Julio

Jehová melak techtlasojtla. Ika yejon, okichiuj matiuelikan matitlajtokan. Maski Jehová kinekiya nochimej kuajli matlajtokan, xijkon opanok. Satanás xkuajli otlajto pampa okikajkayauj Eva, niman pampa okikajkayaujkej Eva tinochimej titlajtlakolejkej (Gén. 3:​1-4). Adán noijki xkuajli otlajto ijkuak okitlajtlakolti Eva niman Jehová (Gén. 3:12). Caín noijki ijkon okichiuj pampa xokijli Jehová ika okimikti ikniuj, Abel (Gén. 4:9). Aman tikitaj kenon ipan escuelas, kampa titekitij niman miyekej políticos teuijuikaltiaj. Noijki ouijtika tiknextis se película kampa xteuijuikaltiaj. Nochiuiyan tijkakij kenon miyekej teuijuikaltiaj, niman tla xtotlajpiyaj noijki uelis peuas ijkon titlajtoskej. San ika, akin tikchiuaj ken Cristo xtiteuijuikaltiaj pampa tiknekij tikyolpaktiskej Jehová. Tejuamej nochipa tiknekij kuajli titlajtoskej pampa tiknekij tikueyichiuaskej Jehová. w22.04 4, 5 párrs. 1-3

Maski Jesús xkipiaya miyek tlemach, kemantika noijki kuajli notlakualtiaya niman tlaoniya (Luc. 19:​2, 6, 7). Biblia kijtoua ika sejpatsin, san ika atl okichijchiuj vino tlen más patioj. Yejon kachtopa milagro tlen okichiuj (Juan 2:​10, 11). Noijki, ijkuak okimiktijkej, kipiaya se tlakentli tlen melak patioj (Juan 19:​23, 24). San ika, Jesús xkeman okinek melak notomintis. Noijki, Jesús otemachti ika tla kachtopa tiktekichiuiliaj Jehová, yejua techmakas tlen ika topanoltiskej (Mat. 6:​31-33). Miyekej tokniuan tlakamej niman siuamej melak yokinpaleui. Matikitakan tlen okijto se tokniuj akin itoka Daniel. Yejua kijtoua: “Ijkuak nitelpochkonetl katka, oniktlapejpeni chikauak niktekichiuilis Jehová”. Daniel xokinek notomintis, yejua yej okinek más tekitis ipan ikalpan Jehová. Kemantika kominpaleuiya tokniuan kampa tlaixpoliui niman noijki tekiti Betel. Daniel noijki okijto: “Maski melak ninotomintiskia, xueliskia niyolpakis ijkon ken aman pampa Jehová melak yonechteochiuj”. w22.05 21, 22 párrs. 6, 7

Tla mojmostla tomachtiaj Biblia niman toamatlajkuiloluan, tikteititiskej ika melak tiktlasojtlaj tlen melauak. Maski tla yotiuejkaujkej noso xtiuejkauij ipan ikalpan Jehová, nochipa onka tlen uelis tomachtiskej. Noneki tokojtiliskej para tomachtiskej, niman ijkuak ijkon tikchiuaj, melak tiyolpakij. Xtinochimej tikuelitaj titlaamapouaskej niman tomachtiskej, san ika, Jehová techijlia matomachtikan pampa kineki más matikasikamatikan tlen melauak (Prov. 2:​4-6). Tla tejuamej tokojtiliaj tomachtiskej, melak miyek tlen tiueliskej. Tokniuj Corey kijtoua ika ijkuak kiamapoua iBiblia, noteltia ipan se tlaxelojli niman itech tlanemilia. Yejua kijtoua: “Nikinamapoua notas, nikintejtemoua amatlajkuiloltin tlen ompa noteneuaj niman más ninomachtia yejon tlaxelojli. […] Yonikitak ika ijkuak ijkon nikchiua, nechpaleuiya más maniueli”. Tla tejuamej tokojtiliaj tikxeloskej tiempo niman kuajli tomachtiskej Biblia, tikteititiskej ika tikpatiojkaitaj tlen melauak (Sal. 1:​1-3). w22.08 17 párr. 13; 18, 19 párrs. 15, 16

Ijkuak nemiya ipan tlaltikpaktli, okiteneuj seki tlen toTajtsin okichijchiuj niman ijkon kinmachtis inomachtijkauan itech iTaj. San seki matikimitakan. Jehová kimititia nochimej tlaltikpakchanejkej ika kintlasojtla. Ijkuak Jesús okitemakak Tlamachtijli ipan Tepetl, okinteneuili inomachtijkauan itlaj tlen miyekej xmás itech tlanemiliaj: tonaltsintli niman kiyaujtli. Yejuin ome tlemach melak noneki maonia para uelis tinemiskej. Jehová ueliskia kichiuas ika akin xkitekichiuiliaj maka inpan matona niman maka inpan makiyaui. San ika, yejua melak tetlasojtlani, ika yejon, nochimej kinmaka yejuin tetlayokoliltin (Mat. 5:​43-45). Jesús okiteneuj tonaltsintli niman kiyaujtli pampa kinekiya techmachtis ika Jehová kineki matikintlasojtlakan nochimej tlaltikpakchanejkej. Ijkuak tikitaskej kenon kualtsin kalaki tonaltsintli noso kenon melak kualtsin tlaseseya ijkuak kiyaui, matitlanemilikan itech kenon Jehová melak tetlasojtla niman xtechikoita. Tlen kichiua Jehová techpaleuis matiknekikan tikimititiskej nochimej tlaltikpakchanejkej ika tikintlasojtlaj. ¿Niman kenon uelis tikimititiskej ika tikintlasojtlaj? Tla tikinnojnotsaj. w23.03 17 párrs. 9, 10

