Septiembre

Aman ika yotikitakej kenon Jehová niman Jesús kitaj tekitl, ¿kiteititia yejuin ika xnoneki toseuiskej? Ka, xyejon kiteititia. Jehová xkeman siaui, kuakon, xnoneki noseuis ken tejuamej. San ika, Biblia kijtoua ika, sakin ika okinchijchiuj iluikamej niman tlaltikpaktli, yejua xok otekit niman onoseui (Éx. 31:17). Yejuin kanaj kijtosneki ika xok otlachijchiuj, ouajnoseui niman ijkon kitas nochi tlen okichijchiuj niman yolpakis. Niman Jesús, maski melak otekit ijkuak nemiya ipan tlaltikpaktli, noijki onoseui niman otlakua imiuan akin kuajli nouikaya (Mat. 14:13; Luc. 7:34). Biblia techijlia matitekitkej niman maka matitlatsiujkej (Prov. 15:19). Kanaj titekitij pampa noneki tikinmakaskej tochanejkauan tlen kinpoloua. Niman tinochimej akin tikchiuaj ken Cristo tikpiyaj se tekitl: noneki titenojnotsaskej. San ika, noijki noneki kuajli toseuiskej. w19.12 2 párr. 2; 3 párrs. 4, 5

Maka matitlajtojtinemikan itech demonios. Noneki tikchiuaskej ken Jesús. Ijkuak Jesús nemiya ne ipan cielo, okimat miyek itech Satanás niman demonios. San ika, ijkuak ouajla ipan tlaltikpaktli, xtlajtojtinemiya intech yejuamej. Yejua kinekiya tlajtos itech Jehová niman xitech Satanás. Noijki ken Jesús, tejuamej xtitlajtojtinemij itech demonios. Tejuamej tikteititiaj ika toyojlo tentika ika “miyek kualtsin tlajtojli”, kijtosneki, tlen melauak (Sal. 45:1). Maka matikinmakasikan xkuajkualtin espíritus. Tinochimej uelis topan nochiuas tlen xkuajli. Ijkuak nion xtikchiaj, uelis tikpiyaskej se accidente, uelis tikualoskej noso timikiskej. ¿Kipiya ika tiknemiliskej ika demonios yejuamej akin kichiuaj yejuin? Biblia kijtoua ika tinochimej uelis topan nochiuas tlen xtikchiaj (Ecl. 9:11). Jehová yejua yokiteititi ika melak kojtik xijkon ken demonios. w19.04 23, 24 párrs. 13, 14

¿Kitlakamatij tlayekankej tlanauatiltin kampa kijtoua ika noneki makiteixpantikan akin noijtoua ika yokinajnauilti se konetl? Kema. Tla kampa yejuamej chantij ijkon kijtouaj tlanauatiltin, kuakon kintlakamatij. Yejuin itlanauatiluan tekiuajkej xkixnamikij itlanauatil toTajtsin (Hech. 5:28, 29). Kuakon, ijkuak kimijliaj ika yakaj yotenajnauilti, yejuamej nimantsin ontenotsaj sucursal niman ijkon kimatiskej tlenon uelis kichiuaskej niman kintlakamatiskej itlanauatiluan tekiuajkej. Tlayekankej kimijliaj akin yokinnajnauiltijkej, noijki intajuan noso yakaj okse akin kimatstika tlen onochiuj ika uelis konteixpantiskej akin otenajnauilti. San ika ¿tlenon panoua tla akin otenajnauilti se tokniuj niman miyekej kimatij? ¿Kinamiki ika tokniuj akin oteteixpanti makinemili ika yokitsojkuilo itoka toTajtsin? Ka, xkinamiki ijkon makinemili. Akin otenajnauilti yejua akin yokitsojkuilo itoka toTajtsin. w19.05 10 párrs. 13, 14

Biblia kimijlia akin yononamiktijkej ika noneki notlakaitaskej niman kichiuaskej tlen onoijlikej ijkuak ononamiktijkej. Kimilnamiktia ika kipiya ika nokojtiliskej nochipa san sekan nemiskej. Ika yejon, Biblia kijtoua: “Sen tlakatl kikaua itataj niman inanaj para nosentlalia san sekan iuan isiuauj, niman on omemej nochiuaj san se” (Gén. 2:24). Akin noyekanaj ika tlamachilistli tlen kisa ipan yejuin tlaltikpaktli xijkon kinemiliaj. Yejuamej kijtouaj ika inseselti noneki kichiuaskej tlen yejuamej kinekiskej. Se amoxtli tlen tlajtoua itech divorcio kijtoua ika ijkuak nonamiktilo, miyekej xok kijtouaj “san sekan tinemiskej hasta ijkuak timikiskej”, aman kijtouaj “san sekan tinemiskej hasta ijkuak xok totlasojtlaskej”. Miyekej kinemiliaj ika xnoneki nochipa tinemis iuan moixnamik. Yejuin yokichiuj ika miyekej manokauakan niman manoyolkokokan. Tikitaj ika melak xkuajli ken kitaj namiktilistli akin noyekanaj ika tlamachilistli tlen kisa ipan yejuin tlaltikpaktli. w19.05 24 párr. 12

