Abril

Matotlajtoltikan: “¿Tlenon nikchiua ijkuak nechmelajkatlaliaj? ¿Niknokuitia tlen onikchiuj? ¿Noso ika okse tlemach ninotlajtlamiya? ¿Nimantsin nitetlajtlakoltia?”. Ijkuak tomachtiskej itech oksekimej itekipanojkauan Jehová akin noteneuaj ipan Biblia uelis kuajli tikitaskej tlenon okichiujkej. Niman uelis totlajtoltiskej: “¿Kenon uelis nikchiuas ken yejuin itekipanojkauj Jehová?”. Noijki, matikitakan kenon uelis tikchiuaskej ken tokniuan telpokamej niman ichpokamej noso akin iuejueyimej akin nemij ipan totlanechikol. Matikitakan tlenon kichiuaj tokniuan telpokamej niman ichpokamej akin tlaxikojtokej ipan escuela, noso tlenon kichiuaj tokniuan akin kintlaueltokaj inchanejkauan noso akin kualoj. Sakin matotlajtoltikan: “¿Kichiua itlaj tlen nejua noijki noneki nikchiuas?”. Tla tikitaj tlenon kinpaleuiya tokniuan, itikmatstoskej tlenon tikchiuaskej ijkuak tejuamej tikixnamikiskej tlen ouijtika. Sajnoye tiktlasojkamatij tlen kichiuaj yejuin tokniuan. Nochi yejuin kichiua melak matiyolpakikan (Heb. 13:7). w22.04 13 párrs. 13, 14

Ijkuak itlaj tikixnamikij, melak tiyolpakij ijkuak se tlayekanketl techkaki niman techyolseuiya. Noijki, melak tiyolpakij ijkuak se precursor techuika kampa titemachtiaj niman techijlia kenon más kuajli titemachtiskej. Nochimej tokniuan melak pakij ijkuak techpaleuiyaj. Tla tejuamej noijki tiknekij tiyolpakiskej ken yejuin tokniuan, noijki matitepaleuikan. Tla tejua tikneki tikchiuas tlen yotikteneujkej niman ijkon más kuajli tiktekichiuilis Jehová, ¿tlenon noneki tikchiuas? Kuajli xkijto tlen tikneki tikchiuas. Tla san tiknemiliaj: “Nikuelitaskia más nitlapaleuis ipan tlanechikojli”. San ika, xtikijtouaj tlenon tiknekij tikchiuaskej, kuakon xtikmatiskej kenon titepaleuiskej. Kanaj uelis tikijkuilos tlenon tikneki tikchiuas niman kenon tikchiuas. w22.04 25 párrs. 12, 13

Ipan yejuin tonaltin, Jehová kinsentlalijtika “sanoyej miyek tlakatl” niman kinmachtijtika para kimatiskej kenon chantiskej ijkuak tekiuajtis (Apoc. 7:​9, 10). Tlaltikpakchanejkej xeliujtokej pampa notlauelitaj niman pampa onka guerras. San ika, akin Jehová kinsentlalijtika xijkon kichiuaj, yejuamej xnotlauelitaj. Uelis tikijtoskej ika inespadas kinkueptokej arados (Miq. 4:3). Yejuamej xteixnamikij ipan guerras kampa melak miyekej mikij, yej kinpaleuijtokej tlaltikpakchanejkej makixmatikan toTajtsin akin melauak niman kinmachtiaj itech tlen kineki kichiuas niman ijkon uelis kipiyaskej “nemilistli on yejuan melauak nemilistli” (1 Tim. 6:19). Pampa yejuamej kipaleuiyaj iTekiuajyo toTajtsin, kanaj inchanejkauan kintlaueltokaj noso kanaj xmás kipiyaj tomintsin, san ika, Jehová kinpaleuiya (Mat. 6:​25, 30-33; Luc. 18:​29, 30). Nochi yejuin techititia ika iTekiuajyo toTajtsin yemelak tlayekanas ipan tlaltikpaktli niman kichiuas tlen toTajtsin kineki. w22.12 5 párr. 13

Ijkuak tlamis mil xiuitl, nochimej akin nemiskej ipan tlaltikpaktli xok kipiyaskej tlajtlakojli tlen Adán otechkauilijteuj (Rom. 5:12). Ijkuakon xok yakaj tlajyouis pampa kuajli popoliuis itlajtlakol Adán. Uelis tikijtoskej ika ijkuak tlamis mil xiuitl, nochimej tlaltikpakchanejkej kentla oksejpa yoliuiskiaj pampa aman xok kipiyaskej tlajtlakojli niman aman kema ika inyojlo nemiskej (Apoc. 20:5). Tikmatstokej ika Jesús nochipa omelajkanen maski Satanás melak okitlatlatak. San ika ¿noijki ijkon kichiuaskej tlaltikpakchanejkej? ¿Noijki melajkanemiskej ijkuak Satanás kintlatlatas? Yejuin noitas ijkuak tlamis mil xiuitl, ijkuak Satanás kimakauaskej niman tetlatlatas (Apoc. 20:7). Akin melajkanemiskej itech toTajtsin nochipa ika inyojlo nemiskej niman xok keman mikiskej (Rom. 8:21). San ika, akin kixnamikiskej toTajtsin, kinpopoloskej (Apoc. 20:​8-10). w22.05 19 párrs. 18, 19