¿Tlenon yejuin tlen apóstol Juan okimojkatlachialti? Se siuatl akin yeuatiaya ipan se xkuajli yolki. Yejuin siuatl se “tlakapapatlaketl”, niman noixmati ken “Ueyixtikaj Babilonia”. Niman yejua noteka imiuan “on reyes yejuan nemij ipan in tlaltikpaktli” (Apoc. 17:​1-5). ¿Akinon kinneskayotia “Ueyixtikaj Babilonia”? Yejuin siuatl xkinneskayotia políticos pampa Apocalipsis kijtoua ika noteka imiuan “on reyes yejuan nemij ipan in tlaltikpaktli” (Apoc. 18:9). Noijki kijtoua ika yejua yeuatiuj ipan on xkuajli yolki noso gobiernos, yejon kijtosneki ika kiyejyekoua kinyekanas. Nion xkinneskayotia “on tlasemankej yejuan nemij ipan in tlaltikpaktli” pampa Apocalipsis hasta sakin kinteneua (Apoc. 18:​11, 15, 16). Yeuejkaui, akin chantiyaj Babilonia melak kinueyichiuayaj okseki tajtsitsintin. Kuakon, “Ueyixtikaj Babilonia” kinneskayotia nochi tlaneltokiltin xmelajkej (Apoc. 17:​5, 18). w22.05 11 párrs. 14-16

Se nantli uelis notlajtoltis tla ikoneuan kinekiskej kitekichiuiliskej Jehová. Sekimej nanantin más ouijtika kitaj kinmachtiskej inkoneuan pampa xkipiyaj inueuentsin noso inueuentsin xkitekichiuilia Jehová. Aman tajtin noijki kinekiskiaj ika inkoneuan makitlasojtlakan niman makitekichiuilikan Jehová. San ika, yejuin uelis ouijtika kitaskej. Tla tejua ijkon mopan nochiua, maka xmajmana pampa Jehová uelis mitspaleuis. Xkintlajtolti oksekimej tajtin tlenon kichiuaj ijkuak nomachtiaj ken familia (Prov. 11:14). Noijki xtlajtlanili Jehová mamitspaleui kuajli xkita kenon uelis timonojnotsas imiuan mokoneuan niman ijkon tikmatis tlenon kinemiliaj niman kenon nomachiliaj (Prov. 20:5). w22.04 17 párrs. 4, 7; 18 párr. 9

Uelis tiktlasojtlaskej Jehová tla tikixmatij iKoneuj. ¿Tleka? Pampa yejua kichiua ijkon ken iTaj (Heb. 1:3). Niman tla tejua tikinamapoua on naui Evangelios tlen uajlauej ipan Biblia, mitspaleuis kuajli xkixmati Jesús. ¿Tejua mojmostla tikamapoua moBiblia? Tla ka, uelis aman tipeuas. Xkita kenon katka Jesús ijkuak tikamapouas ipan Evangelios tlen okichiuj niman tlen okijto. Yejua nochimej kuajli kinnotsaya, ika yejon, miyekej kinisiuiayaj. Yejua noijki hasta kinnapalouaya kokonej (Mar. 10:​13-16). Noijki, inomachtijkauan kuajli nomachiliayaj ijkuak iuan nemiyaj; ika yejon, ueliyaj kijliayaj nochi tlen kimachiliayaj (Mat. 16:22). Jesús ijkon katka pampa okinokixti iTajtsin Jehová. Jehová kinektika matiknotsakan, ika yejon, tikijliaj nochi tlen tikmachiliaj, niman kuajli tikmatstokej ika yejua xtechtejteneuas. Yejua melak techtlasojtla niman kineki techpaleuis (1 Ped. 5:7). w22.08 3 párrs. 4, 5

Pampa Jehová otexchijchiuj, yejua melak kuajli techixmatstika (Sal. 139:​15-17). Jehová noijki kimatstok ika tikpiyaj tlajtlakojli tlen Adán niman Eva otechpanoltilijkej, niman kimatstok kenon techijtlakoua yejon tlajtlakojli. Niman xsan yejon, yejua noijki kita nochi tlen xkuajli topan nochiua niman pampa yejua kitstika nochi tlen topan nochiua, techiknelia (Sal. 78:39; 103:​13, 14). Jehová kuajli kimatstika ika pampa Adán otlajtlako, tejuamej noijki titlajtlakouaj niman timikij (Rom. 5:12). Niman kimatstika ika sa no tejuamej xueliskia tomakixtiskej itech yejon tlajtlakojli niman mikilistli (Sal. 49:​7-9). Ika yejon, yejua otechikneli niman okinek techmakixtis. Ipan Juan 3:16 kijtoua: “Dios sanoyej okintlajsojtlak on tlaltikpaktlakamej, hasta okitemakak isenteKonetsin para nochi on akin kineltokas xpoliuis, yej kipiyas nemilistli para nochipa”. Jehová okiteititi ika kinektok techtlapopoluis pampa hasta okitemakak isenteKonetsin para mamiki topampa (Mat. 20:28; Rom. 5:19). w22.06 3 párrs. 5, 6

