Julio

Uelis techajmanas ijkuak yakaj xkuajli technotsa noso texchiuilia tlen xkuajli, niman kanaj más xkuajli tomachiliskej tla ijkon texchiuilia se toamigo noso se tochanejkauj. Tla ijkon topan nochiua, uelis techpaleuis tla tikitaj tlen ipan onochiuj Ana. Iueuentsin kipiaya okse isiuauj akin itoka katka Peniná. Niman Peniná nochipa kipijpinaujtiaya Ana (1 Sam. 1:12). Ijkuak tejuamej tiknotsaskej Jehová, uelis tikchiuaskej ijkon ken Ana, kema, uelis tiuejkauiskej niman uelis tikijliskej tlen techajmana niman tlen techmojtia. Toteoyouan xnoneki melak kuajli makakistikan nion xnoneki tikintlapejpeniskej tlajtoltin tlen melak temojkatlachialtijkej. Kemantika hasta uelis tiajmankachokaskej ijkuak tikijliskej Jehová tlen techajmana. Maski ijkon, matikilnamikikan ika yejua nochipa kinektos techkakis. San ika, onka okse tlemach tlen noneki tikchiuaskej. ¿Itech tlenon titlajtotokej? Noneki tikilnamikiskej Filipenses 4:6, 7. Ipan yejuin tlaxeloltin, apóstol Pablo okijto ika ijkuak tikchiuiliskej teoyotl Jehová, noneki tiktlasojkamachiliskej. ¿Tleka? Pampa yejua techmaka tonemilis, yokichijchiuj miyek tlemach, techititia ika nochipa techtlasojtla niman techijlia ika uelis tikseliskej itlaj tlen melak kualtsin ika tlayekapan. w20.02 21 párrs. 3, 6

ToTajtsin okichiuj matiuelikan matitlajtokan (Éx. 4:10, 11; Apoc. 4:11). Ipan iTlajtol, yejua techijlia kenon kinamiki titlajtoskej. Nochipa noneki titlajtoskej itech Jehová niman itech iTekiuajyo (Mat. 24:14; Rom. 10:14). Tla ijkon tikchiuaj, tikchiujtoskej ken Jesús okichiuj. Ijkuak ouajlaka ipan yejuin tlaltikpaktli, yejua okiteititi tlen melauak itech iTajtsin (Juan 18:37). Aman tej, noijki noneki kuajli tikitaskej kenon titlajtouaj. Yejua ika, ijkuak tikinnojnotsaskej oksekimej itech Jehová, noneki tikchiuaskej ika “yolyemanilistli niman tetlakaitalistli”, noijki noneki titlanemiliskej itech tlen yejuamej kimachiliaj niman tlen kineltokaj (1 Ped. 3:15, 16). Ijkon xsan tikinnojnotsaskej, noijki itlaj tikinmachtiskej niman kanaj ajsis ipan inyojlo tlen tikimijliskej. Ijkuak tokniuan tlayekankej kitaj ika se tokniuj tlakatl noso siuatl itlaj ipan nochiujtika, tokniuan tlayekankej iuan tlajtouaj. Yejuamej noneki kuajli kitaskej kemanon iuan tlajtoskej, kanaj kampa yejon tokniuj xpijpinauis. w20.03 18, 19 párrs. 2-4

¿Tlenon noneki tiktlajtlaniskej? Uelis tiktlajtlaniliskej Jehová matechpaleui más matitlaneltokakan (Luc. 17:5; Juan 14:1). Nonekis pampa Satanás kintlatlatas nochimej inomachtijkauan Jesús (Luc. 22:31). ¿Kenon techpaleuis totlaneltokil? Tla yotikchiujkej nochi tlen tiuelij, totlaneltokil kichiuas matijkauilikan Jehová yejua matechpaleui. Tla tikneltokaj ika Jehová uelis kiyektlalis tlen tikixnamiktokej, tinemiskej ika toyojlo (1 Ped. 5:6, 7). Teoyotl techpaleuiya matiyolseujtokan maski san tlenon panos. Matikitakan tlen ipan onochiuj Robert, se tlayekanketl akin kipiya ipantsin 80 xiuitl. Yejua techijlia tlenon kipaleuiya nochipa mayolseujto: “Filipenses 4:6, 7 nochipa yonechpaleui manikixnamiki miyek tlen ouijtika”. Noijki kijtoua: “Niknotsa toTajtsin ijkuak nikmachilia ika itlaj nechajmana. Nikita ika ijkuak melak miyekpa niknotsa toTajtsin, noijki melak niyolseui”. w19.04 9, 10 párrs. 5-7

Akin kinnajnauiltiaj kokonej tlajtlakouaj ixpan Jehová. Ijkuak yakaj kitechiuilia tlen xkuajli, noijki tlajtlakoua ixpan toTajtsin. Matikitakan tlen kijtouaya Tlanauatijli tlen okimakakej Israel niman ijkon tikasikamatiskej yejuin. Tlanauatijli kijtouaya ika akin tetlachtekiliaya noso tekajkayauaya xmelajkanemiya itech Jehová (Lev. 6:2-4). Akin tenajnauiltiaj kentla kintlachtekiliskiaj kokonej, yejuamej kichiuaj ika kokonej nochipa manomojtitokan. Kuakon, tla yakaj ijkon kichiua ipan tlanechikojli, xmelajkanemi itech toTajtsin niman kitsokuiloua itoka. Ika yejon, tikmelajkaijtouaj ika akin tenajnauiltia kichiujtika se ueyi tlajtlakojli ixpan toTajtsin. Ipan revistas Amatl Tekakistilijketl niman ¡Xtlachiakan! yonotlali tlen uelis kichiuaskej akin yokinnajnauiltijkej niman ijkon maka melak manoyolkokokan, noijki yonotlali kenon oksekimej uelis kinpaleuiskej niman kinyolchikauaskej, niman noijki kenon tatajtin uelis kintlajpiyaskej inkoneuan. Tlayekankej noijki yokimijlikej tlenon kijtoua Biblia ika kipiya ika kichiuaskej ijkuak yakaj kichiua yejon tlajtlakojli. Ikalpan toTajtsin miyekpa kita tlen ika noyekanaj tlayekankej ijkuak yakaj kinajnauiltia se konetl. w19.05 9 párrs. 8, 9

