Agosto

Maski ijkuak okitlaueltokakej, Jesús ika iyojlo nemiya. ¿Tleka? Pampa kimatstoya ika kiyolpaktijtoya iTaj. Nochipa okitlakamat maski melak ouijtika tlen okixnamik. Yejua onosentemakak itech Jehová pampa kitlasojtlaya. Ijkuak xiuajlaya ipan tlaltikpaktli, otekit iuan toTajtsin (Prov. 8:30). Niman, ijkuak ouajla, okiyolpakti temachtis tlen melauak itech iTaj (Mat. 6:9; Juan 5:17). Yejuin tekitl melak okiyolpakti (Juan 4:34-36). Tikchiuaj ken Jesús ijkuak tiktlakamatij Jehová niman ijkuak miyek tikchiuaj ipan itekiyo (1 Cor. 15:58). Akin nokojtilia melak tenojnotsas tlamantik kita tlen kixnamiki (Hech. 18:5). Xnemili, akin tikinnojnotsaj más ouijtika kenon nemij. San ika, ijkuak peua kitlasojtlaj Jehová niman kichiuaj tlen kintlajtlanilia, más kuajli nemij niman melak yolpakij. Ijkuak tikitaj ika ijkon panoua, techpaleuiya matikneltokakan ika Jehová techtlajpiyas. w19.04 10, 11 párrs. 8, 9

Ken tikitaj, yejuamej okinejkej kimixnamikiskej xkuajkualtin espíritus. Maski yejon libros de magia melak patiojkej katkaj, yejuamej okintlatijkej niman xokintetlayokolijkej nion xokinnemakakej. Yejuamej yemelak kinekiyaj kiyolpaktiskej Jehová. ¿Kenon noijki uelis ijkon tikchiuaskej? Tla tikpiyaj itlaj ken amuletos noso okse itlaj tlen miyekej kikuij niman ijkon nopaleuiskej intech xkuajkualtin espíritus, melak kuajli tla tiktlajkalij (1 Cor. 10:21). Kuajli matikitakan tlenon ika toyolpaktiaj. Matotlajtoltikan: “¿Ninoyolpaktia ika itlaj tlen kipiya naualyotl?”. Matikitakan ika tlen tikchiuaj makiyolpakti toTajtsin. Tiknekij ika totlamachilis maonia chipauak ixpan Jehová (Hech. 24:16). w19.04 22, 23 párrs. 10-12

Ijkuak kimijliaj tlayekankej ika yakaj yokichiuj se ueyi tlajtlakojli, yejuamej miyek tlen kinmajmana. Yejuamej melak kinekij machipaujto itoka toTajtsin (Lev. 22:31, 32; Mat. 6:9). Noijki melak kinekij ika tokniuan chikauak makipiyakan intlaneltok niman kinekij kinpaleuiskej akin yokinchiuilijkej tlen xkuajli. Niman tla yakaj akin nemi ipan tlanechikojli kichiua tlajtlakojli, tlayekankej kiyejyekouaj kipaleuiskej oksejpa manouika iuan Jehová, tla kitaj ika ok uelis kipaleuiskej (Sant. 5:14, 15). Akin kichiua tlen kileuiya itlalnakayo niman kichiua se ueyi tlajtlakojli, kijtosneki ika xchikauak itlaneltok, kentla kualoskia. Yejuin noijki kijtosneki ika xok kuajli nouika iuan Jehová. Tlayekankej kentla tepajtikej yeskiaj. Yejuamej kiyejyekouaj kipajtiskej tokniuj kokoxki, tikteneujtokej akin okichiuj tlajtlakojli. Tlen yejuamej kijliskej itech Biblia uelis kipaleuis oksejpa manouika iuan toTajtsin. San ika, yejuin san uelis panos tla akin otlajtlako yemelak noyolkuepa (Hech. 3:19; 2 Cor. 2:5-10). w19.05 10 párrs. 10, 11

Jehová uelis kichiuas matiknekikan matikchiuakan tlen yejua kineki. Kanaj tikmatiskej ika itlaj noneki nochiuas ipan totlanechikol noso ika oksekan nonekij tenojnotskej. Kanaj totlajtoltiskej tlenon uelis tikchiuaskej niman ijkon titepaleuiskej. Noso kanaj yotikselijkej se tekitl tlen ouijtika niman tiknemiliaj ika xuelis tikchiuaskej. Noijki, kanaj ijkuak tikpouaj itlaj ipan Biblia, tiknemiliaj kenon uelis tijkuiskej yejon niman ijkon tikinpaleuiskej oksekimej. Tla Jehová kita ika tiknekij okseki itlaj tikchiuaskej, yejua techpaleuis matiknekikan matikchiuakan yejon. Jehová noijki uelis techmakas kojtilistli niman ijkon matikchiuakan tlen kineki (Is. 40:29). Ika iespíritu santo, uelis kichiuas melak kuajli matikchiuakan itlaj (Éx. 35:30-35). Niman itechkopa ikalpan uelis techmachtis kenon tikchiuaskej seki tekitl. Tla itlaj xtikmatij kenon tikchiuaskej, matiktlajtlanikan matechpaleuikan. Noijki, uelis tiknotsaskej toTajtsin maski san kemanon niman uelis tiktlajtlaniliskej “on ueyi poder yejuan [...] xtotech kisa” (2 Cor. 4:7; Luc. 11:13). w19.10 21 párrs. 3, 4