Jehová kuajli okijto ika tla titetlapopoluiyaj, yejua noijki techtlapopoluis. Yejuin itlaj tlen noijki okimachti Job. Yejua melak okinxiko Elifaz, Bildad niman Zofar akin san tlemach okijlikej niman melak okiyolkokojkej. San ika, Jehová okinauati makichiua teoyotl inpampa. Niman ijkuak Job ijkon okichiuj, Jehová melak okiteochiuj (Job 42:​8-10). Tla san tikualantokej, sa no tejuamej toijtlakouaj. Tla san tikualantokej, kentla tikechpanojtiaskiaj totlauel niman matikilnamikikan ika Jehová xkineki matisiauikan (Efes. 4:​31, 32). Ipan Salmo 37:8 Jehová techijlia: “Maka xkuajkualani, xkaua on tlauejli”. Tla tikchiuaj tlen Jehová techijlia, techpaleuis. Pampa tla san tikualantokej techkualotlas niman kijtlakos totlamachilis (Prov. 14:30). Tla san tiktlauelitstokej yakaj kentla topajuiskiaj: sa no tejuamej toijtlakojtoskiaj. Kuakon, ijkuak tikintlapopoluiyaj oksekimej sa no tejuamej topaleuiyaj. Noijki, tiyolseuij niman ika toyojlo tiktekichiuiliaj Jehová. w22.06 10 párrs. 9, 10

Tlen tikchiaj ika tlayekapan yeskia kentla se casco tlen kitlajpiya totlamachilis niman techpaleuiya maka sa no tejuamej matoyolpaktikan pampa yejon ueliskia kichiuas maka sa matouikakan iuan Jehová (1 Cor. 15:​33, 34). Tocasco, noso tlen tikchiaj ika tlayekapan, noijki techpaleuiya maka matiknemilikan ika xkeman uelis tikyolpaktiskej Jehová. Matikilnamikikan ika Elifaz, se akin okiyolkoko Job, okijli yejuin: “Xnemi nion se tlakatl yejuan chipauak”. Niman sakin okijto: “Dios xkitlalia iyojlo nion intech iángeles, niman nion on cielo kita xchipauak” (Job 15:​14, 15). Tlen okijto Elifaz xmelauak. Matikilnamikikan ika Satanás yejua akin kineki ijkon matitlanemilikan. Yejua kimatstok ika tla peua ijkon titlanemiliaj, xok tikneltokaskej ika Jehová techmakas nemilistli tlen xkeman tlamis. Kuakon, maka ijkon matitlanemilikan. Maka matikilkauakan ika Jehová kinektok techpaleuis para matikpiyakan nemilistli tlen xkeman tlamis (1 Tim. 2:​3, 4). w22.10 26 párrs. 8-10

Satanás kinekiya ika Job makinemili ika Jehová xok kitlasojtlaya. Ika yejon, okichiuj ika chikauak maajaka niman makitlajkali on kajli kampa kualtsin tlakuajtoyaj on majtlaktli ikoneuan Job (Job 1:​18, 19). Noijki okinmikti iyolkauan niman itlakeualuan Job ika se tlitl tlen oualeuj desde ne iluikak (Job 1:16). Pampa xkeman ijkon chikauak ajakaya niman xkeman uajtemouaya tlitl de ne iluikak, Job okinemili ika Jehová kitlajyouiltijtoya pampa yokichiujka itlaj tlen yejua xkuelita. Maski ijkon, Job xkeman okiuijuikalti Jehová. Yejua okijto ika ijkon ken kuajli okiseli tlen Jehová okimakak, noijki nonekiya kixikos nochi tlen xkuajli ipan nochiujtoya. Yejua okijto: “¡Ma nikiyekteneua toTEKO!” (Job 1:​20, 21). w22.06 21 párr. 7

Jesús okimijli inomachtijkauan on tlen uajlauj ipan Juan 17:14. Niman ikipiya 100 xiuitl ika yotikitakej kenon uajnochiujtiuj yejuin teotlajtojli. ¿Tleka ijkon tikijtouaj? Jesús onochiuj tekiuaj ipan 1914 niman okuajtlajkal Satanás ipan yejuin tlaltikpaktli. Aman Diablo sa ueli tlayekana nikan ipan tlaltikpaktli niman pampa kimatstika ika sa achijtsin poliui para kipopoloskej, melak kintlaueltoka itekipanojkauan toTajtsin (Apoc. 12:​9, 12, 13, 17). Ika yejon, aman miyekej techtlauelitaj. San ika, xnoneki tikmakasiskej Satanás niman akin kipaleuiyaj. Matikijtokan ken apóstol Pablo, yejua okijto: “Tla Dios kipiya iyojlo para techpaleuis, ¿akinon uelis techixnamikis?” (Rom. 8:31). Kuakon, uelis titlaneltokaskej itech Jehová. w22.07 18 párrs. 14, 15