ITlajtol toTajtsin kentla se espada tlen melak tlateki niman kimixnamiki itlakajkayaualisuan Satanás (Efes. 6:17). Biblia techijlia ika akin yomijkej xuelij nonotsaj imiuan akin yoltokej (Sal. 146:4). Noijki techilnamiktia ika Jehová san yejua ueli kijtoua tlenon panos ika tlayekapan (Is. 45:21; 46:10). Tla nochipa tomachtiaj Biblia niman itech titlanemiliaj, uelis tikinmapeuaskej niman tikintlauelitaskej itlakajkayaualisuan xkuajkualtin espíritus. Kuakon, maka matikchiuakan tlen kipiya naualyotl. Akin tiktekichiuiliaj toTajtsin xtikonitaj akin tetlatejtemouilia nion xtikyejyekouaj tonojnotsaskej imiuan akin yomijkej. Xtikchiuaj costumbres tlen miyekej kichiuaj ijkuak yakaj miki. Matikilnamikikan ika miyek itech yejon costumbres opeujkej nochiuaj pampa noneltoka ika akin yomijkej ok yoltokej. Noijki xtotlatejtemouiliaj niman ijkon tikmatiskej tlenon panos ika tlayekapan. Tikmatstokej ika nochi yejuin uelis melak techijtlakos niman uelis kichiuas matonojnotstokan iuan Satanás niman imiuan xkuajkualtin espíritus. w19.04 21, 22 párrs. 8, 9

Akin noyekanaj ika tlamachilistli tlen kisa ipan yejuin tlaltikpaktli melak kipijpinaujtiaj tlen tenauatia Biblia, niman noijki kijtouaj ika xakaj uelis kichiuas tlen ompa ijkuiliujtika. Kanaj kijtouaj: “Tla Totajtsin otexchijchiuj niman ijkon matiknekikan totekaskej iuan yakaj, ¿tleka kijtoua ika noneki matikteltikan toileuilis?”. Yejuamej ijkon kijtouaj pampa kinemiliaj ika noneki tikchiuaskej nochi tlen tikileuiyaj. San ika, Biblia xijkon temachtia. Ompa kijtoua ika xkipiya ika tikchiuaskej nochi tlen tikileuiskej. Techmachtia ika nochimej ueliskej kipopoloskej xkuajkualtin ileuilistin (Col. 3:5). Niman xsan yejon, Jehová kijtoua ika se uelis nonamiktis niman ijkon uelis notekas iuan ixnamik, ijkon omemej nopaktiskej ken kinamiki (1 Cor. 7:8, 9). Biblia xijkon temachtia ken kijtouaj akin xkitekichiuiliaj Jehová. Biblia techmachtia kenon kinamiki matikitakan sexo. Ompa kijtoua ika melak tepakti ijkuak se noteka iuan ixnamik (Prov. 5:18, 19). San ika, noijki kijtoua: “Cada se ma kimati kenijki kipiyas isiuau ikan chipaualistli niman ikan tetlakaitalistli. Niman maka sanoyej xpiyakan on xkuajli eleuilistli” (1 Tes. 4:4, 5). w19.05 22, 23 párrs. 7-9

ToTajtsin xkinkauilis uejueyimej kalpamej makinmiktikan itekipanojkauan, pampa yejuamej kuikaj itokayo niman yokitlakamatkej tlanauatijli kampa kijtoua makisakan itech Ueyixtika Babilonia (Hech. 15:16, 17; Apoc. 18:4). Noijki, yokinpaleuijkej oksekimej maka sa ompa manemikan. Kuakon, itekipanojkauan toTajtsin xiuan kiseliskej “iplagas” Ueyixtika Babilonia. Maski ijkon, noitas tla melauak tlaneltokaj (Ezeq. 38:2, 8, TNM). Ijkuak nochi tlaneltokiltin xmelajkej yopopoliujkej, ikalpan Jehová san yejua nokauas ijkon ken se kojtli tlen se ajakakiyaujtli xouel okitlajkal. Tikmatstokej ika Satanás melak tlauelmiktos. Ika yejon, kitekitiltis tlen idemonios kiteijliskej niman ijkon kichiuas ika manosentlalikan seki uejueyimej kalpamej niman makimixnamikikan itekipanojkauan Jehová (Apoc. 16:13, 14). Yejuin uejueyimej kalpamej akin nosentlaliaj kintokayotiaj Gog akin ualeua Magog. Ijkuak yejon uejueyimej kalpamej kixnamikiskej ikalpan toTajtsin, kuakon, uelis tikijtoskej ika yoajsikej kampa kitokayotiaj Armagedón (Apoc. 16:16). w19.09 11 párrs. 12, 13