Miyekej kinyolchikauaj oksekimej sa no yejuamej manotlasojtlakan. Se enciclopedia kijtoua ika kanaj ipan xiuitl 1970 ika tlayekapan, melak miyek okinkixtijkej amoxtin tlen tlajtouaj itech kenon se uelis kuajli nomachilis. Seki amoxtin kiteijliayaj ika se nonekiya noixmatis, pakis ken nemi niman ika xnonekiya nopatlas. Se amoxtli teijlia ika sa no tejua xmotlasojtla, pampa xakaj nemi akin sajnoye makualtsin, akin melak mateyolpakti niman akin makipatiojkaitakan ken tejua. Yejuin amoxtli kijtoua ika toseselti noneki tikitaskej kenon tinemiskej niman ika noneki tikchiuaskej tlen tejuamej tikmachiliskej ika kuajli niman ika tepaleui. ¿Xmelak ika yotikajkaj yejuin? Satanás okijli Eva noijki ijkon makichiua. Okijli ika yejua ueliskia nochiuas ken toTajtsin niman ika kasikamatiskia “on tlen kuajli niman on tlen xkuajli” (Gén. 3:5). Ipan yejuin tonajli, miyekej kinemiliaj ika uejueyixtokej niman ika xakaj, nion toTajtsin, uelis kimijlis tlenon kuajli niman tlenon xkuajli. Yejuin noijki yokichiuj ika manopatla ken miyekej kitaj namiktilistli. w19.05 23 párrs. 10, 11

Tekiuaj David noijki okixnamik tlen ouijtika. Matikitakan seki tlen okixnamik. Yejua melak onajman pampa miyekpa onopopolo (Sal. 40:12). Ikoneuj akin itoka katka Absalón okixnamik, niman sakin okimiktijkej Absalón (2 Sam. 15:13, 14; 18:33). Noijki, se iamigo akin melak iuan nouikaya okikajkayauj (2 Sam. 16:23-17:2; Sal. 55:12-14). Ipan salmos tlen okimijkuilo nesi kenon melak najmanaya, san ika, noijki nesi kenon melak tlaneltokaya itech Jehová (Sal. 38:5-10; 94:17-19). Sakin, se salmista noijki melak onajman, yejua tekitiya ipan “iyektiopan Dios” niman kanaj katka iuejkachanejkauj levita Asaf. Yejua opeuj kinexikolita kenon kuajli nemiyaj akin xkuajkualtin, niman yejon okichiuj maka mapaki niman melak manajmana. Hasta opeuj kinemilia ika xueyi kijtosnekiya ken Jehová kinteochiuaya itekipanojkauan (Sal. 73:2-5, 7, 12-14, 16, 17, 21). w19.06 17 párrs. 12, 13

Satanás kikui tlen melak tiknekij. Tinochimej tiknekij tikpiyaskej tlen techpoloua niman tikinmakaskej tochanejkauan tlen kinpoloua. Ika yejon, tiknekij tiueliskej se tekitl (1 Tim. 5:8). Niman tikchiuaj yejuin ijkuak tiauej escuela niman ijkuak kuajli tomachtiaj. San ika, noneki totlajpiyaskej. Ipan miyek países, xsan temachtiaj tlen uelis tepaleuis, noijki temachtiaj tlen kinemiliaj tlaltikpakchanejkej. Kimijliaj akin yauej escuela maka matlaneltokakan itech toTajtsin niman maka makipatiojkaitakan Biblia. Kimijliaj ika tejuamej tiyoltokej ipampa evolución, niman akin tlamachilisejkej tlaneltokaj itech yejon (Rom. 1:21-23). Nochi yejon tlanemililtin kixnamiki ken toTajtsin tlanemilia (1 Cor. 1:19-21; 3:18-20). Maka keman matokauilikan ika Satanás matechkajkayaua “ika on xkuajli temachtilistli tlen xmelauak” (Col. 2:8). Nochipa matotlajpiyakan itech ken tekajkayaua (1 Cor. 3:18). Maka matokauilikan ika Satanás makichiua matikilkauakan akinon Jehová niman kenon kineki matiktekichiuilikan. Matikintlakamatikan itlanauatiluan Jehová. Niman maka matijkauilikan ika Diablo makichiua maka matiktlakamatikan tlen toTajtsin techijlia. w19.06 5 párr. 13; 7 párr. 17

Maski san itech tlenon titlajtoskej, matitlanemilikan intech tlaltikpakchanejkej. Matiknemilikan kenon melak kinpaleuis tla uelij tlen Biblia temachtia. Ijkuak imiuan tonojnotstoskej, melak noneki matikinkakikan niman matikintlakaitakan. Tla ijkon tikchiuaj, kuajli tikimasikamatiskej niman kinekiskej techkakiskej. Yakaj kinekis touan nomachtis Biblia tla miyekpa tikontlajpalouaj niman tla xtosiaujkauaj. ¿Tleka? Pampa kemantika xnemi ichan noso kemantika xuelis touan tlajtlajtos. Noijki, kanaj nonekis miyekpa tikontaskej niman ijkon kuajli matechixmati. Sakin, kanaj kinekis touan nomachtis. Matikilnamikikan, tla tiknekij manoskalti tlen tiktokaj, noneki miyekpa tikatekiskej. Noijki ijkon, tla miyekpa yakaj tiknojnotsaj itech Biblia, yejua uelis kitlasojtlas Jehová niman Jesús. w19.07 14 párr. 1; 15, 16 párrs. 7, 8

