Octubre

Miyekpa yotikitakej kenon Jehová kipaleuiya ikalpan. Matiknemilikan yejuin: nochiuiyan titenojnotstokej niman titemachtijtokej tlen melauak (Mat. 28:19, 20). Ijkon tikteititiaj tlen xkuajli kichiua Satanás. Tla Satanás ueliskia, kiteltiskia tekitl tlen tikchiujtokej, san ika, xueli. Kuakon xkipiya ika tikinmakasiskej xkuajkualtin espíritus. Tla timelajkanemij itech toTajtsin, demonios xtlaj uelis texchiuiliskej. San ika, tinochimej noneki tikimixnamikiskej xkuajkualtin espíritus niman titlaneltokaskej itech Jehová. Tla ijkon tikchiuaj, Jehová melak techteochiuas. Satanás xok techkajkayauas. Noijki, nochipa tiktekichiuilijtoskej toTajtsin pampa xtikinmakasiskej demonios. Niman tlen melak ueyi kijtosneki, melak kuajli touikaskej iuan Jehová. Santiago, se inomachtijkauj Jesús, okijkuilo: “Xkixnamikikan on diablo, niman ijkon yejua mechtlalkauis. Xnisiuikan Dios niman yejua mechnisiuis” (Sant. 4:7, 8). w19.04 24 párr. 15; 25 párr. 18

Tatajtin, nemokoneuan se tetlayokolijli tlen toTajtsin yomechmakak. Nemejuamej nemotekiyo nekintlajpiyaskej nemokoneuan. ¿Tlenon uelis nenkichiuaskej niman ijkon maka yakaj makinnajnauilti nemokoneuan? Kachtopa, kuajli xkasikamatikan tlen panoua ijkuak yakaj kinajnauiltia se konetl. Kuajli xkasikamatikan akinomej más tenajnauiltiaj niman kenon kinkajkayauaj kokonej. Xtlatlachixtokan maka yakaj kinekis kinnajnauiltis nemokoneuan (Prov. 22:3; 24:3). Xkilnamikikan ika miyekpa akin tenajnauiltiaj sa no yejuamej akin nemokoneuj kixmatstika niman itech tlaneltoka. Ika ome, xmonojnotsakan imiuan nemokoneuan (Deut. 6:6, 7; Sant. 1:19). Xkilnamikikan ika miyekpa, kokonej xnoyolchikauaj kiteijliskej tla yakaj yokinchiuili tlen xkuajli. Kanaj kinemiliaj ika xakaj kimineltokilis. Noso kanaj akin yokinnajnauilti yokinmojmojti niman yokimijli maka itlaj makiteijlikan. Tla nenkitaj ika itlaj inpan nochiujtika nemokoneuan, san kualtsin xkintlajtoltikan niman kuajli xkinkakikan. Ika yeyi, xkinmachtikan nemokoneuan. Xkimijlikan tlenon noneki kijtoskej niman kichiuaskej tla yakaj peua kinkijkitskia. w19.05 13 párrs. 19-22

¿Tleka Jehová xkimijyouiya akin noueyimatij? Matikitakan se. Akin noueyimatij kiteititiaj ika tlanemiliaj ken Satanás, akin nomati melak ueyixtok. San matikonnemilikan yejuin, Satanás kineltokaya ika Jesús, akin okipaleuijka Jehová ijkuak nochi okichijchiuj, nonekiya ixpan notlakuantelketsas niman kiueyichiuas (Mat. 4:8, 9; Col. 1:15, 16). Ijkuak tikitaj kenon miyekej noueyimatij, más kuajli tikasikamatij tleka toTajtsin kita ika tlamachilistli tlen kisa ipan yejuin tlaltikpaktli melak xkuajli (1 Cor. 3:19). Biblia techpaleuiya matoitakan niman matotlasojtlakan ken kinamiki. Jesús okijto: “Xkintlajsojtla oksekimej ken tejua timotlajsojtla” (Mat. 19:19). Yejuin techititia ika kema noneki matikitakan tlen tejuamej techpoloua san ken kinamiki. San ika, Biblia xtechmachtia ika kipiya ika tiknemiliskej ika más tiuejueyixtokej xijkon ken oksekimej. Biblia kijtoua: “Maka itlaj xchiuakan ikan nexikojli nion maka nenkinekiskej nemoueyimatiskej, yej ikan yolyemanilistli xmomatikan ika oksekimej más uejueyixtokej xken nemejuamej” (Filip. 2:3; Rom. 12:3). w19.05 24 párrs. 13, 14

Matikilnamikikan tlenon ononek tikpatlaskej ijkuak otikselijkej tlen melauak itech iTlajtol toTajtsin niman ijkuak otiktlapejpenijkej tiktekichiuiliskej Jehová. Timiyekej ononek tijkauaskej tlen xkuajli tikchiuayaj (1 Cor. 6:9-11). Melak tiktlasojkamachiliaj toTajtsin ika otechpaleui tijkauaskej nochi yejon tlemach. San ika, maka san ijkon matokauakan. Maski xok tikchiuaj uejueyimej tlajtlakoltin tlen tikchiuayaj ijkuak xtoapolaktiayaj, ok noneki tokojtilijtoskej niman ijkon tikmapeuaskej tlen uelis kichiuas oksejpa ompa matiuetsitij. Noneki tikchiuaskej ome tlemach. Kachtopa, xok kipiya ika titlanemiliskej ken tlaltikpakchanejkej. Ika ome, kipiya ika tikyenkuiliskej totlamachilis noso topatlaskej. Timopatlas xsan kijtosneki tikpatlaskej ken tinesij. Kijtosneki tikpatlaskej tonemilis. Noneki tikyenkuiliskej totlamachilis, kijtosneki tikyenkuiliskej tlen tikileuiyaj, tlen tikchiuaj niman tlen yemelak tikmachiliaj. w19.06 9 párrs. 4-6

