intemachtil niman incostumbre on tlaltikpaktlakamej” (Col. 2:8). Ijkon ken yokijtoka Biblia, ipan itlamiyan tonaltin miyekej sajnoye kinekiskiaj nopaktiskej (2 Tim. 3:4). Tikitaj ika melak miyek onka kokolistli pampa auilnemilo, ken sida, niman yejuin techititia ika tlamachilistli tlen kisa ipan tlaltikpaktli melak xkuajli (2 Ped. 2:19). w19.05 21 párrs. 1, 2; 22 párrs. 4, 5

Satanás okichiuj ika israelitas makineltokakan ika tla kinekiyaj kuajli chantiskej niman kuajli nemiskej, nonekiya kichiuaskej yejon costumbres tlen xkuelita toTajtsin. Akin xtlaneltokayaj itech Jehová okinemilijkej ika san ijkon ueliskia kiyauis, kuakon, okiueyichiujkej Baal. Satanás noijki ouel okinkajkayauj pampa okikuik tlen israelitas kileuiayaj. Kalpamej tlen xkitekichiuiliayaj toTajtsin melak auilnemiyaj. Ipan inteopanuan, tlakamej niman siuamej auilnemiyaj niman ijkon kitlaniyaj tomin. Yejon kalpamej xsan kitekauiliayaj ijkon manochiua, yejuamej kuajli kitayaj auilnemilistli niman ijkuak se tlakatl notekaya iuan okse tlakatl noso ijkuak se siuatl notekaya iuan okse siuatl (Deut. 23:17, 18; 1 Rey. 14:24). Kinemiliayaj ika nochi yejuin tepaleuiaya niman ijkon tajtsitsintin ueliskiaj kichiuaskiaj matlatlaki. Miyekej israelitas okinyoltilan yejuin auilnemilistli niman opeujkej kinueyichiuaj tajtsitsintin tlen xmelajkej. w19.06 2 párr. 3; 4 párrs. 7, 8

Miyekej betelitas niman oksekimej tokniuan oksekan yokintitlankej makitekichiuilikan Jehová. Kanaj yejuin tokniuan akin melajkanemij kimachiliaj ouijtika kikauaskej kampa tlapaleuijtoyaj pampa melak kuelitayaj tlen ompa kichiuayaj. ¿Yejon tlen topan nochiujtika? ¿Tlenon uelis techpaleuis? Mojmostla matikpouakan Biblia niman itech matitlanemilikan, ijkon nisiuj tinemiskej itech Jehová. Noijki, matokojtilikan melak matitenojnotsakan iuan tlanechikojli kampa aman tinemij. Jehová xkimilkaua akin kuajli kitekichiuiliaj, maski xok miyek uelij kichiuaj ken yeuejkaui. Matinemikan san ika tlen noneki. Maka matijkauilikan ika tlen onka ipan tlaltikpaktli tlen kiyekana Satanás makichiua maka sa matiktekichiuilikan Jehová (Mat. 13:22). Maka matikinkakikan akin imiuan touikaj, tochanejkauan noso oksekimej tla techijliaj ika noneki más tiktlaniskej tomin niman ijkon tinemiskej ika toyojlo (1 Juan 2:15-17). Matitlaneltokakan itech Jehová, pampa yejua techijlia ika techpaleuis “ijkuak itlaj techpolos”. Kema, techpaleuis machikaui totlaneltokil, matinemikan ika toyojlo niman matikpiyakan tlen techpoloua (Heb. 4:16; 13:5, 6). w19.08 20 párr. 4; 21, 22 párrs. 7, 8

¿Topan nochiujtok itlaj tlen kichiua matajmanakan? Techyolseuiya tikmatiskej ika Jehová kasikamati tlen tikixnamiktokej. Kimati tlenon xueli tikchiuaj niman hasta kimati tlenon tiknemiliaj niman tlenon tikmachiliaj (Sal. 103:14; 139:3, 4). Tla tiknotsaj Jehová, yejua techpaleuis matikixnamikikan tlen techajmana. Ijkuak tajmanaj, uelis kichiuas matiknemilikan tlen xtepaleui niman techkuilis toyolchikaualis. Tla ijkon topan nochiua, matikilnamikikan ika Jehová techpaleuis. ¿Kenijki techpaleuis? Yejua techijlia matikijlikan tlen techajmana niman techijlia ika kinankilis toteoyouan (Sal. 5:3; 1 Ped. 5:7). Kuakon, miyekpa matikijlikan tlenon techajmana. Maski xtechnotsas ijkon ken okichiuj iuan Elías, kema technotsas itechkopa iTlajtol niman ikalpan. Tlen ijkuiliujtika ipan Biblia techyolseuis niman techmakas se tlamachialistli. Niman tokniuan noijki techyolchikauaskej (Rom. 15:4; Heb. 10:24, 25). w19.06 16 párrs. 7, 8