¿Tlenon kijtosnekij yejuin tlajtoltin? Jesús xokiteasikamachilti tla akin tikchiuaj ken Cristo tikuelitaskiaj matechtlauelitakan, yejua san okijto tlen panoskia. Techtlauelitaj pampa xtikchiuaj ken miyekej tlaltikpakchanejkej, tejuamej tiktlakamatij tlen Jesús otechmachti niman tikteijliaj tlen yejua yotechijli (Juan 15:18-21). Tiknekij tikyolpaktiskej Jehová. Tla tlaltikpakchanejkej techtlauelitaj pampa tiktlasojtlaj toTajtsin, no yejuamej ompa makitakan. Maka matiknemilikan ika xkuajli tinemij san pampa xtikinyolpaktiaj oksekimej. Xtikmatij kemanon techtlaueltokaskej noso kemanon tekiuajkej xok techkauiliskej matikueyichiuakan Jehová. San ika, kema tikmatij ika aman uelis toyektlalijtiaskej tla más kuajli touikaj iuan Jehová, tla tokojtiliaj más tiyolchikaujkej yeskej niman tla tomachtiaj tlenon tikchiuaskej ijkuak techtlauelitaskej. Tla aman toyektlaliaj, techpaleuis matimelajkanemikan ika tlayekapan. w19.07 6 párrs. 17, 18; 7 párr. 21

Ijkuak tikinmachtijtoskej itech Biblia akin xkipiyaj se religión, nochipa noneki tikinpaleuiskej makineltokakan ika yemelak nemi toTajtsin. Noijki noneki tikinpaleuiskej matlaneltokakan itech Biblia. Yejua ika, kanaj nonekis miyekpa imiuan tomachtiskej seki tlamachtiltin. Ijkuak tikinmachtiskej, kanaj nonekis tikitaskej tlenon techititia ika Biblia yemelak iTlajtol toTajtsin. Kanaj uelis imiuan tomachtiskej kenon seki teotlajtoltin yonochiujkej, kenon Biblia xnopopoloua ijkuak tlajtoua itech ciencia niman itech historia, noso uelis tikitaskej kenon melak tepaleui Biblia. Ijkuak tikintlasojtlaj akin kipiyaj se religión niman akin ka, tikinpaleuiyaj manochiuakan inomachtijkauan Cristo (1 Cor. 13:1). Tiknekij tikinmachtiskej pampa tiknekij tikimititiskej ika toTajtsin techtlasojtla niman ika kineki matiktlasojtlakan. Sejse xiuitl, noapolaktiaj miyekej akin xkinekiyaj nemiskej ipan se religión noso akin xmás kinekiyaj nomachtiskej, san ika, yopeujkej kitlasojtlaj toTajtsin. Yejua ika, maka matosiaujkauakan, matikteititikan ika nochimej tikintlasojtlaj niman ika tiknekij titepaleuiskej. Matikinkakikan niman matikyejyekokan tikimasikamatiskej. Ika tlen tikchiuaj, matikimititikan kenon kichiuaskej ken Cristo. w19.07 24 párrs. 16, 17

Jehová okintekitilti ichpochuan Salum niman ijkon makiyektlalikan itepanuan Jerusalén (Neh. 2:20; 3:12). Maski Salum katka se ueyixtika tlayekanketl, ichpochuan okinejkej kichiuaskej yejon tekitl maski melak ouijtika katka niman maski ueliskia itlaj inpan nochiuas (Neh. 4:15-18). Aman, nemij tokniuan siuamej akin melak yolpakij pampa tlapaleuiyaj ijkuak nochijchiuaj niman noyektlaliaj kaltin kampa tikueyichiuaj Jehová. Tlen yejuamej uelij kichiuaj, inpakilis niman pampa melajkanemij, kichiua kuajli manochiua yejuin tekitl. Jehová okiyolmapeuj Tabita makichiua miyek “tlen kuajli” niman makinpaleui akin “itlaj kimpolouaya”, más akin siuakaualtsitsintin (Hech. 9:36). Pampa Tabita melak kuelitaya tetlatlayokolis niman pampa yolkuajli katka, miyekej okichokilijkej ijkuak omik. San ika, melak oyolpakej ijkuak apóstol Pedro okiyoliti (Hech. 9:39-41). ¿Tlenon tiuelij itech Tabita? Ika maski titelpokamej noso itiueuentsitsintin, titlakamej noso tisiuamej, tinochimej uelis tikinpaleuiskej tokniuan. w19.10 23 párrs. 11, 12

¿Kenon ueliskia tikchiuaskej ika yakaj matlajtlako? Matitlanemilikan ipan yejuin, se tlakatl akin melak koni alcohol peua nomachtia Biblia niman nokojtilia xok konis alcohol. Ajsi tonajli ijkuak kuajli kikajkaua alcohol. Kasikamati ika xok kipiya ika oksejpa konis alcohol. Kuakon, kipatla inemilis niman noapolaktia. Sakin, se tokniuj kinotsa ichan iuan oksekimej tokniuan niman kitekiuiltia alcohol, kijlia: “Uelis tikonis maski san achijtsin alcohol tla tiueli sa no tejua timoteltia”. San matikonnemilikan tlenon panoskia tla tokniuj akin yeuejkaui koniya alcohol kitlakamati yejuin tokniuj akin kijtoua tlen xkinamiki. Tlanechikoltin melak techpaleuiyaj matikchiuakan tlen kijtoua on tlaxelojli tlen aman tikitstokej. Ompa techilnamiktiaj tlenon kita Jehová ika más ueyi kijtosneki. Noijki techititiaj kenon tikchiuaskej tlen tomachtiaj niman ijkon tichipaujkanemiskej. Ompa noijki techyolchikauaj matiktlasojtlakan Jehová niman matikintlasojtlakan. Niman yejuin tlasojtlalistli kichiuas maka matikinyemanilikan intlaneltokil oksekimej. w19.08 10 párr. 9; 11 párrs. 13, 14