Ijkuak melak tajmanaskej, uelis oksejpa tikpiyaskej kojtilistli tla nochipa tiauej tlanechikoltin. Ijkuak ijkon tikchiuaj, tijkauiliaj ika Jehová matechpaleui niman matechyolseui. Ipan tlanechikoltin Jehová techyolchikaua ika iespíritu santo, iTlajtol niman itekipanojkauan. Noijki ipan tlanechikoltin uelis titeyolchikauaskej niman noijki uelis techyolchikauaskej (Rom. 1:11, 12). Se tokniuj akin itoka Sofía okijto: “Jehová niman tokniuan onechpaleuijkej maka melak maninajmana. Melak nikinpatiojkaitaya tlanechikoltin. Yonikitak ika, ijkuak melak nitenojnotsa niman melak nitlapaleuiya ipan tlanechikojli, más kuajli nikixnamiki tlen ouijtika niman notlaueluan”. Ijkuak tajmantoskej, matikilnamikikan ika Jehová xsan kijtoua ika kipopolos tlen techtlajyouiltia, noijki techijlia ika techpaleuis ipan yejuin tonajli. Yejua techpaleuiya ijkuak kichiua matikpiyakan kojtilistli niman ijkon maka sa matoyolkokojtokan nion matajmantokan (Filip. 2:13). w19.06 19 párrs. 17, 18

Kema, Jesús kinekiya nosentlalis imiuan inomachtijkauan. Nesi ika kinekiya kimijlis itlaj tlen melak ueyi kijtosneki. ¿Tleka ijkon tikijtouaj? Pampa yejon tlen kachtopa okichiuj sakin ika oyoliuj. Ijkuak Jesús onosentlali imiuan inomachtijkauan, okinmakak se tekitl tlen melak nonekiya makichiuakan ipan yejon tonaltin, niman yejon tekitl sa no yejua tlen aman tikchiujtokej. Jesús okimijli: “Xuiyan niman xkinmachtikan tlaltikpakchanejkej ipan nochi kalpamej, [...] xkinmachtikan makitlakamatikan nochi tlajtlamach tlen yonimechnauati” (Mat. 28:19, 20, TNM). Jesús kineki ika nochimej inomachtijkauan matenojnotsakan, kema, yejuin tekitl xsan okinmakak on 11 apóstoles akin omelajkanenkej. ¿Tleka kuajli tikmatstokej yejuin? Pampa xsan iapóstoles onosentlalijkej ne Galilea ijkuak Jesús okitemakak yejon tlanauatijli. ¿Tikilnamikij tlenon okimijli iluikaktekitketl on siuamej akin nemiyaj kampa okitokakej Jesús? Yejua okimijlika: “Ompa nenkitaskej” (Mat. 28:7). Kema, yejuamej noijki kitaskiaj Jesús ne Galilea. Yejua ika, uelis tikijtoskej ika kanaj yejon siuamej noijki onosentlalijkej ne Galilea. w20.01 2, 3 párrs. 1-4

Jesús okijto tleka miyekej techtlaueltokaskiaj. Okijto ika techtlaueltokaskiaj pampa xtikchiuaj ken kichiuaj tlaltikpakchanejkej. Kuakon, ijkuak techtlaueltokaskej, xkijtosneki tla Jehová xok techselia. Kijtosneki ika tikchiujtokej tlen kuajli. Tlaltikpakchanejkej xueliskej kichiuaskej maka sa matikueyichiuakan toTajtsin akin nochi ueli kichiua. Miyekej itlauelikniuan Jehová ijkon yokiyejyekojkej kichiuaskej, san ika, xouelkej. Matitlanemilikan itech tlen opanok ijkuak onochiuj ika okpa Guerra ipan nochi tlaltikpaktli. Tekiuajkej itech miyek países melak okitlaueltokakej ikalpan toTajtsin. Xsan alemanes nazis okichiujkej maka sa makiueyichiuakan toTajtsin, noijki ijkon okichiujkej akin tlayekanayaj Australia, Canadá niman okseki países. Maski ijkon, ika itlateochiualis Jehová opanok itlaj tlen melak temojkatlachialti. Ipan 1939, ijkuak opeuj guerra, nemiyaj 72,475 tenojnotskej ipan nochi tlaltikpaktli. San ika, sakin ijkuak otlan guerra ipan 1945 melak yomiyekiyakaj tenojnotskej, aman nemiyaj 156,299 tenojnotskej. w19.07 9 párrs. 4, 5

Maski tla xakaj tikmachtijtokej itech Biblia, uelis titlapaleuiskej ika oksekimej manochiuakan inomachtijkauan Cristo. ¿Kenon? Ijkuak yakaj kemach ika sejpa uajlauj totlanechikol, uelis tiktlajpaloskej niman tikchiuaskej kuajli manomachili. Ijkon, yejua kitas ika tejuamej yemelak tikchiuaj ken Cristo pampa titetlasojtlaj. Tla titlanankiliaj, maski tla xmiyek tikijtouaj, uelis kichiuas ika akin yauj tlanechikojli makimati kenon tlanankilis ika nochi iyojlo niman ika tetlakaitalistli. Noijki uelis titenojnotsaskej iuan se tokniuj akin kemach peua tenojnotsa niman tikpaleuiskej makikui Biblia niman ijkon kintlanemililtis akin kinnojnotsas. Tla ijkon tikchiuaj, tikititijtoskej matemachti ken Cristo (Luc. 10:25-28). Miyekej tokniuan noneki melak tekitiskej, yejua ika, xkipiyaj tiempo niman ijkon kichiuaskej okseki tlemach. Maski ijkon, yejuamej temachtiaj itech Biblia, niman yejuin kichiua mayolpakikan. w19.07 17 párrs. 11-13