Ijkuak techtlaueltokaskej, matiknotsakan toTajtsin akin techtlasojtla, matikijlikan tlen onka ipan toyojlo, matikijlikan nochi tlen techajmana (Lam. 2:19). Tla miyekpa ijkon tikchiuiliaj teoyotl, melak nisiuj tinemiskej itech Jehová (Rom. 8:38, 39). Kuajli matikmatstokan ika nochiuas tlen toTajtsin yokijto itech iTekiuajyo (Núm. 23:19). Tla xkuajli titlaneltokaj itech tlen toTajtsin yokijto kichiuas, Satanás niman akin iuan nemij nimantsin ueliskej kichiuaskej matomojtikan (Prov. 24:10; Heb. 2:15). Matikxelokan tiempo niman ijkon matomachtikan itech tlen Jehová yokijto kichiuas itech iTekiuajyo niman matikitakan tleka uelis kuajli tikmatstoskej ika yejuin yemelak nochiuas. Yejuin melak noneki matikchiuakan. ¿Tleka? Matikitakan tlenon ipan onochiuj Stanley Jones, yejuin tokniuj ouejkauj chikome xiuitl tsauktoya ipampa itlaneltokil. Yejua okijto tlenon okipaleui mamelajkanemi: “Kuajli nikmatstoya tlen Jehová yokijtoka itech Tekiuajyotl, nion achijtsin xoniometlamat, niman yejon melak onechyolchikauj. Xouel onechtlankej”. Tla tejuamej noijki kuajli titlaneltokaj itech tlen toTajtsin yokijto kichiuas, xtomojtiskej (Prov. 3:25, 26). w19.07 2 párr. 1; 3 párrs. 6, 7

¿Tleka melak noneki matitemachtikan? Pampa san akin nochiuaj inomachtijkauan Cristo uelij nouikaj iuan toTajtsin. Noijki, akin kichiuaj ken Cristo ika inyojlo nemij, niman ika tlayekapan uelis kipiyaskej se nemilistli “yejuan para nochipa” (Juan 14:6; 17:3). Tikitaj ika Jesús yotechmakak se ueyi tekitl, san ika, xsan tejuamej tikchiuaj. Apóstol Pablo okijtoka ika yejua niman oksekimej tokniuan tekitiyaj iuan toTajtsin (1 Cor. 3:9). Kema, maski tejuamej titlajtlakolejkej, Jehová niman Jesús techmakatokej se tlateochiualistli pampa techmakaj yejuin tekitl. Niman melak teyolpakti ijkuak titepaleuiyaj ika oksekimej manochiuakan inomachtijkauan Jesús. Kachtopa noneki tikintejtemoskej akin kinekij kixmatiskej Jehová. Tikteititiaj ika yemelak tiiteixpantijkauan Jehová tla tikinnojnotsaj nochimej akin tikinnextiaj. Niman tikteititiaj ika yemelak tikchiuaj ken Cristo ijkuak tiktlakamatij tlen yejua otechnauati. w19.07 15 párrs. 3-5

