Junio

Job kuajli nouikaya iuan Jehová, kinpiaya miyek ichanejkauan niman kuajli imiuan nouikaya niman noijki kipiaya miyek tomin (Job 1:​1-5). San ika, san ipan se tonajli okipolo nochi tlen kipiaya. Kachtopa, omijkej niman okinmichtekilijkej iyolkauan (Job 1:​13-17). Sakin omijkej nochimej ikoneuan akin melak kintlasojtlaya. Aman san matikonnemilikan kenon melak onoyolkokojkej niman oajmankamijkej Job niman isiuauj ijkuak okimatkej ika on majtlaktli inkoneuan yomijkaj. Ika yejon, ¡Job onotlakentetsayan niman onotlajkal ipan tlajli! (Job 1:​18-20). Sakin, Satanás okichiuj ika Job makajsi se kokolistli tlen melak tekoko niman tlen melak tepinajti (Job 2:​6-8). Ijkuak xikualouaya, miyekej melak kitlakaitayaj niman hasta konitayaj para makinpaleui (Job 31:18). San ika, aman kicholouiliayaj niman xkitasnekiyaj. Ikniuan, iamigos niman itlakeualuan xkinekiyaj kipaleuiskej (Job 19:​13, 14, 16). w22.06 21 párrs. 5, 6

Ijkuak yakaj noapolaktia, noneki kichiuas tlen apóstol Pablo okimijli tokniuan akin chantiyaj Éfeso. Yejua okimijli: “Ijkon titoskaltijtiaskej ipan tonemilis” (Efes. 4:13). Kentla kimijliskia “Matikchikaujtiakan totlaneltok”. Kuajli nesi ika tejua melak tiktlasojtla Jehová, san ika, uelis más tiktlasojtlas. Sejpatsin apóstol Pablo okitlajtlanili Jehová makinpaleui tokniuan akin chantiyaj Filipos “más ma miyekiya” intlasojtlalis, ika yejon, tikijtouaj ika tejua noijki uelis más tiktlasojtlas Jehová (Filip. 1:9). San ika ¿kenon uelis más tiktlasojtlas? Pablo okijto: “[Ika] nemotlamatkilis niman nemokajsikamatilis”. Yejuin kijtosneki ika ijkuak más tikixmatis Jehová, más tiktlasojtlas, más tikuelitas tlen kichiua, nochipa tiknekis tikyolpaktis niman xkeman tiknekis tikyolkokos. Noijki más tiknekis tikmatis tlen kuelita Jehová, niman tla itikmati, timokojtilis tikchiuas tlen yejua kuelita. w22.08 3 párrs. 3, 4

Tlen ijkuiliujtika ipan yejuin amoxtli san okimijkuilouilijkej itekipanojkauan Jehová. Niman teotlajtoltin tlen uajlauej ipan Apocalipsis inochiujtokej. Apóstol Juan okijto ika ajsiskia tonajli ijkuak nochiuaskiaj teotlajtoltin tlen uajlauej ipan Apocalipsis. Yejua okijto: “Ijkuak nopan oyejkok espíritu santo, oninen ipan itonal toTeko” (Apoc. 1:​10, TNM). Yejua okijkuilo yejuin teotlajtojli kanaj ipan xiuitl 96, niman ijkuakon “itonal toTeko” xiyejkoya (Mat. 25:​14, 19; Luc. 19:12). Kuakon, ¿kemanon opeuj “itonal toTeko”? Seki teotlajtoltin techititiaj ika opeuj ipan 1914, ijkuak Jesús opeuj tekiuajti ne iluikak. Ijkuakon opeuj nochiuaj teotlajtoltin kampa tlajtouaj itech ikalpan toTajtsin tlen uajlauej ipan amoxtli Apocalipsis. Kuakon, amantsin itinentokej ipan “itonal toTeko” (Apoc. 1:3). w22.05 2, 3 párrs. 2, 3

On xkuajli yolki niman on xmelauak tiotlajtojketl yoltokej kominxiniskej tliko kampa tekuintikaj ikan azufre. Kuakon, toTajtsin kinpopolos yejuin xkuajkualtin yolkamej ijkuak ok tlayekantoskej. Tlen techmachtia. Akin tikchiuaj ken Cristo noneki timelajkanemiskej itech Jehová niman san iTekiuajyo tikpaleuiskej (Juan 18:36). Uelis tikchiuaskej yejuin tla xtokalaktiaj ipan política. Yejuin achijtsin ouijtika pampa tekiuajkej kinekij matikinpaleuikan ika tlen tikijtouaj niman ika tlen tikchiuaj. Akin kinpaleuiyaj yejuin tekiuajkej, on xkuajli yolki kintlalilia “sen neskayotl” (Apoc. 13:​16, 17). Jehová xok kimita ken ikoneuan akin kipiyaj yejuin “neskayotl”, niman yejuamej xok uelis kipiyaskej se nemilistli tlen xkeman tlamis (Apoc. 14:​9, 10; 20:4). Kuakon, maski tekiuajkej texchiualtiskej matikinpaleuikan, maka matokauilikan. w22.05 10, 11 párrs. 12, 13