Pablo onokojtili xtlanemilis ipan nochi tlen kuajli yokichiujka noso ipan tlen xkuajli okichiujka. Kema, yejua okijto ika kilkauaya tlen yopanoka niman ijkon kajsis “on tlen onkaj tlayakapan” noso tetlanis kampa notlalojtoya. ¿Tlenon ueliskia kichiuaskia maka sa makitekichiuili Jehová? Kachtopa, yejua miyek yokichiujka ipan judaísmo. San ika, yejua kitaya “nochi on tlajtlamach [...] ken itlaj tlajsojli” katka (Filip. 3:3-8). Ika ome, yejua okintlaueltokaka tokniuan. San ika, yejon xokichiuj ika maka sa makitekichiuili Jehová. Ika yeyi, yejua miyek yokichiujka ipan itekiyo Jehová. Pablo, melak kuajli otenojnots maski okixnamik tlen ouijtika: okitsajkej, okiuijuitikej, okitemojmotlakej, oapolajkej barcos kampa yaya, kemantika xkipiaya tlen kikuas niman xkipiaya tlen ika notlakentis. San ika, xkeman okinemili ika nochi yokimakaka Jehová (2 Cor. 11:23-27). Maski Pablo miyek yokichiujka niman miyek yokixnamijka, kasikamatiya ika nonekiya kitekichiuilijtos Jehová. Tejuamej noijki noneki ijkon tikchiuaskej. w19.08 3 párr. 5

Miyekej tokniuan chantij kampa tekiuajkej xkinkauiliaj matenojnotsakan, yejua ika, noneki kuajli kitaskej kenon tenojnotsaskej (Mat. 10:17-20). Ipan se país, se tokniuj tlayekanketl ipan circuito okimijli tokniuan ika ueliskiaj kinnojnotsaskej inchanejkauan, iminvecinos, akin imiuan nomachtiaj, akin imiuan tekitij niman akin kimixmatstokej. San ipan ome xiuitl, omiyekiyakej tlanechikoltin ipan yejon circuito. Kanaj tejuamej xtichantij kampa xtechkauiliaj matitenojnotsakan. Maski ijkon, matikchiuakan ken yejuin tokniuan: matikitakan kenon más titenojnotsaskej niman matikneltokakan ika Jehová techmakas kojtilistli niman ijkon tikixnamikiskej maski san katlejua tlauejli (Filip. 2:13). Melak noneki ika ipan yejuin tonaltin matikitakan tlen más ueyi kijtosneki, matichipaujkanemikan, maka yakaj matikyemanilikan itlaneltokil niman matikchiuakan “nochi tlen kuajli”. Tla ijkon tikchiuaj, ueyiyas totlasojtlalis niman tikueyichiuaskej toTajtsin Jehová akin melak techtlasojtla. w19.08 13 párrs. 17, 18

¿Xmelak ika xtikuelitaj tinemiskej imiuan akin nochipa kinekij kichiuaskej tlen yejuamej kinekij niman xkinokauiliaj ika oksekimej itlaj makimijlikan? San ika, tikuelitaj tinemiskej imiuan akin teasikamatij, tetlasojtlaj, teikneliaj niman yolyemankej (1 Ped. 3:8). Tla tejuamej ijkon tomachiliaj, uelis tikijtoskej ika oksekimej noijki kuajli nomachiliskej touan nemiskej tla tiyolyemankej. Tla tiyolyemankej, noijki techpaleuiya matikixnamikikan tlen ouijtika. Kemantika uelis tikmachiliskej ika itlaj xkinamiki ijkon manochiua. Xnochipa kintlakaitaj akin kuajli tekitij, niman kemantika más kintlakaitaj akin xmás itlaj kichiuaj. San ika, Salomón okasikamat ika más kuajli tla xsajnoye totekipachouaj itech tlen nochiua (Ecl. 6:9). Tla tiyolyemankej, xtitlauelmikiskej noso xtajmanaskej tla xnochiua tlen tikuelitaskiaj. w19.09 4 párrs. 9, 10

Nochimej tlayekankej niman tajtin noneki kitlakamatiskej Jehová pampa yejon uelis kinpaleuis oksekimej. Jehová yokinnauati tajtin ika yejuamej makinyekanakan inchanejkauan niman kichia makinmachtikan niman makinyektlalikan inkoneuan (1 Cor. 11:3). San ika, intlayekanalis tajtin san ontlami. Tajtin noneki tlanankiliskej ixpan Jehová pampa yejua akin okitlali familia (Efes. 3:14, 15). Tajtin kiteititiaj ika kinokauiliaj toTajtsin makinyekana ijkuak tlayekanaj ken toTajtsin kuelita. Tajtin, xselikan tla onemopopolojkej niman xselikan ijkuak mechpaleuiskej ika Biblia. Tla ijkon nenkichiuaj, nemosiuauj niman nemokoneuan mechtlakaitaskej pampa kitaskej ika nenyolyemankej. Noijki, ijkuak imiuan nenkichiuaskej teoyotl, ika nochi nemoyojlo xnotsakan Jehová. Ijkon, nemochanejkauan kitaskej ika melak nentlaneltokaj itech Jehová. Niman melak noneki nochipa xtekichiuilikan toTajtsin (Deut. 6:6-9). Nemochanejkauan melak kipatiojkaitaskej ken kuajli nenkinyekanaj. w19.09 15 párr. 8; 17 párrs. 14, 16