Miyekej kinyoltilana ika Biblia melak techpaleuiya ipan tonemilis. Se tokniuj akin chanti Nueva York, akin komintlajpaloua akin tlajtouaj chino mandarín, kijtoua: “Ninokojtilia nikinkakis niman nikimititis ika nikneki nikinpaleuis. Tla nikita ika yakaj san kemach nikan youajnochantiko, niktlajtoltia: ‘¿Itimomatstika nikan tichantis? ¿Yotiknexti tekitl? ¿Kuajli mitsnotsaj akin nikan chanejkej?’”. Kemantika, yejuin kichiua ika sekimej makinekikan makinnojnotsakan itech Biblia. Sakin ika yejuin tokniuj kita ika kuajli yes, kimijlia: “¿Tlenon tiknemilia noneki tikchiuaskej niman ijkon touikaskej imiuan nochimej? ¿Uelis nimitsititis tlen kijtoua Biblia? Nikan kijtoua: ‘Ijkuak yakaj kipeualtia tlauejli kentla kitlaposkia tlen kitsakuilijtika atl; achto ika peuas tlauejli, xuiya’. ¿Tiknemilia ika tlen nikan kijtoua uelis techpaleuis kuajli matouikakan imiuan oksekimej?” (Prov. 17:14, TNM). Tla ijkin titenojnotsaj, uelis tikitaskej akinomej oksejpa kinekiskej techkakiskej. w19.07 23 párr. 13

Tla se tokniuj oyejkok ipan totlanechikol, noneki matikasikamatikan yejon tokniuj. Kanaj yejua noso se ichanejkauj kualo. Noso kanaj tlajyouijtika pampa omik yakaj akin kitlasojtla. Niman maski xkijtoua, kanaj najmana pampa kintemoua iamigos. Ijkuak yakaj ijkon ipan nochiua, uejkaui ika ijkon nomachilia. Ijkuak ijkon panos, tlen tikchiuaskej niman ken titlapaleuiskej uelis kichiuas ika tokniuj akin kemach oajsik manomati. Se tokniuj siuatl akin ouejkauj miyek xiuitl ika otlapaleui ipan okse país kijtoua: “Kampa ninemiya, mojmostla nitemachtiaya itech Biblia. San ika, kampa onajsik ouijtika katka niktepouilis se tlaxelojli itech Biblia noso nikteititis se video ijkuak nitenojnotsaya. San ika, tokniuan itech yenkuik tlanechikojli kampa oniaj nechnotsayaj manikinuika kampa ontetlajpalouayaj niman kampa ontemachtiayaj. Melak nechyolchikauaya yejon. Onikmat kenon uelis nitenojnotsas. Nochi yejon onechpaleui oksejpa maniyolpaki”. w19.08 22 párr. 10; 23, 24 párrs. 13, 14

Ijkon ken Evodia niman Síntique, kanaj melak tikitaj kanon nopopolouaj tokniuan noso tlenon xkichiuaj. Yejon itlaj tlen uelis kichiuas ouijtika matikmatikan tikintlasojtlaskej tokniuan. Xakaj nemi akin maka keman manopopolo. Tla san tikitstokej kanon nopopolouaj tokniuan, xok sajnoye tikintlasojtlaskej. Matiknemilikan yejuin, se tokniuj kilkaua techpaleuis ijkuak titlachipauaj ipan Kajli kampa Tosentlaliaj, kuakon tikualanij. ¿Tlenon panos tla peua tiknemiliaj nochi tlen tokniuj xkichiua? Kanaj más titlauelmikiskej niman xok tiknekiskej tiktlasojtlaskej. ¿Tikixnamiktokej itlaj ken yejuin? Matikilnamikikan ika Jehová xsan kita kanon nopopoloua tokniuj, yejua noijki kita kanon tejuamej topopolouaj. Niman maski kita yejon, Jehová ok techtlasojtla. Yejua ika, noneki titetlasojtlaskej ken Jehová niman tikitaskej tlen kuajli kichiuaj tokniuan. Tla tokojtiliaj tikintlasojtlaskej tokniuan, melak kuajli imiuan touikaskej (Filip. 2:1, 2). w19.08 9, 10 párrs. 7, 8

Jehová kintlasojtla akin yolyemankej. San akin yemelak yolyemankej ueliskej kuajli nouikaskej iuan Jehová. San ika, akin noueyimatij, Jehová “kineki uejka ma nemikan” pampa xkimitasneki. Tinochimej tiknekij tikyolpaktiskej Jehová niman tikmachiliskej ika techtlasojtla, yejua ika, noneki tiyolyemankej yeskej. Yolyemanilistli kijtosneki xtimoueyimatis niman xtiknemilis ika tiueyixtika. Biblia techititia ika akin yolyemanki kasikamati ika Jehová melak ueyixtok xken yejua niman noijki kasikamati ika nochimej uelij kichiuaj okseki itlaj tlen yejua xueli (Filip. 2:3, 4). Sekimej san nesij ika yolyemankej. Kanaj melak tetlakaitaj, kuajli tenotsaj niman san pijpinauij, ijkon kichiuaj pampa intajuan ijkon okinmachtijkej. San ika, kanaj ipan inyojlo noueyimatij. Ajsis tonajli ijkuak kiteititiskej kenon yemelak yejuamej (Luc. 6:45). w19.09 2 párrs. 1, 3, 4

