Mayo

Biblia kijtoua ika Juan noijki okitak okse grupo kampa nemiya “sanoyej miyek tlakatl”. ¿Tlenon tikmatij itech yejuin grupo? Juan okijlikej: “In yejuamej on yejuan youajkiskej ipan on temojtij tlajyouilistli. Niman yejuamej okimpakkej intlakeuan niman okimistalijkej ikan iyesyo on Borreguito” (Apoc. 7:14). Sakin ika yopanok ueyi tlajyouilistli, yejuin grupo, kampa nemi “sanoyej miyek tlakatl”, chantis ipan tlaltikpaktli niman toTajtsin melak kiteochiuas (Sal. 37:​9-11, 27-29; Prov. 2:​21, 22; Apoc. 7:​16, 17). Nochimej akin yaskej iluikak niman nochimej akin nokauaskej nikan ipan tlaltikpaktli noneki kuajli kitaskej tlen kijtoua Apocalipsis capítulo 7. ¡Melak kualtsin tlen kitaskej itekipanojkauan Jehová ika tlayekapan! Ijkuakon, akin tikpaleuiyaj iTekiuajyo toTajtsin melak tiyolpakiskej. w22.05 16 párrs. 6, 7

Kemantika noneki kuajli tiknemiliskej tlenon tikchiuaskej. Ijkuak ijkon panoua, tiktlajtlaniliaj Jehová matechmaka tlamachilistli para tikmatiskej tlenon tikchiuaskej (Sant. 1:5). Tekiuaj Salomón okijkuilo: “Achtoj xtejtemo tlamatkilistli niman kajsikamatilistli” (Prov. 4:7). Yejua kijtojtoya ika melak noneki matiktlajtlanilikan tlamachilistli toTajtsin Jehová. San ika ¿uelis techpaleuis tlamachilistli tlen techmaka Jehová ijkuak tikixnamikij itlaj tlen ouijtika? Kema. ¿Kenon uelis tikpiyaskej tlamachilistli? Tla tikitaj niman tla tikchiuaj tlen okijtojkej omemej tlakamej akin melak tlamachilisejkej katkaj. Kachtopa matitlanemilikan itech tlen okijto Salomón. Biblia kijtoua ika “Dios okimakak Salomón tlamatkilistli, niman tlamachilistli” (1 Rey. 4:29). Noijki, matitlanemilikan itech tlen okijto Jesús, akin más tlamachilise intech nochimej tlaltikpakchanejkej (Mat. 12:42). Biblia kiteneua se teotlajtojli kampa tlajtoua itech Jesús. Yejuin teotlajtojli ijkin kijtoua: “Iespíritu toTEKO nochipa iuan nemis, niman kimakas tlamatkilistli, tlamachilistli” (Is. 11:2). w22.05 20 párrs. 1, 2

Tla tejua itiueyi, maka xnemili ika xok uelis más tiktekichiuilis Jehová. Matitlajtokan itech se tokniuj akin itoka Beverley niman kipiya 75 xiuitl. Yejua kualouaya niman xmás ueliya nejnemiya. Maski ijkon, yejua melak kinekiya tenojnotsas niman ijkon miyekej kimijlis mauiyan Conmemoración. Kuakon, ¿tlenon okichiuj? Yejua okijto tlen kinekiya kichiuas niman melak oyolpak ijkuak ijkon okichiuj. Tokniuan onoyolchikaujkej ijkuak okitakej ika Beverley onokojtili más tenojnotsas. Kuajli tikmatstokej ika Jehová melak kuelita ijkuak kita ika tokniuan akin iuejueyimej nokojtiliaj más kitekichiuiliskej (Sal. 71:17). Matiknemilikan tlen kema uelis tikchiuaskej niman ijkon matikchiuakan. Nochipa matikchiuakan tlen kuajli niman tlen Jehová kuelita. Matomajmachtikan itlaj niman ijkon más tiktekichiuiliskej toTajtsin niman más titlapaleuiskej ipan ikalpan. Noijki, nochipa matikitakan kenon uelis tikinpaleuiskej tokniuan. Tla tikchiuaj nochi yejuin, tikitaskej kenon Jehová techteochiuas niman tokniuan kitaskej ika tikuelitaj tiktekichiuiliskej Jehová ijkon ken okichiuj Timoteo (1 Tim. 4:15). w22.04 27 párrs. 18, 19

¿Niman tla mokoneuj xkineki kitekichiuilis Jehová maski tejua melak yotimokojtili kuajli tikmachtis? Maka xmotlajtlakolti. Jehová nochimej yokinkauili, hasta mokoneuan, makitlapejpenikan tla kinekij kitekichiuiliskej noso ka. Tla mokoneuj kitlalkauiya Jehová, maka xmosiaujkaua niman xkilnamiki ika yejua uelis itech uajnokuepas. Xkilnamiki tlen okichiuj se telpochtli akin Jesús okiteneuj (Luc. 15:​11-19, 22-24). Yejuin telpochtli okitlalkaui itaj niman okichiuj tlen xkuajli, san ika, sakin oksejpa onokuep ichan itaj. Tatajtin, Jehová yomechmakak se kualtsin tekitl: nenkimiskaltiskej akin itekipanojkauan yeskej (Sal. 78:​4-6). Tikmatstokej ika yejuin tekitl ouijtika, ika yejon, timechtlasojkamachiliaj pampa nemokojtiliaj kuajli nenkinmachtiskej nemokoneuan más makitlasojtlakan Jehová niman noijki pampa nenkinmachtiaj nochi tlen yejua technauatia (Efes. 6:4). Tla ijkon nenkichiuaj, kuajli xmatstokan ika melak nenkiyolpaktiskej Jehová. w22.05 30, 31 párrs. 16-18

