Marzo

Apóstol Pedro okimijli tokniuan makichiuakan nochi tlen noneki para kinyolchikauaskej oksekimej. Yejua okijkuilo: “Kuajli xtekitiltikan on tlen Dios omechmakak para nenkimpaleuiskej oksekimej” (1 Ped. 4:10). Maka matiknemilikan ika oksekimej technexikolitaskej tla tikchiuaj nochi tlen tiuelij ipan ikalpan Jehová. Melak noneki matotlajpiyakan para maka toueyimatiskej (1 Cor. 4:6). Matikilnamikikan ika Jehová techpaleuiya matikchiuakan nochi tlen ueli tikchiuaj. Kuakon, matiteyolchikauakan niman maka matoueyimatikan (Filip. 2:3). Ijkuak tijkuij tokojtilis niman nochi tlen ueli tikchiuaj para tiktekichiuiliskej Jehová, melak tiyolpakij pampa tikueyichiujtokej Jehová. San ika, maka matoueyimatikan nion matikinyolkokokan oksekimej pampa tla ijkon tikchiuaj xok tiyolpakiskej. w22.04 11, 12 párrs. 7-9

Jesús melak kitlasojtlaya iTlajtol toTajtsin. Salmo 40:8 okijtojka kenon Jesús melak kipatiojkaitaskia iTlajtol toTajtsin: “Nejua nikuelita nikchiuas tlinon tejua tikneki noDios. Motlanauatil nikejeua ipan noyojlo”. Pampa Jesús melak okipatiojkaitak Biblia, okipaleui mayolpaki niman nochipa makitekichiuili Jehová. Tejuamej noijki ijkon techpaleuis tla tokojtiliaj tikamapouaj iTlajtol toTajtsin niman tiktlasojtlaj (Sal. 1:​1-3). Tlen Jesús okijto niman tlen okichiuj techpaleuiya más matiknekikan kuajli tikamapouaskej niman tomachtiskej Biblia. Tla tiknekij más kuajli tikasikamatiskej tlen tikamapouaj, matikchiuilikan teoyotl Jehová, san yolik matitlaamapouakan, matochiuilikan seki tlajtoltilistin niman matikijkuilokan tlen tiuelij. Tla tiknekij kuajli titlanemiliskej itech Biblia, maka san totoka matikamapouakan niman okseki matiktejtemokan ipan toamatlajkuiloluan. Niman tla tiknekij ika iTlajtol toTajtsin matechpaleui, nochipa matikamapouakan ika nochi toyojlo. Tla tikchiuaj nochi yejuin, Biblia más techpaleuis ijkuak tikamapouaskej niman más tiknisiuiskej Jehová (Sal. 119:17; Sant. 4:8). w23.02 13 párrs. 15, 16

Xnemili tlenon más kuajli tikneki tikchiuas. Niman xmokojtili xchiua nochi tlen noneki. Pero, ¿tlenon uelis mitspaleuis ijkon xchiua? Matikonnemilikan ika tikneki más kuajli titemachtis, ¿tlenon uelis tikchiuas? Uelis timomachtis amatlajkuilojli Xmomachti kuajli titlaamapouas niman titemachtis. Niman tla tikpanoltis se tlamachtijli, uelis tikijlis se tokniuj mamitskaki niman mamitsijli tla itlaj noneki tikpatlas noso tla itlaj xkuajli tikchiujtika. Tla kuajli tikinpanoltia motlamachtiluan, kitaskej ika kuajli titemachtia niman noijki kitaskej ika titekitki niman mitsmakaskej okseki tekitl (2 Cor. 8:22). Kemantika ouijtika tikitaj itlaj tikchiuaskej. Tla tejua ijkon timomachilia, ¡maka xmosiaujkaua! ¿Niman kema más kuajli ouel otemachti Timoteo niman ouel más kuajli okinpanolti itlamachtiluan? Biblia xtlaj kijtoua, san ika, tikmatstokej ika yejua kema okichiuj tlen Pablo okijli. Kuakon, kanaj ika yolik yejua opeuj más kuajli temachtia niman más kuajli opeuj kichiua tekitl tlen okimakakaj (2 Tim. 3:10). w22.04 24 párrs. 8-11

¿Akinon kineskayotia on “xkuajli yolki yejuan kipiyaya chikomej itsonteko”? Biblia kijtoua ika yejuin xkuajli yolki tlajtlachia ken leopardo, ikxiuan ken oso niman ikamak ken león niman kipiya majtlaktli ikuakuauan. Niman Daniel capítulo 7 kijtoua ika Daniel okitak se leopardo, se oso, se león niman se yolki tlen kipiya majtlaktli ikuakuauan. San ika, Apocalipsis kijtoua ika Juan okimitak yejuin nauimej yolkamej san ipan se yolki. Niman yejuin yolki xkineskayotia san se gobierno. Noijki, Apocalipsis kijtoua ika kinnauatia “nochi tribus, nochi razas, nochi kech sesekneka tlajtoltin, niman nochimej países”. Ken tikitaj, yejuin yolki más kojtik xijkon ken se gobierno tlen tlanauatia ipan se país (Apoc. 13:7). Kuakon, ¿akinon kineskayotia? Nochimej gobiernos akin youajtlayekantiajkej ipan yejuin tlaltikpaktli (Ecl. 8:9). Ipan Biblia, número 10 kijtosneki “nochi”, ika yejon, pampa yejon yolki kipiya majtlaktli ikuakuauan, kinneskayotia nochimej gobiernos. w22.05 9 párr. 6