Tejuamej noijki uelis itlaj tomajmachtiskej. Tla tokojtiliaj kuajli tikchiuaskej totekiyo, uelis tikchiuaskej on okseki tekitl tlen sakin techmakaskej. Tokniuan akin tlapaleuiyaj ipan kaltin kampa noueyichiua toTajtsin ouelkej tlachijchiuaj pampa oksekimej tokniuan okinmachtijkej. Ipan yejuin tonaltin, tokniuan tlakamej niman siuamej nomajmachtiaj kenon tlayektlaliskej ipan kaltin kampa tikueyichiuaj toTajtsin. Jehová, “toueyiRey yejuan nemi nochipa” niman Jesús, “Rey impan nochimej reyes” kuelitaj matikinpaleuikan ijkuak kichiuaj se ueyi tekitl (1 Tim. 1:17; 6:15). Ika yejon, tiknekij chikauak titekitiskej niman itlaj tomajmachtiskej para tikueyichiuaskej Jehová (Juan 8:54). w22.04 24 párr. 7; 24 párr. 11

Salomón melak kipiaya tomin niman melak kuajli nemiya (1 Rey. 10:​7, 14, 15). San ika, Jesús xmás itlaj kinopiliaya nion xkipiaya ikal (Mat. 8:20). Maski ijkon, Salomón niman Jesús kuajli kitekitiltiayaj intomin tlen kipiayaj pampa Jehová kinmakaya tlamachilistli. Salomón okijto ika tomin techpaleuiya matokouilikan tlen noneki niman kemantika hasta ueli tijkouaj tlen tikuelitaj. Maski Salomón kipiaya miyek tomin, yejua itlaj okasikamat. ¿Tlenon? Yejua okijto: “Más kuajli nouiyan mitsixmatiskej ika kuajli timouika, xken tla miyek tikpiyas oro niman plata” (Prov. 22:1). Noijki okitak ika akin melak kipiyaj tomin xika inyojlo nemij (Ecl. 5:​10, 12). Noijki okijto ika xnoneki tiknemiliskej ika tomin uelis nochipa techpaleuis pampa, aman tikpiyaj, san ika, mostla xtikmatij (Prov. 23:​4, 5). w22.05 21 párrs. 4, 5

Ijkuak titlanemiliaj itech ken Jehová techteochiua aman, más kuajli iuan touikaj. Niman ijkuak titlanemiliskej itech ken Jehová techteochiuas ika tlayekapan, uelis tikneltokaskej ika nochi toyojlo ika ajsis se tonajli ijkuak uelis nochipa tiktekichiuiliskej. Nochi yejuin kichiuas más ika toyojlo matiktekichiuilikan Jehová. Jehová techmakixtis ijkuak kinpopolos akin kichiuaj tlen xkuajli. Kuajli tikmatstokej ika pampa Jehová “sen Dios yejuan kichiua tlen melajki”, xkitekauilis ika akin kichiuaj ken Satanás mauejkauikan manemikan (Is. 25:9). Jehová san kichiatika tonajli ijkuak techmakixtis niman tejuamej noijki san tikchiatokej tonajli ijkuak yejua techmakixtis. Chika tikchiaj yejon tonajli, matiknotsakan toTajtsin, matomachtikan iTlajtol niman matikchiuakan tlen ompa tiuelij, niman matitlanemilikan itech ken yejua yotechteochiuj. Tla tikchiuaj nochi yejuin, Jehová techpaleuis matitlaxikokan ika pakilistli ijkuak tiktekichiuiliskej. w22.11 13 párrs. 18, 19

Biblia xkiteneua kenon onoapolakti Timoteo, san ika, kuajli tikmatstokej ika Eunice, inan Timoteo, melak oyolpak ijkuak onoapolakti (Prov. 23:25). Eunice melak yolpaki pampa Timoteo kitlasojtla Jehová niman Jesucristo, yejua kita ika kuajli yokimachti itelpoch. Itajuan Timoteo xsa noijki ken tlaneltokayaj pampa itaj griego katka niman inan niman iabuela judías katkaj (Hech. 16:1). Ijkuak Eunice niman Loida opeuj kichiuaj ken Cristo, Timoteo yotelpochtiaka. San ika, itaj xkeman okinek kipatlas ireligión. Timoteo iueyi katka niman ueliskia kitlapejpenis tlenon kichiuas. Aman nanantin noijki melak kintlasojtlaj inchanejkauan niman nokojtiliaj kinpaleuiskej inkoneuan para noijki manouikakan iuan Jehová. Niman Jehová melak kuelita ijkuak kita kenon yejuamej nokojtiliaj kinmachtiskej inkoneuan (Prov. 1:​8, 9). Miyekej nanantin yokitakej kenon Jehová yokinpaleui makinmachtikan inkoneuan makitlasojtlakan niman makitekichiuilikan. w22.04 16, 17 párrs. 1-3