Marcos kiyolpaktiaya tlapaleuis. Yejua miyekpa oyaj iuan Pablo niman Pedro chika yejuamej kichiuayaj intekiyo. Miyekpa, Marcos kikouaya tlakuajli, kitejtemouaya kanon ueliskiaj noseuiskej niman kichiuaya okseki tlemach niman ijkon kinpaleuis (Hech. 13:2-5; 1 Ped. 5:13). Pablo okijto ika Marcos iuan tekitiya “ipan itekiu Dios” niman ika melak kiyolseuiaya (Col. 4:11). Marcos niman Pablo melak kuajli onouikakej. ¿Tleka ijkon tikijtouaj? Ijkuak Pablo sa yeika okitsajkej Roma, kanaj ipan xiuitl 65, okijkuilo ika ome amatlajkuilojli tlen okititlanili Timoteo. Ipan yejon amatlajkuilojli, okitlajtlanili Timoteo mauiya Roma niman makuika Marcos (2 Tim. 4:11). Kuajli tikitaj ika Pablo melak kitlasojkamatiya ken Marcos tepaleuiaya, yejua ika, okitlajtlan ika Marcos makitati niman ijkon iuan manemi ipan yejon tonaltin. Marcos melak okipaleui, kanaj kitkiliaya tlen kikuas noso tlen kitekitiltiaya niman ijkon tlajkuilos. Niman nochi yejuin, ken okiyolchikaujkej niman ken okipaleuijkej, okichiuj ika Pablo matlaxiko hasta ijkuak okimiktijkej. w20.01 11 párrs. 12, 13

Yotiktlapejpenijkej se nemilistli kampa tikixnamikiskej tlen ouijtika. Jesús otechijli ika techtlaueltokaskiaj. San ika, uelis tikneltokaskej ika Jehová techmakas kojtilistli niman ijkon tikxikoskej maski san katlejua tlauejli. Tla más titlaxikouaj, más tikpiyaskej kojtilistli (Sant. 1:2-4). Noijki uelis tikneltokaskej ika Jehová uelis techmakas tlen techonpolos, ika Jesús techyekanas niman ika tokniuan techyolchikauaskej (Mat. 6:31-33; Juan 10:14; 1 Tes. 5:11). Yejon siuatsintli akin yesuetsiya akin Jesús okipajti nimantsin oyolseuj ipan yejon tonajli (Luc. 8:43-48). San ika, tla kinekiya nochipa yolseujtos, nonekiya nochiuas inomachtijkauj Cristo. ¿Tlenon tiknemiliaj okichiuj? Tla yejua okitlapejpeni kinomamaltis iyugo Jesús, kuakon, okiseli se ueyi tlateochiualistli: tekitis iuan Jesús ne iluikak. Xtikmatij tlenon nonekiya kikauas yejuin siuatsintli niman ijkon nochiuas se inomachtijkauj Cristo, san ika, tlen okiseli melak kuajli xijkon ken tlen okikauj. Maski tla tikchiaj tiaskej iluikak noso tinemiskej ipan tlaltikpaktli, tinochimej noneki matechyolpakti ika otijkakej Jesús ijkuak otechijli: “Notech xuajlakan”. w19.09 25 párrs. 21, 22

David niman sekimej tlakamej akin itech melajkanemiyaj kinekiyaj makinpaleuikan. Se tonajli, akin nemiyaj iuan David okitlajtlanilitoj achijtsin tlakuajli se tlakatl akin kipiaya tomin, itoka katka Nabal. Yejuamej okinejkej kitlajtlaniliskej tlakuajli pampa okintlajpilijkaj inyolkauan ijkuak nemiyaj ipan tlaluaktli. San ika, Nabal nexikole katka niman xitlaj okinek kinmakas. Yejuin okichiuj ika David melak makualani niman okinek kinmiktis Nabal niman nochimej akin nemiyaj ichan Nabal (1 Sam. 25:3-13, 22). Kuakon, onokalakti isiuatsin Nabal, akin itoka katka Abigaíl. Yejuin siuatsintli akin tlamachilise okiteititi ika melak yolchikauak katka pampa okinamikito David, ikxitlan onotlajkal niman okitlajtlanili maka manotlakuepilti niman maka matemikti. Ika tlakaitalistli okijli makikauili yejon tlauejli ipan ima Jehová. Tlen okijto niman tlen okichiuj Abigaíl okiteititi ika yolyemanki katka niman ika tlamachilise katka, niman yejuin okichiuj ika David makita ika Jehová yejua akin okititlanka (1 Sam. 25:23-28, 32-34). Abigaíl yokiskaltijka kualneskayomej tlen kichiuaya ika Jehová makitekitilti. Noijki, Jehová uelis kintekitiltis tokniuan siuamej akin kiteititiaj tlakaitalistli niman tlamachilistli niman ijkon makinyolchikauakan inchanejkauan niman tokniuan ipan tlanechikojli (Tito 2:3-5). w19.10 22 párr. 10

Tinochimej akin tikchiuaj ken Cristo noneki kuajli tikisaskej itech Ueyixtika Babilonia. Kanaj miyekej akin nomachtijtokej Biblia nemiyaj ipan se religión tlen xmelauak. Kanaj yayaj ijkuak inreligión itlaj kichiuaya, kanaj ontlapaleuiayaj noso kitemakayaj tomin. Tla yakaj akin touan nomachtijtika Biblia kineki tenojnotsas, kachtopa noneki kuajli kisas itech religión tlen xmelauak. Noneki kijkuilos se carta kampa makijto ika xok teuan yes itech yejon religión tlen xmelauak noso grupo kampa nemiya. Tinochimej akin melauak tikchiuaj ken Cristo, noneki kuajli tikitaskej ika maka tikchiujtoskej tlen kineki Ueyixtika Babilonia (2 Cor. 6:14-17). ¿Tleka? Pampa xtiknekij imiuan tikchiujtoskej tlen xkuajli nion imiuan titlajtlakojtoskej. Ixpan toTajtsin, yejuamej kichiuaj tlen xchipauak (Is. 52:11). w19.10 12 párrs. 16, 17