Nemij sekimej akin melak yolchikaujkej noso nimantsin kijtouaj tlen kinemiliaj, san ika, kemantika yejuamej xnoueyimatij (Juan 1:46, 47). Maski san kenon tiyeskej, tinochimej noneki tokojtiliskej niman ijkon yemelak tiyolyemankej yeskej. Matikitakan tlenon okichiuj apóstol Pablo. Jehová okitekitilti niman ijkon miyekan makinpeualti tlanechikoltin. Hasta uelis tikijtoskej ika nion se iapóstol Jesucristo xmiyekan otenojnotstinen ijkon ken apóstol Pablo. Okijto ika yejua kuajli nouikaya iuan Jehová “ipampa iueyitetlajsojtlalis Dios”, niman xpampa yejua ueyixtoya noso pampa miyek yokichiujka ipampa Jehová (1 Cor. 15:10). Kuajli tikitaj ika Pablo okiteititi ika yolyemanki katka ijkuak okomintlajkuilouili corintios, maski kimatstoya ika sekimej kitejteneuayaj (2 Cor. 10:10). w19.09 3 párrs. 5, 6

Kemantika ouijtika tikmachiliaj tokauiliskej Jehová matechyekana pampa titlajtlakolejkej. Ika yejon, miyekpa xtiknekij tiktlakamatiskej. Ijkuak Adán iuan Eva okixnamijkej toTajtsin niman okikuajkej tlen yejua okimijlika maka makikuakan, yejuamej okitlalijkej intlanauatiluan (Gén. 3:22). Ijkon ken yejuamej, aman miyekej xkinekij kitlakamatiskej toTajtsin niman san yejuamej kijtouaj tlenon kuajli niman tlenon xkuajli. Hasta tejuamej akin tikixmatij niman tiktlasojtlaj Jehová kanaj ouijtika tikmachiliaj tokauiliskej Jehová matechyekana. Yejon tlen ipan onochiuj apóstol Pablo (Rom. 7:21-23). Ijkon ken yejua, tiknekij tikchiuaskej tlen toTajtsin kuelita. San ika, noneki tokojtiliskej pampa titlajtlakolejkej niman kemantika tiknekij tikchiuaskej tlen xkuajli. Noijki ken otechiskaltijkej uelis kichiuas ouijtika matikmachilikan tokauiliskej Jehová matechyekana. Tlen kinemiliaj miyekej tlaltikpakchanejkej kemantika xnotlajtolnamiki ika tlen toTajtsin kijtoua, niman kanaj nonekis nochipa tokojtilijtoskej xok ijkon titlanemiliskej. w19.09 15 párrs. 4-6

Noneki tikasikamatiskej ika tokojtilis san ontlami. Yejua ika, kuajli tla tikitaj kenon tijkuij tokojtilis. Kanaj sajnoye totekimiktijtokej ipampa tomin noso ipampa okseki tlen xnoneki. Matikitakan kenon okinankili Jesús se telpochtli akin kipiaya miyek tomin ijkuak okitlajtolti: “¿Tlinon nikchiuas para nikselis on nemilistli yejuan para nochipa?”. Yejuin telpochtli kanaj yolkuajli katka pampa ipan ievangelio Marcos kijtoua ika Jesús okikneli. Yejua ika, Jesús okijli tlen kijtoua tlaxelojli tlen aman tikitstokej. Yejuin telpochtli kinekiya nochiuas inomachtijkauj Jesús, san ika, nesi ika más kitlasojtlaya nochi itomin (Mar. 10:17-22). Tikitaj ika yejuin telpochtli xokinek kinomamaltis iyugo Jesús, okinek kinotekimakas tomin (Mat. 6:24). ¿Niman tejuamej tlenon tikchiuaskiaj? Melak kuajli tla nochipa toixtlalojtokej niman ijkon tikitaskej ipampa tlenon totekimiktijtokej. ¿Tleka? Pampa ijkon tikitaskej tla kuajli tijkuitokej tokojtilis. w19.09 24 párrs. 17, 18

Ok titenojnotstoskej hasta ijkuak Jehová kijtos ika xok tikchiuaskej yejuin tekitl. ¿Kech tiempo kipiyaj tlaltikpakchanejkej niman ijkon ueliskej kixmatiskej Jehová niman Jesucristo? (Juan 17:3). Yejon xtikmatij. San ika, kema tikmatstokej ika aman ika xipeua “on temojtij tlajyouilistli”, nochimej akin kinekij kipiyaskej nemilistli tlen xkeman tlamis uelis kikakiskej tlen tikteijliaj (Hech. 13:48). ¿Kenon uelis tikinpaleuiskej yejuin tlaltikpakchanejkej aman ika ok ueli? Itechkopa ikalpan, Jehová techmakatika nochi tlen noneki niman ijkon matitemachtikan tlen melauak. San matikonnemilikan yejuin, ipan tlanechikojli tlen tikpiyaj ipan semana, Jehová techmachtia kenon titemachtiskej. Ompa tiuelij tlenon tikijtoskej ijkuak tipeuaskej tonojnotsaskej iuan yakaj niman ijkuak oksejpa tontetlajpaloskej. Niman tla tijkauiliaj se tratado noso se revista akin kuajli iuan yotonojnotskej, yejua kipiyas tlen uelis kipoujtias hasta ijkuak oksejpa uelis iuan toitaskej. Toseselti noneki tikitaskej tla titenojnotstokej nochi metstin. w19.10 10 párrs. 7, 9, 10