Sa achijtsin poliui ika Jehová “kintlalilis ipan inyojlo [nochi gobiernos] para kichiuaskej on tlen yejua kineki”. ¿Niman tlenon panos? On “majtlaktlimej reyes” noso gobiernos kimixnamikiskej nochi tlaneltokiltin xmelajkej niman kinpopoloskej (Apoc. 17:​1, 2, 12, 16). ¿Niman kenon tikmatij ika ipopoliuis Ueyixtika Babilonia? Uelis tiknankiliskej yejuin tla tikilnamikij kenon katka ueyikalpan Babilonia. Xakaj ueliya kalakiya ipan yejon ueyikalpan pampa kiyeualojtoya atentli Éufrates. Apocalipsis kijtoua ika tlaltikpakchanejkej akin kipaleuiyaj Ueyixtika Babilonia yeskiaj ken yejon atl tlen kiyeualojtoya ueyikalpan Babilonia (Apoc. 17:15). San ika, noijki kijtoua ika yejon “atl” uakiskia. ¿Tlenon kijtosneki? Kijtosneki ika tlaltikpakchanejkej xok kinpaleuiskiaj tlaneltokiltin xmelajkej (Apoc. 16:12). Yejuin teotlajtojli inochiujtika pampa miyekej yokiskej itech tlaneltokiltin xmelajkej niman oksekan onnopaleuiyaj. w22.07 5, 6 párrs. 14, 15

Ijkuak titetlapopoluiyaj, tikteititiaj ika tiktlasojkaitaj ika Jehová techiknelia. Ipan Biblia tikitaj ika Jesús okijto ika Jehová yeskia ken on tlakatl akin okitlapopolui itlakeual akin miyek kuikiliaya niman xueliya kitlaxtlauiliaya. San ika, akin okitlapopoluijkej xokikneli akin xmiyek kuikiliaya (Mat. 18:​23-35). ¿Tlenon techmachtisnekiya Jesús? Ika tla melak tiktlasojkaitaj ika Jehová melak techiknelia, kuakon tejuamej noijki titeikneliskej niman titetlapopoluiskej (Sal. 103:9). Yeuejkaui se Amatl Tekakistilijketl okijto ika maski miyekpa matitetlapopoluikan, xkeman uelis titetlapopoluiskej ijkon ken Jehová pampa “yejua sajnoye tetlapopoluiya niman teiknelia niman ueli ijkon kichiua pampa Cristo omik topampa”. Tla titetlapopoluiyaj, Jehová noijki techtlapopoluis pampa yejua kimiknelia akin noijki teikneliaj (Mat. 5:7). Jesús noijki ijkon okiteititi ijkuak okinmachti inomachtijkauan kenon noneki kichiuaskej teoyotl (Mat. 6:​14, 15). w22.06 10 párrs. 8, 9

Ijkuak Jesús ouajla ipan tlaltikpaktli ken se tlaltikpakchane, okiteititi kenon iTaj (Juan 14:9). Ika yejon, aman tejuamej itikixmatij Jehová niman ueli tiktlasojtlaj. Jesús noijki yotechpaleui pampa yotechmachti niman pampa kuajli kinyekantika tlanechikoltin. Noijki yotechmachti kenon tikyolpaktiskej Jehová. Niman tinochimej techpaleuiya imikilis Jesús. Pampa ijkuak oyoliuj, okitemakak iyesyotsin para matexchipauilikan “nochi totlajtlakoluan” (1 Juan 1:7). Aman yejua se ueyi Tekiuaj akin xkeman mikis. Sa achijtsin poliui ijkuak Jesús kikuatepaxos on “kouatl” (Gén. 3:15). Ijkuak kipopoloskej Satanás, nochimej tlaltikpakchanejkej akin melajkanemiskej itech Jehová melak yolpakiskej. Ika yejon, maka matosiaujkauakan. Kuajli matitlaneltokakan itech toTajtsin. Yejua “kintiochiuas on tlakamej ipan nochi naciones ipan in tlaltikpaktli”. w22.07 18 párr. 13; 19 párr. 19

Ijkuak tiknekiskej itlaj tikchiuaskej, maka matikilkauakan ika kemantika uelis itlaj nopatlas. San matiknemilikan tlen ipan onochiuj Pablo, ijkuak yejua oyaj Tesalónica. Maski kanaj kinekiya ompa nokauas, sekimej opeuj kitlauelitaj niman ononek oksekan yas (Hech. 17:​1-5, 10). Tla yejua ompa nokauaskia, kanaj san ipampa ueliskia itlaj kinchiuiliskiaj tokniuan. San ika, yejua okinek oksekan yas niman sakin san okontitlan Timoteo para makinyolchikauati tokniuan akin kemach yonoapolaktijkaj (1 Tes. 3:​1, 2). Uelis tikonnemiliskej kenon tokniuan akin chantiyaj Tesalónica melak oyolpajkej. Tlen ipan onochiuj Pablo ijkuak nemiya Tesalónica, miyek tlen techmachtia. Kanaj tiknekij itlaj tikchiuaskej ipan ikalpan Jehová, san ika, itlaj nopatla niman xok ueli tikchiuaj (Ecl. 9:11). Kuakon, ¿aman tlenon uelis tikchiuaskej? Uelis tiknemiliskej tlen kema uelis tikchiuaskej. w22.04 25, 26 párrs. 14, 15