Jesús kuajli kimatstoya ika ipan itlamiyan tonaltin nemiskiaj miyekej akin kipaleuiskiaj. Kuajli kimatstoya ika nochiuaskia on teotlajtojli tlen kijtoua: “On tlakamej notemakaskej ika nochi inyojlo ipan on tonajli ijkuak titetlanis” (Sal. 110:3). Tla tejua titenojnotsa, tikpaleuijtika Jesús niman “tekitketl” yolmelauak niman titlapaleuijtika manochiua yejuin teotlajtojli. San ika, ijkuak titenojnotsaj noijki tikixnamikij itlaj tlen ouijtika. ¿Tlenon tikixnamikij? Miyekej xkuelitaj ika titenojnotsaj. Ika yejon, akin kixnamikij ikalpan toTajtsin, akin tlayekanaj ipan tlaneltokiltin xmelajkej niman políticos kijtouaj ika xmelauak tlen titemachtiaj. Tla tochanejkauan, akin tikimixmatij noso akin imiuan titekitij kinneltokiliaj tlen kijtouaj, kanaj uelis texchiualtiskej matiktlalkauikan Jehová niman maka sa matitenojnotsakan. Ipan okseki países, totlauelikniuan kinmojtiaj tokniuan, kimixnamikij niman hasta kintsakuaj. w22.07 8 párr. 1; 9 párrs. 5, 6

Jehová kineki mojmostla matikpouakan Biblia niman matitlanemilikan itech tlen tikpouaj. Tla tikchiuaj tlen tiueltiuej, totlaneltokil más chikaujtias niman más kuajli touikaskej iuan Jehová. Niman yejon techpaleuis matitlaxikokan ijkuak tikixnamikiskej tlen ouijtika. Noijki, tla tikneltokaj tlen kijtoua Biblia, Jehová techmakas iespíritu santo. Yejuin espíritu techpaleuis matitlaxikokan ijkuak tikixnamikiskej tlen xkuajli (2 Cor. 4:​7-10). Jehová kichiua ika “tekitketl” yolmelauak niman tlamachilise matechinmaka amatlajkuiloltin, videos niman tlakuikaltin tlen kichikauaj totlaneltok (Mat. 24:45). Jehová yotechmachti ika noneki totlasojtlaskej imiuan tokniuan niman ika noneki toyolseuiskej ijkuak tikixnamikiskej tlen ouijtika (2 Cor. 1:​3, 4; 1 Tes. 4:9). Tokniuan kinekij techpaleuiskej matimelajkanemikan ijkuak tikixnamikij tlen ouijtika. w22.08 12 párrs. 12-14

Tla tikijtouaj tlen kuajli kichiuaj oksekimej tokniuan, yejuamej más notlasojtlaskej niman kuajli nouikaskej ipan tlanechikojli. Kanaj kemantika tokniuan akin youejkaujkej ipan ikalpan toTajtsin xnotlajtolnamikiskej niman hasta uelis nokamauisokiskej. Ijkon inpan onochiuj apóstol Pablo niman Bernabé, akin kuajli nouikayaj. Sejpa, yejuamej xonotlajtolnamijkej pampa Bernabé kinekiya kuikas Marcos kampa yaskiaj, san ika, Pablo xkinekiya. ¿Tlenon opanok? Biblia kijtoua: “Onokamauijsokkej, niman yejua ika onoxelojkej” (Hech. 15:​37-39). San ika, sakin Pablo, Bernabé niman Marcos onoyolseuijkej. Sakin, Pablo okijto tlen kuajli kichiuaya Bernabé niman Marcos (1 Cor. 9:6; Col. 4:10). Tla tejuamej noijki xtotlajtolnamikij imiuan oksekimej tokniuan, imiuan matoyolseuikan niman matikitakan tlen kuajli kichiuaj. Yejon kichiuas ika ipan tlanechikojli maonia yolseuilistli niman maka manoxelokan tokniuan. w22.08 23 párrs. 10, 11

Maski tokojtiliaj tikintlakamatiskej itlanauatiluan Jehová, xnoneki tejuamej tikinmelajkatlaliskej oksekimej nion xtiknemiliskej ika tejuamej más tiyolmelajkej. Noneki tikilnamiktoskej ika Jehová yejua Juez akin más ueyixtika “ipan nochi in tlaltikpaktli” (Gén. 18:25). Jehová xtlaj techijlia tla tejuamej matitemelajkatlalikan. Matikitakan tlenon okichiuj José, akin okichiuj tlen melajki. Maski miyekpa okichiuilijkej tlen xkuajli, yejua xkeman onotlakuepilti. Ikniuan okitlajyouiltijkej, okinemakakej ken tlakeuajli niman okijlikej intaj ika yomijka. Sakin, ijkuak José itekiuajtitoya Egipto, ikniuan okitatoj para makinpaleui. Ijkuakon yejua ueliskia kintlajtlakolmakaskia niman notlakuepiltiskia. Ika yejon, maski ikniuan yonoyolkuepkaj, nomojtiayaj pampa kinemiliayaj ika José ueliskia itlaj kinchiuilis. San ika, José okimijli: “Maka xmomojtikan. Nejua xniDios para nemechcastigaros” (Gén. 37:​18-20, 27, 28, 31-35; 50:​15-21). José yolyemanki katka niman kimatstoya ika san Jehová kimelauaya makinmelajkatlali ikniuan. w22.08 30 párrs. 18, 19

¿Tikmatstok tlenon uelis kichiuas Jehová niman ijkon kinankilis iteoyouj se tokniuj? Yejua uelis kichiuas ika tejua xpaleui yejuin tokniuj. Maski tla titlayekanketl, titlapaleuijketl, tiprecursor, titenojnotsketl, titelpochtli noso tla itiueyi, noso tla titlakatl noso tisiuatl, yejua uelis kichiuas ika tejua xkinpaleui tokniuan. Ijkuak se tokniuj akin kitlasojtla Jehová kitlajtlanilia makipaleui, toTajtsin miyekpa kichiua ika tokniuan tlayekankej noso oksekimej tokniuan makiyoltlalikan yejuin tokniuj (Col. 4:11). Melak techyolpaktia tikpaleuiskej Jehová niman noijki tikinpaleuiskej tokniuan. Niman uelis ijkon tikchiuaskej ijkuak onias se ueyi kokolistli, ijkuak itlaj san totoka panos noso ijkuak techtlaueltokaskej. Kanaj tikuelitaskiaj titepaleuiskej, san ika, tochanejkauan noijki noneki yakaj makinpaleui pampa noijki tlajyouijtokej. Maski ijkon, tiknekij tikinpaleuiskej tokniuan, niman Jehová kiyolpaktia ijkuak kita ika tikchiuaj nochi tlen tiuelij (Prov. 19:17). w22.12 22 párrs. 1, 2