Jeremías kanaj okimijkuilo amoxtin 1 niman 2 Reyes, niman noijki on amoxtli Jeremías. Pampa okichiuj yejuin tekitl, tikmatstokej ika okasikamat ika Jehová kimiknelia tlaltikpakchanejkej. Matikonnemilikan yejuin, Jeremías okimat ika ijkuak tekiuaj Acab onoyolkuep itech tlen xkuajli okichiujka, Jehová okijto ika Acab xkitaskia ijkuak kinmiktiskiaj ichanejkauan (1 Rey. 21:27-29). Noijki, okimat ika maski Manasés más okipijpinaujtijka Jehová xijkon ken Acab, Jehová okitlapopolui ijkuak onoyolkuep (2 Rey. 21:16, 17; 2 Crón. 33:10-13). Yejuin kanaj melak okipaleui Jeremías noijki makimijyoui niman makimikneli oksekimej ijkon ken Jehová kichiuaya. Matitlanemilikan itech tlen okichiuj Jeremías ijkuak iamigo Baruc opeuj tlanemilia itech okseki tlemach. Jeremías xokinemili ika Baruc xok ueliskia noyektlalis, ika tlasojtlalistli okipaleui ijkuak okimelajkaijli tlen Jehová kinekiya kijlis (Jer. 45:1-5). w19.11 6 párrs. 14, 15

Ipan amoxtli Levítico, tikitaj ika israelitas ueliskiaj kitemakaskej se “uentli de yoltlalilistli” niman ijkon kiteititiskej ika kitlasojkamachiliayaj Jehová (Lev. 7:11-13, 16-18). Yejuamej xkitemakayaj yejuin uentli tla pampa nonekiya ijkon kichiuaskej, yejuamej kitemakayaj pampa kisaya itech inyojlo. Israelitas kitemakayaj “uentin de yoltlalilistli” pampa kisaya itech inyojlo, niman ijkon kiteititiayaj ika kitlasojtlayaj Jehová. Tlen tikchiuaj ipampa Jehová noijki ijkon ken yejon uentin, tiknekij tikititiskej tlen tikmachiliaj ipampa. Tikmakaj Jehová tlen más kuajli pampa tiktlasojtlaj ika nochi toyojlo. Kuajli tikmatstokej ika melak yolpaki kitas kenon miyekej tlaltikpakchanejkej kitekichiuiliaj pampa kitlasojtlaj niman kipatiojkaitaj itlanauatiluan. Jehová xsan kita niman xsan kitlasojkaita tlen tikchiuaj, yejua noijki kita tleka tikchiuaj. Se neskayotl, tla xok más tiuelij tiktekichiuiliaj Jehová pampa yotiueuentsintiakej, kuajli matikmatstokan ika Jehová xkitstika tlenon xtiuelij tikchiuaj. Kanaj tikitaj ika xmiyek tlen uelis tikchiuaskej ipampa, san ika, yejua kita ika tiktlasojtlaj niman tokojtiliaj tikchiuaskej nochi tlen tiuelij. Yejua kiyolpaktia kiselis tlen tikchiuaj ipampa. w19.11 22 párr. 9; 23 párrs. 11, 12

Noneki titekitiskej ken kinamiki. Tekiuaj Salomón okijkuilo: “Nochi tlen nochiua ipan in tlaltikpaktli kipiya kamanon nochiuas”, niman okiteneuj ika onka kemanon titokas, titlachijchiuas, tichokas, tiuetskas niman timijtotis (Ecl. 3:1-8). Kuajli tikitaj ika tinochimej noneki titekitiskej niman toseuiskej. Jesús kitaya yejon ome tlemach ken kinamikiya. Sejpa, itlatitlankauan Jesús otenojnotsatoj niman melak otenojnotskej hasta “xkipiyayaj tiempo para tlakuaskej”. Kuakon, Jesús okimijli tlen kijtoua tlaxelojli tlen aman tikitstokej (Mar. 6:30-34). Nion Jesús nion inomachtijkauan xnoseuiayaj ijkon ken kinekiyaj. San ika, Jesús kimatstoya ika nochimej yejuamej nonekiya noseuiskej. Kemantika, noneki toseuiskej achijtsin noso tikchiuaskej itlaj okse. Ijkon kiteititia se tlanauatijli tlen Jehová okinmakak israelitas, ompa kijtouaya ika nonekiya noseuiskej ipan tonajli sábado. Tejuamej xok noneki tikchiuaskej ken kijtoua Tlanauatijli tlen okimakakej Moisés, san ika, melak kuajli tla tomachtiaj yejon tlanauatijli itech sábado. w19.12 3 párrs. 6, 7