Jehová melak techyolseuiya ijkuak techijlia tlen kualtsin kichiuas ika tlayekapan. Matikimitakan seki tlaxeloltin tlen techyolseuiyaj. Biblia techijlia ika “xonkaj itlaj nion xakaj uelis techxelos itech itetlajsojtlalis Dios” (Rom. 8:​38, 39). Noijki kijtoua ika “toTEKO nisiu nemi iminuan on yejuan kinotsaj”, yejuin kijtosneki ika Jehová kinkaki toteoyouan (Sal. 145:18). Jehová techijlia ika tla itech titlaneltokaj, uelis san tlenon tikxikoskej niman hasta uelis tiyolpakiskej ijkuak titlajyouijtoskej (1 Cor. 10:13; Sant. 1:2). Noijki, iTlajtol toTajtsin techilnamiktia ika nochi tlen tikixnamiktokej ikipopolos Jehová niman ika yejua techmakas se nemilistli tlen xkeman tlamis (2 Cor. 4:​16-18). Jehová noijki yotechijli ika kipopolos Satanás niman nochimej akin kipaleuiyaj (Sal. 37:10). ¿Yotikintsontekonsalo textos tlen uelis mitspaleuiskej ijkuak tikixnamikis tlen ouijtika? w22.08 11 párr. 11

¿Niman tla tiknemiliaj ika xuelis nochipa tikintlakamatiskej itlanauatiluan Jehová? Jehová kijtoua ika tomelajkayo uelis yes ken on “iakoxonajlo on mar” (Is. 48:18). Matiknemilikan ika tinemij itenko mar niman tikitstokej kenon kualtsin uajkoxoni mar. ¿Xmelak ika xtiknemiliaj ika ajsis se tonajli ijkuak xok koxonis mar? Ka, pampa tikmatstokej ika nochipa koxontos. Ijkon ken mar nochipa koxontika, ¿tlenon uelis tikchiuaskej tla tiknekij nochipa tikchiuaskej tlen melajki? Ijkuak tiknemiliskej itlaj tikchiuaskej, kachtopa matiknemilikan tlen Jehová kineki matikchiuakan niman sakin ijkon matikchiuakan. Maski melak ouijtika tlen tikixnamikiskej, Jehová nochipa techpaleuis niman ijkon mojmostla matikintlakamatikan itlanauatiluan (Is. 40:​29-31). w22.08 30 párrs. 15-17

Ijkuak tlamis 1,000 xiuitl kimakauaskej niman kinekis kinkajkayauas nochimej tlaltikpakchanejkej akin xok tlajtlakolejkej yeskej. Ijkuakon, akin xok kipiyaskej tlajtlakojli nonekis kiteititiskej tla yemelak kinekij ika san iTekiuajyo toTajtsin makinyekana (Apoc. 20:​8-10). Akin melajkanemiskej niman kipaleuiskej iTekiuajyo toTajtsin, xkinpopoloskej intoka ipan amoxtli tlen kijtoua akinomej kipiyaskej nemilistli. Sekimej yeskej ken Adán niman Eva, xkinekiskej kipaleuiskej iTekiuajyo Jehová. ¿Tlenon inpan nochiuas? Apocalipsis 20:15 technankilia, ompa kijtoua: “On yejuan xtlajkuilolnestikatka imintoka ipan on amamoxtli yejuan kijtoua akinomej kipiyaj yenkuik nemilistli para nochipa, ompa okominxinijkej ipan on tliko”. Kema, nochimej akin xkitlakamatiskej Jehová kinpopoloskej. San ika, más miyekej nemiskej akin melajkanemiskej itech Jehová niman makisaskej. w22.09 23, 24 párrs. 15, 16

Ipan kachtopa siglo, sekimej tokniuan kijtouayaj ika tla yakaj akin xjudío katka kinekiya nochiuas tokniuj, nonekiya kinochiuilis circuncisión. Kanaj yejon tokniuan kinekiyaj ijkon manochiua pampa xkinekiyaj makintejteneuakan akin xnomachtiayaj (Gál. 6:12). Apóstol Pablo xkuelitaya tlen kichiuayaj tokniuan, san ika, noijki xokimijli makichiuakan tlen yejua kinemiliaya. Yejua okimijli oksekimej apóstoles niman tlayekankej akin nemiyaj Jerusalén tlen panotoya (Hech. 15:2). Tlen okichiuj okinpaleui tokniuan mayolseujtokan niman mayolpakikan (Hech. 15:​30, 31). Tla kemantika xtotlajtolnamikij imiuan tokniuan, matikimijlikan tokniuan tlayekankej, akin Jehová yokintlali para makitlajpiyakan tlanechikojli. Toamatlajkuiloluan niman tlen kijtoua ikalpan toTajtsin nochipa nokixtia itech Biblia. Tla tikchiuaj tlen ikalpan Jehová technauatia niman xsan tlen tejuamej tiknemiliaj, titlapaleuiskej maonia yolseuilistli ipan tlanechikojli. w22.08 22, 23 párrs. 8, 9

