Agosto

Biblia kinteneua miyekej tlakamej niman siuamej akin okiteititijkej ika kitlasojtlayaj Jehová. ¿Kenon okiteititijkej? Ipampa tlen okijtokej. Niman matikilnamikikan ika Jesús okijto: “On tlen kisa ipan tekamak ualeua ne ipan teyojlo” (Mat. 12:34). Jehová kineki nochipa manemikan akin kitlasojtlaj. Noijki, kineki ika nochimej itekipanojkauan makiueyichiuakan niman kuajli matlajtokan. Kuakon, tla xkuajli titlajtouaj kentla xtikueyichiujtoskiaj Jehová (Sant. 1:26). Miyekej akin xkitlasojtlaj Jehová tetlauelnotsaj, xtetlakaitaj niman noueyimatij (2 Tim. 3:​1-5). Tejuamej xtiknekij ijkon tikchiuaskej. Ka, tiknekij nochipa tikyolpaktiskej Jehová ijkuak titlajtouaj. San ika ¿kiyolpaktiskia Jehová tla yakaj melak kuajli tenotsa ipan tlanechikojli noso ijkuak tenojnotsa, san ika, ijkuak nemij imiuan ichanejkauan kintlauelnotsa? (1 Ped. 3:7). w22.04 5 párrs. 4, 5

ToTajtsin san no yejua kintlalilis ipan inyojlo on majtlaktli kuakuautli niman on xkuajli yolki para kipopoloskej “Ueyixtikaj Babilonia”. Kema, Jehová kichiuas ika gobiernos makijlikan on xkuajli yolki chichiltik, noso Naciones Unidas, makimixnamikikan niman makinpopolokan nochi tlaneltokiltin xmelajkej (Apoc. 18:​21-24). Tlen techmachtia. Noneki tichipaujkanemiskej niman tikueyichiuaskej toTajtsin ijkon ken yejua kuelita (Sant. 1:27). “Ueyixtikaj Babilonia” temachtia tlen xmelauak, nochipa san iluipanotika, kitekauilia manochiua tlen toTajtsin xkuelita niman kichiua naualyotl. Ika yejon, melak noneki matotlajpiyakan para maka peuas tikchiuaskej ken Ueyixtika Babilonia, yej nochimej matikimijlikan: “Xkisakan ipan on ueyikalpan, para xinuan nenkichiuaskej on intlajtlakol” (Apoc. 18:4). w22.05 11 párrs. 17, 18

Tla tikinpiya mokoneuan, xkita kemanon uelis más tikinmachtis itech Jehová. Xkinnojnotsa itech Jehová niman xkimijli kenon yomitspaleui (Deut. 6:​6, 7). Yejuin uelis tikchiuas tla moueuentsin noso se mochanejkauj xmitskauilia xkinmachti mokoneuan. Se tokniuj siuatl akin itoka Christine, kijtoua: “Nejua nikitaya kemanon ueliskia nikinnojnotsas nokoneuan itech Jehová pampa noueuentsin xnechkauiliaya manikinmachti”. Noijki, tla kuajli titlajtoua itech ikalpan Jehová niman xtikintejteneua tokniuan nion tlayekankej, uelis kinpaleuis mokoneuan, pampa ijkuak kinekiskej yakaj iuan tlajtoskej uelis imiuan yaskej. Kuajli xmouika iuan moueuentsin niman mokoneuan. Xkimititi moueuentsin niman mokoneuan ika tikintlasojtla. Kuajli xnotsa moueuentsin niman xtlakaita niman xkimijli mokoneuan noijki ijkon makichiuakan. Tla ijkon tikchiua, tikitas ika mokoneuan más kinekiskej nomachtiskej itech Jehová (Sant. 3:18). w22.04 18 párrs. 10, 11

Jesús okimijli tokniuan akin chantiyaj Éfeso ika yejuamej yotlaxikojkaj pampa ok kitekichiuilijtoyaj Jehová. San ika, noijki okimijli ika xok más kitlasojtlayaj Jehová. Ika yejon, okimijli ika tla kinekiyaj kiyolpaktiskej Jehová, nonekiya más kitlasojtlaskej. ¿Tlenon techmachtia yejuin? Ika xsan noneki titlaxikoskej para tikyolpaktiskej Jehová. ¿Tleka? Pampa yejua xsan kita tla tiktekichiuilijtokej, yejua noijki kita tleka tiktekichiuilijtokej. Yejua kineki matikueyichiuakan pampa tiktlasojtlaj niman pampa tiktlasojkamatij nochi tlen yotechmakak (Prov. 16:2; Mar. 12:​29, 30). Nochipa matitlatlachixtokan. Jesús okitak ika tokniuan akin nemiyaj ipan tlanechikojli Sardis xok más chikauak kitekichiuiliayaj Jehová, ika yejon, okimijli ika nonekiya tlatlachixtoskej. Yejuin techmachtia ika noneki titlatlachixtoskej niman ika xnoneki tiknemiliskej ika xok noneki chikauak tiktekichiuiliskej Jehová. Tla xok ueli tiktekichiuiliaj Jehová ken yeuejkaui tiktekichiuiliayaj, matikilnamikikan ika Jehová xkilkaua nochi tlen yotikchiujkej (Heb. 6:10; Apoc. 3:​1-3). w22.05 3 párrs. 6, 7