Yejuin teotlajtojli onochiuj ijkuak Satanás okichiuj ika judíos niman romanos makimiktikan iKoneuj toTajtsin (Luc. 23:​13, 20-24, TNM). Ijkuak yakaj nokxikokoua xueli nejnemi seki tonaltin. Noijki ijkon, ijkuak Jesús okimiktijkej kentla okikxikokojkej niman yeyi tonajli xitlaj ouel okichiuj pampa nemiya ipan itlalkon (Mat. 16:21). Génesis 3:15 kijtoua ika iuejkakoneuj “siuatl” kikuapatlachoskia “kouatl”. Kuakon, Jesús xueliskia nokauaskia ijtik itlalkon, nonekiya pajtis kampa okikxikokojkej. Niman kema opajtik pampa ika yeyi tonajli Jesús oyoliuj ken se iluikaktekitketl akin xok keman ueli miki. Niman ijkuak toTajtsin kijtos, Jesús kikuapatlachos Satanás niman kipopolos (Heb. 2:14). Yejon 144,000 kipaleuiskej Jesucristo ijkuak kinpopoloskej itlauelikniuan toTajtsin nikan ipan tlaltikpaktli, iuejkakoneuan “kouatl” (Apoc. 17:14; 20:​4, 10). w22.07 16 párr. 11; 18 párr. 12

Tajtin, xkinpaleuikan nemokoneuan kuajli makintlapejpenikan akin imiuan nouikaskej. Biblia kuajli techijlia ika akin imiuan touikaj uelis techpaleuiskej noso techijtlakoskej. Tatajtin, ¿nenkimatij imiuan akinon nouikaj nemokoneuan? ¿Tlenon uelis nenkichiuaskej tla nenkinekij ika nemokoneuan manouikakan imiuan akin kitlasojtlaj Jehová? (1 Cor. 15:33). Ijkuak itlaj nenkichiuaskej imiuan nemokoneuan, xkinnotsakan tokniuan akin kuajli nouikaj iuan Jehová (Sal. 119:63). Tony kijtoua: “Ijkuak tikueyichiuaj Jehová ken familia, nosiuauj niman nejua tikinnotsaj tokniuan tlakamej, siuamej, akin iuejueyimej, akin xiuejueyimej niman akin oksekan ualeuaj niman imiuan titlakuaj. Ijkuak ijkon tikchiuaj, más tikimixmatij tokniuan niman tikitaj kenon kitlasojtlaj Jehová niman kenon chikauak kitekichiuiliaj. [ . . . ] Yotikitakej ika tlen techijliaj niman tlen kichiuaj yejuin tokniuan yokinpaleui tokoneuan más makinisiuikan Jehová”. w22.05 29, 30 párrs. 14, 15

Ijkuak tlayekankej kinotsaj akin yotlajtlako noijki noneki kitlapejpeniskej tlen Jehová yokijto kichiuilis akin yotlajtlako. ¿Niman kipaleuiya tlanechikojli tlen kitlapejpeniaj tlayekankej? Kema. Pampa tla akin yotlajtlako xnoyolkuepa, xkikauiliskej manemi ipan tlanechikojli. ¿Tleka? Pampa xkinekij makimijtlako akin kuajli kitekichiuilijtokej Jehová (1 Cor. 5:​6, 7, 11-13; Tito 3:​10, 11). Noijki, kipaleuiya akin otlajtlako manoyolkuepa niman ijkon makitlapopolui toTajtsin (Luc. 5:32). Niman tlayekankej kitlajtlaniliaj Jehová oksejpa kuajli manouika iuan akin yonoyolkuep (Sant. 5:15). Tla yakaj akin okichiuj se tlajtlakojli xnoyolkuepa ijkuak tlayekankej iuan tlajtouaj, kuakon, kikixtiskej itech tlanechikojli. San ika, tla sakin, akin okichijchiuj tlajtlakojli peua kuajli tlanemilia, yemelak noyolkuepa, xok tlanemilia ijkon ken tlanemiliaya niman xok kichiua ijkon ken kichiuaya, kuakon, Jehová kinektos kitlapopoluis (Luc. 15:​17-24). Maski okichiuj tlen melak xkuajli, Jehová uelis kitlapopoluis (2 Crón. 33:​9, 12, 13; 1 Tim. 1:15). w22.06 9 párrs. 5, 6

Ipan nochi tlaltikpaktli nemij tokniuan akin yokixnamijkej tlen ouijtika, san ika, yotlaxikojkej pampa Jehová okinpaleui maka makichiuakan tlen Satanás kinekiya (1 Ped. 5:9). Niman tejua noijki uelis titlaxikos. Sa achijtsin poliui ijkuak Jehová kijlis Jesús niman akin iuan tekiuajtiskej makipopolokan nochi “tlen kichiua on diablo” (1 Juan 3:8). Sakin, tinochimej akin tiktekichiuiliskej Jehová nikan ipan tlaltikpaktli, tikitaskej kenon nochiuas tlen Jehová yotechijli: “Motlauelikniuan xok tikinmakajsis” (Is. 54:14; Miq. 4:4). San ika, aman ika xiyejko yejon tonajli, matokojtilikan maka sajnoye matomojtikan. Noneki tikneltokaskej ika Jehová melak techtlasojtla niman ika yejua nochipa kinpaleuiya itekipanojkauan. Ika yejon, matitlanemilikan itech kenon Jehová melak yokinpaleui itekipanojkauan niman matikimijlikan oksekimej. Noijki, nochipa matikilnamiktokan kenon Jehová otechpaleui ijkuak otikixnamijkej itlaj tlen ouijtika. Jehová techpaleuis maka sajnoye matomojtikan (Sal. 34:4). w22.06 19 párrs. 19, 20