Tinochimej kemantika tiknekij tikijliskej se toamigo kenon tomachiliaj. Kemantika kanaj ouijtika tikitaj tikteijliskej pampa xtomatij tikimijliskej oksekimej kenon tomachiliaj. Niman tla kemantika otikijlikej se toamigo kenon tomachiliaj niman sakin otikmatkej ika okiteijli, kanaj melak otoyolkokojkej. San ika, melak kuajli tomachiliaj ijkuak tikmatij ika tikpiyaj se toamigo akin xkeman kiteijlijtinemi tlen tikijliaj. Ijkuak tlayekankej xkiteijliaj tlen panotika ipan tlanechikojli, tokniuan intech tlaneltokaj niman kimitaj ken “kampa niyanalo ijkuak chikauak ajaka” (Is. 32:2). Tejuamej tikmatstokej ika uelis san tlenon tikimijliskej tlayekankej pampa yejuamej xtlaj kiteijliskej. Noijki, xtikinchiualtiaj matechijlikan itlaj tlen xnoneki kijtoskej. Niman melak tikintlasojkamachiliaj insiuauan tlayekankej pampa yejuamej noijki xkinchiualtiaj inueuentsitsinuan makimijlikan tlen xnoneki kijtoskej. Melak kualtsin ika tlayekankej xkimijliaj insiuauan tlen inpan panotok sekimej tokniuan. w22.09 11 párrs. 10, 11

Kuajli tikmatstokej ika Jehová kinmakixtis itekipanojkauan akin itech melajkanemiskej ipan ueyi tlajyouilistli (Mat. 24:21; Dan. 12:1). Ijkon kichiuas ijkuak Gog de Magog, noso ijkuak nosentlaliskej miyek países, kimixnamikiskej itekipanojkauan Jehová akin nemij ipan nochi tlaltikpaktli. Maski tla ipan yejuin grupo tlapaleuiskiaj nochi yejon 193 países noso gobiernos akin nemij ipan Naciones Unidas, Jehová niman iiluikaktekitkauan kintlaniskej. Jehová noijki techijlia: “Miyekej naciones nechixmatiskej. Nikintitis noueyipoder niman noyekchipaualis, niman yejuamej kimatiskej ika nejua niDios” (Ezeq. 38:​14-16, 23). Ijkuak Gog kimixnamikis itekipanojkauan Jehová, peuas sa ika tlami guerra: Armagedón. Niman ijkuakon, Jehová kinpopolos “nochimej on reyes ipan on tlaltikpaktli” (Apoc. 16:​14, 16; 19:​19-21). San ika, “yejuan melajkanemij niman yolchipajkej, nochipa nemiskej ipan in tlajli yejuan toyaxka” (Prov. 2:21). w22.10 16, 17 párrs. 16, 17

Tejuamej xtikmatij tleka se tokniuj itlaj okichiuj pampa xtikmatij tlenon kipiya ipan iyojlo, san “toTEKO yejua kixtlaloua tline on tlakatl ijkon okichiu” (Prov. 16:2). Jehová nochimej kintlasojtla maski san kanon maualeuakan niman yejua technauatia nochimej matikintlasojtlakan (2 Cor. 6:13). Niman tejuamej yejon tlen tiknekij tikchiuaskej, tikintlasojtlaskej nochimej tokniuan niman xsan tikinmelajkatlalijtoskej. Tejuamej noijki xtikintejteneuaj nion xtikinmelajkatlaliaj akin xtokniuan. Tejuamej xtikinmelajkatlaliaj tochanejkauan akin xnomachtiaj nion xtiknemiliaj ika xkeman uelis nochiuaskej iteixpantijkauan Jehová. Tla ijkon tikchiuaskiaj, toueyimatstoskiaj niman tikteititijtoskiaj ika tiknemiliaj ika tejuamej más tiyolmelajkej xijkon ken oksekimej. Matikilnamikikan ika Jehová ok kinkauilijtika nochimej manoyolkuepakan (Hech. 17:30). Nochipa matikilnamikikan ika Jehová xkimita yolmelajkej akin kinemiliaj ika yejuamej más yolmelajkej xijkon ken oksekimej. Tla tejuamej tiktlasojtlaj imelajkayo Jehová, tiyolpakiskej niman oksekimej kitaskej ika tikchiuaj tlen kuajli. Niman yejon kichiuas más makitlasojtlakan toTajtsin niman tejuamej noijki más techtlasojtlaskej. w22.08 31 párrs. 20-22