¿Akinomej nemiskej ipan yenkuik tlaltikpaktli? Itekipanojkauan toTajtsin akin makisaskej ipan Armagedón niman kokonej akin uajnemiskej ipan yenkuik tlaltikpaktli. San ika, ipan Apocalipsis capítulo 20 kijtoua ika akin yomijkej noijki yoliuiskej (Apoc. 20:​11-13). Niman ¿akinomej yoliuiskej? Akin “yolmelajkej” noso itekipanojkauan toTajtsin akin itech omelajkanenkej. Noijki yoliuiskej akin “xyolmelajkej” noso akin xkeman okixmatkej Jehová (Hech. 24:15; Juan 5:​28, 29). Kuakon, ¿nochimej mijkatsitsintin yoliuiskej ipan yejon mil xiuitl? Ka. Akin okixmatkej toTajtsin niman xokinejkej okitekichiuilijkej noso xokinejkej kikajkauaskej tlen xkuajli, yejuamej xok kinyolitiskej. ¿Tleka? Pampa ijkuak yoltoyaj okiteititijkej ika xkinekiyaj nemiskej ipan se kualtsin xochitlalpan (Mat. 25:46; 2 Tes. 1:9; Apoc. 17:8; 20:15). w22.05 18 párrs. 16, 17

Jesús kuajli kiyekana ikalpan toTajtsin nikan ipan tlaltikpaktli itechkopa “tekitketl” yolmelauak niman tlamachilise (Mat. 24:45). ¿Tlenon tiknemilia itech ikalpan toTajtsin? Kanaj timomachilia ken Pedro akin okijli Jesús tlen kijtoua tlaxelojli tlen aman tikitstokej. Itechkopa ikalpan toTajtsin, Cristo texchikauilia totlaneltok niman techititia kenon uelis más kuajli titemachtiskej. Noijki techpaleuiya matikpiyakan “yenkuik nemilistli” para tikyolpaktiskej Jehová (Efes. 4:24). San xkonnemili kenon tinemiskiaj tla xtikixmatiskiaj ikalpan Jehová. Jesús melak kuajli techyekana ijkuak tikixnamikij itlaj tlen ouijtika. ¿Tleka ijkon tikijtouaj? Ijkuak opeuj ueyi kokolistli COVID-19, miyekej tlaltikpakchanejkej xkimatiyaj tlenon kichiuaskej, san ika, Jesús okintekitilti tokniuan para matechijlikan kenon nonekiya totlajpiyaskej. w22.07 12 párrs. 13, 14

Israelitas nonekiya mojmostla kinnojnotsaskej inkoneuan itech Jehová pampa yejua ijkon okinnauati (Deut. 6:​6, 7). Tatajtin nochipa nemiyaj imiuan inkoneuan, ika yejon, ueliyaj imiuan tlajtlatouayaj niman kinmachtiayaj kenon nonekiya kitlasojtlaskej Jehová. Telpokatsitsintin nochipa nemiyaj imiuan intaj pampa imiuan tokayaj niman pixkayaj. Niman ichpokatsitsintin nochipa nemiyaj inchan imiuan innan, yejuamej san sekan tlajtsomayaj noso tlasalouayaj. Ken tikitaj, yejuamej ueliyaj kimijliayaj inkoneuan kenon yokintlasojtlaka Jehová niman kenon yokinpaleuijka inchanejkauan. Aman miyekej tatajtin xok más kimitaj inkoneuan pampa tekitij, niman inkoneuan yauej escuela. Ika yejon, tatajtin noneki kixeloskej tiempo niman ijkon nemiskej imiuan inkoneuan niman imiuan tlajtlajtoskej (Efes. 5:​15, 16). w22.05 28 párrs. 10, 11

Ipan yejuin tlaxelojli kijtoua katlejua yejon uejueyimej tlajtlakoltin. Tla yakaj kichiujtoskia se de yejon tlajtlakojli, kichiujtoskia tlen melak xkuajli pampa xkitlakamatstoskia itlanauatil toTajtsin niman nonekiskia kinotsas Jehová niman kitlajtlanilis makitlapopolui. Niman noijki noneki kimijlis tlayekankej tlen okichiuj (Sal. 32:5; Sant. 5:14). Matikilnamikikan ika san Jehová uelis kijtos tla yakaj kitlapopoluis noso ka, niman yejua ueli techtlapopoluiya pampa Jesús omik topampa. San ika, Jehová yokintekitlali tlayekankej niman ijkon ika Biblia makitakan tla kikixtiskej itech tlanechikojli akin okichiuj se ueyi tlajtlakojli (1 Cor. 5:12). Ijkuak ijkon panos, tlayekankej melak noneki manotlajtoltikan yejuin: ¿okinemili kenon kichiuas yejon tlajtlakojli?, ¿okiyan tlen okichiuj?, ¿ouejkauj ijkon kichiujtinemiya? Niman yejuin tlen noneki más kuajli kitaskej: ¿yokiteititi ika yemelak yonoyolkuep?, ¿nesi ika Jehová yokitlapopolui? (Hech. 3:19). w22.06 9 párr. 4