Salomón okijto ika tiyolpakij ijkuak titekitij pampa tekitl yeskia kentla se itetlayokolil toTajtsin (Ecl. 5:​18, 19). Niman yejua chikauak otekit pampa Biblia kijtoua ika yejua okinchijchiuj uejueyimej kalpamej, kaltin, jardines, niman okitokak uvas (1 Rey. 9:19; Ecl. 2:​4-6). Salomón kuelitaya nochi tlen kichiuaya, san ika, kimatstoya ika xsan yejon kiyolpaktiskia. Ijkuak yejua okichijchiuj iteopan Jehová, tlen ouejkauj chikome xiuitl, okitak ika yejon tlen más okiyolpakti (1 Rey. 6:38; 9:1). Yejua okijkuilo: “Nikan onkaj nochi tlen noneki se kichiuas: Xtlakaita Dios niman xchiua on tlen mitsnauatia, pampa on san yejua kitocaroua kichiuas sen tlakatl” (Ecl. 12:13). w22.05 22 párr. 8

Biblia kinteneua miyekej tlakamej niman siuamej akin Jehová okintlapopolui. ¿Tejua tikilnamiki se? Kanaj otikilnamik tekiuaj Manasés, yejua okichiuj miyek tlen xkuajli niman melak otlajtlako ixpan Jehová. Opeuj kinueyichiua tajtsitsintin niman okimijli Israelitas noijki ijkon makichiuakan, noijki hasta okinuentlali ikoneuan. Niman hasta okikalaktito se itajtsin ichan Jehová, kampa melak tlachipauak katka. Biblia kijtoua ika “okichiu miyek tlajtlamach yejuan xkuajli ixpan toTEKO, niman ijki sanoyej okualanij toTEKO” (2 Crón. 33:​2-7). San ika, ijkuak Manasés okiteititi ika yemelak onoyolkuep, Jehová okitlapopolui (2 Crón. 33:​12, 13). Aman matitlajtokan itech tekiuaj David, akin noijki otlajtlako. Yejua oauilnen niman otemikti. San ika, ijkuak David okijto ika otlajtlako niman yemelak onoyolkuep, Jehová noijki okitlapopolui (2 Sam. 12:​9, 10, 13, 14). Nochi yejuin techititia ika Jehová kema kinektok techtlapopoluis. w22.06 4 párr. 7

Kemantika ueliskia xok tikneltokaskej tlen toTajtsin kichiuas ika tlayekapan. Kanaj tikuelitaskiaj ika toTajtsin nimantsin makichiua tlen yokijto, ika yejon, tosiaujkauaj. San ika, matikilnamikikan ika toTajtsin nochipa nemi niman yejua xkita tonajli ijkon ken tejuamej (2 Ped. 3:​8, 9). Yejua kema kichiuas tlen yokijto, san ika, kanaj xkichiuas ijkuak tejuamej tikuelitaskiaj. Kuakon, ¿tlenon techpaleuis maka matosiaujkauakan niman nochipa matikneltokakan ika kema nochiuas tlen tikchiaj? (Sant. 5:7). Noneki nochipa tinemiskej iuan Jehová pampa san yejua uelis kichiuas tlen yotechijli. Noijki, Biblia kijtoua ika tla tikneltokaj ika Jehová nemi niman ika yejua kinteochiua “on yejuan melauak kitejtemouaj”, uelis tikneltokaskej ika nochiuas tlen tikchiaj (Heb. 11:​1, 6). Tla tejuamej ika nochi toyojlo tikneltokaj ika Jehová yemelak nemi, más tikneltokaskej ika kichiuas nochi tlen yokijto. Nochipa matikilnamikikan tlen tikchiaj ika tlayekapan, matiknotsakan Jehová niman matikamapouakan iTlajtol. Tejuamej uelis touikaskej iuan Jehová maski xueli tikitaj. Ijkuak tikchiuiliaj teoyotl, uelis tikmatstoskej ika yejua techkaki (Jer. 29:​11, 12). w22.10 26, 27 párrs. 11-13

San matikonnemilikan kenon nomachiliaya Job. Yejua yeuatika ipan tlikonextli niman ika tonajli niman yeuajli melak nokokoua (Job 2:8). Iamigos san tlemach kijliaj niman kipijpinaujtiaj. Job melak noyolkokoua pampa kixnamiktika miyek tlen ouijtika, niman melak najmana pampa nochimej ikoneuan yomijkej. Pampa yejua xtlaj kijtoua, iamigos kinemiliaj ika yejua kitlalkauis Jehová. San ika, nopopolouaj (Job 2:13). Sakin, Job kominita iamigos niman kimijlia: “Chika nejua ninemi, nochipa nikijtos ika nejua xitlaj nikchiua tlen xkuajli” (Job 27:5). ¿Kenon ouel otlaxiko Job? Nochipa okitlali iyojlo itech Jehová niman kimatstoya ika yejua kipaleuiskia niman ika tla mikiskia, yejua kiyolitiskia (Job 14:​13-15). w22.06 22 párr. 9