Yejon ueyixtika tekiuaj itlayekantika, niman Biblia kijtoua ika kineskayotia ikxiuan tlamachijchiuajli tlen tlachijchiujtin ika “hierro” niman “tlalajmojli”, noso sokitl. ¿Akinon yejuin ueyixtika tekiuaj? Reino Unido niman Estados Unidos. Yejuin omemej tekiuajkej opeujkej nopaleuiyaj ijkuak panotoya Kachtopa Guerra ipan nochi tlaltikpaktli. Tlamachijchiuajli tlen okitemik Nabucodonosor techititia ika yejuin ueyixtika tekiuaj xsan noijki yeskia ken oksekimej tekiuajkej akin noijki ompa noteneuaj. Matikitakan tleka Reino Unido niman Estados Unidos xsan noijkimej ken tekiuajkej akin noteneuaj ipan yejon tlamachijchiuajli. Kachtopa, yejon ueyixtika tekiuaj xtlachijchiujtli san ika se tepostli, ken oro noso plata ijkon ken oksekimej uejueyixtokej tekiuajkej, yej tlachijchiujtli ika hierro niman sokitl. Sokitl kineskayotia nochimej tlaltikpakchanejkej (Dan. 2:43). Yejuin ueyixtika tekiuaj xueli kichiua nochi tlen kineki pampa tlaltikpakchanejkej kichiuaj marchas, yejuamej kitlapejpeniaj intekiuaj niman pampa noneki kitlakamatis okseki tlanauatiltin. w22.07 4 párrs. 9, 10

¿Ok xtikmati tla timoapolaktis? Melak mitspaleuis tla kuajli tiknemilia tlenon mitsteltia (Hech. 8:36). Xtlanemili itech tlen Jesús okijto. Yejua okijto ika ijkuak kichiuaya tlen iTajtsin kineki, kentla tlakuaskia. ¿Tleka? Pampa ijkuak titlakuaj, kipaleuiya totlalnakayo. Jesús kimatstoya ika nochi tlen Jehová techtlajtlanilia, techpaleuiya. Jehová xtechtlajtlanilia matikchiuakan itlaj tlen uelis techijtlakos. Kuakon, ¿mitstlajtlanilia Jehová xmoapolakti? Kema (Hech. 2:38). Kuajli xmatsto ika tla timoapolaktia, melak mitspaleuis. Tla mitsmakaskiaj itlaj tlen melak uelik, ¿xmelak ika nimantsin tijkuaskia? Kuakon, xmoapolakti niman maka xometlamati. ¿Tleka sekimej xnoapolaktiaj? Pampa kanaj kimachiliaj ika ok kinpoloua para noapolaktiskej. Timosentemakas itech Jehová niman timoapolaktis melak ueyi kijtosneki. Ika yejon, kuajli xnemili niman xmokojtili para uelis timoapolaktis. w23.03 7 párrs. 18-20

Ijkuak Jehová okitlapejpeni Jesús ika iespíritu santo, yejua akin kachtopa onochiuj iuejkakoneuj yejon “siuatl”. Sakin ika omik niman oyoliuj, toTajtsin okimakak “ueyilistli niman tetlakaitalistli” niman “nochi tekiuajyotl” para tekiuajtis “ne iluikak niman nikan ipan in tlaltikpaktli”. Noijki okinauati makipopolo nochi tlen kichiua Diablo (Heb. 2:7; Mat. 28:18; 1 Juan 3:8). San ika, Biblia kijtoua ika yejuin “siuatl” kinpiyaskia oksekimej iuejkakoneuan. Apóstol Pablo okijto akinomej ijkuak ijkin okimijli tokniuan tlapejpeniltin: “Tla nenteyaxkauan itech Cristo, tla ijkon, nentekoneuan itech Abraham, niman iuan Abraham nenkiseliskej on herencia yejuan Dios okitlalij ipan ipromesa” (Gál. 3:​28, 29). Ijkuak Jehová kitlapejpenia se tokniuj ika iespíritu santo, nochiua iuejkakoneuj yejon “siuatl”. Kuakon, Jesucristo niman 144,000 akin iuan tekiuajtiskej, yejuamej iuejkakoneuan “siuatl” (Apoc. 14:1). Yejuamej nokojtiliaj tlanemiliskej niman kichiuaskej ijkon ken inTaj, Jehová. w22.07 16 párrs. 8, 9

Tinochimej tikmatij ika ipan itlamiyan tonaltin tikixnamikiskej miyek tlen ouijtika (2 Tim. 3:1). Ijkuak ijkon panoua, kanaj melak toyolkokouaj niman tiajmankamikij, niman más ijkon tomachiliaj ijkuak miyekpa ijkon topan nochiua. San ika, matikilnamikikan ika Jehová kitstika nochi tlen tikixnamiktokej niman ika yejua techpaleuis matitlaxikokan. Aman matikitakan kenon Jehová okipaleui Job. Yejuin tlakatsintli miyek tlen okixnamik. San ipan se tonajli okinmichtekilijkej iyolkauan niman sekimej omijkej, noijki, omijkej itlakeualuan niman ikoneuan (Job 1:​13-19). Sakin, ijkuak yejua ok melak noyolkokojtoya, okajsik se kokolistli tlen melak tekoko (Job 2:7). Jehová kitstoya tlen ipan panotoya Job niman pampa melak kitlasojtlaya, okipaleui matlaxiko niman mamelajkanemi. w22.08 11 párrs. 8-10