¿Tlenon panos tla tinochimej tikchiuaj tlen tiuelij para tiktekichiuiliskej Jehová? Tokniuan nemiskej ika inyojlo niman san sekan nemiskej ipan tlanechikojli. Yejon tlen okichiujkej tokniuan akin onenkej ipan kachtopa siglo. Yejuamej ueliyaj miyek kichiuayaj ipan ikalpan Jehová (1 Cor. 12:​4, 7-11). Maski ijkon, yejuamej xnonekiya notlatlaniskej noso kixeloskej tlanechikojli. Pablo okimijli tokniuan akin chantiyaj Éfeso manokojtilikan san sekan makitekichiuilikan Jehová. Pablo okijto: “Ijkuak cada parte itlalnakayo Cristo kuajli tekiti, nochi kuajli noskaltia niman chikajtiu ikan tetlajsojtlalistli” (Efes. 4:​1-3, 11, 12). Tokniuan akin okichiujkej tlen Pablo okimijli xnotlauelitayaj niman san sekan nemiyaj. Niman aman noijki ijkon panoua ipan tlanechikojli. Kuakon, maka xmotlatlani imiuan oksekimej. Xmokojtili xchiua ken Jesús. Nochipa xkilnamiki ika Jehová xkilkauas nochi tlen tejua tikchiua (Heb. 6:10). Kuajli xmatsto ika yejua kitlasojkamatij tlen tejua tikchiua. w22.04 14 párrs. 15, 16

¿Xmelak ika techyolseuiya ika xtejuamej tikijtouaj akinon kitlapopoluis Jehová? Kema, san ika, onka itlaj tlen uelis tikchiuaskej. ¿Itech tlenon titlajtouaj? Tejuamej uelis tikijtoskej tla tiktlapopoluiskej yakaj akin otexchiuili tlen xkuajli noso yakaj akin otechyolkoko. Yejua kanaj uelis techijlis matiktlapopoluikan noso kanaj xtlaj techijlis. San ika, tla yemelak tiktlapopoluiyaj, xok tikualantoskej ipampa tlen otexchiuili nion xok tiktlauelitstoskej. San ika, tla melak otechyolkokojkej, noneki tiempo para uelis tikilkauaskej tlen otexchiuilijkej. Se revista La Atalaya del 15 de septiembre de 1994 kijtoua: “Ijkuak yakaj tiktlapopoluiyaj xkijtosneki ika tikijtotokej ika kuajli tlen okichiuj. Ijkuak yakaj akin kichiua ken Cristo tetlapopoluiya kiteititia ika kikauilia Jehová makiyektlali nochi tlen xkuajli okichiuilijkej. Jehová se Juez akin nochipa kichiua tlen kuajli niman yejua tetlajtlakolmakas ijkuak nonekis”. w22.06 9 párrs. 6, 7

Jehová okijto ika ipan totonaluan kinsentlaliskia miyekej tlaltikpakchanejkej akin oksekan ualeuaj niman okse tlajtojli tlajtouaj para san sekan makiueyichiuakan. Niman yejuin grupo noixmati ken “sanoyej miyek tlakatl” (Apoc. 7:​9, 10). Maski ipan yejuin grupo nemij tlakamej, siuamej niman kokonej akin oksekan ualeuaj, melak notlasojtlaj niman san sekan kiueyichiuaj Jehová (Sal. 133:1; Juan 10:16). Yejuamej ika inyojlo tenojnotsaj niman sa kinektokej kimijliskej oksekimej tlen kichiuas toTajtsin ika tlayekapan (Mat. 28:​19, 20, TNM; Apoc. 14:​6, 7; 22:17). Tla tejua tinemi ipan yejuin grupo, tikmatstokej ika sa tiknektika ika Jehová makichiua tlen yokijto. Diablo kineki techtlaneltokiltis ika Jehová xtechtlasojtla niman ika xkichiuas tlen yejua yotechijli. Tla tikneltokaj tlen Satanás techijlia, xok titlaxikoskej ijkuak tikixnamikiskej tlen ouijtika niman hasta uelis tiktlalkauiskej Jehová. w22.06 20, 21 párrs. 2, 3