“On kuajli tlajtojli” itech “toTEKO JesuCristo” kijtosneki nochi on tlen melauak tlen yejua otemachti. Tiktlakamatij ijkuak ika yejon toyekanaj ipan tonemilis. Yejon kijtosneki kachtopa tikueyichiuaskej Jehová, tiktlakamatiskej itlanauatiluan niman titlajtoskej itech iTekiuajyo (Mat. 6:33, TNM; Mat. 24:14, TNM). Noijki kijtosneki tikinpaleuiskej tokniuan akin Cristo yokintlapejpeni chika yejuamej kichiuaj intekiyo tlen melak noneki (Mat. 25:31-40). Sa achijtsin poliui ijkuak tlapejpeniltin kintlasojkamachiliskej “oksekimej borregos” pampa melak okinpaleuijkej (Juan 10:16). ¿Kenon kichiuaskej? Achto ika peuas guerra tlen itoka Armagedón, nochimej on 144,000 inemiskej ne iluikak niman xkeman mikiskej. Yejuamej teuan kipopoloskej Gog niman kinmanauiskej akin yolyemankej ken borreguitos (Apoc. 2:26, 27; 7:9, 10). Itekipanojkauan Jehová kinyolpaktis ika okinpaleuijkej tlapejpeniltin ijkuak ok nemiyaj ipan tlaltikpaktli. w19.09 12, 13 párrs. 16-18

¿Tleka tiyolseuij ijkuak tikchiuaj yejon tekitl tlen yotechnauatij Jesús? Pampa akin techyekanaj melak kuajli inyojlo. Maski Jehová melak Ueyixtika, yejua yolkuajli niman melak kitlasojkamati tlen tikchiuaj (Heb. 6:10). Techmaka kojtilistli niman ijkon matikchiuakan yejon tekitl tlen yotechmakak (2 Cor. 4:7; Gál. 6:5). Jesucristo, akin toTekiuaj, techititia kenon noneki titepaleuiskej (Juan 13:15). Niman tokniuan tlayekankej nokojtiliaj kichiuaskej ken “toTEKO JesuCristo yejuan ueyi Tlajpixki” (Heb. 13:20; 1 Ped. 5:2). Nokojtiliaj kuajli technotsaskej, techyolchikauaskej, techmachtiskej niman techtlajpiyaskej. Noijki, akin touan tekitij melak kuajli inyojlo. Xakaj kiyolpaktia itekiyo ijkon ken tejuamej akin tiktekichiuiliaj toTajtsin. Xnemij akin manotlasojtlakan ken tejuamej. Matitlanemilikan itech yejuin: se tlateochiualistli ika titekitij imiuan akin kitlakamatij itlanauatiluan toTajtsin niman akin xkinemiliaj tla uejueyixtokej. Yejuamej xnoueyimatij niman kimitaj oksekimej ika más uejueyixtokej. Yejuamej xkinemiliaj ika san imiuan titekitij, techitaj ken iminamigos. Melak techtlasojtlaj niman hasta ueliskiaj mikiskej topampa. w19.09 20 párr. 1; 23 párrs. 12-14