Jehová kuajli yokijto ika kintlajpiyas itekipanojkauan, ika yejon, kita ika noneki kichiuas tlen yokijto (Sal. 31:1-3). Noijki, kimatstika ika melak xkuajli tomachiliskiaj tla yejua xnajmanaskia topampa. Yejua yotechmelajkaijli ika techmakas tlen techpoloua niman tlen ika tikchikauaskej totlaneltokil, niman xitlaj uelis kitsakuilis ijkon makichiua (Mat. 6:30-33; 24:45). Ijkuak tikilnamikij tleka Jehová kichiua tlen kijtoua, xsajnoye tajmanaj ijkuak xtikpiyaj tomin. Matitlanemilikan intech tokniuan akin onenkej ipan kachtopa siglo. Ijkuak melak okitlaueltokakej tlanechikojli tlen onkatka Jerusalén, “nochimej on tlaneltokakej ochojcholojkej”, san apóstoles ompa onokaujkej (Hech. 8:1). Ika yejon, kanaj miyekej xkipiayaj tomin. Kanaj okipolojkej inchan, intekiyo niman kampa tlanemakayaj. San ika, Jehová xokinkauj, niman yejuamej ok yolpakiyaj (Hech. 8:4; Heb. 13:5, 6; Sant. 1:2, 3). ToTajtsin okinpaleui yejon tokniuan, niman uelis kuajli tikmatstoskej ika noijki techpaleuis (Sal. 37:18, 19). w20.01 17 párrs. 14, 15

Ijkuak David okixnamik se león niman se oso niman ijkon kinmanauis iborreguitos itaj, David okijto ika ouel okinmikti yejon yolkamej pampa toTajtsin okipaleuijka. Ijkuak okitlan yejon uejkapan tlakatl itoka Goliat, David kuajli okitak ika Jehová kiyekanaya (1 Sam. 17:37). Niman ijkuak okicholouilijtinen tekiuaj Saúl, okitak ika toTajtsin kipaleuiaya (Sal. 18, tlajtoltin tlen nesij achto ika peuas). Tla David noueyimatiskia, kanaj kinemiliskia ika iselti okichiuj nochi yejon. San ika, yejua yolyemanki katka, ika yejon, ouel okitak kenon Jehová kipaleuiaya. ¿Tlenon tiuelij itech David? Ika xsan noneki tiktlajtlaniliskej Jehová matechpaleui, noijki noneki tokojtiliskej tikasikamatiskej kenon niman kemanon techpaleuiya. Tla tiyolyemankej niman tla tikasikamatij ika xnochi tiuelij tikchiuaj, melak kuajli tikitaskej ika Jehová techmaka tlen techpoloua. Niman nochipa ijkuak tikitaskej kenon techpaleuiya Jehová, más tiktlasojtlaskej. w19.12 20 párrs. 18, 19

Akin tiitekipanojkauan Jehová uelis más tikneltokaskej ika yejua techpatiojkaita. ¿Tleka ijkon tikijtouaj? Pampa yejua okitak kenon otikselijkej kuajli tlajtoltin niman otechpaleui itech matonisiuikan (Juan 6:44). Ijkuak opeuj tonisiuiyaj itech Jehová, yejua noijki otechnisiui (Sant. 4:8). Noijki, nokojtilia niman kixeloua tiempo niman ijkon techmachtis. Yejua kuajli techixmatstika niman kimati ika uelis tinemiskej ken yejua kuelita. Techititia ika techtlasojtla ijkuak techmelajkatlalia. ¿Xmelak ika kuajli nesi ika toTajtsin techpatiojkaita? Tekiuaj David kuajli kimatstoya ika Jehová kitlasojtlaya niman kipaleuiaya. Yejuin okichiuj kuajli makixiko nochi tlen ipan onochiuj, ken ijkuak sekimej okijlikej ika katka se “xkuajli tlakatl” (2 Sam. 16:5-7). Ijkuak melak toyolajmanaj niman tikixnamikij tlen ouijtika, Jehová uelis kichiuas kuajli matitlanemilikan niman techpaleuis matikxikokan maski san tlenon tikixnamiktoskej (Sal. 18:27-29). Tla toTajtsin techpaleuiya, xitlaj techteltis matiktekichiuilikan ika pakilistli (Rom. 8:31). w20.01 15 párrs. 7, 8

Matikchiuakan teoyotl achto tipeuaskej titemachtiskej itech Biblia. Tla yakaj yopeuj tikmachtiaj, melak kuajli tla nimantsin tikijliaj ika noneki tikchiuaskej teoyotl achto tipeuaskej tomachtiskej niman ijkuak titlamiskej. Noneki tikasikamachiltiskej ika san uelis tikasikamatiskej iTlajtol toTajtsin tla tiktlajtlanij espíritu santo. Sekimej tokniuan kinpouiliaj inomachtijkauan tlen kijtoua Santiago 1:5, kampa techijlia: “Tla semej nemejuamej xnenkimatij on tlen kuajli nenkichiuaskej, ‘xtlajtlanilikan Dios tlamatkilistli’”. Sakin, kitlajtoltiaj: “¿Kenon uelis tiktlajtlaniliskej toTajtsin ‘tlamatkilistli’?”. Miyekej nimantsin kasikamatij ika noneki nochiuas teoyotl. Matikititikan akin tikmachtiaj kenon kichiuas teoyotl. Kuajli matikasikamachiltikan ika Jehová melak kineki kinkakis iteoyouan. Matiktomilikan ika uelis kijlis nochi tlen kajmana niman tlen xakaj kijliskia. Matikilnamiktikan ika Jehová ikimatstika tlenon tikpiyaj ipan toyojlo (Sal. 139:2-4). w20.01 2 párr. 3; 5 párrs. 11, 12