Kemantika melak teyolkoko ijkuak yakaj techmelajkatlalia. Ueliskia tiknemiliskej ika xkinamikiya matechmelajkatlalikan noso ika melak xkuajli ken otechmelajkatlalijkej. Noijki ueliskia tikilkauaskej ika Jehová techmelajkatlalia pampa techtlasojtla (Heb. 12:​5, 11). Xmokauili mamitsmelajkatlalikan niman xmopatla. Miyekpa, Jesús okajuak Pedro imixpan apóstoles (Mar. 8:33; Luc. 22:​31-34). Kanaj ijkuak Pedro kimelajkatlaliayaj, yejua melak pinauiya. Maski ijkon, yejua nochipa omelajkanen itech Jesús, kinokauiliaya makimelajkatlalikan niman xok kichiuaya tlen xkuajli yokichiujka. Niman, ¿tlenon opanok pampa ijkon okichiuj Pedro? Jehová okiteochiuj pampa omelajkanen niman okimakak más tekitl ipan tlanechikojli (Juan 21:​15-17; Hech. 10:​24-33; 1 Ped. 1:1). Noneki timokauilis mamitsmelajkatlalikan niman timopatlas maski ueliskia tipinauis. Tla ijkon tikchiua, más uelis tiktekichiuilis Jehová niman más uelis tikinpaleuis tokniuan. w22.11 21, 22 párrs. 6, 7

Abrahán otlanemili itech nochi tlen yokijlika Jehová niman kimatstoya ika yejua xkichiuaskia itlaj tlen xkuajli. Apóstol Pablo okijto ika Abrahán okineltokak ika Jehová ueliskia kiyolitis ikoneuj, Isaac (Heb. 11:​17-19). Ijkon kineltokaya Abrahán pampa Jehová okijlika ika Isaac kinpiyaskia miyekej ikoneuan; niman ijkuak yejua kiuentlaliskia Isaac, yejua xikinpiaya ikoneuan. Abrahán melak kitlasojtlaya Jehová, ika yejon, kuajli kimatstoya ika Jehová xkeman kichiuaskia itlaj tlen xkuajli. Maski melak ouijtika okitak kichiuas tlen Jehová okitlajtlanili, yejua ika nochi iyojlo okitlakamat pampa itech tlaneltokaya (Gén. 22:​1-12). ¿Kenon uelis tikchiuaskej ijkon ken Abrahán? Matokojtilikan más matikixmatikan Jehová, pampa tla ijkon tikchiuaj, más itech tonisiuiskej niman más tiktlasojtlaskej (Sal. 73:28). Noijki, techpaleuis matitlanemilikan ijkon ken Jehová tlanemilia (Heb. 5:14). Niman yejon melak techpaleuis, pampa tla yakaj techijlia matikchiuakan tlen xkuajli, xtiknekiskej tikchiuaskej. Nion achijtsin xtiknemiliskej tikchiuaskej tlen uelis kiyolkokos Jehová niman tlen uelis kichiuas maka sa iuan matouikakan. w22.08 28, 29 párrs. 11, 12

Ijkuak apóstol Pablo niman Bernabé oyajkej Listra, Iconio niman Antioquía, “okintlalijkej on ueuetkej tlayekankej intech tokniuan” (Hech. 14:​21-23). Yejon tlayekankej melak okinyolchikaujkej tokniuan ijkon ken aman teyolchikauaj tlayekankej. Tlayekankej, nochipa xkitstokan tla ipan nemotlanechikol nemi se tokniuj akin ipan panotika tlen ouijtika, akin kineki “sen kuajli tlajtojli” tlen kiyolchikauas. Pablo okimilnamikti tokniuan ika onenkej “sanoyej miyek tlakatl” akin noijki okixnamijkej miyek tlen ouijtika. San ika, noijki okimijli ika ouelkej otlaxikojkej pampa Jehová okinpaleui (Heb. 12:1). Yejua okinteneuili yejuin tlakamej pampa kimatiya ika kinyolchikauaskia niman kinpaleuiskia nochipa manemikan ipan “iueyikalpan Dios yejuan nochipa nemi” (Heb. 12:22). Tlen Pablo okijto noijki uelis techpaleuis ijkuak tikixnamikiskej tlen ouijtika. ¿Xmelak ika sajnoye techyolchikaua ijkuak tikitaj kenon Jehová okipaleui Gedeón, Barac, David, Samuel niman oksekimej itekipanojkauan? (Heb. 11:​32-35). w22.08 21, 22 párrs. 5, 6