Pablo kiteneua “on tonajli ijkuak uajlas toTEKO [noso ika yejkos ‘itonal Jehová’, TNM]” (1 Tes. 5:1-6). “Itonal Jehová” peuas ijkuak kixnamikiskej “on ueyixtikaj Babilonia”, tikinteneujtokej nochi religiones tlen xmelajkej, niman tlamis ijkuak peuas Armagedón (Apoc. 16:14, 16; 17:5). Pablo noijki techijlia tlenon noneki tikchiuaskej niman ijkon titlatlachixtoskej ijkuak yejkos “itonal Jehová”. Okijto ika xkipiya ika tikochiskej “ken oksekimej”, yej noneki titlatlachixtoskej. Noneki totlajpiyaskej maka tokalaktiskej ipan política pampa ijkon xok timelajkanentoskiaj itech Jehová. Tla tokalaktiaj ipan política, kuakon, tikchiujtoskiaj “ken on tlaltikpaktlakamej” akin xtlaneltokaj itech toTajtsin (Juan 15:19). Tikmatstokej ika san iTekiuajyo toTajtsin uelis kichiuas maonia yolseuilistli ipan tlaltikpaktli. Tejuamej noijki tiknekij tikinpaleuiskej oksekimej tlaltikpakchanejkej “matlatlachiakan”, kijtosneki, tikinpaleuiskej makimatikan tlenon kijtoua Biblia ika ipan nochiuas yejuin tlaltikpaktli. Tla yopeuj “on temojtij tlajyouilistli” noso ueyi tlajyouilistli, tlaltikpakchanejkej xok ueliskej nonisiuiskej itech Jehová. Yejua ika, melak noneki matitenojnotsakan. w19.10 8 párr. 3; 9 párrs. 5, 6

Ijkuak ononek manoteijli tlen onoijkuilojka ipan yejon tlajkuilolamatl, Jeremías okijli iamigo Baruc yejua makiteijli (Jer. 36:5, 6). Ika yolchikaualistli, Baruc ijkon okichiuj maski ueliskia ipan nochiuaskia tlen xkuajli. ¿Uelis tikonnemiliskej kenon Jeremías melak oyolpak ijkuak okimat ika Baruc oyajka ikiyauatenko teopan niman okipouato tlajkuilolamatl imixpan nochimej? (Jer. 36:8-10). Ijkuak akin tlayekanayaj Judá okimatkej tlen Baruc okichiujka, okinauatijkej Baruc makinpouili yejon tlajkuilolamatl (Jer. 36:14, 15). Yejuamej okijtokej ika kijliskiaj tekiuaj Jehoiaquim tlen Jeremías okijtoka. Ijkuak tekiuaj Jehoiaquim okikak tlen Jeremías okijkuilojka, melak okualan hasta okitlati yejon tlajkuilolamatl niman otlanauati makitsakuakan teotlajtoketl Jeremías iuan isecretario. San ika, Jeremías okajsik okse tlajkuilolamatl, okimakak Baruc niman okijlijtia tlen Jehová kichiuaskia. Kuakon, Baruc okijkuilo “nochi on tlinon tlajkuilolnestikatka ipan on amatlajkuilojli mimiltik” tlen tekiuaj Jehoiaquim okitlatijka (Jer. 36:26-28, 32). w19.11 3, 4 párrs. 4-6

Jehová uelis nochiuas tlen nonekis niman ijkon manochiua tlen kineki. Se neskayotl, yejua yonochiuj se tlamachtijketl, se tajtli akin techyolseuiya niman noijki yonochiuj ken akin kiteijlia kuajli tlajtoltin (Is. 48:17; 2 Cor. 7:6; Gál. 3:8). Maski ijkon, miyekpa kintekitiltia tlaltikpakchanejkej niman ijkon manochiua tlen yejua kineki (Mat. 24:14; 28:19, 20; 2 Cor. 1:3, 4). Yejua san akinon uelis kimakas tlamachilistli niman kojtilistli niman ijkon manochiua tlen yejua kineki. Nochi yejuin kijtosneki itokayo Jehová, ken kijtouaj sekimej ixtlamatkej. Tinochimej tiknekij ika Jehová matechtekitilti, san ika, sekimej kanaj xkuajli kimatij tla Jehová kintekitiltijtika. ¿Tleka? Pampa kinemiliaj ika iuejueyimej, pampa itlaj kixnamiktokej noso itlaj xuelij kichiuaj. Oksekimej kanaj kuelitaj tlen kichiujtokej niman xkinemiliaj tla uelis kichiuaskej okseki tlemach. w19.10 20 párrs. 1, 2