Pablo kajmanaya ika itlamachtiluan tlaltikpakchanejkej akin Satanás kinyekana yokimijtlakojkaj sekimej tokniuan (Efes. 4:17-19). Yejon noijki uelis topan nochiuas. Satanás, akin kiyekana tlaltikpaktli, miyek tlen kikui niman ijkon kichiuas matiktlalkauikan Jehová. Yejua kichiua matiknekikan tikpiyaskej miyek tlemach noso tiuejueyixtoskej ipan tlaltikpaktli. Uelis kikuis tlen otiuelkej tochan, ipan kaltlamachtijli niman tlen yotiuelkej intech oksekimej niman ijkon kichiuas matitlanemilikan ken yejua kineki. ¿Uelis tijkixtiskej tlen melak saliujtok ipan totlamachilis? (2 Cor. 10:4). Matikitakan tlen okijto Pablo: “Tikxoxotoniaj nochi on xkuajli tlateixpanuijli yejuan ika techixnamikij. Tikxoxotoniaj on noueyimatilistli yejuan kichiua para se xueli kiselia kajsikamatilistli itech ika Dios. Intlamachilis [...] nochi tlakatl tikchiualtiaj ma kitlakamati Cristo” (2 Cor. 10:5). Kema, ika itlapaleuilis Jehová uelis tikinkixtiskej tlanemililtin tlen xkuajkualtin. w19.06 8 párrs. 1-3

Ana, David niman se salmista okinotskej toTajtsin niman ijkon makinpaleui. Ipan teoyotl okijlikej kenon nomachiliayaj niman tleka melak najmanayaj. Niman nochipa yayaj kampa kiueyichiuayaj Jehová (1 Sam. 1:9, 10; Sal. 55:22; 73:17; 122:1). ToTajtsin melak teiknelia, kuakon okinnankili nochimej yejon itekipanojkauan. Ana ouel oyolseuj (1 Sam. 1:18). David okijkuilo: “Sen yolmelajki tlakatl uelis tlajyouis ikan miyek pajsolouilistli, pero toTEKO de nochi kimanauiya” (Sal. 34:19). Niman salmista okimachili ika Jehová okajsik ika iyekma niman okiyekan ika itlajtol (Sal. 73:23, 24). ¿Tlenon tiuelij intech yejuamej? Ika kemantika melak tajmanaskej ipampa tlen tikixnamiktoskej. San ika, uelis tikixnamikiskej maski san tlenon tla tiknemiliaj kenon Jehová yokinpaleui oksekimej, tla tikchiuiliaj teoyotl niman tla nochipa tiktlakamatij (Sal. 143:1, 4-8). w19.06 17, 18 párrs. 14, 15

Maka keman matipinauikan ika tiiteixpantijkauan Jehová san ipampa tlen kijtouaj tlaltikpakchanejkej (Miq. 4:5). Matikitakan tlenon okichiujkej apóstoles ne Jerusalén ijkuak yokimiktijkaj Jesús. Akin tlayekanayaj ipan tlaneltokijli melak kintlauelitayaj apóstoles, niman yejuamej kimatstoyaj (Hech. 5:17, 18, 27, 28). Maski ijkon, apóstoles mojmostla yayaj teopan niman noteititiayaj ken inomachtijkauan Jesús (Hech. 5:42). Yejuamej xonoteltijkej niman xonomojtijkej. Tejuamej noijki xtomojtiskej tla nochipa toteititiaj ken iteixpantijkauan Jehová: kampa titekitij, kampa tomachtiaj noso kampa tichantij (Hech. 4:29; Rom. 1:16). Apóstoles pakiyaj pampa kimatstoyaj tleka kintlauelitayaj. Niman kitayaj ika se tlateochiualistli katka tlajyouiskej pampa kitlakamatstoyaj Jehová (Luc. 6:23; Hech. 5:41; 1 Ped. 2:19-21). Tla kuajli tikmatstokej ika techtlauelitaj pampa tikchiuaj tlen kuajli, nochipa tiktekichiuiliskej toTajtsin maski ijkon texchiuiliaj. w19.07 7 párrs. 19, 20

Jesús niman inomachtijkauan akin judíos katkaj noseuiayaj ipan tonajli sábado pampa kitlakamatiyaj Tlanauatijli tlen okimakakej Moisés. San ika, ipampa tlen okichiuj niman ipampa tlen okijto, Jesús okiteasikamachilti ika ipan tonajli sábado se ueliskia kichiuas tlen kuajli (Mat. 12:9-11). Jesús xkinemiliaya ika se tlajtlakojli katka tikchiuas tlen kuajli ipan tonajli sábado. Yejua kuajli okiteititi tleka xnonekiya titekitis ipan yejon tonajli. Pampa israelitas noseuiayaj nochi sábados, yejuamej ueliskiaj melak kuajli kiueyichiuaskej Jehová. Biblia kijtoua ika ichanejkauan Jesús kiueyichiuayaj Jehová ipan yejon tonajli. Biblia techijlia: “Kemaj Jesús oyaj ipan on kalpan Nazaret kampa onoskaltij. Niman ipan on tonajli sábado, okalak ipan on sinagoga ijkon ken yejua nochipa kichiuaya. Ne ipan on tiopan onotelkets para okinomachtij on Yektlajkuilojli” (Luc. 4:15-19). Noijki, inomachtijkauan Jesús kitlakamatiyaj tlanauatijli itech sábado, ijkon tikitaj pampa hasta ijkuak yopanoka sábado okiyektlalijkej “on ajuiyalistli tsakuanki niman aceite para itlalnakayo Jesús” (Luc. 23:55, 56). w19.12 4 párr. 10