Ipan itonaluan israelitas, Satanás okikuik tlaneltokijli tlen xmelauak niman ijkon miyekej maauilnemikan. Aman noijki ijkon kichiua. Tlaneltokijli tlen xmelauak xsan kitekauilia maauilnemilo, noijki kichiua manesi ika yejon xtlajtlakojli. Yejua ika, miyekej akin kijtouaj kitekichiuiliaj toTajtsin xok kitlakamatij itlanauatiluan toTajtsin. ¿Tlenon yopanok pampa ijkon nochiua? Apóstol Pablo kiteneua ipan amatlajkuilojli tlen okintitlanili romanos (Rom. 1:28-31). Itech “on tlen xkitocaroua kichiuaskej” tlaltikpakchanejkej, ompa kalaki nochi auilnemilistli, niman noijki ijkuak se tlakatl noteka iuan okse tlakatl niman ijkuak se siuatl noteka iuan okse siuatl (Rom. 1:24-27, 32; Apoc. 2:20). Kuajli tikitaj ika noneki matiktlakamatikan tlen kijtoua Biblia. Intlanemililuan tlaltikpakchanejkej kixnamikij itlanauatiluan toTajtsin pampa xtemachtiaj ikualneskayouan toTajtsin, temachtiaj “tlen xkuajli keleuiya intlalnakayo” (Gál. 5:19-23). Niman yejon kichiua ika se manoueyimati, kuakon tlaltikpakchanejkej san no yejuamej peuaj notlasojtlaj (2 Tim. 3:2-4). Yejuin kixnamiki tlen Jehová kineki, pampa Jehová kineki matiyolyemankej (2 Sam. 22:28). w19.06 5, 6 párrs. 12-14

Elías okitekichiuili Jehová ijkuak melak ouijtika katka niman miyek okixnamik. Jehová okijli Elías makimaka Eliseo seki itekiyo. Ijkon, okimakak se amigo akin ueliskia kipaleuis ijkuak melak najmantoskia. Noijki ijkon, tla tejuamej tikpiyaj se amigo akin itech titlaneltokaj, yejua techpaleuis ijkuak titlajyouijtoskej (2 Rey. 2:2). ¿Niman tla tiknemiliaj ika xakaj nemi akin uelis tikijliskej tlen techajmana? Kuakon, matiktlajtlanilikan Jehová matechpaleui matiknextikan se tokniuj akin chikauak itlaneltok niman ijkon matechyolchikaua ijkuak nonekis. Jehová okipaleui Elías makixnamiki tlen kajmanaya niman makitekichiuili miyek xiuitl. Tlen ipan onochiuj yejuin teotlajtoketl techmaka se tlamachialistli. Kanaj tikixnamikiskej tlen kichiuas melak matisiauikan niman melak matajmanakan. San ika, tla titlaneltokaj itech Jehová, yejua techkojtilis niman ijkon ok uelis tiktekichiuiliskej (Is. 40:28, 29). w19.06 15 párr. 4; 16 párrs. 9, 10

Tla titenojnotsaj itech iTekiuajyo toTajtsin, techpaleuis tikpiyaskej más yolchikaualistli. ¿Tleka? Pampa ijkuak titenojnotsaj techpaleuiya matitlaneltokakan itech Jehová niman maka matitemakasikan. Matiknemilikan yejuin, tejuamej más tikojtiaj ijkuak tikchiuaj ejercicio. Noijki ijkon, tejuamej más tiyolchikauij ijkuak titenojnotsaj techajchan, kampa tojlan, kampa tlanemakalo niman nochiuiyan. Tla aman titenojnotsaj ika yolchikaualistli, yejon techpaleuis ijkuak xok techkauiliskej matitenojnotsakan (1 Tes. 2:1, 2). Miyek tlen tiuelij itech se tokniuj akin omelajkanen niman akin okiteititi ika melak yolchikauak katka. Tokniuj Nancy Yuen san se metro iuan tlajko ika uejkapan katka, san ika, xnimantsin nomojtiaya. Pampa xokinek kikajkauas tlajtos itech iTekiuajyo toTajtsin, okitsajkej China 20 xiuitl. Tekiuajkej akin okitlajtlajtoltijkej okijtokej ika san yejua katka akin “nion achijtsin xtlakaki” itech nochi país. w19.07 5 párrs. 13, 14

Sekimej melak kinekij nomachtiskej itech Biblia, san ika, oksekimej kanaj xkinekij techkakiskej. Kuakon, noneki tikchiuaskej makinekikan matechkakikan. Niman tla tiknekij matechkakikan, noneki kuajli tikmatiskej tlenon tikijtoskej. Matiknemilikan itech tlenon uelis tikinnojnotsaskej niman ijkon kinekiskej techkakiskej. Sakin, matiknemilikan kenon uelis tikimijliskej yejon tlen yotiknemilijkej. Kanaj uelis tajsiskej niman tikijliskej: “Nikuelitaskia nikmatis tlenon tiknemilia itech yejuin. Pampa timiyekej tikixnamikij tlauejli, ¿tiknemilia ika noneki makalaki se tekiuaj akin nochiuiyan matlayekana niman ijkon matlayektlali?”. Niman sakin uelis titlajtoskej itech Daniel 2:44. Noso uelis tikteijliskej: “¿Tejua tlenon tikijtoskia ika noneki tikchiuaskej niman ijkon kokonej matetlakaitakan?”. Niman sakin uelis titlajtoskej itech Deuteronomio 6:6, 7. Melak teyolpakti ijkuak yakaj tikpaleuiyaj manochiua inomachtijkauj Cristo. w19.07 15 párrs. 4, 6, 7