Tla melak tiknekij tikpiyaskej tomin noso miyek tlemach, uelis kichiuas ika san oksekan matontlanemilijtokan niman xok tiktlajpiyaskej totlaneltokil. Apóstol Pablo okijtoka: “Xkuajli para on yejuan tekiti ken sen soldado tlamach ika nokalaktis, pampa ika onkaj kimpaktis on uejueyixtokej. Yejua ika, okitlapejpenij on tekitl de soldado para kichiuas” (2 Tim. 2:4). Kema, soldados romanos xkinkauiliayaj makichiuakan okse tekitl. Tejuamej tikchiuaj ken yejon soldados akin nosentemakaj ipan intekiyo. San tiknekij tikinyolpaktiskej akin techyekanaj: Jehová niman Jesús. Tikitaj ika yejuin más ueyi kijtosneki xijkon ken itlaj okse tlen ueliskia techtekiuiltis Satanás. Kuajli tikitaj tla chikauak tiktekichiuilijtokej Jehová niman nochipa tikitstokej ika kuajli maonia totlaneltokil niman nochi tlen techpaleuiya matitlaxikokan. Noneki nochipa kuajli matitlatlachixtokan. ¿Tleka? Apóstol Pablo okijto ika akin “kinekij ricojtiskej” kipoloskej “intlaneltok” (1 Tim. 6:9, 10). w19.11 17, 18 párrs. 12, 14, 15

Achto ika “uajlas toTEKO [noso ika yejkos ‘itonal Jehová’, TNM]” tekiuajkej kijtoskej ika “onkaj yolseuilistli niman xakaj nion itlaj uelis techmiktis” (1 Tes. 5:1-6). Ipan 1 Tesalonicenses 5:2, “itonal Jehová” kijtosneki “on temojtij tlajyouilistli” noso ueyi tlajyouilistli (Apoc. 7:14). ¿Kenon tikmatiskej ijkuak ipeuas “on temojtij tlajyouilistli”? Biblia kijtoua ika noijtos itlaj tlen techpaleuis matikmatikan. Akin tlayekanaj ipan tlaltikpaktli kijtoskej ika “onkaj yolseuilistli niman xakaj nion itlaj uelis techmiktis”. ¿Noijki ijkon kijtoskej akin tlayekanaj ipan tlaneltokiltin? Kanaj kema. San ika, yejon tlen noijtos, ijkon noijki tekajkayauaskej demonios. Yejuin tlakajkayaualistli melak xkuajli yes, pampa kichiuas ika tlaltikpakchanejkej manomachilikan ika yolseuilistli maski yejon xmelauak, nochi yejon nochiuas achto ika yejkos “on temojtij tlajyouilistli”. Kuakon, “nimantsin uajlas tlaxoxotonilistli impan yejuamej [...]. Nochiuas ken ijkuak on siuatl san uajpejtetsi nokokoua para kinemitia ikonetsin”. ¿Niman tlenon inpan nochiuas itekipanojkauan toTajtsin? Pampa xkimatij kemanon peuas “on temojtij tlajyouilistli”, kanaj kinmojkatlachialtis ijkuak peuas, san ika, ikimatiskej tlenon kichiuaskej. w19.09 9 párrs. 7, 8

Ijkuak itlaj tiktlapejpeniskej tikchiuaskej, matikchiuakan tlen techpaleuis. Yejuin kichiuas matitlamikan tlen otikpeualtijkej. Kanaj yotikijtokej mojmostla tikpouaskej Biblia, san ika, tla xtikpiyaj se programa, kanaj xkeman tikchiuaskej tlen tiknekij. Noso kanaj tlayekankej kinekij komintlajpaloskej tokniuan, san ika, panoua miyek tonajli niman xkichiuaj. Melak kinpaleuis tla notlajtoltiaj: “¿Yotikimijkuilojkej akinomej tikomintaskej? ¿Yotikijtokej kemanon tikomintaskej?”. Noijki, matikitakan tla melauak uelis tikchiuaskej. Tiknekij miyek tikchiuaskej, san ika, xakaj kipiya tiempo, tomin nion kojtilistli niman ijkon kichiuas tlen kineki. Yejua ika, noneki kuajli titlanemiliskej niman totlajtoltiskej tla melauak uelis tikchiuaskej. Kemantika kanaj nonekis tikpatlaskej tlen yotikijtokaj tikchiuaskej pampa xtiuelij tikchiuaj. w19.11 29 párrs. 11, 12