Tlen tikchiaj ika tlayekapan techpaleuiya maka sajnoye matajmanakan ijkuak tikixnamikiskej se tlauejli pampa techilnamiktia ika xnochipa ijkon tinemiskej. Matikilnamikikan ika Jesús okijto ika techtlaueltokaskej (Juan 15:20). Kuakon, tla tejuamej nochipa tikilnamikij tlen kualtsin techmakas Jehová, techpaleuis nochipa kuajli matiktekichiuilikan. Matikitakan kenon tlen Jesús kichiaya ika tlayekapan okipaleui mamelajkanemi itech Jehová maski kimatstoya ika melak kitlajyouiltiskiaj ijkuak kimiktiskiaj. Ipan iluitl Pentecostés itech xiuitl 33, apóstol Pedro okiteneuj se teotlajtojli tlen onka ipan Salmos kampa kijtoua kenon Jesús yolseujtoskia niman tlaneltokaskia itech iTajtsin ijkuak kimiktiskiaj: “Ninoseuis ikan tlamachalistli, pampa xtikauilis noalma nokauas ne miktlan, nion xtikauilis itlalnakayo moyolchipajkatekitkau para ma ijtlakaui. [ . . . ] Niman tinechyoltemitis ikan paktli chika ninemi mixpan” (Hech. 2:​25-28; Sal. 16:​8-11). Jesús kimatstoya ika iTajtsin kiyolitiskia niman ika melak yolpakiskia pampa oksejpa yaskia iluikak iuan iTajtsin (Heb. 12:​2, 3). w22.10 25 párrs. 4, 5

Sejpatsin, Juan niman Santiago okijlikej innan makitlajtlanili Jesús makintlali inakastlan ijkuak tekiuajtiskia ipan iTekiuajyo toTajtsin (Mat. 20:​20, 21). Juan niman Santiago okiteititijkej ika xyolyemankej katkaj niman ika kinekiyaj más uejueyixtoskej xijkon ken oksekimej apóstoles (Prov. 16:18). Ijkuak Santiago niman Juan ijkin okichiujkej, on oksekimej apóstoles noijki xkuajli ken otlanemilijkej. Biblia kijtoua: “Ijkuak on majtlaktlimej nomachtijkej okimatkej tlinon okitlajtlankej on omemej iknijtin, sanoyej intechkopa okualankej” (Mat. 20:24). San xkonnemili kenon apóstoles xok más kuajli nonotsayaj. ¿Tlenon okichiuj Jesús? Yejua xokualan nion xokimijli ika kintejtemoskia oksekimej iapóstoles akin más kitlakamatiskiaj, akin más notlasojtlaskiaj niman akin más yolyemankej yeskiaj. Ka, yejua xijkon okichiuj. Yejua kuajli imiuan otlajto pampa kimatstoya ika kipiayaj kuajli inyojlo (Mat. 20:​25-28). Maski apóstoles miyekpa onokualanijkej, Jesús nochipa okimititi ika kintlasojtlaya. w23.03 28, 29 párrs. 10-13

Tejua melak miyek tlemach yotikchiuj. Melak otiuejkauj otimomachti Biblia niman yejon omitspaleui xneltoka ika Biblia iTlajtol toTajtsin. Niman noijki aman itikixmati Jehová, akin okichijchiuj Biblia, niman melak tiktlasojtla. Ika yejon, otimosentemakak niman otimoapolakti. ¡Melak kuajli tlen otikchiuj! Kanaj ijkuak tejua xtimoapolaktiaya, Satanás melak omitstlatlatak. San ika, aman más mitstlatlatas pampa yejua kineki xtlalkaui Jehová niman maka xtlasojtla (Efes. 4:14). Maka xkauili mamitstlani Satanás. San ika ¿tlenon mitspaleuis xmelajkanemi itech Jehová niman xchiua tlen otikijto ijkuak otimosentemakak? Noneki timopatlatias niman más tikchikaujtias motlaneltokil (Heb. 6:1). w22.08 2 párrs. 1, 2

Tinochimej noneki tikasikamatiskej ika kemantika xnoneki tikteijliskej seki tlen panoua tochan. Kanaj se teueuentsin kinemilia ika itlaj tlen kichiua isiuauj achijtsin teuetskiti. ¿Xmelak ika xkiteijlitinemiskia tlen kichiua isiuauj? Ka, pampa yejua melak kitlasojtla niman xkineki kipijpinaujtis noso kiyolkokos (Efes. 5:33). Tajtin noneki kilnamikiskej ika telpokamej niman ichpokamej kuelitaj makintlakaitakan. Ika yejon, xnoneki kiteijlitinemiskej kenon inkoneuan nopopolouaj (Col. 3:21). Niman kokonej noneki nokamaijmatiskej noso xnoneki kikamaijneuaskej itlaj tlen uelis kinpinaujtis ichanejkauan. Tla nochimej tochanejkauan nokojtiliaj xkiteijliskej nochi tlen panoua tochan, tinochimej ika toyojlo tinemiskej. w22.09 10 párr. 9

Jehová otlajto iuan Job. Okilnamikti ika san yejua toTajtsin akin melak tlamachilise niman ika yejua nochipa kitlajpiya nochi tlen okichijchiuj. Hasta okinteneuili sekimej yolkamej (Job 38:​1, 2; 39:​9, 13, 19, 27; 40:15; 41:​1, 2). Noijki, Jehová okititlan Elihú para makiyolchikauati niman makiyolseuiti Job. Elihú okilnamikti Job ika Jehová kinteochiua nochimej akin tlaxikouaj. San ika, Jehová noijki kinekiya ika Elihú makimelajkatlali Job pampa san kinemilijtoya tlen xkuajli ipan panotoya. ¿Tlenon okijli? Ika nion se tlaltikpakchane xueyixtika ijkon ken Jehová ueyixtika. Noijki, Jehová itlaj okinauati Job: okijli makichiua teoyotl inpampa yeyimej iamigos akin otlajtlakojkej (Job 42:​8-10). ¿Niman aman kenon techpaleuiya Jehová ijkuak tikixnamikij tlen ouijtika? Jehová xtechnotsa ijkon ken okinots Job, san ika, kema technotsa ika Biblia (Rom. 15:4). w22.08 11 párrs. 10, 11