Xtechmojkatlachialtia ika sekimej techtlaueltokaj ijkuak titenojnotsaj, niman kanaj ika tlayekapan más techtlaueltokaskej (Dan. 11:44; 2 Tim. 3:12; Apoc. 16:21). San ika, kuajli tikmatstokej ika Jehová techpaleuis nochipa matitenojnotsakan. ¿Tleka ijkon tikijtouaj? Pampa yejua nochipa kinpaleuiani itekipanojkauan makichiuakan tlen kinnauatia, maski melak ouijtika tlen kimijlia makichiuakan. Matontlanemilikan itech teotlajtoketl Ezequiel, akin Jehová melak okipaleui ijkuak okinnojnots judíos akin nemiyaj Babilonia. ¿Kenomej katkaj judíos akin Ezequiel nonekiya kinnojnotsas? Jehová okijto ika yejuamej “yoltechikajkej” katkaj, xkinekiyaj tlakakiskej niman xkitlakamatiyaj. Yejuamej melak xkuajkualtin katkaj pampa Jehová okijli Ezequiel ika kentla nemiskia itsajlan uitstli noso kentla chantiskia intsajlan kolomej. Ika yejon, Jehová miyekpa okijli Ezequiel: “Maka xmomojti” (Ezeq. 2:​3-6). Ezequiel ouel okinnojnots judíos pampa 1) Jehová yejua akin okititlan, 2) iespíritu santo Jehová okipaleui, niman 3) itlajtoluan Jehová okichikauili itlaneltok. w22.11 2 párrs. 1, 2

Nochi tlen Jehová okichijchiuj ipan tlaltikpaktli, mikiskia, san tlaltikpakchanejkej xmikiskiaj pampa Jehová okijto ika tlaltikpakchanejkej ueliskiaj nochipa nemiskej. Jehová noijki otexchijchiuj para matiknekikan nochipa tinemiskej. Ken kijtoua Biblia, toTajtsin “okitlalilij ipan iyojlo nochi tlakatl ika xkaman mikiskej” (Ecl. 3:11). Ika yejon, xtiknekij timikiskej (1 Cor. 15:26). Matitlanemilikan itech yejuin. Ijkuak melak tikualoj, ¿san ijkon tokauaj niman san tikchiatokej matimikikan? Ka, tiauej kampa tepajtijketl niman tiktolouaj noso tikonij tlen yejua techmaka para tipajtiskej. Ijkon tikchiuaj pampa xtiknekij timikiskej. Niman ijkuak miki yakaj akin melak tiktlasojtlaj, maski tla iueyi noso xiueyi, melak uejkaui toyolkokojtokej (Juan 11:​32, 33). ToTajtsin melak techtlasojtla niman kineki nochipa matinemikan, ika yejon, otexchijchiuj para matiuelikan niman matiknekikan nochipa tinemiskej. w22.12 3 párr. 5; 4 párr. 7

Miyekej tokniuan kanaj kualoj, nomojtiaj noso inselti nomachiliaj ipan yejuin itlamiyan tonaltin. Se ueyi kokolistli uelis kichiuas maka melak matikinnisiuikan tokniuan maski imiuan tinemij. San ika, maka matijkauilikan ika yejon makichiua maka matikinnotsakan. Matontlanemilikan itech apóstol Juan. Yejua okijto ika kinekiya kitas iamigo Gayo (3 Juan 13, 14). San ika, okijto ika se tiempo xueliskia kitas. Kuakon okititlanili se carta. Tla xueliskia tikomintaskej tokniuan, uelis tiktejtemoskej kenon imiuan tonotsaskej. Ijkuak tikominnotsaj tokniuan, xsan toselti tomachiliaj niman más ika toyojlo tinemij. ¿Niman tlenon uelis tikchiuaskej tla melak tajmanaj? Matitlajtokan imiuan tlayekankej niman matikinkauilikan matechyolseuikan (Is. 32:​1, 2). w22.12 17, 18 párrs. 6, 7

Biblia kijtoua ika José okikxisalojkej niman okikechsalojkej seki tonaltin (Sal. 105:​17, 18). Aman ipan nochiujtoya tlen más ouijtika: xok katka se tlakeuajli akin tlayekanaya, aman tsauktoya. ¿Yotikixnamijkaj itlaj tlen xkuajli niman otikitakej ika xnoyektlaliaya maski miyekpa tiknotsayaj Jehová? Yejon ueliskia panos. Tinemij kampa Satanás tlayekana, niman Jehová kitekauilia topan manochiua tlen xkuajli (1 Juan 5:19). San ika, uelis kuajli tikmatstoskej ika toTajtsin kita nochi tlen topan nochiua niman kinektika techpaleuis (Mat. 10:​29-31; 1 Ped. 5:​6, 7). Noijki yotechijli: “Xkaman nimitskauas nion nimitstlalkauis” (Heb. 13:5). Jehová uelis techpaleuis matitlaxikokan maski tlen tikixnamikij ueliskia nesis ika xuelis noyektlalis. w23.01 15, 16 párrs. 7, 8