Matitetlasojtlakan. Yejon tlen kachtopa noneki tikchiuaskej tla tiknekij totech matlaneltokakan. Jesús okijto ika noneki tiktlasojtlaskej Jehová niman tikintlasojtlaskej oksekimej, yejon ome tlanauatiltin tlen más ueyi kijtosnekij (Mat. 22:​37-39). Tejuamej melak tiktlasojtlaj Jehová, ika yejon, tiknekij totech matlaneltokakan ijkon ken itech tlaneltokaj. Tejuamej melak tikintlasojtlaj tokniuan, yejua ika, xtikteijliaj tlen yejuamej techijliaj pampa xtiknekij tikinyolkokoskej nion tikinpijpinaujtiskej. Noijki melak techpaleuis tla tiyolyemankej. Tla ijkon tikchiuaj, uelis totech tlaneltokaskej. Se tokniuj akin yolyemanki xnimantsin itlaj kiteijlitiuetsi san pampa temojkatlachialtisneki (Filip. 2:3). Nion xkijtotinemi ika yejua kimati itlaj tlen sekimej xuelis kimatiskej. Noijki, tla tiyolyemankej, xtiteijlitinemiskej itlaj tlen xuajlauj ipan Biblia nion ipan toamatlajkuiloluan. w22.09 12 párrs. 12, 13

Se iluikaktekitketl okijli Daniel ika ikalpan toTajtsin más kuajli kinmasikamatiskia teotlajtoltin tlen uajlauej ipan libro de Daniel. Sa ika, “on xkuajkualtin tlakamej xkajsikamatiskej on tlen nikan tlajkuilolnestikaj” (Dan. 12:10). Aman noneki tikteititiskej ika tejuamej xtikchiuaj ijkon ken akin xkuajkualtin (Mal. 3:​16-18). Jehová kinsentlalijtika iyaxkauan akin “melak tlasojtij”. ¿Xmelak ika tiknekij teuan matechpoua? Techyolpaktia ijkuak tikitaj ika inochiujtokej seki teotlajtoltin. San ika, sakin nochiuaskej okseki tlen melak techyolpaktiskej. Kachtopa tikitaskej kenon kipopoloskej nochi tlen xkuajli niman sakin tikitaskej kenon nochiuas tlen Jehová okijli Daniel. Yejua okijli: “Ipan on sa ika nochi tonaltin oksejpa tiyoliuis para tikselis motlayokolil” (Dan. 12:13). ¿Sa tiknektika mayejko yejon tonajli ijkuak Daniel niman akin melak tikintlasojtla mayoliuikan? Tla kema, xmokojtili xmelajkanemi itech Jehová niman ijkon yejua xkeman kipopolos motoka ipan amoxtli tlen kijtoua akinomej kipiyaskej nemilistli. w22.09 24 párr. 17; 25 párrs. 19, 20

Tlen Jehová okijli Ezequiel kanaj melak okipaleui. Niman noijki, kanaj Ezequiel okilnamik ika Jehová noijki ijkon okimijlika Moisés niman Isaías ijkuak okintlapejpeni ken teotlajtokej (Éx. 3:10; Is. 6:8). Ezequiel noijki kimatstoya ika Jehová okinpaleui yejuin teotlajtokej makichiuakan tlen okinnauatijka, maski seki melak ouijtika katka. Kuakon, ijkuak toTajtsin okpa okijli Ezequiel: “Nimitsontitlanis”, Ezequiel okasikamat ika Jehová kipaleuiskia. Noijki, ipan libro de Ezequiel tikitaj ika Ezequiel miyekpa okijto: “ToTEKO onechnots” (Ezeq. 14:2). Niman noijki miyekpa okijto: “ToTEKO oksejpa onechnots” (Ezeq. 6:1). Kuakon, Ezequiel kuajli kimatstoya ika Jehová yejua akin okititlanka. Noijki, pampa itaj teopixki katka, kanaj okimachti ika Jehová nochipa kimijliaya iteotlajtokauan ika kinpaleuiskia. Ken Isaac, Jacob, niman Jeremías, Jehová ijkin okimijlika: “Ninemi mouan” (Gén. 26:24; 28:15; Jer. 1:8). w22.11 3 párr. 3