Tinochimej akin titenojnotsaj titlapaleuiyaj ika oksekimej touan manomachtikan. Uelis tikijtoskej ika tejuamej tikchiuaj ken akin kitejtemouaj se konetl akin yopoliuj. ¿Tleka ijkon tikijtouaj? Matikitakan itlaj tlen melauak opanok ijkuak opoliujka se konetl akin kipiaya yeyi xiuitl. Kanaj 500 tlaltikpakchanejkej onopaleuijkej niman ijkon kitejtemoskej. Kuakon, ijkuak yopanoka 20 horas ika yopoliujka yejon konetl, se tlakatl akin teuan tlapaleuijtinemiya okinexti yejon konetl kampa tokayaj. Yejuin tlakatl xokinek makijtokan ika yejua akin okinextijka yejon konetl, yejua okijto: “Otiknextijkej pampa timiyekej otopaleuijkej”. Miyekej nomachiliaj ken yejuin konetl, kimachiliaj ika yopoliujkej. Kinekij ika yakaj makinpaleui pampa xkipiyaj se tlamachialistli. Tinemij ipantsin 8 millones akin topaleuijtokej niman ijkon tikinnextiskej yejon tlaltikpakchanejkej. Kanaj tejuamej xtiknextiaj akin kinektika nomachtis Biblia. San ika, oksekimej tokniuan kanaj kema kinextiaj akin kinektika nomachtis kampa tejuamej titenojnotsaj. Ijkuak se tokniuj kimachtia yakaj niman nochiua inomachtijkauj Cristo, kinamiki tinochimej matiyolpakikan. w19.07 16, 17 párrs. 9, 10

Pablo okimilnamikti tokniuan akin chantiyaj Filipos ika nonekiya tlaxikoskej. Yejon tokniuan opeujkej kixnamikij tlen ouijtika ijkuak opeuj tlanechikojli. Nochi opeuj kanaj ipan xiuitl 50, ijkuak Pablo niman Silas oajsikej Filipos. Yejuamej ompa oajsikaj pampa toTajtsin okimijlika mauiyan Macedonia (Hech. 16:9). Ompa Filipos okixmatkej se siuatl akin itoka katka Lidia, yejua kuajli okinkak. Jehová “okitlapouilij iyojlo niman okiselij” iTlajtol toTajtsin (Hech. 16:14). Sakin, yejua niman nochimej akin chantiyaj ichan onoapolaktijkej. San ika, Diablo xokuelitak yejon niman xsan ijkon uajnokauaskia. Sekimej tlakamej okinuikakej Pablo niman Silas kampa nemiyaj tekiuajkej niman okintlajtolchijchiuilijkej, okijtokej ika kinajkomantinemiyaj akin ompa chantiyaj. Kuakon, otlanauatijkej makinuijuitekikan Pablo niman Silas, sakin okintsajkej niman “okintlajtlanilijkej yej ma kisakan de ipan on ueyikalpan” (Hech. 16:16-40). ¿Okikajkaujkej ika kitekichiuiliaj Jehová? Ka. ¿Tlenon okichiujkej tokniuan akin chantiyaj Filipos? Melak teyolpakti ika yejuamej noijki otlaxikojkej. Kuajli tikitaj ika tokniuan onoyolchikaujkej ipampa tlen okichiujkej Pablo niman Silas. w19.08 2 párrs. 1, 2

Uelis tikchiuaskej “nochi tlen kuajli” tla tiktlasojtlaj Jehová niman ikalpan, noijki tla tikteijliaj ika titlaneltokaj itech Jesús niman ika toTajtsin techteochiuas ika tlayekapan. Noijki tikchiuaj “nochi tlen kuajli” ijkuak tikinpaleuiyaj oksekimej manochiuakan inomachtijkauan Cristo (Mat. 28:18-20). Maski san tlenon tikixnamiktoskej, uelis tipetlaniskej “ken on sitlalimej yejuan petlanij”. Ijkuak tikixnamikij tlen ouijtika, kanaj tiknemiliaj ika xok uelis titenojnotsaskej, san ika, kemantika yejon uelis kichiuas más kuajli matitenojnotsakan. Yejon tlen ipan onochiuj Pablo. Ijkuak yejua okijkuilo carta tlen okomintitlanili filipenses, tsauktoya ipan se kajli ne Roma. Maski Pablo tsauktoya, yejua okinnojnots ika pakilistli “nochimej on soldados” niman akin konitayaj. Tlen kichiuaya Pablo okinpaleui miyekej tokniuan makiteijlikan iTlajtol toTajtsin “ikan más yolchikaualistli, niman xikan nemojtijli” (Filip. 1:12-14; 4:22). w19.08 12 párrs. 15, 16