Akin okichijchiuj iluikak niman tlaltikpaktli techkauilia matiknotsakan ika teoyotl. Tejuamej xnoneki tiktlajtoltiskej Jehová tla uelis tiknotsaskej pampa maski san kemanon niman ika totlajtol uelis tikijliskej nochi tlen tikmachiliaj. Maski tla tinemij hospital pampa tikualoj noso maski tla titsauktokej, uelis kuajli tikmatstoskej ika tla tiknotsaj toTajtsin, yejua techkakis. ¡Melak kualtsin ika ueli tiknotsaj Jehová! Tekiuaj David melak kitlasojkamatiya pampa ueliya kinotsaya toTajtsin. Ipan se tlakuikajli, yejua okijli Jehová: “Xseli noueyikatsajtsilis kenon ajuiyak poktli ijkuak kitlatiaj on kopajli mixpan” (Sal. 141:​1, 2). Yeuejkaui, ijkuak nemiya David, teopixkej melak kuajli ken kichijchiuayaj tlen melak ajuiyak niman sakin kitlatiayaj ijkuak kiueyichiuayaj Jehová (Éx. 30:​34, 35). Ijkuak David okiteneuj yejon tlen melak ajuiyak, okiteititi ika kinekiya kuajli kinemilis tlen kijliskia iTaj ipan iteoyouan. Niman tejuamej noijki tiknekij tikchiuaskej ken David pampa tiknekij ika toteoyouan makiyolpakti Jehová. w22.07 20 párrs. 1, 2; 21 párr. 4

Matijkauilikan Jehová makitlajtlakolmaka akin otechyolkoko. Jehová xtechkauilia matotlakuepiltikan (Rom. 12:​20, 21). ¿Tleka? Pampa Jehová kimatstok ika tejuamej titlajtlakolejkej niman ika xueli tikitaj nochi tlen panoua. San ika, Jehová yejua tetlajtlakolmaka pampa kimatstok nochi tlen panoua (Heb. 4:13). Noijki, kemantika pampa tikualanij xok kuajli titlanemiliaj. Santiago okijkuilo: “Ijkuak sen tlakatl kualani, yejua xkichiua on tlen Dios kuelita” (Sant. 1:20). Kuajli matikmatstokan ika Jehová kichiuas tlen kuajli niman kitlajtlakolmakas akin otechyolkoko noso otexchiuili tlen xkuajli. Ijkuak titetlapopoluiyaj, tikteititiaj ika titlaneltokaj itech tlen Jehová kichiuas. Tla tijkauiliaj ika Jehová makiyektlali tlen otexchiuilijkej, tikteititiaj ika tikneltokaj ika yejua kipopolos tlajtlakojli tlen melak techtlajyouiltia. Ipan yenkuik tlaltikpaktli nochi tlen techtlajyouiltia niman tlen techajmana “nochimej kelkauaskej; xokaman yakaj kelnamikis” (Is. 65:17). w22.06 10, 11 párrs. 11, 12

Pampa techtlauelitaj, kijtosneki ika tikchiujtokej ijkon ken Jesús niman tikyolpaktijtokej Jehová (Mat. 5:​11, 12). Satanás yejua akin kichiua matechtlauelitakan, san ika, xuelis kitlanis Jesús. Niman pampa Jesús techpaleuijtika, nochiuiyan ititenojnotstokej. ¿Tlenon okseki tikixnamikij? Miyekej okse tlajtojli tlajtouaj. San ika, ipan se tlatlachalistli, Jesús okititi apóstol Juan ika titenojnotsaskiaj ika miyek tlajtoltin (Apoc. 14:​6, 7). ¿Niman kenon nochiujtika tlen okitak apóstol Juan? Ipan jw.org tikinpiyaj amatlajkuiloltin ipantsin 1,000 tlajtoltin. Noijki, Grupo akin Tlayekana yokijto ika libro ¡Nochipa uelis tiyolpakis! manotlajtolkuepa ipantsin 700 tlajtoltin. w22.07 9 párrs. 6, 7

Jesús melak teikneliaya. Apóstol Mateo otechijli: “Ijkuak Jesús okintak on tojlamej, sanoyej okimiknelij, pampa yejuamej najmanayaj niman xkipiyayaj yolchikaualistli. Yejuamej nemiyaj ken on borreguitos yejuan xkipiyaj intlajpixkau” (Mat. 9:36). Jesús noijki okijto ika iTaj, Jehová, melak teiknelia, yejua okijto: “Xkineki para semej yejuamej in konetsitsimej ma poliuikan” (Mat. 18:14). ¡Melak tiyolpakij pampa Jehová melak techtlasojtla! Kuakon, tla más tikixmatij Jesús, más tiktlasojtlaskej Jehová. Tla tejua timouika imiuan tokniuan akin chikaujtok intlaneltok, noijki mitspaleuis más xtlasojtla Jehová niman más xchikaua motlaneltok. Yejuin tokniuan nochipa yolpaktinemij niman ika inyojlo kitekichiuiliaj Jehová, niman xnoyolkuepaj itech tlen yokitlapejpenijkej kichiuaskej. Kuakon, xkintlajtolti tlenon inpan yonochiuj niman tlenon yokinpaleui. Niman ijkuak itlaj tiktlapejpenis, xkimijli mamitspaleuikan. Xkilnamiki ika Biblia kijtoua: “Miyekej kuajkualtin tetlakanonotskej, kimanauiskej on nación”. w22.08 3 párrs. 6, 7