Jesús okimijli inomachtijkauan makichiuakan tlen melajki (Mat. 5:6). Yejon kijtosneki ika noneki tiknektoskej tikchiuaskej tlen kuajli niman tlen chipauak ixpan toTajtsin. ¿Tejua tiktlasojtla tlen melauak niman tlen melajki? Tikmatstokej ika kema. Ika yejon, xtikuelita nochi tlen xkuajli onka ipan yejuin tlaltikpaktli nion xtikuelita kenon sekimej tekajkayauaj (Sal. 119:​128, 163). Akin tekajkayauaj kichiuaj ken Satanás, akin kiyekana yejuin tlaltikpaktli (Juan 8:44; 12:31). Satanás kineki kitsojkuilotis itoka Jehová. Desde xochitlalpan Edén, Satanás yokuajtlajtolchijchiuilijtiaj toTajtsin, kijtoua ika yejua xkuajli techyekana, techkajkayaua niman xkineki matiyolpakikan (Gén. 3:​1, 4, 5). Ika yejon, miyekej xkuajli tlanemiliaj itech Jehová. Niman Satanás uelis kichiuas ika tlaltikpakchanejkej akin xkinekij kitlasojtlaskej tlen melauak makichiuakan tlen xkuajli (Rom. 1:​25-31). w23.03 2 párr. 3

Noso tla timokojtilijtika xok tikchiuas tlen xkuajli tikchiuaya, kanaj kemantika uelis oksejpa ijkon tikchiujtikisas. Noso kanaj tikmachilia ika melak ueyi poliui para uelis timoapolaktis, niman yejon mitsajmana. ¿Tlenon uelis mitspaleuis para maka xmosiaujkaua? Melak mitspaleuis tla tiktlasojtla Jehová. Melak kualtsin ika tejua tiktlasojtla Jehová (Prov. 3:​3-6). Tla melak tiktlasojtla Jehová, uelis titlaxikos ijkuak tikixnamikis tlen ouijtika. Biblia miyekpa kijtoua ika Jehová nochipa kintlasojtla itekipanojkauan niman xkeman kinkaua. Niman Jehová omitschijchiuj ijkon ken yejua (Gén. 1:26). Kuakon, ¿kenon uelis tiktlasojtlas Jehová ijkon ken yejua mitstlasojtla? Kachtopa xkititi Jehová ika tiktlasojkamati nochi tlen kichiua mopampa (1 Tes. 5:18). Mojmostla xmotlajtolti: “¿Amanin kenon onechititi Jehová ika nechtlasojtla?”. Niman sakin, ijkuak tiknotsas, xtlasojkamachili tlen okichiuj mopampa ipan yejon tonajli. w23.03 12 párrs. 17-19

Jesús xokualan iuan iapóstoles, yej okimititi nochimej ika kintlasojtlaya. ¿Tlenon tiuelij itech yejuin? Ika xsan noneki totlajpiyaskej maka san tikitstoskej kanon nopopolouaj oksekimej noso kechpatipan nopopolouaj, noijki noneki totlajpiyaskej maka tikchiuaskej noso tiknemiliskej tlen xkuajli ijkuak yakaj nopopoloua. Ika yejon, ijkuak techkualanis tlen se tokniuj okichiuj, matotlajtoltikan: “¿Tleka onechkualani tlen okichiuj? ¿Kanaj nejua noneki ninopatlas? ¿Kanaj tokniuj itlaj kajmantika? ¿Xmás kuajli yeskia tla nikititia ika niktlasojtla niman xtlaj nikijlia maski niknemilia ika xkuajli tlen okichiuj?”. Tla nochipa tikteititiaj ika titetlasojtlaj, tikteititiskej ika yemelak tikchiuaj ken Cristo. Tlen okichiuj Jesús techititia ika noneki tokojtiliskej tikinmasikamatiskej tokniuan (Prov. 20:5). Tikmatstokej ika Jesús ueliya kitaya tlen kipiayaj tlaltikpakchanejkej ipan inyojlo. San ika, maski tejuamej xuelij tikchiuaj yejon, kema uelis tikimijyouiskej tokniuan ijkuak nopopoloskej (Efes. 4:​1, 2; 1 Ped. 3:8). Niman uelis tikimijyouiskej tokniuan tla más kuajli tikimixmatij. w23.03 30 párrs. 14-16

Noijki, ijkuak tikualoskej, Satanás uelis kichiuas ika tochanejkauan noso tlapajtikej matechijlikan ika noneki totlaliliskej yestli niman ijkon xtimikiskej. San ika, tikmatstokej ika tla ijkon tikchiuaskiaj titlajtlakojtoskiaj ixpan Jehová, niman yejon tlen kineki Satanás. Noso kanaj yakaj techijlis matopajtikan ijkon ken techijliaj tlapajtikej, maski xtiktlakamatstoskiaj toTajtsin. Xakaj kuelitaskia mikis, san ika, tikmatstokej ika tla timikij, Jehová ok techtlasojtlas (Rom. 8:​37-39). Nochimej iamigos Jehová akin mikij, kentla xmikiskiaj pampa yejua kuajli kimilnamiki (Luc. 20:37). Yejua sa kichiatika tonajli ijkuak oksejpa kinyolitis (Job 14:15). Jehová hasta yokitemakak isenteKonetsin para ijkon tejuamej nochipa matinemikan (Juan 3:16). Kuajli tikmatstokej ika yejua melak techtlasojtla niman techtlajpiya. Ika yejon, ijkuak tikualoj noso techmiktisnekij xtiktlalkauiyaj, yej más tiknisiuiyaj niman tiktlajtlaniliaj matechyolseui, matechmaka tlamachilistli niman matechpaleui matitlaxikokan (Sal. 41:3). w22.06 18 párrs. 16, 17