Maski Adán iuan Eva otlajtlakojkej niman san inpampa tinochimej timikij, Jehová ok kinektok kichiuas tlen yokijtojka (Is. 55:11). Yejua ok kineki ika tlaltikpakchanejkej akin itech melajkanemij nochipa manemikan. ¿Kenon tikmatij? Ipampa nochi tlen yejua yokijto niman yokichiuj para kichiuas tlen kineki. Jehová yokijto ika kinyolitis akin yomijkej niman noijki yokijto ika uelis nochipa nemiskej (Hech. 24:15; Tito 1:​1, 2). Job kuajli kimatstoya ika Jehová san kinektika kinyolitis akin yomijkej (Job 14:​14, 15). Teotlajtoketl Daniel kimatstoya ika tlaltikpakchanejkej yoliuiskej niman ika uelis nochipa nemiskej (Sal. 37:29; Dan. 12:​2, 13). Judíos akin nemiyaj ipan itonaluan Jesús noijki kimatstoyaj ika akin melajkanemiskiaj itech Jehová, ueliskiaj kiseliskej “nemilistli yejuan para nochipa” (Luc. 10:25; 18:18). Jesús miyekpa okijto ika Jehová kinyolitiskia akin yomijkej, niman ken tikmatij, Jehová okiyoliti Jesús (Mat. 19:29; 22:​31, 32; Luc. 18:30; Juan 11:25). w22.12 4, 5 párrs. 8, 9

Jehová techijlia itech matonisiuikan (Sant. 4:8). Yejua kuelitaskia yes toTajtsin, toTaj niman toamigo. Yejua kinnankilia toteoyouan niman techpaleuiya ijkuak tikixnamikij tlen ouijtika. Noijki, kitekitiltia ikalpan niman ijkon techmachtis niman techtlajpiyas. Tejuamej uelis tiknisiuiskej Jehová tla tiknotsaj, tla tomachtiaj niman tla titlanemiliaj itech iTlajtol. Tla ijkin tikchiuaj, más tiktlasojtlaskej niman más tiktlasojkamachiliskej nochi tlen kichiua topampa. Tiknekiskej nochipa tiktlakamatiskej niman tikueyiteneuaskej ijkon ken yejua kimelaua (Apoc. 4:11). Ijkuak más tikixmatij Jehová, más itech titlaneltokaj niman noijki titlaneltokaj itech ikalpan tlen yejua yokinauati matechtlajpiya. Diablo ika yolik kiyejyekoua maka sa matitlaneltokakan itech Jehová nion itech ikalpan. San ika, uelis tiktlaniskej Diablo. Tla chikauak tikpiyaj totlaneltok niman titlaneltokaj itech Jehová, xkeman tiktlalkauiskej nion xtiktlalkauiskej ikalpan (Sal. 31:​13, 14). w22.11 14 párrs. 1-3

Miyekej tokniuan melajkanemij maski kintsakuaj niman maski kinekij kinmiktiskej. Ijkon kichiuaj pampa kitlasojtlaj Jehová, inTekiuaj akin Ueyixtika Dios. Yejuamej kinektokej melajkanemiskej ijkon ken on yeyimej hebreos akin Jehová okinmakixti ijtik se horno pampa itech omelajkanenkej. Tekiuaj David kimatstoya ika melak nonekiya melajkanemis itech Jehová. Yejua okijkuilo: “NoTEKO, tejua tikinyolkuitia niman tikincastigaroua nochi naciones tla kichiuaj tlen xkuajli. Tejua xnechyolkuiti niman xtenkixti ika xnikpiya tlajtlakojli, pampa xnitlajtlakolejketl [niman pampa nimelajkanemi, TNM]” (Sal. 7:8). Noijki okijto: “ToTEKO kitlajsojtla on yejuan yolmelajki niman xkaman kintlalkauiya on yejuan melauak kitlaliaj iminyojlo itech. Yejua kimanauiya on yolmelajki para nochipa” (Sal. 37:28). Kuakon, melak kuajli tla nochipa tokojtiliaj timelajkanemiskej itech Jehová. Tla ijkon tikchiuaj, tikijtoskej ijkon ken se salmista akin okijkuilo: “Yejuan kiteititis[kej] ika kipiyaj yolmelajkilistli, [ . . . ] motech ma tsajtsikan ikan paktli” (Sal. 132:9). w22.10 17 párrs. 18, 19

Job miyekej imiuan otlajto ipan nochi inemilis, san ika, xkeman okilkauj ijkuak otlajto iuan Jehová. Jehová okiteneuili seki tlen okichijchiuj niman okijli kuajli makimita. Yejon kipaleuiskia makimati ika Jehová melak tlamachilise niman makineltoka ika yejua ueli kintlajpiya itekipanojkauan. Job okasikamat ika toTajtsin ueliskia kimakas tlen kipolouaya pampa okitak ika yejua kinmakaya yolkamej tlen kikuaskej (Job 38:​39-41; 39:​1, 5, 13-16). Job más kuajli okixmat Jehová ijkuak tlanemiliaya itech tlen okichijchiuj. Uelis más tikixmatiskej toTajtsin tla tikitaj tlen yejua okichijchiuj. San ika, kemantika kanaj ouijtika tikitaj tikchiuaskej yejuin. Tla tichantij ipan se ueyikalpan, kanaj xmás ueli tikitaj tlen Jehová okichijchiuj. Niman tla tichantij ipan se pueblito, kanaj tikmachiliaj ika xmás tikpiyaj tiempo para tikitaskej tlen Jehová okichijchiuj. Ika yejon, melak noneki matikxelokan tiempo niman ijkon tikitaskej tlen toTajtsin okichijchiuj. w23.03 15 párrs. 1, 2