Tinochimej tikixnamikij tlen ouijtika. San ika, xsan toselti tinemij. Ijkon ken se tajtli kintlasojtla ikoneuan, Jehová noijki techtlasojtla. Yejua sa kinektika techkakis ijkuak tiknotsaj niman kinektika techpaleuis (Is. 43:2). Kuajli tikmatstokej ika uelis titlaxikoskej ijkuak tikixnamikiskej tlen ouijtika pampa Jehová techkauilia matiknotsakan, techmaka Biblia, techmaka miyek tlen ika tikchikauaskej totlaneltokil niman techinmaka miyekej tokniuan akin techtlasojtlaj. Melak tiktlasojkamatij pampa toTajtsin Jehová kinektika techpaleuis. “Toyojlo sanoyej paki itech toTEKO” (Sal. 33:21). ¿Kenon uelis tiktlasojkamachiliskej Jehová nochi tlen kichiua topampa? Tla kuajli tiktekitiltiaj nochi tlen yejua techmaka. Tla tiknekij nochipa matechtlajpiya Jehová, noneki tokojtiliskej tiktlakamatiskej niman tikchiuaskej tlen kuajli. Tla ijkon tikchiuaj, yejua nochipa techtlajpiyas. w22.08 13 párrs. 15, 16

Ipan yejuin tonaltin, miyekej xok kimatij intech akinon tlaneltokaskej. Miyekej kintlakaitaj akin kipiyaj miyek tomin, políticos niman ixtlamatkej, san ika, notlajtoltiaj tla yemelak kinekij kinpaleuiskej. Noijki, sekimej xok más tlaneltokaj intech akin tlayekanaj ipan tlaneltokiltin. Akin tlayekanaj ipan tlaneltokiltin kijtouaj ika noyekanaj ika Biblia, ika yejon, xtechmojkatlachialtia ika miyekej noijki xok tlaneltokaj itech Biblia. Akin tiktekichiuiliaj Jehová kuajli tikmatstokej ika toTajtsin nochipa kijtoua tlen melauak niman ika nochipa kineki techpaleuis (Sal. 31:5; Is. 48:17). Noijki tikmatstokej ika uelis titlaneltokaskej itech Biblia. Titlanemiliaj ijkon ken se ixtlamatki itech Biblia, yejua okijkuilo: “Itech nochi tlen toTajtsin yokijto, xonka nion achijtsin tlen xmelauak nion tlen xuelis nochiuas. Ikalpan toTajtsin tlaneltoka itech tlen yejua kijtoua pampa tlaneltokaj itech inTajtsin”. w23.01 2 párrs. 1, 2

Tikinyolchikauaj tokniuan ijkuak tikinpaleuiyaj más matlaneltokakan itech Jehová. Sekimej tokniuan kinpijpinaujtiaj. Sekimej kanaj melak kualoj noso melak najmanaj niman oksekimej melak youejkauj kichiatokej mayejko itonal Jehová. Nochi yejuin tlen kixnamikij uelis kichiuas maka sa matlaneltokakan itech Jehová. Ipan kachtopa siglo miyekej tokniuan noijki okixnamijkej yejon. Apóstol Pablo okinchikauili intlaneltok tokniuan ika iTlajtol toTajtsin. Kanaj sekimej tokniuan, akin judíos katkaj, xkimatiyaj kenon kinnankiliskej inchanejkauan ijkuak kimijliayaj ika tlen nomachtijtoyaj xmelauak katka niman ika san judíos kipiayaj tlen melauak. Ika yejon, tlen Pablo okimijli tokniuan hebreos melak okinyolchikauj (Heb. 1:​5, 6; 2:​2, 3; 9:​24, 25). Tokniuan ueliskia kitekitiltiskej tlen Pablo okimijli ipan icarta para kinnakiliskej akin kintejteneuayaj niman kimititiskej ika melauak katka tlen kineltokayaj. w22.08 23, 24 párrs. 12-14

Ipan yejuin xkuajli tlaltikpaktli kampa tlayekantika Satanás miyekej xok yakaj itech tlaneltokaj. ¿Tleka? Pampa kitaj kenon tekajkayauaj políticos, teopixkej, niman akin kipiyaj tomin. Niman noijki xtlaneltokaj intech iamigos, ivecinos, niman ichanejkauan pampa kinemiliaj ika noijki uelis kinkajkayauaskej. Yejuin xtechmojkatlachialtia pampa Biblia yokijtojka ika ipan “itlamiyan tonaltin” miyekej tekajkayauaskiaj niman tetlajtolchijchiuiliskiaj. Miyekej kichiuaj ijkon ken intajtsin, Satanás, akin xnoneki itech titlaneltokaskej (2 Tim. 3:​1-4; 2 Cor. 4:4). Tejuamej akin tiiteixpantijkauan Jehová, kuajli tikmatstokej ika uelis titlaneltokaskej itech Jehová. Kuajli tikmatstokej ika yejua techtlasojtla niman ika xkeman kintlalkauis iamigos (Sal. 9:10). Noijki uelis titlaneltokaskej itech Jesús pampa yejua omik topampa (1 Ped. 3:18). Niman noijki titlaneltokaj itech tlen kijtoua Biblia pampa yotikitakej ika melak techpaleuiya (2 Tim. 3:​16, 17). w22.09 2 párrs. 1, 2