Biblia kijtoua: “Tla tiktlakaitas toTEKO nesis ika melauak titlamatki. Tla tikixmati on Dios Yektitikaj, kijtosneki tikpiya kajsikamatilistli” (Prov. 9:10). Kuakon, yakaj akin kipiya melauak tlamachilistli kachtopa kixmati kenon tlanemilia “on Dios Yektitikaj”, noso, tlanemilia ijkon ken Jehová tlanemilia, niman ijkon kimatis tlenon kitlapejpenis. Tejuamej uelis titlanemiliskej ijkon ken Jehová tlanemilia tla tikamapouaj Biblia niman toamatlajkuiloluan, niman tla ijkon tikchiuaj, tikteititiskej ika tikpiyaj melauak tlamachilistli (Prov. 2:​5-7). San Jehová uelis techmakas melauak tlamachilistli (Rom. 16:27). ¿Tleka ijkon tikijtouaj? Kachtopa, pampa yejua otexchijchiuj niman yejua kuajli kixmati nochi tlen okichijchiuj (Sal. 104:24). Ika ome, pampa nochi tlen kichiua kiteititia ika tlamachilise (Rom. 11:33). Niman, ika yeyi, pampa nochi tlen kijtoua melak tepaleui (Prov. 2:​10-12). Tla tiknekij tikpiyaskej melauak tlamachilistli, noneki tikneltokaskej tlen yotikonteneujkej ipan yejuin párrafo niman tokauiliskej matechyekana Jehová ijkuak tiktlapejpeniskej tlen tikchiuaskej. w22.10 19 párrs. 3, 4

Apocalipsis capítulo 12 kijtoua ika Jesús okintlan Satanás niman idemonios niman okinuajtlajkal nikan ipan tlaltikpaktli. Niman yejon melak okikualani Satanás niman opeuj topan notlauelkixtia. Ika yejon, Biblia kijtoua: “¡Lástima para nemejuamej yejuan nenchantij ipan in tlaltikpaktli niman ipan mar!” (Apoc. 12:​9-12). ¿Kenon techpaleuiyaj yejuin teotlajtoltin? Nochi tlen nochiua ipan nochi tlaltikpaktli techpaleuiya matikasikamatikan ika Jesús itekiuajtitika. Ika yejon, xtechmojkatlachialtia ika miyekej tetlauelitaj niman tenexikolitaj. Tlen yejuamej kichiuaj techititia ika inochiujtika tlen Biblia kijtoua. ¡Kuajli tikitaj ika iTekiuajyo toTajtsin itekiuajtitika! (Sal. 37:1). Noijki tikmatstokej ika ok nochiuas miyek tlen xkuajli achto peuas Armagedón (Mar. 13:8; 2 Tim. 3:13). Melak tiktlasojkamachiliaj Jehová pampa techijlia tleka nochiujtika miyek tlen xkuajli, yejon techititia ika yejua melak techtlasojtla. w22.07 3 párrs. 7, 8

Uelis tiktlajtlaniliskej Jehová makinpaleui tokniuan akin kualoj, akin kintlaueltokaj, akin chantij kampa yotlaixpoliuj noso kampa onka guerra. Noijki uelis tikchiuaskej teoyotl inpampa tokniuan akin tlapaleuiyaj kampa tlaixpoliui. Hasta uelis tikintokayotiskej tokniuan ijkuak tikchiuaskej toteoyouj. Ijkuak tiktlajtlaniliaj Jehová makinpaleui tokniuan, tikimititijtokej ika melak tikintlasojtlaj. Tokniuan tlayekankej noijki kitlasojkamatij ijkuak inpampa tikchiuaj teoyotl pampa yejon kinpaleuiya kuajli makichiuakan intekiyo. Ijkon onomachili apóstol Pablo, yejua okijkuilo: “No ijki xchiuakan oración nopampa, para Dios ma nechmaka tlajtojli ijkuak nitlajtos, niman para uelis nitlajtos ikan yolchikaualistli ijkuak niktemachtis on tlen iyantikaj itech on kuajli tlajtojli yejuan kiteijlia ken Dios temakixtia” (Efes. 6:19). Aman noijki nemij tokniuan tlayekankej akin chikauak tekititokej. Ijkuak tiktlajtlaniliaj Jehová makinteochiua, tikteititiaj ika tikintlasojtlaj. w22.07 23, 24 párrs. 14-16