Jesús okijto ika “temojtij tlalolinis” niman ika nochiuaskia miyek tlen xkuajli ipan tlaltikpaktli achto tlapopoliuis (Luc. 21:11). Jesús okijto ika miyekiyas on tlen xkuajli, niman kema ijkon panotika. Tikitaj kenon nouisokilo, noixnamikilo niman temiktilo (Mat. 24:12). Jesús xkeman okijto ika tla topan nochiua tlen xkuajli kijtosneki ika Jehová yotechtlalkaui. Tikmatstokej ika miyekej itekipanojkauan toTajtsin akin itech omelajkanenkej otlajyouijkej ipampa tlen xkuajli opanok (Is. 57:1; 2 Cor. 11:25). Kanaj Jehová xkichiuas se milagro para techpaleuis, san ika, kema techpaleuis matiyolseujtokan ijkuak ijkon topan panos. Ijkuakon, xmás tomojtiskej tla itikmatstokej tlenon tikchiuaskej niman tla itikpiyaj nochi tlen noneki. San ika, tla nimantsin tiknemilijtiuej tlenon tikchiuaskej ijkuak itlaj panos, ¿xtikteititijtoskiaj ika xtitlaneltokaj itech Jehová? Ka, yej tikteititijtoskiaj ika tikneltokaj ika Jehová uelis techtlajpiyas. ¿Tleka? Pampa yejon tlen Biblia techijlia matikchiuakan, techijlia matiknemilikan tlenon uelis tikchiuaskej tla kemantika itlaj topan panoua. w22.12 18 párrs. 9, 10

Ijkuak José tsauktoya, Jehová okichiuj ika tekiuaj de Egipto itlaj makitemiki. Kuakon, ijkuak faraón okimat ika José ueliya kiteijliaya tlenon kijtosneki tlen yakaj kitemiki, otlanauati makanatij. Pampa Jehová okipaleui José, yejua ouel okijli faraón tlenon kijtosnekiya tlen okitemik, niman noijki okijli tlenon nonekiya kichiuas ijkuak nochiuaskia tlen okitemik. Faraón melak okimojkatlachialti tlen okijli José. Niman ijkuak okimat ika Jehová kipaleuijtoya, okitekitlali para makisentlali tlakuajli ompa Egipto (Gén. 41:​38, 41-44). Seki xiuitl sakin, melak otlatlasojtik Egipto niman noijki Canaán, kampa chantiyaj ichanejkauan José. Pampa José tlayekanaya Egipto, aman ueliskia kinmakixtis ichanejkauan, akin nochiuaskiaj iuejkachanejkauan Mesías. Kuajli nesi ika Jehová yejua akin okipaleui José. Maski ikniuan José kinekiyaj kimiktiskej, Jehová okitekitilti José para manochiua tlen yejua kinekiya. w23.01 16, 17 párrs. 11, 12

¿Tlenon kijtosneki toitaskej sa no tejuamej? Kijtosneki kuajli tikitstoskej nochi tlen ueliskia kichiuas maka sa matouikakan iuan Jehová niman xtikchiuaskej tlen ueliskia techijtlakos. Tla ijkon tikchiuaj, nochipa touikaskej iuan toTajtsin (Prov. 22:3; Jud. 20, 21). Apóstol Pablo okimijli tokniuan ika nonekiya sa no yejuamej noitaskej. Sejpatsin, yejua ijkin okimijli tokniuan akin chantiyaj Éfeso: “Kuajli xmotakan sano nemejuamej ken nemouikaskej. Maka xmouikakan ken on yejuan xtlamatkej, yej xmouikakan ken tlamatkej” (Efes. 5:​15, 16). Satanás kineki maka sa matouikakan iuan toTajtsin. Ika yejon, Biblia techijlia matikasikamatikan “on tlen kineki” Jehová niman ijkon uelis titlaxikoskej (Efes. 5:17). Tla tiknekij tikchiuaskej tlen kuajli, noneki tikasikamatiskej “on tlen kineki” Jehová. ¿Niman kenon uelis tikmatiskej tlen kineki Jehová? Tla mojmostla tomachtiaj iTlajtol toTajtsin niman itech titlanemiliaj. Ijkuak peuas más tikasikamatiskej tlen Jehová kineki matikchiuakan niman ijkuak tikmatiskej tlenon kinemilia Cristo, tikchiuaskej ijkon ken akin kipiyaj tlamachilistli. Niman maski xonias se tlanauatijli, tikmatstoskej tlenon tikchiuaskej (1 Cor. 2:​14-16). Kemantika xouijtika tikitaj tikmatiskej tlenon xnoneki tikchiuaskej, san ika, kemantika kema ouijtika. w23.02 16, 17 párrs. 7-9

¿Kechpa titlachipaua mochan? Kanaj ijkuak kemach ompa otimochantito, melak kuajli otitlachipauj. San ika, tla sakin xok titlachipauaskia, nochi melak tlaltexiniskia niman melak tlatsokuiliuiskia. Ika yejon, tla tikneki kuajli manesi mokal, noneki miyekpa titlachipauas. Ijkon ken miyekpa titlachipauaj tochan, noijki noneki miyekpa tikitaskej tla kuajli ken titlanemiliaj niman tla kuajli tlen tikchiujtokej. Ijkuak tiknekiyaj toapolaktiskej, otokojtilijkej topatlaskej niman otijkixtijkej “ipan totlalnakayo niman toalma nochi on tlen techijtlakoua” (2 Cor. 7:1). San ika, aman ika yotoapolaktijkej noneki tikchiuaskej tlen okijto apóstol Pablo: “Xkauilikan para kuajli ma kiyenkuilijtiu nemoyojlo niman nemotlamachilis” (Efes. 4:23). Ijkon ken nimantsin nosentlalia tlajli tochan, noijki ueliskia nimantsin nosentlalis tlen xkuajli ipan toyojlo niman ipan totlamachilis. Tla xtiknekij ijkon topan mapano niman tiknekij ika Jehová makita ika tichipaujkej, noneki miyekpa tikitaskej tla kuajli ken titlanemilijtokej, tla kuajli tlen tikchiujtokej niman tla kuajli tlen tiknekij tikchiuaskej. w23.01 8 párrs. 1, 2