Yemelak tiyolpakis xsan kijtosneki tipajkamikis, ka, yejuin pakilistli xsan panoua, yej uejkaui nochi monemilis. Niman ¿kenon uelis yemelak tiyolpakis? Ipan se itlamachtil, Jesús otechijli kenijki uelis yemelak tiyolpakiskej, yejua okijto: “Yolpakij akin kimatstokej ika kipiya ika kitejtemoskej tlen ualeua itech toTajtsin” (Mat. 5:​3, TNM). ¿Tlenon okijtosnek Jesús ijkuak okijto ika tiktejtemoskej tlen ualeua itech toTajtsin? Jesús okijtosnek ika tejuamej otexchijchiujkej para matiknekikan tikixmatiskej niman tikueyichiuaskej Jehová. Jehová se “toTajtsin akin paktika”, ika yejon, akin tiktekichiuiliaj noijki uelis tipakiskej (1 Tim. 1:​11, TNM). ¿San uelis tiyolpakiskej tla xtikpiyaj tlauejli? Ka. Niman ijkon tikijtouaj pampa Jesús okijto ika akin najmanaj pampa okichiujkej se tlajtlakojli noso akin kixnamiktokej itlaj tlen ouijtika, uelis yolpakiskej. Noijki okijto ika akin “kintlauelitaj san pampa kichiuaj on tlen kuajli” (Mat. 5:​4, 10, 11). Jesús okijto ika maski tikixnamiktokej itlaj tlen ouijtika, uelis yemelak tiyolpakiskej. ¿Kenon? Tla tikixmatij Jehová, tla tikueyichiuaj niman tla tiknisiuiyaj (Sant. 4:8). w22.10 6 párrs. 1-3

Matitlamachilisejkej. Akin tlamachilise kimatstok kemanon “xnauatis” niman kemanon “tlajtos” (Ecl. 3:7). Ipan seki kalpamej kijtouaj: “Totlajtol yeskia ken plata niman ijkuak xtinauatij yeskia ken oro”. ¿Tlenon kijtosneki? Ika kemantika más kuajli tla xtlaj tikijtouaj. Matikitakan tlenon kichiua se tokniuj akin youejkauj ken tlayekanketl. Kemantika yejua kinpaleuiya okseki tlanechikoltin ijkuak kiyektlaliaj se tlauejli. Se tlayekanketl akin kixmatstok yejuin tokniuj kijtoua: “Yejua xkeman kiteijlitinemi tlen panoua ipan okseki tlanechikoltin”. Pampa yejuin tokniuj tlayekanketl kiteititia ika tlamachilise, tlayekankej kitlakaitaj niman kimatstokej ika yejua xkiteijlis tlen kijliaj. Maka matitekajkayauakan. Tla xtitekajkayauaj, totech tlaneltokaskej. Akin nochipa kijtoua tlen melauak nimantsin uelis itech titlaneltokas (Efes. 4:25; Heb. 13:18). w22.09 12 párrs. 14, 15

Miyekej xkinekij kikakiskej on tlamachilistli tlen “tenotsa ne ipan on kalpanojtli” (Prov. 1:20). ¿Akinomej kijtoua Biblia ika xkinekij kikakiskej yejuin tlamachilistli? Akin xiixtojtomij, akin tepijpinaujtiaj niman akin tontos, noso akin xkinekij kikakiskej tlen kuajli (Prov. 1:​22-25). ¿Akinomej akin xiixtojtomij? Nochimej akin nimantsin kineltokatiuetsij tlen kimijliaj (Prov. 14:15). Tikmatstokej ika teopixkej niman políticos melak yotekajkayaujkej, niman ijkuak tlaltikpakchanejkej kimatij kenon yokinkajkayaujkej, melak noyolkokouaj. San ika, Proverbios 1:22 kinteneua akin kimatstokej ika kinkajkayaujtokej, san ika, ok kinokauiliaj makinkajkayauakan (Jer. 5:31). Yejuamej xkinekij nomachtiskej Biblia nion xkinekij kintlakamatiskej itlanauatiluan. Tejuamej xtiknekij tiyeskej ijkon ken akin kinokauiliaj makinkajkayauakan (Prov. 1:32; 27:12). w22.10 19, 20 párrs. 5-7

Ikalpan Jehová noijki kineki techtlajpiyas, ika yejon, techijlia tlenon tikchiuaskej. Miyekpa, techilnamiktia matikimijlikan tlayekankej kanon tichantij noso matikinmakakan tonúmero de télefono niman ijkon ijkuak itlaj panos, ueliskej techonnotsaskej. Noijki, kanaj ikalpan Jehová techijlis ika nonekis tokauaskej tochan, noso kanaj techijlis kanon uelis tontopaleuiskej noso kanon uelis tikonkuiskej tlen tijkuaskej. Noso noijki uelis techijliskej kemanon niman kenon uelis tikinpaleuiskej oksekimej. Tla xtitetlakamatij, uelis itlaj topan nochiuas noso uelis itlaj inpan nochiuas tlayekankej akin techtlajpiyaj niman melajkanemij itech toTajtsin (Heb. 13:17). Miyekej tokniuan oksekan yonochantitoj pampa kampa chantiyaj noixnamikilo noso yotlaixpoliuj. Yejuamej ika yolik nomatstiuej kampa aman chantij niman xkikajkauaj ika kitekichiuiliaj Jehová. Yejuamej kichiuaj ijkon ken tokniuan ipan kachtopa siglo akin okintlaueltokakej: nochiuiyan kiteijliaj “on kuajli tlajtojli yejuan kiteijlia ken Dios temakixtia” (Hech. 8:4). Ijkuak tenojnotsaj, yejuamej más tlanemiliaj itech iTekiuajyo toTajtsin niman xsan tlanemiliaj itech tlen xkuajli inpan panotika. Ijkon uelij yolpakij niman yolseuij. w22.12 19 párrs. 12, 13

