2 Timoteo

3 Böi zi lö aboto ba dödöu, so dania mbaŵa si lö sökhi ba ngaluo safuria andre. 2 Amuata niha ba daʼö ha tana khöra laʼalui, sangomasiʼö anaʼa, sanuno yaʼira, sangosebua, sangoʼaya, si lö mamondrongo li zatua, si lö mangila mangandrö saohagölö, si faröi, 3 si lö mangomasiʼö awöra, si lö fahasara dödö, samöbögö si lö duhu, si lö fanaha tödö, safaito, si lö mangomasiʼö si sökhi, 4 si manga mböli, sabeʼe högö, si fayawa, sangomasiʼö isö-isö dödöra moroi ba waʼomasira Lowalangi, 5 hulö soloʼö khö Lowalangi ira wamaigida ba no sangosilöʼögö faʼabölönia andrö. Erogö niha simane daʼö. 6 So ba gotaluara zaminiʼö yaʼira weʼamöi ba nomo-omo niha böʼö ba ladönisi dödö ndra alawe si lö tödö ba sebua horö niʼosawuyu gisö-isö dödö, 7 si lö mamöhöli wamahaʼö yaʼia, hizaʼi lö irai iʼokhögö waʼaboto ba dödö si tefaudu sanandrösa ba zindruhu.

8 Simane Yane faoma Yambere solawa Moze, simanö göi ira, lö laböhöli wolawa sindruhu. Sindruhu-ndruhu no tekiko wangera-ngerara. Itimbagö ira Lowalangi börö me lö mamati ira. 9 Hizaʼi, lö si tola lafalua saʼae, börö me no oroma waʼabodora ba niha fefu, simane salua khö zi darua andrö. 10 Tobali, odödögö woloʼö famahaʼögu, lala waʼaurigu, ohitö dödögu, famatigu, faʼebolo dödögu, faʼomasigu, ba faʼanau gölögu. 11 No göi aboto ba dödöu wamakao ba folohi salua khögu ba Gandriokhia, Ikoniu, hegöi ba Lisitera. Utaögö fefu ngawalö wamakao andrö ba Soʼaya zangefaʼö yaʼo moroi ba daʼö fefu. 12 Sindruhunia, dozi sedöna moloʼö Keriso ba wamosumange Lowalangi soroi ba dödö, hasambalö göna ira folohi. 13 Niha si lö sökhi, itugu monönö waʼalösökhi, lafaelungu niha böʼö ba nifaelungu göi ira.

14 Hizaʼi, böi böhöli wamalua si no öfahaʼö yaʼugö, si no öfaduhusi tödö me no lafatunö khöu, börö me öʼila haniha zamahaʼö yaʼugö. 15 Iʼotarai me ono sawuyu ndraʼugö, no aboto ba dödöu Mbuku Niʼamoniʼö, sameʼe khöu faʼatua-tua ba sangorifi börö wamati khö Keriso Yesu. 16 Fefu nösi Mbuku Niʼamoniʼö andrö ba eheha Lowalangi zameʼe ba dödö niha, ba moguna ia ba wamahaʼö, ba wangotuʼö, ba wangaʼazökhi, ba wamomaha ba waʼatulö dödö, 17 enaʼö moʼahonoa genoni Lowalangi ba tefaʼanö ba wamalua ngawalö halöwö si sökhi.