Biblia techijlia ika toTajtsin xkeman techkauas ijkuak tikchiuaskej se tlajtlakojli. Israelitas miyekpa tlajtlakouayaj ixpan Jehová, san ika, nochipa ijkuak yejuamej yemelak noyolkuepayaj, Jehová kintlapopoluiaya. Tokniuan ipan kachtopa siglo noijki kimatstoyaj ika Jehová melak kintlasojtlaya. Jehová okichiuj ika apóstol Pablo makimijli tokniuan akin nemiyaj ipan kachtopa siglo makitlapopoluikan niman makiyolseuikan se tlakatl akin yonoyolkuepka pampa okichiujka itlaj tlen melak xkuajli (1 Cor. 5:​1-5; 2 Cor. 2:​6, 7). Melak techmojkatlachialtia ika Jehová xkintlalkauiaya itekipanojkauan ijkuak kichiuayaj tlen xkuajli, yej ika tlasojtlalistli kinpaleuiaya, kinyektlaliaya niman kimijliaya itech mauajnokuepakan. Niman kijtoua ika aman noijki ijkon kichiuas tla yakaj kichiua se tlajtlakojli niman noyolkuepa (Sant. 4:​8-10). Biblia techititia imelajkayo toTajtsin, itlamachilis niman itlasojtlalis. Noijki, Biblia kiteititia ika Jehová kineki matikixmatikan niman iuan matouikakan. w23.02 7 párrs. 16, 17

¿Tleka tikuelitaj tikmatiskej tlen panotika ipan tlaltikpaktli niman ijkon tikitaskej tla nochiujtika se teotlajtojli? Pampa Jesús okiteneuj tlenon panoskia ijkuak sa achijtsin poliuiskia para kipopoloskej nochi tlen Satanás kiyekantika ipan yejuin tlaltikpaktli (Mat. 24:​3-14). Apóstol Pedro okijto ika noneki tikitaskej kenon inochiujtokej teotlajtoltin itech Biblia niman ijkon machikaujto totlaneltok (2 Ped. 1:​20, 21). Yejua techpaleuiya kuajli matitlanemilikan ijkuak tomachtiaj teotlajtoltin tlen ualeuaj ipan Biblia. Kijtoua ika noneki san tikitstoskej kemanon yejkos “tonajli ijkuak Dios kitlajtlakolmakas nochi tlaltikpaktli” (2 Ped. 3:​11-13). ¿Tleka ijkon okijto? Xpampa tiknekij tikmatiskej “on tonajli niman on hora” ijkuak yejkos Armagedón, yejua ijkon okijto pampa tiknekij kuajli tiktekitiltiskej totiempo para “titouikaskej ikan yolchipaualistli niman yolkuajlilistli” (Mat. 24:36; Luc. 12:40). Tiknekij tikchiuaskej tlen kuajli niman tiknekij tikitaskej tla tiktekichiuiliaj Jehová pampa tiktlasojtlaj. ¿Tlenon techpaleuis ijkon matikchiuakan? Tla sa no tejuamej toitaj. w23.02 16 párrs. 4, 6

Onka seki tlemach tlen “oksekimej borregos” noneki kichiuaskej tla kinekij nochipa nemiskej ipan Xochitlalpan. Akin titeuamej intech on “oksekimej borregos” noneki tikteititiskej ika tiktlasojkamatij tlen Jesús okichiuj topampa. Uelis ijkon tikchiuaskej tla tikinpaleuiyaj tokniuan tlapejpeniltin. Jesús okijto ika yejua kitaskia akinomej kinpaleuiyaj ikniuan tlapejpeniltin niman ijkon kimatis akinomej on “oksekimej borregos” (Mat. 25:​31-40). Uelis tikinpaleuiskej ikniuan Cristo tla chikauak titenojnotsaj niman tla tikinpaleuiyaj oksekimej manochiuakan inomachtijkauan Cristo (Mat. 28:​18-20). Xnoneki tikchiaskej ika tlaltikpaktli manokuepa se xochitlalpan para tikchiuaskej tlen Jehová kuelita. Desde aman uelis tokojtiliskej xtitekajkayauaskej, tikchiuaskej tlen kuajli niman tinemiskej ken Jehová kuelita. Niman noijki noneki timelajkanemiskej itech Jehová, xtikajkayauaskej toueuentsin noso tosiuauj niman xtikintlalkauiskej tokniuan. Tla desde aman tikintlakamatij itlanauatiluan Jehová maski tinemij kampa nochiua tlen xkuajli, xok ouijtika tikmachiliskej tiktlakamatiskej Jehová ipan Xochitlalpan. Noijki uelis itlaj tomajmachtiskej niman tokojtiliskej tikinpiyaskej kualneskayomej tlen techpaleuiskej ijkuak tichantiskej ipan Xochitlalpan. w22.12 11, 12 párrs. 14-16