Ipan Isaías 65:21-23 kijtoua kenon tichantiskej ipan tlaltikpaktli. Biblia kijtoua ika itekipanojkauan toTajtsin tekitiskej, niman tlen kichiuaskej melak tepaleuis niman techyolpaktis. Uelis kuajli tikmatstoskej ika ijkuak Jesús tlamis tekiuajtis, “nochi tlen onkaj ipan in tlaltikpaktli xok ijtlakauis. Nochi tlajtlamach nomanauis ijkon ken ikoneuan Dios no nomanauiskej” (Rom. 8:21). Jehová kuajli okitak ika israelitas matekitikan niman manoseuikan ken noneki, niman yejua noijki ijkon kichiuas imiuan itekipanojkauan ijkuak Jesús Tekiuajtis Mil Xiuitl. Kuajli tikmatstokej ika itekipanojkauan toTajtsin kipiyaskej tiempo niman ijkon kiueyichiuaskej toTajtsin, pampa ijkon ken aman, yejuin kichiua melak matiyolpakikan. Nochimej akin melajkanemij itech toTajtsin melak yolpakiskej pampa kipiyaskej se tekitl tlen kinyolpaktis niman noijki kitekichiuiliskej Jehová. w19.12 13 párrs. 15, 17, 18

Tlajtojli “xkinmachtikan” kijtosneki “miyekpa xkimijlikan”. Kuakon, tajtin nochipa noneki kixeloskej tiempo niman ijkon nemiskej imiuan inkoneuan. Kemantika kanaj nosiaujkauasnekij pampa miyekpa yokimijlikej inkoneuan tlen kijtoua iTlajtol toTajtsin. San ika, noneki kilnamikiskej ika san ijkon kinpaleuiskej inkoneuan kuajli makasikamatikan Biblia niman makitlakamatikan. Kuakon, kuajli xkimixmatikan nemokoneuan. Ipan Salmo 127 kijtoua ika “tokoneuan” yeskiaj ken “flechas” (Sal. 127:4). Ijkon ken flechas tlamantikej niman xsan noijki tlachijchiujtin, kokonej noijki tlatlamantikej. Yejua ika, tajtin noneki kuajli kitaskej kenon kimiskaltiskej inkoneuan. Matikitakan tlenon kijtouaj sekimej tokniuan akin chantij Israel, yejuamej kuajli okinpaleuijkej omemej inkoneuan makitekichiuilikan Jehová. Yejuamej kijtouaj: “Nojnonkua tikinmachtiayaj tokoneuan”. Kema, akin kinyekanaj inchanejkauan noneki kuajli kitaskej tla nonekis noso uelis ijkin nochiuas. w19.12 26 párrs. 18-20

Ijkuak tikixnamikij tlen ouijtika, melak tiktlasojkamatij matechpaleuikan oksekimej. Ryan, akin itaj omik ipan se accidente, kijtoua: “Ijkuak titlajyouijtika, melak ouijtika tikchiuas tlen mojmostla tikchiuaya. Melak kuajli ijkuak oksekimej mitspaleuiskej, maski nesiskia ika tlen kichiuaj xueyi kijtosneki”. Nochipa matikilnamiktokan ika tlen tikchiuaj inpampa tokniuan, maski nesiskia ika xueyi kijtosneki, kichiua kuajli manomachilikan. Matitlajtokan itech Marcos, se inomachtijkauj Cristo akin onen ipan kachtopa siglo. Jehová okimakak miyek tekitl tlen melak ueyi kijtosnekiya. Maski melak miyek tekitl kipiaya, okixelo tiempo niman ijkon kiyolseuis apóstol Pablo, niman Pablo kuajli kimatstoya ika ueliskia kitlajtlanilis makipaleui. Se tokniuj akin itoka Ángela melak najmanaya pampa okimiktijkej se ichanejkauj. San ika, tokniuan melak okiyolseuijkej. Tokniuj Ángela melak okitlasojkamat yejon niman kijtoua: “Ijkuak tokniuan yemelak kinekij mitspaleuiskej, xmitstekiyomakas imiuan titlajtos. Xmitsijliskej tla xuelis mitspaleuiskej, yejuamej ika inyojlo kichiuaskej”. Yejua ika, matotlajtoltikan: “¿Kenon nechitaj oksekimej? ¿Kitaj ika nochipa niknektika nikinyolseuis tokniuan?”. w20.01 11, 12 párrs. 14-16