Simeón katka se tlakatl yolmelajki akin youeuentsintiaka niman ualeuaya Jerusalén. Jehová okijlika ika achto ika mikiskia kitaskia Mesías. Kanaj yejuin melak okiyolchikauj pampa youejkaujka ika kichiatoya Mesías. Jehová okiteochiuj pampa otlaneltokak niman otlaxiko. Se tonajli, “Espíritu Santo okuikak Simeón para oyaj ipan on ueyitiopan”, niman ompa okitak Jesús. Kuakon, Jehová okitekitilti niman ijkon makijto tlenon ipan nochiuaskia yejon konetsintli, akin yeskia Cristo (Luc. 2:25-35). Maski kanaj Simeón xokitak kenon otenojnots Jesús, kema okitlasojkaitak ika Jehová ijkon okitekitilti. Niman melak kualtsin yes ika ipan yenkuik tlaltikpaktli, yejuin tlakatl akin oyolmelajkanen kitas ika itekiuajyo Jesús kichiuas ika nochimej kuajli manemikan (Gén. 22:18). Tejuamej noijki uelis tiktlasojkamachiliskej Jehová pampa techkauilia matiktekichiuilikan. w19.10 22 párr. 7; 23 párr. 12

Maski tla tikpiyaj miyek tlemach noso ka, noneki tiktlajpiyaskej toyojlo. ¿Kenon uelis tikchiuaskej yejuin? Tla xtiktlasojtlaj tomin niman tla más tikpatiojkaitaj tiktekichiuiliskej Jehová xijkon ken totekiyo. Matotlajtoltikan yejuin: “¿San nitlanemilijtika itech notekiyo ijkuak ninemi ipan tlanechikojli noso ijkuak nitenojnotstika? ¿San nitlanemilijtika itech kenon ninopanoltis ika tlayekapan? ¿Nikpiya tlauejli iuan nosiuauj noso noueuentsin san ipampa tomin noso okseki tlemach? ¿Nikseliskia se tekitl tlen miyekej xkuelitaj tla yejon nechkauiliskia más kuajli maniktekichiuili Jehová?” (1 Tim. 6:9-12). Ijkuak totlajtoltiskej nochi yejuin, matikilnamikikan ika Jehová techtlasojtla niman kimijlia yejuin akin kitekichiuiliaj ika nochi inyojlo: “Xkaman nimitskauas nion nimitstlalkauis”. Ika yejon, apóstol Pablo okijto yejuin: “Maka sanoyej xnekikan nenkipiyaskej tomin” (Heb. 13:5, 6). w19.10 29 párr. 10

Ijkuak san sekan itlaj tikchiuaj imiuan tokniuan niman tikitaj inkualneskayouan, miyek tlemach tiuelij intech niman más kuajli imiuan touikaj. Se neskayotl, tla tontenojnotsaj iuan se tokniuj niman tla tijkakij kenon kuajli kitetomilia tlen tikneltokaj niman kenon melak kuajli tlajtoua itech Jehová niman itech tlen yejua kichiuas, kanaj yejon kichiuas melak matiktlasojtlakan. Adeline, se tokniuj akin kipiya 23 xiuitl, okitlajtlanili iamiga, Candice, san sekan mauiyan kampa xmiyekpa notenojnotsa. Adeline kijtoua: “Tiknekiyaj toyolchikauaskej niman más tiyolpakiskej ijkuak titenojnotsaskej. Tiomemej tiknekiyaj tikchikauaskej totlaneltokil”. ¿Kenon okinpaleui san sekan tenojnotsaskej? Adeline technankilia: “Ijkuak tlamiya tonajli, titlajtlajtouayaj itech kenon tomachiliayaj, kenon otechyolchikaujka ken otonojnotskej imiuan tlaltikpakchanejkej niman kenon otikitakej ika Jehová otechyekanka. Tiomemej tikuelitayaj ijkon tonojnotsaskej, niman melak kuajli otoixmatkej”. w19.11 5 párrs. 10, 11

Yeuejkaui, melak pinauiya yejon soldado akin ajsiya ichan niman xkitkiya iescudo. Ixtlamatki romano Tácito okijkuilo ika melak tepinajti katka tla se kuajkaujteuaya iescudo. Yejua ika, soldados chikauak kajsiyaj iminescudo ijkuak tlauijsokiyaj. ¿Tlenon uelis tikchiuaskej niman ijkon noijki xkeman tikmakauaskej toescudo noso nochipa titlaneltokatoskej? Noneki nochipa tiaskej tlanechikoltin niman tikinnojnotsaskej oksekimej itech itokayo Jehová niman itech iTekiuajyo (Heb. 10:23-25). Noijki, noneki mojmostla tikpouaskej iTlajtol toTajtsin niman tiktlajtlaniliskej Jehová matechpaleui matikchiuakan tlen tomachtiaj (2 Tim. 3:16, 17). Tla ijkon tikchiuaj, xtechijtlakos nion se “flecha” tlen kitekitiltis Satanás (Is. 54:17). Totlaneltokil techtlajpiyas, timelajkanemiskej niman kuajli titekitiskej imiuan tokniuan. Noijki titetlantoskej ipan guerra tlen mojmostla tikpiyaj. San ika, tlen más ueyi kijtosneki, tikitaskej ijkuak Jesús kitlanis Satanás niman nochimej akin kipaleuiyaj (Apoc. 17:14; 20:10). w19.11 19 párrs. 18, 19