Xkonnemili kenon melak kualtsin katka tijkakis kenon Jesús temachtiaya. Yejua kintsontekontlaliaya tlaxeloltin itech Biblia niman nochipa kinteneuaya ijkuak temachtiaya. Ijkuak Jesús onoapolakti niman okitlapejpenijkej ika espíritu santo, okilnamik nochi tlen ipan onochiuj iluikak ijkuak xiuajlaya ipan tlaltikpaktli. Niman ijkon tikmatij pampa sakin ika Jesús onoapolakti, okinteneuj seki tlaxeloltin itech Biblia, niman achto ika mikis noijki ijkon okichiuj (Deut. 8:3; Sal. 31:5; Luc. 4:4; 23:46). Niman ipan yeyi xiuitl uan tlajko, Jesús nochipa okiamapouj Biblia ijkuak otenojnots. Noijki, nochipa okinteneuj tlaxeloltin ijkuak temachtiaya niman nochipa kiteijliaya tlenon kijtosneki (Mat. 5:​17, 18, 21, 22, 27, 28; Luc. 4:​16-20). Ijkuak Jesús xipeuaya tenojnotsaya, yejua ikiamapouaya iTlajtol toTajtsin niman kikakiya ijkuak oksekimej kiamapouayaj niman itech tlajtouayaj. Niman ichan kinkakiya María niman José ijkuak kinteneuayaj seki tlaxeloltin itech Biblia (Deut. 6:​6, 7). Noijki kuajli tikmatstokej ika Jesús yaya nochi sábados teopan iuan ichanejkauan niman kuajli tlakakiya ijkuak kiamapouayaj iTlajtol toTajtsin (Luc. 4:16). Niman sakin san yejua opeuj kiamapoua iTlajtol toTajtsin. w23.02 8 párrs. 1, 2

Tejuamej tiktlasojtlaj Jehová pampa itech ualeua nochi nemilistli niman noijki itech ualeua “nochi kuajli tetlayokolijli yejuan tikseliaj” (Sal. 36:9; Sant. 1:17). Nochi tlen kuajli tikpiyaj ualeua itech Jehová, akin kuelita kitemakas tlen kuajli niman akin melak techtlasojtla. Jehová okitekauili ika isenteKonetsin manotemaka topampa, yejon se kualtsin tetlayokolijli. ¿Tleka ijkon tikijtouaj? Matiknemilikan kenon Jehová niman Jesús melak notlasojtlaj. Jesús okijto: “NoTajtsin nechtlajsojtla” niman “Nejua niktlajsojtla noTajtsin” (Juan 10:17; 14:31). Melak miyek xiuitl san sekan onenkej ne iluikak niman yejon okichiuj más kuajli manouikakan (Prov. 8:​22, 23, 30). Aman xkonnemili kenon Jehová melak onoyolkoko ijkuak okitekauili makitlajyouiltikan niman makimiktikan iKoneuj. San ika, Jehová melak mitstlasojtla niman noijki kintlasojtla nochimej tlaltikpakchanejkej, ika yejon, okitemakak itlasojkaKonetsin niman ijkon tejua niman oksekimej uelis ninnemiskej nochipa (Juan 3:16; Gál. 2:20). ¿Xmelak ika yejuin kichiua más matiktlasojtlakan toTajtsin? w23.03 4, 5 párrs. 11-13

Maka matijkakikan tlen temachtiaj akin kixnamikij ikalpan Jehová. Jesús okitak ika sekimej tokniuan akin chantiyaj Pérgamo temachtiayaj tlen xuajlaya ipan Biblia niman texexelouayaj, ika yejon, okinchikajkanots (Apoc. 2:​14-16). San ika, okitak ika tokniuan akin chantiyaj Tiatira xokinejkej kikakiskej itlamachtiluan Satanás, ika yejon, okimijli ika melak kuajli tlen okichiujkej niman okinyolchikauj nochipa matlaneltokakan itech Jehová (Apoc. 2:​24-26). Niman tokniuan akin okinkajkayaujkej niman okikakej intlamachtil akin kixnamikiyaj ikalpan toTajtsin nonekiya noyolkuepaskej. ¿Tlenon techmachtia yejuin? Ika xnoneki tijkakiskej tlen temachtiaj akin kixnamikij Jehová. Biblia kijtoua ika yejuamej “nochiuaskej ken kineltokaj Dios, pero ika on tlen kichiuaj nesi ika xnelij kineltokaj” (2 Tim. 3:5). Tla kuajli tomachtiaj iTlajtol toTajtsin, xtechkajkayauaskej akin kixnamikij ikalpan Jehová (2 Tim. 3:​14-17; Jud. 3, 4). Melak noneki matikitakan tla tikyolpaktijtokej Jehová ijkuak tiktekichiuiliaj. Kuakon, tla itlaj xkuajli tikchiujtokej, nimantsin matikpatlakan (Apoc. 2:​5, 16; 3:​3, 16). w22.05 4 párr. 9; 5 párr. 11