¿Kenon kintlajtlakolmakaskej akin yoliuiskej? ¿Kintlajtlakolmakaskej itech tlen okichiujkej ijkuak yoltoyaj? Ka. Matikilnamikikan ika ijkuak omijkej, opopoliujkej intlajtlakoluan. Kuakon, xkintlajtlakolmakaskej itech tlen okichiujkej ijkuak yoltoyaj, yej kintlajtlakolmakaskej itech tlen kichiuaskej ijkuak kinyolitiskej ipan yenkuik tlaltikpaktli, ijkuak kinmachtiskej. Niman hasta Noé, Samuel, David, Daniel niman oksekimej itekipanojkauan Jehová nonekis tikinmachtiskej itech Jesucristo, niman yejuamej nonekis kiteititiskej ika yemelak tlaneltokaj itech imikilis. ¡Miyek tlen kichiuaskej akin xyolmelajkej! ¿Tlenon inpan nochiuas akin xkinekiskej kitlakamatiskej Jehová? Apocalipsis 20:15 technankilia: “On yejuan xtlajkuilolnestikatka imintoka ipan on amamoxtli yejuan kijtoua akinomej kipiyaj yenkuik nemilistli para nochipa, ompa okominxinijkej ipan on tliko”. Kuakon, yejuamej kinpopoloskej para nochipa. Matotlajtoltikan: “¿Yokijkuilo Jehová notoka ipan amoxtli tlen kijtoua akinomej kipiyaskej nemilistli?”. Tla kema, nochipa matokojtilikan matiktlakamatikan Jehová para maka kipopolos totokayo. w22.09 18, 19 párrs. 17-19

Tla kuajli tikmachtiaj totlamachilis ika tlen kijtoua Biblia, uelis kuajli tiktlapejpeniskej kenon topajtiskej (1 Tim. 3:9). Ijkuak tiktlapejpeniskej tlenon tikchiuaskej niman titlajtoskej imiuan oksekimej, noneki tikilnamikiskej tlen kijtoua Filipenses 4:5: “Nochi tlakatl mamech[i]ta ika nentenotskej”. Uelis tikteititiskej ika titeasikamatij tla xsan tiknemilijtokej kenon xtikualoskej. Tikintlasojtlaj niman tikintlakaitaj tokniuan maski xsan noijki kitlapejpeniaj ken tejuamej (Rom. 14:​10-12). Ijkon ken otikijtokej ipeujyan yejuin tlamachtijli, Jehová yejua akin techmakatika tonemilis. Uelis tikititiskej ika tikpatiojkaitaj tonemilis tla totlajpiyaj niman chikauak tiktekichiuiliaj (Apoc. 4:11). Aman tinochimej tikualoj niman tikpiyaj tlauejli, san ika, Jehová xijkon kinekiya matinemikan. Yejua ika, yokijto ika kichiuas matinemikan ipan se kualtsin tlaltikpaktli kampa xok titlajyouiskej nion xtimikiskej (Apoc. 21:4). Chika yejko yejon tonajli, matiktlajpiyakan tonemilis niman chikauak matiktekichiuilikan toTajtsin Jehová. w23.02 25 párrs. 17, 18

Jehová miyekpa yokiteititi ika san yejua más ueyixtika xijkon ken tekiuajkej akin nemij ipan tlaltikpaktli (Rom. 13:1). San seki matikteneuakan. Kachtopa matitlajtokan itech faraón de Egipto. Yejua okitlajyouilti ikalpan Jehová niman xkinekiya kimakauas. San ika, toTajtsin okimakixti ikalpan niman okiamimikti faraón ipan mar Rojo (Éx. 14:​26-28; Sal. 136:15). Ika ome, tekiuaj Belsasar, akin tlayekantoya Babilonia, okichiuj se iluitl niman okixnamik “Dios iluikakchanej”. Niman xokiueyichiuj, yej okinueyichiuj “dioses yejuan tlachijchijtin ikan oro [niman] plata” (Dan. 5:​22, 23). San ika, toTajtsin okititi Belsasar ika san yejua más ueyixtoya. “Ipan on tlayoua okimiktijkej Belsasar” niman toTajtsin okinmakak itekiuajyo medos niman persas (Dan. 5:​30, 31). Ika yeyi, tekiuaj Herodes Agripa I, akin tlayekantoya Palestina, okimikti apóstol Santiago niman sakin okitsauk apóstol Pedro pampa noijki kinekiya kimiktis. San ika, Jehová xokikauili ijkon makichiua. “Se ángel yejuan toTEKO okuajtitlan ocastigaroj” Herodes ika se kokolistli niman sakin omik (Hech. 12:​1-5, 21-23). w22.10 15 párr. 12

Ijkuak tikitaj ipan Biblia kenon Jehová okintlajpix itekipanojkauan akin itech omelajkanenkej, techpaleuiya nochipa matikilnamiktokan ika tlen tikchiaj ika tlayekapan yemelak nochiuas. Nochi tlen onka ipan iTlajtol toTajtsin “onijkuiloj para techmachtia. Onijkuiloj para on ijyouilistli niman teyoltlalilistli ma techmaka tlamachalistli” (Rom. 15:4). Matitlanemilikan itech kenon Jehová yokichiuj tlen okijto. San matontlanemilikan itech Abrahán niman Sara. Jehová okimijli ika kinmakaskia se inkoneuj maski yejuamej iuejueyimej katkaj niman xok ueliskiaj kinpiyaskiaj inkoneuan (Gén. 18:10). ¿Tlenon okichiuj Abrahán ijkuak okijlikej ika kipiyaskia se ikoneuj? Biblia kijtoua: “Okineltokak ika Dios okitlalij tajtli ipan miyek países” (Rom. 4:18). Maski Abrahán xkimatiya kenon Jehová kichiuaskia tlen yokijlika, yejua itech otlaneltokak. Niman ijkuak okipixkej inkoneuj, yejua niman isiuatsin melak oyolpajkej (Rom. 4:​19-21). Ijkuak tikamapouaj ipan Biblia kenon Jehová okichiuj tlen yejua okijto, techpaleuiya más matikneltokakan ika yejua kichiuas tlen yotechijli. w22.10 27 párrs. 13, 14