Tiknekij tiyolyemankej yeskej pampa yejon kuelita Jehová, ijkon ken okijto apóstol Pedro ipan tlaxelojli tlen aman tikitstokej. Ipampa tlen okijto Pedro, amoxtli “Ven, sé mi seguidor”, ipan capítulo 3, párrafo 23, kijtoua ika timoueyimatis ken se veneno tlen melak teijtlakoua niman ika toTajtsin nion xkintekitiltisneki akin noueyimatij maski miyek mauelikan makichiuakan. San ika, kijtoua ika tla se yolyemanki, toTajtsin ueli kitekitiltia maski xmiyek ueli kichiua. Niman noijki kijtoua ika toTajtsin kiyolpaktis techteochiuas tla tiyolyemankej. Kuajli tikmatstokej ika melak ueyi kijtosneki tikyolpaktiskej Jehová (Prov. 23:15). Xsan tikyolpaktiaj Jehová ijkuak tiyolyemankej, yejuin noijki melak techpaleuiya. Tla tiyolyemankej, oksekimej kinekiskej touan nemiskej. Uelis tikasikamatiskej yejuin tla tiknemiliaj akinon imiuan tiknekij tinemiskej (Mat. 7:12). w19.09 4 párrs. 8, 9

Tlayekankej chikauak tekitij niman ijkon kinpaleuiskej tokniuan. Niman xnoueyimatij pampa yejuamej akin tlayekanaj, yejuamej ika tlasojtlalistli kiyekanaj tlanechikojli (1 Tes. 2:7, 8). Ken kinnotsaj oksekimej, tlayekankej kiteititiaj ika melak tetlasojtlaj niman yolyemankej. Tokniuj Andrew akin youejkauj tlapaleuiya ken tlayekanketl kijtoua: “Yonikitak ika tokniuan más kinekij tetlakamatiskej ijkuak tlayekankej kuajli kiminotsaj niman kimititiaj ika kimintlasojtlaj. Ijkuak ijkon kichiuaj, tokniuan kinekij kinpaleuiskej tlayekankej”. Niman Tony, akin noijki youejkauj tlapaleuiya ken tlayekanketl, techijlia: “Nikyejyekoua nikchiuas ken kijtoua Filipenses 2:3 niman nochipa ninokojtilia niknemilis ika oksekimej uejueyixtokej xijkon ken nejua. Yejuin nechpaleuiya maka san manitlanauatijto”. Tlayekankej noneki yolyemankej yeskej, ijkon ken Jehová. Maski Jehová yejua akin melak ueyixtika, kipaleuiya “on mayanki kampa sanoyej tlajyouiya” (Sal. 18:35; 113:6, 7). Niman Jehová “xkinmijyouiya on yejuan noueyimatij”. w19.09 16 párrs. 11, 12

Uelis tiyolseujtoskej ipan yejon tekitl tlen yotechmakak Jesús tla tikitaj totekiyo ken kinamiki. Yejon tekitl tlen tikchiuaj itlatki Jehová, ika yejon, noneki tikchiuaskej ken yejua kijtoua. Yejua toTeko niman tejuamej tiitekipanojkauan (Luc. 17:10). Tla tiknekij tikchiuaskej yejuin tekitl ken tejuamej tikijtouaj, melak xkuajli tonkisaskej. San ika, uelis tikchiuaskej miyek tlemach niman tikxikoskej san katlejua tlauejli tla tokauiliaj matechyekana Jehová. Matikilnamikikan ika xakaj uelis kiteltis manochiua tlen Jehová kineki (Rom. 8:31; 1 Juan 4:4). Tejuamej tiknekij tikueyichiuaskej Jehová. Ipan kachtopa siglo, miyekej onochiujkaj inomachtijkauan Cristo pampa ijkon ueliskiaj itlaj kiseliskej. Pampa ijkon kichiuayaj, sakin onajmankej niman xok okichiujkej yejon tekitl tlen yokinmakakaj (Juan 6:25-27, 51, 60, 66; Filip. 3:18, 19). San ika, nemiyaj oksekimej akin yemelak kitlasojtlayaj toTajtsin niman tlaltikpakchanejkej. Yejuamej okichiujkej intekiyo ika pakilistli ijkuak nemiyaj ipan tlaltikpaktli, niman Jesús okimijli ika ueliskiaj iuan tekitiskej ne iluikak. Tejuamej noijki uelis tiyolpakiskej tla tomamaltiaj iyugo Jesús ijkon ken kinamiki. w19.09 20 párr. 1; 24, 25 párrs. 19, 20

Maka matikilkauakan ika Jehová yokichiuj maka ok matitlaneltokakan itech tlamachtiltin tlen xmelajkej tlen yeuejkaui tikneltokayaj. Yejuin makixtilistli melak techyolpaktia. Ika tlayekapan uelis tikseliskej se makixtilistli tlen más ueyi. Sa achijtsin poliui, Jesús kipopolos tlaneltokijli tlen xmelauak niman noijki yejon tekiuajkej akin san tlakajkayauaj. ToTajtsin kintlajpiyas itekipanojkauan niman melak kinteochiuas ijkuak nemiskej ipan se xochitlalpan (Apoc. 7:9, 14). Noijki, kinkuiteuas melak miyekej tlaltikpakchanejkej akin yomijkej, yejuamej noijki uelis kitaskej kenon toTajtsin kipopolos tlajtlakojli tlen Adán otechpanoltili (Hech. 24:15). Ijkuak Jesús Tekiuajtitos Mil Xiuitl, yejua niman akin iuan tekiuajtitoskej kinpaleuiskej tlaltikpakchanejkej niman ijkon kuajli manouikakan iuan toTajtsin niman maka sa makualokan. ToTajtsin ijkon kinmakixtis tlaltikpakchanejkej, yes ken Jubileo tlen nochiuaya Israel. Nochimej akin melajkanemiskej itech Jehová xok kipiyaskej tlajtlakojli. w19.12 12, 13 párrs. 14-16