Ne kampa kixmatij ken Lejano Oriente, se tokniuj akin youejkauj ika kinnojnotstinemi akin kijtouaj ika xkipiyaj se religión kijtoua: “Miyekpa, ijkuak nikan kijtouaj ika xtlaneltokaj itech toTajtsin, kijtosnekij ika kinemiliaj ika xnoneki manoueyichiuakan tajtsitsintin. Kuakon, nikimijlia ika nejua noijki niknemilia ika miyekej tajtsitsintin xmelajkej, ika san tlakamej yokinchijchiujkej. Miyekpa, nikinpouilia Jeremías 16:20 niman nikintlajtoltia: ‘¿Kenon uelis tikmatiskej akinon yemelak toTajtsin niman akinomej ka?’. Nikinkaki kenon nechnankiliaj niman nikinpouilia Isaías 41:23, kampa kijtoua: ‘Xtechijlikan tlinon nochiuas más sakin, para tikmatiskej ika melauak nendioses’. Kuakon, nikimititia itlaj tlen Jehová yokijto kichiuas ika tlayekapan”. Okse tokniuj kijtoua: “Nikimititia kenon Biblia yemelak techpaleuiya, nikimititia teotlajtoltin tlen yonochiujkej niman nikintomilia kenon tlachijchiujtli universo. Sakin nikinpaleuiya makitakan ika nochi yejon kiteititia ika nemi se toTajtsin akin nochi okichijchiuj niman akin melak tlamachilise. Ijkuak nikita ika yejuamej kasikamatij ika kanaj kema nemi se toTajtsin, nikimititia tlen kijtoua Biblia itech Jehová”. w19.07 23, 24 párrs. 14, 15

Matikteneuakan seki tlemach “tlen más ueyi kijtosneki”: ika manoueyichiua itoka toTajtsin, ika manochiua tlen yejua kineki niman ika nochimej ipan tlanechikojli kuajli manouikakan (Mat. 6:9, 10; Juan 13:35). Tla tikitaj ika yejuin tlemach melak ueyi kijtosneki, tikteititijtoskej ika tiktlasojtlaj Jehová. Apóstol Pablo noijki okijto ika noneki tichipaujkanemiskej. Jehová uelis kitas ika tichipaujkanemij tla tokojtiliaj tikueyiliskej totlasojtlalis niman tla tikitaj “tlen más ueyi kijtosneki”. Noijki tikteititiaj ika titetlasojtlaj tla tokojtiliaj xtikintlajkaliskej tokniuan noso xtikinyemaniliskej intlaneltokil. ToTajtsin yemelak techmelajkaijlia maka matikinyemanilikan intlaneltokil oksekimej. Kemantika totlaken, tlen ika toyolpaktiaj niman totekiyo uelis kichiuas mayemani intlaneltokil oksekimej. Kanaj xtikchiuaj se tlajtlakojli, san ika, melak xkuajli yeskia tla san topampa yemani intlaneltokil oksekimej (Mat. 18:6). w19.08 10 párrs. 9-11

Desde 1935, akin tiiteixpantijkauan Jehová yotikasikamatkej ika yejon grupo kampa nemi “sanoyej miyek tlakatl” tlen Juan okitak, chantiskej ipan tlaltikpaktli kampa xkeman mikiskej (Apoc. 7:9, 10). Achto ika peuas Mil Xiuitl, akin nemij ipan yejuin grupo noneki nomachtiskej itlanauatiluan Jehová niman kiteititiskej ika chikauak intlaneltokil. ¿Tleka? Pampa san ijkon uelis makisaskej itech “on temojtij tlajyouilistli” niman itech “nochi on tlajyouilistli yejuan nochiuas” (Luc. 21:34-36). Akin nemij ipan grupo kampa nemi “sanoyej miyek tlakatl” melak yolpakij ipampa tlen kichiaj ika tlayekapan. Kasikamatij ika Jehová yejua akin kijtoua kanon chantiskej itekipanojkauan, tla ne iluikak noso nikan ipan tlaltikpaktli. Yejuin omemej grupos kasikamatij ika toTajtsin techteochiua pampa techtlasojtla, yejua ijkon okiteititi ijkuak okuajtitlan Jesucristo mamikiki topampa niman ijkon matechmakixti (Rom. 3:24). w19.09 28 párr. 10; 29 párrs. 12, 13

¿Oksekan otechtitlankej matiktekichiuilikan Jehová? ¿Tlenon techpaleuis kuajli matiktekichiuilikan Jehová? Maka matiknemilikan ika xkuajli tla oksekan techtitlanij, xkijtosneki tla xkuajli ken titlapaleuijtoyaj. Matikitakan kenon Jehová techpaleuijtok niman nochipa matitenojnotsakan. Matikchiuakan ijkon ken tokniuan akin onenkej ipan kachtopa siglo akin maski san kanon yayaj “kiteijlijtiayaj on kuajli tlajtojli” (Hech. 8:1, 4). Tla nochipa titenojnotsaj, kuajli onkisas tlen tikchiuaj. Se neskayotl, sekimej precursores okinkixtijkej ipan se país niman oyajkej oksekan kampa tlajtouayaj intlajtol niman kampa nonekiyaj tenojnotskej. Nion xouejkauj, onochiujkej yenkuikej grupos kampa miyekej nosentlaliayaj. Matikilnamikikan ika tejuamej touikaj iuan Jehová, niman yejon tlen kichiua melak matiyolpakikan. Yejua ika, matonisiuikan itech toTajtsin niman matikneltokakan ika yejua techmakas tlamachilistli, techyekanas niman techpaleuis. Matikilnamikikan ika otomatkej kampa tinemiyaj pampa techyolpaktiaya tikinpaleuiskej oksekimej. Jehová techpaleuis oksejpa ijkon matomachilikan kampa techtitlaniskej tla tejuamej tokojtiliaj titlapaleuiskej (Ecl. 7:10). w19.08 24, 25 párrs. 15, 16