Yejuin onochiuj ijkuak judíos onokuepkej Jerusalén. Ijkon, Jehová okiteititi ika yejua katka inUeyi Tlamachtijkauj. Judíos opeujkej kiueyichiuaj Jehová ijkon ken yejua kuelita pampa Jehová okinyekan. Aman, Jehová noijki toUeyi Tlamachtijkauj niman yejon melak techyolpaktia. Isaías kijtoua ika tejuamej tiinomachtijkauan Jehová, kijtoua: “Kuajli nenkitaskej ikan nemixtololojuan”. Nikan Isaías kijtojtoya ika Jehová kentla notelketstoskia imixpan inomachtijkauan. ¿Kenon techmachtia Jehová ipan yejuin tonaltin? Techmachtia itechkopa ikalpan. Jehová kintekitiltia tlanechikoltin, amatlajkuiloltin, videos de JW Broadcasting^® niman okseki tlemach para ijkon techmachtis. Melak tiktlasojkamachiliaj Jehová pampa ikalpan melak kualtsin techmachtia. Ken Jehová techyekana, techpaleuiya matitlaxikokan ika pakilistli ijkuak tikixnamikiskej tlen ouijtika. w22.11 10 párrs. 8, 9

Ijkuak Jesús otlajto itech tlen panoskia ijkuak kixoxotoniskiaj Jerusalén niman iteopan, niman ijkuak itlapopoliuiskia ipan yejuin itlamiyan tonaltin, okijto: “On tonajli niman on hora […] xakaj kimati, nion yejuamej on ángeles ne iluikak nemij, nion nejua, yejuan niiKoneu Dios. Yej san noTajtsin kimati”. Niman sakin ijkin okimijli: “Xtlachixtiakan” (Mar. 13:​32-37). Ipan kachtopa siglo, tokniuan akin judíos katkaj nonekiya tlatlachixtoskej niman ijkon ueliskia makisaskej. Jesús okimijli inomachtijkauan: “Ijkuak nenkitaskej ika miyekej soldados yokiyejyeualojkej Jerusalén, ijkuakon xmatikan ika saniman kixoxotoniskej”. Niman ijkuak ijkin panoskia, judíos nonekiya kisaskej niman onnopaleuiskej ipan tepemej ijkon ken Jesús okimijli (Luc. 21:​20, 21). Akin okitlakamatkej Jesús niman ocholojkej, omakiskej pampa sakin romanos oksejpa onokuepkej niman okixoxotonijkej Jerusalén. Tejuamej itinemij ipan itlamiyan tonaltin, sa achijtsin poliui para tlapopoliuis. Ika yejon, noneki titlatlachixtoskej ijkon ken tokniuan akin nemiyaj ipan kachtopa siglo. w23.02 14 párrs. 1-3

Jehová kinmachtia itekipanojkauan makijtokan tlen melauak niman makichiuakan tlen melajki, niman yejon kichiua kuajli manomachilikan niman mayolseujtokan (Prov. 13:​5, 6). ¿Tejua ijkon otikitak ijkuak opeuj timomachtia Biblia? Yotiuel ika san Jehová uelis mitsyekanas niman ika noijki san yejua uelis kinyekanas tlaltikpakchanejkej (Sal. 77:13). Ika yejon, tejua tikneki tikintlakamatis itlanauatiluan Jehová (Mat. 6:33). Niman noijki tikneki tikteijlis tlen melauak, tikneki tikteititis ika nochi tlen Satanás yokijto itech toTajtsin xmelauak. ¿Niman kenon uelis tikchiuas nochi yejuin? Tejua uelis tikteititis ika xtikneltoka tlen Satanás kijtoua niman ika tikneki tikijtos tlen melauak. Noijki, uelis tikteititis ika tikneki mamitsyekana Jehová niman ika tikneki tiktlakamatis. Tla tikneki tikteititis yejuin, noneki tikchiuilis se teoyotl Jehová kampa tikijlis ika nochipa tiktekichiuilis. Sakin, noneki timoapolaktis niman ijkon teixpan tikteititis ika itech yotimosentemakak. Kuajli xmatsto ika tla tiktlasojtla tlen melauak niman tlen melajki, mitspaleuis xneki timoapolaktis. w23.03 3 párrs. 4, 5

Miyekej kinekij kipiyaskej yolseuilistli. San ika, onka se yolseuilistli tlen miyekej xkixmatij. ¿Katlejua? Iyolseuilis toTajtsin. Yejuin yolseuilistli kichiua kuajli manomachili akin kuajli nouika iuan toTajtsin iluikakchane. Ijkuak tikpiyaj iyolseuilis toTajtsin, xmás tomojtiaj ijkuak itlaj tikixnamikij (Filip. 4:​6, 7). Noijki kuajli touikaj imiuan akin kitlasojtlaj Jehová pampa, ijkon ken tejuamej, yejuamej noijki kuajli nouikaj iuan toTajtsin akin kitemaka yolseuilistli (1 Tes. 5:23). ¿Tlenon noneki tikchiuaskej tla tiknekij ika toTajtsin matechmaka iyolseuilis? Noneki tikixmatiskej, itech titlaneltokaskej niman tiktlakamatiskej. Niman yejon yolseuilistli techyolseuiya ijkuak tikixnamikij tlen ouijtika. ¿Yemelak uelis tikpiyaskej iyolseuilis toTajtsin ijkuak tikixnamiktoskej tlen ouijtika? ¿Uelis tiyolseujtoskej ijkuak uajnesiskej uejueyimej kokolistin, ijkuak san totoka itlaj panos, ijkuak noixnamikilos noso ijkuak techtlaueltokaskej? Nochi yejuin uelis techmojtis. Miyekej tokniuan tlakamej niman siuamej yokichiujkej tlen okijto Jesús ipan tlaxelojli tlen aman tikitstokej. Jehová yokinpaleui mayolseujtokan maski kixnamikij tlen ouijtika. w22.12 16 párrs. 1, 2