Jehová kijtoua kemanon tetlapejpenis (Rom. 8:28-30). Jehová opeuj kintlapejpenia akin yaskej iluikak sakin ika okiyoliti Jesús. Nesi ika ipan kachtopa siglo, nochimej akin yemelak kichiuayaj ken Cristo katkaj tlapejpeniltin. San ika, sakin, maski miyekej kijtouayaj ika tokniuan katkaj, xmelauak tokniuan katkaj. Maski ijkon opanok, ipan yejon tonaltin Jehová okintlapejpeni sekimej tokniuan akin yemelak kineltokayaj Cristo. Yejuamej katkaj ken on trigo tlen Jesús okijto ika noskaltiskia itsajlan on xkuajli xiujtli (Mat. 13:24-30). Ipan yejuin tonaltin, Jehová ok kintlapejpenijtika akin teuan nopouaskej itech on 144,000. Kuakon, tla toTajtsin kintlapejpenia sekimej tokniuan ijkuak sa achijtsin poliuis ika kipopolos tlen xkuajli ipan tlaltikpaktli, tejuamej xtechmelaua tikijtoskej tleka ijkon kichiua (Rom. 9:11). Xtiknekiskiaj tikchiuaskej ken yejon tlakeualtin tlen Jesús okinteneuj ipan se itlamachtil, yejon tlakamej xokuelitakej tlenon okichiuj inteko inpampa akin sa ika teotlak otekitkej (Mat. 20:8-15). w20.01 30 párr. 14

Jehová kineki ika ikoneuan mapakikan. Maski aman melak titlajyouiyaj, onka miyek tlemach tlen kichiua matipakikan. Uelis tipakiskej pampa kuajli tikmatstokej ika toTajtsin melak techtlasojtla. Noijki, yotikixmatkej tlen melauak temachtia Biblia (Jer. 15:16). Niman tinemij ipan ikalpan toTajtsin kampa tokniuan kitlasojtlaj Jehová, kitlasojtlaj itlanauatiluan niman noijki techtlasojtlaj (Sal. 106:4, 5). Noijki uelis tipakiskej pampa tikmatstokej ika ajsis tonajli ijkuak melak kuajli tinemiskej xijkon ken aman. Tikmatij ika sa achijtsin poliui ijkuak Jehová kinpopolos akin xkuajkualtin, niman itechkopa iTekiuajyo, yejua kikuepas yejuin tlaltikpaktli se xochitlalpan. Xtiometlamatij ika akin yomijkej oksejpa yoliuiskej niman oksejpa touan nemiskej (Juan 5:28, 29). ¿Xmelak ika kualtsin yes? Niman tlen más ueyi kijtosneki: tikmatstokej ika sa achijtsin poliui ijkuak nochimej akin chantij ipan tlaltikpaktli niman ipan iluikak, kiueyichiuaskej niman kiueyiteneuaskej toTaj Jehová ijkon ken kinamiki. w20.02 13 párrs. 15, 16

Tla tikchiuaj se tlajtlakojli, maka matikiyanakan. Matiknotsakan Jehová niman matikijlikan tlen otikchiujkej. Tla ijkon tikchiuaj, tiyolseuiskej niman xok totlajtlakoltijtoskej. San ika, tla tiknekij oksejpa kuajli touikaskej iuan Jehová, noneki tikchiuaskej okse tlemach. Matikselikan ken techmelajkatlalis Jehová. Ijkuak Jehová okititlan teotlajtoketl Natán matlajtoti iuan tekiuaj David itech itlajtlakol iuan Bat-Seba, David xsan tlemach ika onotlami nion xokijto ika itlajtlakol xueyi kijtosnekiya. Nimantsin okinokuiti ika xsan okichiuilijka tlen xkuajli iueuentsin Bat-Seba, noijki okasikamat ika otlajtlakojka ixpan Jehová. David okiseli ken okimelajkatlali Jehová, niman Jehová okitlapopolui (2 Sam. 12:10-14). Tla otikchiujkej se ueyi tlajtlakojli, noneki titlajtoskej iuan tokniuan akin toTajtsin yokintlali matechtlajpiyakan (Sant. 5:14, 15). Ijkuak touan tlajtoskej, maka san tlemach ika matotlamikan. Tla nimantsin tikseliaj ken techmelajkatlalia Jehová niman tikchiuaj tlen techtlajtlanilia, más totoka tiyolseuiskej niman tiyolpakiskej. w20.02 24 párrs. 17, 18

On “majtlaktli tlakamej” kijtosneki nochimej akin kiseliskej nemilistli tlen xkeman tlamis ipan yejuin tlaltikpaktli. On “majtlaktli tlakamej” kimatstokej ika Jehová yejua akin yokintlapejpeni tokniuan akin yaskej iluikak, akin kimixmatij ken on “judío”. Niman melak kitlasojkamatij ika imiuan kitekichiuiliaj toTajtsin. Ipan yejuin tonaltin xtikmatij kenon intoka nochimej tlapejpeniltin akin ok nokauaj ipan tlaltikpaktli. Maski ijkon, akin kichiaj nemiskej ipan yejuin tlaltikpaktli uelis imiuan “yaskej” tlapejpeniltin. ¿Kenon uelis imiuan yaskej? Tlen kijtoua tlaxelojli tlen aman tikitstokej techpaleuiya matikasikamatikan. Kijtoua ika on “majtlaktli tlakamej” chikauak kajsiskiaj “itlaken se judío” niman kijtoskiaj: “Tiknekij nemouan tiaskej, pampa yotiktekakilijkej ika toTajtsin nemouan nemi”. Yejuin tlaxelojli kiteneua san se “judío”, san ika, noijki kijtoua ika on “majtlaktli tlakamej” kijliaj “judío” ika imiuan yaskej. Yejuin techititia ika on “judío” xkijtosneki san se tlakatl, yej kijtosneki nochimej tlapejpeniltin. Akin xtlapejpeniltin kitekichiuiliaj Jehová imiuan akin yaskej iluikak. San ika, yejuamej xkimitaj tlapejpeniltin ken intlayekankauan, pampa kuajli kimatstokej ika san Jesús inTlayekankauj (Mat. 23:10). w20.01 26 párrs. 1, 2