Kipiya ika tokauiliskej Jehová matechyekana. Yejua akin otexchijchiuj, kuakon, uelis techijlis tlenon noneki tikchiuaskej (Apoc. 4:11). San ika, noijki kipiya ika tiktlakamatiskej pampa san yejua akin melak kuajli tlayekana. Miyekej tlaltikpakchanejkej youajtlayekantiajkej, san ika, Jehová yejua tekiuaj akin melak tlamachilise, tetlasojtlani, teasikamatini niman teikneliani (Éx. 34:6; Rom. 16:27; 1 Juan 4:8). Tokauiliaj Jehová matechyekana ijkuak tokojtiliaj tikchiuaskej nochi tlen techijlia niman ijkuak xtitlaneltokaj itech tlen tejuamej tiknemiliaj (Prov. 3:5). Tla tikixmatij ikualneskayouan toTajtsin, kuakon, xouijtika tikitaskej tokauiliskej Jehová matechyekana, pampa ipan nochi tlen kichiua yejua kiteititia ikualneskayouan (Sal. 145:9). Ijkuak kuajli tikixmatij Jehová, más tiktlasojtlaj. Niman, tla tiktlasojtlaj, xnonekis matechijkuilouilikan tlen noneki tikchiuaskej niman tlen xnoneki tikchiuaskej. w19.09 14 párrs. 1, 3

Diablo kintlajyouiltia tlaltikpakchanejkej pampa kimijlia tlen xmelauak niman kichiua maka manemikan ika inyojlo. Yejua kineki matikneltokakan ika Jehová xtechtlapopoluiya niman ika xakaj uelis techtlasojtlas. Yejon se tlakajkayaualistli tlen melak xkuajli tlen kichiua matajmanakan (Juan 8:44). Ijkuak tiknisiuiyaj Cristo, toTajtsin techtlapopoluiya pampa yejua yemelak techtlasojtla (Mat. 11:28, TNM; Rom. 8:32, 38, 39). Yejon tekitl tlen yotechmakak Jesús melak sejneka itech okseki tekitl tlen noneki tikchiuaskej. Matitlanemilikan itech yejuin, ijkuak yotisetonalojkej titekititokej, timiyekej xsan tikmachiliaj ika melak yotisiaujkej, noijki xtinemij ika toyojlo. San ika, ijkuak tiktekichiuiliaj Jehová niman Jesús, melak tiyolpakij. Kemantika kanaj melak tisiaujtokej niman kanaj noneki tochiualtiskej tiaskej totlanechikoluan. San ika ¿xmelak ika ijkuak tiuajtokuepaj tochan oksejpa tikojtikej niman xok tisiaujtokej? Noijki ijkon tomachiliaj ijkuak tokojtiliaj tontenojnotsaskej noso toselti tomachtiskej. Tlen kualtsin tikmachiliaj kichiua matokojtilikan tikchiuaskej nochi yejon. w19.09 20 párr. 1; 23, 24 párrs. 15, 16

Aman ika sa achijtsin poliui ika yejkos “itonal Jehová”, yejua kichia matitenojnotstokan. Noneki tikitaskej tla nochipa tikchiujtokej “itekiu toTEKO” (1 Cor. 15:58). Ijkuak Jesús okijto tlenon tikchiujtoskiaj akin tiktekichiuiliaj toTajtsin, yejua noijki okijto: “On kuajli tlajtojli yejuan kiteijlia ken Dios temakixtia achtoj noteijlis nochiuiyan ipan nochi naciones” (Mar. 13:4, 8, 10; Mat. 24:14, TNM). San xkonnemili: ijkuak tontenojnotsaj, titlapaleuijtokej ika manochiua yejuin teotlajtojli. Nochi xiujtin melak miyekej tlaltikpakchanejkej kikakij tlen kichiuas iTekiuajyo toTajtsin. Matikitakan kenon yotimiyekiyakej akin titenojnotsaj ipan yejuin “itlamiyan tonaltin”. Ipan 1914, nemiyaj 5,155 tokniuan akin tenojnotsayaj ipan 43 países. Niman aman, tinemij kanaj 8,500,000 akin titenojnotsaj ipan 240 países. Maski ijkon, totekiyo xitlami. Ok noneki matikteijlitokan ika san iTekiuajyo toTajtsin uelis kipopolos nochi tlen xkuajli tikixnamikij (Sal. 145:11-13). w19.10 8 párr. 3; 10 párrs. 7, 8

Opanok seki siglos, Jehová okitekitilti Barzilái niman ijkon makipaleui tekiuaj David. Tekiuaj David niman oksekimej tlakamej cholouayaj itech Absalón, se ikoneuj David. Kuakon, yejuin tlakamej yosiaujkaj, yoapismijkaj niman yoamijkaj. Maski Barzilái iueyi katka, yejua niman oksekimej tlakamej okipaleuitoj David maski ueliskiaj mikiskiaj. Barzilái xokinemili ika pampa iueyi katka xok ueliskia kipaleuis Jehová. Barzilái okikuik tlen kipiaya niman ijkon kinpaleuis itekipanojkauan toTajtsin akin miyek tlemach kinpolouaya (2 Sam. 17:27-29). ¿Tlenon tiuelij itech yejuin? Ika maski itiuejueyimej, Jehová uelis techtekitiltis niman ijkon matikinpaleuikan tokniuan akin kinpoloua tlen noneki (Prov. 3:27, 28; 19:17). Maski tla xtiuelij tikominitaj tokniuan niman ijkon tikinpaleuiskej, kema uelis tiktlaliskej tomintsin ipan cajitas niman ijkon ikalpan toTajtsin makinpaleui tokniuan akin kinpoloua tlen noneki (2 Cor. 8:14, 15). w19.10 21 párr. 6