Tejuamej xuelis tikmatiskej tlenon panos ika tlayekapan. Ika yejon, matikilnamikikan ika Jehová xsan techtlasojtla pampa tikpiyaj se ueyi tekitl ipan ikalpan. Noijki, tla san tikitstokej ika tejuamej xtikpiyaj se ueyi tekitl ipan tlanechikojli ijkon ken oksekimej tokniuan, uelis kichiuas matajmanakan (Gál. 6:4). Kuakon, ¿tlenon uelis tikchiuas? Xnemili kenon tejua uelis más tiktekichiuilis Jehová niman tikinpaleuis oksekimej. Tla tejua san tikitstok kenon timotomintis niman san timotlatlaneuiya, kanaj xuelis mitsmakaskej okseki tekitl ipan tlanechikojli. Xkita tlenon uelis tikchiuas tla tikneki mamitsmakakan okseki tekitl ipan tlanechikojli. Tla tejua tikneki timochiuas precursor regular, ¿uelis kachtopa timochiuas precursor auxiliar? Noso, tla tikneki timochiuas tlapaleuijketl, ¿uelis más titenojnotsas? Nochi tlen aman tikchiuas, mitspaleuis niman sakin mitsmakaskej más tekitl. Kuakon, nochipa xkita kenon uelis más tiktekichiuilis Jehová. w22.04 26 párrs. 16, 17

Jehová uelis techpaleuis matikxikokan tlen ouijtika niman matiyolpakikan ijkuak tikchiuaj itekiyo. Ijkuak tiknotsaj toTajtsin itech itlaj tlen techajmana, yejua kanaj kachtopa kichiuas matikxikokan tlen tikixnamiktokej. Niman tla xnimantsin popoliui tlen tikixnamiktokej, kanaj nonekis miyekpa tiknotsaskej para matechpaleui matitlaxikokan. Niman yejon tlen yejua techijlia matikchiuakan. Ipan Isaías 62:7 teotlajtoketl Isaías okijto: “Maka xkauilikan ma noseui [Jehová]”. ¿Tlenon kijtosneki yejuin? Ika noneki melak miyekpa tiknotsaskej Jehová, kentla xtikauiliskiaj manoseui. Yejuin techilnamiktia itlaj tlen okijto Jesús itech toteoyouan ipan Lucas 11:​8-10, 13. Ika tlen Jesús okijto ipan yejuin tlaxeloltin, otechyolchikauj nochipa matiktlajtlanilikan espíritu santo. Noijki matiktlajtlanilikan matechyekana para ijkon tiktlapejpeniskej tlen kuajli. w22.11 8 párr. 1; 9 párrs. 6, 7

¿Tlenon uelis nenkichiuaskej tejua niman mochanejkauan niman ijkon uelis nentlaxikoskej ijkuak mechtlaueltokaskej? Maka xnemilikan tlen xkuajli ueliskia panos, yej más xmouikakan iuan Jehová niman xkinpaleuikan nemokoneuan noijki ijkon makichiuakan. Tla kemantika nenajmankamikij, xkijlikan Jehová kenon nemomachiliaj (Sal. 62:​7, 8). Xtlajtokan imiuan nemokoneuan itech tleka nentlaneltokaj itech Jehová. Melak kuajli tla nenkimijliaj nemokoneuan tlenon uelis kichiuaskej ijkuak itlaj san totoka panos. San ika, noijki melak kuajli yeskia tla noijki nenkimijliaj nemokoneuan tlenon uelis kichiuaskej niman ijkon tlaxikoskej ijkuak mechtlaueltokaskej, niman noijki xkinmachtikan matlaneltokakan itech Jehová. Tla ijkon nenkichiuaj, yejuamej yolchikaujkej yeskej niman xsajnoye nomojtiskej ijkuak mechtlaueltokaskej. Ijkuak toTajtsin techmaka iyolseuilis, xmás tomojtiaj ijkuak itlaj tikixnamikij (Filip. 4:​6, 7). Ika yejuin yolseuilistli, Jehová techyolseuiya ijkuak onka se ueyi kokolistli, ijkuak itlaj san totoka panoua noso ijkuak techtlaueltokaj. Jehová kichiua ika tlayekankej makintlajpiyakan tokniuan, niman noijki kinkauilia nochimej tokniuan ipan tlanechikojli manopaleuikan. Yolseuilistli tlen aman tikpiyaj techpaleuis matikxikokan tlen tikixnamikiskej ika tlayekapan niman ueyi tlajyouilistli (Mat. 24:21). w22.12 27 párrs. 17, 18