Ipan kachtopa siglo, nemiya se tlakatl akin kuelitaya kitemakas, itoka katka José (akin kixmatiyaj ken Bernabé), yejua okinokauili ika Jehová makitekitilti (Hech. 4:36, 37). Ijkuak Saulo opeuj kichiua ken Cristo, miyekej tokniuan xkinekiyaj kinisiuiskej pampa kimatstoyaj ika okintlaueltotokatinen tokniuan. San ika, Bernabé okipaleuito (Hech. 9:21, 26-28). Sakin, tlayekankej itech Jerusalén okimatkej ika tokniuan akin chantiyaj Antioquía de Siria kinekiyaj makinyolchikauakan. ¿Akinon okontitlankej? Okontitlankej Bernabé. Melak kuajli ika yejua okontitlankej, pampa Biblia kijtoua ika “okintlakanonots on tlaneltokakej para nochipa ma tlaneltokatiakan itech toTEKO niman ma kitokatiakan ikan nochi inyojlo” (Hech. 11:22-24). Aman, Jehová noijki uelis techpaleuis niman ijkon matikinyolseuikan tokniuan, ken tokniuan akin yonomijkatijkej. Kanaj Jehová techyolmapeuas matiktlajpalotij noso matikonnotsakan yakaj akin melak najmana niman ijkon matikyolchikauakan. ¿Tiknektokej ika Jehová matechtekitilti ijkon ken okitekitilti Bernabé? (1 Tes. 5:14). w19.10 22 párr. 8

Kemantika, ijkuak tikchiuaj itlaj iuan tokniuan, xsan tikitaj tlen kuajli intech, noijki tikitaj tlen xkuajli. Ijkuak ijkon panos, ¿tlenon uelis techpaleuis? Maka matokajkayauakan, xuelis tikchiaskej ika tokniuan nochi kuajli makichiuakan. Ika yejon, matokojtilijtokan más kuajli imiuan touikaskej. Tla se toamigo kichiua itlaj tlen xkuajli, kanaj nonekis iuan titlajtlajtoskej, san ika, noneki tikchiuaskej ika tlasojtlalistli, niman tlen tikijliskej makisa itech Biblia (Sal. 141:5). Niman tla texchiuilia itlaj tlen xkuajli, noneki tiktlapopoluiskej. Tla yotiktlapopoluijkej, matokojtilikan maka sakin tikilnamiktiskej. Melak noneki ika ipan yejuin tonaltin tlen melak ouijtika matikitakan tlen kuajli kichiuaj tokniuan niman maka matikitakan tlen xkuajli kichiuaj. Tla ijkon tikchiuaj, melak kuajli imiuan touikaskej, niman ipan ueyi tlajyouilistli nonekis matikinpiyakan yejon amigos. w19.11 6 párrs. 13, 16

Ijkuak tikinmachtijtoskej tlaltikpakchanejkej, noneki tokojtiliskej tikinpaleuiskej manochiuakan inomachtijkauan Jesús niman makitlakamatikan nochi tlen yejua otechnauati. Kipiya ika tikinpaleuiskej makasikamatikan ika melak noneki makitekichiuilikan Jehová. Yejuin kijtosneki ika noneki tikinyolchikauaskej makichiuakan ipan innemilis tlen nomachtijtiuej, manosentemakakan itech Jehová niman manoapolaktikan. San ijkon ueliskej makisaskej itech itonal Jehová (1 Ped. 3:21). Iajsitika tonajli ijkuak kipopoloskej nochi tlen xkuajli nochiua ipan tlaltikpaktli. Ika yejon, xtikpiyaj tiempo niman ijkon tikinmachtijtoskej akin xkinekij nochiuaskej inomachtijkauan Cristo (1 Cor. 9:26). Melak noneki matikchiuakan yejuin tekitl, pampa miyekej nemij akin noneki kikakiskej tlen kichiuas iTekiuajyo toTajtsin aman ika xiyejko itonal Jehová. w19.10 11, 12 párrs. 14, 15

Ipan Tonajli ijkuak Notlapachouayaj Tlajtlakoltin, kalpan Israel nosentlaliaya niman kinuentlaliaya yolkamej. Yejon uentin kintlalnamiktiaya nochimej israelitas ika nonekiya makintlapopoluikan niman ijkon xkipiyaskej tlajtlakojli. San ika, kachtopa, ueyi teopixki kalakiya ipan Santísimo niman kontemaya tlen ajuiyak ipan on tlixochtli niman melak tlaajuiyaya ipan yejon cuarto. ¿Tlenon tiuelij itech yejuin? Biblia kijtoua ika teoyomej tlen kinkaki Jehová kentla yeskia yejon tlen ajuiyak (Sal. 141:2; Apoc. 5:8). Ueyi teopixki kitkiya tlen ajuiyak ixpan Jehová ika tetlakaitalistli. Noijki ijkon, ijkuak tiknotsaj Jehová, tikchiuaj ika tetlakaitalistli. Melak tikpatiojkaitaj ika toTajtsin akin otexchijchiuj techkauilia matiknisiuikan, ijkon ken se konetl ueli kinisiuiya itaj (Sant. 4:8). Yejua kinektika touan nouikas (Sal. 25:14). Yejuin melak tikpatiojkaitaj niman hasta xtiknekij tikyolkokoskej nion achijtsin. w19.11 20, 21 párrs. 3-5