Tla yakaj yotexchiuili itlaj tlen xkuajli, kanaj tikmachiliskej ouijtika tikteijliskej tlen topan nochiua (Prov. 18:19). Noijki, kanaj tikmachiliskej ika xtikpiyaj tiempo nion chikaualistli tlen noneki niman ijkon tikinpiyaskej amigos. San ika, maka matosiaujkauakan. Tla tiknekij ika tokniuan matechpaleuikan ijkuak tikixnamikiskej tlen ouijtika, noneki ika aman matiuelikan matikimijlikan tlen tiknemiliaj niman tlen tikmachiliaj. Yejuin tlen techpaleuis matikinpiyakan akin yemelak amigos (1 Ped. 1:22). Jesús okiteititi ika tlaneltokaya intech iamigos pampa kuajli imiuan tlajtlajtouaya (Juan 15:15). Tejuamej noijki uelis ijkon tikchiuaskej tla tikteijliaj tlen techyolpaktia, tlen techajmana niman tlen techyolkokoua. Noijki, noneki kuajli tijkakiskej akin touan tlajtlajtos, pampa ijkon kanaj tikitaskej ika yejua noijki tlanemilia niman kimachilia ken tejuamej, niman kanaj noijki tikitaskej ika kineki kichiuas itekiyo toTajtsin ken tejuamej. Niman tejuamej kachtopa itlaj matikchiuakan niman ijkon tonojnotsaskej imiuan tokniuan (Prov. 27:9). w19.11 4 párrs. 8, 9

Ipan “on temojtij tlajyouilistli” kanaj nopatlas tlen tikteijliskej. Ipan yejuin tonaltin, tikteijliaj tlen kichiuas iTekiuajyo toTajtsin niman tokojtiliaj tikinmachtiskej oksekimej. San ika, ipan “on temojtij tlajyouilistli” kanaj tikteijliskej tlen miyekej xkuelkakiskej. Tlen tikijtoskej yes kentla “uejueyi tesiutli” (Apoc. 16:21). Kanaj tikteijliskej ika nochi tlen kiyekana Satanás ipopoliuis. Ika yolik, tikmatiskej tlenon tikteijliskej niman kenon tikchiuaskej. ¿Nopatlas ken titemachtiskej niman ken titenojnotsaskej? Noneki titlamachiaskej niman ijkon tikmatiskej. Maski san kenon nochiuas, nesi ika toTajtsin techmakas yejuin ueyi tekitl niman ijkon miyekej makimatikan tlen kichiuas (Ezeq. 2:3-5). Ijkuak tekiuajkej kikakiskej tlen tikteijliskej, kanaj kinekiskej techkamatsakuaskej. Ijkon ken aman tikneltokaj ika Jehová techpaleuiya ijkuak tontenojnotsaj, ipan yejon tonaltin noijki nonekis titlaneltokaskej itech Jehová. Uelis kuajli tikmatstoskej ika toTajtsin techmakas kojtilistli niman ijkon tikchiuaskej tlen yejua kineki (Miq. 3:8). w19.10 16 párrs. 8, 9

Tla melak tiknekij tikpiyaskej miyek tlemach maski nion xtechpoloua, uelis tikpoloskej totlaneltokil. Niman kanaj peuas tikinpiyaskej xkuajkualtin ileuilistin (1 Tim. 6:9). San ika, maka matijkauilikan ika yejon ileuilistin manoneluayotikan ipan toyojlo, yej matikimitakan ken “flechas” tlen kintekitiltia Satanás niman ijkon kijtlakos totlaneltokil. Matikonnemilikan ika tikpiyaj tomin niman ijkon tijkouaskej miyek tlemach. ¿Tikchiujtoskiaj tlen xkuajli tla tijkouaj tlen tiknekij tikpiyaskej maski nion xtechpoloua? Kanaj ka. San ika, matitlanemilikan itech yejuin: maski tikpiyaj tomin niman ijkon tijkouaskej itlaj, ¿tikpiyaj tiempo niman chikaualistli niman ijkon uelis tiktlajpiyaskej niman tiktekitiltiskej tlen tijkouaj? ¿Melak tiktlasojtlaj tlen tikpiyaj niman kanaj tikchiuaskiaj ken yejon telpochtli akin xokinek yas iuan Jesús niman xokinek chikauak kitekichiuilis Jehová? (Mar. 10:17-22). Melak kuajli tla tinemij san ika tlen noneki niman tla tiktekitiltiaj totiempo niman tochikaualis ipan itekiyo Jehová. w19.11 18 párrs. 15, 16

Jehová uelis techmakas kojtilistli niman ijkon tikchiuaskej tlen yotikijtokej (Filip. 2:13). Kuakon, matiktlajtlanilikan Jehová matechmaka espíritu santo niman ijkon tikpiyaskej kojtilistli tlen techpoloua. Matiknotstokan Jehová maski tikitaskej ika uejkaui technankilia. Jesús okijto ika Jehová techmakas espíritu santo, san ika, noijki okijto: “Xtlajtlanilikan Dios [...], niman yejua mechmakas” (Luc. 11:9, 13). Noijki, matiknemilikan kenijki tikchiuaskej. Tla tiknekij itlaj tikchiuaskej, noneki kuajli tiknemiliskej kenijki uelis tikchiuaskej. Kuakon, ijkuak tikijtoskej itlaj tikchiuaskej, matikchijchiuakan se amatsintli kampa matiktlalikan tlenon tikchiujtiaskej. Tla tikitaj ika itlaj melak ouijtika, matikijkuilokan okseki tlen techpaleuis matikchiuakan yejon, ijkon tikitaskej ika inochiujtiuj yejon tekitl. Apóstol Pablo okimijli corintios ika chijchikueyi tonajli makixelojtiakan intomin, niman maka nochiaskej hasta ijkuak ajsiskia niman kintlajtlaniliskia (1 Cor. 16:2). Melak kuajli tla tikxelouaj tekitl tlen noneki tikchiuaskej pampa yejon techpaleuis maka matisiauikan. w19.11 29 párrs. 13, 14