Noneki tokojtiliskej para xok totlajtlakoltijtoskej ipampa tlen xkuajli otikchiujkej. San ika, noijki xtiknekij tikchiuaskej tlen xkuajli san pampa tikmatij ika Jehová uelis techtlapopoluis pampa Jesús omik topampa (Heb. 10:​26-31). Niman, tla otikchiujkej itlaj tlen xkuajli niman yotoyolkuepkej, yotiktlajtlanilijkej Jehová matechpaleui, yotikimijlikej tlayekankej niman yotopatlakej, uelis kuajli tikmatstoskej ika Jehová yotechtlapopolui (Is. 55:7; Hech. 3:19). Kema, pampa Jesús onotemakak topampa, uelis techintlapopoluiliskej totlajtlakoluan. Ipan Xochitlalpan nochipa tikpiyaskej tlen tikchiuaskej. Nochipa nemiskej miyekej akin tiknekiskej imiuan titlajtoskej niman tikpiyaskej se tekitl tlen techyolpaktis. Niman más tiyolpakiskej pampa mojmostla más tikixmatstiaskej toTajtsin iluikakchane niman tikitaskej kenon melak techteochiua. Nochipa tiueliskej tlen yenkuik itech toTajtsin niman itech tlen okichijchiuj. w22.12 12, 13 párrs. 17, 19

On “siuatl” xkiteneujtoya Eva. Pampa teotlajtojli kijtoua ika iuejkakoneuan yejon “siuatl” kikuapatlachoskiaj yejon “kouatl”. Niman yejon “kouatl” se xkuajli iluikaktekitketl akin melak kojtik, Satanás. Kuakon, se iuejkakoneuj Eva, akin tlajtlakole, xueliskia kitlanis Satanás. ¿Akinon ueliskia kitlanis Satanás? Apocalipsis techijlia akinon yejon “siuatl” akin noteneua ipan Génesis 3:15 (Apoc. 12:​1, 2, 5, 10). Yejuin “siuatl” xse tlaltikpakchane, xkipiya itlalnakayo nion iomiyouan. Ikxitlan yejuin “siuatl” onka metstli niman kimantika se corona tlen kipiya 12 sitlalimej. Noijki kinemitia se konetsintli, niman yejon konetsintli kineskayotia iTekiuajyo toTajtsin. Yejon Tekiuajyotl onka iluikak, ika yejon, uelis tikijtoskej ika yejon “siuatl” noijki nemi iluikak. Kuakon, ¿akinon on “siuatl”? Ikalpan toTajtsin tlen onka iluikak, kampa nemij nochimej iluikaktekitkej akin melajkanemij itech Jehová (Gál. 4:26). Biblia noijki techijlia akinon kachtopa onochiuj iuejkakoneuj yejon “siuatl”. Se teotlajtojli techijlia ika iuejkakoneuj ualeuaskia itech Abrahán (Gén. 22:​15-18). w22.07 15, 16 párrs. 6-8

Jehová otechtlayokoli Biblia kampa uelis tiknextiskej itlamachilis toTajtsin. Tlen kijtoua Biblia melak tepaleui niman hasta kinpatla tlaltikpakchanejkej. Ijkuak Moisés okimijkuilo kachtopa libros tlen ika peua Biblia, ijkin okimijli israelitas: “In xejua itlaj yejuan nemejuamej uelis san nenkauilmatiskej. In tlanauatiltin mechmakas nemilistli” (Deut. 32:47). Akin kitlakamatiskiaj tlen kijtoua Biblia yolpakiskiaj niman kuajli onkisaskiaj (Sal. 1:​2, 3). Maski Biblia melak youejkauj ika onoijkuilo, ok ueli kinpatla tlaltikpakchanejkej. Tlen kijtoua Biblia nochipa tepaleuiya niman desde yeuejkaui kinuajpaleuijtiuj tlaltikpakchanejkej. Ijkuak tikamapouaj Biblia niman itech titlanemiliaj, Jehová techpaleuiya ika iespíritu santo niman ijkon matikchiuakan tlen ompa kijtoua (Sal. 119:27; Mal. 3:16; Heb. 4:12). San xkonnemili, akin okijkuilo Biblia yemelak kineki mitspaleuis. ¿Xmelak ika yejon kichiua xneki mojmostla tikamapouas moBiblia? w23.02 3 párrs. 5, 6

Ipan Apocalipsis capítulo 13 kijtoua tlenon kichiua on ika chikome tsontekomatl, Reino Unido niman Estados Unidos. Ompa kijtoua: “In xkuajli yolki kipiyaya ome ikuakuauuan ken ikuakuau sen borreguito, pero itlajtol kakistiya ken itlajtol sen dragón [ . . . ]. Yejua no kinchiuaya uejueyi milagros ipan cielo hasta kichiuaya ma uetsi tlitl ipan tlajli imixpan on tlakamej kampa ueli kitaj” (Apoc. 13:​11-15). Niman Apocalipsis capítulos 16 niman 19 kitokayotia ken “xmelauak tiotlajtojketl” (Apoc. 16:13; 19:20). Noijki, Daniel okijto ika Reino Unido niman Estados Unidos “sanoyej tlaxoxotonis” noso kichiuaskiaj miyek tlen xkuajli (Dan. 8:​19, 23, 24). Niman ijkon okichiujkej ijkuak opanok ika Okpa Guerra ipan nochi tlaltikpaktli. On ome bombas tlen okintoponijkej ipan guerra niman tlen okitlamilti yejon guerra, okinchijchiujkej ixtlamatkej akin chantiyaj Reino Unido niman Estados Unidos. Kuakon, yejuamej kentla okichiujkej “ma uetsi tlitl ipan tlajli”. w22.05 10 párr. 9