Jehová techpatiojkaita tinochimej. Achto ika Jesús komintitlaniskia inomachtijkauan matenojnotsatij, okinpaleui maka makinmakasikan akin kintlaueltokayaj (Mat. 10:​29-31). Yejua okinteneuili se tototl tlen melak kixmatiyaj Israel: gorrión. Ipan yejon tonaltin, gorriones melak xpatiojkej katkaj. San ika, Jesús okimijli inomachtijkauan: “Pero nion semej on tototsitsimej ueli uetsi tla on toTajtsin xkauilia”. Niman sakin okijto: “Nemejuamej más nenvalerouaj xken miyekej tototsitsimej”. Jesús ijkon okinmasikamachilti inomachtijkauan ika Jehová nochimej kinpatiojkaitaya. Niman yejon okinpaleui maka manomojtikan ijkuak kintlaueltokayaj. Ijkuak inomachtijkauan Jesús yayaj ontenojnotsayaj ipan kalpamej niman kimitayaj gorriones, kanaj kilnamikiyaj tlen Jesús okimijlika. Tejua noijki uelis ijkon tikchiuas; ijkuak tikitas se tototsintli, xkilnamiki ika Jehová más mitspatiojkaita “xken miyekej tototsitsimej”. ToTajtsin mitspaleuis xtlaxiko ijkuak mitstlaueltokaskej. w23.03 18 párr. 12

Kemantika, kanaj tochanejkauan ueliskia techtlaueltokaskej noso ueliskia techkixtiskej kampa titekitij. Ijkuak tlen tikixnamiktokej melak uejkaui, ueliskia tiknemiliskej ika xok uelis noyektlalis niman noijki ueliskia melak tajmanaskej. Ijkuak ijkin topan panoua, Satanás ueliskia kichiuas matiknemilikan ika Jehová xtechtlasojtla. Noijki, ijkuak tikixnamiktokej tlen ouijtika, Satanás kineki matiktlajtlakoltikan Jehová noso ikalpan. Yeuejkaui ijkon inpan opanok israelitas ijkuak nemiyaj Egipto. Kachtopa yejuamej okineltokakej ika Jehová okitlapejpenijka Moisés niman Aarón para makinmakixti (Éx. 4:​29-31). San ika, ijkuak faraón opeuj más kintlajyouiltia, okitlajtlakoltijkej Moisés niman Aarón (Éx. 5:​19, 20). ¡Melak xkuajli ika israelitas okintlajtlakoltijkej itekipanojkauan Jehová akin itech melajkanemiyaj! Tla tejua youejkauj tikixnamiktika tlen ouijtika, xkijli Jehová nochi tlen tikmachilia niman itech xmopaleui. w22.11 15 párrs. 5, 6

Jehová techmaka tonemilis niman ueli kinyolitia akin yomijkej. Yejua okipaleui teotlajtoketl Elías para makiyoliti ikoneuj siuakaualtsintli akin chantiya Sarepta (1 Rey. 17:​21-23). Sakin, toTajtsin noijki okipaleui teotlajtoketl Eliseo para makiyoliti ikoneuj se siuatsintli akin chantiya Sunem (2 Rey. 4:​18-20, 34-37). Pampa yeuejkaui Jehová okinyoliti akin yomijkaj, techititia ika oksejpa uelis kinyolitis akin yomijkej. Niman ijkuak Jesús nemiya ipan tlaltikpaktli, kuajli okiteititi ika iTajtsin okimakak kojtilistli para teyolitis (Juan 11:​23-25, 43, 44). Aman Jesús nemi ne iluikak niman yokimakakej “nochi tekiuajyotl” para tlanauatis “ne iluikak niman nikan ipan in tlaltikpaktli”. Ika yejon, uelis kichiuas tlen okijto, ika “on mikatsitsimej” oksejpa nokuiteuaskej niman uelis nochipa nemiskej (Mat. 28:18; Juan 5:​26-29). w22.12 5 párr. 10

Ijkuak israelitas xkikakiyaj Ezequiel, kijtosnekiya ika xkikaktoyaj Jehová. Tlen Jehová okijli Ezequiel ipan tlen kijtoua tlaxelojli tlen aman tikitstokej melak okiyolchikauj, pampa maski judíos xkinekiyaj kikakiskej, xkijtosnekiya tla yejua xkuajli kichiujtoya itekiyo. Noijki, Jehová okijli Ezequiel ika ijkuak nochiuaskia tlen yejua yokijtojka, yejon judíos kimatiskiaj “ika intsajlan nemiya sen tiotlajtojketl” (Ezeq. 2:5; 33:33). Kuajli tikmatstokej ika tlen Jehová okijli Ezequiel melak okiyolchikauj niman okipaleui nochipa matenojnotsa. Tejuamej noijki tiyolchikauij pampa tikmatij ika Jehová yejua akin techtitlani. Yejua yotechmakak se kualtsin tekitl: tiyeskej iteixpantijkauan (Is. 43:10). Ijkon ken Jehová okijli Ezequiel: “Maka xmomojti”, tejuamej noijki techijlia: “Maka xmomojtikan” (Ezeq. 2:6). ¿Tleka xnoneki tikinmakasiskej akin techixnamikij? Pampa ijkon ken Ezequiel, Jehová yejua akin techtitlani niman techpaleuiya (Is. 44:8). w22.11 3, 4 párrs. 4, 5