Ipan tlanechikojli tlen onkatka Roma nemiyaj tokniuan akin judíos katkaj niman akin oksekan ualeuayaj. Ipan tlanauatiltin tlen okimakakej Moisés kijtouaya ika israelitas xnonekiya kinkuaskej seki yolkamej, san ika, yejon tlanauatiltin yotekiuetskaj (Mar. 7:19). Ika yejon, sekimej tokniuan opeuj kinkuaj yejon yolkamej, san ika, oksekimej tokniuan xkuajli kitayaj. Niman yejon okichiuj manoxelo tlanechikojli. San ika, apóstol Pablo okimijli ika nonekiya kuajli nouikaskej. Tlen Pablo okimijli tokniuan okimasikamachilti ika tlen kichiujtoyaj, ueliskia kimijtlakoskia niman kimijtlakoskia oksekimej tokniuan (Rom. 14:​19, 20). Hasta yejua okipatlak seki tlen kichiuaya pampa xkinekiya kinyolkokos tokniuan (1 Cor. 9:​19-22). Tla tejuamej tiknektokej tikpatlaskej itlaj tlen oksekimej xkuajli kitaj ijkon ken Pablo okichiuj, tinochimej tiyolseujtoskej niman kuajli touikaskej. w22.08 22 párr. 7

Yejuin techititia ika noneki tokojtiliskej tikchiuaskej nochi tlen noneki niman ijkon tiktlasojtlaskej tlen melajki. Niman matikilnamikikan ika Jehová kinektok techpaleuis para matiktlasojtlakan tlen melajki (Sal. 84:​5, 7). Jehová techilnamiktia ika itlanauatiluan xyetikej (1 Juan 5:3). Tla mojmostla tikintlakamatij itlanauatiluan Jehová, melak techpaleuis. Matitlanemilikan itech armas tlen apóstol Pablo okinteneuj (Efes. 6:​14-18). Apóstol Pablo okijto: “Ijkon ken sen soldado notsakuilia iyelpan ikan iteposchaleco, no ijki xmotsakuilikan ikan on yolmelaualistli”. Kuakon, ¿katlejua arma kitlajpiya toyoltsin? Teposchaleco, tlen kijtosneki itlanauatiluan Jehová. Ijkon ken se teposchaleco kitlajpiya toyojlo, itlanauatiluan Jehová noijki kitlajpiya tlen kuajli tikpiyaj ipan toyojlo. Ika yejon, maka keman matokixtilikan toteposchaleco noso nochipa matikintlakamatikan itlanauatiluan Jehová (Prov. 4:23). w22.08 29 párrs. 13, 14

Desde yeuejkaui, iTlajtol toTajtsin yokinuajpaleuijtia tlakamej niman siuamej akin omelajkanenkej. San ika ¿tleka xopopoliuj Biblia tla yeuejkaui onoijkuilo ipan amamej tlen nimantsin ijtlakauij? Jehová okichiuj manochijchiuakan copias itech Biblia. Akin okinchijchiujkej copias tlajtlakolejkej katkaj, san ika, kuajli okichiujkej intekiyo. Se ixtlamatki akin onomachti itech Tlajkuiloltin ika Hebreo okijto: “Uelis tikijtoskej ika itech nochi libros tlen yeuejkaui okimijkuilojkej, san Tlajkuiloltin ika Hebreo melak kuajli okijkuilojkej ijkuak okinchijchiujkej copias”. Kuakon, kuajli matikmatstokan ika ompa tikamapouaj itlanemililuan Jehová. “Nochi kuajli tetlayokolijli yejuan tikseliaj ualeua” itech Jehová, niman Biblia se kualtsin tetlayokolijli tlen toTajtsin yotechmakak (Sant. 1:17). Ijkuak yakaj itlaj techtlayokolia, tlen techmaka kiteititia tla yemelak techixmati niman tla kimatstok tlenon techpoloua. Niman ijkon panoua iuan Biblia. Ijkuak tikamapouaj, miyek tiuelij itech Jehová. Tikitaj ika yejua kuajli techixmati niman ika kimatstika tlenon techpoloua. w23.02 2, 3 párrs. 3, 4

Ijkuak Jesús tekiuajtitos Mil xiuitl nikan ipan tlaltikpaktli, peuas kinyolitis akin yomijkej. ¡San xkonnemili kenon kualtsin yes yejon tonajli! Tejuamej tiknekij oksejpa tikimitaskej tochanejkauan niman toamigos akin yoliuiskej. Niman Jehová noijki kimitasneki (Job 14:15). San xkonnemili kenon miyekej oksejpa kimitaskej inchanejkauan akin yomijkej. On “yolmelajkej”, akin inestokej ipan amoxtli tlen kijtoua akinomej kipiyaskej nemilistli, “yoliskej [ . . . ] para kipiyaskej nemilistli yejuan para nochipa” (Hech. 24:15; Juan 5:29). Kanaj miyekej toamigos noso tochanejkauan, yejuamej akin kachtopa kinyolitiskej ipan tlaltikpaktli. Noijki akin “xyolmelajkej”, noso akin xokixmatkej Jehová noso xokitekichiuilijkej ijkuak yoltoyaj, “yoliskej niman nokuiteuaskej para kintlajtlakolmakaskej”. Nochimej akin yoliuiskej nonekis miyek tlen nomachtiskej (Is. 26:9; 61:11). Ika yejon, nonekis chikauak titenojnotsaskej niman titemachtiskej (Is. 11:10). w22.09 20 párrs. 1, 2