Kampa tejua tichanti, ¿kenon kitaj tekitl? Ipan miyek países tlaltikpakchanejkej melak tekitij. Yejua ika, miyekej xkipiyaj tiempo niman ijkon ueliskej noseuiskej noso nemiskej imiuan inchanejkauan, noijki xkipiyaj tiempo niman ijkon kichikauaskej intlaneltok (Ecl. 2:23). San ika, noijki nemij akin xkuelitaj tekitiskej, miyek tlemach ika notlamiyaj niman ijkon xtekitiskej (Prov. 26:13, 14). Tlaltikpakchanejkej kitaj tekitl ken xkinamiki. San ika, Jehová niman Jesús tlamantik kitaj tekitl, kuajli tikmatstokej ika yejuamej kuelitaj tekitiskej. Tikmatstokej yejuin pampa Jesús okijto: “NoTajtsin hasta aman tekiti, niman nejua no nitekiti” (Juan 5:17). Matitlanemilikan itech nochi tlen okichijchiuj Jehová, ken iluikaktekitkej, universo niman nochi tlen onka ipan yejuin kualtsin tlaltikpaktli. w19.12 2 párrs. 1, 2

¿Tlenon okichiuj David niman ijkon melak kuajli nouikas iuan Jehová? David okixmat Jehová pampa kitaya tlen okichijchiuj. Ijkuak David telpochtli katka, uejkaujtipan kintlajpixtinemiya iborreguitos itaj. Kanaj ijkuakon opeuj tlanemilia itech tlen toTajtsin okichijchiuj. Ijkuak ika tlayoua ajkotlachiaya, xsan kimitaya sitlalimej, noijki kimitaya ikualneskayouan Jehová (Sal. 19:1, 2). Noijki kitaya kenon Jehová melak tlamachilise ijkuak tlanemiliaya itech kenon titlachijchiujtin (Sal. 139:14). David noitaya melak pitentsin ijkuak tlanemiliaya itech tlen toTajtsin okichijchiuj (Sal. 139:6). ¿Tlenon techmachtia yejuin? Mojmostla matitlanemilikan itech tlen onka toyeualiyan: ken xochimej, yolkamej niman tlaltikpakchanejkej. Tla ijkon tikchiuaj, más tikixmatstiaskej toTajtsin akin melak techtlasojtla (Rom. 1:20). Niman noijki más tiktlasojtlatiaskej toTajtsin. w19.12 19, 20 párrs. 15-17

Moisés okitlapejpeni kitekichiuilis Jehová. Ijkuak Moisés kipiaya kanaj 40 xiuitl, okitlapejpeni nemis imiuan israelitas, akin katkaj itekipanojkauan Jehová. Yejua xokinek makixmatikan ken “tekoneu itech ichpoch on rey de Egipto”. Moisés xokinek makixmatikan ken se ueyixtika tlakatl. Yejua okitlapejpeni nemis imiuan israelitas akin tlakeualtin katkaj ipan Egipto. Ijkon okichiuj maski kimatstoya ika kualaniskia faraón, akin katka se ueyixtika tekiuaj niman akin miyekej kitayaj ken imintajtsin. Kuajli tikitaj ika Moisés melak tlaneltokaya itech Jehová. Ipampa yejuin, yejua nochipa kuajli onouikak iuan Jehová (Prov. 3:5). ¿Tlenon tiuelij itech tlen okichiuj Moisés? Ika, ijkon ken Moisés, noneki tiktlapejpeniskej tla tiktekichiuiliskej Jehová niman tla tiknekij tinemiskej ipan ikalpan. Tla tiktlapejpeniaj yejon, kanaj nonekis tijkauaskej seki tlemach tlen tikuelitaj niman noijki kanaj uelis techtlauelitaskej akin xkixmatij Jehová. San ika, tla titlaneltokaj itech toTajtsin iluikakchane, uelis kuajli tikmatstoskej ika yejua techpaleuis. w19.12 17 párrs. 5, 6

Jehová melak techpatiojkaita maski san otexchijchiuj ika “tlajli”. ¿Tleka kuajli tikmatstokej yejuin? Matikteneuakan se, pampa yejua otexchijchiuj niman ijkon matiuelikan matikinpiyakan ikualneskayouan (Gén. 1:27). Ipampa yejon, san tejuamej otechmakak se kualtsin tekitl: matikintlajpiyakan yolkamej niman nochi tlen onka ipan tlaltikpaktli (Sal. 8:4-8). Maski Adán otlajtlako, Jehová ok kinpatiojkaita nochimej ikoneuan. Ika yejon, okuajtitlan iKonetsin, Jesús, niman ijkon makitemaka inemilis ken tlaxtlauijli ipampa totlajtlakoluan (1 Juan 4:9, 10). Itechkopa tlaxtlauijli, toTajtsin kinyolitis nochimej akin yomijkej ipampa itlajtlakol Adán, kema, kinyolitis akin yolmelajkej niman noijki akin xyolmelajkej (Hech. 24:15). Ipan iTlajtol techititia ika tinochimej techpatiojkaita, maski tla tikualoj, tla xtikpiyaj tomin niman maski tla yotiueuentsintiakej (Hech. 10:34, 35). w20.01 15 párrs. 5, 6