Ipan yejuin tonaltin, melak tiktlasojkamatij pampa ipan tlanechikojli nemij tlayekankej niman tokniuan tlapaleuijkej akin uelis intech titlaneltokaskej. Melak tiktlasojkamachiliaj Jehová pampa yejuin tokniuan nokojtiliaj techpaleuiskej. Niman tejuamej, ¿kenon uelis tikteititiskej ika uelis totech tlaneltokaskej? Tejuamej melak tikintlasojtlaj tokniuan niman tiknekij tikmatiskej kenon nemij. San ika, ijkuak tikintlajtoltiskej kenon nemij, matikintlakaitakan niman maka matokalaktikan kampa xok kinamiki. Ipan tlanechikojli tlen onkatka ipan kachtopa siglo nemiyaj akin tetejteneuayaj, nokalaktiayaj kampa xkinnotsayaj, niman kiteijliayaj tlen xnonekiya (1 Tim. 5:13). Tejuamej xtiknekij ijkon tikchiuaskej. Matikonnemilikan ika se tokniuj siuatl techijlia ika kipiya se kokolistli noso ika itlaj kajmantika. Yejua techijlia nochi yejon pampa totech tlaneltoka niman kimati ika xitlaj tikteijliskej. Kuakon, maka matikteijlikan tlen otechijli pampa yejua xkineki ika oksekimej makimatikan. w22.09 10 párrs. 7, 8

Noneki tikitaskej tlen tikpiyaj ipan toyojlo niman ipan totlamachilis. Niman tla tikitaj ika tlen tikpiyaj xmás kuajli, noneki topatlaskej niman tiktlaliskej ipan toyojlo tlen Jehová kineki matikchiuakan. Maka matiknemilikan ika Jehová ikuajli techita san pampa kemantika titepaleuiyaj noso tikchiuaj tlen kuajli. Kuakon, noneki miyekpa toixtlaloskej niman ijkon topatlatiaskej. Ijkuak xok tikpiyaskej tlajtlakojli, nochipa tikyolpaktiskej Jehová. San ika, aman noneki tokojtiliskej tla tiknekij tikyolpaktiskej. Ipan Romanos 12:​2, Pablo okijto ika tla tiknekij tikyenkuiliskej totlamachilis, noneki tikmatiskej tlenon kineki Jehová matikchiuakan. Maka san ijkon matokauakan niman maka matijkauilikan ika akin xkitekichiuiliaj Jehová matechmauakan ika tlen kinemiliaj niman tlen kichiuaj, yej matikitakan tla titlanemilijtokej ken Jehová ijkuak itlaj tiknemilijtokej tikchiuaskej noso ijkuak itlaj tiktlapejpeniaj. w23.01 8, 9 párrs. 3, 4

¿Nochipa itlaj kichiua Jehová para kiyektlalis tlen tikixnamiktokej? ¿Jehová kiyekana nochi tlen panoua ipan tonemilis niman ijkon kichiua makisa itlaj tlen kuajli itech tlen xkuajli tikixnamikij? Ka, Biblia xijkon temachtia (Ecl. 8:9; 9:11). San ika, tlen ipan onochiuj José techmachtia ika ijkuak tikixnamikij tlen ouijtika, Jehová kita tlen topan nochiua niman techkaki ijkuak tiktlajtlaniliaj matechpaleui (Sal. 34:15; Is. 59:1). Niman xsan yejon, Jehová noijki techpaleuiya matitlaxikokan ijkuak tikixnamikij tlen ouijtika. ¿Kenon? Miyekpa, Jehová techyolseuiya niman techyolchikaua ijkuak más noneki (2 Cor. 1:​3, 4). ¿Tikilnamiki kemanon otikitak kenon Jehová omitspaleui niman omitsyolchikauj ijkuak tiknekiya más mamitspaleuikan? Kemantika, ueli tikitaj kenon Jehová yotechpaleui hasta ijkuak yopanok tlen tikixnamikij. w23.01 17, 18 párrs. 13-15

Yejuin xkuajli yolki noijki tlajtlachia ken on yolki tlen kipiya chikome itsontekon, san ika, yejuin yolki chichiltik. Apocalipsis kijtoua ika yejuin yolki yeskia kentla “on ixkopinajli tlamachijchijtli de on achtoj xkuajli yolki” niman ika yejua on “ika chikueyi rey” (Apoc. 13:​14, 15; 17:​3, 8). Noijtoua ika yejuin “rey” uajnesi, san ika, kipopolouaj, niman sakin oksejpa uajnesi. ¿Akinon kineskayotia yejuin xkuajli yolki? Organización de las Naciones Unidas, akin kinpaleuiya políticos. Ijkuak opeuj, onotokayoti ken Sociedad de Naciones, san ika, opopoliuj ijkuak opanok ika Okpa Guerra ipan nochi tlaltikpaktli. Niman sakin oksejpa ouajnes, niman aman noixmati ken Organización de las Naciones Unidas. Yejuin xkuajkualtin yolkamej noso tekiuajkej, kinyolchikauaskej tlaltikpakchanejkej makixnamikikan Jehová niman ikalpan. Uelis tikijtoskej ika kinsentlaliskej “nochimej on reyes [ . . . ] para nouijsokiskej iuan Dios” ipan iueyitonal noso Armagedón (Apoc. 16:​13, 14, 16). w22.05 10 párrs. 10, 11

