Septiembre

Tla kuajli titlajtouaj, oksekimej kitaskej ika akin kitekichiuiliaj toTajtsin xsan noijki kichiuaj ken akin xkitekichiuiliaj toTajtsin (Mal. 3:18). Kuakon, ken titlajtouaj kiteititia tla yemelak tiktekichiuiliaj Jehová. Matikitakan tlen ipan onochiuj tokniuj Kimberly. Ijkuak se ichpochtli akin iuan nomachtiaya san sekan okichijchiujkej se tarea, yejua okitak ika Kimberly xtetejteneuaya, kuajli tenotsaya niman xteuijuikaltiaya. Yejuin ichpochtli kinekiya kimatis tleka Kimberly xkichiuaya ijkon ken oksekimej. Niman sakin Kimberly opeuj kimachtia Biblia. ¡Jehová melak yolpaki ijkuak kita ika oksekimej nomachtiaj san pampa kitaj ika kuajli titlajtouaj! Tinochimej tiknekij ijkon tikchiuaskej para tikueyiteneuaskej Jehová. w22.04 5, 6 párrs. 5-7

Jesús okinkixtili María Magdalena yejon chikome xkuajkualtin espíritus. Kanaj melak okitlasojkamat. Ika yejon, onochiuj inomachtijkauj Cristo niman okitekitilti nochi tlen kipiaya para kipaleuis Jesús ijkuak tenojnotstinemiya (Luc. 8:​1-3). Maski María melak kitlasojkamatiya tlen Jesús okichiuj ipampa, kanaj ok xkasikamatiya ika Jesús kichiuaskia tlen más kipaleuiskia: yejua kitemakaskia inemilis “para nochi on akin kineltokas xpoliuis, yej kipiyas nemilistli para nochipa” (Juan 3:16). Maski María kanaj xkasikamatiya yejuin, yejua okiteititi ika kitlasojkamatiya tlen Jesús okichiuj ipampa. ¿Kenon? Xkeman okitlalkaui Jesús. Ijkuak pilkatoya ipan kojtli melaktik, María ompa onokauj niman ijkon kipaleuis Jesús niman oksekimej akin ompa iuan nemiyaj (Juan 19:25). Niman, ijkuak Jesús nemiya ipan tlalkontli, María niman oksekimej omemej siuamej okajuiyalitoj itlalnakayo Jesús (Mar. 16:​1, 2). Ijkuak oyoliuj Jesús, xnochimej inomachtijkauan ouelkej okitakej, san ika, María kema niman hasta iuan otlajto. ¡San xkonnemili kenon melak oyolpak María! (Juan 20:​11-18). w23.01 27 párr. 4

Matikilnamiktokan ika maski tla itlaj tikixnamiktokej, noneki nochipa titlatlachixtoskej niman tiktekichiuilijtoskej Jehová hasta ijkuak tlapopoliuis (1 Cor. 15:58; Mat. 24:13; Mar. 13:33). Matiktekichiuilikan Jehová ika nochi toyojlo. Jesús okitak ika tokniuan akin chantiyaj Laodicea xok más ika inyojlo kitekichiuilijtoyaj Jehová, ika yejon, okimijli: “Xmelauak kuajli tinechtlajsojtla nion xmelauak tinechtlauelita [ . . . ], hasta ixko tlajli tixpolijtikaj, xkaman tipaktikaj”. Ken tikitaj, tokniuan de Laodicea nonekiya más ika inyojlo kitekichiuiliskej Jehová (Apoc. 3:​16, 17, 19). ¿Tlenon techmachtia yejuin? Ika tla xok más ika toyojlo tiktekichiuiliaj Jehová, noneki tokojtiliskej más tiktlasojkaitaskej tlen techmaka ikalpan (Apoc. 3:18). Niman tla tiknekij chikauak tiktekichiuiliskej Jehová ika nochi toyojlo, xnoneki tiknekiskej tikpiyaskej miyek tlemach. w22.05 3, 4 párrs. 7, 8

Jehová melak youejkauj ika kuajchijchiujtiuj se amoxtli kampa nestokej miyek tokayomej. ¿Akinon kachtopa ompa okijkuilojkej? Abel, pampa yejua akin kachtopa omelajkanen itech Jehová (Luc. 11:​50, 51). Jehová melak youejkauj ika ompa kinualijkuilojtiuj miyek tokayomej. Ipan Biblia, yejuin amoxtli kitokayotia ken “se amoxtli tlen tetlalnamiktia” niman “amamoxtli yejuan kijtoua akinomej kipiyaj on yenkuik nemilistli para nochipa” (Mal. 3:​16, TNM; Apoc. 3:5; 17:8). Ipan yejuin amoxtli nestika intoka akin kiueyichiuaj Jehová, akin kitlakaitaj niman akin kitlasojtlaj. Nochimej akin ompa nestok intoka kichiaj nemiskej ne iluikak noso nikan ipan tlaltikpaktli. ¿Kenon uelis kijkuiloskej totokayo ipan yejon amoxtli? Tla kuajli touikaj iuan Jehová niman tla tikneltokaj ika iKoneuj, Jesucristo, omikiko topampa (Juan 3:​16, 36). ¿Xmelak ika tinochimej tikuelitaskiaj ompa maijkuiliujto totokayo? w22.09 14 párrs. 1, 2