Jesús okijto tlenon kinpaleuiskia oksekimej makimatikan akinomej yemelak inomachtijkauan, okijto ika yejuamej notlasojtlaskiaj imiuan oksekimej ijkon ken yejua okintlasojtlak. Ipan kachtopa siglo, inomachtijkauan otetlasojtlakej, niman aman tejuamej noijki noneki titetlasojtlaskej maski ijkuak ouijtika yes. Matotlajtoltikan: “¿Kenon uelis nikchiuas ijkon ken tokniuan akin tetlasojtlaj maski kixnamikij tlen ouijtika?”. Pampa titlajtlakolejkej, kemantika ouijtika tikitaj titetlasojtlaskej ika nochi toyojlo. Maski ijkon, noneki tokojtiliskej tikchiuaskej ken Cristo. Jesús otechmachti ika melak noneki totlapopoluiskej imiuan oksekimej (Mat. 5:23, 24). Jesús okijto ika noneki kuajli touikaskej imiuan oksekimej tla tiknekij tikyolpaktiskej toTajtsin. Kema, Jehová yolpaki ijkuak kita ika tokojtiliaj kuajli touikaskej imiuan tokniuan. Tla xtikilkauaj tlen xkuajli texchiuiliaj tokniuan niman tla xtiknekij imiuan toyolseuiskej, yejua xkiselis tlen tikchiuaj ipampa (1 Juan 4:20). w20.03 24 párrs. 1-4

Satanás, “imintataj on yejuan tlakajkayauaj”, yeuejkaui uajtekajkayajtiuj (Juan 8:44). Yotekajkayauj itech ijkuak yakaj miki niman kenon nemij akin yomijkej. Ompa ualeuaj nochi costumbres niman miyek tlen noneltoka. ¿Tleka miyekej kineltokaj tlen Satanás kijtoua? Satanás kimatstika kenon tomachiliaj ijkuak yakaj miki, kuakon, kitekitiltia yejon niman ijkon techkajkayauas. Pampa otexchijchiujkej nochipa matiknekikan matinemikan, xtiknekij timikiskej (Ecl. 3:11). Tejuamej tikitaj mikilistli kentla se totlauelikniuj (1 Cor. 15:26). Maski melak yokiyejyeko, Satanás xueli kiyana tlen melauak itech mikilistli. Ipan yejuin tonajli melak miyekej nemij akin teijliaj niman temachtiaj tlen kijtoua Biblia itech mikilistli niman tlen panoua ijkuak yakaj miki (Ecl. 9:5, 10; Hech. 24:15). Yejuin techpaleuiya maka matomojtikan niman techyolseuiya. w19.04 14 párr. 1; 15 párrs. 5, 6

Jehová kintlasojtla akin kitekichiuiliaj. Nochipa yokintlasojtlak niman nochipa kintlasojtlas. Yejua noijki kitlasojtla melajkayotl (Sal. 33:5). Kuakon, kuajli tikmatstokej ome tlemach. Kachtopa, ika yejua kiyolkokoua ijkuak itekipanojkauan inpan nochiua tlen xkinamiki. Niman, ika ome, ika yejua kichiuas tlen melajki. Tlanauatijli tlen toTajtsin okimakak ikalpan Israel kiteititiaya tlasojtlalistli niman melajkayotl, niman melak kinpaleuiaya akin tlajyouiayaj (Deut. 10:18). Yejuin Tlanauatijli kiteititia kenon Jehová melak kintlasojtla akin kitekichiuiliaj. ITlanauatil Moisés otlan ipan xiuitl 33, ijkuak opeuj tlanechikojli. ¿Kijtosnekiya ika akin opeuj kichiuaj ken Cristo xkipiyaskiaj se tlanauatijli tlen makiteititi tlasojtlalistli niman melajkayotl? Ka, xyejon kijtosnekiya. Tokniuan kipiayaj se yenkuik tlanauatijli: “Itlanauatil Cristo”. Jesús xokimijkuilouili inomachtijkauan tlanauatiltin tlen nonekiya kichiuaskej, san ika, kema okinnojnots niman okimijli kenon noyekanaskiaj. “Itlanauatil Cristo” kijtosneki nochi tlen Jesús otemachti niman otenauatij. w19.05 2 párrs. 1-3

Tinochimej noneki matechyolseuikan niman tinochimej tiuelij titeyolseuiyaj. Matiknemilikan yejuin, ijkuak se konetl uejuetsi niman nokokoua pampa nauiltijtinemi, peua choka niman kontejtemoua itaj noso inan. Yejuamej xuelij kipajtiaj, san ika, kema uelij kiyolseuiyaj. Kitlajtoltiaj tlenon kipiya, kipopouiliaj ixayo, kinapalouaj niman kualtsin kinotsaj, niman kanaj kichipauiliaj niman kitlaliliaj itlaj kampa onokoko. Konetl nimantsin nokajkaua niman kanaj oksejpa onnauiltia. Ika yolik, pajtis kampa onokoko. San ika, nemij sekimej kokonej akin más tlajyouiyaj. Sekimej kinnajnauiltiaj, uelis san sejpa noso miyek xiuitl ijkon kinchiuiliaj. Maski san kenon, nochi yejon kichiua melak xkuajli manomachilikan. Kemantika, nomati akinomej ijkon kichiuaj niman kintsakuaj, san ika, sekimej xkinchiuiliaj ken kinamiki. Niman maski akin tenajnauiltia nimantsin kitsakuaj, akin okinajnauiltijkej ok tlajyouiya maski iueyi. w19.05 14 párrs. 1, 2