Melak tiyolpakij ika Jesús yejua toTekiuaj pampa san yejua kinamiki matechyekana. Jehová kuajli okimajmachti niman okitekitlali para matechyekana (Is. 50:​4, 5). Noijki matitlanemilikan itech kenon Jesús sajnoye yotechtlasojtlak (Juan 13:1). Jesús toTekiuaj, ika yejon, kinamiki matiktlasojtlakan. Yejua okijto ika tlaltikpakchanejkej akin yemelak kitlasojtlaj, akin yejua kimita ken iamigos, kintlakamatij itlanauatiluan. Ijkuak ijkon kichiuaj, kiteititiaj ika kitlasojtlaj (Juan 14:15; 15:​14, 15). ¡San xkonnemili, tejuamej uelis kuajli touikaskej iuan iKonetsin Jehová! Tikmatstok ika Jesús yolyemanki niman kichiua ijkon ken iTaj. Yotiuel ika okintlakualti akin xtlaj kipiayaj tlen kikuaskej, okinyolseui akin najmantoyaj niman hasta okinpajti akin kualouayaj (Mat. 14:​14-21). Noijki yotikitak ika yejua kiyekantika tlanechikojli ipan yejuin tonaltin (Mat. 23:10). Niman tikmatstok ika kichiuas miyek tlen kualtsin ika tlayekapan pampa yejua Tekiuaj itech iTekiuajyo toTajtsin. ¿Kenon uelis tikititis Jesús ika tiktlasojtla? Tla tikchiua ijkon ken yejua. Ika yejon, kachtopa noneki timosentemakas itech Jehová niman timoapolaktis, ijkon ken yejua okichiuj. w23.03 4 párrs. 8, 10

Jehová xsan okichijchiuj tlen onka iluikak, noijki okichijchiuj nochi tlen onka ipan tlaltikpaktli niman ipan mar, niman tla tikitaj nochi yejon, melak miyek tiueliskej (Sal. 104:​24, 25). Noijki xkonnemili kenon otexchijchiuj toTajtsin. Yejua otexchijchiuj para matiuelikan matitlauelitakan ipan tlaltikpaktli. Noijki otexchijchiuj para matiuelikan tikitaskej, tijkakiskej, tikmatiskej, tikijnekuiskej noso tikitskiskej tlen okichijchiuj niman ijkon matechyolpakti. Biblia noijki techijlia ika melak noneki tikitaskej tlen toTajtsin okichijchiuj pampa ijkon uelis tikitaskej ikualneskayouan Jehová (Rom. 1:20). Ijkuak tikitaj ken kualtsin otlachijchiuj toTajtsin, tikitaj ika melak tlamachilise. Noijki nesi ika toTajtsin techtlasojtla pampa tlatlamantik onka tlen tikuaskej. Ijkuak titlanemiliaj itech tlen okichijchiuj toTajtsin niman tikitaj ikualneskayouan, techpaleuiya más matikixmatikan niman matiknekikan más itech tonisiuiskej. w23.03 16 párrs. 4, 5

Yejuin tlaltikpaktli más ijtlakaujtias, niman más ouijtika tikitaskej titlaneltokaskej itech Biblia. Kanaj tlaltikpakchanejkej techijliskej ika tlen kijtoua Biblia xmelauak niman ika Jehová xokitlali “tekitketl” yolmelauak niman tlamachilise para makiyekana ikalpan. San ika, tla tikneltokaj ika iTlajtol toTajtsin kijtoua tlen melauak, xtechkajkayauaskej. Noijki tiknektoskej nochipa tiktlakamatiskej itlanauatiluan Jehová (Sal. 119:112). Xtipinauiskej tikinnojnotsaskej oksekimej itech Biblia niman tikimijliskej makichiuakan tlen ompa uajlauj (Sal. 119:46). Noijki, titlaxikoskej “ikan miyek ijyouilistli niman pakilistli” ijkuak tikixnamikiskej tlen melak ouijtika, ken ijkuak techtlaueltokaskej (Col. 1:11; Sal. 119:​143, 157). Tlen yotiuelkej ipan iTlajtoltsin techpaleuiya matiyolseujtokan niman itech matitlaneltokakan. Noijki techititia kenon uelis kuajli tinemiskej ipan yejuin tlaltikpaktli kampa miyekej xika inyojlo nemij pampa xkimatij tlenon kichiuaskej. Biblia techijlia ika melak kualtsin tinemiskej ijkuak techyekanas iTekiuajyo toTajtsin. w23.01 7 párrs. 16, 17

Ijkuak sa achijtsin poliuiya para kimiktiskej Jesús, yejua okinots iTaj niman okitlajtlanili makinpaleui inomachtijkauan niman makintlajpiya itech Satanás (Juan 17:15). Jesús okimititi iapóstoles ika melak kintlasojtlaya pampa maski kimatstoya ika ikimiktiskiaj, onajman inpampa. Ijkon ken Jesús, tejuamej noijki tikchiuaj teoyotl inpampa tokniuan niman xsan titlanemiliaj itech tlen tejuamej techpoloua. Ijkuak ijkon tikchiuaj, tikteititiaj ika yemelak tikintlasojtlaj tokniuan ijkon ken otechnauati Jesús. Niman noijki tikititiaj Jehová ika melak tikintlasojtlaj tokniuan. Niman tikmatstokej ika ijkuak tikchiuaj teoyotl inpampa tokniuan, Jehová kema kinpaleuiya pampa Biblia kijtoua: “Ioración on yolmelajki tlakatl yejuan ikan nochi iyojlo kichiua, sanoyej kipiya poder” (Sant. 5:16). Tokniuan kixnamikij miyek tlen ouijtika, ika yejon, noneki matikchiuakan teoyotl inpampa. w22.07 23, 24 párrs. 13-15