Tla tikijkuilouaj kenijki yotiknemilijkej tikchiuaskej itlaj, melak techpaleuis matikchiuakan (1 Cor. 14:40). Se neskayotl, tokniuan akin tlayekanaj ipan tlanechikojli kimijliaj makitekitlalikan se tlayekanketl akin makijkuilojtiuj tlenon kijtouaj kichiuaskej, akinon kichiuas niman kemanon tlamiskej. Tlayekankej akin kichiuaj ken kijtoua ikalpan Jehová melak kuajli kichiuaj tlen kijtouaj. Tejuamej noijki uelis tikchiuaskej yejuin. Kanaj uelis tikchijchiuaskej se amatsintli kampa uelis tikijkuilojtiaskej tlen techpoloua tikchiuaskej, niman kanaj uelis kachtopa tikijkuiloskej tlen más tiknekij tikchiuaskej. Yejuin xsan techpaleuis matitlamikan tlen otikpeualtijkaj, noijki techpaleuis matikchiuakan okseki tlemach. San ika, noijki noneki tokojtiliskej niman ijkon tikchiuaskej ken yotiknemilijkej niman titlamiskej tlen yotikpeualtijkej (Rom. 12:11). Apóstol Pablo okijli Timoteo manokojtilijto kuajli temachtis niman nochipa ijkon makichiujto. Yejuin tlen okijto Pablo uelis techpaleuis matikchiuakan tlen yotikijtokej tikchiuaskej ipan itekiyo Jehová (1 Tim. 4:13, 16). w19.11 29, 30 párrs. 15, 16

Ijkuak Jehová okitlajtlanili Moisés makimakixti ikalpan itech Egipto, Moisés kinemiliaya ika xueliskia kichiuas yejon tekitl niman miyekpa okijli Jehová kenon nomachiliaya. ToTajtsin okititi ika yemelak kikneliaya niman okipaleui (Éx. 4:10-16). Ipampa yejon, Moisés ouel oyaj ixpan faraón niman okijlito tlen toTajtsin kinemiliaya kichiuas. Sakin, Moisés okitak kenon Jehová melak kojtik ijkuak okitak kenon kimakixtijtoya ikalpan niman kenon “okamimiktij on rey de Egipto iuan isoldados ipan on Mar Rojo” (Sal. 136:15; Éx. 14:26-31). Sakin ika Moisés okinmakixti israelitas, yejuamej miyekpa kijtouayaj ika xkuelitayaj tlen inpan nochiujtoya. Ijkuakon yejua okitak kenon Jehová melak kijyouiaya ikalpan tlen okimakixtijka itech Egipto (Sal. 78:40-43). Moisés noijki okasikamat ika Jehová melak yolyemanki katka. Ijkon tikitaj pampa ijkuak yejua okitlajtlanili maka makichiua ken kinemiliaya, Jehová kuajli okikak (Éx. 32:9-14). Sakin ika Moisés niman israelitas okiskej itech Egipto, Moisés melak onouikak iuan Jehová hasta kentla “kitstikatka Dios” akin xakaj ueli kita (Heb. 11:27). w19.12 17 párrs. 7, 8; 19 párr. 9

Miyekej inomachtijkauan Jesús ualeuayaj Galilea. Yejuamej xonakiskiaj tla nosentlaliskiaj ipan se kajli ne Jerusalén. San ika, ipan tepetl tlen onkatka Galilea tlaueyi katka, ika yejon, miyekej ueliskiaj ompa nosentlaliskiaj. Noijki, Jesús yonosentlalijka imiuan iapóstoles ne Jerusalén sakin ika oyoliuj. Tla Jesús kinekiskia ika san 11 iapóstoles matenojnotsakan niman matemachtikan, san yejuamej kimijliskia ijkuak imiuan onosentlalijka. San ika, xijkon okichiuj, yejua okintlajtlanili iapóstoles niman oksekimej inomachtijkauan tlakamej niman siuamej manosentlalikan ne Galilea (Luc. 24:33, 36). Aman matikitakan okse tlemach tlen techititia ika Jesús xsan iapóstoles okinnauati makichiuakan yejon tekitl. Ijkuak Jesús kitemakatoya yejon tlanauatijli, yejua noijki okijto: “Nemouan ninemi hasta ijkuak sa achijtsin poliuis ijkuak tlamis tlajtlamach ken nochiua ipan tlaltikpaktli” (Mat. 28:19, 20, TNM). Ipan yejuin tonaltin melak miyekej tikinpaleuijtokej manochiuakan inomachtijkauan Cristo. Sejse xiuitl, kanaj 300,000 tlaltikpakchanejkej noapolaktijtokej. Kema, miyekej nochiujtokej iteixpantijkauan Jehová. w20.01 2 párr. 1; 3 párrs. 5, 6