Apocalipsis kijtoua ika ones “sen sanoyej ueyi niman temojtij yolki itoka dragón. In yolki tlatlachaya chichiltik” (Apoc. 12:3). Yejuin “dragón” kixnamiki Jesús niman ángeles akin kipaleuiyaj (Apoc. 12:​7-9). Noijki kixnamiki ikalpan toTajtsin niman kinyekana on xkuajkualtin yolkamej (Apoc. 12:17; 13:4). ¿Akinon yejon “dragón”? “On kouatl yejuan desde yeuejkaui nemi, itoka diablo noso Satanás” (Apoc. 12:9; 20:2). Yejua akin kinyekana nochimej itlauelikniuan Jehová. ¿Tlenon ipan nochiuas “dragón”? Apocalipsis 20:​1-3 kijtoua ika se ángel kontlajkalis Satanás ipan se pozo niman ompa kitsakuas. Satanás ompa tsauktos 1,000 xiuitl niman xok “kinkajkayauas on países”. Sakin kimakauaskej, san ika, sakin, yejua iuan idemonios kominxiniskej “ne tliko kampa tekuintikaj azufre”. Yejuin kijtosneki ika kinpopoloskej. ¡San xkonnemili kenon melak kualtsin tichantiskej ijkuak Satanás iuan idemonios xok nemiskej! w22.05 14 párrs. 19, 20

Jesús noijki kuelitaya tekitis. Yejua kojxinketl katka (Mar. 6:3). Itajuan kanaj melak kitlasojkamachiliayaj pampa kinpaleuiaya. Noijki, Jesús xtlajtlakole katka, ika yejon, kuajli kikixtiaya nochi tlen kichijchiuaya. Niman kanaj kinpiaya miyekej itlakoujkauan. San ika, maski Jesús kuelitaya itekiyo, noijki kixelouaya tiempo para kiueyichiuas Jehová (Juan 7:15). Niman ijkuak itenojnotstinemiya, yejua okijto: “Maka xtekitikan ipampa on tlakuajli yejuan saniman tlami, yej xtekitikan ipampa on tlakuajli yejuan kisa itech Dios yejuan kitemaka nemilistli para nochipa” (Juan 6:27). Niman ipan se itlamachtil ipan tepetl, yejua okijto: “Xsentlalikan nemoriquezas ne iluikak” (Mat. 6:20). Tlamachilistli tlen techmaka Jehová, techpaleuiya kuajli matikitakan totekiyo. Jehová techijlia matitekitkej niman kuajli matikchiuakan totekiyo. w22.05 22 párrs. 9, 10

Timoteo okitak ika inan kiteititiaya ika yemelak tlaneltokaya itech Jehová. Noijki okitak ika tlen kichiuaya inan kiteititiaya ika yemelak kitlasojtlaya Jehová niman ika melak yolpakiya ijkuak kitekichiuiliaya. Aman, miyekej nanantin noijki kichiuaj ken Eunice niman inueuentsin noso inkoneuan yonopatlakej pampa kitaj tlen kuajli kichiuaj (1 Ped. 3:​1, 2). Tejua noijki uelis ijkon tikchiuas. Matikitakan kenon. Nochipa kuajli xmouika iuan Jehová (Deut. 6:​5, 6). Nochimej nanantin melak kintlasojtlaj inkoneuan niman kinekiskiaj nochipa kuajli manemikan. Kanaj kemantika xtikchiua tlen tiknekiskia, xtimokouilia tlen tikuelitaskia noso kemantika hasta xtimoseuiya pampa tikneki kuajli tikintlajpiyas mokoneuan. Maski tikpiya miyek tekitl, xkilnamiki ika noijki noneki tikxelos tiempo para tikchiuas teoyotl, timomachtis Biblia, tias tlanechikoltin niman ijkon nochipa kuajli timouikas iuan Jehová. Tla ijkon tikchiua, mochanejkauan niman oksekimej kitaskej ika yemelak tiktlasojtla Jehová. w22.04 16 párr. 1; 19 párrs. 12, 13

Pampa Jehová Ueyixtika Juez, xnoneki tajmanaskej kenon kintlajtlakolmakas oksekimej. ToTajtsin kitas kenon tetlajtlakolmakas. ¡Yejon melak techyolseuiya! (Rom. 14:​10-12). Uelis kuajli tikmatstoskej ika yejua nochipa temelajkatlalis niman tetlajtlakolmakas ijkon ken kinamiki (Gén. 18:25). Yejua nochipa kichiuas tlen kuajli. Jehová kipopolos tlajtlakojli tlen melak techtlajyouiltijtika. ¡Tinochimej tiknekij mayejko yejon tonajli! Yejua kichiuas maka sa matikualokan niman maka sa matoyolkokokan (Sal. 72:​12-14; Apoc. 21:​3, 4). Nochi tlen xkuajli topan yonochiuj tikilkauaskej. Niman aman ika xiyejko yejon tonajli matotlapopoluijtiakan ijkon ken Jehová kineki. w22.06 13 párrs. 18, 19