Pampa Jesús ueliya tlaamapouaya, xsan kimatstoya tlen kijtouaya iTlajtol toTajtsin, noijki kitlasojtlaya niman kichiuaya tlen ompa ueliya. San matikonteneuakan tlen opanok teopan ijkuak yejua san kipiaya 12 xiuitl. Akin kuajli kixmatiyaj Tlanauatijli tlen okimakakej Moisés niman temachtiayaj ipan ueyi teopan, melak omojkatlachixkej ijkuak okitakej kenon Jesús melak kuajli kasikamatiya iTlajtol toTajtsin niman ijkuak okikakkej kenon tlanankiliaya (Luc. 2:​46, 47, 52). Tejuamej noijki uelis tikixmatiskej niman tiktlasojtlaskej iTlajtol toTajtsin tla miyekpa tikamapouaj. Tla tiknekij matechpaleui tlen tikamapouaj ipan iTlajtol toTajtsin noneki tikitaskej tlen Jesús okimijli akin kuajli kixmatiyaj Tlanauatijli, ken escribas, fariseos niman saduceos. Maski akin tlayekanayaj ipan tlaneltokiltin nochipa kiamapouayaj iTlajtol toTajtsin, xtlaj ika kinpaleuiaya. Jesús okijto yeyi tlemach tlen nonekiya kichiuaskej yejuin tlakamej para ueliskia kinpaleuis iTlajtol toTajtsin. Tlen okijto Jesús techpaleuis 1) kuajli matikasikamatikan tlen tikamapouaj, 2) tiknextiskej tlen uelis techpaleuis niman 3) tijkauiliskej ika iTlajtol toTajtsin matechpaleui. w23.02 8, 9 párrs. 2, 3

San seki matikteneuakan itech tlenon xnoneki tikchiuaskej. Xnoneki san titeixuetskilijtinemiskej, titlauaniskej, sajnoye titlakuaskej, tikitaskej pornografía, tikmauisoskej kampa nesi kenon nouisokilo nion tikijtoskej tlen ueliskia teyolkokos (Sal. 101:3). Diablo nochipa kitstika kenon uelis kichiuas maka sa matouikakan iuan Jehová (1 Ped. 5:8). Tla xtotlajpiyaj, Satanás ueliskia kitokas tlen xkuajli ipan toyojlo niman ipan totlamachilis. Niman yejon ueliskia kichiuas matipeuakan matitenexikolitakan, matitekajkayauakan, matitetlauelitakan, matoueyimatikan, matiknekikan tikpiyaskej miyek tlemach niman maka matiknekikan titetlapopoluiskej (Gál. 5:​19-21). Tla xtokixtiliaj tlen okitokak ipan toyojlo niman ipan totlamachilis, peuas noskaltis niman peuas tikchiuaskej tlen melak xkuajli, niman yejon melak techijtlakos ijkon ken se xkuajli xiujtli tlen melak teijtlakoua (Sant. 1:​14, 15). Matikteneuakan itlaj tlen ueliskia topan panos niman tlen ueliskia tiknemiliskej ika xtechijtlakos: touikaskej imiuan akin xkitekichiuiliaj Jehová. Maka matikilkauakan ika tla tosentlaliaj imiuan akin kichiuaj tlen xkuajli, noijki peuas tikchiuaskej tlen xkuajli (1 Cor. 15:33). Tla sa no tejuamej toitaj ijkon ken Jesús okijto, xsajnoye tosentlaliskej imiuan akin xkitlakamatij toTajtsin (Luc. 21:34; 2 Cor. 6:15). Tikitaskej ika uelis techijtlakos tla tosentlaliaj imiuan akin xnomachtiaj, ika yejon, ximiuan touikaskej. w23.02 16 párr. 7; 17 párrs. 10, 11

Tejua más yotikixmat Jehová, ika yejon, más yopeuj tiktlasojtla. Niman tikmatstokej ika tikneki más kuajli iuan timouikas aman niman ika tlayekapan, niman kema uelis ijkon tikchiuas. Jehová kineki xyolpakti (Prov. 23:​15, 16). Niman uelis tikyolpaktis ika tlen tikijtoua niman noijki ika tlen tikchiua. Tlen tiktlapejpenis tikchiuas ipan monemilis kiteititis tla yemelak tiktlasojtla Jehová. Melak kuajli tla tiktlapejpenia tikyolpaktis Jehová. ¿Kenon uelis tikteititis ika tiktlasojtla Jehová? Kachtopa, noneki tikchiuilis se teoyotl kampa tikijlis ika san yejua itech timosentemaka (Sal. 40:8). Sakin, noneki timoapolaktis niman ijkon teixpan tikteititis ika itech yotimosentemakak. Ijkuak timoapolaktis melak tiyolpakis niman noijki yolpakiskej tokniuan niman mochanejkauan akin ompa nemij. Niman yejon tonajli melak ueyi kijtosneki pampa ijkuakon nochi nopatla. Desde ijkuakon xok sa no tejua timoyolpaktis, aman tikyolpaktis Jehová (Rom. 14:8; 1 Ped. 4:​1, 2). Tikmatstokej ika uelis ouijtika tikitas tiknemilis tla timoapolaktis, san ika, xmatsto ika tla timoapolaktia, melak mitspaleuis xyolpaki. w23.03 5, 6 párrs. 14, 15