Se tokniuj telpochtli kijliaj ika kipiya se kokolistli tlen kikixtilijtias ikojtilis. Okse tokniuj akin iueyi kikixtiaj ipan itekiyo. Se tokniuj siuatl akin iueyi, kita ika aman xok ueli kitekichiuilia Jehová. Tla noijki ijkon topan nochiujtika, kanaj tiknemiliaj ika xok titepaleuijkej. Niman yejuin uelis techijtlakos, uelis kichiuas maka sa matipakikan, maka kuajli matomachilikan niman noijki uelis kichiuas maka kuajli matouikakan iuan oksekimej. Satanás niman akin kichiuaj ken yejua nion xtechpatiojkaitaj. Satanás kita ika xtitepaleuijkej niman xtechtlakaita. Se tonajli okijli Eva ika sa no yejua ueliskia noyekanas, san ika, yejua kuajli kimatstoya ika Eva mikiskia tla xkitlakamatiya Jehová. Satanás kiyekana yejuin tlaltikpaktli. Ika yejon, miyekej akin uejueyixtokej xakaj kipatiojkaitaj niman xkinmajmana tlen kimachiliaj oksekimej. San ika, Jehová xijkon techita, yejua kineki kuajli matomachilikan niman techpaleuiya ijkuak tikixnamikij se tlauejli tlen kichiua matiknemilikan ika xtitepaleuijkej (Rom. 12:3). w20.01 14, 15 párrs. 1-4

Jeremías onen intsajlan akin xyolmelaujkanemiyaj kanaj 40 xiuitl, sekimej katkaj ivecinos niman kanaj sekimej katkaj ichanejkauan akin ualeuayaj Anatot, kampa ualeuaya Jeremías (Jer. 12:6). Jeremías okitejtemo akinon ueliskia iuan nouikas, okijli isecretario, Baruc, nochi tlen kimachiliaya. Baruc okijkuilo yejon niman hasta tejuamej uelis tikpouaskej (Jer. 8:21; 9:1; 20:14-18; 45:1). Tikmatstokej ika pampa san sekan nemiyaj ijkuak Baruc kijkuilojtoya nochi tlen ipan nochiujtoya Jeremías, okichiuj ika melak manotlasojtlakan niman manotlakaitakan (Jer. 20:1, 2; 26:7-11). Jeremías xonomojti kimijlis israelitas tlenon ipan nochiuaskia Jerusalén (Jer. 25:3). Pampa Jehová melak kinekiya ika tlaltikpakchanejkej manoyolkuepakan, okijli Jeremías makijkuilo ipan se tlajkuilolamatl tlen yokijtoka kichiuas (Jer. 36:1-4). Pampa kanaj Jeremías niman Baruc ouejkaujkej seki metstin ika okichiujkej yejuin tekitl, tikmatstokej ika yejuamej melak otlajtlajtokej niman ijkon onoyolchikaujkej. w19.11 3 párrs. 3, 4

¿Kenon noneki tikimitaskej tokniuan siuamej niman tlakamej akin tlapejpeniltin? Xkuajli yeskia tla yakaj melak tikueyikaitaskiaj, maski tla yejua tlapejpenijli, akin kixmatij ken ikniuj Cristo (Mat. 23:8-11). Ijkuak Biblia tlajtoua itech tlayekankej, kijtoua: “Xmouikakan ikan tlaneltoktli ken yejuamej”, san ika, xkijtoua tla noneki tikchiuaskej nochi tlen se tlaltikpakchane kichiua noso kijtoua (Heb. 13:7). Melauak ika Biblia kijtoua ika sekimej tokniuan kema kinamiki “ma kintlakaitakan”. Niman kinamiki ijkon makintlakaitakan pampa “kuajli tlayekanaj intech on tlaneltokakej” niman pampa chikauak “tenojnotsaj ika on kuajli tlajtojli niman temachtiaj”, xpampa tlapejpeniltin (1 Tim. 5:17). Tla tejuamej melak tikinueyikaitaj akin tlapejpeniltin, yejuin tokniuan kanaj xkuajli nomachiliskej, noso hasta ueliskia tikchiuaskej manoueyimatikan, niman yejon melak xkuajli yeskia (Rom. 12:3). ¿Xmelak ika xtiknekiskiaj tikchiuaskej ika se tlapejpenijli makichiua itlaj tlen melak xkuajli? (Luc. 17:2). w20.01 28 párr. 8

Apóstol Pablo kixnamikiya miyek tlemach, niman yejon kichiuaya manajmana. Kajmanaya tlen inpan nochiuaya tokniuan (2 Cor. 2:4). Miyekej akin kitlauelitayaj okiuijuisojkej niman okitsajkej. Noijki najmanaya pampa xkipiaya miyek tlemach (Filip. 4:12). Niman noijki matikilnamikikan ika yejua yexpa oapolajka ijkuak yaya ipan barco, yejua ika, uelis tikonnemiliskej kenon nomojtiaya nochipa ijkuak tlejkouaya ipan se barco (2 Cor. 11:23-27). ¿Tlenon okiyolseui? Pablo kajmanaya tlen inpan nochiuaya tokniuan, san ika, kasikamatiya ika san iselti xueliskia kinpaleuis. Ika yejon, okintlajtlanili oksekimej tokniuan makipaleuikan makitlajpiyakan tlanechikojli, ken Timoteo niman Tito. Kuajli tikmatstokej ika tlen okichiujkej yejuin tokniuan, okichiuj ika Pablo mayolseui (Filip. 2:19, 20; Tito 1:1, 4, 5). w20.02 22, 23 párrs. 11, 12