Jehová yokiteititi ika yejua más kojtik xijkon ken gobiernos akin nosentlaliaj para kixnamikiskej. Yejua okinpaleui israelitas makinnotlatkitikan tlaltin tlen yokimijlika kinmakas (Jos. 11:​4-6, 20; 12:​1, 7, 24). Jehová miyekpa yokiteititi ika san yejua Ueyixtika Dios. Ijkuak Nabucodonosor, akin tlayekantoya Babilonia, okijto ika melak kojtik katka niman ika melak ueyixtoya niman xokiueyiteneuj Jehová, toTajtsin okichiuj makipolo itlamachilis. Sakin, ijkuak Nabucodonosor okajsik itlamachilis, okiueyiteneuj Jehová niman okijto ika san yejua nochipa tlayekanas. Niman noijki okijto ika Jehová uelis kichiuas nochi tlen kinekis niman xakaj uelis kiteltis (Dan. 4:​30, 33-35). Se salmista okijkuilo: “ToTEKO kinteltia on naciones para maka ma kichiuakan on tlen xkuajli kinemiliaj kichiuaskej”. Noijki okijto “¡Sanoyej tlatiochijtli on nación yejuan kita toTEKO ken yejua iDios! ToTEKO, yokitlapejpenij on nación para yejua iyaxka yes” (Sal. 33:12). Ken tikitaj, melak tepaleui tla timelajkanemij itech Jehová. w22.10 15, 16 párrs. 13-15

Miyek teotlajtoltin tlen onka ipan Biblia yonochiujkej, yejon techpaleuiya matikmatstokan ika tlen Jehová yokijto kema nochiuas. Tomachiliaj ijkon ken se salmista akin okijli Jehová: “Sanoyej nikneki para xnechmakixti; nochi notlamachalis yoniktlalij ipan motlajtoltsin” (Sal. 119:81). Jehová sajnoye techtlasojtla, ika yejon, ipan Biblia yejua techijlia ika tikpiyaskej “sanoyej kuajli tlamachalistli” (Jer. 29:11). Maski tlaltikpakchanejkej kinekiskej tlayektlaliskej, xueliskej. San Jehová uelis tlayektlalis pampa yejua ijkon yokijto. Kuakon más matomachtikan itech teotlajtoltin tlen uajlauej ipan Biblia, ijkon, más titlaneltokaskej itech iTlajtol toTajtsin. Noijki uelis titlaneltokaskej itech Biblia pampa tlen ompa kijtoua melak tepaleui (Sal. 119:​66, 138). San matikonteneuakan yejuin: miyekej akin kinekiyaj nokauaskej, aman san sekan nemij niman ika inyojlo nemij pampa okichiujkej tlen Biblia kijtoua. Niman inkoneuan noijki ika inyojlo nemij pampa kintlasojtlaj niman kintlajpiyaj (Efes. 5:​22-29). w23.01 5 párrs. 12, 13

Matitlanemilikan itech kenon Jehová yotechpaleui. San seki matikonteneuakan. Jesús okijto ika iTaj techmakaskia tlen ika topanoltiskej (Mat. 6:​32, 33). Noijki okijto ika Jehová techmakaskia iespíritu santo tla tiktlajtlaniliaj (Luc. 11:13). ¿Xmelak ika Jehová yotechmakak nochi yejuin? Kema. Noijki, Jehová yokijtojka ika techtlapopoluiskia, techyolseuiskia niman techmakaskia tlen ika tikchikauaskiaj totlaneltok, niman kanaj yotikitak ika Jehová yokichiuj yejuin mopampa (Mat. 6:14; 24:45; 2 Cor. 1:3). Tla titlanemiliaj itech nochi tlen Jehová yokichiuj topampa, techpaleuis nochipa matikilnamiktokan ika yemelak nochiuas tlen tikchiaj ika tlayekapan. Tejuamej noijki uelis tiyolpakiskej pampa melak kualtsin tlen tikchiaj ika tlayekapan niman tikmatstokej ika Jehová kichiuas nochi tlen yotechijli. Niman ken okijto se salmista: “Sanoyej paki [ . . . ] on yejuan kitlalia nochi itlamachalis itech iTEKO Dios. [ . . . ] Yejua nochipa kichiua on tlen kijtoua” (Sal. 146:​5, 6). w22.10 28 párrs. 15, 17