¿Kenon ueliskia se tlapejpenijli “xkitlakaitas” pan niman vino ijkuak noilnamiki imikilis Cristo? Tla kikua yejon pan niman tla koni yejon vino maski xkintlakamatstika itlanauatiluan toTajtsin (Heb. 6:4-6; Heb. 10:26-29, TNM). Akin tlapejpeniltin kimatstokej ika noneki melajkanemiskej tla kinekij yaskej iluikak (Filip. 3:13-16). Iespíritu santo Jehová xkichiua ika tlaltikpakchanejkej manoueyimatikan, yej kichiua más mayolyemankej (Efes. 4:1-3; Col. 3:10, 12). Ika yejon, akin tlapejpeniltin xnoueyimatij. Xkinemiliaj ika san yejuamej más kipiyaj espíritu santo xijkon ken oksekimej itekipanojkauan toTajtsin. Noijki xkinemiliaj ika yejuamej más kuajli kixmatij tlen kijtoua Biblia xijkon ken oksekimej. Yejuamej xkeman kijliskiaj yakaj: “Tejua noijki titlapejpenijli, noijki noneki tijkuas pan niman tikonis vino ijkuak noilnamiki imikilis Cristo”. Tlapejpeniltin yolyemankej niman kasikamatij ika san Jehová uelis kijtos akinon yas iluikak. w20.01 27, 28 párrs. 4, 5

Jehová kineki matiknisiuikan niman matiknotsakan. Ika yejon, techijlia ika nochipa matikchiuilikan teoyotl, niman yejua nochipa kinektok techkakis (Rom. 12:12). Yejua xkeman kijtos tla xok techkakis, pampa yejua xkeman siaui niman nochipa kipiya tiempo niman ijkon kinkakis toteoyouan. ¿Niman tejuamej kenon tijkakij Jehová? Ijkuak tikamapouaj iTlajtol, Biblia, niman okseki amatlajkuiloltin tlen techpaleuiya matikasikamatikan iTlajtol. Niman noijki tijkakij Jehová ijkuak kuajli titlakaktokej ipan totlanechikoluan. Tla tejuamej nochipa tiknotsaj Jehová, noijki kuajli iuan touikaskej. Jehová kinekiskia matikijlikan nochi tlen onka ipan toyojlo (Sal. 62:8). Yejua ika, melak kuajli tla totlajtoltiaj: “Ijkuak nikchiua teoyotl, ¿nochipa san no yejua tlajtoltin nikimijtoua, noso nikijlia Jehová nochi tlen nikmachilia niman niknemilia?”. Kuajli tikmatstokej ika melak tiktlasojtlaj Jehová niman tiknekiskiaj nochipa iuan touikaskej. ¿Tlenon techpaleuis nochipa iuan matouikakan Jehová? Tla nochipa tiknotsaj niman tla tikijliaj nochi tlen techyolpaktia niman tlen techyolajmana. Kuajli matikmatstokan ika nochipa uelis tiktlajtlaniliskej matechpaleui. w20.02 9 párrs. 4, 5

Jehová yokintekitlali tlayekankej niman ijkon yejuamej makintlajpiyakan itekipanojkauan toTajtsin. Ken Nehemías okiyekan ikalpan Jehová, uelis melak kinpaleuis tlayekankej. Pampa Nehemías katka tlanauatijketl, yejua ueliya tlayekanaya Judá (Neh. 1:11; 2:7, 8; 5:14). Matikitakan seki tlen okixnamik Nehemías. Yejua okimat ika judíos yokitsokuilotijkaj iteopan toTajtsin niman xkinpaleuiayaj levitas ika tomin, ijkon ken kijtouaya Tlanauatijli. Noijki, xkitlakaitayaj tonajli sábado niman sekimej yononamiktijkaj imiuan akin xompa chanejkej. ¿Tlenon kichiuaskia Nehemías? (Neh. 13:4-30). Maski Nehemías yejua akin tlayekanaya, xokinchiualti judíos makichiuakan tlen yejua kijtouaya. Nehemías okinots Jehová niman ijkon yejua makiyekana niman okinmachti judíos iTlanauatil toTajtsin (Neh. 1:4-10; 13:1-3). Noijki, yolyemanki katka niman okinpaleui imikniuan, hasta imiuan okiyektlali itepanuan Jerusalén (Neh. 4:15). w19.09 15, 16 párrs. 9, 10