Se juez noneki melak kuajli kimixmatis nochi tlanauatiltin. Yejua noneki kasikamatis tlenon kuajli niman tlen xkuajli. Se juez noneki kimatstos nochi tlen opanok ijkuak yakaj kitlajtlakolmakas. ¿Niman akinon kita nochi tlen panoua? Kema, san Jehová. Ika yejon, tikijtouaj ika san Jehová kinamiki yes juez. Jueces miyekpa nopopolouaj pampa xkimatij nochi tlen opanok, yejuamej san kimatij tlen kitaj niman tlen kimijliaj oksekimej. San ika, Jehová xkeman nopopoloua ijkuak tetlajtlakolmaka pampa yejua kimatstika nochi tlen opanok (Gén. 18:​20, 21; Sal. 90:8). Yejua kuajli kimatstok kenon titlachijchiujtin, kenon otechiskaltijkej, kenon tichantij, kenon titlanemiliaj, niman kenon tomachiliaj. Noijki, Jehová kita tlen onka ipan toyojlo. Ika yejon, kimatstok tleka itlaj tikchiuaj noso tleka tiknekij itlaj tikchiuaskej. Ken tikitaj, Jehová nochi kitstika niman xtlaj uelis tikiyaniliskej (Heb. 4:13). Kuakon, Jehová kachtopa kita nochi tlen opanok niman ijkon kijtos tla yakaj kimelaua kitlapopoluis. w22.06 4 párrs. 8, 9

Melak kuajli tla tikitaj tlen Satanás okichiuili Job, pampa aman noijki ijkon kichiua. Satanás okijto ika xmelauak tiktlasojtlaj Jehová, pampa okijto ika tiktlalkauiskej tla yakaj kinekiskia techmiktis. Noijki kijtoua ika toTajtsin xtechtlasojtla niman ika xkitlasojkamati tlen tikchiuaj ipampa. San ika, akin kitlaliaj inyojlo itech Jehová, Satanás xkeman uelis kinkajkayauas. Ijkuak Job okixnamik miyek tlen ouijtika, okitak ika nonekiya más yolyemanki yes. Kuakon, ijkuak tejuamej tikixnamikiskej tlen ouijtika noijki matikitakan kanon noneki topatlaskej (Job 42:3). Ijkuak tikixnamikij tlen ouijtika, tikitaj tlen kuajli tikchiuaj niman tlen xkuajli tikchiujtokej. Ijkuak tikitaskej ika tikchiujtokej itlaj tlen xkuajli, uelis nimantsin topatlaskej. w22.06 23 párrs. 13, 14

Jehová noijki techijlia ika yejua techpaleuis. Achto kijtos: “Nemejuamej nennotestigos”, yejua okijto: “Maski nenkipanoskej miyek tlajyouilistli, ken nenkipanoskiaj sen ueyi atl noso tlitl, nejua nochipa ninemis nemouan, niman xnenamimikiskej noso xnentlatlaskej” (Is. 43:2). Kemantika, ijkuak titenojnotsaj tikixnamikij tlen melak ouijtika tlen yeskia kentla atentli noso kentla tlitl. San ika, Jehová techpaleuiya niman ijkon maka matijkajkauakan ika titenojnotsaj (Is. 41:13). Miyekej xkinekij techkakiskej. San ika, kuajli tikmatstokej ika yejon xkijtosneki tla tejuamej xkuajli tikchiujtokej totekiyo. Tikmatstokej ika Jehová yolpaki ijkuak xtikajkauaj ika titenojnotsaj niman yejon melak techyolchikaua. Apóstol Pablo okijto: “Dios kitlaxtlauilis cada se ken kitocaroua ipampa itekiu” (1 Cor. 3:8; 4:​1, 2). w22.11 4 párrs. 5, 6

Ipan yejuin tonaltin, tikitaj kenon teotlajtoltin inochiujtokej pampa miyekej “tlakamej itech nochi tlajtoltin tlen onka ipan países” inomachtijtokej tlen melauak itech toTajtsin (Zac. 8:23; Sof. 3:​9, TNM). Aman ipan 240 países nemij ipantsin 8 millones itekipanojkauan Jehová. ¡Niman sejse xiuitl melak miyekej noapolaktiaj! San ika, xsan techyolpaktia ika melak yotimiyekiyakej, tejuamej más techyolpaktia ika yejuin yenkuikej tokniuan yopeujkej kichiuaj tlen Jehová kuelita. Biblia kijtoua ika yejuamej ikipiyaj “yenkuik nemilistli” (Col. 3:​8-10). Yejuin tokniuan xok auilnemij, xok teuisokij niman xok techikoitaj. Inochiujtika tlen kijtoua Isaías 2:​4, ompa kijtoua: “Xok kintlayejyekoltiskej para ueliskej tlauisokiskej”. ¿Kenon tepaleuiya pampa tikteititiaj ika tikpiyaj “yenkuik nemilistli”? Kichiua ika miyekej manonisiuikan ipan ikalpan toTajtsin niman tikteititiaj ika tejuamej yemelak tikchiuaj ken Cristo, akin techyekantika (Juan 13:35). Niman nochi yejon kiteititia ika Jesús techpaleuijtika. w22.07 9, 10 párrs. 7, 8