Xnoneki tiknemiliskej ika pampa se tokniuj tlapejpenijli, kuakon, isiuatsin niman itajuan noso oksekimej ichanejkauan noijki tlapejpeniltin. ToTajtsin yejua akin kintlapejpenia mauiyan iluikak, yejuin xsan notepanoltilia (1 Tes. 2:12). Kuakon xtitetlajtoltiskej tlen uelis kichiuas maka kuajli manomachilikan oksekimej. Se neskayotl, xkeman tiktlajtoltiskiaj isiuatsin se tokniuj tlapejpenijli kenon nomachilia ijkuak konnemilia ika xnemis iuan iueuentsin ipan xochitlalpan. Tejuamej kuajli tikmatstokej ika toTajtsin Jehová kinmakas itekipanojkauan nochi tlen kinpoloua niman ijkon manemikan ika inyojlo ipan xochitlalpan (Sal. 145:16). Noijki, ijkuak tejuamej xtikinueyikaitaj tlapejpeniltin, sa no tejuamej totlajpiyaj. ¿Tleka ijkon tikijtouaj? Pampa Biblia techijlia ika sekimej tlapejpeniltin uelis kikauaskej Jehová (Mat. 25:10-12; 2 Ped. 2:20, 21). Yejua ika, tla tejuamej xtikinueyikaitaj tlaltikpakchanejkej, xkeman tikimitaskej ken totlayekankauan, maski tla yejuamej tlapejpeniltin, maski melak kimixmatij noso melak youejkaujkej kitekichiuiliaj Jehová (Jud. 16). Kuakon, maski tla kemantika yejuamej kikauaj tlanechikojli noso xyolmelajkanemij, tejuamej xtikpoloskej totlaneltokil niman xkeman tijkauaskej Jehová. w20.01 29 párrs. 9, 10

Pampa tiitlasojkakoneuan Jehová, tokojtiliaj tikchiuaskej ken yejua, ika yejon, titetlasojtlaj, kuajli titenotsaj niman titetlapopoluiyaj. Ijkuak akin xkixmatij toTajtsin kitaj ika tikchiuaj tlen kuajli, kanaj noijki kinekiskej kixmatiskej (1 Ped. 2:12). Tla tajtin kichiuaj tlen kuajli inpampa inkoneuan, ijkon ken kichiua Jehová, kanaj inkoneuan noijki kinekiskej nouikaskej iuan toTajtsin. Tejuamej melak tiknekij tikueyiteneuaskej toTaj iluikakchane niman tiknekij ika oksekimej makixmatikan. Tomachiliaj ken tekiuaj David, akin okijkuilo: “Nejua nikteneua noTEKO ipampa nochi on tlen onechchiu[i]lij” (Sal. 34:2). San ika, sekimej san tipijpinauij niman tomojtiaj titlajtoskej itech toTaj Jehová. ¿Tlenon techpaleuis maka ijkon matomachilikan? Tla tiknemiliaj ika uelis tikyolpaktiskej Jehová niman ika oksekimej melak kinpaleuis tla kixmatij. Jehová kichiuas matiyolchikaujkej. Ijkon ken okinpaleui tokniuan akin onenkej ipan kachtopa siglo, tejuamej noijki techpaleuis (1 Tes. 2:2). w20.02 11 párr. 12; 13 párr. 13

Miyekej akin tikinmachtiaj Biblia nopatlaj niman noapolaktiaj. San ika, oksekimej nesi ika xmás kinekij nochiuaskej inomachtijkauan Cristo. Kuelitaj tlen tikimititiaj, san ika, kanaj xnoyolchikauaj noapolaktiskej. Tinochimej akin titemachtiaj Biblia tiknekij ika tonomachtijkauan makichiuakan tlen ueltiuej niman makitekichiuilikan Jehová. Jehová kineki ika tlaltikpakchanejkej makitekichiuilikan pampa yemelak kitlasojtlaj. Akin tiiteixpantijkauan Jehová tiknekij tikinpaleuiskej makitakan ika Jehová najmana inpampa niman ika melak kintlasojtla. Tiknekij makimatikan ika Jehová “imintataj on iknomej” niman ika yejua “kinmanauiya on kakaualtsitsimej” (Sal. 68:5). Ijkuak akin tikinmachtiaj Biblia kasikamatij kenon Jehová kintlasojtla, kanaj yejuamej más kitlasojtlaskej Jehová. Kuakon, matikinpaleuikan makasikamatikan ika toTajtsin kineki kinmakas se nemilistli tlen xkeman tlamis niman ika kinektika kinpaleuis makipiyakan yejon nemilistli. w20.01 3 párrs. 7, 8