Isaías okijto ika oksejpa kiueyichiuaskiaj Jehová ken yejua kuelita. ¿Yonochiuj yejuin teotlajtojli ipan yejuin tonaltin? Kema. Desde 1919 melak miyekej tlaltikpakchanejkej yokiskej itech Ueyixtika Babilonia, tlen kijtosneki tlaneltokiltin xmelajkej. Niman Jehová yokinuikak kampa más kualtsin nemij xijkon ken tlajli tlen okinmakak israelitas, yokinuikak kampa uelij ika inyojlo kiueyichiuaj niman kichiuaj ken yejua kuelita (Is. 51:3; 66:8). Desde 1919, tokniuan tlapejpeniltin san sekan kuajueyichiujtiuej Jehová, sakin, “oksekimej borregos” akin kichiaj nemiskej ipan tlaltikpaktli noijki opeujkej nemij kampa san sekan kiueyichiuaj Jehová imiuan tlapejpeniltin. Ipan nochi tlaltikpaktli nemij tokniuan akin san sekan kiueyichiuaj Jehová. Kuakon, uelis kuajli tikmatstoskej ika maski san kanon tichantiskej, tla tiktekichiuiliaj Jehová ika nochi toyojlo, san sekan tikueyichiuaskej toTajtsin imiuan tokniuan. w22.11 11, 12 párrs. 12-15

¿Ouijtika tikita tikasikamatis ika Jehová “nochipa nemi”? (Is. 40:28). Tla kema, xsan tejua ijkon mopan yonochiuj. Yeuejkaui, Elihú ijkin okijto itech toTajtsin: “Xuelis tikpouaskej keski xipan kipiya” (Job 36:26). Aman tej, tla xtikasikamatij itlaj, xkijtosneki ika xmelauak. Matitlajtokan itech tlauijli. Kanaj xtikasikamatij kenon tekiti tlauijli, san ika, yejon xkijtosneki ika xonka tlauijli. Noijki ijkon, kanaj xkeman uelis tikasikamatiskej kenon toTajtsin xkeman onemiko niman kenon xkeman mikis. San ika, yejon xkijtosneki ika toTajtsin xnochipa nemi. Tlen Biblia techijlia itech toTajtsin kema melauak, maski xtikasikamatij (Rom. 11:​33-36). Noijki, toTajtsin inemiya achto ika oniaskia universo niman nochi tlen kipiya, ken tonajli niman okseki sitlalimej. Niman Biblia noijki kijtoua: “Okipatlau on cielo” (Jer. 51:15). w22.12 2, 3 párrs. 3, 4

Kanaj kemantika techtlajtlaniliskej matikchiuakan teoyotl. Matikonnemilikan yejuin: se tokniuj siuatl akin temachtia uelis kijlis tokniuj akin iuan otemachtito makichiua se teoyotl. Kanaj yejuin tokniuj akin oteuikak xmás kixmati akin kimachtiaj, ika yejon, kanaj más kuajli yeskia tla kichiua teoyotl ijkuak tlamiskej nomachtiaj pampa ijkon ikimatstos tlenon kitlajtlanis ipampa akin kimachtiaj. ¿Tlenon noneki kilnamiktos se tokniuj tlakatl akin kijliaj makichiua teoyotl ijkuak kisaskej ontenojnotsaskej noso ipan se tlanechikojli? Tokniuan tlakamej noneki kilnamiktoskej ika ipan inteoyouan xnoneki temelajkatlaliskej nion xnoneki itlaj kitemachiltiskej. Ipan tlanechikoltin techmakaj makuijli minutos para tokuikatiskej niman para nochiuas teoyotl. Kuakon, tokniuj akin kijliskej makichiua teoyotl xnoneki melak uejkauis, niman más ijkuak peuas tlanechikojli (Mat. 6:7). w22.07 24 párrs. 17, 18

Jesús okijto ika ipan itlamiyan tonaltin, miyekan oniaskiaj uejueyimej kokolistin (Luc. 21:11). Tlen Jesús okijto techmaka yolseuilistli. ¿Tleka? Pampa itikmatstoyaj ika nochi yejuin panoskia, ika yejon, xtechmojkatlachialtia. Aman inochiujtika nochi tlen Jesús okijto. Yejua ika, tikchiuaj tlen Jesús okijto ika nonekiya kichiuaskej akin nemiskiaj itlamiyan tonaltin. Yejua okijto: “Pero maka nemoyolpajsoloskej”. Melauak ika ijkuak onka se ueyi kokolistli, xok ueli tikchiuaj tlen kachtopa tikchiuayaj. San ika, maka matijkauilikan ika yejon makichiua maka sa matomachtikan noso maka sa matiuiyan tlanechikoltin. Ipan amatlajkuiloltin niman videos tlen techmaka ikalpan toTajtsin, tikitaj ika tokniuan noijki kixnamiktokej tlen tejuamej tikixnamiktokej niman melajkanemij itech Jehová. w22.12 17 párrs. 4, 6

Nochimej kimatiyaj ika Jacob melak kitlasojtlaya ikoneuj José (Gén. 37:​3, 4). Ika yejon, ikniuan José akin más iuejueyimej katkaj opeujkej kinexikolitaj José. Niman ijkuak sekimej tlasemankej madianitas ompa ika opanokej, yejuamej okiminemakiltijkej imikniuj José. Yejon tlakamej uejka oyajkej, oyajkej Egipto. Niman ompa oksejpa okinemakakej José, aman okinemakiltijkej Potifar, se tlakatl akin ueyixtoya. Inemilis José san totoka onopatlak. Ijkuak nemiya ichan, itaj melak kitlasojtlaya; niman aman nemiya Egipto, ken se tlakeuajli (Gén. 39:1). Kemantika, tlauejli tlen tikpiyaj san noijki tlen oksekimej tlaltikpakchanejkej kipiyaj (1 Cor. 10:13). Noso kemantika techpijpinaujtiaj, techixnamikij noso techtlaueltokaj san pampa tiinomachtijkauan Cristo (2 Tim. 3:12). Maski san tlenon tikixnamiktoskej, Jehová uelis techpaleuis. w23.01 14, 15 párrs. 3, 4