Ijkuak tiknotsaskej Jehová noneki tikititiskej ika melak tiktlakaitaj. Matitlanemilikan itech tlen okitakej Isaías, Ezequiel, Daniel niman Juan. Nochimej okitakej ika Jehová se tekiuaj akin melak ueyixtika. Isaías okitak ika Jehová “yeuatikatka ipan sen trono yejuan onkatka sanoyej tlakpak” (Is. 6:​1-3). Ezequiel okitak ika Jehová yeuatoya ne iluikak ipan icarro niman iyeualiujyan petlaniya itlaj ken se akosamalotl (Ezeq. 1:​26-28). Daniel okitak “sen Ueuentsin yejuan yejuekaui nemiya” niman itlaken istak katka niman itrono kampa yeuatoya uajkisaya tlitl (Dan. 7:​9, 10). Niman Juan noijki okitak ika Jehová yeuatoya ipan itrono niman iyeualiujyan onkatka se akosamalotl tlen “petlantikatka xoxojki ken on tetl itoka esmeralda” (Apoc. 4:​2-4). Ijkuak tikitaj ika Jehová melak ueyixtika, techpaleuiya matiktlasojkamatikan ika ueli tiknotsaj niman techpaleuiya matikilnamikikan ika melak noneki matiktlakaitakan. w22.07 20 párr. 3

Telpokamej niman ichpokamej, Satanás xkineki xchikauakan nemotlaneltok, ika yejon, kineki xometlamatikan. Yejua kinekiskia maka sa xneltokakan tlen kijtoua Biblia. Ajsis tonajli ijkuak sekimej mitsijliskej ika xnemi se toTajtsin akin otexchijchiuj niman ika tejuamej tinemij ipampa evolución. Kanaj tejua xtitlanemiliaya itech yejuin pampa tipitentsin katka, san ika, aman ika yotiueyiyak, kanaj yejon tlen mitsmachtiskej ipan moescuela. Tlen kijtoskej momaestros uelis kichiuas xometlamati niman uelis peuas tiknemilis ika yemelak tlen kijtouaj. San ika, xkilnamiki ika yejuamej kanaj xnomachtiaj itech toTajtsin akin otexchijchiuj. Xkilnamiki tlen kijtoua Proverbios 18:17: “Yejuan achtoj tlajtoua para nomanauis, nesi ken melauak tlen kijtoua. Pero ijkuak yejko on itlauelikniu, yejua kipanextia ika xmelauak tlen okijtoj”. Yejuin texto mitsititia ika xnoneki tikneltokas nochi tlen mitsijliaj ipan escuela. ¿Tlenon uelis tikchiuas? Kuajli xmomachti iTlajtol toTajtsin niman toamatlajkuiloluan. w22.08 2 párr. 2; 4 párr. 8

Tejuamej tiknekij tikasikamatiskej tlen tikamapouaj ipan Biblia pampa san ijkon uelis techpaleuis. Matitlanemilikan itech tlen Jesús okijli “sen temachtijketl ikan itlanauatil Dios” (Luc. 10:​25-29). Yejuin tlakatl kinekiya kimatis tlenon nonekiya kichiuas para uelis nochipa nemis, niman Jesús okipaleui matlanemili itech iTlajtol toTajtsin. Okitlajtolti: “¿Tlinon tlajkuilolnestikaj ipan on tlanauatijli? ¿Kenijki tikajsikamati?”. Yejuin tlakatl kuajli ken otlanankili. Okiteneuj tlen kijtoua iTlajtol toTajtsin niman okijto ika nonekiya kitlasojtlas toTajtsin niman itlaltikpakikniuj (Lev. 19:18; Deut. 6:5). San ika, sakin yejuin tlakatl otetlajtolti: “¿Akinonon notlaltikpakikniu yejuan noneki niktlajsojtlas?”. Pampa ijkin otetlajtolti, okiteititi ika xkasikamatiya tlen yokiamapoujka. Ika yejon, xkimatiya kenon kichiuas tlen kijtoua iTlajtol toTajtsin. Xuelis tikasikamatiskej iTlajtol toTajtsin tla xtechpaleuiya Jehová, ika yejon, tiktlajtlaniliaj matechmaka iespíritu santo niman ijkon kuajli tikitstiaskej tlen tikpouaskej. Niman noijki noneki matiktlajtlanilikan matechpaleui matikchiuakan tlen kemach otikonamapoujkej. w23.02 9 párrs. 4, 5