Apóstol Pablo yolyemanki katka, yejua ika, kasikamatiya ika nonekiya makiyolseuikan iamigos. Yejua xkajmanaya tla oksekimej kinemiliayaj ika xyolchikauak katka pampa tokniuan kiyolchikauayaj ijkuak melak najmantoya (Col. 4:7-11). Tla tiyolyemankej niman tikasikamatij ika noneki matechyolchikauakan, tokniuan kinektoskej techyolchikauaskej. Pablo kimatstoya ika iTlajtol toTajtsin kiyolseuiskia (Rom. 15:4). Noijki kimatstoya ika “on iYektlajkuilol Dios” kipaleuiskia kuajli matlanemili niman ijkon uelis kixikos maski san katlejua tlauejli (2 Tim. 3:15, 16). Ijkuak ika okpa okitsajkej ne Roma, okimat ika imikiskia. Okitlajtlanili Timoteo nimantsin makitati niman makimitkili tlajkuilolamamej (2 Tim. 4:6, 7, 9, 13). ¿Tleka? Pampa kanaj seki itech yejon tlajkuilolamamej katkaj Tlajkuiloltin ika Hebreo, kuakon, Pablo ueliskia kintekitiltis niman ijkon nomachtis. Tla tejuamej nochipa tomachtiaj Biblia ijkon ken Pablo, Jehová techyolseuis ika iTlajtol, maski san katlejua tlauejli tikixnamikiskej. w20.02 23 párrs. 14, 15

Tlen okijtokej Elifaz, Bildad niman Zofar kuajli techasikamachiltia ika yejuamej nion xkinemilijtoyaj kenon kipaleuiskej Job. Yejuamej san kinemilijtoyaj kenon kititiskej Job ika okichiujka tlen xkuajli. Seki tlen kijtouayaj melauak katka, san ika, okijtokej miyek tlemach tlen xmelauak itech Job niman itech Jehová. Noijki, okichikajkanotskej Job niman okijlikej ika kichiuaya tlen xkuajli (Job 32:1-3). ¿Kenon okitak Jehová tlen okichiujkej yejon yeyimej tlakamej? Yejua xokuelitak niman melak okikualanijkej. Okijto ika yejuin tlakamej xkipiayaj intlamachilis niman okinnauati makitlajtlanilikan Job makichiua teoyotl inpampa (Job 42:7-9). ¿Tlenon tiuelij itech tlen xkuajli okichiujkej Elifaz, Bildad niman Zofar? Kachtopa, ika xnoneki tiknemiliskej tlen xkuajli intech tokniuan (Mat. 7:2-5). Yej noneki kuajli tikinkakiskej achto itlaj tikijtoskej. San ijkon tiueliskej tikasikamatiskej tlen inpan nochiujtika (1 Ped. 3:8). Ika ome, ijkuak itlaj tikijtoskej, noneki kuajli tikitaskej ika tlen tikijtoskej mamelauak niman maka mateyolkoko (Efes. 4:25). Niman, ika yeyi, Jehová kineki matitlajtokan ken kinamiki. w20.03 22 párrs. 15, 16

Ijkuak tikinmachtiaj oksekimej itech Jehová, kichiua más matikixmatikan. San matitlanemilikan itech yejuin, kuajli tikitaj kenon Jehová melak teiknelia ijkuak kichiua matikinnextikan akin kipiyaj kuajli inyojlo (Juan 6:44; Hech. 13:48, TNM). Tikasikamatij ika iTlajtol toTajtsin melak kojtik ijkuak tikitaj kenon kichiua ika akin tikinmachtiaj makikauakan tlen xkuajli niman makipatlakan innemilis (Col. 3:9, 10). Noijki tikitaj ika toTajtsin melak teijyouiya pampa kinkauilia ika oksekimej noijki makixmatikan niman ijkon makisaskej (Rom. 10:13-15). Kuakon, noneki nochipa tikpatiojkaitaskej ika touikaj iuan Jehová maski tla yotiuejkaujkej tiktekichiuiliaj noso tla san kemach yotipeujkej. Uelis tikteititiskej ika tikpatiojkaitaj iuan touikaskej tla tikchiuiliaj teoyotl. Tla tiknekij kuajli touikaskej iuan yakaj, noneki melak kuajli iuan tonojnotsaskej. Yejua ika, miyekpa matiknotsakan Jehová, maka matechmojti tikijliskej tlen tiknemiliaj niman tlen tikmachiliaj. Yejon kichiuas matiknisiuikan. w19.12 19 párrs. 11, 13, 14

Noijki tikpiyaj tlamachialistli ijkuak tikmatij ika Jesús niman iTekiuajyo toTajtsin kiyektlaliskej nochi tlen Satanás kijtlakoua (Is. 65:17; 1 Juan 3:8; Apoc. 21:3, 4). Niman, techyolchikaua tikmatiskej ika Jesús techpaleuijtok ipan ouijtika tekitl tlen tikchiujtokej sa itlamiyan yejuin tonaltin (Mat. 28:19, 20). ¿Xmelak ika yolseuilistli, tlamachialistli niman yolchikaualistli kichiua matinemikan ika toyojlo? Kuakon, ¿kenon tiyolseujtoskej ipan totlamachilis ijkuak tikixnamikiskej tlen ouijtika? Tla tikchiuaj ken Jesús. Kachtopa, nochipa matikchiuakan teoyotl. Ome, matiktlakamatikan Jehová niman chikauak matitenojnotsakan maski maouijtika tlen tikixnamiktoskej. Niman yeyi, matikselikan ken techpaleuiyaj toamigos. Kuakon, iyolseuilis toTajtsin kitlajpiyas totlanemilil niman toyojlo (Filip. 4:6, 7). Niman ijkon ken Jesús, uelis tikxikoskej maski san tlenon topan mapano (Juan 16:33). w19.04 13 párrs. 16, 17