Kanaj kemantika uelis tiknemiliskej ika nonekis titlajtoskej iuan tokniuj akin otechyolkoko. San ika, kachtopa noneki totlajtoltiskej: “¿Nikmatstika nochi tlen opanok?” (Prov. 18:13). “¿Kanaj tokniuj xkinekiya nechyolkokos?” (Ecl. 7:20). “¿Kemantika nejua noijki ijkon yoniktechiuilijka?” (Ecl. 7:​21, 22). “Tla nitlajtoua iuan tokniuj, ¿más nikueyilis tlauejli?”. Tla totlajtoltiaj yejuin, kanaj tikitaskej ika más kuajli tla tikititiaj tokniuj ika tiktlasojtlaj niman tikilkauaj tlen opanok. Toseselti uelis tikteititiskej ika tikchiuaj ken Cristo tla tikintlasojtlaj tokniuan maski nopopolouaj. Ijkuak tikteititiaj ika titetlasojtlaj, oksekimej uelis kitaskej ika tejuamej yemelak tiktekichiuiliaj toTajtsin Jehová, niman yejuamej noijki kinekiskej kitekichiuiliskej. Kuakon, nochipa matotlasojtlakan para nochimej makitakan ika tikchiuaj ken Cristo. w23.03 31 párrs. 18, 19

Biblia noijki kiteititia itlaj tlen melak ueyi kijtosneki: itlasojtlalis toTajtsin. Pampa Jehová melak techtlasojtla, xokitlali ipan Biblia tlen xtechpaleuis para tiktekichiuiliskej (Juan 21:25). Jehová noijki techititia ika techtlasojtla pampa xotechinmakak miyek tlanauatiltin ipan Biblia. Ipan Biblia yejua okichiuj makijkuilokan teotlajtoltin, tlen inpan opanok sekimej tlaltikpakchanejkej niman tlen techpaleuis ipan tonemilis niman ijkon kuajli matiktlapejpenikan tlenon tikchiuaskej. Tlen okitlali ipan Biblia techpaleuiya matiktlasojtlakan niman matiktlakamatikan Jehová ika nochi toyojlo. Biblia kiteititia ika Jehová melak kineki techpaleuis. Ijkon tikijtouaj pampa ipan iTlajtol kinteneua miyekej itekipanojkauan akin uelis tikimasikamatiskej pampa san noijki okixnamijkej tlen aman tejuamej tikixnamikij (Sant. 5:17). Niman tlen más ueyi kijtosneki, ijkuak tikitaj kenon Jehová okinpaleui itekipanojkauan, más kuajli tikasikamatij ika yejua “tenotski niman teikneliani” (Sant. 5:11). w23.02 6 párrs. 13-15

Sa ika tlami libro itech Biblia ijkin peua: “Ipan in tlajkuilolamatl nikijkuiloua on tlajtlamach yejuan Dios okinek para JesuCristo ma kinmachisti on itekitkauan on tlen saniman nochiuas” (Apoc. 1:1). Kuakon, melak kuajli tla tikuelitaj tikmatiskej tlenon panotika ipan tlaltikpaktli niman ijkon tikitaskej tla inochiujtika se teotlajtojli. Niman kanaj hasta tikuelitaj titlajtoskej imiuan tokniuan itech yejuin. Ijkuak titlajtoskej imiuan tokniuan itech kenon inochiujtokej seki teotlajtoltin, noneki totlajpiyaskej. ¿Tleka? Pampa ueliskia tikijtoskej tlen tejuamej tiknemiliaj, niman yejon ueliskia kinxelos tokniuan. San se matikteneuakan itech tlen ueliskia panos niman tlen uelis tikchiuaskej: kanaj ueliskia tijkakiskej ika sekimej tekiuajkej kijtouaj ika kiyektlaliskej se tlauejli niman ika yejuamej kichiuaskej nochimej kuajli manemikan niman maonia yolseuilistli. Ijkuak ijkon tijkakiskej, maka nimantsin matiknemilijtiuetsikan ika inochiujtika teotlajtojli tlen uajlauj ipan 1 Tesalonicenses 5:​3, yej noneki matikitakan tlenon yokijto ikalpan toTajtsin. Tla nochi tlen tikijtouaj tikixtiaj itech amatlajkuiloltin tlen ikalpan toTajtsin yotechmakak, tikinpaleuiskej tokniuan ipan tlanechikojli makipiyakan “san se tlanemilijli” (1 Cor. 1:10; 4:6). w23.02 16 párrs. 4, 5