Ijkuak tikixmatij se tokniuj, kemantika techtlajtoltia: “¿Kenon otikixmat tlen melauak?”. Niman tejuamej ika nochi toyojlo tiknankiliaj. Noijki tikuelitaj tikinkakiskej tokniuan ijkuak techijliaj kenon okixmatkej Jehová niman kenon opeuj kitlasojtlaj. Tejuamej noijki ika nochi toyojlo tikimijliaj tleka tikuelitaj tinemiskej ipan ikalpan Jehová (Rom. 1:11). Ijkuak ijkin tonojnotsaj, techilnamiktia ika melak kualtsin ika tiiteixpantijkauan Jehová. Noijki techilnamiktia ika tiknekij nochipa tinemiskej ipan “tlen melauak”, noso ika tiknekij nochipa tikyolpaktiskej Jehová. Tejuamej melak tiktlasojtlaj tlen melauak. ¿Tleka? Kachtopa, pampa tiktlasojtlaj Jehová, akin techmachtia tlen melauak. Ipan iTlajtoltsin Biblia tikitaj ika toTajtsin melak kojtik niman ika yejua okichijchiuj iluikak niman tlaltikpaktli. Ompa noijki tiuelij ika Jehová se toTaj akin melak techtlasojtla niman kinektika techpaleuis (1 Ped. 5:7). w22.08 14 párrs. 1, 3

Apóstol Pablo okinyolchikauj tokniuan manotlasojtlakan niman makichiuakan “on tlen kuajli” inpampa oksekimej (Heb. 10:24). Pablo xsan okinyolseui tokniuan, yejua noijki okinpaleui. Ken ijkuak otlaapistik Judea, yejua okimitkili tokniuan tlen kikuaskiaj (Hech. 11:​27-30). Maski Pablo chikauak tenojnotstinemiya niman temachtijtinemiya, yejua nochipa kitaya kenon kinpaleuis tokniuan akin xmiyek tlemach kinopiliayaj. Ijkon okimititi tokniuan ika Jehová nochipa kintlajpiyaskia. Aman, tejuamej noijki tikinchikauiliaj intlaneltokil tokniuan ijkuak tiktekitiltiaj totiempo niman tokojtilis niman ijkon tikominpaleuiskej kampa tlaixpoliui niman ijkuak tiktemakaj totomintsin. Ijkuak ijkin tikchiuaj, tikinpaleuiyaj tokniuan más makineltokakan ika Jehová nochipa kinpaleuis. w22.08 24 párr. 14

Ipan Biblia onka miyek teotlajtoltin tlen yonochiujkej, niman seki melak youejkaujka ika yonoijkuilojkaj. Tlen yeuejkaui opanok techititia ika yejon teotlajtoltin yemelak yonochiujkej. Yejon xtechmojkatlachialtia pampa tikmatstokej ika Jehová yejua akin okimijto yejon teotlajtoltin. Matitlanemilikan itech ueyikalpan Babilonia. Kanaj ipan ika chikueyi siglo, Jehová okichiuj ika Isaías makijto ika kinotlatkitiskiaj Babilonia. Isaías hasta okijto ika akin kinotlatkitiskia itoka yeskia Ciro, niman noijki okijto kenon kinotlatkitiskia yejon ueyikalpan (Is. 44:​27–45:2). Noijki okijto ika sakin kixoxotoniskiaj Babilonia niman ika xok yakaj ompa chantiskia (Is. 13:​19, 20). Maski Babilonia melak ueyixtoya, medos niman persas okinotlatkitijkej ipan xiuitl 539 ijkuak xpeuaya xiuitl 1, niman aman xok yakaj ompa chanti. w23.01 4 párr. 10

Jehová yotechinmakak miyekej tokniuan akin tikimitaj ken tochanejkauan, niman yejon melak techpaleuiya (Mar. 10:​29, 30). Ipan nochi tlaltikpaktli tikinpiyaj tokniuan akin kitlasojtlaj Jehová niman kintlakamatij itlanauatiluan, ijkon ken tejuamej tikchiuaj. Tinochimej melak totlasojtlaj maski xsan noijki ken titlajtouaj, ken otechiskaltijkej niman ken totlakentiaj. Niman maski yakaj kemach tikixmatij, tejuamej itiktlasojtlaj. Noijki sajnoye techyolpaktia ika san sekan tikueyichiuaj Jehová, ika yejon, melak noneki kuajli matouikakan (Sal. 133:1). Kemantika tokniuan techpaleuiyaj ijkuak itlaj tikixnamikij (Rom. 15:1; Gál. 6:2). Yejuamej techyolchikauaj nochipa matiktekichiuilikan Jehová niman más kuajli iuan matouikakan (Heb. 10:​23-25). ¡San xkonnemili kenon tinemiskiaj tla tokniuan xtechpaleuiskiaj! Kanaj xtikxikoskiaj nochi tlen texchiuilia Satanás niman akin kinyekana. w22.09 2, 3 párrs. 3, 4