Jehová noijki kinekiskia ika tejuamej matiktlakamatikan. Niman kinamiki ijkon matikchiuakan pampa yejua akin otexchijchiuj, techmakatok tonemilis niman yejua toTaj akin melak tlamachilise. San ika, xsan ipampa yejon tiktlakamatij, tejuamej tiktlakamatij pampa tiktlasojtlaj (1 Juan 5:3). Niman maski onka miyek tlemach tlen techititia ika noneki tiktlakamatiskej, yejua xkeman texchiualtia ijkon matikchiuakan. Yejua techkauilia matiktlapejpenikan tlenon tikchiuaskej, ika yejon, melak yolpaki ijkuak kita ika tiktlakamatij pampa tiktlasojtlaj. Tajtin kinekiskiaj ika inkoneuan manemikan ika inyojlo. Ika yejon, kimijliaj kenon noneki nemiskej noso noyekanaskej. Kokonej akin kintlakamatij, kiteititiaj ika tlaneltokaj itech intajuan niman ika kintlakaitaj. Ika yejon, melak noneki ika tejuamej matikimixmatikan itlanauatiluan Jehová niman matikintlakamatikan. Tla ijkon tikchiuaj, tikititiskej Jehová ika tiktlasojtlaj niman tiktlakaitaj. Yejuin kichiuas kuajli matinemikan (Is. 48:17, 18). San ika, akin xkitlasojtla toTajtsin niman xkitlakamati itlanauatiluan xijkon ipan nochiua, sa no yejua notlajyouiltia (Gál. 6:7, 8). w20.02 9, 10 párrs. 8, 9

Ijkon ken Abigaíl, tejuamej noijki noneki toyolchikauaskej niman ijkon titlajtoskej iuan akin tikitaj ika kineki kichiuas tlen xkuajli (Sal. 141:5). Noneki titetlakaitaskej, san ika, noijki noneki timelajkatlajtoskej. Ijkuak ika tlasojtlalistli tikijliaj yakaj kanon noneki noyektlalis, tikititiaj ika iuan touikaj (Prov. 27:17). Tlayekankej melak noneki manoyolchikauakan niman ijkon tlajtoskej imiuan akin kichiuaj tlen xkinamiki (Gál. 6:1). Tokniuan tlayekankej yolyemankej niman kimatstokej ika, pampa noijki tlajtlakolejkej, kanaj ajsis se tonajli ijkuak noijki nonekis yakaj makimijli kanon noneki noyektlaliskej. San ika, yejon xkinteltia maka makinmelajkatlalikan akin noneki noyektlaliskej (2 Tim. 4:2; Tito 1:9). Ijkuak yakaj kijliaj kampa noneki noyektlalis, nokojtiliaj kuajli kimachtiskej niman xnosiaujkauaj. Pampa kintlasojtlaj tokniuan, kinekij kinpaleuiskej (Prov. 13:24). San ika, onka itlaj tlen melak kinekij kichiuaskej: kiueyichiuaskej Jehová. Yejua ika, kiteititiaj tlenon kineki Jehová niman kitlajpiyaj tlanechikojli (Hech. 20:28). w20.03 20 párrs. 8, 9

Jehová okichiuj ika Moisés makimakixti ikalpan Israel. San ika ¿kemanon Jehová okitekitilti Moisés? ¿Okitekitilti ijkuak Moisés okinemili ika iueliskia kichiuas yejon tekitl pampa “okimachtijkej nochi on tlamatkilistli niman tlajtlamach yejuan on egipcios nomachtiaj”? (Hech. 7:22-25). Ka, Jehová okitekitilti ijkuak yokimachtijka ika nonekiya yolyemanki yes (Hech. 7:30, 34-36). Niman okiyolchikauj mauiya ixpan yejon ueyixtika tlakatl akin tlanauatiaya Egipto (Éx. 9:13-19). Tikitaj ika Jehová kintekitiltia akin kiteititiaj ikualneskayouan niman akin tlaneltokaj itech kojtilistli tlen yejua kitemaka. Yeuejkaui, Jehová miyekpa okintekitilti itekipanojkauan. Niman tejuamej, ¿kenon techtekitiltis? Melak noneki matokojtilikan tikchiuaskej okseki (Efes. 3:16, 17). Tla tokauiliaj matechtekitilti Jehová, yejua kichiuas matitenojnotsakan ika pakilistli, melak kuajli matitemachtikan, matiuelikan matiteyolseuikan, melak kuajli matitekitikan, kuajli matiteasikamatikan noso kichiuas matikchiuakan okse itlaj tlen nonekis niman ijkon manochiua tlen yejua kineki. w19.10 21 párr. 5; 25 párr. 14

Se kuajli amigo techpaleuis matimelajkanemikan itech Jehová. Niman uelis tiknextiskej se kuajli amigo tla tejuamej noijki tochiuaj se kuajli amigo (Mat. 7:12). San xnemili, Biblia kijtoua matikinpaleuikan oksekimej, niman más akin itlaj kinpoloua (Efes. 4:28). Tla titlanemiliaj san tikinpaleuiskej oksekimej, melak tomachiliskej ika toyojlo (Hech. 20:35). Yejon amigos techpaleuiskej ijkuak tikixnamikiskej tlen ouijtika niman kichiuaskej matomachilikan ika toyojlo. Ijkon ken Elihú okikak Job, toamigos techkakiskej ijkuak tikimijliskej tlen techajmana (Job 32:4). Maski xtikchiaskej matechijlikan tlen tikchiuaskej, techpaleuis tla tijkakij tlen yejuamej techijliskej itech Biblia (Prov. 15:22). Niman ijkuak itlaj techonpolos, matikchiuakan ken tekiuaj David, maka matoueyimatikan niman matikselikan tlen techmakaskej (2 Sam. 17:27-29). Tla toamigos ijkomej, nochiuaj se tetlayokolijli itech Jehová (Sant. 1:17). w19.04 11 párr. 12; 12 párrs. 14, 15