Se soldado nonekiya kimanas icasco niman ijkon xkikokoskej ipan itsontekon. Aman tejuamej noijki tinemij ipan se guerra kampa Satanás techixnamiki, yejua kineki matiknemilikan tlen xkuajli niman kineki kijtlakos totlamachilis. Ika yejon, melak noneki matotlajpiyakan. Ijkon ken se casco kitlajpiya itsontekon se soldado, tlen tikchiaj ika tlayekapan kitlajpiya totlamachilis niman ijkon uelis timelajkanemiskej itech Jehová. Tla nochipa tikilnamikij tlen Jehová techmakas, techpaleuis kuajli matiktlapejpenikan tlen tikchiuaskej. Matitlanemilikan itech tlen inpan onochiuj sekimej tokniuan akin chantiyaj Corinto. Yejuamej xok kineltokayaj ika Jehová kinyolitis akin yomijkej (1 Cor. 15:12). Pablo okijto ika akin xkineltokayaj ika toTajtsin teyolitis, san kinemilijtoyaj kenon noyolpaktiskej (1 Cor. 15:32). Aman noijki nemij miyekej akin san kinekij noyolpaktiskej pampa xtlaneltokaj itech tlen toTajtsin kichiuas ika tlayekapan. San ika, tejuamej xijkon tikchiuaj, tejuamej kema tikneltokaj tlen toTajtsin kichiuas ika tlayekapan. w22.10 26 párrs. 8, 9

Jehová kitstika nochi tlen tikixnamikij niman yejua kineki, ika maski san kemanon, matikijlikan ipan toteoyouan kenon tomachiliaj. Yejua melak kuelita ijkuak tiknotsaj (Prov. 15:8). Kuakon, ijkuak san toselti tomachiliskej, matikijlikan Jehová nochi tlen techajmana (Sal. 62:8). Tla yotikijlikej tlen tikmachiliaj, matiktlajtlanilikan matechpaleui matikitakan tlenon uelis tikchiuaskej niman matiktlajtlanilikan matechyolchikaua niman matechpaleui kuajli matiktetomilikan tlen tikneltokaj (Luc. 21:​14, 15). ¿Niman tlenon uelis tikchiuas tla tejua melak timajmana? Xtlajtlanili Jehová mamitsyolchikaua para uelis titlajtos iuan se tokniuj akin chikaujtok itlaneltok niman noijki xtlajtlanili makipaleui yejon tokniuj para mamitsasikamati. Nochipa matikitstokan kenon technankilia Jehová niman matokauilikan matechpaleuikan tokniuan. w22.08 10 párr. 6

Ijkuak kemach onotlali se tlanechikojli ne Tesalónica, opeuj kintlaueltokaj tokniuan. Biblia kijtoua ika intlauelikniuan “okuajtejchiuilankej Jasón inuan oksekimej tokniuan imixpan on tekiuajkej ipan on ueyikalpan” (Hech. 17:6). ¡San matikonnemilikan kenon onomojtikej tokniuan akin kemach yopeujkaj nomachtiaj! San ika, apóstol Pablo xkinekiya ika yejuin tokniuan makitlalkauikan Jehová. Ika yejon, okintekitlalijteuj sekimej tokniuan para makitlajpiyakan tlanechikojli. Sakin, apóstol Pablo ijkin okimijli tokniuan akin chantiyaj Tesalónica: “Otiktitlankej Timoteo. Yejua [ . . . ] omechyolchikauato niman omechyoleuato ipan nemotlaneltok, para maka yakaj notsinkixtis ipampa on tlajyouilistli” (1 Tes. 3:​2, 3). Timoteo okitak kenon Pablo okinyolchikauj tokniuan akin chantiyaj Listra niman kenon okinpaleui Jehová. Ika yejon, ouel okimijli tokniuan ika Jehová kinpaleuiskia matlaxikokan (Hech. 14:​8, 19-22; Heb. 12:2). w22.08 21 párr. 4

Kanaj ipan xiuitl 1870, Charles Russell niman oksekimej akin noijki nomachtiayaj Biblia opeujkej melak kuajli nomachtiaj iTlajtol toTajtsin. Yejuamej kinekiyaj kuajli kasikamatiskej tleka omik Jesús niman noijki kinekiyaj kimatiskej kenon noneki tikilnamikiskej imikilis. ¿Kenon techpaleuiya tlen okasikamatkej akin opeujkej nomachtiaj Biblia? Pampa yejuamej onokojtilijkej nomachtiskej Biblia. Niman aman, tejuamej kuajli tikasikamatij tleka omik Jesús niman kenon techpaleuis imikilis (1 Juan 2:​1, 2). Noijki yotiuelkej ipan Biblia tlenon inpan panos akin kitlakamatij toTajtsin: sekimej yaskej iluikak niman xok keman mikiskej, niman oksekimej nochipa chantiskej ipan tlaltikpaktli. Noijki, tomachiliaj más nisiuj itech Jehová ijkuak tiknemiliaj kenon melak techtlasojtla niman kenon techpaleuiya toseselti tlen Jesús okichiuj topampa (1 Ped. 3:18). Ika yejon, ijkon ken yeuejkaui okichiujkej tokniuan, aman tejuamej noijki tikinnotsaj oksekimej touan makilnamikikan imikilis Cristo, ijkon ken Jesús okijto matikchiuakan. w23.01 21 párrs. 6, 7