Noijki xnoneki tiktlejkoltiskej ipan redes sociales itlaj tlen oksekimej xnoneki kimatiskej. Pampa ijkuak itlaj tiktlejkoltiaj xtikmatij kenon kitekitiltiskej niman hasta kanaj uelis titeyolkokoskej. Noijki, ijkuak totlauelikniuan kinekiskej itlaj matikimijlikan intech tokniuan, xnoneki itlaj tikijtoskej pampa ueliskia itlaj kinchiuiliskej. Yejuin ueliskia panos ijkuak se policía techtlajtoltis itlaj intech tokniuan ipan se país kampa xtechkauiliaj matitenojnotsakan nion matosentlalikan. ¿Tlenon uelis techpaleuis maka itlaj matikijtokan? Tla tikchiuaj ijkon ken okijto se salmista ipan Salmo 39:1: “Ninokamatsakuas”. Tla tiknekij ika tochanejkauan, toamigos, tokniuan niman oksekimej totech matlaneltokakan, noneki tokamateltiskej niman tokamatsakuaskej. w22.09 13 párr. 16

Tla tiknekij yemelak tiyolpakiskej, noneki tikamapouaskej niman tomachtiskej Biblia. Jesús okijto ika iTlajtol toTajtsin yeskia kentla tlakuajli. Niman noneki tikamapouaskej tla tiknekij kuajli tinemiskej. Ika yejon, Jesús okijto: “Xsan ikan tlaxkajli uelis nemis sen tlakatl, yej no ikan nochi tlajtojli yejuan Dios kijtoua” (Mat. 4:4). Kuakon, mojmostla matikamapouakan iTlajtol toTajtsin, Biblia. Jehová melak techtlasojtla, ika yejon, ipan Biblia techijlia tlenon uelis tikchiuaskej tla tiknekij yemelak tiyolpakiskej. Ompa techijlia tleka otexchijchiuj, kenon uelis iuan touikaskej niman tlenon noneki tikchiuaskej tla tiknekij matechtlapopolui. Noijki, ompa techijlia tlen kualtsin techmakas ika tlayekapan (Jer. 29:11). Ijkuak tejuamej tiuelij nochi yejuin ipan Biblia, melak techyolpaktia. Ika yejon, tla kemantika melak tajmanaj pampa tikpiyaj se tlauejli, más matikamapouakan iTlajtol Jehová niman itech matitlanemilikan. w22.10 7 párrs. 4-6

Biblia techijlia maka matokauilikan matechkajkayauakan. Tla tikchiuaj tlen kijtoua Biblia, tikpiyaskej más tlamachilistli niman tikitaskej ika itlanauatiluan Jehová techpaleuiyaj matiktlapejpenikan tlen kuajli niman maka matokalaktikan ipan tlauejli. Melak techpaleuis tla titlanemiliaj itech tlen tikchiujtokej. Tla tejua youejkauj timomachtia Biblia niman tiauj tlanechikoltin, san ika, xitimoapolaktia, xmotlajtolti: “¿Tleka xninosentemaka itech Jehová nion xninoapolaktia?”. Noso tla yotimoapolakti, xmotlajtolti: “¿Nikita ika aman más kuajli nitenojnotsa niman nitemachtia itech Biblia? ¿Tlen niktlapejpenia kiteititia ika ninoyekana ika Biblia? ¿Kuajli nikinnotsa oksekimej ijkon ken Jesús kichiuaskia?”. Tla tikitaj ika noneki topatlaskej, más kuajli matomachtikan tlen Jehová techijlia pampa matikilnamikikan ika yejua “kimaka tlamatkilistli yejuan xe ixtojtomij” (Sal. 19:7). w22.10 20 párr. 8

Ezequiel okitak ika iespíritu santo toTajtsin melak kojtik. Ipan se tlatlachalistli okitak kenon espíritu santo kinpaleuiaya iluikaktekitkej niman koliniaya noso kiuiyoniaya icarro Jehová (Ezeq. 1:21). Ezequiel techijlia tlenon okichiuj: “Ijkuak ijkon onikitak, oninotlakuantelkets niman oninopachoj hasta ipan tlajli”. Pampa melak omojkatlachix, hasta ouets ipan tlajli (Ezeq. 1:28). Kanaj ijkuak Ezequiel tlanemiliaya itech yejon tlatlachalistli tlen okitak, kuajli kasikamatiya ika iespíritu toTajtsin kipaleuiskia nochipa matenojnotsa. Jehová ijkin okinauati Ezequiel: “Tejua tlaltikpaktlakatl, xmotelketsa pampa nejua nimitsnotsas”. Tlen Jehová okinauati niman iespíritu toTajtsin okipaleui manokuiteua (Ezeq. 2:​1, 2). Niman ijkuak Ezequiel otenojnots, “ipoder toTEKO”, noso iespíritu santo, nochipa okipaleui (Ezeq. 3:22; 8:1; 33:22; 37:1; 40:1). w22.11 4 párrs. 7, 8