Kanaj tiknemiliaj ika tikixmatstokej Jehová pampa tikmatstokej kenon itoka niman tikmatij seki tlen yokijto niman yokichiuj. San ika, yejuin xkijtosneki tla kuajli tikixmatstokej. Noneki tikxeloskej tiempo niman ijkon tomachtiskej itech Jehová niman tikixmatiskej ikualneskayouan. Tla ijkon tikchiuaj, tikasikamatiskej tleka Jehová kichiua itlaj noso kijtoua itlaj. Yejuin techpaleuis matikitakan tla kuelita tlen tikchiuaj niman tlen tiknemiliaj. Niman tla yotikasikamatkej tlen Jehová kineki matikchiuakan, aman noneki yejon tikchiuaskej. Kanaj sekimej techpijpinaujtiaj pampa tiknekij tiktekichiuiliskej Jehová, niman kanaj más ijkon texchiuiliskej tla kitaj ika yopeuj tiauej tlanechikoltin. San ika, toTajtsin xkeman techkauas tla itech titlaneltokaj. Niman tla ijkon tikchiuaj, uelis nochipa iuan touikaskej. ¿Yemelak ika uelis kuajli tikixmatiskej Jehová? Kema. w19.12 16, 17 párrs. 3, 4

Kemantika, tajtin kanaj najmanaj pampa kitaj ika ouijtika kimiskaltiskej inkoneuan, san ika, kokonej se tlateochiualistli tlen ualeua itech Jehová. Yejua kineki kinpaleuis. Kuajli kinkaki inteoyouan niman kinnankilia ika Biblia, ika toamatlajkuiloluan niman ika tlen kijtouaj niman kichiuaj oksekimej tajtin akin kuajli yokinmiskaltijkej inkoneuan. Noijtoua ika tiuejkauis 20 xiuitl niman ijkon tikiskaltis se konetl, san ika, tlen yemelak, tajtin nochipa kinmachtijtoskej inkoneuan. Melak kuajli tla tajtin kimititiaj ika kintlasojtlaj, tla kixelouaj tiempo niman ijkon imiuan nemiskej niman tla kinmachtiaj itech Biblia. Nochi yejuin melak kinpaleuis. Maka matikilkauakan ika tlatlamantik ken kokonej kipatiojkaitaj yejuin. San ika, miyekej melak kitlasojkamatij ika intajuan okinmachtijkej makitlasojtlakan Jehová ijkon ken yejuamej. Ijkon nomachilia tokniuj Anna, akin ualeua Asia, yejua kijtoua: “Melak niktlasojkamati ika notajuan onechmelajkatlalijkej niman ika onechmachtijkej maniktlasojtla Jehová. Xsan onechmakakej nonemilis, noijki onechmachtijkej kenon niyolpakis” (Prov. 23:24, 25). Miyekej tokniuan noijki ijkon kijtoskiaj itech intajuan. w19.12 27 párrs. 21, 22

Nemij miyekej tokniuan akin kinekij yakaj makinyolseui, ika yejon, xouijtika tikmatiskej akinomej uelis tikinpaleuiskej. Ika yejon, noneki tikitaskej kenon uelis titeyolseuiskej maski kemantika techmojtia tikchiuaskej yejon. Kanaj tomojtiaj pampa xtikmatij tlenon tikijtoskej noso tlenon tikchiuaskej ipampa akin tlajyouijtika. San ika, melak tepaleui tla tajmanaj inpampa akin noyolajmanaj. Aman ika itinemij ipan sa itlamiyan tonaltin, miyekixtias tlen xkuajli niman más ouijtika tinemiskej (2 Tim. 3:13). Noijki, pampa titlajtlakolejkej niman miyekpa topopolouaj, nochipa nonekis matechyolseuikan. Apóstol Pablo ouel otlaxiko ipan nochi inemilis pampa tokniuan kiyolseuiayaj. Kuakon, maka keman matikinkauakan tokniuan. Tla ijkon tikchiuaj, tikinpaleuiskej tokniuan nochipa makitekichiuilikan Jehová (1 Tes. 3:2, 3). w20.01 12, 13 párrs. 17-19

Akin tlapejpeniltin xkichiaj ika oksekimej makinueyikaitakan (Filip. 2:2, 3). Kimatstokej ika, ijkuak Jehová okintlapejpeni, xokichiuj ika nochimej makimatikan. Ika yejon, se tokniuj tlapejpenijli xmojkatlachia ijkuak sekimej xmás kineltokiliaj ika toTajtsin yokitlapejpeni. Kimatstokej ika Biblia techmachtia ika xnoneki nimantsin tikneltokiliskej akin kijtos ika toTajtsin yokimakak se ueyi tekitl. Yejuamej xnoueyimatij, ika yejon, ijkuak yakaj kemach kixmatij, xkijliaj ika yejuamej tlapejpeniltin. Noijki xkiteijlitinemij ika yejuamej yaskej iluikak (1 Cor. 4:7, 8). Akin tlapejpeniltin xkintejtemouaj oksekimej akin noijki tlapejpeniltin niman ijkon nonojnotsaskej itech kenon Jehová okintlapejpeni. Nion xkichiuaj grupos kampa san yejuamej nomachtiskej Biblia (Gál. 1:15-17). Tla ijkon kichiuaskiaj, tlanechikojli xexeliujtoskia niman yejuamej kixnamiktoskiaj iespíritu santo toTajtsin. ¿Tleka ijkon tikijtouaj? Pampa espíritu santo kichiua ika tokniuan ipan tlanechikojli san sekan manemikan niman nochimej mayolseujtokan (Rom. 16:17, 18). w20.01 28 párrs. 6, 7