¿Tleka tiktlasojtla Jesucristo? Biblia techijlia tleka uelis tiktlasojtlaskej. Ompa kijtoua ika Jesús kimanauiya “on tlen melauak, on tlen melajki niman on tlen yolyemanki”. Kuakon, tikasikamatij ika tejua tiktlasojtla Jesús pampa noijki tiktlasojtla tlen melauak niman tlen melajki, ijkon ken yejua. Xkonnemili kenon Jesús ika yolchikaualistli okiteijli tlen melauak niman tlen melajki (Juan 18:37). San ika ¿kenon Jesús okiteititi ika yolyemanki katka? Tlen kijtoua Jesús niman tlen kichiua, kiteititia ika yejua yolyemanki. Jesús nochipa kiueyiteneua iTaj, niman xkeman kineki ika oksekimej yejua makiueyiteneuakan (Mar. 10:​17, 18; Juan 5:19). ¿Kenon timomachilia ijkuak tikita ika Jesús melak yolyemanki? ¿Xmelak ika noijki tikneki tiktlasojtlas iKoneuj toTajtsin niman tikchiuas ken yejua? Kema. ¿Niman tikmatstok tleka Jesús melak yolyemanki? Pampa Jehová yolyemanki, niman Jesús kitlasojtla iTaj niman kichiua ijkon ken yejua (Sal. 18:35; Heb. 1:3). ¿Xmelak ika yejuin kichiua más xnisiui Jesús? w23.03 3, 4 párrs. 6, 7

Biblia kijtoua ika yoliuiskej ome grupos: akin “yolmelajkej” niman akin “xyolmelajkej”. Yejuamej noijki uelis nochipa nemiskej ipan tlaltikpaktli. ¿Akinomej on “yolmelajkej”? Nochimej akin omelajkanenkej itech Jehová hasta ijkuak omijkej. Niman “xyolmelajkej”, on akin xokitekichiuilijkej. Niman miyekej okichiujkej tlen sajnoye kitlauelita Jehová. Pampa yejuin ome grupos yoliuiskej, ¿kijtosneki ika intoka ijkuiliujtika ipan amoxtli tlen kijtoua akinomej kipiyaskej nemilistli? Ijkuak yoltoyaj, intoka akin “yolmelajkej” inestoya ipan amoxtli tlen kijtoua akinomej kipiyaskej nemilistli. ¿Opopoliujkej intoka ijkuak omijkej? Ka, pampa Jehová xkimilkaua. Biblia kijtoua: “Dios xejua iminDios on mikatsitsimej, yej yejua iminDios on yoltokej, pampa para yejua melauak nochimej kipiyaj nemilistli” (Luc. 20:38). Yejon kijtosneki ika ijkuak yoliuiskej, intoka ok nestos ipan amoxtli tlen kijtoua akinomej kipiyaskej nemilistli. San ika, uelis tikijtoskej ika intoka san ijkuiliujtok ika lápiz (Luc. 14:14). w22.09 16 párrs. 9, 10

Jehová kinekiya ika kachtopa tlaltikpakchane makuelita niman makiyolpakti nochi tlen onka ipan tlaltikpaktli. Ika yejon, okitlali Adán ipan se kualtsin xochitlalpan kampa ueliskia kitas nochi tlen ompa onkatka, noijki kinekiya makitlajpiya niman makiueyili yejon xochitlalpan (Gén. 2:​8, 9). Xkonnemili kenon yolpakiya Adán ijkuak kitaya kenon xinachtli ixuaya niman kenon xochimej poniyaj. Adán kipiaya se kualtsin tekitl: kitlajpiyas xochitlalpan Edén. Jehová noijki okijli Adán makintokayoti yolkamej (Gén. 2:​19, 20). Jehová ueliskia yejua kintokayotis, san ika, okinek kimakas Adán yejon tekitl. Adán melak kuajli kintlajtlataya yolkamej para kitas kenon tlachiayaj niman tlenon kichiuayaj niman ijkon kimatis kenon kintokayotis. Yejuin kualtsin tekitl okipaleui Adán makita kenon iTaj melak tlamachilise niman kenon melak kualtsin katka nochi tlen okichijchiuj. w23.03 15 párr. 3

Daniel okijto ika yejuin ueyixtika tekiuaj kineskayotia ikxiuan tlamachijchiuajli tlen okitemik Nabucodonosor. Biblia noijki kijtoua ika yejuin tekiuaj sa ika tlami ueyixtika tekiuaj yeskiaj niman sakin xok yakaj okse tekiuajtiskia. Ken yotikitakej, yejuin tekiuaj Reino Unido niman Estados Unidos (Dan. 2:​31-33). Sa achijtsin poliui ijkuak iTekiuajyo toTajtsin kinpopolos yejuin ueyixtika tekiuaj niman oksekimej tekiuajkej ipan Armagedón (Apoc. 16:​13, 14, 16; 19:​19, 20). ¿Kenon techpaleuiya yejuin teotlajtojli? Daniel okijto okse itlaj tlen techititia ika itinemij ipan itlamiyan tonaltin. Ikipiya ipantsin 2,500 xiuitl, sakin ika okixoxotonijkej Babilonia, Daniel okijto ika uajnesiskiaj oksekimej nauimej uejueyixtokej tekiuajkej akin noijki kitlajyouiltiskiaj ikalpan toTajtsin. Noijki okijto ika Reino Unido niman Estados Unidos yeskiaj sa ika tlami ueyixtika tekiuaj. Yejuin teotlajtojli techyolseuiya niman kichiua más matikneltokakan ika sa achijtsin poliui ijkuak iTekiuajyo toTajtsin kinpopolos nochimej tekiuajkej akin nemij ipan tlaltikpaktli niman ika san yejua tlayekanas. w22.07 4 párr. 9; 5 párrs. 11, 12