Nikan Isaías kijtojtoya ika Jehová kentla yaskia inkuitlapan inomachtijkauan para kinyekantias niman kimilijtias kanon noneki yaskej. ¿Kenon tokuitlapan tikaktiuej itlajtol toTajtsin ipan yejuin tonajli? Tla tikpouaj Biblia, pampa desde yeuejkaui ompa ijkuiliujtika iTlajtol toTajtsin. Kuakon, ijkuak tikpouaj Biblia kentla Jehová technotstoskia tokuitlapan (Is. 51:4). ¿Tlenon noneki tikchiuaskej tla tiknekij ika Jehová más kuajli matechyekana? Isaías okiteneuj ome tlemach. Kachtopa okijto “In yejua kuajli ojtli”, niman ika ome, “Maka xtlalkauikan”. Kuakon, xsan noneki tikixmatiskej “ojtli”, noijki noneki ompa tiaskej niman xtiktlalkauiskej. Jehová kitekitiltia iTlajtol niman ikalpan para techijlis tlen kineki matikchiuakan niman noijki techijlia kenon uelis tikchiuaskej tlen yejua techmachtia. Noneki tikchiuaskej yejuin ome tlemach tla tiknekij titlaxikoskej ika pakilistli ijkuak tiktekichiuiliskej Jehová. San ijkon kuajli tikmatstoskej ika Jehová techteochiuas. w22.11 10, 11 párrs. 10, 11

Sakin ika sekimej apóstoles omijkej, sekimej tlakamej akin kijtouayaj ika kichiuayaj ken Cristo okalajkej ipan tlanechikojli (Mat. 13:​24-27, 37-39). Pablo ijkin okijtojka itech yejuin tlakamej: “Kitemachtiskej on tlen xmelauak, para on tlaneltokakej kinuikaskej” (Hech. 20:30). Yejuamej kijtouayaj ika xmelauak katka ijkuak Biblia kijtoua ika Cristo “san sejpa onotemakak ken uentli para miyekej kinkixtilis intlajtlakoluan”. Yejuamej temachtiayaj ika nonekiya miyekpa nouentlalis iyesyo niman itlalnakayo Cristo (Heb. 9:​27, 28). Ipan yejuin tonaltin, miyekej tlaltikpakchanejkej akin kipiyaj kuajli inyojlo ijkin tlaneltokaj. Yejuamej chijchikueyi noso mojmostla yauej teopan niman ijkon kipanoltiskej tlen kitokayotiaj el sacrificio de la misa. Noijki, seki religiones xmás kilnamikij imikilis Jesús, niman miyekej akin nemij ipan yejon religiones xkasikamatij tleka omikiko Jesús. w23.01 21 párr. 5

Ijkuak Jesús tekiuajtitos Mil xiuitl, kinyolitis akin yomijkej niman kinpaleuis tlaltikpakchanejkej akin tetlakamatij maka makipiyakan tlajtlakojli. Nochimej akin Jehová kitas ika yolmelajkej kinmakas “on kuajli tlajli, para ipan chantiskej nochipa” (Sal. 37:​10, 11, 29). “Niman on mikilistli, yejuan nochi tlak[a]tl itlauelikniu, yejua sa ika nochi kitlanis Cristo” (1 Cor. 15:26). ¡Melak tiyolpakiskej pampa xok onias mikilistli! Uelis kuajli tikmatstoskej ika nochipa tinemiskej pampa iTlajtol toTajtsin ijkon kijtoua. Pampa tikmatstokej ika uelis tikpiyaskej nemilistli tlen xkeman tlamis, techpaleuiya matimelajkanemikan itech Jehová maski tikixnamikij tlen melak ouijtika ipan yejuin itlamiyan tonaltin. San ika, tla tiknekij tikyolpaktiskej Jehová, noneki timelajkanemiskej itech niman itech Jesús pampa yemelak tikintlasojtlaj niman xsan pampa tiknekij timakisaskej (2 Cor. 5:​14, 15). Tla yemelak tikintlasojtlaj Jehová niman Jesús, tiknekiskej tikchiuaskej ken yejuamej niman titenojnotsaskej (Rom. 10:​13-15). Ijkuak más tokojtiliaj tiktemakaskej tlen tikpiyaj niman noijki ijkuak tokojtiliaj xsan totech titlanemiliskej, Jehová más kineki touan nouikas niman xkeman techkauas. w22.12 6, 7 párrs. 15, 16

Ijkuak techtlaueltokaj, xok ueli tonechikouaj, xok ueli titenojnotsaj niman xok ueli tikchiuaj okseki tlemach pampa tekiuajkej uelis techajsiskej. Kanaj melak tiajmankamikij pampa san tiknemilijtokej tlenon ueliskia panos. Niman xtlaj tlenon tla ijkon tomachiliaj. San ika, noneki totlajpiyaskej. Jesús okijto ika ijkuak kintlaueltokaskiaj inomachtijkauan, ueliskia xok más tlaneltokaskej (Juan 16:​1, 2). Tikmatstokej ika Jesús okijto ika techtlaueltokaskiaj, san ika, noijki okijto ika uelis timelajkanemiskej (Juan 15:20; 16:33). Ijkuak xok techkauiliskej tikueyichiuaskej Jehová, kanaj sucursal noso tlayekankej techijliskej kenon uelis totlajpiyaskej, kenon tikseliskej tlen ika tomachtiskej niman kenon uelis titenojnotsaskej. Ijkuak ijkon panos, matikintlakamatikan akin techyekanaj (Sant. 3:17). Niman maka keman matikijlikan akin xkinamiki kimatis itlaj itech se tokniuj (Ecl. 3:7). w22.12 20, 21 párrs. 14-16