Jesús okinmachti tlaltikpakchanejkej tlen kichiuas iTekiuajyo toTajtsin. Tejuamej melak tiktlasojkamatij ika Jesús omik topampa pampa ijkon ueli iuan touikaj niman noijki ueli touikaj iuan Jehová. Tla tikteititiaj ika titlaneltokaj itech Jesús, noijki uelis nochipa tinemiskej ipan tlaltikpaktli niman uelis oksejpa tikimitaskej tochanejkauan noso toamigos akin yomijkej (Juan 5:​28, 29; Rom. 6:23). Tikmatstokej ika nochi yejuin xtechmelaua tikseliskej. Xkeman uelis tiktlaxtlauiliskej Jesús nion toTajtsin nochi tlen yokichiujkej topampa (Rom. 5:​8, 20, 21). San ika ¿kenon uelis tikimititiskej ika tiktlasojkamatij tlen yokichiujkej topampa? Tla tijkuij nochi tlen tikpiyaj niman ijkon titlapaleuiskej ipan ikalpan toTajtsin. Melak miyek tlen uelis tikchiuaskej, uelis tontlapaleuiskej ijkuak kinchijchiuaskej noso kinyektlaliskej kaltin kampa tikueyichiuaj toTajtsin. w23.01 26 párr. 3; 28 párr. 5

Akin tekiuajtiskej ipan iTekiuajyo toTajtsin más miyekej kinyekanaskej, niman tlayekanaskej ipan nochi tlaltikpaktli. Ijkon ken Jesús, on 144,000 yeskej tekiuajkej niman teopixkej (Apoc. 5:10). Ijkuak israelitas kitlakamatiyaj Tlanauatijli tlen okimakakej Moisés, teopixkej kintlajpiayaj israelitas. Yejuamej kinchikauiliayaj intlaneltok niman kitayaj maka makualokan. Niman pampa Tlanauatijli tlen okimakakej Moisés “san kixneskayotia on tlen kuajli tlajtlamach onyas”, uelis tiknemiliskej ika akin tlayekanaskej iuan Jesús kinpaleuiskej tlaltikpakchanejkej. ¿Kenon kinpaleuiskej? Kintlajpiyaskej itekipanojkauan toTajtsin: kinchikauiliskej intlaneltok niman kitaskej maka makualokan (Heb. 10:1). Ok xtikmatij kenon yejuin tekiuajkej niman teopixkej nonojnotsaskej imiuan akin chantiskej nikan ipan tlaltikpaktli. San ika, uelis kuajli tikmatstoskej ika Jehová kitas ika akin chantiskej ipan Xochitlalpan makipiyakan nochi tlen noneki (Apoc. 21:​3, 4). w22.12 11 párrs. 11-13

Tejuamej tikinnotsaj tlaltikpakchanejkej mauiyan Conmemoración pampa tiknekij makimatikan tlen Jehová niman Jesucristo okichiujkej topampa (Juan 3:16). Tiknekij ika tlen kemach ika sejpa kitaskej niman kikakiskej makinpaleui para más makixmatikan Jehová niman makitekichiuilikan. San ika, xsan tikinnotsaj akin xkeman yauej Conmemoración. Noijki tikinnotsaj tokniuan akin xok touan nosentlaliaj nion xtenojnotsaj. Tikimijliaj mauiyan Conmemoración pampa tiknekij tikimilnamiktiskej ika Jehová ok kintlasojtla. Niman melak tiyolpakij ijkuak tikitaj ika sekimej kema yauej. Ijkuakon, kilnamikij kenon melak yolpakiyaj ijkuak kitekichiuiliayaj Jehová (Sal. 103:​1-4). Ijkuak tikinxelouaj invitaciones, sekimej techinseliliaj niman sekimej ka. Maski ijkon, tikmatstokej ika toTajtsin kita akinomej yauej pampa kineki kinpaleuis mamakisakan (Luc. 15:7; 1 Tim. 2:​3, 4). w23.01 20 párr. 1; 22, 23 párrs. 9-11

Jesús kimatstoya ika iTaj, Jehová, nochipa kintlajpiya itekipanojkauan. Maski ijkon, achto mikiskia, okitlajtlanili makintlajpiya inomachtijkauan (Juan 17:​15, 20). ¿Tleka? Pampa noijki kimatstoya ika Satanás melak kintlauelitaskia inomachtijkauan. Yejuin tlaltikpaktli kiyekantika Satanás, ika yejon, akin kichiuaj ken Cristo kixnamikij miyek tlen ouijtika. Nochi tlen tikixnamikij uelis techsiauitis noso hasta ueliskia kichiuas maka matimelajkanemikan itech Jehová. San ika, xnoneki melak tomojtiskej pampa Jehová kitstika nochi tlen tikixnamiktokej niman kinektika techpaleuis. Kema, Jehová “nochipa kincuidaroua yejuan kitlakaitaj [ . . . ] niman kinmanauiya” (Sal. 33:​18-20). w22.08 8 párrs. 1, 2

Ijkuak itikpanoltiskej Conmemoración niman tla yotikpanoltijkej, tikteititiaj ika tikpatiojkaitaj tlen Jesús okichiuj topampa. ¿Kenon? Tikxelouaj más tiempo para tikchiuaskej teoyotl niman titlanemiliskej itech kenon melak ueyi kijtosneki imikilis Cristo. Noijki, tokojtiliaj más miyekej tikimijliskej touan makipanoltitij Conmemoración. Niman ijkuak ajsi tonajli ijkuak itikpanoltiskej Conmemoración, xtlaj tijkauiliaj matechtelti para matiakan. Ipan Conmemoración, techijliaj tleka nonekiya yakaj mamiki topampa niman kenon imikilis se tlakatl ouel okichiuj ika toTajtsin makintlapopolui miyekej tlaltikpakchanejkej. Noijki techilnamiktiaj akinomej kikuaj pan niman konij vino, niman techijliaj tlenon kijtosneki yejuin ome tlemach (Luc. 22:​19, 20). Ijkuak tijkakij yejuin tlamachtijli, titlanemiliaj itech kenon Jehová kinteochiuas akin kichiaj nemiskej ipan tlaltikpaktli (Is. 35:​5, 6; 65:​17, 21-23). Melak noneki matiktlasojkamatikan ika tejuamej tikmatij nochi yejuin itech imikilis Cristo. w23.01 20 párr. 2; 21 párr. 4