Ajsis tonajli ijkuak yejon tlaltikpakchanejkej akin okitakej kenon okipopolojkej inreligión melak kualaniskej ijkuak kitaskej ika iteixpantijkauan Jehová xpopoliui inreligión. Kuajli tikmatstokej ika yejuin nochiuiyan nomatis, hasta ipan redes sociales kisas yejon. Satanás niman tekiuajkej, akin yejua kinyekana, techtlauelitaskej pampa san toreligión ok onias ipan yejon tonaltin. Kitaskej ika xouelkej okipopolojkej nochi religiones itech yejuin tlaltikpaktli. Ika yejon, nochimej san totech tlajtoskej. Ijkuakon, tekiuajkej nokuepaskej Gog de Magog. Nosentlaliskej niman ijkon kixnamikiskej ikalpan Jehová (Ezeq. 38:2, 14-16). Pampa xtikmatij nochi tlen panos, kanaj tomojtiaj. San ika, onka itlaj tlen kuajli tikmatstokej: xkipiya ika tikmakasiskej “on temojtij tlajyouilistli”, pampa Jehová techijlis kenon timakisaskej (Sal. 34:19). w19.10 16 párrs. 10, 11

Tejuamej xsan tikmachiliaj ipan toyojlo ika tiktlasojkamachiliaj Jehová, noijki tikititiaj ika tlen tikijtouaj niman ika tlen tikchiuaj. Tejuamej xtikchiuaj ken oksekimej tlaltikpakchanejkej, akin xkitlasojkamatij tlen toTajtsin kichiua inpampa. Biblia yokijtoka ika miyekej ijkon kichiuaskiaj ijkuak tinemiskiaj ipan sa itlamiyan tonaltin (2 Tim. 3:1, 2). Maka keman matikchiuakan ken yejuamej. Jehová kineki ika nochimej ikoneuan kuajli manouikakan. Pampa tikintlasojtlaj tokniuan, miyekej kitaj ika tejuamej melauak tikchiuaj ken Cristo (Juan 13:35). Se itekipanojkauj Jehová okijkuilo: “Xkitakan ken kuajli niman kualtsin ijkuak nemij san sekan ikoneuan Dios ikan tetlajsojtlalistli” (Sal. 133:1). ¿Xmelak ika noijki ijkon tomachiliaj ken yejuin salmista? Ijkuak tikintlasojtlaj tokniuan, noijki tikititiaj Jehová ika tiktlasojtlaj (1 Juan 4:20). Melak kualtsin ika tikinpiyaj miyekej tokniuan, yejuamej kuajli tenotsaj, tetlasojtlaj niman teikneliaj (Efes. 4:32). w20.02 9 párrs. 6, 7

Tlen kiyolajmanaya Ana, xnimantsin opopoliuj. Yejua ok chantiya iuan Peniná. Niman Biblia xkijtoua tla Peniná onopatlak. Kuakon, uelis tikijtoskej ika Peniná ok kijliaya tlen teyolkoko. San ika, aman Ana yolpakiya niman xok najmanaya. Ijkuak Ana okineltokak ika Jehová kikakiskia iteoyouj, yejua xok onoyolajman. Okinokauili makiyolseui Jehová. Oajsik tonajli ijkuak Ana okinpix ikoneuan, Jehová ijkon okinankili iteoyouj (1 Sam. 1:2, 6, 7, 17-20). Uelis oksejpa tinemiskej ika toyojlo maski xpopoliui tlen kichiua matajmanakan. Seki tlemach tlen tikixnamikij kanaj xpopoliuiskej maski tikchiuaskej teoyotl niman maski nochipa tiaskej tlanechikoltin. San ika, tlen ipan onochiuj Ana techititia ika Jehová nochipa techyolseuis, niman xitlaj uelis kitsakuilis ijkon makichiua. Jehová xkeman techilkauas, niman ajsis tonajli ijkuak yejua techteochiuas pampa otitlaxikojkej (Heb. 11:6). w20.02 22 párrs. 9, 10

Ijkuak tokniuan tlayekankej kitaj ika se tokniuj itlaj ipan nochiujtika, tokniuan tlayekankej kilnamiktiaj tlen kijtoua Biblia tlen kipaleuis makichiua tlen kuajli. ¿Tleka melak noneki matoyolchikauakan titlajtoskej ijkuak nonekis? Matitlajtokan itech Elí. Ueyi teopixki Elí kinpiaya omemej ikoneuan akin melak kintlasojtlaya. San ika, yejuamej nion xkitlakaitayaj Jehová. Yejuamej kipiayaj se ueyi tekitl ipan tabernáculo pampa teopixkej katkaj. San ika, xkichiuayaj intekiyo ken kinamikiya pampa san “kajauilmatiyaj on uentli” tlen israelitas kimakayaj Jehová niman melak auilnemiyaj (1 Sam. 2:12-17, 22). Tlanauatijli tlen okimakakej Moisés kijtouaya ika akin ijkon kichiuaya, nonekiya kimiktiskej. San ika, Elí kinkauiliaya ikoneuan makichiuakan tlen xkuajli. San okinyemankanojnots niman okinkauili ok manemikan ken teopixkej ipan tabernáculo (Deut. 21:18-21). ¿Okuelitak Jehová tlen okichiuj Elí? Jehová okijli yejuin ueyi teopixki: “¿Tline más tikintlajsojtla mokoneuan xken nejua[?]”. Ika yejon, Jehová okijto ika kinmiktiskia yejon omemej tlakamej akin melak xkuajkualtin katkaj (1 Sam. 2:29, 34). w20.03 19 párrs. 4, 5