Ijkon ken yeuejkaui okijto Jesús, yejua ok kinyekantika inomachtijkauan para matenojnotsakan itech iTekiuajyo toTajtsin ipan nochi tlaltikpaktli. Yejua kitekitiltia ikalpan Jehová niman ijkon techmachtis kenon titenojnotsaskej itech kuajli tlajtoltin niman techmaka tlen techpaleuis matitenojnotsakan (Mat. 28:​18-20). Aman tejuamej san noneki tikchiuaskej tlen Jesús yotechnauati: titenojnotsaskej, titemachtiskej niman titlatlachixtoskej chika tikchiaj matlapopolo Jehová. Nochipa tikmatstoskej ika nochiuas tlen tikchiaj tla tikchiuaj tlen kijtoua Hebreos 6:​11, 12. Jehová yokijto kemanon kitlamiltis tlen Satanás kiyekantok. Ijkuak yejkos yejon tonajli, yejua kichiuas manochiuakan teotlajtoltin tlen uajlauej ipan Biblia. Niman, maski kemantika tikmachiliaj ika melak youejkauj ika xyejko itonal Jehová, Biblia kijtoua ika “xuejkauis ika yejkos” (Hab. 2:​3, TNM). Ika yejon, kuajli yotiknemilijkej tikchiuaskej ijkon ken kijtoua Miqueas 7:7 itech Traducción del Nuevo Mundo: “Nejua nitlatlachixtos ipampa Jehová. Nejua ika noyojlo nitlamachias ipampa toTajtsin akin nechmakixtia”. w23.02 19 párrs. 15, 16

Matontlanemilikan itech se tlakatl akin kineki ajsis ikuatipan se tepetl. Ijkuak tepetlejkotias, uelis noseuijtias niman ijkon kitas kenon melak tlakualtsinkan kampa nemi. Noijki ijkon, kemantika noneki toteltiskej niman tiknemiliskej kenon Jehová techpaleuijtika matikxikokan se tlauejli. Ijkuak itlayoua, uelis totlajtoltiskej: “¿Kenon onechteochiuj Jehová yejuin tonajli? Maski ok nikixnamiktika tlen ouijtika, ¿tlenon kichiujtika Jehová para nechpaleuis manitlaxiko?”. Matokojtilikan mojmostla matikitakan kenon Jehová otechteochiuj ipan yejon tonajli. Ijkuak itlaj tikixnamiktokej, tiktlajtlaniliaj Jehová makikixti noso makiyektlali tlen tikixnamiktokej (Filip. 4:6). San ika, maka matikilkauakan kenon techteochiujtika Jehová. Matikilnamikikan ika Jehová kijtoua ika techkojtilis niman techpaleuis matitlaxikokan. Kuakon, nochipa matiktlasojkamachilikan Jehová pampa yejua techpaleuiya. Tla ijkon tikchiuaj, tikitaskej ika maski tikixnamiktokej tlen ouijtika Jehová techpaleuiya (Gén. 41:​51, 52). w23.01 19 párrs. 17, 18

Matotlajtoltikan: “¿Tlen aman nikchiujtika kiteititia ika nikasikamati ika sa achijtsin poliui para toTajtsin tlapopolos? Ijkuak niknemilia kanon nitekitis noso tla ninomachtis universidad, ¿kachtopa nikita tla tlen niktlapejpenis xkichiuas maka sa maniktekichiuili Jehová? ¿Nikneltoka ika Jehová nechmakas tlen noneki?”. Jehová melak yolpaki ijkuak kita ika tokojtiliaj tinemiskej ken yejua kineki (Mat. 6:​25-27, 33; Filip. 4:​12, 13). Noneki miyekpa tikitaskej kenon titlanemiliaj, niman tla tikitaj ika xmás kuajli ken titlanemiliaj, noneki topatlaskej. Pablo ijkin okimijli tokniuan akin chantiyaj Corinto: “Sano nemejuamej kuajli xmixtlalokan para nenkitaskej tla nenmelajkanemij ipan nemotlaneltok. ¡Xmotlatlatakan!” (2 Cor. 13:5). Kuakon, tla tiknekij tikyenkuilijtiaskej totlamachilis, noneki tikpouaskej iTlajtol toTajtsin, titlanemiliskej ken toTajtsin tlanemilia niman, tla tikitaj ika itlaj xkuajli tikchiujtokej, nimantsin topatlaskej para tikyolpaktiskej Jehová (1 Cor. 2:​14-16). w23.01 9, 10 párrs. 5, 6