Jesús omik topampa, ika yejon, Jehová ueli techintlapopoluilia totlajtlakoluan niman noijki uelis kichiuas nochipa matinemikan (Mat. 20:28). Apóstol Pablo okijto: “Ijkon ken ipampa sen tlakatl opeu on mikilistli ipan in tlaltikpaktli, no ijki ipampa sen tlakatl opeu yoliuij on mikatsitsimej. Ijkon ken nochimej mikij pampa tekoneuan itech Adán, no ijki nochimej yejuan tekoneuan itech Cristo oksejpa yoliskej” (1 Cor. 15:​21, 22). Jesús okinmachti inomachtijkauan makitlajtlanikan ipan inteoyouan mauajla iTekiuajyo toTajtsin niman manochiua tlen toTajtsin kineki ipan tlaltikpaktli (Mat. 6:​9, 10). Jehová yokitlali iKoneuj ken Tekiuaj ipan iTekiuajyo niman kinsentlalijtika 144,000 tlaltikpakchanejkej para matekiuajtikan iuan Jesús niman ijkon manochiua tlen yejua kineki. Ijkuak tlaltikpakchanejkej kipiyaskej nemilistli tlen xkeman tlamis, nochiuas seki tlen toTajtsin kineki manochiua ipan tlaltikpaktli (Apoc. 5:​9, 10). w22.12 5 párrs. 11, 12

Ijkuak miki yakaj akin melak tiktlasojtlaj, melak tiktemouaj. Kanaj ijkuak kemach miki, melak toyolkokouaj, niman tla melak otlajyoui achto mikis, más toyolkokouaj. San ika, ijkuak tikilnamikij kenon itlaj otechmajmachti noso kenon itlaj okichiuj noso otechijli para techyolchikauas noso techuetskitis, xok más toyolkokouaj niman oksejpa peua tiyolpakij. Noijki ijkon panoua ijkuak tikilnamikij tlen ipan opanok Jesús. Ijkuak tikamapouaj ipan Biblia kenon melak otlajyoui Jesús niman kenon okimiktijkej, melak techyolkokoua. Niman ijkuak inopanoltis Conmemoración niman tla yonopanolti, más titlanemiliaj itech kenon melak patioj imikilis Cristo (1 Cor. 11:​24, 25). San ika, melak tiyolpakij ijkuak tiknemiliaj tlen Jesús okijto niman okichiuj ijkuak nemiya nikan ipan tlaltikpaktli. Noijki techyolchikaua ijkuak titlanemiliaj itech tlen kichiujtika niman itech tlen kichiuas ika tlayekapan. w23.01 26 párrs. 1, 2

Ijkuak Jesús omik, inomachtijkauan melak onoyolkokojkej. Yejuamej melak kitlasojtlayaj niman kichiayaj makinpaleui, san ika, aman Jesús yomijka (Luc. 24:​17-21). Ijkuak Jesús oyoliuj, ouajnonexti imixpan inomachtijkauan niman okimijli ika ipan nochiujtoyaj teotlajtoltin itech Biblia. Noijki, okimijli makichiuakan se tekitl tlen melak ueyi kijtosneki (Luc. 24:​26, 27, 45-48). Niman sakin Jesús oyaj iluikak. San ika, inomachtijkauan xok noyolkokojtoyaj, aman melak yolpaktoyaj. Melak yolpakiyaj pampa kimatiyaj ika Jesús yoltoya niman ika kinpaleuiskia makichiuakan tekitl tlen yejua okinnauatijteuj. Niman pampa inomachtijkauan Jesús yolpakiyaj, okinpaleui chikauak makitekichiuilikan Jehová (Luc. 24:​52, 53; Hech. 5:42). Uelis tikchiuaskej ijkon ken inomachtijkauan Jesús tla kachtopa tiktlaliaj iTekiuajyo toTajtsin ipan tonemilis. Melauak ika noneki nochipa tokojtiliskej tla tiknekij nochipa tiktekichiuiliskej Jehová, san ika, yejua yotechijli ika melak techteochiuas tla ijkon tikchiuaj (Prov. 10:22). w23.01 30, 31 párrs. 15, 16

Tla xtiknekij tikchiuaskej ijkon ken Adán niman Eva, noneki más tikixmatiskej Jehová, más tikitaskej tlen kuajli kichiua niman tokojtiliskej tikasikamatiskej kenon tlanemilia. Tla tejuamej ijkin tikchiuaj, peuas más tiktlasojtlaskej. Matikitakan tlen okichiuj Abrahán, akin melak kitlasojtlaya toTajtsin. Yejua nochipa okitlakamat Jehová maski kemantika xkasikamatiya tlen kinauatiaya. Yejua nochipa onokojtili más kixmatis Jehová niman kasikamatis kenon tlanemilia. Ijkuak Jehová okijli Abrahán ika kipopoloskia Sodoma niman Gomorra, Abrahán okijli: “¡Maka xchiua ijkon! Tejua tijuez yejuan más tiueyixtikaj ipan nochi in tlaltikpaktli”. ¿Tleka ijkon okijli? Pampa xkinekiya ika akin yolmelajkej mamikikan imiuan akin xkuajkualtin. San ika, kimatstoya ika Jehová xkichiuaskia itlaj tlen xkinamiki. Ika yejon, opeuj kitlajtlajtoltia niman Jehová xokualan, yejua okinankilijtiaj tlen kitlajtoltiaya. Ijkuak Abrahán otlan tlajtoua iuan Jehová, okasikamat ika yejua kita tlen tikpiyaj ipan toyojlo niman ika yejua xkeman kintlajyouiltia akin yolmelajkej (Gén. 18:​20-32). w22.08 28 párrs. 9, 10

Ipan xiuitl 455 i.x.x. 1, sakin ika yokintlalijkaj itepanuan Jerusalén, tekiuaj Nehemías okintekitlali sekimej tlakamej akin intech tlaneltokayaj para makitakan tlenon poliuiya ipan yejon kalpan. Se itoka katka Hananías, Biblia kijtoua ika yejua “soldadojtlayekanki katka ipan on kajli kampa chantij on soldados”. Niman Nehemías ijkin okijto itech Hananías: “Yejua kuajli tikpiyaliayaj toyojlo niman yejuan más kitlakaitaya Dios xken oksekimej” (Neh. 7:2). Hananías melak kuajli kichiuaya itekiyo pampa melak kitlasojtlaya Jehová niman nochipa kinekiya kichiuas tlen yejua kuelita. Tla tejuamej noijki ijkon tikchiuaj, tokniuan noijki uelis totech tlaneltokaskej. Aman matitlajtokan itech Tíquico, se telpochtli akin apóstol Pablo itech tlaneltokaya. Pablo ijkin okijto itech Tíquico: “Nochipa kichiua on tlen melauak ipan itekiu toTEKO” (Efes. 6:​21, 22). Pablo xsan kimatstoya ika Tíquico kimitkiliskia cartas tokniuan de Éfeso niman Colosas, noijki kimatstoya ika kinyolchikauaskia niman kinyolseuiskia. Aman nemij miyekej tokniuan tlakamej akin kichiuaj ken Tíquico, akin melajkanemij niman kiteititiaj ika uelis intech titlaneltokaskej. Yejuin tokniuan nokojtiliaj kichikauaskej totlaneltok (Col. 4:​7-9). w22.09 9, 10 párrs. 5, 6

Kanaj 13 xiuitl, José okixnamik tlen melak ouijtika. José ueliskia kinemilis ika Jehová xok kitlasojtlaya, niman ijkuak kixnamikiya tlen ouijtika, ueliskia kinemilis ika Jehová yokitlalkauijka. San ika, yejua xsan kualantinemiya ipampa tlen okichiuilijkej. Yejua okiteititi ika nochipa kipiaya kuajli tlamachilistli. Niman ijkuak oksejpa okimitak ikniuan, yejua xonotlakuepilti, yej okimititi ika kintlasojtlaya niman okintlapopolui (Gén. 45:​4, 5). ¿Tleka ijkon okichiuj? Pampa kuajli otlanemili. Yejua xsan tlanemilijtoya itech tlen xkuajli okixnamik, yej otlanemili itech tlen Jehová kinekiya manochiua (Gén. 50:​19-21). ¿Tlenon tiueli itech José? Ika tla yakaj mitsyolkokoua, maka xnemili tlen xkuajli itech Jehová noso maka xnemili ika toTajtsin yomitsilkauj. Xtlanemili itech kenon Jehová mitspaleuijtika xtlaxiko. Noijki, nochipa xtetlapopolui niman xkilnamiki ika tla melauak titetlasojtla, tikintlapopoluis akin mitschiuiliaj tlen xkuajli. w22.11 21 párr. 4

Teotlajtoketl Daniel okimitak seki tlatlachalistin tlen techititiaj ika san Jehová más ueyixtika xijkon ken tekiuajkej. Kachtopa okimitak nauimej xkuajkualtin yolkamej tlen kinneskayotiaj tekiuajkej akin yeuejkaui otlayekankej niman akin aman tlayekanaj: Babilonia, Medopersia, Grecia niman Roma, niman Reino Unido niman Estados Unidos, akin aman tlayekantokej (Dan. 7:​1-3, 17). Sakin, Daniel okitak ika Jehová yeuatoya ipan itrono ne iluikak (Dan. 7:​9, 10). Daniel okitak kenon toTajtsin kinkuilia intekiuajyo nochimej gobiernos akin tlayekanaj ipan tlaltikpaktli niman kinmaka akin más kuajli tlayekanaj niman akin más kojtikej. ¿Akinomej? “Yejuan tlajtlachaya ken se yejuan onochiu tlakatl”, Jesucristo, niman “yejuan okintlapejpenij on ueyixtikaj Dios”, on 144,000, akin “tlamandaroskej para nochipa” (Dan. 7:​13, 14, 18). Yejuin techititia ika san Jehová Ueyixtika Dios. Tlen okitak Daniel techititia ika yemelak tlen yejua yokijtojka. Yejua okijto: “Dios iluikakchanej […] kinkixtia niman kintlalia on reyes” (Dan. 2:​19-21). w22.10 14, 15 párrs. 9-11